［紫砂茶壺］CLSA 變成一間大陸國企中信里昂，預咗啦下話，其實比預期中遲啦。好快名都改埋你

TLDR：CLSA，就等於籃球嘅AND1，或者英超溫布頓隊。癲佬兵團。咁畀人收編咗仲係咪嗰回事？當然唔係。正如車仔麵大排檔入咗舖都唔係嗰回事。但你估買嗰個唔知？

原文：How China’s Top Broker Tamed the ‘Insane Asylum’ of Hong Kong Finance（https://bityl.co/3Prx）

1. 相當好嘅文，當然係要科水。話時話埃汾耐唔耐有啲gift subscription（完全合法，因為我係付費訂戶），耐唔耐都在Patreon抽獎。不過不定期，你當bonus好了。無論如何支持下埃汾個Patreon（https://bit.ly/31QmYj7）．一星期至少三篇港美市場評點，一個月一舊水唔使，開張一個月已500人訂！仲有兩篇免費試睇。

2. 廣告賣完，講返個來龍去脈。首先早排在Whatsapp講開CLSA某神級人物，原來過咗檔我都唔知（證明我已經離開呢個圈）。然後早兩日見到WSJ呢篇文，今日又見有港媒講，咁就three times a lady，一定要寫

3. 想講，CLSA（里昂）係一間好特別嘅公司！行內人，做股票應該知，但行外人未必知。我一時都醒唔起有乜其他行業可以相比。可能係AND1？定係NetFlix？卒之諗到，其實CLSA，即係以前英超溫布頓！癲佬兵團！

4. 全部比喻都不倫不類（其實可能AND1最似樣），但無非想表達，CLSA係一間真係有「企業文化」，與眾不同嘅公司。講大，佢唔係最大。賺錢？唔係最賺錢。人工？亦唔係最高。但，就係唔撚同。做過CLSA係真係型啲，特別係Research Analyst （我當然冇做過，見都冇得見，係咁上下水平。我最勁就只係去到見德意志銀行或者瑞信嗰啲級數）

5. 文章嘅題起得好好，Tamed，馴服佢。馴服咗呢間Insane Asylum，痴線佬集中營（定避難所）。咁畀人馴服咗嘅CLSA仲係咪CLSA？唔打茅波唔拎牌嘅溫布頓仲係咪溫布頓？就當然唔係嗰回事，但買嗰個其實未必介意，或者都控制唔到

6. 寫得真好，正如上面講，CLSA咪就係癲佬兵團。當然佢地未係溫布頓咁癲，但好多都係啲主流一線大行撈唔掂，或者唔想跟果套嘢嘅鬼才去落腳。咁你知啦，一線大行，梗係搵錢為先，扼殺創意，一定係咁。即係以前TVB咁，流水作業嘛。但亞視先有開心主流派。

7. CLSA，就真係CLS的。CLS固然係Credit Lyonnais Securities，但重點係A，Asia，呢間公司由第一日已經同其他行唔同。其實間公司係香港創立嘅！創始人係Jim Walker與同埋胡漢輝（原來我公司樓下間利昌金舖就係佢，失敬）。之後先到里昂入股。留意最初幾個高層都係SCMP記者，唔係金融出身，亦令到間公司由頭到尾就唔同

8. CLSA最出名，應該有幾樣嘢，幾樣嘢都同佢地與眾不同嘅文化有關

9. 首先，CLSA係一間以Research Analyst 出名嘅公司，十分少見。後來我去唔止一間公司，啲高層對Research不滿指手劃腳，都係會想「參考」CLSA，但當然學唔嚟啦。畀你抄到嘅就唔係真正企業文化

10. CSLA嘅Research，都係以比較出位見稱。但出位唔係嘩眾取寵，或者特別中。但總之就係有啲同人地唔同嘅嘢。例如佢地好早已經用漫畫做封面，甚至專門請一team人去畫。

11. 仲有咩出位嘢？例如佢地會去寫丁蟹效應（https://bityl.co/3PpF），真架，全英文，跟足普通報告嘅format 同flow．做嚟做乜？冇架，過癮咯！但換著第啲行，少不免就畀老細問：整嚟做乜？對生意有乜幫助？只係為你地啲友自己過癮？

12. CLSA仲有咩出名？當然係里昂風水指數。應該大家都略有所聞，啲分析員定阿頭仲要著晒風水衫出嚟講。有乜科學根據？冇架！只係過癮。但吸到注意。當然而家仲有估，不過好似冇咁多人留意，冇計，共產黨唔講風水

13. 仲有乜出名？應該係CLSA嘅投資日。間間行都搞，我都搞過，但人地搞得就係唔同。佢搵咩人嚟講？你以為搵格林斯潘之類（我在北京都聽過格老講，大陸行咪搵佢，佢亦樂於咁呃飯食）？錯，佢搵泰臣，搵碧咸，搵Rihanna 嚟講。夠唔夠型？（其實CLSA都搵過格林斯潘，仲搵過克林頓，可惜冇搵萊溫斯基）

14. 寫咗成千幾字，就講間公司點與眾不同。唔使最大唔使最賺錢但係要過癮要型要特別。引返原文嘅英文，It was probably the noisiest voice and the most colorful voice” in the region. The firm prided itself on being non-hierarchical and freethinking.

