【龔成問答信箱】（Q22101-22120）

Q22101：

龔sir 我今日做左進階班功課 有d問題想下，我用左莎莎既年報去計財務比率

1）我計到既ROE 分別係-26.4同-31.1, 但係你比的價值網同bochk 係-23.5 同-24.9，點解會有d分別呢？

2）EBITDA 利潤率 其實我唔係好識搵個EBITDA出黎 自己跟住年報計除息除稅除折舊後 都計唔到價值網 顯示既-3.85同-3.67億(價值網顯示2020年係正數

我諗應該係負數先岩？）個EBITDA利潤率 價值網 係-12.7同6.41，而bochk係 4. 06同5.47, 想請教下可唔可示範一下點計？

3）存貨週轉日數 我計到160，呢個數字同價值網差唔多，但bochk係106, 又係想請教下邊個數字先岩？

4) 關於杜邦分析法

2020年: 1.97 x 1.75 x - 9.02% ＝-31.1
2021年: 1.89 x 1.21 x - 11.5% ＝-26.3

ROE 2年都負數 不過2021負得冇得多 2021年純利率差左 不過財務槓桿 同總資產週轉率個數細左 所以負少左

我就唔係好明 總資產週轉率 應該愈大愈好 但係假設2021年都係1.75 (instead of 1.21) 咁計出黎個ROE負得仲勁 咁咪調返轉應該係愈細會愈好？請指教一下

龔成老師︰

1) 我相信係你和其他網站，係計個"發行股數"和"股東權益"出現分別。

因為每個網站的公式都不同的，就算發行股數都不同，計年頭？年尾？平均？加權平均？通常我睇財經網站，都唔會太著重d細數字，你了解大方向就得，同埋，不同財經網站的數據，一定會有d誤差，正常的。

2) 至於EBITDA利潤率，你可以參考BOC個數字。你可以用佢年報中"經營虧損"，再加翻"按性質分類之開支"中的折舊部份(2021年年報P.177)。但會有少少差別，可能係提取數據或匯價問題，影響不大。

價值網部份，都係用類似計法。但2021年數據，可能系公式不同，其實，一般網站在計算EBITDA時，都計左「使用權資產折舊」，但這並不是真正的折舊，所以數據的參考價值會低左。

其實較精準方法，我建議係用EBIT - 折舊，但這個折舊，應該排除左"使用權資產折舊"的數字，咁會更準確。2020和2021年EBITDA，應該為-7.6%和-10%。

2020年︰(-5.53 + 1.17) / 57.17 = 7.6%
2021年︰(-3.91 + 0.87) / 30.43 = 10%

3) 如果用我教法，拿年初和年末平均數計，答案係160。至於點解BOC會有分別，因為佢係計算存貨時，唔係用年初和年末平均數去計，所以有落差。

你照用160，咁就可以。

4) 你這個杜邦分析計算，係正確。你睇翻個3組數字﹐你會發現中間組數(營業額/總資產)，係變動最大。

你就會發現，企業這2年面對問題，係銷售數字出左最大問題，有明顯轉差情況。

之後，我地再睇翻客觀環境。由於這2年有社運和疫情影響，令到營業額受損，係正常。這些都係中短期因素，因此我地係分析企業質素時，唔洗過度在意。

至於你話總資產週轉率愈大，個ROE就會負得愈多，係正常。因為現時佢生意少左好多，但好多固定成本，好似舖租、人工等，唔係話停就停到。

佢現時基本上，每件貨品都係蝕住做。但當這些不利因素過去，營業額回復正常，有更多銷售單位去攤分這些固定成本時，就會令佢轉虧為盈。

這時候，每賣一件貨都係賺錢，自然會係總資產週轉率愈大愈好。

------------------------------------------------

Q22102：

你好 龔sir本人持倉如下：

778 @$10.3 x 5000
823 @$71 x 1500
941 @$83 x 500
968 @$13 x 8000

1177 @$4.5 x 12000
1928 @$41 x 2400
6823 @$10.5 x 10000

另月供5隻各$1000, 現值16萬多

3,285,823,1177,1299

本人50歲 月入33K 還有十年退休，想法是退休時將所有股票轉成有5厘息以上的收息股 作生活補貼

1) 這個組合有沒有問題？

2) 因為未來還有10年穩定收入 這組合是否過於保守？

謝謝 祝生活安康

龔成老師︰

1) 你持有和月供股票，都係有質素。但由於你50歲，係一個要為退休開始準備的年紀。

因此，你要將組合中的股票，慢慢轉成較保守組合。按年紀增長，慢慢加大收息股比重。目標係10年後退休時，組合100%係收息。

現有持股，暫時可以不用改變。但月供組合中，中生(1177)和比亞迪電子(0285)都係潛力股，風險對你而言，用點高，唔建議用佢地作為月供組合。

你可以將這2隻股票，換成為收息股，會較適合你現時的年齡配置。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

還有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

另外，你要留意一下，你組合持股的佔組合比例。個別企業和行業，不要佔組合15%和30%以上，否則會有過度集中性風險。

你現時部份股票，係超過這個標準。但由於都係有質素股票，故不用沽出。用未來新資金，去慢慢拉平衡翻個比例，咁就可以。

現時大市只在合理區，每月月供之餘﹐緊記都要留少少現金，用來等大跌市出現時，可以去掃平貨。

2) 你大致上跟我所講的方法，去進行配置，增長力度就會配合到你年紀所需。

我假設投資回報有10%（連股息再投資），你每月投資$5000 + 55萬持股，10年後大約會增值至250萬。

你再將佢換成6%收息股，大約每月就會有1.25萬的現金流。你可以以此作為參考，調整自己投資計劃。

------------------------------------------------

Q22103：

我正在研究電動車和自動駕駛，有什麼介紹

對這個行業未來的看法

龔成老師︰

電動車方面，我自己一直較看好比亞迪（1211），係佢的電動車。

首先，電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但並不是一兩年就見到收成。

至於自駕技術，見集團都一直有同科技企業合作，相信發展上都係正面。

但這股經常都處略貴水平，大約去翻$135先算合理，如果真的好想買入，現價小注月供好了。始終現價投資風險高，回翻先考慮正式買入。

或者，你可留意下中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q22104：

老師你好！岩岩開始睇你既書，好似展開左我人生新既一頁，原來一直以來既理財觀念（淨係識得放錢係銀行儲）係好old school同好無效率。依家將你一本本書慢慢睇，希望可以快啲財務自由啦

