雖然2020年大家都好討厭佢， 但我就相反幾鍾意呢一年。 2020係我活左30年， 最有感觸最大得著既一年。 返咗香港既呢三年， 幾乎一年發生兩至三件大事， 一件事先啱啱好平息， 都未安頓好自己心情， 就緊接第二件事～第三件事～ 就好似俾人兜巴兜巴打落塊面到冇停過😀。 連去睇心理輔導，個姑娘都好驚訝點解我可以生活到依嫁先崩潰。仲話我嘅EQ、忍耐力都高到不可思議。我都唔知我究竟因為堅強、遲鈍、定係戇鳩拯救咗自己幾多次。 但最後因為半年前發生咗一件事， 觸發左自己本身抑壓住好耐既情緒嘅問題， 我簡直係可以形容佢好似噴泉咁， 完全搵唔到個開關掣。 另外發現自己每一次發生嘅事情， 都好似鬼打牆咁樣不停重演， 其實真係同個性有好密切既關係。 過去半年簡直討厭自己討厭到， 如果手上有一個掣撳完之後會消失， 我會毫不猶豫一野拍落去。 過去半年不停重複問自己， 點解咁懦弱？點解冇晒勇氣？點解唔敢面對真實嘅自己？點解要為咗人哋嘅開心委屈自己？ 點解咁怕傷害人？點解咁怕受傷害？點解少少事就驚？點解容許自己變成咁樣？點解唔夠堅決？點解怕同人嗌交？點解要怕麻煩？點解唔夠愛自己？點解俾人不停踩自己心口而唔敢出聲？點解淨係識得匿埋喊？點解唔識反擊？點解唔開心既時候唔嘗試發脾氣？點解點解好多點解。 呢半年反省左自己好多既問題。 因為自己不停既反問不停嘅質疑， 令到自己開始有焦慮症。 會呼吸困難、心口突然之間抽住痛、心口同手心會係咁出汗、無啦啦冇任何原因會好想大喊、突然好絕望但又冇原因、會好易暈、好易個人斷電（隻眼會強行合埋），而且去到多人嘅地方更加明顯。 當時我嘗試搵過心理輔導， 但對我黎講，呢個方法好似冇咩用。 睇咗兩三次之後卒之我都係揀自己解決問題， 因為佢同我講嘅事情、幫助我嘅方法，我內心入面其實一直知道。 畢竟本身我個人算係醒目，😀 好多嘢我都知答案，算理性。 但就睇我敢唔敢正面去面對各種嘅問題。 所以我當睇心理輔導， 係一個提醒/一個開關掣， 話俾心入面嘅自己聽， 喂～蔣雅詩連心理輔導都睇埋， 睇輔導都好貴㗎， 唔好嘥錢啦！係時候真真正正解決問題啦！ 而且我覺得到最後解決問題嘅，其實都係靠內心終於鼓起勇氣、唔再自欺欺人、願意面對自己嘅自己。 其實喺生活上發生大部份唔愉快既事情， 都係自己選擇。 呢個受害者嘅角色係自己分配俾自己。 而且有好多時候會因為你嘅細膽， 引黎一啲人得寸進尺既行為同舉動。 因為你容許呢種事情發生係自己身上， 所以佢哋嘅出現同埋佢哋嘅行為，自己都有責任。 真係切忌覺得自己係受害者。 因為係你自己開咗個門罅俾人傷害你。 如果因為一件事令到你傷心難過、開始會討厭自己既同時，你已經要向外界Say No 應該要保護返自己。遠離呢一種唔好嘅事物。 只要你夠愛自己、勇敢講出自己嘅想法，會發現個世界會唔一樣好多。 呢個只係我嘅想法。 一直有好多人關心我最近點， 有冇搵到解決方法，所以我直接喺度講我點樣改善呢個問題。 不過可能對你地黎講未必適用⋯ 所以只供參考。 到最後我係用以下嘅方法，幫助自己焦慮症好返好多。 唔知係咪因為自己有打開機嘅習慣， 只要開始一關新既遊戲， 無論死幾多次都好，我都會瘋狂continue。 我有一段時間只要去到多人嘅地方，就會發作。會喺商場正中間突然無聲大喊、呼吸困難係咁出汗、想嘔想暈、無辦法對焦、手腳無力、完全無辦法思考同集中之類。 一開始我都驚，但係之後越諗越唔對路， 我活左咁多年，之前從來都唔會咁， 如果我呢一刻因為驚而縮沙， 我咪有排都唔會好返？ 最後我幾乎隔日就迫自己出門（我本身唔係一個鍾意出門嘅人），去一啲多人嘅地方亂咁行，迫自己習慣。 卒之我用咗三個月嘅時間，就可以喺多人嘅地方來去自如。雖然都會慌張，但已經唔會再有令到身體唔舒服嘅事情發生。 去到心理，我開始咩都嘗試講出口，無論成功與否。 起碼逐少為自己捍衛嘅方法， 會續啲續啲令到你開始慢慢喜歡上自己。 今日既我寧願暴走，都唔想再委屈自己將自己收埋。 遇到情緒上既起伏問題，雖然會迷惘無助。 但其實呢種只係一種排毒既過程，聽都有聽過啦「排清毒素身體好」呀麻！ 同埋你只要願意放過自己夠愛自己， 就邊個都唔敢行埋你傷害你。 同埋發生咩事都好，最緊要照顧好自己既內心。 新一年既目標暫時係拼老命做自己，愛自己。 2021大家加油身體健康啦～ 雅詩愛大家唷💞