【龔成問答信箱】（Q22041-Q22060）

Q22041：

Hello 龔sir 我係你股票班初班既舊生 最近睇緊12號恒基既年報 有d問題想問下

請問本年度盈利後面點解仲有一個本年度收益總額？唔係好睇得明 除稅及重新分類後之本年度其他全面收益淨額 即係點？

仲有佢既基礎盈利14899係點計出黎呢？我嘗試將公佈盈利10192 加 "投資物業及發展中投資物業之公允價值（減少） / 增加" 2413 都計唔到 14899

聯營同合營公司既盈利需要剔除嗎？

最後就係buffolio顯示既恒基 PE係用基礎盈利定公佈盈利計算呢？我需唔需要加減其他數字去計算正確既PE?

唔好意思 有好多問題

龔成老師︰

這頁"綜合損益及其他全面收益表"，係分析估值時，我都唔會特別去參考。因為佢主要係一些非營運性變動，無太大參考價值。

至於基礎盈利，主要係扣除左"物業公平值變動"，所造成之影響。

你可以參考翻2020年年報P.226，你用"本公司股東應佔盈利"，再加翻所以公平值數字(因為當年公平值，都是負數。若當年公平值係正數，你就要倒轉，扣除翻佢。)，就會計到14899個答案。

水牛網顯示，會係用用"本公司股東應佔盈利"作計算(即包含公平值之影響)。

------------------------------------------------

Q22042：

龔成老師你好！好想同你分享個好消息！我同丈夫成功買到第2層樓啦！難得睇中啱心水地區尺數既低水單位，所以決定賣哂所有股票同埋加按少少層樓俾首期

首先 我好想多謝老師你強調儲資產呢個概念，雖然我啲股票唔係大賺，不過起碼不經不覺已經儲到一筆可以靈活套現既資產，全靠呢筆錢 今次先有機會入市。

不過宜家手上已經冇哂股票 現金亦唔多，要供2層樓亦都令少左現金流去儲股票

再加上黎緊首要目標係可以儲到筆錢裝修新屋，想請問老師我應該如何分配長線同短線既投資方向？

現階段應該全部保留現金用黎裝修？還是繼續以月供方式儲貨？

謝謝老師建議

龔成老師︰

先恭喜你，又成為業主。

我地財富組合除左要有增長力和質素外，平衡性都好重要。你現時資產明顯係偏重於物業類，長線你應集中加回一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

至於先裝修，定投資，你要從生活所需和財富增值，2者之間去取個平衡。

但我建議，點都要每月做番少少月供，唔好完全係零。因為你現時係零股票，而大市又只係合理水平，這個狀態唔理想。

另外，由於你要供2層樓，令每月可投資金額減少。你最好盡快將另一層樓放租，去提升自已可投資現金流，咁會較好。

當然，你現時現金太少，都要留一定的現金先。

------------------------------------------------

Q22043：

老師你好，我又有問題想問。看完"80後千萬富翁"後，有一個疑惑

假設我辭職後，以全職股票投資者創富，之後希望分散投資，買入一間物業，問題就來了：

1.沒有工作，全職股票投資者，可申請按揭嗎？

2.同時，過到壓力測試？

3.成立空殼公司，買入物業是否更好？

龔成老師︰

1) + 2)你可以利用「資產方式」申請按揭，而非一般有收入人士，所用的「壓力測試方式」。

或者你可以加入擔保人，都有機會可以提升你成功申請按揭機會。

但坦白講，無收入要做按揭，一般都會較難。

所以最好在你有穩定收入時，處理好物業這部分，之後先辭工。

3) 成立空殼公司買入物業，係可以節省不少稅項。但空殼公司本身，都有不少營運和買賣成本，例如要會計師每年核數、買賣時需要律師評估資產等。

加上公司買物業要支付「買家印花稅」15%，因此否則未必值得咁做。

------------------------------------------------

Q22044：

1:假設，本金10萬，每月再投入1萬。如果比自己目標係每年升15%,咁應該點計，因為以年計

1月資金可用12個月，但12月資金只用1個月。咁我應該用22萬乘15%,定應該點計好?

2：老師，想請問下，假設如果雙方同意，我冇任何牌照既情況下，可以幫人做投資嗎

3:老師想請問下，假設現在有1百萬資金，用了5年時間儲錢加投資得來，有買樓需求，可選擇用來買樓首期或繼續用股票滾下去，

但如果買左首期後就變左股票果邊滾落去既速度慢左，面對咁既情況應該點做好

4：老師，想問如果抽到居屋，又比左首期買左之後，可唔可以出租？

龔成老師︰

1) 唔好諗到太複雜，我地唔係要一個好精準架數字，因為投資中間會有好多變數，未必一切如你估算一樣。

但係你要知一個大概數字，係有意思，可以作參考架數字。

以你情況，可以簡單點，當你當年每月資金，係年尾一次過投入。咁樣計算，簡單之餘，出來結果都會相對保守。

第1年回報︰22萬 x (1 + 15%)
第2年回報︰(第一年回報 + 12萬) x (1 + 15%)....如此類推

2) 如果是《證券及期貨條例》規管範圍，基本上就要有牌照。如果你只係幫下屋企人手，當然另計。其實，當中好講有無「利益」在其中。

3) 如果你係有實際需要，去置業的話，你係可以動用這筆資金。其實物業都係一個資產，都算係一種投資。

但最好，係你置業之餘，都有一定資金，用投資優質股，令成個組合唔好偏左係物業個邊，咁就最理想。

4) 根據正常程序，係要補左地價，先至可以成間居屋放租。

而且，投資物業放租，在香港現時法例下，是不能以高成數按揭進行的，金管局定明，如果要投資物業收租，最高的按數不能高於5成，高於5成者，只能自住。

當然，這是政府的規定，但坊間的做法，往往是另一回事。但你要明白佢地的做法是犯法的，因此一定有風險，做與唔做，自行決定。

坊間不少投資者，就算高成數揭揭都會照放租，其實你照去地產經紀同你講你想這樣，佢地就明，會照同你做，當然，細節位不便在這裡講太多，有機會你上堂見到面，我分享坊間的做法。

記住，所有事情都會有風險的，這是一個值博率的問題，我只可以話，坊間不少人都會照做。

------------------------------------------------

Q22045：

龔sir，你好!多謝你一直耐心回覆讀者的提問。我都其中一個支持你的讀者，你的著作特別是年報勝經，寫得很好。我亦因此開始學習睇年報。

最近我投資左百度(9888)，現價大約210蚊左右。投資原因主要是看好雲業務同智能駕駛的前景。我相信這兩個範疇能配合中國未來的大方向。

配合本身網上廣告業務收益穩定，有利百度發展新增長點。

百度最大的擔心是競爭者多，在今日「全民製車」的時期，百度的賣點只是研發時間比同業長，比同業更早開始投入研究。講到這裡，就引伸出另一個憂慮，就是巨大的無人駕駛投資能否變現。

我明白股價反映公司價值，同時亦反映了市場的對於公司的期望值。但在這裡，我唔識判斷「市場期望值」這件事。

不知我的看法是否正確，百度目前的市盈率大約9倍左右，應該是屬於健康水平。 未知老師的看法如何? 現價應否再加注?謝謝!

