【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20641-Q20660）

Q20641：

老師你好，你上堂教過除非係非常高估值或者公司質素有變，就要賣出。

但我想問下如果持有一隻股票發現佢公司發展已經開始見頂，或者佢股價已經釋放左公司既價值，係咪都可以將佢賣出?

我見你答幾時賣1211，你話將來普及後就可能會考慮賣出。

因為我留意緊海底撈呢間公司最近既年報，指出海外市場拓展有難度，國內競爭大而且已經唔會再大規模開店。佢股價亦都反映得差不多，咁係咪可以沽售?

龔成老師：

要睇你的投資方向，首先，我地投資一定是買入優質股，這點不變的，而公司發展時，一定會有速度上的改變，但我地都要睇翻佢的優質度有無改變。

我假設比亞迪（1211）往後一定高速發展電動車，然後到10年後市場成熟，佢增長力有限，如果到時佢已經有一定的市佔率，有好強的客戶群，但增長就弱左，在企業質素來講，其實仍是有的。

但佢就由水桶1類，變成了水桶2，所以就要睇你的投資方向，如果你想集中水桶1，就有可能賣出，因為佢已經完成了「水桶1的使命」。

但如果你到時想投資平穩增長類股，其實佢是適合的。

因此，增長力只考慮優質度的其中一個指標不是唯一的指標，正如無增長力的港燈（2638）都是優質股。

------------------------------------------------

Q20642：

龔成老師，想問問有關丈夫與我的投資及退休方案。

本人是一位鋼琴老師，39歲，希望以月供股票的形式，預備大約14年後的退休生活（ 14年後是女兒18歲，之後有機會去外國讀書）。

本人有醫療保險，一份投資相連的保險（ 現在大概十萬元現金價值），以及一份月供基金（今年是第13年，需要供20年 ，每月$1600，現在現金價值大概$33萬 )。

囡囡有一份教育基金（需要付10年保費 ，年供2萬元，今年供第三年）。

股票有2手盈富基金，21手中國銀行，流動現金13萬元。

丈夫今年48歲，也有幾份儲蓄保險，以及醫療保險。 其中一份儲蓄保險，兩年後可以選擇吾供， 去到53歲 ，可以攞返大約50萬。

另外， 有一份投資相連保險， 現在現金價值大約15萬（ 每個月供$1000，要供多11年）。 現有流動現金70萬，定期儲蓄20萬（2-3厘利息）。

55歲會有一筆250萬的退休金，而每月會有大概$15000的長俸。我丈夫會延長退休年齡至60歲，故此，在55歲直至60歲，除了每月長俸外，也會有每月大約$46000月薪，以及當60歲時，有一筆90萬的約滿酬金。

如果我們兩夫妻，每月準備用一萬元作月供基金，請問有什麼建議？

另外， 丈夫及我現有的流動現金，可以怎樣運用在股票市場裏，長期持有？

另外，現住在公務員宿舍，直至退休，所以住屋方面沒有問題。但其實希望在退休時，能夠有一個真正的安樂窩屬於自己，所以想請教老師有什麼建議？

是否選擇丈夫60歲退休後買樓，就很難達成財務自由？謝謝！


龔成老師︰

你現時投資，都好集中係一些儲蓄保險、定期、投資相連保險這些產品身上。

其實保險主要作用，就係幫你做好防守部份，只要買足夠保障就可以。至於增值，我地應該集中係優質資產類別，好以優質股、物樓等。

因為長線計，優質資產的升值能力，一定比這些產品好。

所以，我建議你先審視翻現有投資產品。如果增長力唔係好高，你可以考慮調整一下保險/基金的供款，令你能夠有更多現金流，來買入優質資產。

你和你先生，距離退休尚有一段時間。可以用一些有增長力的股票，好似「平穏增長股」 + 「潛力股」去增值。

現有持股都可以，但我地創造一個理財組合，除左要適合你年紀和目標外，都講求平衡性。唔可以太偏重個別行業或企業，相同行業不可佔組合多於3成，而單一企業不要高過15%。

你現時持股太偏重係中行(3988)，而一刻你唔需要沽出，可以用未來新資金，去慢慢拉平衡翻個組合。

現在你每月5成儲蓄，即是用$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，我唔建議你佔太多，大約3成左右好了。

現時大市只是合理區，你現有100萬資金(你自已13萬+你先生70萬現和20萬定期)可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$10000 + 100萬本金，14年後大約會增值至700萬。

到你們退休時，將增值型股票，慢慢換成收息資產，去創造穏定現金流，去支援退休生活就可以。以股息率6%計，這700萬可為你們每月創造$3.5萬的現金流。

至於房屋，由於你現時資金唔算多，而且都有公務員宿舍。你可以考慮住至退休。到獲得2筆可觀的退休金時，才購入自住物業。以便在退休前這段時間，騰出更多資金，用作增值之用。

------------------------------------------------

Q20643：

老師，今年都有幾隻大股上市，如bilibili, 百度等等，其實港交所往後係咪都係升勢，長遠來講都係值得買入?