小妹25歲，月入4萬，家用一萬，用一萬（下個月開始想用少啲儲多啲)，儲兩萬。

黎緊應該會同男友買樓，想買約7-800萬既樓，有首期，希望可以快啲供完，唔想負咁耐債，其實睇完書真係好唔想供樓，覺得要借錢再負咁耐債呢件事好矛盾，更無奈樓價愈黎愈唔合理，但又想有個安樂窩

1。儲蓄約15萬；需要再拎錢出黎投資嗎？

2。美股：少量voo

3。睇完老師你講既野，想試下月供股票
你覺得我每月供
$5000 （2800）平穩增長股
$5000 （3067）潛力股
如何？

4。如果二人都用呢個組合投資，可以加快供完層樓嗎（男友都係月入4萬）
希望你可以比啲意見我，謝謝呀！

龔成老師：

你現時25歲，係累積財富的黃金時期，你要好好把握，盡你一切的力量去儲蓄、投資、學投資知識。

你盡快加儲蓄到每月$2萬，是正確的。

1）你表示「有首期」，是否已另外預左一筆足夠的資金，去準備買樓，我假設你已準備好，餘下的$15萬就可以投資/等投資，不過，我會較建議你等完成買樓過程，先開始投資。

另外，現時低息環境，其實唔需要太急去還錢，你照正常速度去還錢就得，資金可以用作增值。

2）VOO可長線持有。

3）可以，這兩隻都是不差的選擇，但現時好睇你會幾時買樓，而決定投資多少，留現金多少。

4）你概念上不用想著「想盡快供完層樓」，你只要照正常速度去供樓就得。每月保持進行財富增值，照上述月供模式進行，就得。

------------------------------------------------

Q22105：

你好龔成老師, 首先感謝你的無私分享，令我有希望可以有天財務自由。

先跟你分享我的現況

工作方面：我今天25歲，月收入13K，上年原本收入18K，但因為轉行由低做起，希望將來可以收入更穩定，所以即使收入下降仍堅持轉行。

我亦有PT工作，大概月入3K。而今年9月我打算花約80K讀PT PGDE，預計2年後畢業後起薪點可以升至30K。

儲存方面：我答應自己每月要儲14K，預期3年後有500K。

資產方面：我現有資產350K，當中股票佔6成，3成是銀行定期，其餘是流通現金。股票比例:

1) 316, 買入價119, 股數419
2) 823, 買入價62.76, 股數131
3) 1177, 買入價7.73, 股數1414
4) 2388, 買入價24.4, 股數1447
5) 2800, 買入價26.37, 股數2301
6) 3067, 買入價17.6, 股數692
7) 3988, 買入價3.07, 股數3252

目標：我期望3年後可以儲到一百萬，與男朋友夾份置業再結婚。

1) 請問老師認為我的方法適當嗎? 有更快達到目標的方法嗎?

2) 請問老師認為我的股票比例恰當嗎? 有需要更集中投資/賣走哪隻股票嗎? 我暫時只有穩定地月供1177及3067各約$2000。謝謝你

龔成老師：

1）現時的股票與現金比例，適合的，持有的股票都是有質素的股，但你25歲，其實未必適合持有收息股，因此，中行（3988）這類收息股，就未必是最好的選擇。

至於大方向，基本上無問題的，但由於你轉左工，收入減少，你要睇下自己能否做到每月儲$14000的目標，如果可以做到，相信3年資產達至$100萬，可以的。

2）比例基本無問題，由於你3年後要資金，因此不能太過進取，你預潛力股與平穩增長，各佔一半就可以，潛力股不能太多，反而當你買完樓後，資金可以更長線投資，到時可以再增加翻潛力股的比例。

------------------------------------------------

Q22106：

Hi老師，最接近神的男人
因2年前無意中係fb識到你

另外，知道你聽過好多 多謝你的人留言，
我都一樣
我都好想多謝老師！同埋多謝我自己！

我有間居屋 供緊， 在職媽媽
小朋友x2 有一個工人姐姐
以前就算好慳好慳，
都儲得好小錢！

人工唔高 只是普通文職 ，
但我2年內竟然都儲到多達十萬以上！
都係你帶來的正能量影響

除左正職外，亦多層面地搵到額外收入（如投資，網上填問卷，任務/網店/etc....）
真係好多 原來增加收入來源係好重要
，
而我也揾到真正搵錢方法 好開心）
為了令自己收入更大，我偷時間去投資自己身上！去學習不同知識！
賺取更多額外收入！
多謝你無私奉獻

龔成老師：

哈哈，太誇張了，其實我做的事不是好誇張，我原本都是好普通的人，只是我比一般人更加努力，希望你都要明白，好多事情你都能做到的。

見到你有正面的影響就太好了，你最重要是保持進步，無論知識，以及財富。

你現時的方向正確，同時，你應該思考一些長遠增加收入的方法，例如自己在現時職位上的發揮，有無進步的空間，長遠的事業發展怎樣。在自己的能力上，以子職業上，都要從長遠角度出發，加油！

------------------------------------------------

Q22107：

你好，有些投資問題想求你指教

我月入3萬，太太月入7萬，有兩個3歲小朋友。我有層自住樓，貸款金額仲有500萬，每月供$18000左右。因為我人工唔夠借，所以太太是我擔保人。

另外，我太太和她的家人有層已供完聯名物業市值720萬，但她家人住緊。

現在，我哋想喺太太和家人的聯名物業按揭貸款，之後買入的士（的士牌連新車約$550萬）收租作投資，但我們現金儲蓄得50萬其餘就按揭借回來，你認為可行嘛？

以我的背景會唔會好大風險？還是作其他投資好呢？

謝謝你的賜教

龔成老師︰

我相信你年紀都唔係太大，應該係年青至中年人士的階段。

在這個年紀，其實借貸比例高少少，都係可以。你預總負債，最多可以去到總資產7成。從負債風險角度，只要你做到7成以內，風險水平都係可以接受。

所以，你要計一計數，所有負債，比起所有資產的市值計算。如果超過7成，就是開始高風險。

但你要留意，的士牌過往是增值類別，而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，視為收息類的資產會比較好。

以你們年青至中年年紀，我比較建議集中係一些較有增長力資產，例如一些有增長力的優質股。

投資的士牌唔係唔得，但佢增長力唔會好強，財富增值效果，現時未必有優質股咁好。

------------------------------------------------

Q22108：

龔成，你好啊！好緊張，希望你會答我呢個投資初哥問題

我目前有HKD80,000資金專門預留作為投資用途，宜家30歲，希望係2022年2月前投資而賺到HKD160,000;請問有咩嘢建議？

我之前有月供股票買盈富同CLP,都有小量投資美股，只限tesla, ARK及台積電。

Thanks!!!!

