以前會喺讀者投稿前面加上自己嘅意見，今次等大家睇完先，後尾我再講。

＝＝＝＝＝

讀者投稿：Martin1981

我自己開舖頭，普通小生意老細，員工都係得幾個，不過平平穩穩總算做咗6年。

未開舖之前我都係打工，當時發覺求職網雖然有好多招聘廣告，但好多工都唔關我事，因為冇大學畢業，有啲工即使再感興趣，亦明知道可以勝任，偏偏就因為學歷而apply唔到。

細個咩唔識死，走咗去買偽造嗰啲畢業證書，唔係淘寶，我係去ebay買，仲畀我搵到一個seller好專業，鬼佬嚟嘅，成套咁賣一set兩份，一份係科目成績表，一份係畢業證書，真係有火漆印嗰種，我仲可以揀讀邊科、幾時畢業、邊間英國大學畢業，咁當然冇揀牛津劍橋啦，唔需要吹到咁大，只係要張入場券搵工啫。

呢套ebay買返嚟嘅假畢業證書點可能呃到人？你諗緊嘅嘢，同我當初嘅顧慮一樣，每當對方問我拎工作同埋學歷證明去影印，我個心都跳得好快，好驚畀人發現。

我用假學歷前後搵到兩份office工，返工之後就更加覺得諷刺，身邊雖然係大學生，不過做嘢唔覺特別叻，甚至英文都唔係特別好，我中五都流利過佢。有啲所謂大學畢業嘅同事連待人接物都好差，咁樣講唔係要貶低讀過大學嘅人，我都見過某啲大學生同事真係好掂，談吐舉止淡定，我只係想表達，一個人做嘢叻唔叻？有冇責任感？有幾多見識？係好人定係人渣？同學歷可以完全無關，起碼喺能力同埋工作表現方面，同我呢個中五畢業嘅人冇明顯差距。

直至我再用假學歷去轉另一份好鍾意嘅工。

之前兩間公司規模唔大，後來我搵到一份環境再好啲，人工再高啲，不過返咗一個星期左右，HR走嚟問我：「唔好意思，因為我哋send咗email去check，你間大學話冇呢個學生，你當時係咪用其他名？同埋成績表個student number都check唔到，或者你有冇當時啲學生證畀一畀我？純粹send返去校方嗰邊確認。」

HR好好人，我感覺到佢唔係從懷疑角度出發，係真心想幫我解決件事，呢啲亦係外國head office定落嘅規矩，不過我真係太驚喇，之前兩份工嘅reference check只係搵舊公司問嘢，從來冇check學歷。

其實我好鍾意呢份工......

隔咗一日，我同HR辭職，作咗個故仔話有更好offer，本身都考慮緊，既然最後要轉工，所以就唔特別再畀咩學生證佢喇，免得佢百忙一場。

我好記得HR、部門經理、自己team同事，仲有隔離team同事都不斷留我，話我做得好地地不如留低。雖然只係返咗幾日，但佢哋個個都好nice，日日同佢哋成班人食lunch，有一日仲撞正某同事生日，大家買埋蛋糕返office慶祝，我好唔捨得呢間公司，不過再留低就要延續check學歷呢件事，偽造虛假文書係犯法，真係唔走唔得。

除咗識於微時嘅朋友之外，工作後認識嘅所有人如果問起，我都會話自己喺英國讀完大學，如果對方唔問就當然唔會特別提，我都分唔清係想呃埋自己，抑或怕走漏風聲，只係撞正有啲都係從英國讀書返嚟嘅人，每當講起當地生活、趣事、宿舍......我都只能夠支吾以對，因為根本就未去過。

雖然check學歷單嘢最後隨住我resign而冇後續，但心理陰影好大，始終係犯法同埋虧心事，驚上得山多終遇虎，結果我用之前做嘢嘅積蓄開咗間舖，勉勉強強做得住，不過呢半年受疫情影響，生意無可避免差咗好多，再係咁落去，舖頭應該撐唔過2020年，我好唔想再出去再搵工，但如果真係要行呢一步，我會用返中五畢業嘅學歷，唔想再提心吊膽。

搵個樹窿呻完，多謝有你呢個地方，因為咁唔光彩嘅秘密，連我老婆都唔知，佢係我以前一份工嘅同事，佢都以為我係大學生，而其實學歷問題係我人生最大嘅遺憾。

＝＝＝＝＝＝

睇完之後，首先我想分享下以前做HR同埋Headhunt嘅經驗。

做HR嘅時候，我嗰間的確唔係咩大公司，大約120人左右，公司冇要求喺學歷方面要check，反而老細較著重candidate舊公司嘅reference check，而我都知道好多規模唔大嘅公司，雖然請人嗰陣都有學歷要求，但education background check嘅情況並唔多，亦相信有人曾經用過投稿讀者嘅方法搵工。