佢之前由400急升到500幾的時候，價格係唔合理?

龔成老師：

港交所（0388）一定有優質的。

而我地分析時，會著重企業的長遠價值，唔好只睇一年的業務情況。這股有獨特性，長遠股市發展仍正面，所以一定有長線價值，只是平與貴的問題。

這股去到$500已是貴的水平，當佢由$400升上$500時，就是由合理去到貴的情況。當然，企業價值慢慢會變的，但要以長遠角度去分析。

這股由於經常都唔平，如投資，利用月供較好。

------------------------------------------------

Q20644：

你好，我持有1833、2359、2269。
股價跌左，點算？

龔成老師

其實你持有的股票，不是無質素。

但你出現了集中風險情況，如果你組合全部都是醫藥相關股，當行業或大環境出現了一些不利變化，會對你整個組合產生不利影響。

加上醫藥類本身的風險比其他行業較高，如果你太過集中，風險較大。

這幾隻股都有質素，建議你股價上翻D，要開始調整翻。建立一個更平衡的組合。

------------------------------------------------

Q20645：

呀sir 我現家持有以下股票

9988，2手@242
285，2手@54
6060，7手@69.5
1858，3手@21.7

因為我入場先半年多D，呢排個市愈跌愈勁搞到我好擔心，因為我有一半資金都係入面，請問呀sir你點睇上面4隻股，我希望等佢地回升先走，唔想止蝕離場

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

阿里（9988）有質素，無問題。
比亞迪電子（0285）有潛力，無問題，只是之前貴，現價都貴。

眾安（6060）本質不差，但不建議持有太多。
春立醫療（1858）唔建議持有太多。

------------------------------------------------

Q20646：

Hi 龔成老師! 我睇左好多本你既書 再睇埋巴菲特既書 終於由一個完全唔識買股票 唔識點樣入手嘅人變到開始識買少少股票 仲要係賺緊 真係好多謝你，有你介紹既股 我通常都會好放心甘買

另外想問吓你我而家呢個投資組合有冇問題
我月入22.5 k ,28歲

盈富 月供 4000
上個月開始:
小米 月供 2000
美團 月供 2000

我想問下應唔應該停左月供美團呢？
多謝你甘多個人既問題都答哂

龔成老師：

上述的股票，都是有質素的，可以長期進行。無問題。

以你的年齡，財富有增長力，投資上述股票，可以，比例都適合。

美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值。你以長期月供的模式進行，可以。你預佢股價上落大，唔好因為股價上落而以為佢質素有變，分析企業質素是最舌要的。

------------------------------------------------

Q20647：

老師請問（1088）中國神華現價是否合理？這股高息，所以想長遠持有

龔成老師：

中國神華（1088）質素中等，過往較有質素，近年有減弱情況。

佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。如果是收息的，都可以，但就唔建議太大注。

------------------------------------------------

Q20648：

成哥，我希望進修完後有機會上你嘅班學野。我現時31歲。股票投資左大約7年。當中有賺有蝕，總體係賺錢，都係短炒為主。

直到近年自留意到你，見到你好多分析同資料都好實用，明白到咩叫長線投資有潛力股票，唔好只以短炒賺錢！有以下問題想請教你：

我有一層現樓，新界屯門區，2016年當時買入價270萬，實用四百幾尺，樓齡32年，未大維修。因樓已升值覺得無咩升值潛力/樽頸位，而家想換樓，因只有單人入息，按壓力測

現考慮應該用現樓價格換相約價格嘅唔近市中心嘅新樓博升值潛力或價錢相約嘅二手藍籌3x年舊樓承轉力較高。兩者都3百頭尺比現時小約一百尺。仍徘徊係新樓與舊樓之間。你會有咩意見？

