💡🔎 IB取消繁體中文考試?! 🔍💡

今天在Facebook見到好幾個朋友轉貼「國際文憑（IB）繁體中文科考試由於應考人數太少，擬最快兩年後取消，只保留簡體中文科」的新聞。

作為一個熱愛正體字的人，唔駛問第一下反應當然「我是憤怒」，但資料寫不足50人應考又感到那裡怪怪的 (大多是香港人的「真道」好像已有60個IB位了吧)。

跟車太貼前了解一下，原來說的並非IBDP (類似DSE的文憑試)，而是新加入的MYP eAssessment。

近年受熱棒的IB課程，其實已有50年歷史 (我有同年朋友不是考A-Level而是IB，好幾個90後讀者做IB Project時有訪問過我)。

但中小學已開辦IB的學校在港其實不多，主因是要每年付IB費用。因此很多新派私校或直資學校(如：真道/蔡繼有)中小學沿用活動教學或近似IB課程，也有傳統名校(如：男拔/聖保羅男女)照用香港學制課程，到文憑試時才選取若干人數(大多是尖子)報考IBDP考取大學。

在2016年，IB新加入一個叫MYP eAssessment的評估，註冊了的IB學校可在約15歲-16歲的初中年紀自由參與。

那並非考試，而是「評估」(有分別嘛?!)，評估後可拿到証書。據路邊社(笑)都幾可靠的消息，該証書認受性很低，但叫做「如你沒考IBDP文憑試」的話多張「証明」給人家知道自己唸IB 。

但，家中有財力實力唸MYP IB中學的，也沒什麼不去應考IBDP的理由....? 就算因私人理由不考IBDP，也有IB中學畢業証書啊。因此，讀IB中學的人基本上不怎麼去考MYP e Assessment(也當然它只辦了兩年，一切也言之過早)。

資料分享太多，我入正題。

MYP eAssessment是個大家拿著部電腦click click click的評估(新世代啊)))，可用英文、法文、西班牙文考不同科目 (phy chem bio history.....)。

今次新聞的熱話「語言文學科」，2018年可選的科目只得.......六種 (見圖），繁簡中文已叫兩種，少到喊，可見這評估是新到小試牛刀仍在「測試」應加入什麼語言科目的試驗階段。

而IBDP文憑試可選的第一語言文學科 (母語)，記憶中有超過150種 (當然包括繁體中文，先不說香港，台灣也有人不少人選修)

我想帶出的是，支持香港學生學習繁體中文是非常極度極之重要(握拳💪🏻）我也是身體力行(?)的一員，也明白一來到繁簡之戰大家一定有點敏感 (太愛繁體字)。但細看了解後可發現IB這次有意擬定取消繁體中文評估，並非傳媒或網友形容的討好國內、政治因素、劣幣驅逐良幣等等等等.....只因它原本暫訂的語言科目已很少，仍是試辦中。

有時事評論員說擔心如MYP eAssessment取消繁體中文，IBDP也將取消，可選讀IBDP的直資學校因而要讀簡中，再再影響普通學制的中小學。

我個人意見是這有點杞人憂天，正如日本、意大利、印度等國也有不少學生考IB，但eAssessment語言科還是未出現日意印文，這難度又是IB機構看輕/想消滅他們的母語/文字嗎? 不會啊。

嗯，當然，我明白大家的隱憂。始終普教中的出現，已看到香港某天全面轉用簡體字絕非全沒可能(唉)。但在憤怒轉發前，也先了解一下究竟咩事吧。

亂收尾：一起理智地(?)守護我們美好的繁體字💞

+ + + +

戴頭盔補充：

1) 突然趙榮德(嘿)上身似的討論學校，只因今天在網上見太多人以為IBDP兩年後要全盤考簡體，某幾個準備讀IB的家長世界末日似的 (我解釋到很累，不如直接寫一篇)

2) 我是會考/AL出身的舊世代普通市民。對IB的了解一定不夠在學家長/同學深入。以上的資訊如有錯誤，請賜教。

3) 關於IB的研究，源自小丫第一間返的playgroup是家附近一家蚊型IB幼稚園。七個月大**已在那裡一星期一次的返到兩歲，校長也笑說「睇住佢大」，地方小巧但感覺溫馨，更預先取錄N班學位，當時有考慮直接唸到K3再算。

但，那是一間真正的(?)IB國際學校，畢業的小朋友(部分是外國人)九成九入讀國際學校。香港大部份國際學校都是教簡體中文 (最多分校的ESF英基也是)，我100%不能接受孩子學簡體。某部分國際小學教繁體，例如英基的啟新(但它們自己幼稚園都未收得晒)、CAIS (就是陳慧琳兒子的學校，近年難考到不可思議)，其餘幾家地點太遠或學費債卷太驚人不是我此等平民家庭可負擔。

