【龔成問答信箱】（Q21861-Q21880）

Q21861：

老師你好，我係一個中小企東主，因疫情生意大跌，現準備申請sme loan，max可以借幾百萬，利息為2.75%，分8年還，頭18個月可以只還利息。

雖然資金可作實體業務發展，但有感現在市道都非常困難，所以想睇下老師有冇咩建議，可以係18個月後還款時己有足夠資金去還款，又或者點樣好好善用這筆貸款好呢？感謝

龔成老師︰

其實一門生意做得好，佢回報長線一定係會跑贏其他資產類別。

而且，通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

你要想清楚，資金借來做咩？怎樣具體進行財富增值？

不要為借而借。

股市，現時只是合理區，明顯未係有個最好時機，若現時用借貸去投資，風險係唔細。

就算你只係投資較穏定的收息股，去賺息差，我地都難保會出現賺息蝕價的情況。因此，你想用這個貸款，去進行賺息差的動作，我就較有保留。

現時疫情依然有一定不確定性，我建議你視乎自身經營情況，去決定借取相對金額的貸款，去過度這個較困難的時期，會較好。

------------------------------------------------

Q21862：

老師你好，之前有問過你問題，多謝你詳細分析，你之前有覆過我部分手持的股票一般質素的如下：

閱文集團中招股價55（已估）
雷蛇20手，平均2.6（已估）
通達集團2手，平價1.7

中國石油4手，平均4.81
中國鐵建5年前入，10手，平均16.2
海通國際4手，平均7.85

剩餘這些是否長痛不如短痛，忍痛估岀，換其他？謝謝

想重新來過，重整理財組合。

我係唔係應該愈早放棄上述d舊乳酪

龔成老師︰

通達集團（0698）、中國石油（0857）、海通國際（0665）、中國鐵建（1186）都是一般質素。

質素不致於話要即刻沽，但始終質素有限，唔建議你持有太多。你最好有反彈時，沽出部份，換至其他優質股會較好。

另外，我見你中鐵建(1186)買入價都幾貴，相信你是熱炒一帶一路時買入。

記住，我地盡可能都要避開一些熱炒話題行業。因為好多時，佢地都會被炒到好貴，就算係有質素，你太貴入，長線回報都會出問題，你要注意這點。

你組合不至於要推倒重來，但部份較一般股票，不宜持有太多，長線會影響你增長力。

中短期，可能你會見因為重整組合，而出現一些帳面虧損。但不要太在意，因為我地投資唔係1,2年，係一個超長線的計劃。

所以，你必須盡快修正好你的組合，重新向正確方向上路。長線回報，一定比你今日的虧損大得多。

記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21863：

成哥 我今年25歲 啱啱接觸股票 現持有1810 25.55 200股 / 6618 130 150股 / 3800 2.72 3000股。 每月收入17000，固定支出10000。 我可以點投資？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於你現時持股，小米(1810)和京東健康（6618）都有質素，你長線持有就可以。

保利協鑫能源(3800)就較為麻煩，佢現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21864：

成哥，我係一個新手，年頭開始follow咗你，亦睇完80後百萬富翁，將會開始睇財務自由行。

了解及入咗1830, 而家已經升咗100%. 多謝你嘅advice & sharing. 請問1830有潛質升值50倍或以上嗎？如果可以好似388咁就當然係最好。謝謝你。

PS. Set咗個目標比自己，希望一兩年內置業及五年內賺三百萬。努力！向目標出發！

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

你本身有貨，就長線持有，但這刻就不要心急加注。

佢會唔會升到50倍，暫時睇佢業務，唔係中短期可以去到50倍的爆升股類型。但此股都有質素和增長潛力，值得你長線持有。

另外，你要記住，好以完美醫療（1830）這類潛力股，增長潛力大，但不確定性都高。如預期一般發展，回報自然好。但不似預期的話，都會出現較大回調，故風險都唔細。

因此，你股票組合中，唔好過份持有潛力股，以免風險過大。我假設你係年青人，最多都係佔組合5成好了。若你投資經驗較淺，更要下調至3成以下，才算穏妥。

而你為自己將來定下目標，係一件好事。但若果你真係有需要1,2年內置業，投資策略就要調整。

因為1,2年唔係一個長時間，有機會出現波動。你用作置業個部份資金，投資時要保守D，以免影響你置業計劃。

------------------------------------------------

Q21865：

龔成 你好 ！
如何發掘有潛力嘅股票？

龔成老師：

買股票就是買企業，潛力股就是有長遠發展力的潛力企業。

要尋找潛力企業，過程比較複雜，而股票班，會教5種選股方法。

簡單來說，你要分析企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。

尋找一些有潛力發展的企業。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的發展、價值等。

------------------------------------------------

Q21866：

龔老師你好！我今年五十六歲，還有四年就退休。早年因要照顧家人沒有什麼儲蓄。

現在只有一層市值$830的出租私樓，仍然欠銀行$330萬，只有十多萬現金。

我現在每月可儲蓄$25,000, 租金收入（如果租客續租-現死約至2023年一月）$17,000。

我退休時應該有$650萬至$700萬Provident Fund。早年的MPF 現在戶口結餘有$41萬。有兩份保險，如果65歲退保應該有$100-120萬。

我退休後仍要照顧有認知障礙的年老母親，現在住公司宿舍，現有的私樓不打算自住，退休時希望買返一間不貴過$1,100萬的較大單位方便照顧母親及有地方安置工人。保守估計退休後每月駛費最少$3萬。

請問以我現時財務狀況，有冇可能60歲後靠現有的資產不再工作。多謝指教，希望早日回覆。

龔成老師：

物業現時的收租減供款，應該有正現金流的，因此這部分短期不用變動，你保持這方面的情況就得。

到2023年租客到期，你就睇自己的情況，可以轉另一私樓，但現時物業賣出後套現，現金約$500萬，與你目標物業$1100萬仍有距離，你要想想，要調整目標，還是動用退休金等。

現時你每月可儲$25000，一年就是$30萬，4年$120萬，就算考慮投資回報，可能滾存至$140萬-$170萬。

如果你每月想有$3萬現金流，假設投資一些5%回報，要穩健、有現金流的工具，你就要有$720萬才做到。

物業套現（$500萬），4年儲（$170萬），退休金（$730萬），保險（$100萬）。合共$1500萬。

但你目標物業為$1100萬，而產生現金流所需資產$720萬。

你到時擁有資產，與所需要的金額，有缺口，所以你要睇下，自己是否要改變目標，又或初期做一些兼職。

------------------------------------------------

Q21867：

龔sir您好：小女最近好迷惘，希望龔sir可以指教一下。現時持有幾隻股票都係坐艇當中，都唔係幾好意思講出黎，驚比人笑我買埋d垃圾股。

493國美零售，$2.43買入，現價$1.28
1499歐科雲鏈，$0.6買入，現價$0.39
769中國稀土，$1.3買入，現價$0.93
9988阿里巴巴，$256買入，現價$207
1211比亞迪，$185買入，現價$177.1

