https://youtu.be/thFrvdo5svE
特色自家製作🍡🍰甜品糖水🍯咖哩💥https://youtube.com/playlist?list=PLkU_SdeTtB_QpH2ff0e37WtCe30Du7eO7
🌈這系列全部影片都有中英文翻譯

禦寒浸腳
https://youtu.be/wmp9hI7YWj0

腳踭痛
https://youtu.be/TqnhqiDBZ9M

移動冷氣
https://youtu.be/AZY99tV8jQE

🔥🔥🔥我有1000多條片🎬大家入呢個網址 😁全部可以睇曬🙏
https://goo.gl/cuyAZa hip🔥🔥🔥

🔥🔥I have more than 1000 movies🎬Everyone enters this URL 😁All can be viewed 🙏
https://goo.gl/cuyAZa hip🔥🔥

Sweet & Sour Pickled Young Ginger🔹Sweet, Sour, Crisp😋Appetizing Snack🔸 Or Eaten with Century Eggs👍

醃酸甜子薑
甜甜酸酸爽脆
開胃小吃
或皮蛋夾酸薑!

Pickled Young Ginger

看了QT那齣Docu。
一如所料，主要歌功頌德，但回看他《從前，有個荷里活》之前八齣電影的一些事一些情，還是會感動。
略嫌被訪者不夠多。
還有一個主要作用，代QT宣布，正式同荷里活大淫魔Harvey Weinstein劃清界線。他的Miramax，是QT頭八齣戲的發行。你可以話，因為有Harvey，QT才可以放膽（兼有錢）去拍他想拍的電影。
以下呢一篇，2013年寫的。
如果而家寫，應該會好唔同，但我當然唔會咁做。
——————————————————————
【The A-Z of QT】

Quentin Tarantino令我想起90年代的美好時光。
迷QT的同學在宿舍房門貼上《Reservoir Dog》海報，我就瘋狂地租LD來學睇戲，跟住一齊興起去讀編劇班，放學後再去當年還位處海防道的HMV買研究QT的書……然後95年暑假，我們磨了一個有關殺手的劇本出來，再拉埋願意為藝術犧牲的義氣同學，在一個夏夜，搞足成晚，拍咗幾分鐘的戲。
我想QT在1984年開始搞他的第一部戲時也像我和同學般甩轆。分別是，QT在無盡的甩轆過程裡，繼續追尋，並成功搵番個轆——即使不是原本的那一個，卻又被QT離奇地砌出另一樣嘢出來。

A——A Band Apart
QT於1991年跟Lawrence Bender合組的電影公司，名字來自法國導演尚盧．高達（Jean-Luc Godard）1964年作品《Bande à part》。公司logo原形，則是《Reservoir Dog》中，成班人著晒黑色老西準備做世界的經典一幕。

B——Lawrence Bender
QT多年戰友，監製了對方大部分電影。QT在80年代寫的第一個劇本《My Best Friend's Birthday》，就是在Lawrence Bender鼓勵下而催生。他也在QT電影做過串星。《Pulp Fiction》裡John Travolta和Samuel L. Jackson咪去咗一個單位幫大佬奪回那個神秘的喼，窩藏單位內的其中一條友便是了。

C——Canned Music
QT自然不是第一個採用罐頭音樂的導演，只是他用到出晒名而已。
他每一部戲都在指涉一個（或數個）電影類型，於是，他便在那些類型中選取自己喜歡的歌或配樂——他睇中的大都不是甚麼為人熟悉的A級大製作，反而是一些低成本的名不經傳電影，他選來用的同時，也在向這些影響過他的電影/電影人致敬。當然最重要的是，大部分被QT選取的歌或配樂，都跟他的電影很夾。
即使QT也有另外請音樂人譜寫作曲，卻從不會採用單一音樂人的作品。他怕人家寫的東西同電影唔夾，咁就用又唔係唔用又唔係。

D——Django Unchained
QT第8部作品。發生在美國內戰前的西部片（其實場景是美國南部），但又不像傳統西部片以白人主導，QT想講的實則是黑奴的故事。
一如之前多部作品皆有reference，《Django Unchained》也參考了不少西部片，卻並非美國貨，反而是由意大利人在上世紀60年代大量製作的Spaghetti Western——低成本，不會千里迢迢成crew人飛去美國西部，而只會在西班牙和意大利搵笪地方，扮成美國。對比美國的本格西部片，Spaghetti Western更暴力，提供了更離經叛道的娛樂性。
影響QT最深的是1966年的《Django》。Sergio Corbucci執導的這部意大利粉西部片，暴力程度勁到在英國長年禁止發行（直至1993年才解禁）；主角Franco Nero更獲邀在《Django Unchained》客串——這個「1966年版Django」，被安排在酒吧內問「21世紀版Django」Jamie Foxx個名點讀。

E——Eli Roth
應該是QT最睇好的導演。QT親自監製了Eli Roth的兩齣超暴力Torture Porn《Hostel》，也讓他幫手拍《Inglourious Basterds》的戲中戲《Nation's Pride》（即戲裡用來向納粹歌功頌德、激勵軍隊士氣的那齣黑白片）——還有，Eli Roth更擔演了最後拍住Brad Pitt炸死納粹的一名死士。

F——Foot Fetish
據聞，QT有戀足癖。
先撇除他本人有沒有這門癖好，在他電影中女性腳部的確往往被放大描寫——必備的像特寫女角步行時的腳部動作，激烈一點的像《Inglourious Basterds》裡，Diane Kruger演的那名德國女演員暨間諜因丟失了一隻高踭鞋，被Christoph Waltz發現而揭穿身份——其中一幕便是Christoph Waltz命令Diane Kruger遞出腳，讓他替她穿上那隻丟失了的高踭鞋。美腿，成為了致命元素。
但更勁是《Death Proof》，中場一幕炒車，Sydney Tamiia Poitier成條右腿被炒斷，QT更用心地用慢鏡呈現這條已開主人的腿，是怎樣像一pat爛肉般跌在地上。

