【龔成問答信箱】（Q22321-Q22340）

Q22321：

龔Sir，一直猶豫到底買唔買名錶，因為本人做銀行嘅，牌頭對予工作黎講都有一定影響，但名錶都起碼6位數字上落，加上有限量

所以有一定價值，而且可以為我工作帶黎額外嘅收入，算唔算資產一項？

龔成老師︰

如果隻錶本身限量，你相信有升值潛力，其實都可以投資。但由於金額都唔平，你真係資金較充裕，才好考慮。

至於工作方面，一個人穿著，的確會影響客人第一印象，這點我明白。

但相信客人最終選擇你，你的穿戴影響可能只佔好少比重，主要係睇你有無實力，唔好放錯重點。

------------------------------------------------

Q22322：

老師，上緊進階班，想問香港寬頻（1310) 是一隻適合投資的收息股嗎？問題如下：

1.派息比率超過100%,將盈利以外的資金，派發給股東，長遠是否有影響？

2.見企業的資產淨值出現負數及負債比率都十分高，但經營活動現金流量保持正數，仍值得投資作為收息，我廿幾歲？

謝謝

龔成老師︰

1) 香港寬頻（1310）派息比率>40%，股息率>4%，而派息政策穏定，和有一定派息紀錄，因此佢已可定性為收息股。

你見佢好多時派息比率高於100%，甚至近年去到1000%，唔係佢拿左盈利以外的資金去派發，而純粹係"折舊"拖低左個盈利所致。

實際上，佢都只係派緊當年賺的錢，你再仔細睇翻，佢經營現金流，就會明白。

2) 佢流動資產，係少於流動負債，一般情況我地會視為短期還款，可能會有較大壓力，甚至會出問題。

但我地都要考慮埋，企業本身狀況。以一間全年收入近100億企業，現金流都算強勁，短期17億缺口，唔算係好大問題。

當然，佢負債偏高，係會扣少少分，但依然係一隻有投資價值的收息股。

但香港寬頻（1310）就係用來收下息，唔會有太大增長力，以你2X歲年紀，此類股票唔係太適合你。

------------------------------------------------

Q22323：

老師你好，我想請教一下，聯易融9959@19和攜程9961@280有貨，這兩股，屢創新低

應繼續嗎？

龔成老師︰

我地唔好用個股價，去判斷一隻股票的持有價值。我地應該睇翻佢本身質素，有質素就算中短期有波動，你照持有都無問題。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力，有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

攜程集團（9961）有質素。

佢係全球領先的一站式旅行平台，可提供一套完整的旅行產品、服務及差異化的旅行內容。

用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。

產品及服務組合涵蓋經濟、高端、定制化及精品產品。集團經營一系列品牌，包括攜程(Ctrip)、去哪兒(Qunar)、Trip.com及天巡(Skyscanner)。

根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。

財務數據方面，收入都有不差的增長，但盈利就比較波動，有時會出現虧損，反映企業仍處於投資期。

這企業有獨特性，長遠有投資價值，但估值難，未能確定這刻的平貴度。只可以話，潛力度是有的，但預期股價都會波動，因此投資要控制注碼。這股宜長線，等企業成長。

這2間企業，都有長線投資價值。若你持貨不多，可以守。但持貨較多的話，建議你沽出部份，去平衡風險。

------------------------------------------------

Q22324：

龔sir，我買咗呢一隻股票10000股，0.411，之後見到佢出咗呢d，我唔係幾明白點操作，請問依家我係應該繼續持有還是沽售？

如果繼續持有的話，是否需要再投入資金？

龔成老師︰

COOL LINK-NEW(8491)主要於新加坡從事食品供應業務，見佢多年虧損，無明顯投資價值。

佢會進行20合1，和合併後二供一。這都係一些典型財技股的做法。

我對這類股票較有保留，建議你沽出會較好。

------------------------------------------------

Q22325：

上嵐用來投資收租如何？

龔成老師︰

屯門上嵐位置上，尚算可以。

但我一直都唔係好建議讀者，買1手新盤，因為好多時都會有溢價，變相買貴左，影響回報。

而且，佢單位主要係26X-29X呎，唔算話好大。勉強算可以容下一個家庭，投資價值不算高。

------------------------------------------------

Q22326：

Sir，我份工作做咗10年，但強積金得28個，係咪太少？

請問有冇咩好建議呢？我18歲開始返工，今年28。

龔成老師︰

多與少，唔係最重點，因為每個人生活水平都唔同。最重要係你這筆資金，是否用得其所。

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。只要按你的年齡，長線配置就得。我自踏入社會工作後，一直都是100%恆指，無變過。

除了強積金，你要繼續保持你月供習慣，去努力增值和增力投資相關知識，相信長線你財富一定會有理想增長。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

------------------------------------------------

Q22327：

Hi 龔成老師，很久沒有聯絡了。我現在有個煩惱，因為在＄2.54買入了8083， 現在跌了50％， 自己之前看到業績每年增長不錯，可是高位入了。

看不懂它私有化，分拆科技上市的新聞對業績有什麼影響，8083的投入金額佔整體倉位大約5％，現在虧損一半，是否應該守下去呢? 定忍痛止損。

希望你能夠抽空回覆，謝謝

我另外也持有5％的2013， ＄17買的

现在持有40000股8083

龔成老師︰

簡單講，中國有贊（8083）首先佢會分派有贊科技，然後以主板模式上市，原有的就是以私有化模式，退市。

佢以每1股的8083，換取約0.05股新派的有贊科技，另外仲會加少少現金，約每股$0.13。

中國有贊（8083）業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高。你現時持股佔組合，唔算好多，可以守，但你要明白佢有一定風險。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但此股都係較大不確定性，但你持股唔算多，可以守住先，再觀察。

------------------------------------------------

Q22328：

老師，請教你，我現金有三成，其他股票。唔需要應急錢。港交所佔資產組合4%，但已嫌了75%，那應該放嗎？感謝解答

龔成老師︰

港交所(0388)有長線投資價值，而且佢組你組合好少，我建議長線持有較好。

但如果你係個好保守架投資者，你可以用"升一倍，沽一半"架策略，去先收入成本，都係可以。

------------------------------------------------

Q22329：

Hello 龔sir。有時情想了解一下，我現在手上有 03988 中國銀行，共18000股，均價為 3.0944 。

仲有現金為約5萬左右，請問現時部署，應該先每月持續購入？還是先截倉，尋找其他更有潛力的股票？

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

因此，我地先要睇翻，到底中行(3988)適唔適合你年紀。中行(3988)有質素，但只是收息股，如果你係中年至退休人士，這股都可以。若你係偏年青，由於佢增長力不高，就不太適宜持有太多。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，你唔應該再加注在中行(3988)，反而要慢慢加入其他合適股票，去令個組合風險更分散。

以下是一些不同類型優質股，你可以因應自已年紀，去作出配置。

潛力股︰中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

------------------------------------------------

Q22330：

龔老師，你好，我有睇開你嘅fb同埋有睇你寫嘅書，我今年24歲，收入大約～15000多啲，家用$5000，草$7000，目前持有以下股票︰

小米（$26，2200股）
中國移動（$53.125，4000股）
中芯國際（$28.15，5000股）
碧桂園（$8.66，10000股）
金蝶國際（$27.1 ，1000股）