龔成老師︰

多謝你的支持!

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

雲和無人駕駛，都會係有業務當中較有潛力部份。百度的無人駕駛技術，其實唔錯。雖然越早研發，唔代表一定可以越早市場化。

但百度在無人駕駛技術，無論研發和運作，都累積左一定經驗，有助提升佢成功市場化機率。若無人駕駛技術成功市場化，相信會成為集團盈利的新增長點。

由於無人駕駛市場未算成熟，就算有較多競爭者進場，都未必會造成較大影響。加上集團有一定技術，係競爭上相信會有優勢。

這些部份發展雖有潛力，但都存在很多不確定性，我地好難完全掌握將來發展狀況。因此，係估值時，對這些不確定性較高的分部，要保守少少。

百度現時收入，主要來自在線營銷服務。這部份，集團有一定優勢，預期長線發展正面。

百度在規模和質素上係有，但你預佢中短期會較波動，不宜持有太多。若你資金好充裕，要價加小注係可以，否則等較大回調才加注，會比較好。

------------------------------------------------

Q22046：

龔sir你好，我對於股票買賣只是初哥，之前都是有少少人云亦云既心態作買賣。而我丈夫曾經上過你既堂，從他口中得知你的FB page，最近經常睇你既page增加投資概念。想問下你嘅意見。

本人37歲，已婚未有仔女。月入$58K，丈夫月入$20K多少少，收入算穩定，已購入一層自住物業，仲有17年需要供樓。

之前一路只保守地作儲蓄，大約有流動資金$100萬，扣除供樓，生活費同雜費，每月可儲蓄$24K，想可以好好分配同計劃點樣做好投資理財，為將來有小朋友及退休生活作計劃。

之前買入一些收息股票為主。如下：

0005 匯豐 70.5x1200股+46.2x2000股
1398 工商銀行 6.41x 15000股
2800 盈富基金 28.72 x2000股

1. 睇了你的FB page 後想嚐試月供股票，考慮緊每月用一萬蚊月供0002，2318，6823。這些組合適合嗎？

2. 現在持有既股票組合適合繼續長期持有？定放售？

3. 如果買潛力股，你會建議買邊隻？

期待老師的回覆，非常謝謝！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你37歲，應以增值為主。平安(2318)係可以，但其餘2隻只係收息股，增長力較弱，唔係太適合。我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$12000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但我建議，在你實行以上計劃前，先儲起半年開支(若你預將會有小朋友，都要預留埋這部份開支)，作為應急之用，咁會較穏當。

2) 你持股雖然都有質素，但匯控(0005)和工行(1398)都係收息股，你年紀不宜持有太多。建議沽出部份，慢慢換至上述股票，會較好。

3) 我上述潛力股，都適合你，但你投資經驗較淺，要控制個比重，唔好佔多過組合3成。

另外，大部份潛力股現價都略貴。現時只有安碩恒生科技(3067)、ＧＸ中國電車基金（2845）、比亞迪(1211)、阿里（9988）、中生製藥（1177）、福壽園(1448)勉強算在合理區頂部，可分注入貨，其餘想買就要等一等。

------------------------------------------------

Q22047：

龔成老師，你好，最近睇左幾本理財書，當中都有一個對沖概念，但睇返sir的書，或fb的對答，好似都好少呢方面既資訊，是否同你理念唔一樣？

另外我本人都買左d科技股，例如阿里巴巴和小米，都諗住有排都唔放，但又唔想繼續供落去，想供d其他行業的（你話同一產業不是多過30%)，

睇左眼科藥物公司兆科眼科，或者是德視佳，一個造藥一個行醫，你會點睇？

龔成老師︰

我主要係建議透過創建一個合適、平衡、有質素的財富組合，去做到在合理風險下，爭取最大回報。

跟一般對沖，去平衡風險有所不同。而且對沖唔易玩，唔適合一般投資者去操作。

兆科眼科（6622）係一間眼科製藥公司，致力於療法的研究、開發及商業化。通過自主開發或許可引進已建立起包含25種候選藥物的全面眼科藥物管線，涵蓋影響眼前節及眼後節的多數主要眼科適應症。

集團初步將策略重心放在中國五大眼科適應症上，包括乾眼症(DED)、濕性老年黃斑部病變(wAMD)、糖尿病黃斑水腫 (DME)、近視及青光眼。

佢已建立起由13種創新藥及12種仿製藥（按國家藥監局的《藥品註冊管理辦法》分類）組成的眼科藥物管線。創新藥管線包括8種候選藥物，若獲批准則有潛力成為中國市場領先產品。

仿製藥管線包括6種潛在中國首仿藥。集團擁有8項已頒發的中國專利及一項已頒發的歐盟專利，並提交6份中國專利申請。

佢已於廣州市南沙新區建造的生產設施，根據中國、美國 及歐盟cGMP標準設計及興建以用於生產眼科藥物，其生產能力完備並可用於商業化規模生產。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注，當小注投資下好了，同時要明白當中的風險。但用作月供，就不建議了。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，可小注直接買入，但不宜月供。