G——Grindhouse / Genre
2007年的《Grindhouse》是大野心project。為展示、回溯過去專播B片的Grindhouse的美好時光，QT和老死Robert Rodriguez用上高成本各拍了一齣扮低成本的類型電影，放埋一齊播，而且仲學足Grindhouse做法，在片與片之間攝入trailer，這些trailer仲特登搵人去拍。Robert Rodriguez的《Planet Terror》，由頭暴力到尾打到尾，塞到你飽，但睇完若有所失；QT的《玩命．飛車．殺人狂》，玩的類型是Slasher Film，叫得做有官能刺激的其實只得中間和最尾那場，其餘時間就是對白對白和對白（有些無聊有些則在借啲意品評昔日飛車片），但奇在，你會滿足（但問心，若單獨看的確有點冗長）。

H——Harvey Keitel
最初QT只打算以3萬元美金拍攝首部獨立電影，後來Harvey Keitel加入，了解晒成個project後，答應出任監製，再由他出面找資金，最後成功籌集百萬資金（但相對一部「正常」荷里活電影這筆數只是濕濕碎），讓QT完成了他的首作《Reservoir Dog》。QT擁有後來的電影成就，除了要多謝佢自己，也要多謝Harvey Keitel。

I——Inglourious Basterds
《Inglourious Basterds》前的QT，玩類型玩自己喜歡的電影人和事，每一部電影都是認真而帶住玩樂心去完成的。
《Inglourious Basterds》裡的QT，也有玩類型和自己心愛的東西，卻首次接觸歷史，接觸一個大題目——歷史是怎樣完成的？在歷史的推演過程裡，又有多少「裡子」參與其中？以及有幾多不為人道的哪渣嘢發生咗？
當然，這是QT以歷史事實和結果為本而自行虛構的對抗納粹史，希特拉在被公認的歷史裡，並不是在法國某戲院睇睇吓戲，而被美國人監生射爆頭而死的——事實是這個安排也遭人詬病，鬧佢提倡以更暴力手段來對待暴力。但這描寫，是真的痛快淋漓啊。
至於由Brad Pitt領軍的那群爛仔，用刀在納粹兵額頭劃上納粹的「逆十字」，很暴力，卻也是一個記下歷史的方法。你在人生某過程做過傷天害理的事，隨時間流逝一切都會煙消雲散，唯有用這麼一個暴力方法鑿個嘜喺你額頭，才能永遠keep住。這才是《Inglourious Basterds》的核心命題。我最喜愛的QT作品。

J——Jackie Brown
當年在香港上映時不知由誰起了一個《危險關係》的名字，擺明是想人自行link到《危險人物》。但如果你是抱著看另一齣《危險人物》的心情去看《Jackie Brown》（Sorry我真的好憎嗰個中文戲名），你應該會好憤怒。
《Jackie Brown》改編自美國小說家Elmore Leonard的《Rum Punch》，但作為最core的女主角卻被QT一嘢改為黑人，他想把電影拍成一齣90年代的Blaxploitation，這樣，便大條道理起用在70年代拍下大量Blaxploitation的紅星、他的偶像Pam Grier主演。
相對大玩敘事結構和電影類型的《Pulp Fiction》，《Jackie Brown》冇咁花巧，即使人物眾多，但QT集中描寫的由頭到尾都是Robert Forster和Pam Grier，這對萍水相逢、年齡同樣有番咁上下的男女——Blaxploitation只是外在形式包裝，QT真正想講的是這對男女之間沒結果的一段情。這算是愛情成份最重的QT電影。

K——Kill Bill
還記得當日臨入場時同朋友咁講：希望佢呢鋪掂啦，否則真係正式玩完。
《Kill Bill》是《Jackie Brown》整整六年後的QT作品。七年間，他有個很多計劃，但冇一樣落實；依然有拍戲，但竟然是走去客串拍電視劇……
《Kill Bill》是QT的一次重新起步。不像過往三部幾電影一概以long take文戲為主（「三部幾」中的「幾」是指《Four Rooms》中的單元《The Man from Hollywood》，啲long take直情長到令你誤以為睇緊悶爆舞台劇），這次要涉獵的是動作——日本武士片的一對一決鬥、西部片沙塵滾滾裡的速度對決，還有咱們邵氏武俠片的盤腸大戰。
分成上下兩集的《Kill Bill》，上集集中於復仇的過程、動作；下集重點是解謎，一個曾經殺人如麻的女人，怎樣在人生的重要一刻彰顯母性。你會發現，QT對女性心理原來摸得好透澈。

L——Samuel L. Jackson
有些演員，不止一次出現在QT電影裡，而出現得最多的是Samuel L. Jackson。

M——Mira Sorvino
唯一公開的女友。
對於Mira Sorvino大家可能已經好陌生，但在90年代她曾經是最被睇好的女演員，更憑Woody Allen的1995年電影《Mighty Aphrodite》（無敵愛美神）攞過奧斯卡最佳女配角。也曾演過周潤發勇闖荷里活首作《血仍未冷》。後來，唔知點解地，逐漸由一線退下來，近年集中演出低成本獨立製作。另，Mira已經嫁咗人。

N——Nigger
這個英文字，對我們的意義可能就只是一個英文字，解「黑鬼」。
在美國卻是個極端敏感的字眼（記得《虎膽龍威3》嗎？Bruce Willis一開始便被壞人要求掛住一塊寫上這個字的木牌走入哈林區，瞬即便被黑人圍住咁兇）。
這麼一個敏感字眼卻經常出現在QT電影裡。美國黑人導演Spike Lee尤其反感，說不明白好端端的一個白種人為甚麼要keep住動用這個侮辱性字眼；而對於描述黑奴的《Django Unchained》更講到明不會睇——他的祖先故事絕不應該成為甚麼Spaghetti Western。
但作為QT御用的黑人演員Samuel L. Jackson，對於Nigger被大量使用，不覺不妥。

O——Oscars
QT至今只攞過一次奧斯卡，1995年憑《Pulp Fiction》獲頒最佳原著劇本。咁當然，攞幾多個小金人，同個人電影成就不成正比。

P——Postmodern / Pulp Fiction
曾幾何時的一個無敵學說，無敵在學說本身定義太模糊，無敵在幾乎可以apply在塵世間任何事情上。又曾幾何時，QT電影也被指是後現代主義的無敵示範：類型的拼貼、傳統的模仿重塑與顛覆……
今時今日，大抵沒幾個人會重提後現代。
對於《Pulp Fiction》的讚美和研究已經太多，唯一想說是，在《Pulp Fiction》（和《Reservoir Dog》）前，荷里活電影製作模式只有A和B，但QT卻用行動證明了還有C——把類型大膽拼貼，把古老題材翻新，把故事結構撈亂重組，甚至把再低俗的題材擺上藝術殿堂，而最終成果必需是：擁有高度娛樂性。
不敢說QT是第一個或唯一一個這樣做的人，但總之他成功了他們沒有。