仲有少量美股
Coinbase ($350 ,2股）
Futu ($188.5 ,20股）
TSM ($132.45, 2股）

我從上年4月開始投資，但都係一名新手，想請問我港股既投資組合有啲咩需要注意，因為我本身好睇好芯片股，覺得芯片既需求不斷增加，

近期見到港股差唔多每日都跌，波動較大，以及初時玩美股，咁岩都係買左高位 我依家仲等緊返家鄉。

另外想問如果報讀你既課程要幾多錢？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你不論持有那個市場的股票，持有與否，最重要都係睇企業質素。中短期波動係正常事，再優質股票，都有出現。只要好優質股，你一直持有就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你24歲計，應先做好財富增值。中國移動(0941)係收息股，增長力唔會明顯，不建議你持有太多。你最好沽部份，換至其他有增長力股票。

碧桂園(2007)，業務都算不差，但負債高，風險略高，雖然都可持有，但不宜持有太多。

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

除左以上3隻，想你特別留意之外。其他持股，都係有質素，你長線持有就可以。

另外，若你睇好芯片業發展，中芯國際（0981）和TSM都係合適選擇。質素上，TSM會較高。

而中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄，即$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，你經驗較淺，可以先小注，大約佔組合3成左右。到你有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22331：

我是一個45歲女士有一個仔11歲。我早前買咗隻708 $69買一直好似撞鬼咁都唔放過直到$13放咗放咗

現有十萬現金想問老師買什麼股票可以有得增值

龔成老師︰

其實恒大汽車（0708）都唔算全無投資價值，只係風險偏高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

當佢一有較不利消息，好易就會好似現在咁，出現大跌。這類股票唔係不能投資，但只能好小注，去平衡佢個不確定性風險。

以你45歲，可以選擇一些「平穩增值股」+「潛力股」作投資目標，並以「平穩增值股」作為主力。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有10萬資金可以先投入一半，以分注形式入貨。餘下一半就等大市出現一定程度的下跌，才大力度掃貨，然後長線投資。

------------------------------------------------

Q22332：

龔成老師你好，最近睇咗你幾本書。本人33歲 ，已婚有兩個小朋友 同先生收入加埋有四萬。家庭開支都需要二萬五

之前同屋企人住，打算嚟緊下年自己租樓住，租金大約一萬蚊

而家手持280-300萬現金，睇過而家嘅樓價 如果喺新界區買入一個400至500尺嘅單位要600萬，如果供樓嘅話就會 $16000-$18000，如果咁樣供樓嘅話就會儲唔到錢

我希望你用呢300萬，4-5年後 希望達至500萬有冇可能？

買入600-700萬樓，想有500呎，到時俾首期 400萬再做按掲200幾萬，無咁吃力。預留100萬現金，for小朋友讀野或不時之需。

請問老師

1）由於樓價不斷上升 有機會係呢四至五年期間投資股票 未必追得切樓價既上升，定係應該而家及早買樓 ？

買個500萬以下單位算，但因為有兩個小朋友 ，如果俾晒首期，就無現金流。

2）希望回報大點，如組合以下股票會增較理想

9988
1810
1177
另外留80 萬買入電燈作收息

老師，應該買入邊啲增長較快？同時亦會月供2800，或一些潛力股

3） 如果到3-4年後，現金少過200 萬，都仍然希望買入一個細單位作收租。因為想買樓 所以股票想5年後取反出後 或留20%長線投資。

謝謝老師百忙抽空

龔成老師︰

1) 其實投資任何項目，都係會有不確定性，無人知5年後，優質股增幅會否跑嬴樓市。但從投資角度，現時租金回報率不高，優質股值博率會較好。

另外，我地投資會講求平衡性，如果你買樓後就資金盡用，不能投資其他資產(如優質股)。這樣你財富組合，就會太集中係物業類，唔係咁理想。

因此，你先用優質股去增值，5年後再去置業，相信會係較穏當的做法。

2) 這5年，你可以用一些有質素的增長股，去做增值。你所講的3隻股票，都係適合。但佢地都係潛力股，風險會較高。如果全數只投資這類股票，會令你組合的不確定性風險太大。

建議你用「平穏增長股」 + 「潛力股」作組合，去創造一個增值平台。港燈(2638)只係收息股，增長力唔高，唔建議你投資。

現在你每月先用5成儲蓄做月供。其餘先儲起，用一邊月供一邊儲蓄的策略。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那300萬現金(扣除等同半年開支的應急錢後)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

3) 我假設投資回報有10%（連股息再投資），你每月投資$5000 + 280萬現金，5年後大約會增值至490萬，故這樣安排相信很大機會達至你的財務目標。

但若果到時金額，跟你目標物業，都尚有一定距離。你可以先買入一個細單位，再用餘下股票增值，之後才細屋換大屋。

但緊記，買樓同時要留有一定優質股，去保持增值，以維持財富組合平衡性，這才算得上係理想。

最後要提醒翻，如果你的投資股票能力不強，成續不好，投資知識不高，你有可能現時買樓，好過你將資金投資股票。

因為上述的策略，建基於你能將股票增值，而增長是大過物業增長的。但如果你過往投資經常虧損，投資股票只會得不償失，那麼，將資金直接投資物業，可能更好。

------------------------------------------------

Q22333：

老師，我是去年入股市開始投資的，現在處於虧損，我怕自己的情緒會影響判斷，所以很希望老師能夠幫助解答我的問題，讓我可以逼自己理性決定。

1.成實外教育。前期教育新規出台，現時股價已下跌一半，不知道是不是該股的基本面已經改變，還應該繼續保留該股嗎？

2.聯易融。因為騰訊的加持，上市的時候其實就有抽，後面下跌的時候毫不猶豫就買了，知直到今天停牌，讓我開始反省自己思維的簡單。想請教老師如何看待這隻?

另外也想問問老師對新股的態度是如何的?會選擇抽新股嗎還是寧願等有些數據做過分析後再買?

謝謝！祝生活愉快

龔成老師︰

1) 成實外教育（1565）主要透過結構性合約，於中國從事民辦教育服務。佢係四川經營十多所學校，提供學前教育至十二年級及高等教育服務。

佢的學校除提供必修英語課程外，也為具興趣的學生提供第二外語班，包括德語、法語及日語等。

睇翻過往的財務數據，其實不差的，業務基本上穩定，盈利都不算差，不過增長力就唔算強。

但近年中央對教育板塊，推出不少政策，都係不利於民辦教育發展。雖然暫時影響未算好大，但不確定性風險增加唔少。

若你持貨佔組合比重不多，可以守。但若佔較多，建議沽出部份，去平衡風險。

2) 有大企業加持，可以係加分位，但絕對唔可以因為這個單一因素，但決定這企業是否值得投資。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力係有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

