0831 - 0901 宇宙船 扭蛋劇場 罰你

J: 你依家先至做啊？實做唔切啦！
N: 放暑假太開心唔記得咗⋯⋯
J: 你由細到大都係咁㗎喎。
N: 你唔好理我啦！

N: 而家我返學又唔係你返學！
J: 問你啲friend借嚟抄啦！
N: 邊個會借俾我呀？我啲朋友一係轉晒校，一係移晒民！

J: 如果你一早同人地打好啲關係而家咪唔使咁囉。
N: 如果我細個你係同我講普通話，我咪可以同人打好啲關係囉！

J: 你check清楚有冇錯字呀！
N: 呢份寫錯咗都唔使改正㗎⋯⋯你估真係有人睇咩！咁多份！
J: 吖你記得帶啲茶點返去派俾朋友……
N: 太遲啦！你唔好搞我啦阿媽！我已經好煩㗎啦！諗起聽日要入校長室都覺得煩！
J: 使唔使見到校長咁大陣仗呀⋯⋯
N: 遞辭職信唔通遞俾社工同埋科主任呀？

J: 頂多咪轉校！
N: 以我嘅操行，你轉覺得我轉得去邊間呀？
J: 最多我幫你逐間叩門！
N: 我點解一定要返學啫！
J: 唔係你讀個教育文憑返嚟做乜嘢啊？我供你讀㗎！
N: 仲好講！你供唔起我就去咗考毅進啦！你累死我喇！

N: 喂阿媽！我啲信封你又收埋左去邊啊？！
J: 你唔好再對我咁差態度啦下！邊有人叫你暑假最後一日先來寫辭職信呀？你依家怪我呀？

扭蛋劇場重溫請到：

［職場胃腩系列］朋友經驗，再次證明，最緊要寄多啲CV，見多啲工

TL：DR –成和敗努力嘗試，寄多啲信，見多啲工。正如你不停咁唔用套，總有一日會中獎。

1. 出賣朋友系列，其實我知佢唔會介意，雖然其他朋友可能會睇唔過眼。我朋友，叻人，學霸，但邊個話你知叻人會撈得掂（世俗地）？朋友際遇，比上不足比下有餘，但似乎應該值得更好—咁但，呢個世界上，呢啲故事太多啦，對不？個個都覺得自己underpaid架啦，如果唔係我朋友，我先唔會理。

2. 無論如何，在我地提議（其實係威迫）下，佢毅然轉行—決定去教書。我覺得係不錯的。等於狀元讀醫，合理過唔合理。你咪撚同我講咩做CEO做埃賓架幾千萬人工，自己創業又點點點，做醫生又點辛苦。常識，在香港，一個狀元做醫生，基本上係risk-adjusted return最好嘅選擇，完全離晒罩—如果我唔係怕血同手震，我都會做。唔使你做月球人星球人，但，你做個醫管局醫生，都好似七八皮嘢啦？夠你過幾好嘅生活。你望下台灣啲醫生搵幾錢？英國啲醫生又搵幾錢？香港地，讀到醫，梗係讀醫。批評嗰啲都戇鳩。

3. 教書呢？其實都不錯的。如果唔介意冇安雅的話（舊文寫過）（https://bit.ly/2NtTkJM）。但朋友同我都咁上下年紀，安雅又好安心雅又好，乜都玩夠啦。以一個學霸嚟講，去見教書工，幾好的，老校鍾意。咁朋友呢啲，大約你都估到，學霸，當然有啲性格，就畀我更加性格（我04年開始做金融，咩稜角都磨到滑晒牙）。在呢個設定下，你諗下，有乜工好得過教書？唔會發達（其實做其他工都唔會），但維持到個中產生活，又唔會畀人炒（呢點先重要）。

4. 但，學霸何其多？佢係好霸，但我都霸，每年大把霸。個市場有效率的，正如狀元人人讀醫科，咁亦都好多人想搵份教書工，因為個risk adjusted return實在太高—如果你唔介意冇安雅（但我介意，所以最後冇教書）