Q——Question
《Django Unchained》之後QT有甚麼拍攝計劃？
1.《Double V Vega》：《Reservoir Dog》的Mr. Blonde和《Pulp Fiction》的Vincent本是同根生，QT多年前話有意拍齣戲講這對暴力兄弟。
2.《Kill Bill: Vol.3》：交代女主角Beatrix Kiddo十年後的生活。QT答案一直是：可能會拍，可能唔會拍。
3.Another Bond Film：應該唔會。QT話，他最想拍的從來只有《皇家賭場》，但已經俾人拍咗。

R——Robert Rodriguez
另一位長年戰友，同樣在90年代拍下首作並開始發展。對比起來，Robert Rodriguez產量多而雜，好睇是好睇，唯獨欠了QT那種鑽探電影的視野和野心。

S——Speed
Yes，就是那齣讓奇洛李維斯和平頭裝紅起來的《Speed》。在《Reservoir Dog》成功過後，QT曾獲電影公司力邀執導《Speed》，但他婉拒了，選擇去拍《Pulp Fiction》（另，他仲推埋執導《Men in Black》的邀請）。人生交叉點：如果當日他心急想紅而去了拍A級動作片，他可能只會成為另一個工匠，而不是導演。

T——True Romance
Tony Scott執導，負責劇本的正是QT。男主角Christian Slater生日，巧遇性感女主角Patricia Arquette，而她其實是妓女，是好朋友送給男主角的生日禮物，結果愛得暴烈並走上亡命之途……
戲的原型來自QT早在1984年便開始搞的《My Best Friend's Birthday》，斥資5千元美金，同朋友用了四年完成，QT自編自導自演。這齣長70分鐘的黑白片，因一場大火燒淨三十幾分鐘。從未作公開發行。

U——Uma Thurman
最受QT重用的女演員，重用到被傳二人有路。QT說，Uma Thurman對他很重要，是他的靈感女神。感情方面，則是柏拉圖式的。咁即係點吖？

V——Violence
QT以暴力起家，暴力也成為了QT電影的標籤，但問心，QT的暴力場面其實冇乜嘢，他監製的《Hostel》才算離譜。
事實是也有一個導演說QT根本不明白暴力真諦——Oliver Stone，將QT的《Natural Born Killers》劇本肆意改晒的黑手，說自己打過越戰見過死人，QT的暴力不過是閂埋房門生安白造出來鬧著玩的。
仲有，暴力色情是雙生兒，但截至《Inglourious Basterds》，QT電影從來沒有出現過女星露點。

W——Wong Kar-Wai
1995年，QT跟Miramax合組Rolling Thunder Pictures，以其名義在美國發行一些他欣賞的海外電影，其中一齣便是王家衛的《重慶森林》。當時王家衛更應QT之邀到洛杉磯出席講座，過程與感受記錄在《四齣王家衛，洛杉磯。》這本書裡。將書裡說話對照番兩位導演日後的路途，有種難言感受。

X——XX
X，羅馬數字中的10。去年是QT出道20周年，為隆重其事（和掠水），推出了《Tarantino XX: 8-Film Collection》這個blu-ray boxset，除收錄由《Reservoir Dog》到《Inglourious Basterds》的8部戲，另有兩隻碟的bonus feature，主要是影評人在為QT歌功頌德……
另，QT曾說過不希望六十過後還在拍戲，寧願寫吓小說好過。佢今年三月便行年五十。

Y——Youth
QT沒進過任何電影學校沒受過所謂電影訓練。未做導演前一直在加州Manhattan Beach的一間租帶舖Video Archives打工，期間吞噬了大量一般人看不起眼的「好電影」，作為日後拍片的database。

Z——Zed's dead baby, Zed's dead.
我真係諗唔到"Z"應該講乜，想來想去只想到《Pulp Fiction》那個強姦犯Zed。當Bruce Willis殺了Zed後，駕著Zed的電單車返屋企接女友著草，天真女友不知大禍臨頭還在猛問架電單車是誰的，這時候Bruce Willis便說："Zed's dead baby, Zed's dead."我想講的其實是，QT寫的對白真的好易入腦，想這篇嘢的時候，我個腦便不停在loop他不同電影中的不同經典對白，經典在對白並不是甚麼微言大義，反而大都很無聊，但又幽默而真實。

陳詠謙都有打手。。。。。。

本身對呢個人冇咩唔好既感覺，只係嫌少少哂左陳奕迅啲歌既曲，不過再多睇其他人既comment, 愈睇愈有問題，呀，係咪應該寫篇blog講下佢好？

路見不平，自命正義，終於都要挪用寶貴時間，去點評陳詠謙嘅大作，嘗試為民請命。其實點評歌詞實在非我所長，音律押韻我亦只有皮毛了解，但係畢竟自細聽香港流行曲聽大，有感仗義執言先至無負香港流行曲於我人生嘅啟蒙，唯有挺身而出，盡力而為。先旨聲明，寫歌詞唔同寫散文小說，遣詞造句確實有彈性得多，可以不拘泥於傳統，而寫得意象曖昧，含意深隱，亦唔代表詞作有誤，因此內文要寫嘅，主要係順應網民意見，針對絕對無法原諒嘅大弊，例如立意古怪、錯用詞語、表意混亂等各種問題，某啲顯而易見嘅小病，例如〈龍舌蘭〉直頭唔啱音呢類大家心照不宣嘅，就唔會多講。以下我精選咗十首算係近年街知巷聞嘅垃圾作品淺評分析，希望可以拋磚引玉，畀便交流。