至於停牌，係屬於短暫性質，純粹係有重要內幕消息要公布。

其實我一直都唔係好建議抽新股，因為好多時新股定價都係較貴。而且，提供的數據參考性都較弱，好難做個較準估值。

好多時佢真正表現，要過1,2年先可以睇到，故有一定風險。

當然，唔係話新股全部唔好抽。但由於有一定不確定性，同埋多數唔平。因此，較理想做法係最多先小注，再觀察。

------------------------------------------------

Q22334：

阿sir 嗰陣時你每月存1萬咁你月供股幾多錢？

龔成老師：

我無做月供股票的，月供股票是適合初階者，如果有企業估值的能力，就不一定要月供。

我當時的策略，是每月儲$1萬，然後儲到一定數量後，以及當該股處便宜價，或合理區較下部，就會出手。

------------------------------------------------

Q22335：

老師，我依家儲多啲本 想問一個白癡問題 「分注」嘅定義 係每月自訂月供amount 定 一手一手滿滿入貨？

龔成老師：

分注有好多方法的，原理即是分開去買入，我地投資，先要定計劃，例如你某隻股，你想佔股票組合比例多少，如$10萬。

分注就是將$10萬，分開多次去入，例如每次$2萬，分5次。或以月供，每月$3000進行，長期進行，直至到你適合的比例。

------------------------------------------------

Q22336：

中國移動呢隻點？如果而家呢個價買唔買得過？

龔成老師︰

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

你可視佢為收息股，增長力不算強，這股有長線投資價值。現價合理。

若你係中年至退休人士，或者你投資取態好保守，這股係可以考慮。相反，你係偏年青的話，由於佢增長力不高，作為投資目標，就唔係咁適合。

------------------------------------------------

Q22337：

龔成老師:本人現持有以下股票，因有些已經跌了很多，也不太肯定這些企業現時是否還有發展的空間，希望龔Sir可以幫我分析一下究竟我應該止蝕，繼續持有還是再增持，謝謝。

136恆騰網絡8000股 平均買入價12.42
520呷哺呷哺1000股 買入價21.86
2158醫渡科技100股 買入價26.3

由我認識股票開始就一直follow龔成老師你，我其實很認同龔Sir你講的買股票應該係睇企業的質素，睇佢長遠發展潛力。但自從我罹癌之後，

因沒有工作收入，只有每月有三千幾政府補貼，所以希望由股票短炒賺一兩千補貼生活開支，但就一時衝動就買左以上股票，希望龔Sir可以賜教，

我呢種情況其實係咪唔應該買股票，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，你比時間企業去成長，而唔係短期炒賣，去賺差價。

你唔好預投資增值，可以解決你短期財務問題。你現時持有投票，都有長線投資價值，但佢地風險和波動性都較高，不宜持有太多。

以你現時情況，應優先留有一定較多現金，去支援你日常生活和醫療開支。

若佢地佔你資產比重較高，你可以沽出部份去套現一些現金，以備不時之需。若只係佔好少部份，你照持有都可以，但預係長線持有，才會有較理想回報。

恆騰網絡（0136）及醫渡科技（2158）都是較高風險的股，反映你在選股出問題，如果持貨多，宜減。

至於呷哺呷哺（0520），其實有質素的，但之前貴，現時才合理翻D，這股都有得守的。

------------------------------------------------

Q22338：

老師你好，我受到你既影響就已經成功買樓，不過因為工作關係就冇得租出去，咁其實層樓係咪都仲係支出而不是財富增值？

同埋依家要賣大部分股票去裝修，唔知吉利 (@16入) 同比亞迪 係咪都應該依家賣？有啲其實低過買入價 (e.g 領展，港鐵) 係咪都賣咗先？

(諗緊埋咗蝕緊嘅先定係吉利或者比亞迪呢啲潛力嘅先）

補充返，我27歲，買咗樓後計哂所有支出(including fund investment) 有~3000 淨。。。所以要build 返現有股票portfolio 要啲時間

吉利同比亞迪都各只有一手

龔成老師︰

雖然你買樓後，要供樓，好似只係得支出，無收入。但我地做財富增值，唔好用現金角度去諗一陣事，要用資產角度去做出發點。

你每月供樓還款，當中一部份係還本金，其實就係幫你累積緊資產。

只要你個物業係有質素，長遠有升值潛力，就算無租金收入(即係現金流)，都一樣符合財富增值的目的。

當然，你物業有利息支出，這都是一個負現金流狀態，如果可以的話，將物業出租始終是最好的做法。

至於沽邊隻股票先，你可以睇先睇質素，再睇平貴，去作決定。若這些股票都係優質，你就睇下邊隻現價較貴，現價值博率較低，就可以優先沽出。

現時比亞迪(1211)和吉利(0175)，相對領展(0823)、港鐵(0066)這類舊經濟股為貴，值博率會較低，可以優先沽出。

在買完樓之後，財富組合會偏向左物業類個邊。因此，你將來再有新資金，要優先投入優質股類，令財富組合回復平衡。

------------------------------------------------

Q22339：

1373可以月供嗎？

有條件做下一隻1830？

注碼可以15%？

龔成老師︰

國際家居零售（1373）係一間於香港、新加坡、馬來西亞西部、中國內地及澳門均擁有業務的家品零售連鎖商，提供超過2萬款家品。

集團的店舖及特許店以「日本城」等品牌經營。

過往財務數據不差，生意盈利保持增長，有長線投資的價值。現價合理區中上部，仍是可投資的。

但佢業務和產品性質，跟完美醫療（1830）不同，較難出現同樣突破性增長。

而且，你睇翻這住多年，佢派息比率都偏高，可見管理層發展野心都唔大，你預此股長線係平穏增長型。此股都有質素，佔組合10%左右會較理想。

------------------------------------------------

Q22340：

Sir，如果目標是五年後有平穩的增長力，每月買入三至四手3067，持續進行五年，是否可行？

龔成老師︰

安碩恒生科技(3067)雖然係一籃子優質科技股，有別於投資單一企業，會較具分散風險能力。

但由於佢始終只係集中在科技股，難免會造成行業過度集中的風險。

我一般會建議讀者，個別企業和行業，不要佔組合15%和30%以上，銀行業更加不要高於組合20%，以避免出現過度集中性風險問題。

而且，3067本身都有一定波動性，如果你目標係平穏增長，盈富(2800)會係較合適選股。

由於你都係偏年青，未到30歲。你可以考慮用5成盈富(2800) + 5成安碩恒生科技(3067)作為組合，這個配置的增長潛力和風險度，相信會較適合你年紀。

另外，想提多你一件事。現時大市只在合理區，資金唔好盡用。最好留有部份，等大跌市出現時，可以用來掃平貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22221-22240）

Q22221：

你好呀老師，我最近上左車，手頭現金唔夠要放手上既股票，現時佔我自己個組合最大部分就係比亞迪。

我想請問你會建議我放部分比亞迪嗎？如果放應該咩價位先放？感謝

龔成老師：

如果你有資金需要，就要賣股票，不過決定賣那一隻，並不是睇那一隻賺得多。

你要分析「之後的組合情況」，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你這刻，要假設自己賣出那些股票後，「之後的組合」會變成怎樣，這個組合是否優質，是否適合你，是否平衡。

------------------------------------------------

Q22222：

龔sir，你好呀sir 剛剛學習投資 見到有 月供股票 呢樣野。現時大約有$6000 流動現金可作投資

如果想以增長率 係未應該從 2800盈富基金 出手會比較好嗎？ 還是有其他月供股票介紹?