另外，我地月供係一個長線計劃，最少供3年，並持有5年，才會有較佳效果。因為月供可以拉平均個買入價，減少買貴貨風險。

若你經常供一陣就轉，會影響到平均價格效果，令最終回報不確定性增加。

------------------------------------------------

Q22048：

我想請教一下，你覺得應該怎樣教育兒童理財？因為看過你的文章/書本，你都提及學校缺乏理財教育！謝謝！

（期待可以在澳門上課的澳門讀者）

我兒子8歲，有時會問我供樓借貸，公司借錢，點解麥當勞可以咁成功等等，我自己本身不是商科，所以都係google咁簡單講俾佢知

龔成老師︰

我建議你同佢玩「大富翁」、「現金流」這些遊戲。

如果佢8歲已經有這些問題，我相信佢對這方面好有興趣，好有潛質，日後可以好有成就，你可以找一些成功的名人、商人傳記之類的兒童書比佢睇。

書本和遊戲，都係教授小朋友理財的理想方法。好似大富翁遊戲，小朋友可以從享受遊戲同時，也會學到不少經濟理論和操作模式。

另外，書本可以令佢從前人身上，學到一些經驗。當然，佢年紀比較細，較難理解我們成年人睇架書籍。

最好先選擇佢年紀水平，和他有興趣的書籍入手。之後才慢慢加入一些，未必是他有興趣，但又對他理財知識有幫助的書籍。

家長在遊戲和閱讀時，要多加讚賞，對佢學習會有激勵作用。

如果你本身無太多理財知識，就係教授小朋友同時，自已都要增進一下，甚至一齊學習。可以作親子活動之餘，都可以提升雙方學習的樂趣。

------------------------------------------------

Q22049：

老師：我在重整現時持有的股票組合，由於未到8月上課時候，唯有再麻煩老師，唔好意思。想請教以下幾隻股票是否優質和他們的合理價範圍。謝謝！

405
939
2822

此外，以上三隻股票是否都屬於平穩增長股呢？謝謝！

龔成老師︰

這3隻股票，都係優質，同時現價都在合理區，可以分注入貨。

越秀房產（0405）和建行(0939)係收息股，增長力較弱，主要係收下息。以你年紀，收息不用佔太多，大約2成左右好了。

南方A50（2822）算係平穩增長股至潛力股之間，有一定波動性。此股適合你年紀，可以考慮。

------------------------------------------------

Q22050：

老師你好！我居住在澳門，今年45歲，自住房屋市值約900萬還欠貸款400萬，每月供17000。

另有一間市值約600萬已供滿收租約9000（澳門租金較低）

因疫情上年失業，現新工作每月薪金只有18000再加上9000租金，每月收入共27000，每月供樓保險加上生活開支剛好月月清，另有60萬積蓄想投資股票市場。

現時手頭沒有揸股票，想問應唔應該賣咗收租樓，還清400萬貸款，剩餘200萬用來買平穩收息股？還是只用60萬積極蓄投放股市？

另外想買老師你的書，我是股票初學者，適合先看那一本？

龔成老師︰

其實物業都係一種資產，除非你收租物業升值潛力真係好弱，或者質素好差，否則持有用作收租，咁會較好。

至於增值，你可以先用這60萬去做。由於你已經有2個物業，故你新資金應先集中係優質股類，以免出現過度集中風險。

以你45歲，可以選擇一些「平穩增值股」+「潛力股」作投資目標。

由於你現時無太多投資經驗，潛力股這類風險較高的股票，你就不要持有過多，最多維持1-2成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-4成，到時要視乎你投資經驗多寡，和了解這些股票程度而定。

大市現處於合理水平，那60萬資金，你可以先用20-30萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22051：

龔成老師你好，剛開始月供股票3個月，其中一隻月供2382 平均價179，佢今個月升左好多

我係想長線持有，但遇著咁大升幅，平均價就會拉高 變貴左。心態上係繼續月供 還是停供一個月先？

龔成老師︰

舜宇光學（2382）係有質素和潛力的潛力股，若你係年青至中年人士，月供這隻股票係可以。

現時此股已經偏貴，但由於未到好貴，我地係唔需要停左個月供。短期成本價，係會有被拉高情況，但係月供係一個長線計劃，長遠個價都會拉平衡。

除非佢再升到一個好貴水平，我地可能要減少股款，甚至停供。但大前題係，你有無定平貴的能力。若果無，我建議你不理價值升跌，一直去供。

因為你自行調整供款，如果時機不對，反而大大影響左你平均價格的效果。所以，若你投資經驗較一般，我建議你選好優質股後，唔好理個價，一直供，反而對你最有利。

------------------------------------------------

Q22052：

龔老師你好，我今年31歲，月入二萬五，月存二萬，手持8份儲蓄保險，有啲五年期，有啲十年期，有啲三十年期（大約150萬左右），

有七十萬流動資金，另外有三十萬買咗股票，但坐緊艇包括:

9988（200)$280買入
175 (2000)$31.5買入
1810 （1200）$29.5買入
0066（2000）$38.9買入
1801 （1000）$90.6買入

龔老師我二年後想買樓，想用呢70萬用二年時間滾到100萬，請問有咩建議。麻煩指點迷津

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有股票，都係有質素，長線持有係無問題。但信達生物（1801）仍處於燒銀紙的狀態，不確定性好大，暫時唔建議加注。

我地投資股票，其實等同投資一間企業。希望透過其自然增長，以達至財富增值的目的。所以，我地投資一定要較長時間。而2年只算係一個短時期，股價好易出現波動，增加回報的不確定性。

因此，你這70萬不宜作太高風險投資。我建議用盈富(2800)，再加收息股作為組合。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那70萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

但這個組合增長力，未必足以2年內由70萬滾到100萬。但佢勝在穏定性較高，在只能投資2年的情況下，這個配置會較為穏當。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時持有儲蓄保險，實在係太多。如果佢了一定時間的，你可以保留。但你還很年青，我建議你長線計，應該取消部份，將資金轉至優質股去做增值，會較好。

------------------------------------------------

Q22053：

龔sir，你好！有幾個投資問題想問。

1. 投資黎講，係咪唔應該買保險，或者唔應該買有儲蓄成份保險？

2. 按回報計算，應該買50年樓齡二手樓，還是一手樓？

3. 未來咩房型或者尺數更適合投資？

龔成老師︰

1) 答案係不一定。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

2) 一手樓，好多時都會有一定溢價，變相令你買貴貨，影響長線回報，所以我一直都唔係好建議買一手樓。

至於50年樓齡二手樓，由於已有一定樓齡，除了本身保養成本會較高外。向銀行貨款也較困難，因此投資價值都較一般。

2個選擇，其實都唔係咁理想。除非50年樓係好平，租金回報率又高，而且係一些大型屋苑，才值得考慮。

3) 房型其實無特定，尺寸最好至少有300呎，可以附合到一個家庭的最低限度需要，投資價值會較好。

其實我地投資一間物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

------------------------------------------------

Q22054：

你好 龔sir，Follow左你嘅post都有一段時間 我亦都睇左你嘅著作「財務自由行」「80後2百萬富翁」「股票聖經」「50隻潛力股」最近4月中更參加左你加「投資陪升股課程」剛剛都畢左業

其實我一直都想理財 覺得你講嘅理論好實用及貼地，好有循序漸進嘅思維。

老師你所教嘅方法都係由你經驗所堆積出黎嘅結論 炒股散戶10個有9個都輸 你教嘅長期持有優質股其實先係最快嘅捷徑！

我雖然開始理財或接觸真正理財只有半年多啲 但思維上我確實改變左 而我起碼已每日記帳已維持左大半年 而每月月尾也會檢討 (先發現原來自己成日駛好多無謂錢 !) 多謝阿SIR!