另外手上持有多隻股票，總值約50萬，其中有阿里巴巴 、中國銀行、眾安在線、中國中車、匯豐銀行、盈富基金、京東健康、騰訊。係咪會投資得太多股票類別？ 是否應該簡化？

基金方面買了貝萊德世界科技同摩根中國基金（美元），你點睇呢2隻基金？ 短炒定長線會較適合？
謝謝指教！

龔成老師：

我地分析時，最重要睇翻長遠的價值，現時你的物業，如果質素較差，都可考慮轉，但如果質素並非太差而你又轉類似的物業，其實會用了一定的交易成本。

所以，如果你打算轉，其實最好有明顯的改善才進行這動作。

例如買樓價再大D，同時質素較好的物業（即是有明顯改變）。

如果這刻資金不算多，換樓後未有明顯改變，不如儲多少少資金，等過2、3年一次過轉好D，會較好。

如果上述兩個要2選1，二手藍籌樓比新樓好，但你都可以選一些約10年樓齡的。

至於現時的股票，基本上都是有質素的，問題不大，不算散。另外，銀行股不是過度集中。

至於基金，無研究該基金。而基金一般都不宜短炒的。

------------------------------------------------

Q20649：

龔sir,我嚟你依度面壁下。
我係基層家庭，依家讀緊yr1。

機緣巧合咁知道有你依個人。亦都受你啟發，好努力去生活，讀書，同埋去學財務知識。但因為疫情儲唔到幾多錢。成個人就好似好心急咁。好傻咁被依句“根本沒錢的人，必須要投機”刺激。

連自己set俾自己唔好短炒嘅原則都冇埋。

依家交完學費，自己都笑咗自己，輸左唔少。

哈哈 之後儲錢再上你嘅堂。

龔成老師：

每個投資者都會經歷這些，這是學習的一部分，我1999年開始買股票，頭幾年都是短炒，輸得多，先知自己行錯左，之後先用長線投資，就開始賺錢。

有D人會醒，有D人唔會醒。

你只要盡早明白就得，保持正確知識增長。

------------------------------------------------

Q20650：

龔sir你好

本人現持有
1211 500股 買入價$251.8
2845 500股 買入價$151.5
3067 3000股 買入價$21.16
1177 3000股 買入價$8.29

以上資金可以未來1至2年都唔需要動用
應該減持止蝕，還是可以等佢價位上番去?

謝謝老師指教

龔成老師：

可以持有，無問題，唔好因為股價上落而影響投資策略，你最重要睇企業業務。

不過，你買入價都貴，你應該慢慢分注買入，元應該集中在貴的時候買。

另外，有兩隻都是電動車類，你要注意集中風險。

你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q20651：

老師你好，我係澳門人，有買你書「財務自由行」來看，易明以及了解自己應該點樣去努力，十分謝謝你。不過在於普通人來講唔知點樣可以將被動收入增加，因為平時返工照顧家庭已經非常繁忙。

我的目的是希望40歲可以買到一個有電梯的樓宇，剛剛學習炒股票現在資產分配如下：

股票120,000，手持6185及241。

和家人有物業，兩個已經有一定年期的老唐樓。自住不用供款

還有一個與親人合買的蚊型新唐樓，現在收租金維持到供款的一半，另每月供款幾千。希望幾年之後賣出，
現在儲蓄中每月存款大約$8000。

我想請問我如何可以在五年之後可以有一個比較好的物業。具體就是有電梯和樓齡比較年青可能目標在600萬左右。十分謝謝你的意見

我是澳門居住的，很想過來上堂，希望疫情之後有機會報名。老師會考慮有網課版本嗎。謝謝你

龔成老師：

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。

至於阿里健康（0241）同樣是有潛力，不過，風險同時存在，所以，唔建議太大注。

這兩股你都可以持有，但如果持貨較多，建議部分轉其他股。

至於物業，你現時的物業情況，不用改變，但就要利用其他方法去進行增值，例如股票。這幾年要努力儲錢及投資，以平穩增長股+潛力股去作投資組合，令財富增。等你有足夠的資金。

每月$8000，可利用月供或自行分注，投資平穩增長股+潛力股，最簡單是投資盈富（2800）+恆生科指ETF（3067），同時，要留有一些現金等投資機會。

過幾年後，就賣出部分股票，加上賣出部分物業（要到時再睇情況決定），然後將資金買入$600萬物業。在長遠來說，宜將資金投資一些質素較好的物業。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20652：