全部夾埋成本用了$55萬左右，現蝕$13萬，人生第一次投資股票，由2月份起左右買入，雖然一日未沽都仲未算輸，但坐艇坐到好心痛。

本人今年33歲，澳門人，月薪$4萬，唔計股票，可流動資金有百零萬存款，唔需要供物業，比$1萬家用屋企人，扣除所有開支一個月可以儲$15000。

之前一直好大洗無限制特定自己儲錢，洗剩幾多就儲幾多，今年想換樓但無本事先驚覺自己浪費左好多光陰。依家最大夢想係換新樓，好想改善居住環境。

希望龔sir可以指教一下我應該點分配投資好，好希望可以改善居住環境。

呢排因為呢d事情緒都好低落，求龔sir指教，感激！

龔成老師︰

投資失利，係每個投資人，都會必經的階段。最重要係，你有無從中學習到一些有用經驗，去提升自己將來的勝算。

首先，我想你明白2個正確的投資觀念。

我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，唔好抱住唔放就無蝕架心態，咁係好危險。我相信你架想法係，我唔放住，總有一日會返回家鄉。但我話你知，唔係一定的。

因為若然你抱住架係一隻垃圾股，佢只會一路跌，唔會再升翻上去。反而你決斷些，盡快垃圾股清走，換成優質股，長線才會有反敗為勝的機會。

你現時持股中，國美零售(0493)和中國稀土(0769)質素較弱，長線換至其他優質股會較好。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

阿里巴巴(9988)和比亞迪(1211)有質素，你長線持有就可以了。

你現時33歲，可以投資「平穩增值股」+「潛力股」這類有增長力的股票，為置業累積本錢。你可以先用每月儲倒的一半資金投資，另一半就先儲起。

平穩增值股：盈富(2800)、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

潛力股：安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注(不多於3成)。

此期間，你要努力提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21868：

HELLO老師，剛讀完股票勝經，對股票開始有少少少許認識，所以我想為自己重新訂立一個投資組合去增值自己的財富，希望能聽取你的意見。

我29歲，可月儲大約$6000現金，現有以下資產：

1. 約12萬股票(買入時12萬, 現應沒有)
-高鑫零售(6808) 1000股 $9.95入
-阿里巴巴(9988) 200股 $264入
-心通醫療(2160) 1000股 $17入
-快手(1024) 100股 $397.4入

2. 儲蓄保險, 月儲$1500, 已儲7年, 3年後供完, 如果唔拎, 55歲有74萬

3. 上年買入445萬的物業, 供30年, 現負債345萬, 資產我佔一半 (用來投資, 不打算自住)

4. 現金$24000

因那4隻股票我都係無分析企業底下買的, 所以我好希望重新審視自己的投資組合, 我睇完股票勝經後, 我利用書中的股票篩選3步曲的第一步:

初步分析財務指標, 想初步嘗試睇睇自己持有的股票需唔需要止蝕, 見到心通醫療(2160), 快手(1024), 中芯國際(0981)數據都麻麻(我唔知有無計錯呢), 請問老師對呢幾隻股有甚麼意見嗎?

我知道投資最好投上市最少兩年的企業會較好, 但因當初就是犯了全世界都熱炒新股所以我又跟住去買的錯, 令當時高位買入了價值不高的企業…

我想能放60%在水桶1, 40%在水桶2(月供), 先增值後現金流, 但現在看來太大比重在那堆潛力股

如現所持有的股票可先繼續持有, 我再額外月供$3000於水桶2對整體會有幫助嗎? 但又怕可能2,3年內需要結婚、搬出來住等會需要現金。

先謝謝老師抽空解答

龔成老師︰

篩選3步曲的第一步，只係方便較初階投資者，從數千隻股票中，選取一些較有研究價值的股票，再進行分析。

但這個方法唔係完美，有機會部份優質股被篩走，但作為初級投資者，這個方法算係較有效率和準備性較高。

而且，這個只係第一步，就算當中數字不太理想，都唔代表佢無投資價值。你要再完成後2步，才會有個較完整的結果。

你現時持有的4隻股票，都係有質素，可長線持有。但微創心通醫療科技（2160）現時未有盈利，故不確定性較高，暫時唔好再加注。

另外，我地投資時，的確要盡量避開熱炒行業。因為佢地股價好多少被炒高，變相影響了你長線回報。

而且上不足2年的企業，由於數據不多，我地好難去判斷去佢的質素，所以要保守少少。唔係唔投資得，但要控制注碼，去平衡這個不確定性的風險。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

"保險"只係理財中防守部份，買足夠保障就可以，增值可以留比優質資產(如優質股、物業等)去做。你現時份保單，仲有3年就供完，我建議你供埋佢。

但未來時間，你資金集中翻利用優質股去做增值，長線效果一定較好。

你29歲，應以增值為主，建議你用「平穏增長股」 + 「潛力股」作組合，去創造一個增值平台。現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

以你年紀，用60%在水桶1, 40%在水桶2，係可以。

但由於你投資知識不高，水桶1只宜小小注(不多於3成)。最好是你先提高投資知識，等到你有一定知識和經驗，才慢慢增加大水桶1比例(大約5-6成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

但若然你2,3年內，會有一些較重大實際開支要用，投資時可能要保守少少，水桶1比例要再下調多D。所以，你先計劃好自己未來人生規劃，才諗點去投資。

------------------------------------------------

Q21869：

老師請問時代天使質素可以嗎？老師唔好意思，最近有朋友推介左美股俾我，想問下你覺得以下股票的質素和現價合理嗎？

ATHM 汽車之家
MTLS materialise
CQQQ 中國科技指數ETF

感激你的回覆

龔成老師︰

時代天使科技（6699）有質素，長遠仍有發展力。

佢係中國的隱形矯治解決方案提供商。根據報告，市場份額4成。

這企業透過時代天使隱形矯治系統在整個隱形矯治過程中助力牙科醫生，其由關聯的三部分組成：數字化輔助案例評估支持及矯治方案設計服務；隱形矯治器指用於治療錯頜畸形的可移動、透明塑料材質牙套；雲服務平台iOrtho使牙科醫生可在整個治療過程中進行下達訂單。

佢目前銷售四種隱形矯治器，包括時代天使標準版、時代天使冠軍版、時代天使兒童版以及COMFOS。作為隱形矯治系統的核心，集團自研技術及數據平台，即masterForce、masterControl及masterEngine。