龔成老師︰

我地做財富增值，一般希望做到架合理回報，係每年增長10-15%。你現時這個目標(1年升倍)，用股票投資去做，風險會好大，較難達到。

而且，1年係一個好短架時間，就算再優質股票，都要時間升值。1年太短，好易會有股價波動風險，令最終回報不確定性好高。

如果你無其他增值方法，建議你按部就班，透過月供去買入優質股，去為自已資產作增值。

你過往投資股票，都係有質素，用來增值係可以。但以你30歲年紀，應以增值為主。中電(0002)增長力不高，未必太適合你。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，我建議你加強每月儲蓄，這是重要的。

------------------------------------------------

Q22109：

你好呀, 老師, 我今年29, 有以下兩件事情想各你請教:

1. 想與姐姐置業 兩人月入共7萬 流動資金約有100 萬, 本住青衣區, 想買樓齡不超過20 年的, 正考慮藍澄灣, 同埋想問2人自住, 建議入手呎價為多少

（實用面積為500呎會過大負擔嗎？ 想做9成按揭，另想問下老師你覺得此區樓宇有升值潛力嗎？ 由於是第一次置業，想先請教老師有何建議?

2. 另外，因父母抽到居屋，費用為200多萬， 父母正考慮做多少成按揭，如一次過付款，流動資金便所剩無幾，但做按揭又要俾利息，所以想請教老師

建議按幾成才合適呢？

謝謝你的解答!

龔成老師︰

1) 青衣區內大型屋苑唔算好多，成個區潛力度只算中等。但東大嶼計劃落實的話，有機會刺激到這區樓價上升。

藍澄灣質素算中等，佢距離港鐵站較遠，係一個扣分地方，但整體算係可以。

但你這個作為自住樓，我建議較從你自身需要作出發點，去作出考量。你要諗這間屋，係唔係適合你長遠需要，講緊係未來5-20年。

呎吋方面，只要唔好太細(少於300呎)，符合到你生活要求，咁就可以。另外，我地自住樓一定要堅守一個大原則，就係長線要"供得起"。如果可以的話，置業係無問題。

2) 現時貸款息口在低位，無論係你和你父母，我都建議盡量做高成數貸款，去空出更多資金，做財富增值。

如果你父母本身好怕風險，就將按揭成數調低，但其實在財富運用上，高成數會較好的。但要留意，你自己買物業時，高成數按要比按保，你要平衡翻。

雖然高成數按揭表面上，係要比多左利息，但我地要從機會成本做考慮。你利用低息貸款，空出來資金進行投資增值(投資優質股)，去爭取更大回報，相信長線財富增值效果會更理想。

同時，你父母都可以因此留下更多資金，以備不時之需。

------------------------------------------------

Q22110：

Hi 呀Sir你同唔同意1211黎緊要加強品牌宣傳，佢銷量好似唔夠多，我明白佢有技術，但始終作為買家都想要多人識既牌子咁。

比如比亞迪做公交車，人地買左會唔會覺得自己個檔次低左

龔成老師︰

其實比亞迪(1211)品牌，的確有改善空間，特別係在國際市場。

但由於佢有技術，這方面係佢主要勢所在，品牌雖然唔算好強，但無損其投資價值。

而且，集團將來未必只係集中係出售新能車，可以會慢慢加大電池和新能車相關技術銷售。故零售品牌的強弱，未必對佢影響十分大。

其實，比亞迪其中一個往後的發展，就是「賣電池」，即是同不同的車企合作，而這方面的發展，自己的品牌，未必是核心。

------------------------------------------------

Q22111：

龔成老師，你好！距離上次請教問題，原來已經有1年7個月，最估唔到既係呢段時間自己既資產價值升左有65%(105->175)。主要係將過去持有既現金部分轉左去股票+每月部分剩餘資金作月供

所以出現左較大既升值。

一、打算準備置業，而因為我目前有接近6成既資產都係股票，因此若要置業就需要放左一D股票，目前股票（買入價，未扣除過往收息）如下：

完美醫療[email protected]，24000股
騰訊700@408，400股
銀河[email protected]，1000股
盈富基金[email protected]，6910（月供緊10000）
中生製藥[email protected]，10000股
小米[email protected]，3000股
建設銀行[email protected]，10000股
阿里巴巴9988@176，100股
港鐵[email protected]，1449股(月供緊3000）
閱文[email protected]，406股

我有考慮既係因完美醫療同騰訊升幅較大，再接觸到較平宜價較難，所以計劃：

1.先放左升值潛力無咁大：如建設銀行、閱文集團；

2.現時買入價與成本價相距較近：港鐵、阿里巴巴、小米

3.再考慮剩餘（優先考慮銀娛，及部分盈富基金）的股票。

你覺得呢個安排會唔會較好？

二、由2019年11月開始月供到而家，見盈富基金佔現時比例較大，想降到3000/月，因為澳門月供股票成本較貴，50hkd/隻/月，

唔想月供分得太散，想10000就分別5000福壽園，5000港鐵。會唔會都可以？但若果成功置業，到時候可能只月供到3000-5000。

三、最近睇完你本《80後千萬富翁》，好有感觸，特別係我對現時份工完全感受唔到滿足感，甚至厭倦，現時一有時間就會睇報表，樓宇相關資訊，

目標向住有基本財務自由後辭職。感謝你本書再俾我動力去向股票，樓宇，老闆方向發展。

龔成老師︰

一) 你的策略，有部份需要修正。

我地考慮持有邊D股票，要從佢是否適合你、組合平衡性和現價平貴(而唔係睇買入價與成本價的差距)，去作出考量。

你還未到30歲，建行(0939)這類收息股，唔適合你。閱文集團（0772）確定性較高，可以減持少少。

完美醫療(1830)現價偏貴，加上佢佔你組合比重較高，我都建議你沽出部份。

至於餘下股票，持有價值差不多。若你有需要進一步套現，你可以按比例去每隻沽少少。

二) 你這個調整，都可以。暫時你就用你新的調整，去繼續進行月供。到你置業後，才按需要減少月供供款，就可以。

三) 本書能幫到你就好，記住要做好財富增值，唔係短時間可以做到的事。要保持學習、維持現有投資習慣，你自然會一步步走向財務自由。

------------------------------------------------

Q22112：

你好！ 家父將於4年後退休，佢想我幫佢用1百萬做投資，希望長期收息亦可有小許本金增長。

80% 穩定收息
303 vtech 15%
778 置富 15%
1310 香港寬頻 12%
941 中國移動 12%
2638 港燈 15%
2800 盈富 11%

