Facebook就好似一個同你拍咗好多年拖嘅人，初初畀到你無限新鮮感，同佢一齊你體驗到前所未有嘅樂趣，以至你每日都將大量時間同心機花喺佢身上，成為你生活嘅重心。 但係蜜月期過後，佢就慢慢開始變質。 有啲人鍾意將另一半嘅事當成談資，而Facebook直情會偷聽你嘅說話，然後再偷偷將你嘅私隱同喜好開心share換取利益。 佢開始以「為你好」為名，控制你接收朋友嘅消息，然後自把自為用演算法強行塞啲佢認為適合你嘅內容同廣告畀你，暗中模塑你嘅思想意識。 當你想發展自己嘅興趣，開個page用心經營，佢就化身恐怖情人，千方百計壓低你嘅engagement，阻止你接觸其他人——除非你肯大量課金。 最近美國總統大選一役，佢甚至將自己嘅立場夾硬灌輸畀你，假公正，一言堂，成個道貌岸然嘅偽君子咁。 明明Facebook咁差，點解你都係離唔開佢？ 因為你同佢有咁多年感情，喺度有咁多相片，留低咁多文字回憶，所以步步回頭，欲斷難斷。 呢度有晒你所有朋友，你哋喺同一個生活圈子，離開Facebook就好似分手之後被逼同某啲共同朋友疏遠，呢種扭結成為咗無形嘅枷鎖，令你寸步難行。 更重要嘅係，大家一齊咁多年，好多嘢已成習慣，只好得過且過，而年紀漸長，好奇心已經磨鈍咗，「試新嘢」變成一種負擔，心裡面有一把聲音說服自己：就算搵到下一個，都冇人可以保證會比佢更好，既然係咁，多一事不如少一事⋯⋯於是你又原諒佢多一次。 睇到呢度，如果真係問感情意見，相信十個有九個都會識答：梗係要分手啦黐線。既然大家都對Facebook咁不滿，咁點解唔試下用MeWe？ 我哋都唔知MeWe會唔會變成第二個變質嘅Facebook，但至少佢而家暫時冇廣告，冇演算法，唔會販賣用家資料，upgrade某啲功能要收費但尚算明碼實價，唔試下踏出comfort zone，又點會有更好嘅相遇？ 一個人轉會冇咩意思，只有大家一齊行動先有意義。 我嘅MeWe page： https://mewe.com/p/chanfanwriting MeWe個人account： mewe.com/i/fanchan1 IG出唔到link，簡單嚟講search陳煩就得😂🙏🏻