老師 就我個人情況 我有幾大重點想請教 先講我背境

今年34歲 未婚沒有仔女 每年有年終雙糧及花紅 年薪為一百萬多啲

換左樓 樓價700萬多啲 做按揭9成 月供約24k 每月可儲到16k 左右 當中10K放左係月供股票

1. 現金約有450k 放左係買樓是「高息戶口 」約 1.4% PA – 都係聽阿SIR教導 留番D現金當做BACKUP 及緊急用錢 – 見戶口又有少少息 所以暫時放係度

2. 股票約有 450k 全部都係2-3月入
788 - 10000股
823 - 400股
1177 - 4000股
1448 - 2000股
1833 - 400股
1928 – 2800股
1972 - 5600股
3067 - 6000股
3918 – 2000股

3. 月供股票 每月10k – 由本年3月先開始供
00175 – 2k
00700 – 2k
01211 – 2k
02800 – 2k
09988 – 2k

4. 沒有其他兼職及副業

問題：

1. 目標 40歲前有1000萬 以上咁樣執完條數好似都未有咩FEEL 想請教阿SIR有咩建議可達到我目標?

2. 計過月複利息回報 上堂提到10-15% 已叫做好理想 但依個都係參考% 點可以令自己既增長穩定D？見住自己D投資上上落落 我連唔蝕都無信心 應該點好

3. 調整緊股票係6:4 水桶1 vs 水桶2 - 一直都賣咁D 1972 而放入D水桶1度 但見住D水桶1好似都無咩升 無咩信心做到阿SIR講既每年10-15%增長 想請問應該點調整好?

4. 因為我工作時間都叫自由 亦都放星期六, 日 但我問題係真係無咩特別興趣及嗜好 點樣先可以令自己多D興趣 從已令自己多個機會有個副業或兼職 我依家只有打工一份收入 好似好危險咁

5. 自己打算2022年結婚 係緊急用錢度預算300k黎用做結婚 都打算結完就生小朋友 如結左婚及生小朋友 應該點調整以上所有策略?

6. 年年交稅都10幾20萬 好肉赤 有咩方式可以減少 或更好處理方法

最後想問阿sir你係咪真係有開到糖水鋪？哈哈 我要去幫襯一下 ! 謝謝

龔成老師：

我不會公開你的名，不過問題會放上網，等更多人能學習。

1）你現時的理財不差，配置平衡，同時配合你的年齡情況。但如果要去到$1000萬，就要再加努力，因為你現時每月儲到$16000，一年約20萬，就算計及投資回報，以及你現時持有的資產去增值，要滾存到$1000萬都不易。

除非你之後用一些較進取的方法，例如集中投資潛力股，以及自己發掘潛力股，早市場一步找到，投資並得到數倍計的回報，就有機，但這要你付出較多，你要每星期花大量時間去尋找潛力股。

2）我地最重要睇長期回報，目標一年有10%-15%，但不用每年睇，而是睇長期的平均，你已經方向正確，保持進行就得。

只要你多做功課，全面了解企業，以及其增長力，就會好有信心。

3）你要睇長期，你的思維仍停在短期股價。其實你要睇「企業成長及價值」先得。

4）你要多了解自己。如果唔知自己想發展D乜，就「試」，有時試試下，你就會更了解，例如試下做小生意，找一些你平時不會想過做的兼職，唔好浪費左你的時間。

如果無野做，就花多D時間去研究企業，睇年報。

5）最重要是你預留$30萬以上的現金，餘下先投資，由於2022年與現時已接近，因此這$30萬不宜投資。

只要預算要結婚的資金，準備好。餘下資金就算進取少少，都無問題。

6）如果有需要，就開公司，當然你最好問翻會計師佢地的意見，現時公司頭$200萬的盈利，交約8%稅，比高薪打工仔交的稅仲少，你可以上網了解下。

------------------------------------------------

Q22055：

龔成老師你好，我想问下7522只股，当时听朋友介绍买下7522，平均价为3.75买入8万股，这股现在一直向下，我应该怎樣处理，是否应该溝貨，还是走货？请賜教。

这只股會否會跌倒变费纸的

我不憧买股，这段时间看了你的视频，知我买的股亂七八糟，有909、9888 全部虧損。我有一百万來投资，现在用了一半，我应怎樣重新组合，麻煩晒。

龔成老師︰

你先要緊記一個好重要的概念，我地買入一隻股票，一定要知道佢質素、行業前景、財務狀況等，才去投資。

唔好聽朋友講、或者聽消息，就去買貨。如果你連隻股票背後買什麼、公司如何賺錢、行內有什麼優勢、點解未來有發展和增長潛力，都答唔倒自已，咁就要停一停，唔好投資住。

ＦＩ二華夏納一百(7522)投資目標是提供在扣除費用及支出之前，盡量貼近納斯達克100指數每日兩倍反向表現（-2x）的每日投資業績。

如果納斯達克100指數跌1%，你就會獲利2%(另扣管理費)。但若然納斯達克100指數向上，你就會虧損。

我對這類產品有保留，納斯達克100指數在過去一直反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

明源雲(0909)和百度(9888)都係偏向潛力股類型，都係有長線投資價值。若你係年青至中年人士，只要唔係持有過多，可以守。但若佔你佔合較多，最好沽出部份，去平衡一下風險。

若你對投資知識不多，我建議你先用月供去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，餘下50萬和每月儲蓄，就等大跌市機會出現，才大力度掃貨，並長線投資。

若你現時組合，只係得1,2隻股票，我建議你都將部份股票，換碼至上述優質股，令組合風險可以更分散，整個組合也會較健康。

------------------------------------------------

Q22056：

老師，我近期抽到白居二，想購入沙田愉翠苑，為小孩的校網作準備。

問題1. 三房盤唔多，呢期成交量又高，價錢有的癲，三月至今升了12.3% 有的單位價亦企得好硬，心怕而家唔安排，睇定啲遲下連盤都冇！借問一聲，你有何看法？

問題2. 看新聞明年會加息，我究竟用H息口好，定用P息口好呢？

人生第一次 去選擇買樓 這麼重大的決定，真想跟老師分享

有睇中到盤, 但價錢不到位,預700-720萬, 睇中單位為740萬，在想要不要去馬, 怕錯過左, 之後就冇合心意的盤...