佢通過持有第二類醫療器械經營備案憑證的全資附屬公司向醫院及牙科診所直接銷售大部分服務及產品。客戶包括公立醫院、私營牙科診所及分銷商。

企業發展正面，過往的生意及盈利都有理想增長，不過，現時估值都唔平，要注意如果市場估值出現修正，股價可以出現下跌。

整體來說，企業發展正面，但現價就唔平，投資值博率只是中等。

ATHM 汽車之家、Materialise NV(MTLS)、CQQQ中國科技指數ETF，都有投資價值。

但CQQQ係潛力股類，波動性會較大，不宜持有過多。這些股票，現價合理中上，用分注或月供儲貨，會較理想。

------------------------------------------------

Q21870：

龔成老師你好，有以下問題想請教：本人現年46歲，現職公務員，月薪11萬。每月支出13000元，另外支付7000元作母親生活費。扣除薪俸稅，每個月約儲蓄約8萬元。

本人未婚，有自住物業，不用供款，樓價約750萬。

現金方面 [總額約77萬]：港幤35萬 (本地)，新加坡元7萬 (外地)

投資方面 [總額約126萬]：0008電盈 (60000股)、0405越秀房產 (78,000股)、0778 置富產業信託 (20000股)、0941中移動 (4,000股)、1398工商銀行 (15000股)、2638港燈 (30,000股)

強積金：目前267萬

保險 (已供完)：儲蓄壽險一份(110萬)現值42萬；儲蓄保險四份(＠15萬)＠現值10萬；危疾儲蓄 (24萬)現值4萬

自兩年前供完樓後，本人一直專心儲錢，想盡早達至財務自由、及退休。

本人現時的投資方面，盼望能給予意見。

期待回覆。

龔成老師︰

你現時成個財富組合中，已經有物業類，而且相較其他資產，都佔較大比重。因此，新資金我地會先集中翻係股票類，令財富組合較平衡。

持有的外幣，除非有實際用途，否則應轉回港紙好做增值。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，儲蓄保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想，你要自己平衡下。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你46歲，應以增值為主，建議你用「平穏增長股」 + 「潛力股」作組合，當中以作「平穏增長股」主力，去創造一個增值平台，為退休作準備。

你現時持股，都有質素。但問題是全部都是「收息股」。佢地主要係收下息，增長力好弱，不宜持有太多。以你年紀，最多佔股票組合2成好了(若你較保守，比重高D都可以﹐但成個組合增長力會慢左。)。

其餘收息股，建議你慢慢換碼至以下股票，去提升翻個組合的增長力。

現在你每月先用5成儲蓄，即$40,000做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合1-2成左右。若你係有一定經驗，你可以投資到約4成比重。

至於77萬現金和餘下的一半的儲蓄，我地就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

到你累積到一定資產，足夠你財務自由。你就可以將佢地，慢慢換成收息資產，去創造現金流，支援退休生活。

------------------------------------------------

Q21871：

龔成老師，首先要多謝你! 之前上完你的堂，獲益良多，明白投資唔可以過份集中，要平衡。

手上有新舊經濟股，即使新經濟股呢家回落返較合理水平，而舊經濟股又慢慢回升，所以整體回報吾會大上大落，甚至期待股價會再一步回落入貨.

近期檢視組合，發現地產股 (12，66，823)佔了整個組合約35%。 想問這3只股票之中，哪兩只較有潛力/值博率，因為現有的股票數目有些多。謝!

龔成老師︰

你現時想法正確，成個財富增值策略，最重要係「平衡性」。我地投資，其實係一個財富配置的動作。

你要去建立一個風險不高，適合自己年紀，長線又有增長力的財富組合。

現時你地產類佔35%，雖然超過我經常講的行業不要多於30%標準。但由於唔係超好多，而且港鐵(0066)只算係半隻地產股，故比重尚算可以，唔沽出都得。

至於潛力和質素，港鐵(0066)會較高。若計現價值博率，則是恒基地產(0012)較高。

------------------------------------------------

Q21872：

你好，我也是80后，单亲妈妈，有现金港币150万，股票

0788铁塔50000*1.1
6618京健1200*170/500*112
1810小2000*17./3000*29
1177中生5000*8.8
3067etf5000*16.7

现金人民币80万，合伙生意每个月分红港币3-6万，物业按揭贷款200万，每月供8000至8800，收租13000，自己租房8300，每月另开支3万。

因家庭原因2年内只有分红和房租收入且支出很多，2023年以后收入会多支出会减少。看了您的书后，我计划从6月开始月供，请问，2万至3.5万区间，取什么数合理？

0388 3000
0700 2000
1177. 3000
1211. 2000
1810. 3000
0027. 5000
2800. 5000

因我想带小朋友一起去上您的课。8月基础课还没有报名。万分感激。

每个月除了8千房租外，还需开支3万以上

这几年我一直只会用50万来炒股，所以上次请教您的时候说06618是半仓

龔成老師︰

若你每月能儲的資金較波動，你可以用一年平均數，去作為指標。

由於你未來2年，收支上會比較緊張，我建議你先預留最少半年開支，才開始投資計劃。月供部份﹐頭2年你都預一個較輕鬆的金額，會比較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供，其餘先儲起，用一邊月供一邊儲蓄的策略。

你現時選股都可以，但潛力股(0388, 0700, 1177, 1211, 1810)佔比太高，以你年紀最多佔4-5成好了。若你投資經驗較少，要再向下調整。

你可以將潛力股預算，加入盈富(2800)和銀娛(0027)，或者以下平穏增長股都可以。

現時大市只在合理區，現金佔組合大約3-5成就可以。當你扣除應急資金後，現金水平高於3-5成，你可以用分注模式買貨。

但你現時持貨，完全集中晒係潛力股。因此，這筆現時直接入貨的資金，應優先集中係平穏增長股，去平衡翻個風險會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