就算不說經濟問題，當時只得2歲，太快選定從此走國際路線也有點「洗濕個頭」。始終真的是很普通的香港家庭而已。

後來選了另一家學校。但那年因此有機會活到老學到老的了解很多IB資訊、考試內容、考卷(笑)、選科，更認識了一些IB家長或老師校長等等。了解後，更認定那是孩子長大後再看個性才決定的事啊(攤手)。

**會七個月這麼早就上playgroup，是她先天性有點身體問題，因私隱理由就不詳談了，當時醫生建議盡早給她去上。如是普通小朋友，個人心得是一歲半後才去玩玩吧，七個月時只是爬來爬去累死老母啊~~~ **

4）我會簡體中文，也經常寫（快嘛）。但文字意思結構，真的是正體字才可了解中文字詞之美啊 💛

(照片取自IB官網)

<3 <3 情人節快樂呀各位~😜大時大節都仲出文我覺得自己實在太有愛🤗🤗

----------

#26
我避開Michelle的眼神︰
「你……今日喺學校有冇新消息？」
「……哦，呢樣……嗯，我今日未有時間去理科班問喎。我聽日幫你問下？唔好咁擔心啦。」
「其實，你記唔記得要幫我搵嗰個人叫咩名？」

Michelle輕輕皺眉︰
「華子昕？」
「英文名呢？」
「嗯？英文名……？好似冇聽你提過喎。」

她的表情還是半點不自然都沒有，我停下腳步，從書包裡拿出那周會單張，指著下方的名字︰
「我只係想問下你，認唔認到呢個名？」

.

Michelle臉色驟然一變，著緊地抓住我雙臂︰
「點解你會……啊！頭先喺補習社……？阿翔，你聽我講先，件事……」
「不如你答我先。佢係咪返咗去學校？你係咪見過佢？」
她垂頭抿著嘴，久久說不出話。

我甩開她，忍不住提高聲量︰
「即係我講中咗啦！點解呀？佢明明返咗嚟，點解你要話咩消息都冇呀！如果你唔想幫我嘅，你咪出聲囉！」
「……唔係啊……唔係咁……」

「咁係點？其實你係咪好憎我？一直同我扮friend，又扮晒咩有契約，又話一定要做到為止，然後就故意跣我一鑊……嘿，真係畀你呃到透。你唔係好忙嘅咩？究竟咁樣做對你有乜好處？」

她不斷搖頭，聲細如蚊︰
「……唔係……我真係想幫你架……真架……只係……嗰日，你講、講起話……話線人要培養，我先至明白到……你……」

.

大腦閃過去年11月底在補習社外一個場景。當時她剛打聽到華小姐入了大學，
當我叫她再問清楚時，她說︰
『你諗得太簡單啦，線人都要養嘅。我同嗰個人又唔熟，仲要問人拎咁多嘢，人哋以為我有咩居心添……』
當時我還傻傻附和：
『咁又係呀。如果我第一次去你學校嗰日就問你，你都唔會答我啦。』

只聽Michelle低聲續道︰
「……你、你喺phy lab送筆畀我嘅時候，我曾經有一刻以為你真心為小學嘅事道歉……直到嗰日你咁講，我先知道你嘅目的……」
我聲音不禁抖擻︰
「就係因為咁？因為你覺得我由頭到尾都係度利用你，所以你……你唔忿氣，就要報復？」

「……唔係。我知道你利用我，我唔介意畀你利用……我、我真心想幫你……但係……但係……」
她驟然抬起頭來，淚珠直往下掉，串串掛在冷頸巾上︰
「我唔想你覺得我……我、連利用價值都冇埋！」

.

看到Michelle的眼淚，我的心不由得掀了一下，怒氣也縮回肚子裡。
她的話實在太奇怪，我緊緊皺眉︰
「你講緊乜？咩叫利用價值都冇埋？」

她咬了咬唇︰
「因為我……我、我同佢傾過偈……就喺周會完咗之後。」
我瞪大眼睛，她卻避開我的視線︰
「佢……佢親口同我講，佢……佢唔想……」
「唔想乜呀？你講啦！」

「……佢唔想……同你聯絡……」
「冇可能！佢點會咁講！佢、佢……」
「……我都想係假……但係佢……佢當時真係，真係咁講……」

.