20% 增長股票
1810 小米 7%
981 中芯 3%
823 領展 5%
066 港鐵 5%

請問以上可以嗎？定比例或股票有些轉換會更好？
Thanks！

龔成老師︰

由於你父親，尚有4年就退休，投資上應要較保守。

你現時持股和配置，大致上都可以。但盈富(2800)唔係收息股，佢派息平均只有2-3%，但有穏定增長力，可持有。

另外，中芯(0981)和小米(1810)雖有質素，但波動性較大，不宜持有太多，故不要再加注。

現時大市只在合理區，資金唔好盡用。最好留有部份，一方面，可以等大跌市出現時，用來掃貨。另一方面，你父親都應該留有一定現金，以備不時之需。

------------------------------------------------

Q22113：

龔成老師你好，我想請教下你，我已經賣左我既單位，宜家手頭上現金有130萬，我和先生的入息加埋有6萬，我地想買返樓

但係樓齡新少少已經去到700萬，供唔起，我地打算租住先但係又驚上唔返車，請問我地點做會好d？

龔成老師︰

若現時財政，不足以直接承擔心目中的理想單位，你有2個方法。

你可以先購買一個較細單位，之後放租去「以租養樓」或自住。另一邊，就用優質股繼續增大個資金，之後才用較高成數去買大屋，令自己可以供得起。

這樣做，可以有平倉樓市的效果。你們資產，相對受樓價波動的影響，就會較細。當你地將來再換物業，會較有預算。

另一個方法，就係直接用優質股去增值。現時以租金回報率計，股市值博率會較高，潛在回報都會較大。

但由於佢同樓市，唔係有直接關聯。若長線樓市升幅跑嬴股市，變相反而令你置業成本上升左，得不償失。

你要自己衡量下，邊個方法會較適合你。

------------------------------------------------

Q22114：

本人49歲，丈夫51歲，一子將升中學。夫婦兩月入約15萬。在何文田擁有一物業，以丈夫名下持有，仍欠銀行180萬。

我與丈夫現共有公積金約700萬。現金260萬，定期200萬，基金保險200萬。我自己有9手滙豐股票、1手工商，1手港交所。

丈夫常想多買一層樓，因現單位不夠住，想多買一間三房單位，何文田單位出租。但我想以我們的年紀，再重新供一間樓是儍事嗎？

最近見大埔一大屋苑800呎單位，售950萬，26年樓齡，可考慮嗎？

龔成老師︰

其實，每個人都有自住需要，一個適合家庭長線生活的物業，係需要的。你用現時方法，買入一間3房，再將現有物業放租，係可行。

你現時有一定的現金，只要利用作首期，餘下部分現金，你每月供款，我相信可以應付，但的確，每月支出會增加左，你要計好數。

而你現有物業按揭$180萬，將其放租，我相信每月都有基本的正現金流，可以幫少少你每月供樓部分。

另外，如果日後能善用公積金，無論作為部分還款，又或投資一些能產生現金流的工具，都能有助你供樓的。

但當你再買入一個物業時候，你成個財富組合，就會偏晒係物業類，出現過度集中性風險。故你在買入新物業後，長遠來說，加大翻優質股的投入﹐去令財富組合回復平衡。

另外，你現時持有股票，都係有質素。但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時明顯，係偏重左係銀行股，未來要加大其他行業股票佔比，去平衡翻個組合。

以下是一些適合你的股票，現價都在合理區，可分注入貨。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，資金唔好盡用。要留有部份，等大跌市出現時，可以用來掃貨。

------------------------------------------------

Q22115：

龔sir，我是你的學生，想就爸媽的情況請問你意見：

爸媽是退休公務員，60歲，有長俸(每人每月約$15,000)。他們持有一個單位，市值約$1,000萬。下年中他們將搬來跟我一起住，請問他們應該：

(1) 將樓放租，租金大概$20,000/月，每月$2,000管理費；或

(2) 將樓放賣，將部份所得資金(大概$700萬)換入保守投資股票組合，希望有4-5%年回報，換取現金流。

請問那個方案較適合他們的情況？如是(2)，請問除了港燈般的公用股，還有那些是最穩健的收息股？因為就算領展置富這些近年都比較波動，謝謝

龔成老師︰

你父母由於會跟你同住，所以無自住樓需要，其實用分法1和2去處理，都係可以。

若你父母透過長俸和租金收入，已經足以應付基本生活支出，我會建議一動不如一靜，用方法1就可以。

相反，若現時長俸金額和他們生活開支，係有一段距離，你就可以考慮用方法2。

另外，你可以考慮將層樓加按，套現部份資金，去買收息股(最好係方法1，不足夠支付生活才用)。

但由於借貸始終有一定風險，唔好按太多，大約2成左右好了。同時你要明白，這樣會令你父母負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

你要從實際情況和風險中，取一個平衡的方法。

以下是一些有質素的收息股，給你作參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

領展(0823)都可以考慮，但因為佢都有一定增長力，所以股息率未必太高，你要留意這點。

我較建議方法（1）。

------------------------------------------------

Q22116：

我想請教，以收息股為例

我既3號仔，早前收左利息，我係咪應該將息做investment ，Otherwise 就achieve 唔到個compound effect ?謝謝你

龔成老師︰

其實複息效應，係分2部份。第一部份，係企業賺到錢，攞去再投資在業務上，創造更多盈利。

另一部份，就係你所講的派息。這部份，就要投資者，將這筆資金去再投資，去創造更多財富。

但如果你持有股數不多，收到股息可能較少，不足以買1手股票。你可以將這些股息先儲起，到有一定數量，目標股票價值又合理，就可以出手。

------------------------------------------------

Q22117：

龔成老師: 現時持股組合中，有1928金沙 $33.9買入，但擔憂政治風險影響續牌，以至可能帶來毀滅性打擊，

眼見880 澳博股價下跌不少，值博率上升，請問是否換馬較好?