緊記，我地投資股票，係希望買入一些優質企業，透過佢自然增長，達至財富增值目的。絕對唔係"短炒"，一定係要用長線投資策略，才會有理想效果。

------------------------------------------------

Q21873：

老師 唔好意思呀我靜靜咁睇左你個page好耐 想投資但又唔敢亂咁入市

覺得1211，0285，2382，1810仲有排升 全部都想長線持有。但唔知幾時先入場好 有冇咩建議價位可以俾我做參考

龔成老師︰

你上述股票，都係有質素的潛力股，有長線投資價值。

但現時股價計，全部都唔平。比亞迪(1211)預佢回到$135才算開始合理翻少少，才可小注。

如果月供，最好回少少先開始，或者你小小注月供，就可考慮。

比亞迪電子(0285)、小米(1810)、舜宇光學科技（2382）全部都係略貴，要回多1,2成，才好開始分注入市。

但這3隻若你係諗住月供儲貨，現價開始係無問題。

由於「潛力股」係波動性較高股票，只適合年青至中年人士。而且，投資潛力股係需要一定經驗，如果你經驗較淺，可以先小注，大約佔組合3成左右。

若你係有一定經驗，你可以投資到約5成比重。

------------------------------------------------

Q21874：

老師,我們有選擇困難症,想問你月供股票的意見, 暫時每個月想供2萬, 年齡45至50歲, 希望平穩中，也能有理想的回報。

1. 3 - $3000
2. 12 or 16 better? - $2500
3. 66 $3000
4. 823 $2500
5. 2388 or 2318 better?$2000
6. 2800 $3000
7. 3067 $2000
8. 1177 or 2845 better?$2000

盼望老師能夠給我們意見(以上 第2，5，8点)， 整個月供組合可以嗎？

感激萬分

龔成老師︰

整體而言，你組合係可以。

但有一個較大問題，就係不少股票，都係跟地產相關，好似0012/0016、0823。另外，港鐵(0066)我地會當佢係半隻地產股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

我建議你，將部份地產相關股份的月供預算，轉換至盈富(2800)，對你成個組合的平衡性，都會有利。

至於恆地(0012)定新地(0016)，前者係手持農地是全港最多的發展商，長遠發展潛力較高，但風險都會大少少。而新地，則預佢係較平穏發展。

中銀香港(2388)和平保(2318)，2隻都係有質素，前者係銀行業，後者係主力做保險。中銀行性質上，會令佢風險高少少。但整體而言，2隻都有質素，你可以睇翻自己較睇好邊個行業。

中生(1177)和GX中國電車（2845），前者係醫藥股，長線人口老性，加上人均收入上升，都對緊藥需求有增無減。

而2845這基金的，目標是追蹤Solactive中國電動車指數NTR「相關指數」表現緊密相關的投資回報。

如果你睇好電動車發展，可以月供2845。而且佢係一籃子的企業，相比1177，更有分散風險能力。

以上選項，如果你都係唔知點分好，最簡單就係將預算拆一半，2隻都供晒就可以。

最後提提你，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21875：

龔成老師你好，我25歲, 剛工作2-3年，上年開始買d股票，現有組合如下：

(股票) 名稱 股 平均買入股價
0011 恒生 400 126
0005 匯豐 1200 34.8
1810 小米 1000 27.5
9618 京東 100 286.6
9988 阿里 300 255
6600 賽生藥業 500 18.8
0823 領展 (每月買$4,000, 由上年$65開始買起)

平時亦有短炒 3690, 1024 等科技股 和 0883 中海油

(1) 以上股票是優質股嘛? 請問 9988 , 6600 (我係抽新股抽中的) 有無長楂必要?

(2) 我覺得我組合較多銀行股同新興科技股，但對其他行業認識不足，請問如果想長期穩健股的話，有甚麼選擇?

(3) 如果想60歲退休時左右每個月有$30,000-40,000收息, 到時股票投資額應有多少? 現有組合/只買股票可以嘛?

謝謝

龔成老師︰

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

1) 只要係有質素，而又適合你年紀的股票，我地都會長線持有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你還很年青，才25歲，應先做好財富累積部份，故投資時應集中係有增長力的優質股身上。

阿里巴巴(9988)和賽生藥業（6600）都有質素和增長潛力，故你長線持有就可以。

但賽生藥業(6600)業務始終波動，不宜持有太多。

2) 恆生(0011)和匯控(0005)雖然都有質素，但只係收息股類，增長力不高。以你年紀，不宜持有太多，建議你將部份換至其他增長股，會較好。

而中海油(0883)只係商品類股票，對產品定價能力較弱，質素只係中等，不宜持有太多。其餘股票，都係適合你長線持有。

未來時間，你可以集中係「平穏增長股」 + 「潛力股」。

但由於潛力股會較波動，若你想投資長期穩健的股票，可以較集中係「平穏增長股」類。若你對以上股票或行業不太認識，你集中係盈富(2800)就可以。

同時間，我建議你用月供模式，去儲貨。因為初學者對企業估值，點去定平貴，未必會太了解。你先利用月供模式，去做增值，可以減低買貴貨風險，對你而言會較理想。

你每月先用5成儲蓄做月供。其餘先儲起，用一邊月供一邊儲蓄的策略。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

3) 如果你希望退休後每月有4萬蚊現金流，以股息率6%計，你需要本金800萬。

所以，你現時要努力累積這筆資金，為退休做準備。但我地投資時，唔會只集中係優質股，我地要講求成個財富組合平衡性，當中要包括不同資產類，好似股票、物業、車位等等。

但由於股票投資金額係較少，所以你初期可先用這個途徑開始。到有一定資金，才加入物業類，咁就可以。

我假設投資回報有10%（連股息再投資），你每月投資$5000，到退休時已可以增值至800萬以上，達至你的退休目標。

但你還很年青，我建議你盡量每月用一半人工，去做投資增值。好好把握年青優勢，令複息回報效果發揮到最大。

------------------------------------------------

Q21876：

龔sir:本人月收入九萬，妻子無收入，家庭支出六萬,可儲約三萬，現金120萬

物業
一居屋自住（未補地價）值七百萬 （已供完）
一外國物業值一百八十萬（未完成按偈一百三十萬）待出租

港股股票 約33萬

881 中升控股 881 一手共三萬
700 騰訊 一手共六萬
1801 信達生物共五萬
066 MTR 共四萬
1883 中信國際電訊共四萬
3067 科指ETF共三萬
3187三星房託共三萬

669 創科共三萬（月供三千）
2800盈富共一萬 (月供一千）
1299友邦共一萬(月供一千）
9988阿里爸爸共一萬（月供三千）

美股股票 +基金 （約十四萬）

TSM台積電 一萬
AAPL蘋果 兩萬
COIN Coinbase 一萬
貴金屬ETF 三萬
白銀ETF 三萬
基金四萬

澳洲基金（十二萬）

Bitcoin 兩萬

請問

1.你認為我持有的投資/股票組合需要改善嗎，例如友邦，創科好似已經pe 好高/好貴，另外每隻股票的質素也希望老師給點意見

2.需要再加多潛力股/平穩增長股嗎？

3.如希望每月有五萬現金流收入讓自己財務自由，應該作出怎樣調整/部署？

唔記得咗講我今年35歲，希望50歲前完成目標

龔成老師︰

1) 你現時持有股票，都係有質素。創科(0669)係貴，而友邦(1299)算係合理區中上部。

現價雖然唔平，但未到好貴。故現貨可持有，你照維持月供都無問題。

2) 你現時股票，都係有增長力。但不論月供，還是現有持貨，都係比較偏重左係潛力股(0881, 0700, 1801, 3067, 0669, 9988, TSM, AAPL, COIN)。

