早幾日係會展的士站被拒載。最衰U字頭間野要收我成四倍車資。如果唔係我都唔會硬着頭皮去的士站俾人激到一肚氣。個日會展入面有個幫辦同Madam ，所以我就過咗去Report單嘢。有冇實際作用大家都知㗎啦？

琴日見到呢單新聞（https://hk.news.appledaily.com/…/…/article/20171205/57543503
） 嘅Follow-up，見到少一個傻嘅的士司機喺路面都叫有D安慰（當然係Temporary）。不過睇啲網民留言，發現普遍啲人都唔知咩叫Hospital Order 「入院令」。

司機俾人拉左之後發現佢語無倫次，要見精神科索取報告。Forensic Psychiatrist 就會判斷佢有冇精神病，有乜嘢精神病，同埋佢犯罪係唔係Solely因為佢嘅精神病。咁痴線嘅人都可以因為佢本身鹹濕而非禮人，唔一定下下都係因為聽到幻聽叫佢去摸。醫生容唔容易分到同埋容唔容易俾病人呃就另計。

之後醫生就會建議病人喺邊一個地方接受治療最理想，例如小欖，以及建議Minimum治療嘅時間時間。通常三個月都係Standard。所以入院令只不過係最少嘅治療時間，唔係只係醫佢三個月就算。呀司機病咗咁耐，之前又唔返去KH複診，呀水都唔知佢三個月會醫得好啦。啲網民唔使衝出嚟Seven嘅。

完咗三個月入院令，通常醫生會再評估佢而家進度如何。未醫得好，就會建議佢繼續喺其他精神病院接受治療。但通常就唔會再留喺小欖。佢住邊頭就會掟佢去嗰邊醫院。

最理想就梗係醫到佢好為止啦。當然世事無咁完美。通常醫咁上下，見佢病房表現理想（冇暴力傾向，或者再犯錯嘅可能性低），越嚟越收得多人病房開始爆棚（即係呀姑娘開始俾說話你聽要出症）， 咁就會放佢返出去。

呢D叫喺社區繼續接受治療，幾好聽。啲外國話咁樣人性化啲。唔使成日困住係醫院咁唔人道窩。都係個句，佢叻唔叻，呃唔呃到醫生就睇佢功力。出到去佢食唔食藥，覆唔覆診，俾唔俾個案經理PCP或者社康護士CPN探就另一回事。

Hospital order 嘅 Reference: Cap 136 Mental Health Ordinance, part IV

香港蘋果日報再次報導「懷疑醫療事故」，Dr Who 再次為大家釋疑。

跟據新聞同埋小弟探聽，事發係一位肝炎病患身上。同一般大家聽嘅乙型、丙型唔同，呢位病人嘅肝炎係因為自身免疫過份活躍，「自己打自己」而引致，所以需要使用類固醇去控制病情。可惜嘅係，藥物未能有效控制佢嘅情況，而佢都因此需要排隊換肝，但係排隊期間，佢不幸染上肺囊蟲肺炎，令到佢而家連肝都未換得住。

蘋果就引述專家：「懷疑開漏的抗生素為磺胺類抗生素複方新諾明（Co-trimoxazole，又名 Septrin），有專家指不少研究文獻均指，若長期接受高劑量類固醇治療的病人，感染肺囊蟲的風險大增，若病人服用預防性抗生素，可降低感染率，故認為『（抗生素）畀到呢個病人嘅好處係多過壞處』。」

1）「若長期接受高劑量類固醇治療的病人，感染肺囊蟲的風險大增」

的而且確，免疫系統正常嘅人係基本上唔會患上肺囊蟲肺炎（Pneumocystis Pneumonia，PCP）一般人患上嘅肺炎都同呢隻病菌無關。要得到呢個病，免疫系統一定要相當差（例如愛滋病患、長期免疫抑制病者等），而服用高劑量免疫抑制藥物（例如類固醇）的而且確係會增加患上 PCP 嘅風險。

2）「若病人服用預防性抗生素，可降低感染率，故認為『（抗生素）畀到呢個病人嘅好處係多過壞處』」

小弟問過本地有相關專業嘅醫生，香港指引一般會為兩類病人開出肺囊蟲預防性治療（Prophylaxis）。一為愛滋病患者，二為器官移植患者，係報導中嘅病人係並不屬於呢個兩類別。

「蘋果學者」話不少文獻指「開定藥係利多於弊」，於是我又手痕上網搵下資料。

對於應否為非愛滋患者處方肺囊蟲預防性治療，國際醫療界並未有公論。而一份研究就指出，如果病人得到 PCP 嘅機會係大過 6.2%，就可以考慮處方相關藥物 [1]。咁夠竟咩叫 6.2%，唔同研究就整合左一大個列表出黎，一般黎講包括以下病人：

* 服食超過一個月高劑量（≥ 20 mg）類固醇並且同時有其他免疫系統抑制情況（例如血液科癌症、其他免疫抑制劑）嘅病人
* 部份血液科癌症病人
* 接受器官、骨髓移植嘅病人