老師...求你指引我...

龔成老師︰

1) 本身三房這類大單位，供應係較少，故價格較敏感都係正常。雖然佢近期升左唔少，但由於白居二始終跟市價，有一定拆讓，故有一定吸引力。

加上這個是你自住房，考慮重要主要係是否配合「你長線生活需要」和能否做到「供得起」。如果係無問題，你都可以考慮入市。

2) 明年是否加息，暫時都係一個問號。以現時狀況計，H息會較好。但政府規定，居屋只能用P按，故你其實無得選擇。

------------------------------------------------

Q22057：

老師你好！我係你股票學生，完最後一課，感受到老師的愛心同努力，一星期兩晚3-4小時站立不停講課，課程內容非常豐富，非常感激, 辛苦你了。

另外，想請問之前不懂股票，自己又想穩健及有利息，買了：

恒生銀行 。3500
匯豐銀行。4400。
領展。$2000。（月供）
盈富基金。$3000 （月供）
小米。200
瞬宇光學。300

其實之前買匯豐恒生作收息，其他是認識你後才購入。我知道要減持銀行股，請指教應該怎樣保留。謝謝

龔成老師：

你現時較大的問題，是銀行股較多，你不要再增持這類，你應該溫翻第2堂的筆記，慢慢調整翻一個適合你年齡及風險承受程度的組合。

我會建議你過1年後，經濟好翻D，匯豐（0005）上翻D，減持部分，餘下就慢慢減，直至去到適合你配合配置的比例。

至於恆生（0011），質素比匯豐好，因此留低的比例不較匯豐多。

至於其他選股，其實無問題的，都是一些有質素的股票，你持有無問題。至於月供部分，你可以長期進行。

------------------------------------------------

Q22058：

老師 我抽中白居二 但而家二手樓市都好貴

但唔利用今次機會又怕再抽唔到
你覺得其實買公屋（eg 華貴邨）有你升值潛力？

樓齡29年 - 但好似有地鐵2026年華富有地鐵。

另外一係買私樓 要承擔有機會租唔出時 要俾供費 ，心目中係天水圍wetland seasons bay.

主要都想升值 搵到錢 可以財務自由！

你點睇呢兩個選擇，我知都幾大分別.....

龔成老師：

從自住的角度，你好好運用白居二會較好，公屋在投資角度的價值不及私樓，但從自住角度，其實可以考慮，因為你能以較少的現金流支出，解決了自住方面的問題，你就可以有較大的餘下現金流，去進行其他方面的投資。

華貴邨在地點不差的，港島區始終近中環，但地鐵相信有排先起好。因為佢要拆左華富邨，安頓好原本的居民，之後先用地鐵一整發展，相信要10年時間先落成。

華貴邨在公屋裡，算是有質素的，但不是大升類，只是平穩增長。如果你從自住的角度考慮，不是不可。

------------------------------------------------

Q22059：

龔 Sir，現時持有：

1000 股 9988 @$213
4000 股 1928 @$36.9
120,000 股 728 @$2.58
2000 股 941 @$48.7
30,000 股 3033 @$7.9

請問對此組合有何意見?建議加入金股，車股到組合?

現時買 7299 定2840 會較好?

龔成老師：

你現時持有的股票，基本上都是有質素的，其實問題不大，你持有就得，部分股雖然略有回落，但長線有得守的。

但你長遠，最好建立一個更平衡的組合，同一股票，最好佔組合比例15%以下。

你可以加入ＳＰＤＲ金ＥＴＦ（2840），這是一隻追蹤黃金價格的交易所買賣基金，當金價上升，佢都會上升，當金價跌，佢都會跌。

睇翻佢過往的價格表現，基本上都追蹤到黃金的價值，因此都可以成為投資黃金的工具。

只要佔組合比例不過多就得。

------------------------------------------------

Q22060：

想問，其實如果我長揸6666，唔會會可以上番去呢？

好驚佢會爆煲啊，到時渣都冇

龔成老師︰

若母公司出事，的確有機會出現，母公司要沽出恒大物業(6666)股權套現還債的情況。如果真係出現，的確會令股價受壓。

但你要記住，我地投資係睇長線，和企業本質。恒大物業(6666)負債情況，無母企咁差，加上物管行業，預期未來會發展得唔錯，因此有投資價值。

不過，集團大部份物業，都係來自母公司。故母公司出問題，令發展減慢，有機會會影響到集團發展。

當然，這些都是未知之數。以現時狀況計，恒大物業(6666)都有投資價值。如果你真係較擔心佢前景，你可以沽出部份，去平衡風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21861-Q21880）