Michelle的眼裡螢光流轉，看我的眼神滿是憐憫。
車子從旁邊的馬路呼嘯而過，車燈照得她臉上忽明忽滅。
我盯的她的臉，只覺她的表情很認真，卻無法分辨究竟是不是謊言。

我很想高呼這都是假的，都是Michelle都騙我；偏偏，心底裡卻有另一把聲音在悄聲說︰
阿翔，是報應啊。
你以為道歉就有用嗎？道歉過後對方也不一定接受。
你以為扭曲空間就可以追回時間嗎？時光一去不返才是世界的定理。

她看我不說話，又低聲補充︰
「我當時覺得，就算佢咁講都好啦，只要我問返老師拎佢嘅email就得……但係……理科班嘅老師話，今次係華子昕返咗香港之後主動打電話要探校，咁啱佢哋又做海外升學主題，所以先會叫埋佢一齊……」
「點講？」
我打斷了她的回憶。

「嗯？」
「你話你當時見到華小姐，同佢傾過偈。」
「係……」
「咁佢講過乜嘢？你……當我求下你，你逐句逐句話返畀我知！」

.

Michelle抿了抿嘴︰
「佢……當時我……我走到去後台……我話有啲嘢想同佢講，於是同佢企埋一邊……嗰陣有個Maths老師陪住佢，然後我介紹自己，佢對我笑咗笑……跟住……我問佢……我問佢……」

她話音稍歇，畏懼地抬眼望了望我︰
「我問佢……係咪識得凌逸翔……」
「佢、佢點答？」
「佢問返我……問我點解咁問……於是我話……我話識得你……」

我心臟怦然亂跳，焦急著抓住Michelle肩膀︰
「跟住呢？佢乜嘢反應？乜嘢表情？動作係點樣？你諗清楚啲！」
她的表情有點痛苦︰
「我記得……佢當時個樣好愕然，好似估唔到我哋學校有人識得你咁……動作……動作好似係……掩住個嘴？sorry，我唔係記得好清楚……」

.

隨著Michelle的話，華小姐的模樣又在我腦中浮現。
聽到我的名字，她就那麼驚訝嗎？
難道她真的從沒想過，回來也可以找一找我？
她……難道早已忘記我這個人？

Michelle憂心忡忡地凝視我，我深呼吸了幾下，再用手勢示意繼續說，她才緩緩開口︰
「跟住佢……佢有問我你最近點。我就話，你好努力讀書，成績好似幾好，最近仲補緊英文。然後我再問佢拎聯絡方法，但係佢……佢唔想畀……」
「乜嘢叫唔想畀？你講清楚啲呀！」

她嚥了嚥口水︰
「我話，話你一直想好想聯絡返佢，所以想問佢拎個MSN。但係佢話，佢而家要跟啲課程比較辛苦，已經好少用MSN，咁樣……」
「吓？佢、佢居然會覺得辛苦？」
「佢真係係咁講架……」
「當係先啦。咁跟住呢？」

.

「然後我就話，冇MSN都唔緊要，email都得架，你真係好想搵返佢……但係……」
可能我的臉容太恐怖，Michelle連眼角都不敢望我，話音越來越細︰
「佢只係笑咗下，同我講……話……話只要你而家過得好就得，佢喺美國都過得好好……佢唔會再……再同你……」

「你講大話！」
我再也無法自制，對著Michelle大叫︰
「佢冇可能會咁架！你呃我！講到尾你都係唔想幫我啫！」

Michelle的淚又再奪眶而出，但她卻沒有避開，反而踏前一步拉住我︰
「……阿翔，我、我……」
我甩開她的手，轉身想走，但還沒踏前，突然感到後背一陣溫暖。

發熱的頭腦呆了一陣，才發現Michelle從後抱住我，把身體緊貼在我的背上︰
「唔好咁，阿翔……我會幫你架……我一定會……」

「我唔會再信你！」
我掙脫她的懷抱，頭也不回地向地鐵站衝去。
馬路嘈雜的車聲當中，聽不出被拋在背後Michelle的啜泣聲。

.
待續

----
✏陪朋友去自修室追女神，點知喺補習社又識多個女神
又曦

*鍾意睇嘅朋友請share ❤

上一回︰http://bit.ly/2GaPsYi

#陪朋友去自修室追女神
全集︰http://bit.ly/2kyjbRt

----

✌過年啦~~姐姐我決定放自己假！✌
所以今次唔玩跑數，初五夜晚再更新🤗

放假冇文睇點好？梗係翻睇《自修室》本書啦👀
華小姐派真係必睇架，唔好話我冇提你哋😉
冇乜事我都係走先，初五見~~ 🏃💨