1990年12月10日 我媽在這裡生下我 雖然長子長孫的身分，在家族裡備受關注，也因此倍感壓力，但好險我還算個爭氣的兒子，謝謝媽媽，妳是我生命中最偉大的母親❤️ #新營 #張鳳池婦產科 #背起來考試會考

⠀⠀⠀⠀⠀⠀⠀⠀⠀ 普遍人對婦產科嘅反應都好兩極。 ⠀⠀⠀⠀⠀⠀⠀⠀⠀ 喜歡嘅同學會將人地個仔視如己出， 人地生仔佢感動； 不太喜歡嘅人望住個仔都無動於衷， 人地生仔佢大嗌「異型呀！」。 ⠀⠀⠀⠀⠀⠀⠀⠀⠀ 從一開始就睇 Dr Who 嘅人都知道，小弟唔係抗拒婦產科，但總係搵唔到人地成日講嘅個種感動。上一篇有讀者話我唔專重助產士，今次我就同大家分享一個群策群力嘅故事。（整乜好似榕樹頭講故咁樣...） ⠀⠀⠀⠀⠀⠀⠀⠀⠀ 唔記得係第幾次嘅當值，大熒幕上面寫左幾個孕婦嘅資料，全部產前檢查都正正常常，大家估計應該都幾輕鬆。 ⠀⠀⠀⠀⠀⠀⠀⠀⠀ 「產三拆床！」 ⠀⠀⠀⠀⠀⠀⠀⠀⠀ HCA 即刻行入三號產房幫準媽媽擺好「鋪士」，放好張床，預備生 B。因為成件事正正常常，我同助產士都用正常速度，正常地換衫。埋到位，大家都開始「手拉腳撐，痾呀！」。痾左幾下，一泡綠色嘅黏液係媽媽嘅陰道流出。 ⠀⠀⠀⠀⠀⠀⠀⠀⠀ 「Thick MSL！Call MO！Call paedi！」 ⠀⠀⠀⠀⠀⠀⠀⠀⠀ 個堆黏液其實就係羊水。叫得做「水」，大家都估到本應係咩款；叫得 Thick MSL，即係話佢又綠又濃，通常反映 BB 係宮內出現過問題，所以要即刻召黎產科同兒科嘅醫生。 ⠀⠀⠀⠀⠀⠀⠀⠀⠀ 皇后醫院設計時，得登將兒科產科放係隔離層，醫生們前後腳趕到，產室人數立即多左一倍，「手拉腳撐，下巴掂心口」嘅聲浪都高左一倍。 ⠀⠀⠀⠀⠀⠀⠀⠀⠀ 產科醫生黎到，望到母嬰都開始攰，情況不妙，當機立斷大嗌「攞Vacuum！」。一聲令下，產床四圍立即變陣：助產士由主角變助攻、產科醫生坐陣正中、姐姐立即推黎一部負責吸實 B 頭嘅「吸塵機」、兒科醫生戴好手套企係 BB 床隔離準備接力、其他姑娘開始寫紙做紀錄落柯打、爸爸繼續被嚇呆、我亦都成為一塊更貼牆啲牆紙。 ⠀⠀⠀⠀⠀⠀⠀⠀⠀ 醫生手起剪刀落，剪開媽咪會陰、幫 BB 上吸盤，產房最熟悉嘅聲音再次響起。唔同嘅係，今次大家唔再係迎新營嘅口號式尖叫，而係一句句由衷嘅鼓勵。「加油呀！留力等宮縮！一鼓作氣！」、「仲差啲咋！頭仔有檸檬咁大啦！」，BB 彷彿突然多左十幾個父母。 ⠀⠀⠀⠀⠀⠀⠀⠀⠀ 試多兩次，BB 都終於平靜地滑出陰道。平時，助產士會將剛出世仲喊緊嘅小朋友放上媽咪心口，比爸爸進行剪綵儀式剪臍帶；但係，今次 BB 一出世，助產士已經「搶」走 BB，直接將靜默嘅 BB 遞比兒科醫生。 ⠀⠀⠀⠀⠀⠀⠀⠀⠀ 胎兒係子宮入面未需要呼吸，一切氧氣養份都係來自臍帶；BB 一喊其實代表住佢氣道暢通、肺部循環系統亦係咁先會啟動。 ⠀⠀⠀⠀⠀⠀⠀⠀⠀ 「喊啦！小朋友，喊啦！」 ⠀⠀⠀⠀⠀⠀⠀⠀⠀ 兒科醫生一路檢查，助產士就係咁拍 BB 嘅腳板底，但佢依然都係一團佈滿黏液嘅灰色異形，大家亦都只有繼續咁拍... ⠀⠀⠀⠀⠀⠀⠀⠀⠀ 「嗚～嗚～哇～～～～！」 ⠀⠀⠀⠀⠀⠀⠀⠀⠀ 平時最擾人嘅喊聲而家為產房帶黎一陣歡呼。灰色異形慢慢出現血色，成為一個白裏透紅嘅小朋友。一班慈母般嘅助產士係旁邊面帶微笑咁輕輕拍手。爸爸亦都情不自禁錫左一啖佢筋疲力盡嘅老婆，呢位新任嘅媽媽。 ⠀⠀⠀⠀⠀⠀⠀⠀⠀ 同組同學：「咦！Dr Who 你喊呀？」 Dr Who：「邊有，沙入眼呀。」 同組同學：「產房邊有沙呀！」 ⠀⠀⠀⠀⠀⠀⠀⠀⠀ #永遠都記住每一個症都係一個人 #永遠唔會只係普普通通正正常常 #DrWhoHK