Q21861：

老師你好，我係一個中小企東主，因疫情生意大跌，現準備申請sme loan，max可以借幾百萬，利息為2.75%，分8年還，頭18個月可以只還利息。

雖然資金可作實體業務發展，但有感現在市道都非常困難，所以想睇下老師有冇咩建議，可以係18個月後還款時己有足夠資金去還款，又或者點樣好好善用這筆貸款好呢？感謝

龔成老師︰

其實一門生意做得好，佢回報長線一定係會跑贏其他資產類別。

而且，通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

你要想清楚，資金借來做咩？怎樣具體進行財富增值？

不要為借而借。

股市，現時只是合理區，明顯未係有個最好時機，若現時用借貸去投資，風險係唔細。

就算你只係投資較穏定的收息股，去賺息差，我地都難保會出現賺息蝕價的情況。因此，你想用這個貸款，去進行賺息差的動作，我就較有保留。

現時疫情依然有一定不確定性，我建議你視乎自身經營情況，去決定借取相對金額的貸款，去過度這個較困難的時期，會較好。

------------------------------------------------

Q21862：

老師你好，之前有問過你問題，多謝你詳細分析，你之前有覆過我部分手持的股票一般質素的如下：

閱文集團中招股價55（已估）
雷蛇20手，平均2.6（已估）
通達集團2手，平價1.7

中國石油4手，平均4.81
中國鐵建5年前入，10手，平均16.2
海通國際4手，平均7.85

剩餘這些是否長痛不如短痛，忍痛估岀，換其他？謝謝

想重新來過，重整理財組合。

我係唔係應該愈早放棄上述d舊乳酪

龔成老師︰

通達集團（0698）、中國石油（0857）、海通國際（0665）、中國鐵建（1186）都是一般質素。

質素不致於話要即刻沽，但始終質素有限，唔建議你持有太多。你最好有反彈時，沽出部份，換至其他優質股會較好。

另外，我見你中鐵建(1186)買入價都幾貴，相信你是熱炒一帶一路時買入。

記住，我地盡可能都要避開一些熱炒話題行業。因為好多時，佢地都會被炒到好貴，就算係有質素，你太貴入，長線回報都會出問題，你要注意這點。

你組合不至於要推倒重來，但部份較一般股票，不宜持有太多，長線會影響你增長力。

中短期，可能你會見因為重整組合，而出現一些帳面虧損。但不要太在意，因為我地投資唔係1,2年，係一個超長線的計劃。

所以，你必須盡快修正好你的組合，重新向正確方向上路。長線回報，一定比你今日的虧損大得多。

記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21863：

成哥 我今年25歲 啱啱接觸股票 現持有1810 25.55 200股 / 6618 130 150股 / 3800 2.72 3000股。 每月收入17000，固定支出10000。 我可以點投資？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於你現時持股，小米(1810)和京東健康（6618）都有質素，你長線持有就可以。

保利協鑫能源(3800)就較為麻煩，佢現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21864：

成哥，我係一個新手，年頭開始follow咗你，亦睇完80後百萬富翁，將會開始睇財務自由行。

了解及入咗1830, 而家已經升咗100%. 多謝你嘅advice & sharing. 請問1830有潛質升值50倍或以上嗎？如果可以好似388咁就當然係最好。謝謝你。

PS. Set咗個目標比自己，希望一兩年內置業及五年內賺三百萬。努力！向目標出發！

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

你本身有貨，就長線持有，但這刻就不要心急加注。

佢會唔會升到50倍，暫時睇佢業務，唔係中短期可以去到50倍的爆升股類型。但此股都有質素和增長潛力，值得你長線持有。

另外，你要記住，好以完美醫療（1830）這類潛力股，增長潛力大，但不確定性都高。如預期一般發展，回報自然好。但不似預期的話，都會出現較大回調，故風險都唔細。

因此，你股票組合中，唔好過份持有潛力股，以免風險過大。我假設你係年青人，最多都係佔組合5成好了。若你投資經驗較淺，更要下調至3成以下，才算穏妥。

而你為自己將來定下目標，係一件好事。但若果你真係有需要1,2年內置業，投資策略就要調整。

因為1,2年唔係一個長時間，有機會出現波動。你用作置業個部份資金，投資時要保守D，以免影響你置業計劃。

------------------------------------------------

Q21865：

龔成 你好 ！
如何發掘有潛力嘅股票？

龔成老師：

買股票就是買企業，潛力股就是有長遠發展力的潛力企業。

要尋找潛力企業，過程比較複雜，而股票班，會教5種選股方法。

簡單來說，你要分析企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。

尋找一些有潛力發展的企業。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的發展、價值等。

------------------------------------------------

Q21866：

龔老師你好！我今年五十六歲，還有四年就退休。早年因要照顧家人沒有什麼儲蓄。

現在只有一層市值$830的出租私樓，仍然欠銀行$330萬，只有十多萬現金。

我現在每月可儲蓄$25,000, 租金收入（如果租客續租-現死約至2023年一月）$17,000。

我退休時應該有$650萬至$700萬Provident Fund。早年的MPF 現在戶口結餘有$41萬。有兩份保險，如果65歲退保應該有$100-120萬。

我退休後仍要照顧有認知障礙的年老母親，現在住公司宿舍，現有的私樓不打算自住，退休時希望買返一間不貴過$1,100萬的較大單位方便照顧母親及有地方安置工人。保守估計退休後每月駛費最少$3萬。

請問以我現時財務狀況，有冇可能60歲後靠現有的資產不再工作。多謝指教，希望早日回覆。

龔成老師：

物業現時的收租減供款，應該有正現金流的，因此這部分短期不用變動，你保持這方面的情況就得。

到2023年租客到期，你就睇自己的情況，可以轉另一私樓，但現時物業賣出後套現，現金約$500萬，與你目標物業$1100萬仍有距離，你要想想，要調整目標，還是動用退休金等。

現時你每月可儲$25000，一年就是$30萬，4年$120萬，就算考慮投資回報，可能滾存至$140萬-$170萬。

如果你每月想有$3萬現金流，假設投資一些5%回報，要穩健、有現金流的工具，你就要有$720萬才做到。

物業套現（$500萬），4年儲（$170萬），退休金（$730萬），保險（$100萬）。合共$1500萬。

但你目標物業為$1100萬，而產生現金流所需資產$720萬。

你到時擁有資產，與所需要的金額，有缺口，所以你要睇下，自己是否要改變目標，又或初期做一些兼職。

------------------------------------------------

Q21867：

龔sir您好：小女最近好迷惘，希望龔sir可以指教一下。現時持有幾隻股票都係坐艇當中，都唔係幾好意思講出黎，驚比人笑我買埋d垃圾股。

493國美零售，$2.43買入，現價$1.28
1499歐科雲鏈，$0.6買入，現價$0.39
769中國稀土，$1.3買入，現價$0.93
9988阿里巴巴，$256買入，現價$207
1211比亞迪，$185買入，現價$177.1

全部夾埋成本用了$55萬左右，現蝕$13萬，人生第一次投資股票，由2月份起左右買入，雖然一日未沽都仲未算輸，但坐艇坐到好心痛。

本人今年33歲，澳門人，月薪$4萬，唔計股票，可流動資金有百零萬存款，唔需要供物業，比$1萬家用屋企人，扣除所有開支一個月可以儲$15000。

之前一直好大洗無限制特定自己儲錢，洗剩幾多就儲幾多，今年想換樓但無本事先驚覺自己浪費左好多光陰。依家最大夢想係換新樓，好想改善居住環境。

希望龔sir可以指教一下我應該點分配投資好，好希望可以改善居住環境。

呢排因為呢d事情緒都好低落，求龔sir指教，感激！

龔成老師︰

投資失利，係每個投資人，都會必經的階段。最重要係，你有無從中學習到一些有用經驗，去提升自己將來的勝算。

首先，我想你明白2個正確的投資觀念。

我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，唔好抱住唔放就無蝕架心態，咁係好危險。我相信你架想法係，我唔放住，總有一日會返回家鄉。但我話你知，唔係一定的。

因為若然你抱住架係一隻垃圾股，佢只會一路跌，唔會再升翻上去。反而你決斷些，盡快垃圾股清走，換成優質股，長線才會有反敗為勝的機會。

你現時持股中，國美零售(0493)和中國稀土(0769)質素較弱，長線換至其他優質股會較好。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