龔sir 我30幾歲 暫時單身 搵緊大約2萬正職收入，兼職都有1萬。而女朋友準備置業 拎左我係投資保險公司基金 大約50萬出黎幫佢

咁本身投資左 兩期ibond ，保險公司基金 大約用10000投資係裏面，

而且買左幾隻股票 （6993）$13.6 入左500股 ，（8500）$5.5 入左4000股，（8500) $2.45 入左2000股，（857）$3.64 入左200股

我諗住自己都想買層樓要黎收租，又想買車。大約有5-6千 可以拎出黎投資，而家應該方向如何?

謝謝龔sir

謝謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

你現時3X歲，應以增值為主。現有持股都算有質素，但中海油(0857)係商品類股，質素只算中等。

而天泓文創（8500）質素再弱多少少，整體只算一般，2隻股票長線都不宜持有太多。

另外，IBOND主要係創造平穏現金流，無增長力，建議你沽出，贖回現金。

而保險基金，你可以比較翻，佢是否優於大市回報，去決定是否值得持有。

未來時間，你可以用「平穏增長股」 + 「潛力股」的組合，去累積財富，以達成你的目標。

若果你現時無投資知識和經驗，對企業估值，點去定平貴未必會太了解。我都會建議，先利用月供模式去做增值。因為可以減低買貴貨風險，對你而言會較理想。

現在你每月可先用5成儲蓄做月供。其餘先儲起，用一邊月供一邊儲蓄的策略。

如果你係新手，未必對以上股票有認識，可以先指數基錢做目標。至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。


------------------------------------------------

Q22223：

你好, 龔sir! 有事想請教下你, 求你可以解答一下, 謝謝。

本人33歲, 月入2萬6, 股息平均每月3000,有層剛收樓未裝修的開放式居屋（折後150萬, 現按揭貸款約130萬）。為咗控制自己物慾,

一出糧我就將大部分錢投資在股票裡, 所以手上現金只應付當月的開支。

現持有：
2638港燈-
82000股 (扣除股息後平均價7.28元）

405越秀房託
50000股（扣除股息後平均價4.31元）

在未來1年內想用40萬裝修層樓, 所以現在要減持股票套現。想問點部署好？減持邊隻好？

龔Sir, 我知道我的投資組合有點保守, 我想聽聽你的意見, 謝謝你。

龔成老師︰

其實，你都明白到現時組合，係不太適合你年紀。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你係應先集中用有增長力股票，去做增值，而唔係去買收息股，去純收息。

若你一年用，係要動用40萬去做裝修，你現時就要開始分注沽出持股。你現時2隻收息股，都係有質素，但增長力就麻麻。你可以按比例咁，慢慢沽出部份持股。

目的係套現幫你支付裝修費外﹐同時都要將部份，換成其他有增長力的股票。

未來時間，我建議你用「平穏增長股」 + 「潛力股」作組合，去創造一個增值平台。你可以將這2隻股票的一部份，換成以下增長股。

另外，你可以用每月空出來資金，去進一步堆砌這個增長組合。每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22224：

早晨 龔sir，好耐之前聽你講買咗1211，前嗰排賺咗少少，多謝

用咗1211賺咗嘅錢買咗啲股票（1177、3319），同時亦月供緊幾隻股票（2800@$2000、1177@$2000、270@$2000）。最近恒指持續下跌，唔知你點睇1177、270、3319？？？謝謝

龔成老師︰

你建立一個「長期、優質、平衡的組合」就得。

要記住一個重要概念，我地持有一隻股票與否，關鍵位是企業質素、前景，不要被買入價或者大市升跌所影響。

買入價和大市走向，只是一個心理因素，如果企業核心因素未被影響，我地係唔需要理會。

你所持有股票，和月供組合配置，都係有質素和適合你年紀。

但緊記優質股最理想的增值方法，係長線持有。唔好賺少少就沽貨，咁會浪費左你長線增值機會。

------------------------------------------------

Q22225：

龔成老師，本人46歲，有1個小朋友，我和先生從來對投資都0興趣, 我有份文職, 自上年疫情, 公司生意差了, 便多了時間,

跟同事開始投資股票, 真是信同事講而買少少, 升少少就放, 最重要唔想虧錢, 當然之後不能咁幸運, 現買下多隻股份, 都虧錢中。

無意間係網上見到你對股票投資的答問, 覺得你的投資概念好好, 所以現在想重新整理股票組合，令財富可以穩健中増加, 想請教你, 那些應該保留, 減持或放棄？

現已投放30萬持有下列股份。

1530本來好想放, 但自己無把握好時機, 升上去時未放之後就一直跌到現在, 自己又唔想虧錢, 之前你有講過三生都有質素, 請問我可以等, 還是應該止蝕放棄, 轉投其他股份?

請提議。

今個7月開始月供共$ 5000以下股份
2800盈富基金 $3000
0066港鐵公司 $2000

現持有股份
0002中電控股 71 @1000
0270粵海投資 11.24 @4000
0388香港交易所 452 @100
9988阿里巴巴 277 @100

0941中國移動 49.75 @500
1530三生製藥 10.8 @4000
7299ＦＬ二南方黃金 7.95 @5000
7568ＦＩ二南方納指 1.54 @10000