⠀⠀⠀⠀⠀⠀⠀⠀⠀ 係醫學院嘅尾聲，最常聽到嘅問題一定係「你有冇想入邊一個專科」。而好多人都會話，當你讀到個一科，你就會感覺到自己適唔適合。 ⠀⠀⠀⠀⠀⠀⠀⠀⠀ 讀到婦產科，小島學堂規定每一個學生都要去產房當幾次值，幫手接生，即係我地叫嘅「執仔」。試過自然分娩嘅女士都一定見過產房嘅戰況，而我都仲記得自己第一次當值... 一去到產房換衫，就見到助產士們圍左係護士站吹水，旁邊係一塊大過我屋企電視三倍嘅熒幕，上面寫哂產房而家有幾多個準媽媽係到等緊生仔、每一個人嘅基本病史、宮頸開左幾多度之類，有經驗嘅一望塊板就會知道大概仲要等幾耐。由於毫無起色，我都坐左係護士站發呆。 ⠀⠀⠀⠀⠀⠀⠀⠀⠀ 突然，電話響起。護士長聽完電話，企起身大嗌「對面推人入黎！SROM，fully，直入產六！」 (快譯通：穿左羊水、宮頸已經全開，由對面病房直送入六號產房），成班 HCA 同埋助產士就一齊彈起哂身衝去執嘢，係十秒內成個護士站無哂人，剩返我一個發白日夢發到流哂口水。 ⠀⠀⠀⠀⠀⠀⠀⠀⠀ 廿秒之後，電動門聲響起，緊隨嘅係慘叫中嘅準媽媽，同埋後面負責攞住所有嘢嘅老公。 ⠀⠀⠀⠀⠀⠀⠀⠀⠀ 「呀！！！！！！！好痛呀！！！！！！」 ⠀⠀⠀⠀⠀⠀⠀⠀⠀ 入到產房，HCA 已經較好床鋪好布，負責產六嘅助產士都已經著好哂全副武裝。媽媽一上到床，兩邊嘅護士已經捉住佢對大髀，兩腳一分，見到 BB 個頭頂已經到左門口。 ⠀⠀⠀⠀⠀⠀⠀⠀⠀ 有個剛剛入黎嘅助產士見到我就問：「點呀，攞左 consent 未呀？」 Dr Who：「點攞...?」 ⠀⠀⠀⠀⠀⠀⠀⠀⠀ 事關醫學生要觀察分娩就一定要先攞到老公老婆嘅許可，但老公而家換緊衫、老婆就嗌緊，旁邊圍住好多助產士... 故事去到呢到暫停一陣。每年去到八月呢個時候，各大學迎新營都會有活動，好多時候大家搭地鐵見到一大班著住同款 T-shirt 嘅學生跑黎跑去，就係參與緊其中。活動期間佢地好多「任務」，最常見嘅就係嗌口號，所以大家有時見到一班學生係天星碼頭咆哮、圍住金紫荊係到怒叫就係咁解。大家記住呢班熱血青年嘅情況，同樣嘅事，就係女皇醫院六號產房入面發生，只不過係熱血青年變左一大班女士。外星人黎觀察地球人一定覺得好神奇，點解會有一班人對住一個女士嘅陰部怒吼。 ⠀⠀⠀⠀⠀⠀⠀⠀⠀ 「手拉腳撐！下巴掂心口！拉呀！唔係推呀！」 「唔好嗌啦！忍住道氣呀！你下面都唔用力！」 「嗌無用架！痾啦！唔比抖呀！個仔都未抖！」 「痾長啲呀！嗌係唔會生到仔架！痾多下啦！」 「手拉呀！唔好扮矜持啦！有屎出都係要痾！」 「出黎見到頭仔啦！你咪放鬆！佢縮上去啦！」 ⠀⠀⠀⠀⠀⠀⠀⠀⠀ 呢幾句台詞，相信試過係本地自然分娩嘅媽媽都耳熟能詳。 ⠀⠀⠀⠀⠀⠀⠀⠀⠀ 婦產科係女士嘅天下，全個產房只有我同老公兩隻雄性生物。由於我地都係第一次見咁嘅情況，大家都係望住個 BB 頭頂發呆。呢個時候，助產士就咆哮。 ⠀⠀⠀⠀⠀⠀⠀⠀⠀ 「老公！唔好望啦，念力生唔到仔架啦！幫你老婆打下氣啦！」 「學生！幫手打氣啦！」 ⠀⠀⠀⠀⠀⠀⠀⠀⠀ 老公唔知做咩好，唯有幫老婆抹汗。 我都唔知做咩好，hang 左幾秒機之後只係講到一句：「呃...加油呀。」 ⠀⠀⠀⠀⠀⠀⠀⠀ 「___！算啦你都係。」 「手拉腳撐！下巴掂心口！痾！！！！！」 ⠀⠀⠀⠀⠀⠀⠀⠀⠀ 助產士係助產期間，全部都會成為維園阿伯，好熱血咁大叫。更神奇嘅係，呢個奇觀只要個仔一出世，就會忽然完結。助產士變返哂做淑女，講嘢好斯文，執完手尾嘅又會返哂去茶房食薯片，留下一地羊水、一隻新鮮嘅異形、一個攰到無力講嘢嘅媽媽、同埋一個瘋狂錫緊佢老婆嘅老公（同埋一個唔知行去邊嘅醫學生）。 ⠀⠀⠀⠀⠀⠀⠀⠀⠀ 「BB 出世時間，下晝兩點三十四分。」 ⠀⠀⠀⠀⠀⠀⠀⠀⠀ 原來媽媽被推入產房到小朋友出世，只係六分鐘。 ⠀⠀⠀⠀⠀⠀⠀⠀⠀ #DrWhoHK