龔成老師︰

金沙(1928)無論在賺錢能力、規模、物業質素和協同性等等，都係優於澳博(0880)。

現價計，雖然澳博值博率係較高。但長線計，金沙(1928)增長相信會較好，我比較建議用金沙，作為長線投資目標。

至於澳門賭牌問題，我係課堂上，都有課程的同學們分享過。簡單而言，佢成功續牌機會，會係較大。

------------------------------------------------

Q22118：

龔sir, 有事想請教你意見。我將會離職，公積金約有40萬可選擇取回或者繼續存放於景順，目前都係放高風險的100%環球股票基金。

僱主供款30萬幾（我唔洗供），而家收益9萬幾。

請問我應該選擇取回所有現金再作其他投資？（扣取放回MPF的錢之後應該還有28萬左右可以取回）還是應該先繼續放，等個市好啲再取出？（佢五年內再隨時取回）, 先謝

龔成老師︰

首先，你按翻人生財富配置就得，睇翻自己年齡情況，是否適合說基金的風險度。

另外，你可以睇翻隻基金表現和目標，去做決定。

例如投資的資產類別、投資策略、風險程度、市場、費用成本、以及過往的表現。

你可以睇佢過往5-10年，如果回報係比主要投資市場高，有機會值得繼續放在公積金戶口投資。

------------------------------------------------

Q22119：

老師，請問你有沒有覺得最近市況有點過熱，大市市值有點偏高？

我留意到HSI的市值已高達17倍，比以前一般10-12高出不少，另外一流的公司市值升很多不在話下，但連不少質素很好的2線公司都有2-3倍的升幅，

例如中國軟件，中遠海控，這情況令我擔心市場正在開始形成泡沫。

針對這種情況，我繼續保留質素很好的公司，但我應該把手上投資組合中質素一般的股票賣出，換成現金還是換成較好質素的股票比較好？

現在我有1百萬股票，1百萬現金，我希望5年後能夠增值成1千萬，跟隨老師你的步伐，請問我怎樣做才可以達成目標。感謝你的時間和思考，如果上面寫得不夠清楚，請見諒。

另外一提，在我只有十萬時看百萬富豪，給予我希望及目標，最終我得到百萬，果然意念成就事實。

現在，我正在看千萬富豪這本書，給予我新的目標，而且我已經不會再覺得是希望，而是信念，必定能做到的信念。

感謝你，這些都是因為老師影響到我。

我現在是創業，會計師樓老闆之一，算是正在做創富類的工作吧。

我想變得更好。

龔成老師︰

先恭喜你，達成首個理財目標，成為百萬富翁。

由於近期恆指加入不少新成份股，令到PE合理區，都作出相應調整。你預13倍左右，算係合理區底部。

中國軟件國際(0354)和中遠海控（1919）係貴，但整體大市依然算係合理區，暫時唔見有好明顯泡沫。

你持有優質的股票，應長線持有。但較一般的股票，若持有比重較多，可以考慮換碼至其他優質股

其實，我地投資股票，就等同投資一間企業。係要時間，比佢慢慢成長。一般希望做到架合理回報，係每年增長10-15%。

你現時這個目標，用5年將財富由200萬，增值至1000萬，用股票投資去做，風險會好大，較難達到。

其實，正如《80後千萬富翁》書中所講，要致富其實有5條路，投資只係其中之一。

而生意，都係其中一個出路。一盤生意打理得好，回報係可以遠超投資優質股，所以你想達至你的1000萬目標，可以先從自己盤生意著手。

若再用空閒資金，才用來投資優質股和物業，令財富組合更平衡，咁就可以。

如果你這筆100萬資金，係已經諗住預留去投資優質股。你可以先儲起，因為現時大市只在合理區，你可以等有明顯回調時，才用來慢慢分注入貨。

------------------------------------------------

Q22120：

老師，不知不覺就過左2年多没有message你, 其間我有睇你書及留意你facebook

亦成為我這幾年的鼓勵，現在有些問題想請教你意見, 我同男友想在明年初結婚, 我們都打算未來幾年內移民, 我們打算未來1-2年生BB,

我男友想買樓, 他會用大部份積蓄, 但我反而叫他租樓住, 因為咁様，cash flow會較多, 而且怕幾年後樓價會跌, 放樓也不容易, 一買一賣涉及很多費用, 又要用錢装修

我們這個情況, 你會有甚麼建議? 贊成我男友買樓嗎？還是盡量租樓, 留多d cash係手?

因政局常變, 而買樓有3年禁售期, 因為我才建議男友租樓, 但他不喜歡租, 只想買, 你意見如何? 這刻可怎樣為將來同移民打算?

龔成老師︰

過幾年樓市升跌，無人知。從自住角度，若你係有實際生活需要，而有"供得起"，置業都係可以。因為除了優質股，物業都係一種資產，都係可以幫到你累積財富。

較理想的情況，就係在置業同時，可以留有一定優質股係手，保持增值。令成個財富組合，唔會過於遍重物業，因而造成過度集中性風險。

但其實，你距離移民只有幾年時間,如果移民時，你可能不會保留任何香港資產，我就建議你地租屋會較好。

加上一買一賣的成本高，同時無人知樓市到時是高是低。

因為本身樓市有一定波動性，加上装修和買賣成本都高，還有額外印花稅等問題。為幾年生活，而去置業，未必真係值得。

你反而用移民前的幾年時間，將資金投資一些優質股，去幫你移民前做些增值，相信會較好。

而你男友想買樓，我估有機會係從投資角度出發。但其實現時樓市算略貴，整體租金回報率不高。投資值博率計，會係股市會較高。若他真的有從投資角度考慮，你可以提一提他這一點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14301-Q14320）

Q14301：

老師，我係你學生，有D問題想請教：

我想問「永續債」的問題：
在Balance Sheet中被視為股東權益部份，而非負債，利息也沒當利息支出。

同時間，因為佢係權東權益類，所以在集團總純利拆數時都可以分番份，變相令股東應佔利潤少左。

我找了一個研究個案：

恆大(3333)係2017年全數清還了所持的永續債，由於以往總純利由“股東+少數權益+永續債”3者瓜分，現在少了永續債，所以股東應佔利潤大升數倍。(當然我了解過，仲有其他因素令佢純利升，但影響少於1/3)

係而個情況，其實企業本身盈利能力無變，只是資本結構變左。但股東又就係袋多左，係講緊以後都分多左。

1) 計算合理之每股盈利，有無地方要因為咁去調節下???