感謝你的意見。

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，才會有最理想效果。

你要明白，就算再優質股票，中短期都會係有波動。只要佢長線質素不變，你一直持有就可以。

其實睇翻你持股，大致上都無問題。

三生製藥（1530）都有質素的，不過近年增長力有所減弱，但公司不是無錢賺的。不過，由於市場之前估值較高，現時預期佢盈利轉弱，因些股價中短期較弱。

這股都有投資價值的，你現貨可持有。不過，你預中短期一定會較弱，你預要較長線持有，才會有明顯回報。

較大問題係ＦＩ二南方納指(7568)和ＦＬ二南方黃金（7299）這2隻ETF。

ＦＬ二南方黃金（7299）當中有槓杆成份，要留意風險。升的時候你會賺多左，但跌時候你損失同樣會係雙倍。

若你係想追蹤黃金，又唔想買現貨，建議你用無槓杆成份的SPDR黃金ETF(2840)會較穏當。

ＦＩ二南方納指(7568)除了有槓杆成份的風險外，佢係係反向追蹤納指100指數每日表現。如果納指跌1%，你就會獲利2%(另扣管理費)。

但若然納指向上，你就會虧損。我對這類產品有保留，納指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

而月供方面，現時配置和組合，都係合適。

現時大市只在合理區，每月儲蓄唔好盡用。要留有部份，等大跌市機會出現時，可以用來大手掃貨。

------------------------------------------------

Q22226：

1.每注相隔大約10-15%係指升/跌都可以再入市？定係每跌多10-15%先再加貨？定係將25萬拎埋黎做月供（每月1萬）會更好

2.老師，請問0388 港交所係平穩增值定係潛力股？

3.老師，平穩增值股每手入場費都較高，買一手平穩增值 = 好幾手潛力股

按老師所講：同一行業不能高過30%，同一企業不能高過15%

但由於資金（25萬）有限，平穩增值股只可以揀幾隻，每隻都只係入到1-2手；而潛力股老師話現價可以先入一注，每注相隔大約10-15%。

由於平穩增值股每手入場費較高，以致一開始入手時成個比例會偏向平穩增值股，甚至同一企業的比例都會高於15%（甚至去到30%）咁係咪都可以接受？

龔成老師︰

1) 我意思是指，每股股票的股價計。例如，你港鐵(0066)$44入左首注，下一注就預$37.5-40左右才入。

當然，你將這25萬，平均拆落去5隻股票(每隻每月$2000)，都係可以。

2) 港交所(0388)會較偏向係潛力股

3) 其實開始時，組合金額不高，會較難做到我這個標準。所以，開始時有所偏離，都係可以接受。

但長線計，你要用這個標準作為參考，去令組合不會有過度集中問題。

另外，唔好覺得買入1手成本高，就係貴。平貴定義，應該係參考企業本身質素、行業發展等，去估算出來。

雖然平穏增長股好多1手成本唔少，但以估值角度，反而大部份平穏增長股，都尚在合理水平。

反而潛力股，現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

當然，如果你係用月供儲貨的話，你之前提過的股票，現價已經可以開始。

------------------------------------------------

Q22227：

5 1000股 @$57.7
1658 6000股@$5.73
3067 500股@$18.8
1883 1000股@$2.58

3988 1000股@$2.95
1398 1000股@$3.07
1177 2000股@$7.37

想請問成sir，我持有以上股是否收息股為多？我組合是否比較保守？我想增加一些較有潛力增長既股有咩見議？

另外因銀行股佔多數，我想放0005轉其他非銀行股，但要回到$57相當困難，你會否見議止蝕一部分轉其他高增值既股票？謝謝你

龔成老師︰

我地設計組合時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時銀行股，明顯係太多。你要沽出部份，轉至其他行業股票。匯控(0005)佢只係收息股，你唔好預佢有太大增長力，要上翻$57應該係有機會，但唔會係短期的事。

如果你唔想沽出現有持股，其實都可以。但你新資金，要先避開銀行業，去將個比重慢慢修正翻好。

至於收息股是否過多，要睇翻你年紀和風險承受能力。若你係年青人，收息股不宜太多。如果你較中年，可以升至2-3成。到你將近退休，就要至7成以上。

所以，你可以睇翻自己年紀和風險取態，去調整長線收息股比例。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22228：

老師，先多謝你回覆，我會溫翻課堂筆記，我仲有以下問題。

1. 暫時來講，令我放心，相對風險較少的潛力股是1448，同埋1177，以月供策略的話

2. 1297潛力度有1448穩定嗎？

3. 我研究緊1909，ROE達40%，5年平均EPS:0.336，5年取3年PE:12-20，合理價是4.032-6.72。

紿終業務是網上遊戲設計，風險比較大，現價3.08，雖然仍然便，但因風險大，宜月供。

相反327，5年平均EPS: 0.55X1.1=0.605
5年取3年PE:7-10
合理價: 4.235-6.05。

327的業務是做無接觸支付，業務相比1909穩定。但現價是8.93，價值偏貴。不宜大注，只能月供。

4. 345今日受到memo 事件影響令股價下跌一成，從基本因素上，是沒有受影響的，所以大跌理應是買入好機會，但維他奶高增長時期已過，

加上PE仍接近50，仍然好貴，所以不建議買入或最多只能月供，如果跌到20元才開始可以用分段增持？Memo事只是影響短期股價，對維他奶本質完全不受影響

5. 想問你企業評估表，收益和盈利有什麼分別？

6. 利息成本從哪兒看到？

龔成老師︰

1) 以月供策略，中生(1177)和福壽園(1448)有係一個唔錯選擇，可長線。

但始終佢地都係潛力股，就算再高質，都會有一定波動性，你要明白這點。

2) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。

現價其實有投資價值，但就唔建議太過大注。整體質素上，會係福壽園(1448)較好。

3) 火岩控股（1909）有質素的。佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。第二，股價上落大。

因此，你係估值時要較保守，你預現價合理區上部，投資值博率都有，但未算高。

而百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。但此股波動性風險，相對1909無咁高，估值可以上調少少，現價算合理區中上部。

其實不宜長線月供，只係適合一些好優質股票。如果要投資此2隻股票，只宜直接入貨，同時要控制注碼。

4) 維他奶(0345)短期股價一定不利，但長遠，我相信影響又未算核心性，不過好睇事情的發展，要睇管理層，以及事件發酵程度，仍有未知數，只可以話短期股價上落都大。

但此股質素上係有，佢過往一直略貴，但由於高質素，反而我地可以用月供去儲貨。

不過現價就唔平，大約為合理區頂至略貴，小注或月供可以，但回多1成投資會更有投資值博率。這股可長線的。

除非事件導致一些較長線的負面影響，否則此股值得長線持有。

5) 「收益」等同營業額，假設你係開糖水店，你賣一碗糖水係$10，個「收益」就係$10。

「盈利」就係扣除你當中一切成本(如人工、食物成本、舖租、電費等等)的淨賺金額。

6) 你可以在年報損益表中的「融資費用 / 融資成本」找到。

------------------------------------------------

Q22229：

老師，我今年30歲，現時持有以下股票:

6186 @20.35 4000股
914 @48.1 500股
241 @20.19 2000股
700 @600 200股
9618 @286.49 200股

270 @12.02 8000股
3067 @16.56 1400股
1448 @7.56 4000股
1810 @28.15 1000股
3331 @23.9 1000股

823 @60 500股
1398 @4.4 10000股

想請教老師，對於此組合，可否給予意見？是否可以守？ 有部份股票，如6186、241 帳面上已蝕20%，是否應減持？

龔成老師︰

你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持有股票，都係有質素，你照長線持有就可以。

中國飛鶴(6186)和阿里健康（0241）都係有質素，可長線持有。但佢地波動性略高，建議不要太大注。

另外，你現時30歲，應以增長為主。工行(1398)只係收息股，增長力欠奉，以你年紀不宜持有太多。

------------------------------------------------

Q22230：

我已經買下你幾本好書，但真的沒有時間開始閱讀，建議你可否把你的好書分level, 由BB初哥到高手呢?

還有我好愛港交所，但是是否好貴？幾時可以買一手入場好？建議下？還有什麼好抵的股票呢？

謝謝你龔sir

我真的覺得你幫我開發我50歲從逆境中走出來，充心多謝你，因為過往23年也一直都沒有人問津，一直蝕錢尤其股票市場上，做生意又差，又唔知怎樣開發公司生意，好慘！

雖然而家仍是逆境中，但公司每月都叫有收入及中小企貸款協助了我們過到難關，有小小希望

龔成老師︰

你可以先睇我架《80後百萬富翁》、《財務自由行》和《股票勝經》，較適合初學者。

之後，你可以再睇埋《選股勝經》和《年報勝經》。這2本會較仔細少少，講解企業估值方法和知識。最後，你才睇餘下幾本。

港交所(0388)由於有好高質素，故經常都係偏貴。現價算合理區頂至略貴，你可以考慮用月供儲貨，或現價小小注，你預回翻10-20%更有投資值博率。

我的答問，能幫到你就好。未來時間，就要繼續努力，讓自己可以走更遠。加油!