佢地雖然有增長潛力，同時風險都較高，不宜持有過多。

以你35歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，貴金屬、白銀這類資產，唔會創造現金流，唔建議持有太多。我地一般只會持有黃金或者白銀，去對沖一些突發性金融事件，大約佔組合3%左右，其實已經可以，最好以實貨持有。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

而虛擬貨幣，我不是這方面的專家，所以我無太多意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

如果你分析到佢長遠的交易大，大家都持續關注，就有價值，就值得你投資。但畢竟佢波動性都好大，就算投資，也不宜佔組合太多。

3) 如果你希望15年後每月有5萬蚊現金流，以股息率6%計，你需要本金1000萬。

現時大市在合理區，你建議你每月用儲蓄一半，即$15000做月供。其餘先儲起，用一邊月供一邊儲蓄的策略。

而現有120萬資金可以再投入多30-50萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產180萬(所有股票、貴金屬、白銀、基金和比特幣)，15年後大約會增值至1800萬，故這樣安排相信很大機會達至你的財務目標。

------------------------------------------------

Q21877：

龔老師您好，麻煩你給我意見，現有股票組合都是高價買入，請問那些應該繼續守 那些應該止蝕離場還是溝貨？什麼價位放或溝貨？

00700@$660
01024@$357.3
[email protected]
03690@$433.8
09618@$395.23

現金流有7萬

萬分感激

龔成老師︰

首先，你唔好將個重點，放錯係買入價個度。我地持有一隻股票與否，關鍵位是企業質素、前景，不要被買入價影響。

買入價只是一個心理因素，如果企業核心因素未被影響，我地係唔需要理會。現時你持有股票，都係有質素，有長線投資價值。

至於溝貨，我就唔建議，因為這幾隻股票，現價都只算係合理區頂。而且當中藥明生物(2269)、美團(3690)本身不確定性都較高，只宜小注。

另外，你現時持股全部都係潛力股，佢地雖然有增長潛力，同時風險都較高，不宜持有過多。

就算你年青，潛力股可最多只宜佔組合約5成，餘下應用平穏增長股作組合。若你投資經驗較淺，潛力股比重，要再調至3成以下。到你學到一定投資知識，才慢慢調高。

如果你係近退休之齡，你些潛力股，是不適合你的。

未來時間，你就要加大翻平穏增長股部份，令組合更平衡。

現時大市只在合理區，現有7萬你可以先儲起，等大跌市才出手。

------------------------------------------------

Q21878：

收到 我有買阿sir啲書嚟睇啊
股票班要等我儲到錢先

啊Sir 睇唔睇好京東健康

龔成老師︰

好，在上股票班前，都要努力學習。

你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂掌握，會有幫助。

京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

------------------------------------------------

Q21879：

潛力股都係可以持期持有？定係升到某個價位要放？我只有一手小米。

因為我岩岩先睇完大富翁，準備購入你其他書本

龔成老師︰

你現時手上只有小米(1810)，而且只有1手，你照長線持有就可以。

至於沽貨，我不會有明確的目標價。

我賣出基於下列幾個原因：由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。

此外，股價要是嚴重高估，例如市況狂熱，又或自身的原因令股價爆升，都有可能沽出。

若然你無法掌握到我上述所講的，可簡單用「升一倍、放一半」的原則，沽出後等同收回成本，餘下的貨就不用再理會，長期或永遠持有，因為這部分已經是淨賺。

當然，你小米(1810)只有1手，就用不上「升一倍、放一半」這個策略，所以你長線持有就可以。

如果你本身對投資認識不多，你可以先睇我寫架"80後百萬富翁"、"財務自由行"和"股票勝經"，會較為適合初學者。

------------------------------------------------

Q21880：

老師，我在考慮一個問題 就係假設我用300萬買左個車位放租，月租3000蚊 。一年3萬6。回報得1.2%，另外要租83年先回本。這樣的投資還算可行嗎

龔成老師︰

過往年代，車位一般都去到6%-8%的租金回報，但近年市場資金不斷追資產，連車位都不平。

近年「車位」價格近年雖然已回落不少，但整體上，只係合理區頂部。

若以你例子計，只有1.2%租金回報率，其實係不太理想。不單升值空間細，就連基本租金回報都不合格，唔係一個理想的投資目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20621-Q20640）

Q20621：

老師你好，我係你舊生，為了加强分析能力，我分析了一間公司：太興

雖然只上市兩年 但公司適逢
2019 社會事件
2020 新冠肺炎
雖然令營業大幅倒退 但2021.3.1 發盈喜預計淨利潤增長40-55%

所以對此公司管理層有信心 只要限聚令放寬 回復自由行 相信未來2年有不錯增長，我考慮左兩個情況的年份推算，得出了不同的答案

請老師再比意見 睇下今次會否太進取
（過往市盈率我同左你上堂講的方法，以過往多年作推算）

based on 2021/3/1 news said that TH Net profit growth rate from 40-55%
assume growth rate 50%

2020e EPS will be ：087*1.50
2021eEPS will be：0.195，0.163*1.5

industry PE：17-21
TH PE ：14-20

price range：（1.82-2.6）0.13*14-0.13*20
price range：（2.73-3.9）0.195*14-0.195*20

龔成老師：

太興集團（6811），是一間源自香港的多元品牌休閒餐飲餐廳集團。

除旗艦品牌「太興」外，集團透過自創、收購及授權成功壯大品牌組合，當中包括「茶木」、「靠得住」、「敏華冰廳」、「錦麗」、「東京築地食堂」、「漁牧」、「飯規」及「夫妻沸片」。

佢的餐廳網絡有過百間餐廳，香港、中國內地、澳門及台灣都有。

此外，集團於香港火炭營運一間食品廠房，亦於中國內地東莞營運一間食品廠房。

整體質素，算是不差，品牌價值相有，業務增長力中等，但賺錢能力不算強，成本轉嫁能力有不足的地方。現價算是合理價，中短期較弱，長遠會好翻D，都可考慮投資，但又未值得去到好大注。

至於你的估值方面，你計的方法方向雖然正確，你用了兩年的數據去進行參考，但要留意，由於這企業上市年期不算長，加上上市後面對了較多特殊情況，所以參考價值會減左。

因此，我地會集中翻佢過往，正常經營環境情況下的生意與盈利，這些財務數據會更有參考價值。

如果我睇翻佢過往正常環境下的盈利，2016-2018，盈利大約為$1億、$1億、$3億，由於企業在2019年上年，因為，有可能因為上市要「整靚盤數」，所以令到2018年的盈利增長較多，所以我地會保守少少，參考2016、2017年的數據較多，2018年參考價值會少左。