15. 文中亦都引返，舊CEO提過Insane Asylum，一線大行生存唔到嘅人，CLSA歡迎你。公司唔講階級，新職員一樣參加最高層會議。

16. 不過俱往矣，其實一路都有人質疑呢套文化生唔生存到落去，畢竟做大事三個條件，銀紙，銀紙，同埋銀紙。CLSA一路強項都係Research同Equity Trading，但好早已經畀人質疑係咪過時。咁加速呢套嘢玩完嘅，當然係大陸佬入股。

17. 時為2013年，中信證券買起里昂。而家都7年，差不多了。借來的時間，借來的地方。最近一兩年就加速「中信化」，「去里昂化」

18. 諗都諗到，CLSA呢套企業文化，同直屬國務院嘅中信，點融合？佢地啲友連華爾街主流大行都頂唔住，何況中信證券？再加上中國國進民退，中美關係又惡化（下刪一萬字）等等。所以都係嗰句，遲早要嚟，7年已經比預期內。

19. 正如文章所謂，而家嘅CLSA，就變到好似一間國企咁。咁但，佢真係一間國企嘛，咁先正常。

20. 一貫作風，買咗返嚟，開頭梗係唔郁住，相敬如賓。咁開頭都真係冇乜干預。但過去一兩年，啲鬼佬高層就陸續出走了，好多分析員亦走埋，大陸佬上場。係咁架啦

21. 亦可能因為咁，見到CLSA在行內投票啲排名都跌咗，乜乜AsiaMoney最佳Research之類，當然你亦可以話得啖笑，埃汾都玩過，明顯拎唔到獎就話得啖笑
22. 仲有，WSJ都冇提嘅，我講。咪話早排whatspp同朋友講起CLSA某神級人物？正係Chris Wood．唔識Chris Wood你都唔好話自己出嚟行。做analyst做到有Wikipedia page喎（https://bityl.co/3PrV）。呢位外型似莫扎特嘅仁兄，在我入行前（即係，15年前），已經係神枱級人馬。佢份weekly newsletter Greed & Fear極出名。當年我直頭視佢為奮鬥對象。結果？咁個撚個打NBA都當佐敦高比或占士偶像啦，踢波個個都視C朗美斯為奮鬥對象啦，咁樓下個阿叔變咗C朗未？

23. 但原來Chris Wood都走埋，走咗成年幾我都唔知。都話我已經離開咗呢個圈（其實從來都冇入過，你踢澳門聯賽又話同C朗係同一個圈咩）

24. 但，講到尾，賺唔賺到錢先？似乎都係不錯，至少暫時係。某程度上多得中美交惡，唔少美國上市嘅中資返嚟香港上，甚至原本想去美國嘅都唔去，留在香港。投行過去一年呢啲上市費相當好搵。而在Asia ex Japan，2020上半年，投行收入最高嘅，就係中信證券。因為多中資公司上市。

25. 呢個當然亦有人講香港市場日漸中國化，但，一路都係架啦。得罪講句，以前又有幾國際？咪又係匯豐一隻？怡和都收埋皮啦，下話？咁以前都不過係英國化啫。但英殖年代當然係英國化，正如回歸後當然係中國化。唔同一堆日本定印度公司嚟香港上市咩。

26. 篇文最初講，「紫砂茶壺」，新一代應唔知係乜。就算知咩係紫砂茶壺，應都唔知紫砂茶壺as a metaphor．但我都係嗰句，一葉知秋，CLSA咪反映香港金融，金融咪反映成個社會。係咁架啦，借來的時間，借來嘅地方。天要下雨娘要嫁人。係架，金牌小龍抄咗都唔似鼎泰豐。但有乜所謂呢？反正鼎泰豐大陸仲賺錢過台灣。

27. 所以都係鐵律，買返嚟，點會唔拆你塊招牌？我地唔係講緊香港電台下話？商業機構，當然係邊個畀錢邊個話事。舊文［誰大，誰惡，誰正確］（http://bit.ly/2WvlUkT）寫過，「最初係A,B，吞併咗就A+B，但記住分莊閒，最後就變成A自己。B個名掉落屎坑。例子太多。隨口講都講到，摩根士丹利添惠，摩根大通，瑞士信貸第一波士頓，瑞銀華寶，匯控獲多利，法國巴黎百富勤。當然仲有，星展唯高達，匯豐獲多利。」

28. 變味？咪變味咯。如果只係想賺錢嘅，咁入股幾個巴仙做財務投資得啦。但自己渣莊就係過癮嘛，所以點解明明創業死亡率極高，餐廳好多都執笠，但依然好多人仆到去做。因為過癮。咁但過癮，多數係有代價。所以我從來都唔信咩返工會開心，如果返工好開心，應該公司收你錢，唔係出糧畀你