------------------------------------------------

Q22231：

老師你好，我其實一路都有密密留意你的Facebook, 特別是當股票跌的時候你便會出來穩定大家，我也是其中一受益人。

我今年將44歲，從事製衣業，估計去到年尾公司都要執，生意不好。

我有以下投資組合，請幫忙看看有否需要重整一下

5 - 423 股 - n 年前從153月供,現已停
823 - 500 - @92
1830 - 4000 - @8.8
1211 - 500 - @183.4
0003 - 約15000 - 月供
3690 - 100 - @283
669 - 500 - @101.9
9988 - 100 - @302

另外想問問2013 是否合適？

其實我知道老師有教導學生計股價的合理區位，但現實很多時股價都高過合理區位，那應該堅等至合理區位才入，還是怎樣去衡量那個位入呢？

龔成老師︰

你現有持股，都係有質素，你可以長線持有。

但我發現你有2個較大問題，第一，你好多股票的買入價，都係偏高。相信你買貨，都幾受市場氣氛所影響。

我建議你在未能定平貴前，最好用分注或者月供模式去儲貨，以減低入貴貨的風險。

第二，你而家太偏重左係潛力股，佢地雖然有增長潛力，同時風險都較高，不宜持有過多。

以你44歲計，潛力股可佔約3-4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

但現貨不用沽出，用新資金去令佢平衡翻，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

至於買貨策略方面，我地係貴架水平，係唔會買貨，因為會影響長線回報。

但有部份優質股，好多時都只會停留係合理區中間，甚至頂位。係而個時候，我地就可以會策略性地入少少，或者用月供儲貨，以免錯失儲貨機會。

我唔係所有股票，都值得這樣做，要視乎股票質素和手上資金，去做一個完整的配置計劃。

------------------------------------------------

Q22232：

老師你好，本人今年30歲，每月收入36000，基本開支23000，餘下13000應該如何配置？

目標五年後達致140萬，現在現金有20萬，現持有股票如下：

175 1000股@24.75
9988 200股@209
788 32000股@1.17
2388 1000股@28.3
2845 200股@133
1833 300股@94

龔成老師：

其實好睇你的年齡、風險承受程度、投資目標，而我地一般進行人生財富累積，會用「先增值，後現金流」的方法。

你30歲，是財富增長的黃金期，可以著重「增值」，上述的股票都適合你的，你都可以長線投資，這些都是潛力股或平穩增長股。

現時現金$20萬，你可以留$10萬，餘下$10萬就投資，另外，你每月儲到$13000，可以動用$6000去月供（如果不想月供，就儲起先，久不久買入優質股都得）。

你可以考慮以下比例。

平穩增長股：潛力股
7：3
（如果你投資實力較強，可增加潛力股比例）

平穩增長股：指數基金。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22233：

龔Sir, 想問下你投資意見，我同老公都36歲，兩個加埋現金有110萬，我地本身租屋， 最近諗緊買唔買樓， 老公收入有7萬多，可買8百萬的樓，需要比1.1百首期。

我們有機會4年後移民去其他地方， 但我們找到有些盤睇好有升值能力， 例如近紅磡火車站的屋（有沙中線通車）或康城的樓。

但我記得睇過窮爸爸富爸爸寫買樓不是資產，而是負債。 如果有一間樓其實又要付厘印，mip, 管理費等等，個度去一舊錢。4年後走，我唔sure 我買的樓有呢個爆升能力。。

另一個方案就是唔買樓，用1.1萬投資在股票或其他野， 有的是流動性， 但同時一輸股票又係乜都冇。。

請問你點睇？

謝謝你閱讀及分享

龔成老師︰

其實買樓，表面上係開支，但只要係有質素的物業，我地都會視之為資產。因為你每月供樓，除了支付利息外，有一部份資金係還本金，等同儲資產一樣。

但由於係香港，買樓係一個大動作，當中買賣成本都唔細。而且，現時以租金回報率計，樓市投資價值，不及優質股高。

如果你係肯定4年後會離開香港的話，我比較建議投資在優質股，會較好。

當然，股市都會有風險，但只要我地認真選股，再策略性地投資。其實當中風險，已經會少左好多。

以你現時36歲去計，你可以投資「平穏增長股」和「潛力股」。

若你每月有一定閒錢，可以做埋月供股票，去加快財富增值。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有110萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你準備移民前1年﹐就要開始慢慢沽出持股。唔好等到走前一刻，才一次過沽貨，以減低價格波動，所造成之風險。

------------------------------------------------

Q22234：

老師，港交所我持4手，大約$350（2手），$480（2手），如果到$500，沽2手賺差價，再搵d錢去投資其他優質股，這樣做合理嗎？

另外想問，兢價時段，散戶可以買賣，對嗎？怎樣操作？

7月2日我見669 兢價時段大約$145，當時想沽，但又唔識點做。開市後，價位得大約$135，就無沽。

但覺得疑惑，兢價時段同開市價位可以差咁多?！

因為我手持388同669，佔我全部投資資金的7成（約有70萬）。所以想趁個市未大跌就沽一些先，但唔知咩價位沽好

龔成老師︰

港交所(0388)現時係升左唔少，但又未到好貴，我建議你維持持有，咁會較好。你想投資其他優質股，你可以用新資金去做。

競價時段，散戶可以買賣，就好似平時咁網上落盤。你會有分"競價盤"和"競價限價盤"，後者係指定價格範圍。

而前者，係無指定價格，所以有機會大幅偏離你心目中預期價位，你要明白這個風險。

競價時段，有時開價會偏離得好緊要，所以我一般唔會建議讀者用。最多只可用在一些大價股，如果係細價股，個波動會好大，太危險。

另外，記住我地投資唔好估走勢，無人知個市係唔係就快大跌。有機會係再向上升，你就升去增值機會。

現時港交所(0388)和創科（0669）係貴，但未到好貴。用平貴去衡量的話，其實未有減持需要。

但由於佢佔你組合比重太高，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

就算佢地現時是平定貴，你都必需減持，去平衡風險。但唔洗一次過沽到要求比重，你可以分段咁慢慢換碼。

同時，再用你新資金，去一齊慢慢修正個組合比重，咁就可以。

------------------------------------------------

Q22235：

Hi 龔成老師，我諗住今年年尾或者下年年頭買外地樓收租，要賣出部分股票套現。

我而家持有以下股票:
恆地 x 2手
港鐵 x 3手
盈富基金(月供5千) x 3156股
阿里巴巴 x 2手
QQQ x 20股
ARKK x 20股

請問你覺得我應該賣出邊類型股票套現？以上嘅股票得阿里巴巴係蝕錢。

同埋我而家每月用5千蚊供緊盈富基金，我應唔應該買樓前停供？

多謝老師付出寶貴嘅時間解答，你本80後千萬富翁好好睇呀，令我好有動力去成為有錢人。

龔成老師︰

多謝你支持我本新書!