因此，可以推算一個有代表性的盈利，大約為$1.5億（當然這不是好準，但可以作為參考基礎），即是每股盈利為$0.15。

至於所用的市盈率，可以用翻14-20倍，因為我地在估值時，會偏向保守D，就可以計出佢的估值為$2.1-$3.0。

如果再考慮一些中短期疫情及經濟等不利因素，就會將這個估值再調低少少。

你在估值時，假設佢盈利增長50%，由於這幾年較特殊，這個假設唔算有實在的基礎，所以我地應該考慮翻一些長期同核心的因素。

其實這企業不差的，你見佢的品牌都有一定的價值，同時佢有創造品牌的能力，這的確能加分。但同時，香港人的特性是貪新鮮，有時品牌可以一下子唔受歡迎，這都是風險因素之一，所以，這企業整體上是有質素，但股價上落都會較大，這點都要留意。

------------------------------------------------

Q20622：

您好，龔先生，follow了由您的專頁有一段日子，我有點理財問題想請教您。

本人36歲，一家之主，有兩個BB, 家庭固定開支包括租金、保姆費用、保險、BB平均每月開支及日常洗費約72000港幣，做小生意月入約25-35萬港幣，後面會租舖做生意月租$24000。

所有積蓄壓在貨物算是有200多萬資產。2018年初基本沒有積蓄，現時積蓄（貨物）都靠這三年存款所得。

生兩個bb時用左好多錢，而且2020-2021年這一年才平均月入有20萬以上，之前兩年大約收入230萬左右，收入是愈來愈豐厚所以才打算開門店。

由於做生意必須囤貨，我基本上都是以囤貨當儲蓄。

我希望幫助分析一下我可以每月有什麼理財方法能增加我另一個投資方法楚來分散風險，穩步上揚。

望得到您的關注和回覆，謝謝。

龔成老師︰

首先，你做生意一定有不確定性，所以點都要保守一的現金，計好數，餘下的才可以進行平衡配置。

因此，你現時每月都能儲蓄，我會建議你先留一定的現金，作生意備用，餘下先「投資」。

同時，如果你生意發展得不差，在理論上，將資金投資到自己生意得到的回報，其實會比你投資其他工具更好。

當然，我地都要考慮平衡風險，將所有財富集中在一盤生意，是有風險的，所以如果財富許可，就建議你投資其他類別。特別是一些流動性較強的項目，如股票。

除了你現時生意外，你可以透過每月閒置資金，去投資一些優質股，來進行財富增值。同時間，你財富增值，都唔會完全偏重晒係生意，從而令你風險降低。

我地係投資前，必需先做好防守部份，特別係你類做生意人士。因為現金流，對經營一盤生意係好重要。

我建議你在投資前，先儲起一筆等同半年基本生活開支的應急錢。另外，也儲起一筆生意上的營運資金，以備不時之需。

以下我以「閒錢」的角度去幫你做配置。

你可以用你每月餘下的現金流，以「月供股票」模式，去為財富進行增值。

策略上，你可以投資「平穏增長股」和「潛力股」。你先用每月5成儲蓄做月供，其餘5成就儲起，用一邊月供一邊儲蓄的策略。

由於你係做生意，每月收入可能有波動。你可以用一整年架平均月入，去計算月供金額，咁就可以。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20623：

你好，龔成老師，呢排開始有留意你fb，亦好認同你對股票既睇法及教導，令我扚起心肝想重新重組過我既股票。

請教一下，請問應該持有還是止蝕。
005，3200股，53.45入
1711，20000股，1.5入
1716，6000股，7.6入
1810，1400股，30.95入
2328，8000股，6.39入
3309，2000股，13.98入
9988，100股，250.4入
感謝解答

龔成老師：

以質素來說，並不是差，但要改善。

匯豐（0005）你預只是收息，增長力不強，持有多少比例，要睇翻你自己的年齡與投資目標。

歐化（1711）質素一般般，有較大反彈宜減。

毛記葵涌（1716）質素一般般，有較大反彈宜減。

希瑪眼科（3309）過往一直貴，股價要大升不易，最好上翻D減持少少先。

至於另外幾隻股，都有質素，無問題。

你日後可以加入一些ETF，如盈富（2800），如果能承受風險，想有潛力就加恆生科指ETF（3067）。

------------------------------------------------

Q20624：

老師你好，本人36歲，月入3萬，早年替親人還債無咩錢儲到。係近年終於還清，慢慢儲番少少錢。現時手上現金只有10萬，股票5萬。扣除租金，家用每個月儲到約1萬5千。

0005 1手 （62買入）
01398 3手 （4.5買入）
03988 8手 （3 買入）

我唔係好有興趣投資，但真係擔心退休生活。想請老師比D建議我手上嘅錢同每月萬五蚊可以點儲點增值，唔該老師。

龔成老師：

現時的現金$10萬，你可以動用其中的$5萬，去投資，但不要一次過用，要分注慢慢用。

另外，你現時過份集中在銀行股，已出現了行業集中風險，最好等股價上翻D減持，部分轉其他。

你36歲，其實唔需要太保守。而你現時集中在收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以自行分注，或做月供股票，每月$10000。

你可以考慮盈富（2800）$4000。

另外再加2隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可供3067。$2000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

雖然你對理財興趣不大，但在長遠，會對你財富有巨大影響，因此，一定要學習當中知識。

------------------------------------------------

Q20625：

龔成老師請問現在適合樓換樓嗎？

詳情如下，本人29歲，現職護士，月入4萬2，長線有700股阿里巴巴（9988）228蚊，1500股長和（0001）55蚊，4000股置富（0778）7.45蚊，另有20萬蚊環球基金。

先生30歲，現職專業人士，月入5萬8，長線3000股長和（0001）50蚊，1000股長實（1113）43蚊，500股領展（0823）73蚊，另有40萬分別在美股及基金。