老師，想你幫助一下。

我們38歲，已有一物業租比人，cover到供樓，而剛剛又安排到政府宿舍，所以我想將原本租樓用既10000元做月供股票，作長線投資。

你建議10000元選多少隻股票？
2800，1177，1211，1810，700都係心目想選的，這些合適嗎？比例又應該點分配？或者有無合適的推介？

另外都有見你推介3067及1833但銀行無哩兩隻做月供計劃，所以想等佢合埋再以現金入貨。

先感謝你的幫忙！

龔成老師：

可以，你可以每將原本租樓用既10000元做月供股票，作長線投資。

如果你現時現金不多，都要同時留現金，月供股票每月用$7000。如果你現時已有一定現金，就可以月供$10000。

盈富（2800）$6000，餘下4隻，各$1000。長期進行。上述都是有質素，可長期月供的股票。不過比亞迪（1211）略貴，你自行決定是否供，或等回少少先供，這刻月供不是不可，但注碼不能太多。

至於3067，你可以每2個月入1、2手，同樣有儲貨的效果。

------------------------------------------------

Q20653：

你好，我係一個對股票零知識的媽媽
我月入二萬幾，扣除家庭日常開支我諗餘下8千
我想拎3千出黎做月供

我睇左你fb好耐，初步想開始月供股票
2800盈富$2000
3067 恆生$1000

請問這個選擇適合我嗎
萬分感謝

龔成老師：

如果你每月餘下$8000，用當中的$3000去做月供，可以的。只要保持長期進行就得。

不過，3067可能無得月供，你或者自行，每隔2、3個月買入一手就得。

組合都適合的，如果你本身較保守，就減慢買入3067的速度。

------------------------------------------------

Q20654：

老師您好!請問如果700未有貨，甚麼價錢為合理價值?另外想問現在新經濟，saas等類大幅回調，長遠計這類股會否被睇低而一沉不起?700仍可當作一隻長期持有的股票嗎？

另外亦想問最近很多人（包括股評人）都睇好9618，請問京東是否比阿里好？如果都是以中長期持有，您會選擇阿里還是京東？謝謝！

龔成老師：

騰訊（0700）現價略貴，不過月供無問題。或回10%開始分注投資。

至於新經濟，長遠有價值的，只是之前貴，現價都略貴，所以你預佢會好波動。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，算是合理區中上部至頂，如果買，都可以，但要控制注碼。這股可以長線投資的。

佢同騰訊、阿里（9988）都有長線投資價值，而佢這刻相對投資值博率會高少少（其實都接近）。

------------------------------------------------

Q20655：

龔Sir, 想問下1800 可長線嗎？我想下個月開始每個月用$3000幫小朋友供股儲錢，係集中供一隻定要分2-3隻供？有建議嗎？

龔成老師：

中國交通建設（1800）本身不是無質素，但又未去到好好，算是中等類別，但增長力不強。

負債高是扣分的地方，因此估值不會高，股價都反映了相關風險，現價算是合理。分注投資都可，但就未必適合太大注。

如果你幫小朋友供股儲錢，建議你投資ETF，這會更加適合。例如盈富（2800）、恆生科指ETF（3067）。

最簡單就是月供$3000盈富，相信最適合你的。

------------------------------------------------

Q20656：

您好, 龔Sir, 之前大市調整, 波幅都好大, 雖說要明白這是正常調整, 但心情仍很不安, 想向您求些定心丸. 請您幫忙分析一下我現有時倉, 是否健康.

1337 18/1 $2.55 10000股
1516 27/1 $21.5 2000股
1810 3/2 $28.7 3000股

1337 曾升穿3.3 但我無沽到, 我知道佢發盈喜, 請問仍有長期時有的價值嗎?

1516 曾升穿28 但我無沽到, 我知道佢既物管比係3.0比碧桂園更高, 即代表將來有更多發展空間, 有更多收益, 我咁樣理解正確嗎?

1810 曾升穿32 但我無沽到, 有點後悔買入量太多, 應分注, 我知道小米有質素, 佢既軟件方面做得很好, 市場佔有率亦高, 佢亦會發展更多家居智能產品, 對用家有黏貼性, 可長期時有, 無奈我持有價位有些高, 應否等佢回升少許時沽出, 再等低位入返呢?

請您可否分析一下175, 1475, 2812

請問以上股的合理區是多少錢?