首先，你唔好用佢現時帳面賺蝕，去判斷一隻股票。就算再優質股票，中短期都會有波動，係正常事。

你現時股票，都係有質素和適合你24歲年紀。因此，若你需要用持股套現，我建議你用平衡地賣出，咁就可以。

至於月供，除非你這$5000資金，都係需要買樓時動用，否則你維持月供會較好。

另外，你若打算投資海外樓收租，你最少要確認自已，係認識這項目，要堅守「不認識就不投資」這個方針。

如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你分析過後，覺得都有值博率，才好去入市。

------------------------------------------------

Q22236：

你好 龔成老師，近期突然留意到你個fb page觸動了我神經 啟發了我人生 開始想為自己打算一下 希望唔會太遲

本人 41歲 家庭主婦 要揍著兩個幼小孩非常捆身 只有儲蓄$hk20萬和5萬人民幣儲蓄的我每月少少支出沒有收入

現在開始有些少時間感到傍惶 眼見銀行錢越來越少又怕通帳 好想搵辦法滾大舊錢

我現在打算月供盈富$2000港交所$1000會唔會太冒險 我還有什麼可以做呢？萬分感謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你41歲，依然有一定時間，比你去做財富增值。只要你用正確方法，相信會得到理想效果。

以你年紀計，都可以用增值作為主要目標。你月供盈富$2000和港交所$1000，係有一個合適的配置。

但緊記月供係一個長線計劃，月供最少維持3年，並持有這些股票5年以上，才會有較理想效果。

當然，可以的話，最好一直持有。因為，優質股持有時間越長，財富增值效果就會越理想。

而人民幣只係貨幣一種，由於貨幣可以無限發行，長線只會貶值，唔係財富增值的理想工具。除非你有實際需要，否則你應換回港元，去進行投資。

另外，你可以用現有資金，去投資平穩增長股。

大市現處於合理水平，那20萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

另外，你要去多讀投資相關書本、年報，新聞和課程，去提升你自己的投資知識。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q22237：

老師，您好，我其實想月供2000元2800盈富基金，但好像最平都係渣打手續費每次50元, 中銀仲要每次100元，其他富途牛牛又冇，我供款少但手續費佔咁多，值得月供嗎？

但是儲三个月或半年一次過先買，謝謝賜教。

龔成老師︰

雖然月供手續費，係有點高。但作為初學者，我都係比較建議做月供。

因為，你現時無投資知識和經驗，對企業估值，點去定平貴未必會太了解。先利用月供模式去增值，可以減低買貴貨風險，對你而言會較理想。

當然，你自行按一個時間，去自已入貨，都係可以，同樣有月供的效果。但你要有自律性，同時要長期進行(最少供3年，持有5年)，才會有平衡價值波動的效果。

------------------------------------------------

Q22238：

你好老師，希望你能給我一些建議。
35歲， 有投資港股，美股，儲蓄保險

每月計劃: 2800(月供$3000) + 3067(月供$2000) & $5000 為美元存錢

目標：希望到2025年儲額外100萬

問題:

1. 我應該如何改善港股的投資

2. 每月有為年尾交10K左右保險存錢，有用這筆錢投資，差不多年尾需要賣掉一些股票來支付保險費- 這是一種錯誤的方法嗎

這是清單，計算包括股票利息:

小米1810 1,600 @24.07
阿里9988 200 @256.80- 虧錢
日清1475 5,000 @8.16- 虧錢
雷蛇1337 30,000 @2.39- 虧錢
港交所388 100.00 @196.30
HSBC 005 1,600 @62.66- 虧錢

盈富2800 513 @29.08- 虧錢
安硕科技3067 558 @17.778- 虧錢
電能006 1,500 @54.08
中電002 500 @79.80
煤氣003 2,000 @12.30

領展823 500 @75.00
置富778 3,000 @8.02
中銀3988 5,000 @4.00- 虧錢
iBond 4246 300 @100.00

正在考慮月供其他股票，例如700，1177，1810

謝謝你的幫助

龔成老師︰

1) 首先，你持股太多，雖然這些股票都係有質素。但長線計，你重點維持10隻左右，會較理想。

雷蛇(1337)不確定性較高，不宜持有咁多，建議沽少少，去平衡風險。

另外，以你年紀應以增值為主。IBOND主要係收息，唔適合你，建議沽出套現。

你現時月供組合係可以，你計劃新加的3隻都係優質股，但佢地都係潛力股，波動性會較高，以你年紀最多佔組合一半好了。

我假設投資回報有10%（連股息再投資），你每月投資$10000 + 現有持股50萬，4年後大約會增值至130萬，故這樣安排相信很大機會達至你的財務目標。

2) 保費方面，我建議你另外現金儲起去支付。因為優質股係要長線持有，而你這個方法，就等同短炒，是不正確的。

------------------------------------------------

Q22239：

龔成老師你好，想請教一下想財富更加增值應該加邊隻股票比較理想! 可否屆時inbox我~ 我怕miss左回覆~ 謝謝!

本人現時34歲, 有以下股票組合:

1. 中國銀行(3988) 4000股 ($2.71 x2000 + $2.79 x 2000)
2. 領展 (823) 100 股x $71.3
3. 盈富(2800) 800股 (之前月供股票，但現時停了)

每月可以有$3000左右騰出來(因一邊想儲多點現金平行)，以上的投資組合，是否應繼續月供盈富，或是先儲多一點再掃貨? 還是可加多一隻股票增值? 金沙 (1928) 適合我嗎?

謝謝老師!

如果安碩3067, 買幾多手可以長線持有? 謝謝!

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你34歲，應以增值為主，建議你用「平穏增長股」 + 「潛力股」作組合，去創造一個增值平台。

中行(3988)只係收息股，增長力唔明顯，不宜持有太多，建議不要再加注。領展(0823)和盈富(2800)都係適合你。

月供方面，盈富(2800)、 金沙(1928)都係可以，你可以先集$2000供盈富，或跟金沙各$1000。餘下$1000就儲起，等大跌市機會。

安碩恒生科技（3067）係潛力股，都合適你年紀。我地無話幾多手先適合，但因為佢係潛力股，有增長力之餘，都有一定波動性，故佔組合比重不可過高。

以你年紀，潛力股大約可佔4-5成。但若你投資經驗較淺，我建議2-3成好了。等你學會一定投資知識，才慢慢加翻大個比重。

------------------------------------------------

Q22240：

sir你好, 我係呢2星期先開始認識你, 有好多野想問

我40, 女性, 1個8歲小朋友, 一向唔識理財, 直至結左婚先開始學懂下理財, 辛苦儲左30幾萬, 衰左喺1間投資公司同微信女,

而家得返6-7萬積蓄, 有工作, 25000元, 但比10000家用, 同女家8成開支都係我比, 所以每月剩返嘅錢唔多, 想請教下有咩方法以令積蓄有穩定增長?

40歲人先得咁少積蓄覺得好慚愧

龔成老師︰

過去的事情，就當吸收個經驗，讓它過去吧。

現在開始正式做好投資，用正確方法，去累積資產。首先我地投資股票，就等同投資一間公司。

你必需要知道佢質素、行業發展、財務狀況、點賺錢等，才好決定是否投資。

現時你可以先做3件事﹐現價先入一手盈富(2800)，再回10-15%就再入一手，餘下資金就等大跌市機會。

另外，你要努力增加收入或者減少開支，令你每月有一定儲蓄，可以比你用來月供股票。

第三，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

哈佛知識分享 - 行業分析及定位《點做生意? - 裙褂》Case Study

(想睇全程 unedited 訪問，可whatsapp 我90361143)

做生意要識得分析個行頭， 你一定要認識哈佛教授 Michael Porter 的波特五力 Porter's 5 Forces:

(1) Competitive Rivalries 行內的競爭性
(2) Threat of Substitution 代替品的威脅
(3) Threat of New Entry 新入行競爭者的威脅
(4) Supplier Power 供應商的議價能力
(5) Buyer Power 買家的議價能力

多謝經營了44年的鴻運繡莊老闆黃師傅接受訪問。

. 如何分析行業?
. 如何定位競爭?
. 做生意最忌什麼?
. 裙褂行業如今發展? 

