願天下有情人終成兄妹（下） . 有一日我經過化驗所樓下，忍唔住就衝咗上去， 我想搵張醫生，佢係唯一一個了解件事嘅人。 . 情緒積壓到極點，就需要一個發洩口。 . 護士答：「張醫生今日唔喺度。」 . 我好失望，隨口問：「哦，你地果個『驗DNA送孕前檢測』嘅優惠，仲做緊啊？」 . 我有諗過，假如果日化驗所無做優惠， 或者老婆無貪便宜，我一世都唔知真相，我地會點？ . 可能我地會生個有缺陷嘅仔女，好努力撫養佢......至少老婆仲喺我身邊。 . 護士好疑惑：「先生，我地從來無做過呢個優惠。」 . ， 我呆咗，反覆問完又問，Check完又check，先確定呢個優惠係唔存在。 . 點解張醫生要哄我老婆做孕前檢測？會唔會...... . 我搵朋友幫手，諗方法拎到我老婆嘅DNA樣本，拎咗去三間唔同嘅化驗所。 . 最後確定，我同我老婆，唔係兄妹。 . 但咁又點？我地離婚，係因為我令佢流產，係因為我親手殺咗我地個BB！ . ， 「點解你要呃我，我根本唔識你。」我望住張醫生，袋裡面已經擺咗把刀。 . 只要佢答完，我就會一刀了結呢個整散我頭家嘅仇人。 . 「但係我識你啊。」張醫生冷笑。 . 佢識我？我回想我做過嘅所有野， 自問循規蹈矩，從來無傷害人，見到阿婆都會讓座，點會得罪佢？ . 張醫生答：「你有份害死我老婆。」 . 「你係咪認錯人？」 . ， 張醫生撳電腦，開咗一張Cap圖， 係我嘅FB留言：「呢個女人真係不知廉恥，死都要亂倫。」 . 到底係咩事？我評論緊邊個女人？我已經無晒印象。 . 張醫生慢慢講：「結咗婚先知老婆係親生妹妹，感覺點？不過我無你咁好彩，我地真係兄妹，而且件事仲揚咗。」 . 我查過關於亂倫嘅法例：「如果你事前唔知，係唔會坐監架。」 . ， 「但知咗之後，就唔可以一齊，法庭宣判我地婚姻無效。」 張醫生出晒神：「我地忍唔住偷偷一齊番，點知被網民影到親密照，網上公審，呼籲警察拉我地，結果我老婆自殺。」 . 張醫生望住我：「你知唔知報紙點寫？『亂倫女羞愧自盡』！我唔明，我地到底做錯咗乜野？」 . 我隱約有印象，果件事好似係幾年前，「咁多人留言，你就係要害我？」 . 網上個個都人云亦云架啦，我肯定我唔係唯一，亦唔係講得最難聽果個。 . 「每一個留言我都有cap低，背到熟晒，天網恢恢，係你自己送上門。」 張醫生聳肩：「你應該怪自己，點解信科技，都唔信屋企人。」 . ， 我捉住袋裡面嘅刀柄，手指都痛埋：「為咗一個FB留言，就要我家破人亡？」 . 「你覺得呢？喺網上做嘅野，就唔使負責任？」 張醫生笑一笑：「想報復？黎啦，我乜都唔驚。」 . 果一刻，我意識到，殺一個人，根本無辦法洩憤。 . 我要大家感受到我嘅痛苦，我要全世界為我陪葬。 . ， 我無殺張醫生，你係咪覺得，我會變成一個連環殺手？ . 傻啦，我根本無呢個能力，而且我仲有更有效嘅方法，可以傷害到更多人。 . 我開咗個科學資訊網站，開始散播偽科學， 例如亂倫生出黎嘅仔女會更聰明、打流感疫苗會增加中風機率、生食果子狸會養顏...... . 只要內容夠嘩眾取寵，自然有人幫我Share。 . 呢個年代，大家都信「科學」，多過信自己。 . －完－ . #短故 #短篇 #小說 #陳美濤 #廣東話 #粵語 #願天下有情人終成兄妹 #tomatochan #愛情