【食的疑惑】味精食得多會口渴？ 味精食得多會傷健康？ #健康飲食 成為潮流，外出食飯，愈來愈多餐廳標榜「#無味精」。好多人飲食時聞「味精」色變，認定味精唔好，但事實係咁嗎？ 其實味精嘅主要成分穀氨酸(MSG)廣泛存在喺天然食材之中，我哋日常飲食都會攝取到，只要適量，帶來嘅「鮮味」增添食物美味。有人覺得味精係壞東西，因為食完會口渴，有咁情況只因多數味精摻合大量鹽，攝取鈉過量，所以身體頂唔順。 普遍存在天然食材中 喺二十世紀初，日本科學家喺蒸發大量海帶湯裡發現味道除酸甜苦鹹外，仲有第五味─「#鮮味」！鮮味嘅來源，就係穀氨酸，屬胺基酸一種。其實穀氨酸廣泛存在喺天然食材之中，例如：昆布、柴魚、蘑菇、粟米、豆類、芝士等，我們日常飲食都有機會攝取得到；另外，喺現代食品工業中，會用海藻萃取或以粟米、甜菜、甘蔗、糖蜜等原枓通過發酵等技術而製成穀氨酸，再摻合鹽製成味精。 適量食用味精安全 在食品界，為求提升食品鮮味，味精常添加喺加工食品入面如：火腿、香腸、丸類、即食麵湯粉等。中廚烹調時，為使餸菜更美味，都偏好加味精增味。本來食用味精唔會影響健康，美國FDA曾公布研究報告，食用正常消費量嘅味精係安全嘅，而且無任何證據顯示食用味精和任何慢性疾病有關。但因為味精含高鈉成分，食得太多易感口渴，此外，對現今追求健康飲食嘅人亦係大敵，因為攝取鈉過高對心臟、血壓、肝腎臟都唔好。部分人食味精過量，會出現過敏反應，例如舌頭腫脹、頭暈、身體麻痺、心跳加促、肌肉無力等。情況輕微嘅話，醫生建議可以飲水嚟解決。網上另有人話飲杯果汁或可樂都有幫助。如過敏情況嚴重，當然要求醫。 其他增鮮方法 市面有售嘅味精多為合成物，含鈉高，少食為妙。不過，若想喺烹調時為食物提鮮，其中一個方法就係加入香菇。經風乾嘅香菇含有大量谷氨酸鈉和天冬氨酸，兩種都係氨基酸一種，具有強烈鮮味。另有廚藝達人教路，可以將紫菜、乾貝等打磨成粉，取代味替用來調味，增添鮮味，還可增加營養。 =====================⠀⠀⠀⠀ 立即 Follow @LikeMagazineHK | 每日送上優質生活Tips