另外, 我上月買到您本百萬富翁, 3日左右睇晒了, 好滿足, 感覺你好偉大, 無私分享您用時間金錢累積的經驗, 我會再翻睇的, 而且會介紹俾有需要的人.

我亦好奇您時有哪些股票, 通常會持有多久? 想作參考.

非常感謝您! 祝安康!

龔成老師：

我地最重要是睇企業長期的發展，並不是睇短期股價，而你講「曾升穿XX但我無沽到」，這是無意思的，因為我地根本就唔需要太著重短期股價，同時無人能捉到最高位。

我地只要睇翻企業的質素，以及在我地組合所佔比例是否適合，就可以。

雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

融創服務（1516）有質素的。

佢由融創中國（1918）分拆上市，主要在中國提供物業管理服務及增值服務。而融創中國本身係中國好有規模的地產發展商，有這個背景優勢，佢長遠發展唔差。

睇翻佢資料，佢客戶主要包括融創中國及其合營企業與聯營公司，以及其他房地產開發商、業主、住戶及其他客戶（如社區增值服務相關的廣告公司）。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

小米（1810）有質素，長線就得。

至於吉利（0175）現價約在合理區頂。日清食品（1475）合理區中上部。三星中國龍網（2812）略貴。

至於我持股，講幾隻啦，比亞迪（1211）、金沙（1928）、小米（1810）、中生（1177）。

------------------------------------------------

Q20657：

老師，如果我月供組合係 2269，669，3690，每月各1000，可以嗎?

龔成老師：

可以，這些都是有質素的股票，你可以進行。

藥明生物（2269）、美團（3690）都是潛力度好高的股票，不過現價都略貴，你以月供模式，慢慢收貨，是適合的投資策略。

最緊要是「長期進行」。

另外，最好每個月仍有少少現金剩，等出現大跌市時可以把握到機會。

------------------------------------------------

Q20658：

我的投資目標是要長期財富。我已50歲，我想

a. 潛力新經濟股的比例只想5% （例：比亞迪(1211)、小米（1810）、必瘦站 （1830））

b. 平穩舊經濟股的比例只想15%（例：盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、希慎（0014））

c. 收息舊經濟股的比例只想15% (例：領展（0823）、置富（0778）、陽光（0435）、港燈（2638）、中電（0002）、深高速（0548）

d. 優質平穩新經濟股的比例只想15%（例：3067）

e. 現金的比例只想50%

請問我的組合的風險如何？
平衡配置如何？

龔成老師：

上述的分配，方向是可以的，但潛力股+潛力基金3067已去到20%，單以股票組合內部計已去到40%，其實有點多，以你的年齡，可以調整翻少少。

同時，隨著你年齡慢慢增加，宜增加翻收息股的比例。

至於上述選股，無問題，都是有質素的，不過隻數有少少多，除非你財富組合金額數目好大，否則，可以減少少隻數。

基本上，上述組合風險平衡，配置無大問題，只是一些小調整。

------------------------------------------------

Q20659：

有好多60幾歲嘅人同我講，佢話佢玩咗股票咁多年，都係打平手，甚至係蝕D

我對股市股票基金呢啲東西沒有太大的概念，我一心想搵錢，所以我希望有一個正向同埋正確嘅價值觀對待呢樣嘢，謝謝你指教

龔成老師：

我過往做銀行、證券行做了多年，見到唔少客都是輸錢的，因為佢地不斷買買賣賣，而有小部分人賺錢的，佢地的方法好簡單，買入優質股長線投資。

你試想想，港交所（0388）、騰訊（0700）、比亞迪（1211），如果以升少少賣出等跌的心態，就無法賺到10倍、100倍的回報，你只要買入後唔理佢，就能有高回報！

------------------------------------------------

Q20660：

龔老師：請問現有20萬現金流應如何投資，因現在有質數的都好貴，請問有沒有一些有質數而現在入貨都可以考慮的。請指點。謝謝賜教！

龔成老師：

你可以考慮舊經濟股類，這類股現價仍在合理區。

例如港鐵銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果有增長力，而勉強未算貴的，其實阿里（9988）、吉利（0175）都算，不過暫時不是大注時期。

大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

https://www.mpfinance.com/fin/columnist2.php?col=1463481132098&node=1612465230753&issue=20210205