阿里巴巴(9988)和比亞迪(1211)有質素，你長線持有就可以了。

你現時33歲，可以投資「平穩增值股」+「潛力股」這類有增長力的股票，為置業累積本錢。你可以先用每月儲倒的一半資金投資，另一半就先儲起。

平穩增值股：盈富(2800)、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

潛力股：安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注(不多於3成)。

此期間，你要努力提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21868：

HELLO老師，剛讀完股票勝經，對股票開始有少少少許認識，所以我想為自己重新訂立一個投資組合去增值自己的財富，希望能聽取你的意見。

我29歲，可月儲大約$6000現金，現有以下資產：

1. 約12萬股票(買入時12萬, 現應沒有)
-高鑫零售(6808) 1000股 $9.95入
-阿里巴巴(9988) 200股 $264入
-心通醫療(2160) 1000股 $17入
-快手(1024) 100股 $397.4入

2. 儲蓄保險, 月儲$1500, 已儲7年, 3年後供完, 如果唔拎, 55歲有74萬

3. 上年買入445萬的物業, 供30年, 現負債345萬, 資產我佔一半 (用來投資, 不打算自住)

4. 現金$24000

因那4隻股票我都係無分析企業底下買的, 所以我好希望重新審視自己的投資組合, 我睇完股票勝經後, 我利用書中的股票篩選3步曲的第一步:

初步分析財務指標, 想初步嘗試睇睇自己持有的股票需唔需要止蝕, 見到心通醫療(2160), 快手(1024), 中芯國際(0981)數據都麻麻(我唔知有無計錯呢), 請問老師對呢幾隻股有甚麼意見嗎?

我知道投資最好投上市最少兩年的企業會較好, 但因當初就是犯了全世界都熱炒新股所以我又跟住去買的錯, 令當時高位買入了價值不高的企業…

我想能放60%在水桶1, 40%在水桶2(月供), 先增值後現金流, 但現在看來太大比重在那堆潛力股

如現所持有的股票可先繼續持有, 我再額外月供$3000於水桶2對整體會有幫助嗎? 但又怕可能2,3年內需要結婚、搬出來住等會需要現金。

先謝謝老師抽空解答

龔成老師︰

篩選3步曲的第一步，只係方便較初階投資者，從數千隻股票中，選取一些較有研究價值的股票，再進行分析。

但這個方法唔係完美，有機會部份優質股被篩走，但作為初級投資者，這個方法算係較有效率和準備性較高。

而且，這個只係第一步，就算當中數字不太理想，都唔代表佢無投資價值。你要再完成後2步，才會有個較完整的結果。

你現時持有的4隻股票，都係有質素，可長線持有。但微創心通醫療科技（2160）現時未有盈利，故不確定性較高，暫時唔好再加注。

另外，我地投資時，的確要盡量避開熱炒行業。因為佢地股價好多少被炒高，變相影響了你長線回報。

而且上不足2年的企業，由於數據不多，我地好難去判斷去佢的質素，所以要保守少少。唔係唔投資得，但要控制注碼，去平衡這個不確定性的風險。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

"保險"只係理財中防守部份，買足夠保障就可以，增值可以留比優質資產(如優質股、物業等)去做。你現時份保單，仲有3年就供完，我建議你供埋佢。

但未來時間，你資金集中翻利用優質股去做增值，長線效果一定較好。

你29歲，應以增值為主，建議你用「平穏增長股」 + 「潛力股」作組合，去創造一個增值平台。現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

以你年紀，用60%在水桶1, 40%在水桶2，係可以。

但由於你投資知識不高，水桶1只宜小小注(不多於3成)。最好是你先提高投資知識，等到你有一定知識和經驗，才慢慢增加大水桶1比例(大約5-6成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

但若然你2,3年內，會有一些較重大實際開支要用，投資時可能要保守少少，水桶1比例要再下調多D。所以，你先計劃好自己未來人生規劃，才諗點去投資。

------------------------------------------------

Q21869：

老師請問時代天使質素可以嗎？老師唔好意思，最近有朋友推介左美股俾我，想問下你覺得以下股票的質素和現價合理嗎？

ATHM 汽車之家
MTLS materialise
CQQQ 中國科技指數ETF

感激你的回覆

龔成老師︰

時代天使科技（6699）有質素，長遠仍有發展力。

佢係中國的隱形矯治解決方案提供商。根據報告，市場份額4成。

這企業透過時代天使隱形矯治系統在整個隱形矯治過程中助力牙科醫生，其由關聯的三部分組成：數字化輔助案例評估支持及矯治方案設計服務；隱形矯治器指用於治療錯頜畸形的可移動、透明塑料材質牙套；雲服務平台iOrtho使牙科醫生可在整個治療過程中進行下達訂單。

佢目前銷售四種隱形矯治器，包括時代天使標準版、時代天使冠軍版、時代天使兒童版以及COMFOS。作為隱形矯治系統的核心，集團自研技術及數據平台，即masterForce、masterControl及masterEngine。

佢通過持有第二類醫療器械經營備案憑證的全資附屬公司向醫院及牙科診所直接銷售大部分服務及產品。客戶包括公立醫院、私營牙科診所及分銷商。

企業發展正面，過往的生意及盈利都有理想增長，不過，現時估值都唔平，要注意如果市場估值出現修正，股價可以出現下跌。

整體來說，企業發展正面，但現價就唔平，投資值博率只是中等。

ATHM 汽車之家、Materialise NV(MTLS)、CQQQ中國科技指數ETF，都有投資價值。

但CQQQ係潛力股類，波動性會較大，不宜持有過多。這些股票，現價合理中上，用分注或月供儲貨，會較理想。

------------------------------------------------

Q21870：

龔成老師你好，有以下問題想請教：本人現年46歲，現職公務員，月薪11萬。每月支出13000元，另外支付7000元作母親生活費。扣除薪俸稅，每個月約儲蓄約8萬元。

本人未婚，有自住物業，不用供款，樓價約750萬。

現金方面 [總額約77萬]：港幤35萬 (本地)，新加坡元7萬 (外地)

投資方面 [總額約126萬]：0008電盈 (60000股)、0405越秀房產 (78,000股)、0778 置富產業信託 (20000股)、0941中移動 (4,000股)、1398工商銀行 (15000股)、2638港燈 (30,000股)