2) 這個算唔算核心性因素，雖然同業務無關，但真係長線影響投資者盈利?

龔成老師：

我先從概念上講，永續債，雖然在會計上，會放在股東權益部分，但從本質上，這其實是負債。

因為「股東權益」最基本的原理，就是當企業增值時，就享有當中的回報，同時，要承受企業本身的風險，當企業破產時，是最後才分到錢的。

而永續債，說到尾都是負債，要保持支付利息，同時是「欠了投資者一筆數目」，而「股東權益」則沒有「欠了」的成為。

因此，永續債在概念上，應該視為「負債」，但在會計上，只是入數在股東權益的部分。

1）無特別要調整。

因為過往的盈利，其實最終的股東應佔溢利，已經是扣除了小數股東權益，以及永續債的利息。到佢還債後，盈利股東應佔溢利同樣不計小數股東權益，以及無該永續債的利息要扣。

你只要當佢看成是其中一個借貸，而借貸的利息，無論是以一般的融資成本去入數，還是以永續債支付利息成本去扣數，最後的「股東應佔溢利」都是扣除相關支出的。

因此，當我地計算有代表性的每股盈利時，會考慮小左一筆利息支出，但並不是有前後方面的核心性調整。

2）要睇個數有多少，如果過往每年佔盈利的比例好大，就反映是核心性因素，而在推算之後的盈利時，最好考慮這因素。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14302：

老師 你好 邊本書岩初學者睇??
80後百萬富翁? 定財務自由行?

本身有做緊月供投票

龔成老師：

初學者，可以先睇《80後百萬富翁》，然後睇《股票勝經》，再睇《財務自由行》。之後再睇我的其他書。

月供股票可以保持進行，這反映你對股票有基本知識，你盡快睇上述的書，對你之後投資好有用。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14303：

老師覺得體育用品新股6110滔博如何？

能唔能夠好像安踏同李寧一樣係優質倍升股？

龔成老師：

滔搏（6110）主要係中國從事運動鞋服產品零售業務。

佢絕大多數門店為單一品牌門店，以所售運動鞋服產品的品牌冠名，而家共與11個品牌合作，當中主力品牌（Ｎｉｋｅ）、（ａｄｉｄａｓ）。

其他品牌包括（Ｐｕｍａ）（Ｃｏｎｖｅｒｓｅ）（Ｖａｎｓ）等。

基本上，都是大品牌，而佢除單一品牌門店外，亦以自有門店品牌經營多品牌門店。佢有好強的零售網絡，包括8000家直營門店，可見有一定的規模及質素。

其實業務增長不差，財務數據正面，但由於上市不久，財務數據的可信程度會減，因此會扣分。基本上正面的，現時估值在合理區中上部，如果注碼不大，都可考慮。

由於市場已對所有體育用品股，調高了估值，因此佢要倍升不是中短期能做到的事。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14304：

老師，你好。現時澳門比人降級，香港零售市場不利，請問對新手黎講金沙同六福值得入貨嗎？定繼續儲2800會比較好？

龔成老師：

我相信上述所講的種種情況，其實都是一些中短期的問題，只要唔影響到企業的核心情況，其實不用太擔心。

我地投資，一定是長線，往往會分析「企業3年後的情況」作為基礎。

金沙（1928）與六福（0590），都是業務本質理想的企業，不用擔心中短期問題，這兩股都有投資價值，金沙現價在合理區中上部，六福則處合理區。其實都可投資。

不過，我會建議你用盈富（2800）作組合的核心，然後再加上金沙六福作輔助，已是一個不錯的組合。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14305：

老師，長實基建1038 我計算了合理區 $55.7-68.8，正確嗎？ 這個股票適不適合大手投資？

龔成老師：

長建（1038）有一定的質素，你計算大致正確，現價在合理區內。

這企業近年受歐洲經濟差的因素影響，業務較弱，增長慢，但佢其實仍在不斷投資中，只要當地慢慢好翻，佢之前的投資會有成效，我對佢長遠前景正面的，但不是高增長型，只是平穩增長類。

這股可以適度投資，佔組合一定的比例，無問題。但要留意，任何股票，我地都不建議過份集中的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14306：

成哥。1515點睇？

龔成老師：

華潤醫療（1515）其實本質唔差的，雖然盈利有少少下跌，但業務仍是正面，睇翻佢的主要業務，係中國從事綜合醫療服務、提供醫院管理、諮詢服務、醫院集團衍生業務，都是仍有發發的。

加上佢旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。係長期中國人口老化的過程中，佢一定有利。

現時估值合理，但就不是高增長類別，前景仍是正面的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14307：

龔sir：請教一下你，如果話退休時，每月有5萬蚊收入，會持續發放至終身的，那麼這個狀況，可以算係「財務自由」嗎？

龔成老師：

如果每月有$5萬現金流，終身，對於大部分人來說，都已經算是財務自由。

其實財務自由的定義每個人都不同，因為公式是「被動收入大過基本支出」，每個人的基本支出都不同，所以，只要這數目是足夠你平日的消費，就已經進入了財務自由的狀態。

即是在財務上，已經自由了，不用每天再為金錢而工作。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14308：

大師你好，請問大學生，資本幾萬，買正股如美團、小米、阿里巴巴加起全部獲利近20%，但回報數千非常少...
因此，我買了數千元牛證，貪該衍生產品較簡單，門檻又低，但上落幅度下下10%以上，風險槓桿了5-6倍，非常驚險。

但我目標想博取倍數增長，不知大師有何見解？牛證可否長渣？但我怕用更高風險的投資工具如輪、孖展等非我能力所及...

