到日本旅行，一眾shopping怪最常遇到嘅煩惱事：過重！

個人食到過重就梗係驚，但行李過重就仲驚，因為會被罰錢嘛，亞洲地區如泰國，返香港行李過重收費好平，但日本卻係非一般嘅亞洲地區，返黎過重都罰得幾金下！有冇諗過其實可以郵寄部份行李返香港？雖然日本郵費一啲都唔平*，但點都平過俾航空公司罰**。

喺日本寄野返香港，需要填寄件人資料(日本地址、日本電話)，如果有朋友喺日本住，可填朋友嘅資料，但如果冇有關資料呢？咁我自己就會填酒店***地址及電話。填表時，係需要表明，如果郵件打回頭要點處理，我通常都會填「丟棄」，因為如果冇真正可以收件嘅日本回郵地址，根本打回頭都唔會收得返。所以大家要記住！寄嘅野一定唔好係貴重野！擔心寄失？如果真係好擔心會寄失，咁就唔好寄喇，因為如果冇回郵地址，你根本係唔會收得返！不過我當年喺日本搬返香港時，寄左50箱野，一箱都冇寄失過，一直以黎自己亦從未試過寄失或打回頭！不過咩都有“萬一”，如果真係驚，就唔好寄喇，冇百份百保証咖！

寄野嘅箱可以喺郵局買(價錢見附圖)，非常實淨，亦可以自備紙箱，最好唔好一早將紙箱封口，因為職員有機會要檢查，最好等檢查後先完全封箱。

日本嘅郵局通常營業時間為：
星期一至五 0900-1700
https://map.japanpost.jp/smt/search/
但有部份郵局星期六、日都會開，營業時間仲好長，有啲直情營業至 2400
https://www.post.japanpost.jp/shiten_search/

日本寄外國(国際郵便)大致分四種：
EMS、航空便、SAL便、船便

EMS：最貴亦最快，2-4日就到，不過真係超級貴，填嘅野又多，仲要買保險，所以唔建議，亦唔會教大家寄喇。
航空便：即係寄飛機，都快，3-6日，不過都係好鬼貴，我自己就好少寄。
SAL便：廉航飛機，唔係任何國家適用，香港可以。快過寄船，平過寄飛機，但唔肯定要幾耐，通常半個月至一個月左右。
船便：最最最慢，最快都要三星期，分分鐘成個月都唔定，不過就最平，我自己就次次都係寄船，因為一定唔趕又唔貴重嘅先會拎去寄。其他趕用趕著嘅，就梗係跟自己寄艙行李啦！

以1kg物件為例，由東京寄至香港價錢分別約為：
EMS ¥2100
航空便 ¥2050
SAL ¥1800
船便 ¥1600

不能寄：
易碎品(玻璃、瓷器⋯等）、液體、易燃品(煙花、爆竹、彈藥)、壓縮氣體(殺蟲水、hair spary⋯)、易燃液體/氣體、炭、火柴、漂白水、有毒品(殺蟲劑、農藥⋯)、放射性物質、電芯、水銀、磁石、engine、含酒精飲料、spray罐、指甲油、酒精含量超過24%的防曬護膚品、酒精含量超過24%的頭髮用品、電子煙、電話電池、香水

唔可以寄嘅野其實係非常多，而間間郵局嘅職員檢查鬆緊不同，有啲真係會逐件物件check，所以大家寄野最好唔好太多種類，例如一百円店買嗰啲濕碎野就最好唔好寄喇，較嚴謹嘅郵局職員會逐件check，唔肯定時又要逐件向上司請示。最好係成箱都係衫，或者成箱都係公仔，總之同一箱寄同類嘅野就最好！

寄到返香港都有野必須留意呀!!!!! 香港郵局以前派件，派到收件人地址如果冇人收件，可免費安排再次派送，但依家如果要再派就要收費
https://www.hongkongpost.hk/tc/mail_redelivery/index.html
所以大家要留意填寫收件地址時，最好填個辦工時間一定有人收件嘅地址。
如果真係派到黎冇人收，郵局會留底一張卡喺信箱通知你要去郵局取件，如果一段日子都唔去取件，郵局會收取額外儲存費用(逐日計)，如果太耐都唔去郵局認領郵件，就會打回頭返日本咖喇!!

*亞洲郵費一般都好平，但日本唔係計入亞洲區嘅價錢，而係同歐美郵費睇齊，要留意呀！
**航空公司寄艙行李，每over 1kg，罰款約為20美元
***記得只寫酒店地址，唔好寫酒店名，因為如果郵局職員見你填嘅回郵地址係酒店，未必會俾你寄。

圖：
① 寄件人姓名
② 寄件人地址 (日本)
③ postal code
每個日本地址都會有個postal code，例如：
169-0072 東京都新宿區大久保
「169-0072」👈🏼呢個就係postal code
④ 電話號碼(日本)
⑤ 收件人姓名
⑥ 收件人地址
⑦ 收件人電話號碼
⑧ 香港
㊀ 郵寄物品資料，填英文就可以，例如：
Clothes, bag, shoe …
㊁ 件數
㊂ 價錢
㊃ 總價錢
㊄ 寄件日期
㊅ 簽名

郵局=郵便局
請車我到最近的郵局=
一番近い郵便局へ行ってください

^^寄野一兩個人就夠，唔好太多人阻住人哋辦公
^^寄野時一袋二袋就梗，pack野時盡量唔好阻人哋太多位，保持安靜，細細聲講野
^^寄完野剩返啲紙袋、包裝、垃圾等等，要自己拎返走
^^時刻considerate，做個文明旅客

#大家睇完喜歡或覺得有用就俾個like
#唔嫌麻煩仲會幫手share更感激萬分
#大家幫手like下share下係發帖者嘅出post原動力
#有其他日本野化妝野想知 #歡迎留言 #請留言唔好inbox
#日本 #自遊行 #旅行 #東京 #大阪 #北海道 #札榥 #九州 #福岡