譚新強：BNO移居英國人士 應以Uncle Roger為榜樣 不是Uncle Tom

最近英國放寬了BNO護照的居英權，並設下了「5+1」的入籍路線圖。此舉遭到中國強烈反對，馬上宣布不再承認BNO護照作為旅行證件和身分證明的有效性。

不少人當然認為英國不懷好意，故意干預中國內政，再次挑撥離間，煽動香港人反對中央的情緒。再者Brexit（脫歐）後的英國前路渺茫，如能吸引到大量富有香港人到英國消費和投資，也有着數。當然大部分英國人是反對的，Brexit的最主要原因就是抗拒移民。說到底，英國是一個階級觀念極重，充滿種族歧視的國家。不管如何，這仍勉強可算是遲來的春天。英國背棄香港人30多年，早在1980年代中英談判時，就有道德責任賦予所有香港人居英權（實應直接英國國籍）。最初時曾發出約370萬本BNO護照，但沒有居英權的BNO形同廢紙，所以回歸後逐漸變得凋零。但隨着近兩年的香港動亂，申請人數再度上升，去年翻倍多達30多萬。現在終於有機會得到居英權，估計將有更多人申請，有資格的人數約300萬，加上他們的家人，總數或超過500萬，即約香港人口七成。如真的那麼多人離開香港，短期內確有挖空香港人才和財富的風險，這亦是中國反對的原因之一。

但整體來說，我認為今次BNO風波是一件好事。從2019年開始，我已多次指出《基本法》的多個嚴重錯誤和漏洞，尤其仍充滿鴉片戰爭可恥痕迹，世上罕有的畸形荒謬國籍與居留權混淆問題。西方外籍人士（expats），仍如十九世紀鴉片販一樣享有特權，只需住滿7年，即享有永久居留權和所有社會福利，甚至擁有投票權，區議會和立法會功能組別參選權。在美國，綠卡持有者絕不能投票，歐洲、澳洲等地都一樣。即使英國，現在給予BNO居留權，相信也必須6年以上入籍後，才有投票權。但不公平地，我認為對香港貢獻更大、主要來自菲律賓和印尼等亞洲國家的外傭，無論在港服務多少年，又永遠得不到永久居留權，遑論投票和參選權。

此外，大量香港人擁有雙重甚至三四重國籍，美、加、澳、紐等，已超過100萬，如包括現有和曾經擁有（護照過期不等於放棄國籍）BNO人士，遠超過香港一半人口！當然還有超過200萬的居港內地同胞，奇怪地和侮辱地，連他們也需要同樣住滿7年才可獲得永久居留權。在美國，從加州搬到紐約州，只需一個月就可登記做選民。所以過去兩年，每當我看到反對政府人士和偏頗新聞報道，經常以香港人民意支持作為各種傷害香港和國家的暴行為最重要藉口，甚至包括殺人放火等喪盡天良罪行，我就愈覺得有弄清楚香港人定義的重要性和迫切性！

其實現今中國以民為本，外交政策和平，40年沒有戰爭，內地發展成績斐然、近年政策更不再單以經濟急速發展為目標，亦非常關注脫貧、貧富懸殊、社會公平公義和環保問題。政經制度的效率和合理性，已逐漸超越西方。中國社會當然仍有很多問題，但對比美國，毫無疑問，相對少罪惡和暴力，社會較充滿正能量，較少怨氣和仇恨，所以根據哈佛中國長期民調研究，中國中央政府得到90%以上人民支持，其實也不意外。只希望以邪教式、歇斯底里式、自卑兼自大式憎恨中國的人，包括部分香港人和西方人，願意張開眼睛，看清楚中國以大多數人利益為依歸的成功和合理政策，不可只看某些不知真假的打壓個人自由個案，以此為延續錯誤偏見和歧視的藉口。

以為4年投一次票就是民主已過時

現代人亦應放棄過時思想，以為4年投一次票就是民主，就是天堂。美國的選舉制度固然充滿不公，甚至反民主，即使英國和歐洲政治制度亦大致上停留在200年前，甚至中世紀階段，完全跟現代社會和科技脫節，更未必適合人類共同面對大流行和氣候變化的長期挑戰。適當的科技運用，可讓政府更實時關注人民和地球的需要，以此制訂更有效的公共健康、交通和經濟政策等。譬如發現新疫症出現，政府就應馬上採取隔離、大規模測試和緊急醫療措施，一切按照科學，跟傳統所謂左右派政經理念一點關係都沒有。這就是中國的做法，美國反而一切以政治掛帥，連口罩都成為政治圖騰，結果一場COVID疫情，至今已近50萬人死亡，比二戰還要多！

