有follower同我分享，要求黃店將收入一部分捐出去俾其他黃組織係本末倒置。究竟黃店係咪要將收入捐出去其他「幫手足」嘅機構先至值得支持？呢一種迷思，其實都幾值得大眾討論。 . 黃色經濟圈嘅出現，係因為我哋想壯大自己呢邊嘅金錢資本，增強自己嘅金錢力量，後來發展到有其他願景，例如係手足就業機會、創業機會同造織工會等。然而，撇除真係食人血饅頭嘅政棍、躝癱，好多喺黃色經濟圈（除咗飲食業）嘅人同店都好驚被扣上「食人血饅頭」嘅稱號。潛而默化下呢啲黃店/人習慣將自己喺黃色經濟圈中所賺到嘅資本，拎一部分出嚟課金俾其他組織，同時間就有種錯覺：「喂呢間黃店唔賺錢架，收到嘅錢會捐出去幫手足架」。 . 幫手足係咪只等於課金俾立場、612、好鄰舍呢一類呢？究竟咩叫做幫手足呢？「幫手足」呢個term變咗一張處於不敗之地，唔需要詳細解釋但唔容許合理質疑，因為你一問就係「搞分化」。黃色經濟圈嘅出現唔係就係真真正正，用金錢去壯大「手足」咩？俾錢黃店賺，點解會同課金俾頭先提到嘅機構比價值低咁多呢？去到而家，唔喺利潤度拎錢嚟捐好似好羞恥。「黃店喎，唔捐出去都唔知係咪偽黃」呢一種思維，本身就係一種迷思：黃色經濟圈係黃色慈善圈，唔課金出去而有利潤係可恥、不值支持。 . 其實黃店就係手足。黃店嘅構成正正係因為受壓逼，黃店嘅理念就係相信五大訴求缺一不可、光復香港時代革命。黃色經濟圈嘅出現唔係要做一部部提款機或唱錢機，唔係收咗啲錢就要拎返一部分出嚟；黃色經濟圈嘅出現係可以鼓勵大家表態，增加我哋嘅資本，就好似成立一間間銀行咁。再講，黃店背後嘅團隊就係手足，佢哋可能就係最逼切需要援助嘅一群，點解要要求佢哋將本應可以幫自己嘅一筆錢捐出去再間接得到資助？ . 以上所講嘅其實都係我用嚟話俾自己聽，因為我身分又係顧客又係黃色經濟圈中嘅黃店店主。我覺得有一種「我唔應該有利潤」嘅內在壓力，同時又受到外人個種「你賺咗錢就要捐啦」嘅外在壓力。好多謝呢位follower提醒我，我都要調整自己心態同諗法：唔通幫襯黃店就唔係幫手足？唔通黃店唔可以係手足？唔通黃店唔可以係被捕人士？唔通黃店唔可以生命告急？ . 除咗對黃嘅定義set得太高，我哋對於黃色經濟圈嘅想像都可以更貼地、更體恤別人。 . #香港人 #黃色經濟圈 #黃色文創圈 #黃店 #黃店地圖 #幫手足 #手足