所以，無論係本地指引或者外地勢力，博愛醫院嘅做法應該都係無違反一貫做法。

當然都係個句，我都係探聽返黎同上網搵文獻，小小醫學生理解有誤嘅話請多多包涵同指正。

[1] Stern A, Green H, Paul M, Vidal L, Leibovici L. Prophylaxis for Pneumocystis pneumonia (PCP) in non-HIV immunocompromised patients. Cochrane Database Syst Rev. 2014

正經Mode：長文3，慎入

唔夠精神科醫生/資源不嬲都知。你又知唔知膠層點對付要縮短輪候時間嘅壓力？佢哋會叫前線嘅醫生仔每節門診額外睇多幾個新症。新症會分嚴重程度。新仔係會睇中級嚴重Cat 2 Case （即係你哋平時認知嘅精神病，例如抑鬱、思覺失調等等。但係唔嚴重到要即刻入院，冇傷害自己傷害人哋嘅風險）。 總之做靚條數，清左條隊，同返傳媒講而家輪候時間縮短到幾多幾多個月。但係無人提過睇症嘅質素。

你要知道新仔最慘可以本身一晝4個鐘嘅門診，已經要睇40+個舊症，再加不嬲都有嘅一個新症+/-半個轉症。新症/轉症最少都要睇15至30分鐘（其實真心已經好過份地快）。剩返三個半鐘頭睇40個舊症。每人有5.25分鐘敲門/入嚟/坐低/講嘢/醫生打case notes/print藥紙/再叫佢起身出返去。

呢5分鐘內你係要睇下佢有冇復發、有冇隱瞞病情、有冇傷人或自殺風險、有冇按時食藥、食藥有冇副作用、使唔使轉藥、再安排埋抽血、安撫一齊黎嘅屋企人、睇埋唔係精神科嘅病例如佢今日頭痛傷風感冒想攞埋藥⋯⋯仲未計其他Social Problem：想攞公屋，有咗公屋但係想調因為唔想對住垃圾房對面，想攞傷殘金又唔想返自力更生計劃，唔想返日間醫院等等。一有個抑鬱嘅入嚟要喊下你要俾佢Ventilate再做埋Counselling，你就要拉上補下喺其他舊症偷返時間。

呢5分鐘你就要考慮你有冇放個計時炸彈出去，佢使唔使快啲返嚟覆診（但係你啲OPD期已經爆曬唯有叫出面文員係咁加quota俾你，又逼到自己死，節節都係40+個症），定係搵嗰個案經理PCP跟佢，Or即刻勸/逼佢入院。

當然仲有一堆功課要做：簽綜援，簽傷殘金，睇社工/日間醫院姑娘/職業治療師/心理學家報告，寫N咁多份醫療報告，開低能冇意思大家都係噏廢話嘅Day Hospital Round/開PCP Round/收法庭傳票做Expert Witness等等。我都未計又要預埋啲時間比病人同屋企人鬧你冇醫德冇良心。

跟著On Top而家仲要叫你睇多一至兩個Cat 2 新症。你估質素如何？衰左瀨嘢，醫生仔自己孭。

不過唔好愁，膠層都會幫手架！佢地自己係會睇唔嚴重嘅Cat 3 Case。佢哋通常都已經等左幾年，所以當中有一半已經自然流失。舉個例：阿女同個男友分手，唔開心，所以想睇精神科，GP dx acute stress rxn。等左兩三年之後，已經換過幾次畫。佢話唔使再嚟睇，Case Close。其餘嘅，係啲輕微失眠嘅個案，即係唔係因為抑鬱又或者濫藥瞓唔到覺等等⋯又或者返工有少少唔開心想過嚟睇，但係已經轉左工，又或者已經習慣咗適應左。嗰啲通常睇一次Screen過冇嘢就可以Downgrade佢番去GOPD嘅Integrated mental health program（唔知仲係咪呢個名？！），又或者直情FU PRN唔洗鬼再番黎。

膠層一節OPD通常淨係睇10個以內嘅舊症，加埋追一個唔知黎唔黎嘅新症。以佢嘅功力，一個鐘已經可以KO曬，喺間房又同個🍊開 GI Meeting.

Bonus：新仔清Extra新症，最好自己Mark低條數。譬如佢同你講清10個就夠，一定要自己計清楚。如果唔係通常呀經理會俾12、3個你睇。你問佢夠數未嘅時候，佢先至話哎呀，呀邊個搞錯左， 你原來睇多左添～～～ ^_^！

PS：有啲膠層都好好會幫手衝症，少數囉⋯⋯但係而家大多數D好人都頂唔順HA，出咗Private Lu～～

PPS：Sorry，off topic 添！本身睇到郭家麒個post其實我係想講：你估有幾多Psychi係做兒童精神科child psyc 個Team？精神科永遠最大Team嘅就係General Adult，而我頭先廢噏嘅都係講緊成人精神科嘅資源，Child Psyc嘅資源少之又少😣～～

【精神病患者孤立無援 政府坐視不理】
香港近日發生多宗自殺個案，開學季節更是學生自殺的高峰期，單在上個學年就有31名學童自殺。

但在這樣嚴峻的環境下，每年為超過23萬名精神病患者提供治療的醫管局，卻只有356名精神科醫生。

情況如何嚴峻？可以從抑鬱症病人首次求診的輪候時間得知，他們要等近2年的時間！

政府根本對精神病患者坐視不理！

#學童壓力 #精神壓力 #精神健康