二人合資，先生單名於2017年買入天水圍嘉湖550呎單位，買入價485萬，現值約600萬，欠銀行約360萬，另mortgage link 戶口有50萬存款。

有計劃下年生小朋友，現在適合賣樓及套現部分資產用作購入1000萬以下，8成按揭的單位嗎？謝謝你

龔成老師：

如果換樓，一般都不用太分析樓市，反而分析自身的情況，是核心。

將現時物業賣出，能套現$240萬，連同股票、基金、現金，大約$350萬-$400萬。

首期方面無問題。

假設借$800萬按揭，30年，2%，月供約$3萬，你地都可以負擔的。

相信，你地都可以考慮$1000萬以下的物業，如果有實質需要，都可以進行換樓這動作。

------------------------------------------------

Q20626：

老師, 剛睇到你既文章話不要停留舒適圈, 有個唔係關係股票既問題都想請教下,

我而家做緊一份非常舒適既工差不多4年,人工不高得19K, 但勝在十分穩定, 基本福利齊全, 而且公司同自己屋企同區, 車錢時間都可以慳唔少, 但問題是人工既上升空間好有限, 去年什至因疫情要凍薪及無bonus無雙糧乜都無

而家有另一個option, 係朋友介紹一份corporate sales, 底薪比現職工作少幾千只有15-18K, AL18日變7日, 地點遠好多

另只有少量基本福利, 但公司氣氛好, 好願意教我呢D無經驗既新人, 收入方面計commision既話捱完頭一年之後上升幅度好大機會比現在高, 可以第2年開始也有20K以上,而且朋友都係入面做, 有信心是穩陣的公司

我而家好煩惱, 應不應該放棄而家穩定的現況去接觸未知又不穩的領域, 因為都想學習和見識更多, 還是應該再等一等, 發拙/等待第3可能性?

我背景係今年29歲, 無家庭經濟負擔, 但只有10萬剛投資在股票基金, 另有10萬現金, 剛開始月供$2K盈富3個月, 可能2年後會結婚需要現金支持 謝謝老師!

龔成老師：

你最重是從長遠的角度去想。

你要想想，5年後，10年後，留在現時公司怎樣？如果你跳出來又會怎樣？

你要問自己，長遠想自己變成點，想自己做甚麼？過怎樣的生活？

你現時29歲，有選擇權，到你過10年、20年，你再變的空間就會少，這刻要好好想清楚。

你有兩個選擇，第一，留在現時公司但要同時發展副業，不能永遠停在原地。

第二，跳出去。

有時跳出去，當訓未必最好，但有可能成為之後更好的踏腳石。

加油！

------------------------------------------------

Q20627：

老師 想問宜家個市要點樣部署？

科技股最近跌 係調整 定係熊？？ 我有9988 9618 1810係手 應該清倉先嗎？

另外大部分係月供緊收息股 66， 2800，388，823， 1299 ，我會繼續月供 不過會就住個市去改供款數目

仲有兩手2號仔 諗住收完末期息就賣哂佢
請問咁做岩嗎？

龔成老師：

第一，唔好因為股價下跌而影響配置。

第二，唔好太著重分析之後的股價走勢。

第三，你最重要持有優質企業，長線投資。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的，都是有質素的股票，基本上無乜野要改。除非你持有新經濟股的比例好多，就減少少。

你月供的，保持月供，金額都不用太大改變。

至於中電（0002）是收息股，如果這股在你組合收息類比例適合，其實不用改變。

------------------------------------------------

Q20628：

龔sir你好:我從你的著作中，拜讀到水桶投資法一說。坦白說，起初不甚了了。但就像一顆種子一樣，埋藏心中。沒想到真的有生根發芽的一日。

某一天，靈機一動，心領神會，領略到水桶投資的精髓所在。

我靠這個觀念，以$12.44的2013, 升至$18.12放出一半，用盈餘再買入700及9988, 建立一個組合，打算長期持有。

現在這個組合，不但優質，而且全部低位入貨，前景無限。原來這就是正確的投資方法，比頻繁炒出炒入的太多。

讀書真的是最好的投資。你不知道那年那日，對人生產生決定性的作用。

龔成老師：

對，我地從來不是炒賣，是一個配置，資金的運用，平衡，以及平貴的分析。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20629：

老師 我三十萬成本 輸淨50000
買什麼都輸 可否介紹一隻股票比我 我就黎跳樓
不過收息安全股

我要搏反黎 再輸我要死啦 老師 救一救我
而家啲錢入晒3311
點算

啲錢仲要係屋企人嫁
我真係冇晒辦法 所以先求你救救我
感激不盡 老師

龔成老師：

財不入急門，你「要搏反黎」的心態是錯的。

你集中一隻股是錯的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

中國建築國際（3311）由中國海外發展（0688）以介紹形式分拆上市，業務主要分為樓宇建築及土木工程。

佢參與所取得建築工程項目的日常管理及實施。一般透過競投過程取得項目工程。將部分建築工程外判予分包商，並於建築工程進行時負責客戶或他們的顧問、分包商及供應商之間的協調工作。

過往生意與盈利都穩定，但增長力就不強，現價合理，不過唔好對股價有太大期望。目標是收息。

建議你將部分賣出，轉其他。

最簡單是轉盈富（2800）、港鐵（0066），小注恆生科指ETF（3067）。你要睇長遠，唔好太在意短期賺蝕數。

------------------------------------------------

Q20630：

你好，老師，本人31歲，剛剛學習投資，過往無乜儲蓄，因為家庭負擔較重。現在情況較為理想，手上可動資金雖然不多，但仍想由月供股票開始學習投資增值財富。

每月想大約投資$1500-$2000，先集中一至兩隻潛力，第一隻比較平穏增長，屬意盈富（2800）、金沙（1928）或粵海（0270）

第2隻比較增長力強，屬意中生製藥（1177）或中海油（0883）。請問以上組合較適合嗎? 或者可有其他建議? 謝謝!

龔成老師：

第一隻，盈富（2800）。因為盈富這是一個「平衡組合的工具」，當中有52隻成份股，對股票組合有平衡作用。

盈富當然不是高增長的項目，但就能平穩增長。

第二隻，你可考慮中生（1177）或安碩恒生科技（3067），有長線投資價值。

3067這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20631：

Hello成哥，我啱啱開始睇你專頁，對月供股票好有興趣，想請教一下，如果我一個月可供5-7000，港交所係咪一個好選擇？

另外中國銀行會唔會都合適？
謝謝你

龔成老師：

港交所（0388）可以，我地進行月供，一定要選優質股，這股適合，因為原理就是長期儲貨。

不過，你最好建立一個平衡的組合，唔好只集中在一隻股。

中行（3988）是收息股，你預佢增長力不強，投資與否，就要睇翻你的投資目標。

如果不懂選股，最簡單是加入ETF，如盈富（2800）。

------------------------------------------------

Q20632：

龔sir, ,本人47歲, 單身, 月入90K, 每月可儲35K-40K, 有一自置物業 約10M,剩1.8M要供約55歲供完, 想供完後55歲考慮退休

1. 手上股票如下:

HSBC : 9000股, 平均買入48
1398: 400股, 平均買入4.855
2800: 9500股, 平均買入26.9
9988: 1000股, 平均買入248
0941: 10000股 , 買入55.6
1928: 1250 股, 平均買入38
0388: 1000 股, 平均買入497
1024: 100股, @116
0066:1000股, @28
2388: 1000股票@8.5

2.現金: 160萬

3.人民幣定期:40萬

4.基金產品:80萬(己停供, 但要待55歲才可取回)

5. 自願供款退休金扣稅計劃: 供5年,每年供約5萬,已供1年

6. 保險公司儲蓄產品: 供5年,已供4年, 每年6萬

以上安排理想嗎? 有什麼可善地方? 0941是否持太多, 或增持那一個比較好

本人希望退休時每月有2萬收入. 謝謝

龔成老師：

整個財富組合，基本上都平衡的，問題不大。

如果要優化，可以加強少少增長力。

你47歲，可以投資一些平穩增長類的項目。你可以加強翻這類（但就唔需要太進取）。

現時你已有物業，最好的方法是加強翻股票部分。現時股票，你持有較多銀行股，想信已經足夠，之後唔好再加太多。中移動（0941）亦較多。

原有股票，基本上都有質素的，可持有。只要往後可投資「平穩增長類股」，到你近退休時，可以慢慢轉為收息股。

現時的$160萬，可以動用$50萬-$80萬，投資平穩增長股類別。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20633：

Halo，龔sir
我大概有8萬現金

想係三年內有明顯增長
現時有小米600股，莎莎4000股，中海油2000股，剩餘既
我應該去月供盈富嗎？謝謝

龔成老師：

如果你想在3年內有明顯增長，例如1倍或更高的回報，你就要集中投資潛力股。不過，這同時會令你面對更高的風險，你自己衡量是否用這策略。

莎莎（0178）、中海油（0883）、盈富（2800）都只是平穩增長股，你如果想高增長，就宜轉其他，當然，風險會提高。

這幾隻都是有質素的，月供盈富都是正確的。問題是你要思考自己的投資策略，想穩中求勝，還是高增長，以這去進行配置。

至於小米（1810），潛力股，你可持有。

如果想投資潛力股，可考慮：舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q20634：

老師，岩岩睇左你其中三本著作，改變左我對投資嘅心態

而家我想開始投資，有諗住係主力美股
但有人話最近美股跌，唔應該入市

但我打算係每月分注咁入市，唔知有冇影響？

龔成老師：

第一，你要選優質股。

第二，唔好太著重中短期股價，最重要是睇翻企業價值。企業長遠的質素、平貴。

所以你要首先鎖定優質股，之後睇下現時平與貴，去衡量投資策略（而不是股價將會升跌）。如果現價唔平，投資就要小心控制注碼，或等下先。

如果不懂企業估值，就可以用月供或小注分注去慢慢收貨。

------------------------------------------------

Q20635：

你好龔Sir, 現時持有以下股票，請問是否繼續持有。

1928： 38.1 x 400
6060: 70.5 x 200
9618: 415 x 100

另外
9618咩價位合理可以入？

龔成老師：

持有，這些都是有質素的股票，唔好因為短期股價上落而影響左長期的策略。

金沙（1928）無問題。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

初步睇，企業有發展力的，不過風險同時存在，因此唔建議太大注投資，所以，唔好心急加注。

至於京東集團（9618）正面的。可持有，如果要加注，現價小小都得，未貴，或回翻1成更有投資值博率。

------------------------------------------------

Q20636：

如果現倉：
823:$59（2手）
1810:$28（4手）
1516:$27（1手）
1316:$13.76（1手）
1024:$385（1手）
9992:$91（2手）
1117: $2.95（1手）
1833: $134（1手）

以上有冇問題？可以守？價值面冇變？
謝謝
因大部分都洩緊
不用止洩吧？
有建議嗎？
700現價可入？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你現時的持股，都有質素的，根本無問題。

整體上，組合可以持有，部分股雖然你在貴的價位入，但這股有得守的。我完全見唔到這些股的基本面有變。

但你太過集中新經濟股及近期熱炒股，這是最大的風險，你應該建立更平衡的組合，例如加入盈富（2800）、港鐵（0066）等。

另外，你唔少股的買入都在貴，反映你投資時機不懂掌握，在較多好消息時（股價一定貴）追入。建議你日後多用分注或月供模式進行投資。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂至略貴，不過月供可以。或小小注。

------------------------------------------------

Q20637：

龔sir，想問下點睇1475 同3800 ？
1475 6.77 買入
3800 3.56買入
需止蝕嗎？

龔成老師：

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，你可守。這股可長線的。

保利協鑫能源（3800）有增長力，但業務不穩，質素中等。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果持貨較多，宜減。如不多就持有住先。

------------------------------------------------

Q20638：

龔Sir，我係最近先開始學玩股票，但人已中年（30），工作多年但月月清無乜積蓄，而家手上得幾萬蚊想發奮圖強，但睇你啲野真係學到好多，謝謝你

其實我係澳門人，我了解過澳門可以做月供的銀行不多，中國銀行已經係最多股票可供選擇的一間，但佢都係無3067，所以我揀左823，1810做月供，但耐何我收入不多又有個人固定支出

所以我每月只能用3-4千元做月供，因為另外仲想草資金留住散買其他股，我每月供款咁少其實會唔會無乜作為？我揀呢個月供組合可唔可以？我也有想過將823換做1177的，期待你的建議，thank you

龔成老師：

30歲仍是一個黃金時間，盡你能力儲蓄、投資、增加知識。要努力追翻。

小米（1810）、領展（0823）可月供的，你長期進行就得。而3067如果無得供，你可自己，久不久買入1、2手，都做到慢慢儲貨的效果。

中生（1177）是潛力股，如果你加入，會令你的組合好集中在潛力股。因此，暫時建議供領展，遲D先變。

------------------------------------------------

Q20639：

hi sir
點睇而家股市+樓市? Thanks!

龔成老師：

新經濟股略貴，但長遠仍正面，不過預期會好波動。華舊經濟股，則慢慢好轉，長期正面的。

至於香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

------------------------------------------------

Q20640：

龔sir 本人現有農夫山泉 $64入，思摩爾$86入 同京東集团$415入，全部蝕價中，三隻股是不是可繼續等待定換碼？請分析

龔成老師：

上述的3隻股，都有質素的，但之前貴，股價波動，就算最近跌左，股價仍略貴，要有心理準備仍波動。

這些股都可長線，都可以守，因為質素都不差，但股價上落大，唔建議持有太過多，如果你貨不多，可守住先，如果貨多，太集中在這3股，同時無現金，就建議減少少平衡翻個組合。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。