從1840年第一次鴉片戰爭至今已181年，香港回歸中國亦已超過23年。《基本法》並非上帝頒下，刻在石上，永不可改動的《十誡》，它只是一個寫得非常差，充滿錯漏和殖民地時代色彩的過時小憲法。修正及改良《基本法》並非甚麼大事情，現在已到了固本清源，撥亂反正的時間。中央絕不應亦絕不能拘泥於一些十九世紀遺留下來的束縛，而讓香港情况繼續轉壞，成為西方意圖阻礙中國發展的棋子。

近兩年前我最初提出香港國籍法不合理時，很少人關注此問題，喜見現在已成為一個非常熱門的討論議題。我的建議非常簡單，符合人情和法理，主要只有兩點：

（1）取消所有單一外國國籍人士的投票和參選權。住滿7年者，仍可保留永久居留權；（2）應寬待多重國籍人士，包括BNO。雖然中國是不容許雙重國籍的，但基於香港特殊歷史，所以有點寬鬆彈性處理，也屬合理。有傳聞中國或將取消利用BNO「5+1」計劃移居英國人士的永久居留權和投票權（在入真正英籍之後或之前都有可能），甚至有人建議所有雙重國籍人士的永久居留權都應被取消。

我明白中國對英國假慈悲，臨時給予BNO居留權的憤怒，除嚴重干預內政外，亦有點擔心如人數太多，不止出現走資情况，亦可能出現這批「英國人」遲些回流香港，不公平地繼續享受香港各種社會福利。我認為中國可以大方一點，繼續讓雙重國籍人士享有永久居港權，最重要是先搞清楚誰應享有投票和參選權。以我了解，現在申請特區護照時，表上已說明如成功，申請者將成為中國公民，如持有其他護照，將只被當作旅遊證件，而非國籍證明。

不過，我認為此做法仍不夠清晰，明顯不少擁有中國香港特區護照人士不承認自己是中國人，仍自居為英國、美國人或其他國籍，但又偏偏經常上街示威或暴動，亦積極參與投票或參選等政治活動。如此荒謬、如此如意算盤的事情，即使西方國家如美國和英國，都是絕不會容許和容忍外國人在當地搞暴亂、搞革命的！在美國，間諜搞顛覆政府的最高刑罰是死刑。

我建議最簡單的做法是給予這些雙重國籍人士一個最後機會，在投票和參選前，必須作出一個選擇，是否願意宣誓成為中國公民。宣誓後，就仍可享有投票和參選權，當然其他護照就真的只算是旅遊證件。即是如犯了法被拘留，發出其他護照的國家使節，亦無權提供協助。

如不願意宣誓，就當然不應享有投票和參選權，我建議應取消特區護照，但仍可保留永久居港權。此做法可解決雙重國籍問題，亦等如開拓出一種香港綠卡制度。在美國也有一些綠卡人士，永不入美籍，但就仍保留居留權。

英脫歐後匯率樓價大跌

我明白即使我說到口乾，仍有部分人士繼續對政府不滿，真的會選擇移民英國。這亦非壞事，有如一段已沒有愛情的婚姻，離婚可能是最好的決定，勉強是沒有幸福的。看到估計將移民英國的人數約十多萬，不少但也不算多，對香港的影響也不會太大。

移民當然不是一個容易的決定，尤其英國。倫敦位處北緯51.5度，比多倫多，甚至魁北克市還要北，如非受惠墨西哥灣暖流（Gulf Stream）帶來較溫暖水流和氣候，實應比加拿大更冷。但冬天仍當然極早天黑，擔保下午4點不到黑齊（蘇格蘭不到3點半）！這種天氣非常容易令人抑鬱，要比較小心。加上英國疫情嚴重，每100萬人的感染率是香港的40倍，單是英國的死亡率已經高於香港的感染率！

英國公投決定Brexit後，經濟已轉差，匯率樓價都大跌，可能是抄底機會，但未來英國發展方向，仍然一籌莫展。政治上仍非常分歧，蘇格蘭和北愛爾蘭都很可能在未來10年脫離英國獨立。Brexit前，英國人可在歐盟任何國家居住和工作，現在當然喪失這些機會了。

英國除了天氣冷，人情更冷，不要忘記階級觀念是他們發明出來的。整天滿口民主自由，但王室、貴族、封爵等封建制度就通通保留着，男士見到英女王仍需鞠躬，女士更要行屈膝禮（curtsy），自由平等？算了吧！