1. 高山低谷

第一首，必定要揀林奕匡嘅成名作，因為一黎呢首亦係陳詠謙成名之作，二黎林奕匡係一眾受害歌手之中搵陳詠謙寫得最多歌嘅一位。由於呢首都算係佢填得相對認真嘅歌，稍為認真去聽，相信大家都意會到歌詞要表達嘅訊息，就係寫二人地位不對等，情人遠在天邊，抒發可望不可即嘅感慨，類似《詩經》中嘅〈蒹葭〉。而正因為立意明確，只要聽眾細加咀嚼，就會發現有唔少用語係異於我地平常嘅語文習慣，而各種誤用，都唔足以稱上鑄造新詞，而係徹底嘅錯用，長久咁用落去絕對會影響我地嘅語文鑑賞能力。

廣為傳唱嘅副歌之中，寫到「渴望被成全」，呢點係中學生都常犯嘅錯，語文水平略高嘅人都會知問題喺邊。首先，渴望社會或他人成全，寫渴望成全已經夠清晰，亦合乎文法，根本毋須強加被字。其次，就當佢係被動句，被動句多數常用於呈現負面情況，例如「他被歌迷離棄了」。雖然漢語歐化潮流之下，被字亦會拎黎寫所有被動情況，用法分別係：一、強調被動，如「他被上司提攜了」，但較恰當嘅用法應該係「他獲得了上司提攜」；二、施事者不明，如「他被痛罵了一頓」，唔知邊個鬧咗佢；以及三、強調謂語，如「民意被政府騎劫了」，突顯民意遭不當操作。近幾年社會風氣好中意講「被自殺」、「被抑鬱」、「被捉迷藏」去嘲諷中國對待異見人士嘅卑鄙手段，亦突顯被字特質。因此，成全本來就必須取決於他人，「渴望被成全」中嘅被字份屬多餘，而參考返林夕作品，佢係傾向少用呢個被字，更加從來唔會濫用去充塞字數。

然後係「腳下路程難以削短」，亦係不當。要貫徹文意，最準確應該係用「縮短」，但係唔啱音，唔用得。削字，多用於削皮去屑、削弱削減、削職以及剝削，而路程之縮減，勉強用削，拎最近則只有削弱削減一義，但削減係指從原定數目之中減去若干數目，多數牽涉具體數量。而「天一黑天一光揮發了一句再會」亦係睇得明而寫不通。考慮到揮發一詞必定要同所揮發之物共同出現，可見句意係指呢一聲拜拜會蒸發會消失，咁睇返上文下理，到底點解突然會有呢句拜拜？同埋周而復始每日講拜拜又應該點樣理解？係咪指每日返工放工同人講拜拜都係多餘？呢句都係有待解釋。加上「只見人下墮」令人聯想到跳樓，「我繼續埋藏我愛戀」嘅愛戀應該寫作感情，以及整體故事空洞，成首歌都無法打動人心。無可否認，用山勢為喻，以陳詠謙水平計，已經係上佳之作，但係真係慘不忍暏。

2. 別來無恙

第二首，因為一句「我現時自己肯做飯」而飽受批評，加上陳詠謙本人沾沾自喜現身解話，亦係一定要寫。首先，我絕對唔反對援引口語入文，推廣粵語理所當然，但豬隊友推廣得眼高手低，就係成事不足，敗事有餘。「我現時自己肯做飯」之所以不能接受，首先係做飯唔係廣東話，做愛至係，其次係破壞意境，寫得太白。根據陳詠謙本人陳詞，佢認為一個人dry到要自己煮飯好適合主人公情況，而唔押韻都係刻意為之，因為咁樣對應返故事主角悔疚一世，凡事都看破，其實呢兩點問題都唔算大，因為個出事位係在於呢句只係表現自己獨立嘅例子，而唔係概括句。副歌開首，普遍係直抒胸臆，或者概括痛心程度，甚少會兜口兜面隊一句嘢出黎，聽眾話聽到尷尬嘅原因，應該係咁。參考返黃偉文嘅「二百年後在一起／應該不怕旁人不服氣」，或者林夕嘅「世界將我包圍／誓死都一齊」，其實都相當直白同口語化，但就一啲都唔突兀，反而引起到好多人共鳴。

值得一提自然唔少得「來年陪著子女學行／紀念當初我們的愛情」。由於主人公目前單身，我地不妨假設子女係指對方嘅子女，但既然係咁，又係邊個想借用呢啲子女去紀念主人公嘅愛情？同埋若要紀念，子女非己所出，兩者關係喺邊？呢句真係相當費解。然後自然亦要談及「王菲的孤寂／多麼孤寂」。眾所周知，王菲有首〈百年孤寂〉，但咁樣抽孤寂二字借代全首，相當突兀。加上以反復修辭強調孤寂，極有濫竽充數之嫌，借用連登網民一句，一個肥柒on9仔自己打緊xanga個場景，真係完全咁呈現咗出黎。而我覺得有一句，亦係表現得出陳詠謙其人對於成語嘅運用係只取片面之意，唔識其中內涵——「恃住雄辯滔滔／隨便的把你喝罵」。呢種情況喺中學生作文之中亦係相當普遍，因為佢地背誦成語而又缺乏廣泛閱讀，對於詞語嘅理解唔係由字句之中而得，因此就會畀老師打曬交叉。雄辯滔滔一詞褒多於貶，多數用於讚美，例如「這位律師雄辯滔滔，聽得旁聽市民心悅誠服」，又或者杜甫《飲中八仙歌》中嘅「高談雄辯驚四筵」，一般係指其人發言具說服力，以理服人。雖然世俗有言，「事實勝於雄辯」，但雄辯唔等同於狡辯詭辯，因此同情人爭執，同埋事後亦知道自己理虧，係咪應該用雄辯滔滔，亦係值得商榷。

呢首歌其實有一點特色相當鮮明，相當陳詠謙，就係每句都係個腦冇點諗就不加修飾咁講出口，而且句與句之間割裂去睇都完全無礙傳意。對歌詞冇乜要求嘅人，未必察覺到問題所在。同樣生活化嘅情節，其實楊千嬅嘅〈假如讓我說下去〉都有，「但我把／談情的氣力轉贈誰／跟你電話之中講再會／再會誰」即係冇人同我傾電話，「暴雨天／我至少想講掛念你／然後你／你最多會笑著迴避」就係顧左右而言他，甚至熄機潛水，但林夕之所以一啲打xanga嘅感覺都冇，係因為佢掌握以至駕馭得到何謂藝術——將自然同現實加以修飾加以轉化，呢一層人為工夫就叫藝術。〈別〉描述主人公分手後陷於懊悔，內容貼近生活，照計係好易畀聽眾代入，但就正因為咁，意圖代入嘅聽眾聽到一頭霧水，代入無方，可以話係高不成低不就。