龔成老師：

所有衍生工具，都不能長線投資的，絕大部分都只是短炒。

投資股票，一般的每年回報15%-20%，我明白，對年輕人來說，回報不算吸引，你的想法正常，我過往都試過，而我過往做銀行，好多客都試過。

我18歲投資股票，頭幾年炒輪、炒孖展，想法同你一樣，想高回報，結果點？輸足幾年。

幾年後，從頭開始，爭取翻15%-20%，穩健投資，當年好後悔點解唔早D開始穩健投資。

到後來我做銀行，見證大量散戶，好多人都同你的心態一樣，就我所見，100個客短炒，有98都是輸的。

世上的確有人短炒衍生工具賺錢，但好少好少。你可以試，因為你這年齡，想快速賺錢心態是好正常，好多野唔試過，亦唔會知結果，我只是分享我所見。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14309：

龔老師你好， 我重讀緊大學，有十分小量既收入，想問老師你利福國際(1212) 以依加既P/E ratio 值得買嗎?
定係都係比合理價較貴?
打算買2-3手，放3-5年

龔成老師：

市盈率只是我地分析企業平貴時，其中一個指標，並不是唯一的指標。另外，我地用市盈率時，會以調整的模式進行，以更有效分析（具體的方法，要課堂才能詳細講述）。

利福國際（1212）不差的，有品牌，過往業務不差，只是近期受香港的零售影響，而長遠來說，仍是有投資價值的。

但要留意，佢負債增長快，這會造成風險，這是扣分的地方。現時估值合理，可投資，只要不太大注就無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14310：

呀sir你點睇390 同1186？

同埋邊一隻比較好？

龔成老師：

中國中鐵（0390），本質不算差的，有投資價值。但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。

至於中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。

如果要兩隻選一隻，可選中國中鐵。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14311：

你好，龔老師。我一直持有中糧包裝（906）差唔多3年了，股價逐少逐少有6.x跌至而家3.x，上個月有好消息仲裁方面有好消息。

不過，係股價一直都沒有變動，最近市況見到所有其他股票都因為有好消息而有升幅，但係中糧包裝郁都唔郁。

有個想法我係咪應該放棄持有（虧損大概40%），而去買一啲如中生製藥等潛力大嘅股票好啲呢？

龔成老師：

我地繼續持有一隻股票與否，最重要是睇企業的質素、前景，買入價不是重點位，只是一個心理因素。

中糧包裝（0906）本質算是中等，不是劣質，但又不能叫優質股，現時市盈率算是合理價，你可以等佢有較大的反彈時，賣出，雖然轉其他股。這策略可以。

如果你這刻持有太多，可以先賣出一部分。

佢雖然生意穩定，但就多年來都無增長，加上盈利無增長，同時股本回報率處低水平，反映企業賺錢能力不強，投資者投入的資金回報不高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14312：

你好 中國移動@71.4 中電 @85.5 中國石化@6.3 中國銀行

我各持一手 我響中美有問題之前買入 唔急放 但係想請教一下我幾時賣出較佳?

龔成老師：

你持有的股票，基本上都有一定的質素，基本上可以一直持有。不過，上述是偏向收息類的股票，增長力其實唔強。

如果你投資目標是收息，其實可以一直持有，如果想有增值，可以等出現某些市場因素帶動股價向上後，賣出轉其他，例如中移動（0941）可能有5G的影響，如果股價上升不少，都可以考慮賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14313：

成哥你好，想你點評下我依家嘅情況。

本人22歲，大學最後半年。現時兼職大約一個月搵$5000，現金儲到$40萬，10個月前開始月供，每月大約每隻供$1000-3000(貴就減供，平就加供)，組合如下：

388: 52股/平均價247.22
3: 1017股/平均價 15.98
823: 182股/平均價 86.64

1. 打算繼續月供上述股票至30歲，長遠來說可以嗎？畢業後月入大約應該都係得$15000，想月儲$10000投資，請問你建議如何分配供股？

2. 由於我覺得我供嗰3隻股都係平穩股，所以想加供1隻潛力股，如果下年1月開始加供1177，每月$500 (因為現價比較高，想落返6左右先加供返)，你認為如何？

3. 聽人講823將商場翻新又翻新晒，引入貴價鋪又引入完，所以最多得返五年左右增長，之後會變收息股多，老師點睇？

4. 因為想買上車盤，目標30歲前有100萬做首期+買樓雜費。現時已有現金儲蓄$40萬，所以還差$60萬。請問除左股票後，仲有咩投資可以令我快啲達成目標？

感謝

龔成老師：

1）所選的，都是有質素的股票，可以保持長期月供。其實你唔需要將每月金額加加減減，月供是長期模式，保持去供就得，除非大市好明顯的平或貴。

上述3股，你照舊供，另外，加上盈富（2800）每月供$3000，長期進行。

2）中生製藥（1177）有潛力，你投資$500每月，可以，長期進行就得。

3）佢的增長力，的確比過往年代少左，但仍是有增長，可視為平穩增長類股票，有投資價值。

4）投資平穩增值股，一定是主力，你除了月供外，同時建議你好好利用餘下的現金，部分以選優質股，等較平宜時買入的模式進行，這會更有效增加回報。

不要白白浪費了資金的增長力，如無能力選股，就投資盈富（2800）。

另外，你可以將小小資金，試下做生意，除左可以學到野外，亦是一個令財富快速增長的機會。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14314：

龔sir好
我28歲 月入2萬左右

目前有
3手盈富 26.650
2手阿里巴巴 197.300
手上流動資金仲有約20萬

想問下龔sir 呢20萬可以點投資？
本來打算買收息股 不過想問下龔sir意見

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

盈富（2800）是好適合你的類別，可長線持有。

阿里爸爸（9988）是有質素的潛力股，你可以持有，但不建議過多，因此不建議加注，但你原有貨，可長線持有。

至於你手上的$20萬，以你的年齡，不適合投資收息股，可考慮平穩增長股，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14315：

你好，請問3759看好？
現價可入嗎？

龔成老師：

康龍化成（3759）主要經營醫藥研發服務平台，業務遍及全球，客戶包括全球前20大醫藥公司及生物科技公司。

業務如有實驗室服務、臨床開發服務、ＣＭＣ（化學、製造及控制）服務。

業務的增長力不差，行業發展正面，整體來說不差的，唯然之前已在國內上市，但始終在香港上市不久，這會扣分的。現價都算是合理價，小注投資可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14316：