倫敦雖然真是個多種族城市，街上接觸到的大多數人來自東歐、南亞、中東和非洲，來自中國和東南亞也不少。但這不等如各種族就很和諧。除操着貴族口音的英格蘭人會歧視他們，認為是低階級的人外（包括操cockney和其他低級口音人士），即使其他種族人士亦會互相歧視。尤其在過去一年COVID疫情中，不少亞裔人士，不管來自日本或泰國等，只因外貌像中國人，就曾在街上被襲擊。

網紅Uncle Roger常誇中國文化易惹仇恨

Uncle Roger就是其中一個例子。Uncle Roger是29歲，年輕英俊的新進網路笑匠紅人Nigel Ng（黃瑾瑜）的化名角色，扮作一個操誇張廣東口音，對任何事，特別中國菜非常挑剔的中年漢。數月前，Uncle Roger以一段非常搞笑，批評BBC烹飪節目的Egg Fried Rice視頻，在YouTube上走紅，至今點擊人次已超過1.5億，subscriber亦超過300萬。黃瑾瑜來自馬來西亞吉隆坡，明顯接受良好西方教育，英文完全沒有口音，中學後去了美國Northwestern大學念工程。畢業後去了英國做data scientist，但他醉心演藝界，所以毅然成為了全職棟篤笑藝人。闖了數年，終於在網絡世界打出了名堂，在西方已頗出名，在馬來西亞老家更是個紅人。

約兩個月前，當Nigel走路回家時，不幸遇到一個人，突然無故向他襲擊，揮拳打他的臉，幸好傷勢不重，嘴唇流血和面上瘀黑。Nigel認為襲擊者不知道他是誰，打他的原因可能亦是COVID 導致的種族歧視。我不知道襲擊者是否認識Uncle Roger，如認識可能更憎恨他，因為Uncle Roger此角色雖有點自嘲成分，所有情節都只為搞笑，但主調就是他對亞洲尤其中國文化非常驕傲，不停誇獎中國人注重教育和家教，反過來不停取笑西方人不懂飲食，甚至笑謔批評他們的各種生活習慣和文化。

數周前又發生了一次網上的不愉快事件。Nigel與另一美國飲食KOL Mike Chen聯手做了一個節目，後來發現Mike Chen原來是個法輪功邪教徒，就馬上把視頻下架，並在微博上向中國人道歉。此舉完全合理，但當然被一些人在網上攻擊，被誣告為五斗米而向中國折腰。Nigel澄清絕無此事，他暫無任何來自中國的收入，而他只想為觀眾帶來歡樂，無意加入任何政治元素。我亦替他非常不值，早前他表示因襲擊事件陰影而有意搬家，近日他更回了馬來西亞探親過年。即使他選擇留在亞洲發展，我也不會感覺意外，前途可能更好。

移民縱賣樓 最好留點騰訊傍身

近日看到一篇移民倫敦指南，教人如何在那邊成為一個稱職的送外賣人員，看完有點心酸。文章非常詳細，逐步教人到埗後如何以BNO身分拿合法工作證明，然後開銀行戶口，如何加入Deliveroo等外賣Apps。連在哪裏買單車，哪條路線較賺錢和安全，都詳盡介紹。他說每月收入，折合約13,500港元，我真不知在倫敦如何能夠生活！所以我之前已提醒過考慮移民的朋友，必須有傍身之技，從前很多人學斬叉燒，現代人最好學點投資。我勸喻移民英國的人，即使賣掉香港房屋，最好留點騰訊（0700）傍身。英國FTSE指數沒有多少隻揸得落手，Unilever洗衣粉？AstraZeneca好一點，有COVID疫苗，買Diageo不如買茅台，還是同樣面對中、英身分危機的匯控（0005），要買也不用跑到英國買。唯一要小心的是入了英籍後，如英國「制裁」騰訊（笑了），可能不容許英國人持有。

此指南最後語重心長，善意提醒香港人送外賣時要禮貌，收到貼士更要大聲講Thank you，務必令英國人對香港人留下良好印象（在香港的服務員當然無此多餘責任）。我贊同，但小心斯德哥爾摩症候群突然發作，腰骨發軟，有種想做Uncle Tom（西方著名小說奴隸角色），90度鞠躬的衝動。希望他們多點以Uncle Roger為學習榜樣。

（中環資產持有騰訊、匯控及茅台財務權益）