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn

【全民媒體】丁蟹：而我不知道張華峰是誰（中環客）

喺香港電台金融服務界功能組別嘅選舉論壇，主持人問張華峰丁蟹係乜水，佢竟然唔知，成為中環大笑柄。當美資花旗銀行都搵一百毛同青姐，再加真身丁蟹嚟宣傳佢個炒股app果陣，你張華峰竟然唔知丁蟹係乜水，咁你仲話出嚟選金融服務界功能組別。

不過張華峰之所以唔知丁蟹係乜水，亦都同華資行不嬲嘅做生意手法堅離地好有關係。要佢地知道丁蟹係乜水，真係有啲難度。

其實最早發現丁蟹同個市竟然有關係，係CLSA仲係法資行果陣，佢地出研究報告去研究丁蟹。一方面法國人本來鍾意研究啲唔正經嘅嘢，法國人嘅行事方式同高登班人好似，另一方面，外資行多數已經多數用程式買賣，正正因為係程式買賣，所以佢地對任何會影響到個市嘅變數都會攞去研究，睇過大行內部啲研究報告（唔係果啲俾街客road show嘅「研究報告」，果啲係sales kit嚟，唔係專業人士去睇都會中伏），真係好刁轉嘅嘢都可以研究，所以大行可以贏有佢理由。所以外資行嘅研究員或交易員可以唔識廣東話，可以生活好離地，但唔可以唔識丁蟹係乜水，因為唔知近排有鄭少秋嘅電視劇出現，就睇少一個變數，就會損失一個機會。

但華資行係另一樣嘢，華資行搵銀方式主要分兩種，一種係做廚房，配股、IPO、stock loan、買賣殻嘅炒手，金利豐就係呢方面嘅領導者，但依家呢種生意好多都被中國資本啲行搶嚟做，因為好多呢類資金都係中國資金嚟。另一種咪狂搵啲中國中產嚟香港炒股搵銀，張華峰間恒豐證券咪主力做呢樣，做到2010年，因為對一個深圳嚟新客盡職審查唔夠（叫認識你的客戶喎），被證監罰款添。張華峰本來係左校出身，已經唔係太融入香港社會，丁蟹果套《大時代》表面講炒股，實際上係對文革嘅大批判，張華峰咁愛國又點會睇呢？

喺一眾華資行同中資行力撐下，張華峰唔識丁蟹都會贏嘅，只不過，喺中環有排被人笑，畢竟丁蟹係呼風喚雨嘅一代神人，咁都唔識真係削咗啲。

中環客

《最好看的大行報告》

以前因為工作需要，所以我要經常接觸sell side的大行報告。自我大學讀書以來，我已經知道大行報告的可信程度，如非工作需要，我是比較情願看其他本土刊物來吸收知識和資訊。當然自從驚天地、泣鬼神、地上最強的雜誌《港股策略王》面世之後，我就自然愛不釋手啦。(渾水按：喂！我又擦鞋啦！加稿費啦喂！) 。

雖然大行報告如此難睇，但其實好多分析員、marketing的人還是依賴它們，所以這其實是一個怪現象，明明份野都唔得，但個個又照跟照copy照參考，所以這些參差的資訊就好似病毒般傳開去。尤其是現在，大行報告完全無助我搵食，所以我已經N耐無睇了。大概是因為太多散戶相信大行的專業吧，我也不排除大行報告會有一些散戶無從得知的內容，畢竟寫這些大行報告的分析員至少都見過下管理層嘛。

話雖如此，我以前工作的時候對CLSA的大行報告算幾有好感。

首先，佢地做的資料和分析雖然無大用，但其實幾有心機，而且它們分析涉及的話題都比其他大行更深更廣。有時國家大選會影響股市，不同黨派的政策也有異，但CLSA的報告是最精簡，是一個不錯的懶人包，作為吸收一些表面知識，這很夠用。

其次，是工作需要。CLSA的報告是比較整齊，表達得比較清楚又不眼花瞭亂。最重要的是他們的圖、數據、表都很工整，用黎「參考」再改頭換面實屬一流，所以我很有好感。

第三，是可讀性幾高幾盞鬼。基本上主流的大行報告都sell專業，行高檔路線。不過，CLSA卻會怪力亂神，搞什麼風水指數。現在全世界媒體講丁蟹效應都會提一提CLSA的研究報告。坦白講，整這一份丁蟹報告是沒有什麼商業利益，不過CLSA卻這樣做，可謂非常搞笑。這份報告是我當年畢業功課有份研究的，當中甚至因為丁蟹效應而build up了一個model，不過當然也有戴頭盔在文中強調：「we have still worked out an empirical relationship for the sake of fun. 」見到這句，自然有種會心微笑的感覺。

（逢星期五刊登於財經雜誌《港股策略王》）