5. 我由英國戰域返港時，寄（留意，係寄）過嘅求職信，冇一千都有八百，可能唔止？見過嘅工，幾百份—我頂丫，學校我都見過幾十間。好合理，校長鍾意高材生，固然你話，識考試唔等於識教書，當然，但有件 A Level 4A1B嘅（正係本人）同埋一件會考唔合格嘅，你應該都係叫前者嚟面試。校長見到我，發現此人言談輕佻，全無愛心，就後話。

6. 亦所以，我都參加過煙人嘅過程。而家有電郵真好，但當年我地呢，請個中學老師，收嘅CV，係幾箱幾箱咁計（其實間間都係）。因為教書位，對好多人嚟講，實在太筍。學霸固然啱，但得罪講句，有啲勉強入到大學，讀啲乜乜科嘅，你唔教書，真係好大機會在職貧窮，人工低過譚仔阿姐。

7. 咁當年係點揀人嚟煙架呢？答案係，好似大抽獎咁，根本一大堆嘅信，我地係拆都唔會拆嘅—邊有咁Q得閒？亦即係，就當你係愛恩斯坦孔子再世都好，都好大機會就咁沖咗落藍巴勒海峽。揀剩嗰啲，先再睇有冇串錯字呀，邊間大學呀，成績點呀咁。

8. 講到呢度，你就明了—根本就係game of chance，往往同你所有嘢都無關（有啲友可能試下個信封整啲突紋咁，我諗起「羊車行淫」嘅故事）（https://bit.ly/2NvL6AD）。你CV貼張裸照，校長都未必睇到。

9. 所以，點突圍？好簡單，就係，大包圍，乜都寄！甚至明明佢要求你有咩教育文憑而你冇，都照寄—我當年就係冇，廣告寫明要有，但我照寄，咪又係請我。校長貪我靚仔，吹咩？

10. 因為好簡單，太不對稱了，以前仲話要寄信，而家send個email（但聽聞有唔少學校仲要求寄信），頂多作篇乜撚嘢「教學理想」（堪稱史上最白痴嘅嘢）。你嘅marginal cost，近乎零。

11. 呢個亦係我教朋友嘅方法，根本唔使諗。我話根本就好似青蛙（？）排卵咁，係咁屙就得架啦，理得佢。因為佢嘅目標，就係maximize個reach。唔好忘記，好多email根本就咁畀個書記delete埋。

12. 一如所料，朋友都收到唔少面試通知。合理的，CV靚嘛，學霸嘛，我唔通請件數學拎E架咩，你啲廢柴咪繼續講「讀書叻唔等於識教」—但，「廢亦唔等於識教」。至少我係科主任，請件成績好啲嘅，唔會激到自己吐血，唔使教埋佢數學。

13. 朋友面試幾次，都唔成功。我叫佢努力，唔止係勉勵佢，而都係嗰句，game of chance．點可以成功？見到中為止！女嘅嘢一樣，呢件唔得溝第件。而反正你見次工成本低過溝次女好多，至少校長唔會要你請佢食飯。

14. 好啦，最後佢當然得到屙化。但有趣係乜？有趣係，個屙化嚟自，再再之前，好一排之前佢見嘅一間學校。學校見完佢，話，拿，好欣賞佢，但冇空缺。換著我就可能問「咁校長請問你叫我嚟把撚？你好得閒？」。但我朋友係個有教養嘅人，當然照樣連聲多謝校長。結果？早幾日，間學校有條友辭職，校長就翻兜佢，就係咁搞掂—如果佢當初講咗我句對白，就冇呢件事。如果佢將學校個電話block埋，就冇呢件事。如果佢最初一聽冇位啱佢就起身走，就冇呢件事