龔sir你好，我是個剛剛開始月供股票的新人，目前打算月供1萬，3千2800，2千2388，2千0003，1299和0066各1.5千。

請問接下來如果打算加1211或0012進去現有的組合資金會不會分太散?還是維持現狀就好? 求指教。

龔成老師：

你現時月供所選的，都是有質素的股票，你可以月供，長線投資。最重要，就是唔好理中短期股價，保持長線進行就得。

暫時保持現狀態，唔好太心急加入其他股。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到你有較大累積資金及知識，先再入其他股。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14317：

hi 龔生您好，你覺得肺炎對香港樓市影響大嗎？

龔成老師：

暫時睇，會有，但未必會好大。

香港本身的經濟轉弱，加上這次的肺炎，對樓市點都有影響，但長遠來說，香港樓仍會因供求問題，令樓價向上，因此，這一年相信是買樓的時機。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14318：

龔成老師你好：我們為一對80後夫婦，家庭月入大概65000（我是家庭主婦，老公一人工作）。

有一層自住物業，扣除按揭還款、家用以及日常開支每月大概有$10000-$20000儲蓄，以往沒有投資習慣，只有一份價值$150000的儲蓄保險而已。

另現金大概有$600000，想做一些中長線投資為退休打算但不知從何入手，請問可否俾D建議我地呢？非常感謝

龔成老師：

你有儲蓄保險，這只是防守性產品，在財富分配上，缺少了進攻的部分，因此應該將資金，分配到股票，令你的組合更為平衡。

由於你之前無投資，因此不建議投資高風險類，最好是投資一些穩健的股票，例如盈富（2800）$2000、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

我會先建議你投資盈富，之後再加上其他。

你可以以分注投資的模式，以及月供股票方式去進行，因為你初投資，不懂平貴概念，利用分注投資的模式，最有效減少風險，平均買入價。

暫時只建議動用$30萬，分注去入，慢慢入。

另外，以你的情況，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14319：

龔成老師你好，之前已有拜讀你嘅書，但自己有啲唔爭氣，未能活學活用...

早前係高價入左兩手維他奶同埋煤氣，咁岩最近又有一筆大支出，令cash flow 得返唔多，想請教之後可以點部署。而家portfolio 係咁：

0012 $37.8 1000 shares
2800 $26.35 1000 shares
0345 $34.63 4000 shares
0003 $17.22 3000 shares

多謝老師，感激！

龔成老師：

你持有的都是有質素的股票，唔需要擔心，有得守。

我地投資，無可能準確預測到高低，只能分析當中的平貴情況，如果你記得，我都有分析過上述的股，例如維他奶（0345）及煤氣（0003）這都是優質股，但你買入價都有少少貴。

由於無人能預測股價，但我地可以從平貴去決定投資策略，當優質股處貴時，就算我地想買入，都不能大注，等佢落翻去合理區先會正式買入。

所以你之後，要學習配置、投入注碼的技巧。如果你這刻現金唔多，要做的，就是儲現金，原有貨不用變，但這刻要集中儲現金，唔好心急入貨住。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q14320：

龔成老師你好,我今年36歲, 投資股票已經8年, 但大多數輸多嬴少, 手頭上的股票全部都蝕緊, 另有15萬現金, 如何可以做到資產增值, 可否幫幫我睇睇手上股票如何處理, 謝謝

滙豐控股 $80 @400股
另月供滙豐平均價 $62.36 @255股 (月供1500)
領展房產基金 $83.65 @368股 (月供平均價)(月供2000)
中國生物製藥 $12.98 @5000股

中國人民保險集團 $5.10 @8000股
中廣核電力 $3.10 @8000股
錦欣生殖 $12.30 @4000股
ＨＴＳＣ $24.80 @400股

月供需要調整嗎?手上的股是否需要換馬,手機股睇好嗎, 以前賺過2018, 2382, 而家再入如何. 文筆不好, 謝謝

龔成老師：

匯豐（0005）並不是無質素，但比過往轉弱左，你可以持有，但就未必值得你不斷月供去加注，因為質素唔算強，同時你36歲，這股只是收息股，未必最適合你。

至於領展（0823）、中生製藥（1177），有質素，持有無問題。

中國人民保險集團（1339）、中廣核電力（1816）質素雖不算差，但不算好強之列，這類股可以持有，但不應佔組合比例太多。

錦欣生殖（1951），雖然有增長力，但業務風險較高，小注可以。

ＨＴＳＣ（6886）質素都算有，但不算好強，同時有一定的週期，你到下一次股市旺市的時期，可以考慮賣出。

你選股不算好差，但時機把握能力較弱，反映你對股市冷熱，企業價值概念無能掌握。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

很多投資人都覺得財報是落後指標，但在會計師的眼裡，冰冷的數字背後，往往隱藏著讓人意想不到的獲利密碼！今天我們就找來四大會計師事務所的前所長張明輝，還有學霸分析師丁彥鈞，教你如何從財報中，提前挖到獲利100%的黑馬股！
#股市 #股票 #台積電

01:27 看財報預知未來?用1細節揪出公司掉價警訊!
03:43 單靠財報小心誤用!高手曝搶得先機的第一步!
05:08 獲利3點不漏!1公式竟能算出台積電未來利潤?
07:16 被低估的營建股!1特性讓它總在後期獲利爆炸
10:00 公開不賠錢秘訣!高手教你精準挑營建潛力股!
13:40 1指標找出合理價!提高你的營建股投資勝率!
14:32 3重點看IC產業未來!這項上升就代表有危險?
17:48 IC產業鐵口直斷!專家如何看Q4的未來發展?
19:30 金融股股價表現不佳?拖垮獲利全都是因為它!
20:42 2原因看壞壽險業!最賺的金融之最其實是它!
22:25 金融類股怎麼挑? 專家心中的優質Top2是...?

✓ 點我加入《風傳媒》Line 好友（ID：@dyp8323m）　http://bit.ly/2hETgWE
✓ 點我訂閱《風傳媒》YouTube 頻道　http://bit.ly/2grkAJ6
✓ 點我追蹤《下班經濟學》IG頻道（ID：@worked_money） https://bit.ly/2WZ1Dnb
✓ 點我加入《下班經濟學》telegram頻道　https://t.me/storm_money

【Facebook粉絲團】
風傳媒►► https://www.facebook.com/stormmedia
風生活►► https://www.facebook.com/SMediaLife
下班經濟學►►https://www.facebook.com/workedmoney