［赤口玩串尐：Focus嘅眾數係Foci，咁Octopus 呢？］

新一年祝大家八足（呢個八咩？）咁多爪，不過記住莊子話頭，太醒目都係好快畀人捉去做sashimi。

小弟而家寫文都不忘時效，團年教你講移民英國騙局（http://bit.ly/2MSl2yF），新年教你下年目標（http://bit.ly/2MPB7VI）。咁今日呢篇，知識份子家庭赤口撩交嗌必備，建議你挑機問下同枱中任何讀過大學嘅人，偽ABC BBC 溝洋腸 Janice Man口音嘅更佳。我？我年三十晚已經問咗

問題就係：一隻八爪魚係 Octopus，咁好多隻八爪魚係叫乜？如果食齋嘅，可以轉為一張八達通係Octopus，咁好多張八達通係乜？Technically Speaking，到底Octopus 嘅plural form 係乜？

再有文化啲嘅，不妨畀個前設trap 佢：Focus嘅眾數係Foci，Locus（軌蹟）嘅眾數係Loci，咁Octopus嘅眾數係乜？前題當然係同枱嘅知道Foci Loci，照計我年代讀理科嘅實知，不過你知而家啲小朋友咩程度啦。

講返今日引呢篇文，作者真係勁，八爪魚眾數都寫篇文（http://bit.ly/2MTFvTy）。作者自稱She is obsessed with culture, language, literature, and law，你可以理解係文法塔利班，語文警察，煩膠。嘻。即係食拉麵一定要有冰水嗰啲，正如蔡瀾話食喇沙一定要有螄蚶。

作者認為，拿，讀音就冇所謂，有人話蕃茄係吐媽桃，有人話係吐味桃，冇問題的。但作者自告奮勇做討論終結者，一槌定音，打撚扁隻八爪魚。八爪魚八隻腳（或手，任你），三種眾數（有人話四種添！）寫法，但只有一種正確

韋氏字典話（http://bit.ly/2MU3VfI），常見嘅Octopus眾數有三種，分別係Octopi, Octopuses 同埋Octopodes。維基就話仲有人叫做Octopods（http://bit.ly/2MT2NZY）。
由我上面講Focus Locus你都應該估到我陰你，Octopi係錯嘅。作者話頭，只有一個寫法係啱嘅：好多隻八爪魚，係Octopuses，唔係Octopi。

作者話，話撚知你好多人寫Octopi，多人唔代表啱，Octopi係錯的。冇錯，Focus眾數係Foci，Locus眾數係Loci，但不代表Octopus都係咁轉。

點解？就真係語言L出場嘅時間啦。Focus 同 Locus都係拉丁文語源，所以眾數係唔要us要i．但Octopus係希臘文語源，所以唔跟呢個法則。所以，Octopi肯定係錯。正路地，希臘文語源嘅字，應該係轉做Octopodes — 不過由於一啲好奇怪嘅例外（！），專家話呢個畸屎係特例（http://bit.ly/2MU4Ht8），所以唔係Octopodes，係Octopuses。但總之Octopi一定係錯！

作者仲「賊喊捉賊」（我加嘅呢句），話個問題就係啲識少少扮代表嘅塔利班，成日走去更正人地。呀作者自己成日寫八爪魚嘅文（？），所以佢一寫Octopuses成日有人更正佢：阿嬸，係Octopi唔係Octopuses呀！

作者話呢啲就係hypercorrection，矯枉過正，識少少扮代表，一般都係啲煩膠鍾意look smart，axia, rhinoceri , peni都係此類。記住，好多個假說係叫axioms唔係axia，好多隻犀牛係叫 rhinoceroses唔係rhinoceri（我懷疑有幾多人寫全寫），而好多碌撚係penises，唔係peni。

作者做過律師，對於一大堆毒L文法塔利班相當厭煩。試過有位本身編字典嘅律師，寫過傳票subpoenas，都一大堆友走去挑佢機，話佢讀咁多書都唔知subpoena嘅眾數係subpoenae。原因？因為佢地知道Formula嘅眾數係Formulae掛，咪以為subpoena都係咁跟。所以幾時都話知小小嘅錯通人，大鑊乜都唔知嘅白痴。

事實上subpoena係拉丁字，sub係under (as in subway)， poena 係懲罰／痛苦（有神話神祇以此為名）。所以根本冇subpoenae呢樣嘢。

作者結論：有時你自己錯都唔緊要，但唔該唔好做煩膠，特別係自己識少少時走去挑人機。Octopi係錯，Octopuses先啱，沒有約定俗成沒有各自表述。

香港呢？我即時諗起啲用「尐」字嘅友。首先，隻字好撚核突（我話嘅）。另外，鍾意用都唔緊要啦，但非官方統計，用「尐」字嘅友，十居其九係煩膠。即係佢地唔只自己要用「尐」字，仲要出嚟更正你話呢個先係本土正寫，話你寫「啲」錯。呢啲就係hypercorrection

仲未發癲？好，年初四你返工討論下，到底 一個愛馬士袋，英文係a Hermes 定 an Hermes?（http://bit.ly/2MU5fPI）

Bonus：如果你咁啱赤口食飯食八爪魚時問咁巴閉，記住影張相畀我，有Bonus。「不過討論埋Bonus嘅眾數係乜先」