15. 資深讀者會發現，其實同我最初入銀行嘅過程，極之相似（https://bit.ly/2NtTkJM）。當年我又係大半年前見蕉行，我甚至都唔記得。大半年後我裸辭，去旅行，甚至都冇決定一定唔教書，只係要離開間學校—咁去旅行嘛，當年科技又未先進，咁唔通人地打嚟叫面試你話你去三星期旅行咩，所以我諗住返嚟先搵工，咩嘢都冇寄過。但點知，我入機場途中，蕉行打畀我，就咁請咗我。

16. 個關鍵係乜？記住，老闆都係懶的，男嘅特別係（偏見）。我出一次廣告，見幾條友。咁揀唔中你。但，可能首選嗰個返一陣工就唔撈呢？或者死咗呢？或者有更好嘅屙化呢？好多呢啲情況。咁我係老闆會點？又出多次廣告？未煩過咩。我咪拎返上次嗰堆人出嚟，搵個見過嘅，而唔係十分非常之騎呢嘅，咪執二攤頂上

17. 而嗰個人，就係我，

18. 講咗咁多，堅料嚟啦。記住多啲見工。係呀，就算擺明你唔合佢quali嘅都照寄。就算你擺明係唔想轉嘅，都照去見。所以但凡有啲獵頭打嚟，問我，我都係來者不拒的，幾時我都ready to move．因為你點知呢？你好滿意公司啫，但可能下星期你就畀人炒呢。或者可能新公司見你嗰個好鍾意你，加你三倍人工呢？老死都見咗先。

19. 咁你話，浪費時間喎。咁都係，但，天地良心，你啲時間好值錢咩。真係好值錢，咪去到速戰速決，你唔試點知唔得？牛市時我見工都講明幾多點要走（熊市時？唔趕唔趕）

20. 咁可能啲獵頭呀HR睇到呢度，已經叫你唔好學我，唔好去浪費人地時間。但天呀，屌，啲獵頭呀HR嘅本質，就係浪費你時間架啦！你只係行使返你應有嘅權利！唔好覺得羞恥。真的，唔係我公司，但我見好多畸屎，有啲位，明明人都請埋，都仲照見人。明明有內定，都仲要見人。為顯示公司有公平程序喎，死未。有啲根本冇嗰個位，都仲要見人，了解行情。正如，有啲獵頭，擺明係混吉的，約你出去，係你教佢嘢，你話比佢知咩係buy side 咩係 sell side。根本你每次見工，都可能係一早閂咗門，對面條友撚化你。所以掉轉又有何不可？況且你可以改變主意。對家加你三倍人工，你仲愛你舊公司？

21. 所以，你去見多啲工，梗冇壞。正面啲，你亦都可以知道，人地要啲乜。有啲友呢，可能有幸，入大公司，然後十幾年都冇update份CV，從冇見過一份工—到有一日畀人郁咗，先發現自己連CV都未識寫。等於我朋友，從來冇教過書，根本人地啲術語都未知，但見得幾次，就已經學得似模似樣，識講CM GM Cert Ed PGDE 訓輔合一 人人可教 之類的廢話了.

22. 另外，去見工，你亦知道人地look for 啲咩是嬌碩，你有嘅很好，你冇嘅就加把勁，你聽都未聽過嘅，就小心啲。仲有，你做緊嘅嘢人地有冇興趣，對家覺得你人工低定高—如果對家都暗示你人工高，咁你自己小心，可能你真係overpaid

23. 當然，仲有，更重要嘅，唔見工，邊有得加人工？舊文都講過啦，旨意老細自動自覺加你人工，係含得撚的。夠晒粗鄙，但舊文好受歡迎（https://bit.ly/3exI62J）。

24. 你係公務員呀教書呀年年加人工就還好，但私刑企業嘅，你靠佢每年嗰幾巴仙，就真係含得撚。咁點你先可以加得快？兩個方法。一係你轉工，跳嚟跳去，魚唔過塘唔肥，我加兩三倍人工我話撚知你話我jumpy．一係？你跳草裙舞，拎個offer兇你舊老細。