至於Headhunt公司方面，印象中只有做過幾次education background check，因為大公司通常由佢哋HR自己做返，甚至係再外判出去搵其他機構做。

無論你apply嘅公司check定係唔check，又或者用咩方式去check，偽造文書的確係好大件事，唔好以身試法，搵份工啫，得不償失惹埋官非就好唔抵，無謂心驚膽顫。

「Martin1981 」選擇分享呢件事出嚟，表明係自己嘅遺憾，聽得出佢後悔同埋耿耿於懷，但由於有顧忌而冇留低聯絡方法，我唔知道當中更多細節，喺度順便再講多少少。其實我遇過好多candidate，當中一部分都唔係大學畢業，亦有好多係因為唔同嘅原因，令到當時冇直接讀大學，要做咗好耐嘢先再讀返。

我唔否認好多公司嘅職位或者工作內容根本唔需要大學畢業，而學歷同工作能力亦未必成正比，呢樣我完全明白，不過唔止香港，好多地方都係一樣，畢業證書就係一張入場劵，如果「Martin1981 」已經穩定咗落嚟，不妨選擇再進修，去讀返個學位返嚟絕對唔遲，我了解你諗咩，之前已經有自己生意，又咁大個人喇，而家先走嚟讀書似乎太遲。

進修係為自己，永遠唔會遲，繼續諗落去而冇行動先叫做遲。我唔知你幾多歲，其實三十幾四十歲先再進修大有人在，始終嚟緊嘅路冇人知道會點，希望你好好裝備自己，唔好再用假學歷去搵工喇，有人嘅學歷同工作能力不成正比係佢哋嘅事，最重要係自己心安理得，祝一切安好。

香港快運面試 之 實食冇痴牙(我以為)

Date back to 6/11/2013

當時呢個時間我已經遞左辭職信
我個時去in 之前仲苦惱緊: 死啦, HKE淨係飛來回線, 我究竟做唔做份工好呢~~~~
舊同事冷冷一句劈埋唻: 人地請你先算啦, 人地 HX/ UO 淨係請靚女架咋

O…Noted. 咁即係冇行啦!?
毒_切忌有自信, 我的確 FF 得太多,
照去, 當拎 in FA 經驗

First In:入房前要填 Reference Check 同申請表格(可先晌 HKA 求職頁面下載, 填好痴埋相帶定去更方便~), 大家準備定相一張、學歷及工作經驗副本,

Arm Reach: 女仔要除鞋, 男仔唔洗除鞋, 要過208cm

入到房, 八位 Interviewees, 三位 Interviewers

首先逐個企起身, 每人自我介紹一分鐘
It’s just a piece of cake (我以為)

之後 Interviewers 會比一堆雜物我地,
叫每人揀其中一樣野用普通話 Present 一分鐘
檯面有: 麥當勞茄汁一包﹑木筷子﹑牙籤﹑紙巾一包﹑支裝水一支 (其他唔記得)
我當時揀中左木筷子, 覺得呢個 choice幾易 elaborate
(廉航/成本/清潔工人/木筷子)
It’s just a piece of cake (我繼續以為)

做完普通話 Present 之後又再轉返用英文做 Group Discussion
八個人分成兩組, 即每組四人, Present 時間 6 分鐘

Topic: What are the benefits of low cost carrier and legacy carrier?
始終 HKE 係廉航, 都估到有可能會被問到有關既問題
當時我地組係支持做 legacy carrier 既
面試前都有上網search 下廉航 VS 傳統航空既特點, 背晒 points
我係最尾一個 present, 淨返唔夠 30 秒時間開口,
快快手講多兩個 points 已經夠鐘
It’s just a piece of cake (我繼續以為 x 2036)

之後 Interviewers 就出房傾, 我地就繼續留晌房等運到..
兩分鐘之後, Interviewer 就只係叫左一個人留低
其餘既可以離開

咁當然, 被選中的細路並唔係我
當時既心情就好似比雷劈中咁
跌到落谷底, 負能量漫天飛舞
連行過既花草樹木都會枯死

我以為申請廉航既 FA, 要求會低 D
我以為自己做呢份工係Over Qualified
我仲以為我自己要煩點樣 reject offer
咪 FF 啦好嗎?

其實我都知道自己有呢 D 諗法真係好錯好錯,
事實上係我自己能力不足, 太自以為是
我最應該做既係檢討自己, 而唔係去埋怨個面試選人制度

不過最灰既事實就係: 連 HKE 都 First In止步

1) ********* 究竟仲有咩 Airline 肯請我? *********
2) ********* 究竟我仲 in 唔 in 落去好!?? *********

腦交戰!

HKE Interview 既三日之後就係我所講既: 沉默是金阿聯酋面試
下回繼續分解