3. 經過一些秋與冬＋哪裡只得我共你

Dear Jane嘅簡單易明K歌之選，又係陳詠謙傑作。「兩眼一黑／然後失控」令人聯想到頭暈倒地以及精神病發，九唔搭八，而領起句嘅「一些」同「與」本來就係蛇足，事關寫歷經秋冬同揮去驚恐就已經夠曬精煉。副歌「 無謂再關心你／我沒資格慰問你／無謂再騷擾妳／我沒這塊厚面皮」其實都幾適合失戀聽眾，但量詞之選用，直接反映出陳詠謙不諳避俗，缺乏語感。所謂語感，其實就係語言使用者對其所熟悉嘅語言有冇敏銳感覺﹐能否領悟語言文字真實意思以及必然會引起嘅聯想﹐直覺必待厚積薄發，同語文根基息息相關。用塊字去形容臉皮，會令人聯想到塊狀死物，進而聯想到牛皮豬皮，就算句子本身幾有詩意，一個塊字都足以盡廢前功。語感佳者，可以善用詞語刺激聯想，但語感弱者，萬一誤用就會弄巧反拙，呢一點，所有寫作者都應當有所警覺。

另外，「得到的若期望有限期／失去的未重聚已別離／後悔如我遍地」亦係反面教材。遍地呢個詞語其實好有畫面，例如自由民主遍地開花，或者風吹草低牛羊遍地，只要一見遍地，讀者就會聯想到數量之多，發展之盛。但觀照呢句歌詞，遍地嘅理應係後悔，但寫出黎引起嘅聯想就係主人公遍地——大概係因為TVB重播《西遊記》太多，我所諗到嘅係孫悟空大顯神通，一條猴毛落地即可化成千百猴子猴孫之勢，同後悔之情極為矛盾，成個感覺極之滑稽。參考返陳奕迅一首〈黑暗中漫舞〉，其中有一句「猶如自卑水銀瀉地」，當中嘅水銀瀉地，即係水銀流到一地都係，令人聯想到玻璃落地隨之流瀉，一發不可收，非常適合用於形容主人公每每獨自揣摩情人心理之時嘅自卑爆發，同時深化主題，令人可以透過具體比喻去感受主人公單戀嘅卑微渺小。兩相對比，大家就會理解點解後悔遍地係不知所謂，而自卑瀉地則係神來之筆。

順手講埋〈哪裡只得我共你〉之中，為人詬病嘅「我們身邊太多假人／心中太多傷痕」。第一個問題，係陳詠謙點解要寫假人，因為準確而言，呢首歌想傳達嘅係對抗世俗眼光，而主要世俗現象並非虛假；第二個問題，係亂咁簡化為假人二字，又會引起不當聯想，令人諗到CPR練習用公仔，櫥窗display公仔，驅趕雀仔嘅稻草人，甚至消防處嘅任何仁。除非佢係明知到會引起不當聯想都要用，否則明顯又係語感薄弱之過。睇埋「途經幾百萬傷口」同「與外界／未隔絕我共你／能停止呼吸」，我更有理由相信，假人所指，真係CPR練習用公仔阿Anne，而「不掙扎／只緊扣」，亦一定係指緊三角巾同繃帶，成首歌係為聖約翰救傷隊暗中宣傳。

意境係一樣好抽象嘅嘢，而某年書展講座，林夕就曾經講過意境可以分為三種境界，一係山寨，二係自己創造，三係灌注生命同感情。第一種，就係運用約定俗成而又根深蒂固嘅傳統意象，亦即係中學生學習寫作必學嘅大自然景物，諸如星星月亮太陽天地花草，其中若果突然出現現代物品諸如蘋果電腦應用程式芝士拉絲抹茶爆漿，文章就會意境盡失，而陳詠謙明顯係畫虎不成反類犬嘅示範人物。第二種，自己設定，就好似林夕有期好中意用探戈咁，以跳舞相持比喻情愛拉鋸，寫得貼切就可以自成一格，睇返陳詠謙大紅作品，可以話係冇一首做到。第三種，用返林夕自己舉嘅例句，「滿街腳步突然靜了／滿天柏樹突然沒有動搖」之所以有意境，就係因為作者觸覺敏銳，以「滿天」而非「滿街」去寫柏樹，所以就描寫到樹勢之高，從而襯托出主人公獨自流連街頭何其微不足道，而其身影又係何其嘅失魂落魄，得出融情入景而後情景交融嘅效果。當一位做到寫景則情景相生，說理則情理兼備，而另一個則直接將秋與冬寫出黎，其後又再將「只知感覺失了蹤」寫出黎，文學係咪真係一句各有各觀點就可以打發紛爭，聽眾心中自有答案。

4. 百年不合

眾多歌手入面，周柏豪其實同陳詠謙係最夾，而原因係周柏豪畀人嘅觀感本來就冇乜文化，因此陳詠謙嘅詞質樸庸俗而又文句不通，反而非常配合周柏豪形象。以〈百〉為例，其實我聽咗好多次，都唔明何謂「即使今生擱淺／苦等隔世盛宴」。陳詠謙低手之處，就係唔識連用一系列有關比喻去經營意象，生硬插入詞語，但又缺乏前後呼應。見到擱淺，讀者自然會聯想到海洋，聯想到輪船，聯想到鯨豚，但〈百〉偏偏冇一樣嘢係關事。由於人係唔會擱淺，讀者必須自行領會擱淺之意，偏偏陳詠謙又冇建構到完整比喻，寫到不倫不類。參考返麥浚龍嘅〈吃鯨魚的人〉，黃偉文寫得清楚吃鯨魚者為何人，所以吃鯨魚呢個人類根本唔會做得到嘅行為亦好易理解，而「隨時能屠殺／也不必講究良心」中嘅屠殺，亦唔會偏向無關主題嘅多餘聯想例如種族屠殺，落點相對清晰。

