每一次分手，阿強都會埋怨女朋友背叛佢，百般刁難唔畀對方離開，其實女朋友觀察過、冷靜過、妥協過，甚至講出咗雙方嘅問題。一個女友係咁，兩個女友又係咁，三四五六七八個都係咁，不過阿強始終認為所有責任喺對方身上，唔覺得要檢討，甚至要人哋畀掟煲費先可以走。

阿強，係我舊老闆。

我未試過返一份工係合約寫明一年內走要賠一個月人工，就算你提前幾個月通知都好，總之頭一年內任何時間走，麻煩你畀錢贖身。當年我未試過做呢類工，仲要係大公司，心諗你嚇我唔到嘅。

返工第一個月，幾乎日日有散水餅食，嗰陣係蜜月期，作為新人梗係唔明，久而久之真係發覺有啲位好難做，Office內嘅同事亦可分為5類：

1) 視錢財如糞土，唔開心咪賠錢走囉咩呀！

2) 走，唔L賠，告我吖笨。(公司真係有告)

3) 做得好開心，因為佢哋係迫走人嗰班膠層。

4) 由Day 1 開始日日話辭職，辭L到你結咗婚生埋仔，個仔讀埋大學，佢都仲喺度做。

5) 聶瞳，又名窮L，真係冇錢賠，我返埋位做嘢先喇。

其實我曾經致電勞工處了解，職員好細心兼友善咁同我講：「我哋淨係幫到勞工法例，你嗰條係合約法，要另外搵律師問。」職員好好，係勞工法例唔好啫。

老闆加得落去合約度，點會死錯人吖，阿強有律師團隊架！

大家開宗明義有呢條例，我覺得唔可以怪人，咁巴閉最初我可以唔簽架，但重點係從此之後我明白一樣嘢，間公司好做就一定唔會有呢條例，有得呢條例就一定惡做。

聽講我舊公司以前唔係咁，自從某年啲人不斷辭職之後就開咗新例，大把我呢啲人限於唔想賠錢而留低，只係留得住個人，都留唔住個心，大家關係根本唔會甜蜜，移情別戀係遲早嘅事。

簽咗約就代表要遵守，呢個係合約精神，但如果我係老闆，會寧願花時間睇下啲人辭職嘅原因，人人都係咁，代表咗公司真係有問題，唔應該將所有責任歸咎於員工，甚至下下都話後生仔唔捱得，就算啲人因為唔想畀掟煲費而留低，一年後咪又係一個循環，要留住人才，搵個源頭出嚟改善先至係上策。

#我聽日唔返工成日坐喺屋企覆inbox
#未收到回覆請你等我
#想SayHi可以inbox我

❤️❤️❤️the used in love and death cover❤️❤️❤️幅圖令我思考咗好耐