25. 睇到啦？兩條路，你都要有個offer在手（＊）。所以梗係見多啲工。明冇？

26. 呀，有人話，咁易咩葉師傅，咁易鼠出去見工咩。所以呢，真係唔該你搵份易鼠出去見工嘅工！當然一切只係trade off啦下，但，即係，你在中上環返工嘅，應該易啲。食個飯都可以，或者請半日假都可以（＊＊）。不幸地，你在觀塘返工，而你搵金融工嘅，都真係窄啲。

27. 唔好意思，出賣咗朋友私隱。但，識咗佢差不多四十年（哇！），佢唔會介意。況且今次呢壇求職大計，我都出唔少力比唔少意見，而我明顯唔係得閒得滯。

28. （＊）理論上，你可以賭白頭片，明明冇offer在手都去兇老細。但講大話嘅嘢我唔建議人做，況且，你老細真係叫你去會計部出埋糧嗰時，你點算？

29. （＊＊）而我係從來冇試過因為見工而請假的。當年老細見我著西裝問我去邊，係咪見客，我都係照答佢「去見工」，佢會問我「見邊間」，甚至後期問我「問下佢請唔請Senior嘅位」。當然唔該你搵個好嘅老細。

————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。

入面有埋圖，有埋恒指標普目標價，教埋資產配置，有埋6隻心水股。有港股有美股有大有細。

請去呢度睇：https://bit.ly/37S4iC5

課程編號：CC002
客服whatsapp: 63832145

「學會感謝那，錯的人」── Duncan Taylor the Big Smoke

Patreon 免費 link：
https://www.patreon.com/posts/33769495

Medium 訂戶 link ：
https://link.medium.com/1akfbjYSP3

//

喂又係 #酒精抗疫 嘅時間。

呀，其實上次介紹過支 Bowmore Small Batch ，嗰陣已經係 1 月 17 日，即係武漢都未封城囉，邊度有「酒精抗疫」呢個諗法啫？莫講話搶廁紙啦，當時口罩都未使搶到排隊排通宵。而家睇返，真係有種彷如隔世嘅感覺。

不過，生活還是要過的。既然大家未買到口罩咯，粗粗地袋落信封，下次再攞出嚟頂住先 (按：鬼唔知四個鐘就要換一次？「換」嘅前提係有新嘢可以代替吖嘛。冇新嘅，換條鐵？咁你情願唔戴，定係戴住個舊嘅先？) 再唔係，後生細仔買個豬嘴，搭配濾罐濾棉，都係一個折衷嘅辦法。

當然啦，當我都寫得出嚟嘅時候，我相信新填地街啲濾罐濾棉已經賣到斷市架喇。機會都係留畀有準備嘅人嘅……我呢啲，最叻都只係大年初三去咗百佳買定兩條皇冠廁紙嘅啫。

- - -

2020 年要重複返 2003 年「沙士」嘅抗疫之戰，對於唔同年齡層嘅朋友嚟講，可能有唔同嘅感受。

後生啲嘅， 17 年前毛都未出嘅，對時任特首董建華嘅印象大概會比較依稀，反而可能記得董太董趙鴻娉全副保護衣咁去牛頭角下邨勸啲婆婆「洗手洗手洗手」。

好似我呢啲，當年已經要考中學公開試嘅，當然就會記得，喂屌，戴住口罩喺幾百人嘅試場入面疾走行書三小時係相當之辛苦嘅一件事。又會記得，有首群星合唱嘅歌叫《同步過冬》，同 “We Shall Overcome” 一樣，旨在鼓舞人心。

2003 年嘅香港，仲有一啲會「問責下台」嘅高官。衛生福利及食物局局長楊永強喺 2004 年 7 月呈辭，源於立法會發布沙士調查報告之後，三大黨民主黨、民建聯及自由黨一致要求楊永強問責下台。董建華力保多時都保佢唔住，當年北京亦唔介意犧牲楊永強去平息民怨。