然後我地亦可以研究「若未夠赤裸／撫摸到永遠」同「在婚紗中再見」想表達乜嘢。前句之中，赤裸應該係指主人公將自己心聲表露無遺，但對方無動於衷，然而呢點基礎，根本幫唔到讀者去理解到底係邊個撫摸邊個，同埋點解要撫摸，可謂上文不接下理。而後句之中，在婚紗中唔同在婚禮中，到底點樣至可以進入婚紗之中，又係百思不得其解。陳詠謙可能會辯稱呢啲就係創意，同埋寫到明在婚禮中再見就係死板，但達到一定文字鑑賞門檻嘅人，相信會知道咁樣寫絕對唔可行。

講返成個敘事，其實真係撲朔迷離。我至今再聽，都係諗唔明到底主人公同埋對方係情根早種，定係有緣無分。歌詞講到今世「當你想行前一寸／愛下去又發現你／站到一邊」，又講「卻是證實這段愛／沒有起點」即係對方根本唔過電，發展機率近乎零，既然如此，點解主人公會有認定大家係「分開一百年／捱到今生才遇見」？「拉扯著那根線」又到底從何而來？《紅樓夢》之中，曹雪芹一開始就以神話領起，寫賈寶玉係頑石入世，而林黛玉則係絳珠仙草，其後兩人一生糾纏係命運嘅安排，此之所以愛得轟烈，傷得淒苦，但同百年好合正正相反嘅百年不合吹到咁大，去到最尾只係講返某一世嘅小情小愛，未免流於小題大做。

5. 小問題＋3am

AGA嘅〈小問題〉係好聽，但一聽就發現取材好大問題。雖然應付失戀各有各法，喜愛夜蒲放肆買醉都可以係反映現實，但主人公個性之差難逢敵手，我估唔到連詩雅都終於會遇到競爭。「穿起高踭取悅人」同「只記得我新結識那碧眼金髪的氣質」，於我而言，某程度上係物化女性，矮化女性；「只須很悉心的設計／裝飾我這身體」同「只須很瀟灑的破費／修葺我每處枯萎」，刻劃出主人公滿足於物質，只顧外在，形象實在相當廉價。最弊嘅係，首歌完全冇任何自強之寄意，反而係以「我只得這一點智慧」為放浪行為開脫，歌手形象徹底崩壞，MK到無以復加。

而用字方面，「我不要雙眼承受雨季」嘅雨季又係毫無鋪墊就彈出黎，引用返林夕嘅意境論，雨季係老嫗能解嘅傳統意象，要寫唔係唔得，但成首歌冇提過水，冇提過雨，連眼淚都冇提過，突然以雨季去寫哭泣，就係顯得突兀嘅原因。再睇「別這樣干擾我一生」，干擾係同接受訊號有關，如果對方係干擾，主人公應該由頭到尾都係對佢反感，但既然曾經癡心錯付，對方好歹都係過氣情人，要貶損對方，以打擾形容，會比干擾合適。參考返黎明嘅〈我這樣愛你〉，會見到林夕有用覆蓋去寫主人公對情人嘅愛綿密如羅網，而「何時才發現／就算天涯海角／都可能覆蓋」之中嘅覆蓋用得準確之餘，更加迎合到和記廣告行銷要求，一石二鳥，天衣無縫。

而〈3am〉其實一首好難出事嘅歌，事關英文部分都應該係跟返demo，偏偏又畀陳詠謙踢出身價。「如假開心開心開始假得很／倒不攤開這張牌」運用頂真，但又係砌詞搪塞；而「終於真的真的不再有情意」同「 終於真的真的不同行」用詞重複，但真的二字唔係歌詞要旨，因為主人公只係夜半失眠，唔係陷入幻想，分唔清夢境同現實。陳奕迅嘅〈不來也不去〉之中，有「如煙／因給你遞過火／如火／卻也沒融掉我」，林夕嘅頂真係用得其所，因為兩句確有承接。而同樣係陳奕迅嘅〈K歌之王〉之中，有「才令我因你要呼天叫地愛愛愛愛那麼多」，其中嘅愛字四連，有嗌破喉嚨之意，係愛到力竭聲嘶嘅出色詮釋，又係用得啱啱好。

6. 矛盾一生＋揮揮手

JW嘅〈矛〉唱到街知巷聞，控訴對方不知上進，無意結婚，好多人都會引用「矛盾只因深愛著」自況，而我自此至終，都唔明乜叫「跌下來瘡疤」，而「怎會沒決心成家」亦有力問鼎陳詠謙十大缺乏語感排行榜三甲。成家呢個用語從來唔會喺抒情歌入面見到係有原因，事關多元成家、成家立室、立業成家中嘅成家，係新聞用嘅正經用語，一般人談婚論嫁，多數都係講返結婚就算，唔會選用咁沉重嘅字眼。正如我地唔會喺同朋友傾偈嘅時候話「有見及此，我會出席」，或者「多謝你諮詢我意見」，而係會講「你咁講，我就去喇」，或者「多謝你肯聽我意見」，又正如去餐廳嗌嘢食落order，我地會講「I would go for this one」，或者「I would like to take this one」，同自己朋友或者情人講嘢，就算幾咁相敬如賓，多數都係講「I want this one」，頂盡都係講「Can I have this one」，用字係應當有場合之分，身分之別，唔可以隨心亂講，任性亂寫。〈揮〉之中有句「成為寂寞人口／脫去戒指」，所犯同上。

而講到用韻乸西，〈矛〉副歌用死「aa」，以嗎吧為主，輔以架怕疤，亦係佢嘅代表作。雖然林夕曾經話過押韻其實並非必要，只係因為要迎合主流見識至堅持押韻，但用韻會令首歌易記易上口，亦令文本朗讀之時有節奏美，都有合理之處。押韻毋須句句押，隔句押亦得，最重要都係睇旋律頭，但無計可施就求其採用「aa」韻，呢點大概就係師承黃偉文嘅結果。黃偉文所填嘅〈囍帖街〉同〈苦瓜〉雖然都係大熱，但取材新穎，都掩飾唔到其人押韻手法之不足——用助語詞押韻，畢竟係有啲技窮。反觀我個人相當中意嘅〈東京百貨〉，陳少琪喺副歌係用「iu」為韻，填咗照秒少調潮票，詞句曉暢而不落俗套，可謂熟能生巧，自出機杼。