訪問內容有答案。大家有大喜事也可幫襯他。

鴻運繡莊
總店:
元朗教育路69號地下全層
(852) 2477 6688 (敬請預約)
營業時間:上午12:00 至 下午8:00
逢星期四休息

尖沙咀店:
尖沙咀金巴利道73號新業廣商業大廈2樓202室
(852) 2787 9708 (敬請預約)
營業時間:中午12:30 至 下午8:00
逢星期日休息

內文: 
今次呢個case好特別，鴻運繡莊， 專做裙褂， since 1975 年，做咗44年，同我一樣，今年都係44歲。 佢個行頭又點呢，點做生意? 我後面呢間係去元朗嘅老店，而家又去佢尖沙咀嘅分店睇下。

呢盤生意係由阿黃師傅嘅爸爸44年前做起。Michael Porter 話你要分析一個行業，你睇五大影響個行業嘅大力量。

以5個力量唔係加起嚟(Additive)喎，只要其中一個失衡呢，就成個行頭可以玩完。 依家我逐一逐一同你解釋， 不過先了解下鴻運繡莊其實做乜先。

咁大家其實又知唔知道裙褂分類又點呢？ 

咁你又知唔知，褂係買多定租多呢？ 幾錢呀？

(1) 要了解個行頭， 就要先了解行內競爭性 Competitive Rivalries. 咁你就要睇有幾多競爭者， 品質的差異性，顧客嘅忠誠度，同埋離開市場唔玩嘅成本。 有啲行頭視對手為死對頭，互相廝殺，割喉式減價! 有啲行頭就互相禮讓， 基本上可能係合謀競爭，好似油公司咁，抬高個價。 咁阿裙褂呢行又點呢? 

(2) 市場上有冇代替品，都會影響成個行頭嘅表現。 例如以前有好多人用計數機， 依家一個智能電話就已經代替晒啦。 高鐵代替咗公路，港珠澳大橋代替咗搭船等。 當然要睇下個代替品係唔係代替得曬啦。咁裙褂呢?

(3) 新入行競爭者多唔多威脅呢? 係咪話抄就抄， 有冇咩特別專業知識? 有冇任何入行嘅障礙呢? 好似係外國醫生嚟香港一樣，未考過香港醫務委員會嘅試，就係唔準係香港做醫生。 有冇任何技術嘅保障， 或者 economy of scale 好似百佳/惠康咁大，先至壓得低個價錢呢? 

(4) 供應商的議價能力。 你同邊個人入貨? 多唔多選擇? 佢哋會唔會大過你好多，大石砸死蟹? 你轉其他供應商議會唔會成本好大?  你係賣電腦嘅，可能大部分嘅利潤就去咗Intel 粒 chip 嗰道， 因為你部電腦冇咗佢粒chip 就唔值錢。

(5) 第五個力量， 最後你就要睇買家議價能力。 市場上多唔多買家?佢哋嘅order 大唔大? 佢哋對價格敏唔敏感? 佢哋入其他貨改變嘅成本高唔高? 例如，醫藥行業一向都好賺錢， 因為買家為咗身體好, 多多錢都願意畀。同埋佢哋轉食另一隻藥嘅話，改變嘅成本可能係付出健康，太大喇。 做藥廠嘅，反而最怕就係insurance 公司， 因為佢哋主宰咗客人見咩醫生同食咩藥。 裙褂呢個行業有點呢? 

裙褂又點樣令到個買家願意畀多啲錢? 有咩新意呢? 

Hello Kitty 呢啲叫做licensing專利授權。 一般你都會同個licensor簽訂的合約，用佢個圖案幾多年嘅時間，預期有幾錢嘅收入， 當中幾多百分比嘅營業額會畀返佢 Royalty Fees， 平則百分之幾，貴則20%至30%。 當然你作為licensee , 就要upfront 俾個minimum guarantee 佢， 即是你一件都賣唔出， 你都一早已經付出咗。 當然佢唔係個個批，都要你有返咁上下料到先畀你用啦。

除咗hello kitty 嘅褂， 一件傳統嘅裙褂需要有咩呢?

咁講完一大輪，做裙褂嘅成本架構係點? 賺幾錢呢? 

一般做零售批發嘅，攞貨返嚟，轉手賣畀人，賣100蚊，賺3/4成啦。 但如果係自己品牌，H&M 馬沙等，賺5/6成啦，luxury brand, Prada 咁就7/8成啦。咁做褂呢? 人工超貴又點呢?

要提防新競爭者嘅進入威脅， 原來你做時裝零售都可以註冊外觀㗎喎。 你去知識產權署， 各種產品外觀設計都可以註冊㗎，包括電腦，電話，DVD/CD，紡織品，珠寶，同埋手錶。 只要你係獨特嘅， 填幾份文件交啲證據，成功註冊咗保障有效期最長就係25年，每五年續期一次。 咁做裙褂又點呢? 

最後根據Michael Porter 做生意， 你先要用以上5 forces 去分析個行業好唔好做。 好做嘅，就有以下四種方法贏人，比行家做得更好。

(1) Cost Leadership 大眾市場, 成本平過人，好似佳寶， 百佳，惠康咁。

(2) Cost Focus 小眾市場，成本都係平過人， 例如而家好多新興嘅夾公仔機，專 target 一班年青人/細路仔， 半賭博嘅心態去刺激呀，唔使人管理， 啲公仔成本都唔值錢。

記住喎， 我講緊係成本平過人，唔係價錢平過人喎。 成本平過人，即是價錢一樣，你自然賺多啲啦。

要贏人? 仲有 (3) Differentitation 大眾市場，但係行差異化， 好似Starbucks 咁。

(4) Differentiation Focus 小眾市場，都係行差異化，啲嘢靚過人。好似Prada， Chanel 咁。

想知多啲，可以睇返我之前有條片講關於100間士多嘅故事， 就同你仔細分析左呢四格。 咁鴻運繡莊做裙褂又點呢?

好明顯黃師傅就係行緊第四, differentiation focus strategy. 我自己做商舖基金都係一樣， 做專啲，做好啲，我哋基金收費唔平， 但最緊要服務好，投資者同租客賺到錢。 

根據Michael Porter, 四格入面做生意選擇邊格都得，但最忌就是Stuck in the Middle, 你唔願意作出tradeoff 取捨，就難贏競爭對手。

希望你都透過呢啲嘅影片學到嘢，做生意更加叻。 最後身邊有朋友結婚或者你自己又大事都好呢，記住呢鴻運繡莊啦! 

買舖/租舖/放舖/投資商舖基金熱線: 28301111 或 whatsapp +852 90361143

盛滙商舖基金 Bridgeway 網頁  www.bwfund.com

李根興創業之友 https://www.facebook.com/EdwinNetwork/

李根興商舖之友 https://www.facebook.com/edwinprimeshop/

李根興 youtube 商舖創業及投資分享商舖創業及投資分享https://www.youtube.com/channel/UCEN66AnLghXESgCDIsz-3Nw

#哈佛知識，#鴻運繡莊，裙褂點做生意，#michaelporte#michaelporter, #點做生意，#商舖, #李根興, #創業, #edwinlee, ＃盛滙, ＃bridgeway, #舖, #商機