嚟到今時今日，大家會旨望邊一個高官下台？ 2019 年年中嘅「反送中」事件搞咗大半年，連一個警員被紀律處分都冇，咁更加唔好講高台「引咎辭職」。咎？邊度咎？佢哋根本唔覺得自己有錯喎。而家嘅中南海就更加唔使講啦，「止暴制亂」咁大義凜然，連鄭若驊想唔玩，北京都用專機從倫敦接佢返去「接受治療」咯。

- - -

有人話，香港人有啲命苦，苦在每個特首下台之後，接任人往往更加乞人憎，導致大家不其然地懷念上一個。呢種感覺，我諗喺梁振英當政時期，大家懷念曾蔭權嗰陣會最深刻。而明明當年「當奴」喺立法會同黃毓民或者梁國雄針鋒相對嘅時候，大家都覺得曾蔭權副嘴臉好難睇。

但原來，所有嘢都只係相對嘅，並非絕對嘅。 Relative, not absolute (except vodka).

因為有梁振英，我哋學識懷緬甚至同情曾蔭權。因為有林鄭月娥，我哋甚至覺得原來葉劉淑儀呢個姐姐好似仲醒過佢。

亦因為有而家「忠誠勇毅 (進) 、有事打倒褪」嘅警隊精英，我哋更加敬佩無畏無懼出生入死嘅消防員、資源緊絀但係迎難而上 (直至今次終於要罷工) 嘅醫護人員。多謝毅進仔展示公務員有權用盡、玩官僚程序、耍官威嘅醜陋陰影，反襯出消防同醫護人性嘅光輝。

- - -

喺一個意難平嘅晚上，我斟咗一杯 The Big Smoke 嚟飲。望住呢杯金黃色嘅液體，首先令你諗起啲乜？係尿呀。其他威士忌，我唔會咁講，但係唔知點解，呢支標榜煙燻味濃厚嘅蘇威，我隊個鼻落去聞，就係聞到陣阿摩尼亞味。

不過本住人一世物一世嘅精神，我都係再仔細啲去聞一聞，強勁的煙薰及泥煤味，突出得有啲離諎。

冇嘅， the Big Smoke 挑選咗盛產泥煤嘅 Islay (讀法係「 i - 拿」，唔係「 i - 尼」或「 Is - 尼」) 嘅一眾年輕威士忌，混合釀成。係呀，個個𡃁仔都好重煙薰味喇，咪好似當年古惑仔旺角揸弗人咁，個個 MK 金毛又黑色恤衫扣少兩粒鈕，好爆呀，但鋒芒太露，反而俗套。

飲埋佢啦，都係煙熏味，中後段再逐啲滲多啲出嚟，放大到最後。冇喇，獨沽一味，聞唔到飲唔到其他味，或者純粹係我先入為主嘅問題，但係 the Big Smoke ，真係令入坑不久嘅我知道，即使對於泥煤或者煙熏嘅獨特風味再情有獨鍾都好，始終有一個限度，過咗火位，就係浮誇。

日後遇到其他比較柔和而又不失性格嘅威士忌時，我都會暗暗地感謝 the Big Smoke ，畀我知道何謂適可而止。

臨尾附上官方 tasting note (賴叔英譯中) 畀大家參考返：

聞香：油膩，工業用 (?!) ，甜灰 (?!?!) ，乾草棚，驅蟲劑 (……)

嚐味：青檸、奇異果、提子、草藥、重奶油、煙熏青口及灰燼味

餘韻：疊加嘅煙熏、厚重而油膩。更多嘅奇異果、蜜瓜及漸進嘅鹽味、乾橙，略帶辣椒及朱古力味

- - -

[頭盔] 賴叔係鼻敏感患者，嗅覺係正常人一半；又由於青春期喪食白烚翠玉瓜同娃娃菜，味覺都係正常人嘅一半。

所以，我講啲咩都好，大家最好 take it with a pinch of salt 。唔好阿叔講乜就講乜，自己用個鼻、用條脷，試真佢。 [/頭盔]