再呼應返AGA首〈小問題〉，其實〈矛〉嘅故事都係不知所謂。空有冤氣對白，缺乏具體劇情，hook line勉強可以漁翁撤網，但副歌完全打動唔到人，此其第一問題。第二問題，就係愛情觀片面膚淺，從未細加探討愛情，更遑論明寫愛情，暗寫人生咁樣去傳道解惑，繼續流行曲社教化之功能。林夕寫情寫理天下無雙，黃偉文偏向市井，都算寫盡失戀苦戀，入心入肺；而周博賢專寫時事，針砭時弊，周耀輝別具詩情，寫歌寫出詩嘅朦朧美，基本上係各有特色，而陳詠謙嘅風格，大概就係攞你命三千式殺人於無形，一聽到就想飛歌轉台——我斗膽封陳詠謙為寫歌界嘅葉念琛，相信冇人會有異議。

7. 姐姐＋活著為求甚麼

李克勤自己都係識寫詞，點解會接受到呢首歌詞，我覺得重驚人過向曼聯送禮。「原來沒有你／但仍愛你／才後悔當天不肯留住你」雖然略嫌肉麻，但出現喺主流情歌其實真係一啲問題都冇。問題係，呢首歌所描述嘅係家傭，主人公對佢抱有嘅應該係感激之情，而唔係愛情，到底點樣至會牽掛到「朝馬尼拉的方向想起你」，視姐姐為「愛的傳奇」？唱到「忍痛／將你淡忘」，我直頭覺得李克勤情深過楊過，根本應該離婚休妻，另娶姐姐。

情節上，呢首歌都有犯駁之處。一般而言，如果僱主僱員關係良好，姐姐離職之後，雙方都會保持聯絡，好少音訊全無。而既然姐姐冇離開過香港，亦即係轉咗僱主，咁主人公又點解會炒佢魷魚？「誰料我路過砵甸乍街／竟找到你」呢種電光火石，好難講得通。我嘗試去消化故事，唯一可以諗到嘅就係主人公情不自禁，苦戀姐姐，家人發現之後執意驅逐姐姐，結果主人公只可以喺姐姐有可能出沒嘅街頭巷尾搜尋對方倩影，重溫舊夢。假如有朝一日李克勤真係轉行呢種路線，講婚姻背後辛酸，講自己同屋企姐姐打得火熱，或者大眾會受落都唔奇。

用字方面，呢首歌最差嘅係「天天飾演乖少艾」，其他都可以放過陳詠謙。話說少艾一詞，語出《孟子》一句「知好色則慕少艾」，解年輕貌美嘅女子都真係好有歷史。而現代人之所以認識少艾，相信都唔係因為讀古書，而係聽得多青春少艾呢個配搭。撇開姐姐點解會以少艾形容呢點唔講，艾本植物，少艾即以艾草正鮮比喻少女亭亭而立，可見少已經係形容緊艾，而乖少艾三字呢個組合，就即係用咗兩個形容詞去寫植物，而乖係唔會拎黎寫植物。即係我地可以話一個老人家老當益壯，如同長青樹，我地唔會話佢襟老長青樹，因為長青已經表達到健康，而且襟老都唔會係要黎形容樹。

順便講埋〈活〉。林夕珠玉在前，黃偉文都有首〈燕尾蝶〉勉強壓卷，陳詠謙挑戰社會議題，無異於引火自焚。「容顏暴露摺痕」所指嘅應該係個樣好老，皺紋暴露老態，又係要聽眾自己諗。「幾個悲哀章節日日重播／天降天災萬民地上縱火」，所指嘅應該都係天災人禍大家有責，但縱火狂徒為何人，又係語焉不詳，除咗令人諗到喜怨無常嘅舊約上帝，都真係冇乜idea。

8. 半祝福＋Gonna be alight

周殷廷其人已經不知所終，但由陳詠謙操刀嘅作品，將會遺臭百年。祝福舊愛，同類歌曲多不勝數，但希望情人「快樂得更明顯」，係咪即係指對方之前都係快樂，但快樂得較為收歛？若果快樂都可以有introvert同extrovert之分，而陳詠謙又真係寫得出，其實確實會好有啟發。副歌致命，在於突然加插槍擊，「如果他真的比我好／別再時時開槍亂掃」，again，敗壞意境。Verse2主人公心態慢慢轉變，講起對方已有新歡，其實都易明，但「你已毫無疑問找到安慰睡眠」呢句又係病句。找到應該係指向人或者物件，虛嘅找到人生方向都得，但睡眠係一種狀態，進入夢鄉可以，但搵睡眠出黎係講唔通。

上承周柏豪歌曲入面大量運用赤裸，陳詠謙又再無緣無故加插情色，好地地一首最後祝福，即刻變到俗不可耐。諗到對方會同新歡有性行為係可以理解，但以「隨便白天纏綿／夜晚裸露別來送我上苦路」白描，就係自亂佈局。〈半〉嘅基調係純情，周殷廷嘅定位亦非大講鹹濕，裸露二字亂入，格調之粗劣，真係不敢恭維。

〈G〉其實都係聽得過嘅歌，風格有啲似林奕匡首〈Good Man〉，但細聽之後又聽到副歌有句「甚麼東西正在變做美好的團體」，不知所云。Verse2有句「青春出於笑容裡／開滿花」，其實都解得通，但第二句「率真出於眼神裡／一句話」嘅嗰句話從何而來，又係毫無預兆，石頭爆出黎咁。好地地一個新人，唱咗首膠歌，然後就萬劫不復，真係不無惋惜。

9. P.S. I Love You＋壯舉

張敬軒係我本人極之欣賞嘅歌手，好彩佢人在英皇而非華納，未來唔似會再有同陳詠謙合作嘅可能。〈P〉其實算係不過不失，但因為林若寧同林夕寫過好歌畀張敬軒，而張敬軒自己早期作品都寫得青澀可愛，陳詠謙嘅歌就相形見絀。故事寫因戰禍而天人相隔其實好清楚，但主人公喺副歌嘅內心戲，可謂不明不白。「忘掉了生死／用愛跟這世界對比」，其實睇唔出邊個死咗抑或係一齊死，但既然係人生無常，話係不可以抱著你，會比「不需要抱著你」更加合理。然後「逾越了生死／當知這份愛從沒禁忌」又係全無鋪墊，因為首歌冇講過呢段感情係禁忌之戀，而為死去情人守節，亦唔係禁忌。「生死難忘／別忘記自己」，驟聽似係一種提醒，提醒自己要好好生活落去，但其實突然筆鋒一轉嘅呢個提醒，同「在雲中禱告／祝福你／繼續飛」係冇衝突，因為主人公由頭到尾都冇話過要殉情。

然後繼續睇Verse2﹐病句又至。「當一切／沒法逃過了劇震」，既然係逃唔過，點解又會用個了字？「誰在瓦礫中獻吻／講永別卻那麼接近」，卻前卻後轉折不清，卻字無法理解。「捉不緊的有太多／這一雙手在提示我／時辰到／人如初」，呢雙咁重要嘅手又係突然出現，極其量只可以話佢上接Verse 1之中「硝煙裡／讓我除去了面罩」嘅手，但有冇必要用雙手除，聽眾不妨存疑。快飛去結尾，「珍惜這份愛才是勝利」換成粵語，就應該係「珍惜呢份愛先係叫贏」，然而本身主人公未有誤解勝利定義，因此亦冇要糾正嘅地方，陳詠謙想用才是二字帶出乜嘢訊息，我都依然未悟到。

另外亦必須要討論〈壯〉，畢竟呢首可以話係陳詠謙眾多作品之中最言之有物嘅一首。我地都知道所有創作者喺寫自己最熟悉嘅題材往往係寫得最入肉，林夕寫苦戀寫到出神入化，黃偉文寫同志戀情別出心裁，都係因為有親身經歷，所以緣事而發，份外有感。意淫其實冇問題，樂而不淫，無傷大雅即可，而陳詠謙擅寫不顧後果嘅價值觀，就寫出咗吳雨霏嘅〈告白〉同陳奕迅嘅〈碌卡〉兩首佳作，係要欣賞。然而我地必須思考嘅係，一個填詞人只寫得好呢種缺乏深度同修養嘅歌詞，可唔可以稱為最佳填詞人。無可否認，黃霑林振強林夕等人確實係一下子將平均數扯得太高，令到後來者好難超越，但文從字順，詞有所指，應該係最低標準，如果連咁都做唔到，直接出demo派台instead of固守曲詞俱全嘅舊例，可能至係更佳出路。

10. 給兒子的信

唔少為陳詠謙平反嘅人都話呢首寫得好，以此作結，真係最好不過。一般人一定先入為主，覺得寫畀自己親生仔，點計係誠意之作，冇理由鳩寫，但陳詠謙不負眾望，又一次成功鳩寫，本色出演，繼續陳詠謙獨樹一幟嘅意思含糊，言不及義。「成年路太遠你學識怨命／所以任性／難受但我會繼續供應」，唔知佢供應啲乜，照計係愛，但真係讀者估，唔係作者寫；「若我有天跛了／你戴上我的眼睛」驟聽好有意境，其實唔知戴上父母嘅眼睛為乜——靠後生傳承自己人生經驗，唔使等老咗至做；代爸爸去環遊世界，亦冇理由用返爸爸對眼；陀住爸爸一對眼球出遊，反而顯現到少少心意，但又不切實際，背離常理，總之點講都唔通。

再睇「如果天地狠狠的將一切理想／破滅了」又係反面教材，大家千祈唔好有樣學樣。破滅，常用於理想或者幻想破滅，此中破滅非關外力，只可以係自體消亡，如果想話理想破滅係外力迫成，簡單可以用消滅用殺掉，靚啲可以用扼殺用磨蝕。雖然語言潮流時刻變動，我地唔可以一味泥古，但將某物破滅呢種寫法，如無意外，過多一百年應該都唔會獲得學界同世俗認受。用呢句病句做副歌第一句，有人話一聽就無名火起，呢種反應真係合理不過。

宏觀睇返成首歌，主人公到底抱持點樣嘅心態育兒，我亦甚為不解。佢有話「還是流我的血／你別忘掉」，提醒對方記得有自己嘅支持，亦有話「是我對不起你」同「可以恨我」，承認自己生仔出於自私，似乎有盡力善待同保護小朋友去盡力彌補之意，但再睇「我對你好／不須答謝我」，又主動提起自己嘅好，提起完又話「不須答謝我」，聽完只覺呢個爸爸暗啞底想要人知恩報恩，但又唔敢直講，扭擰造作。更加得意嘅係，呢個爸爸一直都流露無限愛意，又講到唔介意小朋友失敗，只求佢開開心心，但又忽然狠心咁話「註定某日我將拋棄你於荒野」，到底係因何而生嘅轉折？拋棄本身暗含主動之意，字面意思只可以解讀為主人公主動為之，但呢個爸爸愛心爆棚，應該係對親兒不捨不棄至係，點解會註定拋棄親兒？如果佢想講嘅係人世間自有規律，迫到父母不得不拋棄子女，咁就一定要講得清清楚楚，否則就好難呼應其後嗰句「你永遠有一種愛／從未缺少」。概而言之，呢封信真係好深奧，除非佢身體力行去抵制香港政府強制十二年義務教育，用自己一套中文去教仔，否則佢個小朋友未來都好難聽得明佢想表達啲乜。

總結

時間有限，每首只可以點評少少，但不知不覺，都寫咗六七個鐘。我試過填詞，知道填詞唔易，但自知之明，理應人皆有之。我相信大多數人都係不滿佢「我叻仔我可以肥」嘅招積，不滿蜀中無大將，而廖化竟自以為曹操。我個人偏好林夕，上文信手拈來例子大多以佢作品為主，希望大家體諒。最後衷心希望呢個寫得相當簡單嘅分析，算係勉強整理得到大家嘅見解，我知「殘忍只須一棍」同衛蘭都好恐怖，但考慮到其中問題同以上例子大體相似，在此不贅。辭多歉甚，如有補充賜正，歡迎切磋交流。

https://gnimmm.com/2018/11/25/smartfatchan/