強積金：目前267萬

保險 (已供完)：儲蓄壽險一份(110萬)現值42萬；儲蓄保險四份(＠15萬)＠現值10萬；危疾儲蓄 (24萬)現值4萬

自兩年前供完樓後，本人一直專心儲錢，想盡早達至財務自由、及退休。

本人現時的投資方面，盼望能給予意見。

期待回覆。

龔成老師︰

你現時成個財富組合中，已經有物業類，而且相較其他資產，都佔較大比重。因此，新資金我地會先集中翻係股票類，令財富組合較平衡。

持有的外幣，除非有實際用途，否則應轉回港紙好做增值。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，儲蓄保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想，你要自己平衡下。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你46歲，應以增值為主，建議你用「平穏增長股」 + 「潛力股」作組合，當中以作「平穏增長股」主力，去創造一個增值平台，為退休作準備。

你現時持股，都有質素。但問題是全部都是「收息股」。佢地主要係收下息，增長力好弱，不宜持有太多。以你年紀，最多佔股票組合2成好了(若你較保守，比重高D都可以﹐但成個組合增長力會慢左。)。

其餘收息股，建議你慢慢換碼至以下股票，去提升翻個組合的增長力。

現在你每月先用5成儲蓄，即$40,000做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合1-2成左右。若你係有一定經驗，你可以投資到約4成比重。

至於77萬現金和餘下的一半的儲蓄，我地就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

到你累積到一定資產，足夠你財務自由。你就可以將佢地，慢慢換成收息資產，去創造現金流，支援退休生活。

------------------------------------------------

Q21871：

龔成老師，首先要多謝你! 之前上完你的堂，獲益良多，明白投資唔可以過份集中，要平衡。

手上有新舊經濟股，即使新經濟股呢家回落返較合理水平，而舊經濟股又慢慢回升，所以整體回報吾會大上大落，甚至期待股價會再一步回落入貨.

近期檢視組合，發現地產股 (12，66，823)佔了整個組合約35%。 想問這3只股票之中，哪兩只較有潛力/值博率，因為現有的股票數目有些多。謝!

龔成老師︰

你現時想法正確，成個財富增值策略，最重要係「平衡性」。我地投資，其實係一個財富配置的動作。

你要去建立一個風險不高，適合自己年紀，長線又有增長力的財富組合。

現時你地產類佔35%，雖然超過我經常講的行業不要多於30%標準。但由於唔係超好多，而且港鐵(0066)只算係半隻地產股，故比重尚算可以，唔沽出都得。

至於潛力和質素，港鐵(0066)會較高。若計現價值博率，則是恒基地產(0012)較高。

------------------------------------------------

Q21872：

你好，我也是80后，单亲妈妈，有现金港币150万，股票

0788铁塔50000*1.1
6618京健1200*170/500*112
1810小2000*17./3000*29
1177中生5000*8.8
3067etf5000*16.7

现金人民币80万，合伙生意每个月分红港币3-6万，物业按揭贷款200万，每月供8000至8800，收租13000，自己租房8300，每月另开支3万。

因家庭原因2年内只有分红和房租收入且支出很多，2023年以后收入会多支出会减少。看了您的书后，我计划从6月开始月供，请问，2万至3.5万区间，取什么数合理？

0388 3000
0700 2000
1177. 3000
1211. 2000
1810. 3000
0027. 5000
2800. 5000

因我想带小朋友一起去上您的课。8月基础课还没有报名。万分感激。

每个月除了8千房租外，还需开支3万以上

这几年我一直只会用50万来炒股，所以上次请教您的时候说06618是半仓

龔成老師︰

若你每月能儲的資金較波動，你可以用一年平均數，去作為指標。

由於你未來2年，收支上會比較緊張，我建議你先預留最少半年開支，才開始投資計劃。月供部份﹐頭2年你都預一個較輕鬆的金額，會比較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供，其餘先儲起，用一邊月供一邊儲蓄的策略。

你現時選股都可以，但潛力股(0388, 0700, 1177, 1211, 1810)佔比太高，以你年紀最多佔4-5成好了。若你投資經驗較少，要再向下調整。

你可以將潛力股預算，加入盈富(2800)和銀娛(0027)，或者以下平穏增長股都可以。

現時大市只在合理區，現金佔組合大約3-5成就可以。當你扣除應急資金後，現金水平高於3-5成，你可以用分注模式買貨。

但你現時持貨，完全集中晒係潛力股。因此，這筆現時直接入貨的資金，應優先集中係平穏增長股，去平衡翻個風險會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

緊記，我地投資股票，係希望買入一些優質企業，透過佢自然增長，達至財富增值目的。絕對唔係"短炒"，一定係要用長線投資策略，才會有理想效果。

------------------------------------------------

Q21873：

老師 唔好意思呀我靜靜咁睇左你個page好耐 想投資但又唔敢亂咁入市

覺得1211，0285，2382，1810仲有排升 全部都想長線持有。但唔知幾時先入場好 有冇咩建議價位可以俾我做參考

龔成老師︰

你上述股票，都係有質素的潛力股，有長線投資價值。

但現時股價計，全部都唔平。比亞迪(1211)預佢回到$135才算開始合理翻少少，才可小注。

如果月供，最好回少少先開始，或者你小小注月供，就可考慮。

比亞迪電子(0285)、小米(1810)、舜宇光學科技（2382）全部都係略貴，要回多1,2成，才好開始分注入市。

但這3隻若你係諗住月供儲貨，現價開始係無問題。

由於「潛力股」係波動性較高股票，只適合年青至中年人士。而且，投資潛力股係需要一定經驗，如果你經驗較淺，可以先小注，大約佔組合3成左右。

若你係有一定經驗，你可以投資到約5成比重。

------------------------------------------------

Q21874：

老師,我們有選擇困難症,想問你月供股票的意見, 暫時每個月想供2萬, 年齡45至50歲, 希望平穩中，也能有理想的回報。

1. 3 - $3000
2. 12 or 16 better? - $2500
3. 66 $3000
4. 823 $2500
5. 2388 or 2318 better?$2000
6. 2800 $3000
7. 3067 $2000
8. 1177 or 2845 better?$2000

盼望老師能夠給我們意見(以上 第2，5，8点)， 整個月供組合可以嗎？

感激萬分

龔成老師︰

整體而言，你組合係可以。

但有一個較大問題，就係不少股票，都係跟地產相關，好似0012/0016、0823。另外，港鐵(0066)我地會當佢係半隻地產股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

我建議你，將部份地產相關股份的月供預算，轉換至盈富(2800)，對你成個組合的平衡性，都會有利。

至於恆地(0012)定新地(0016)，前者係手持農地是全港最多的發展商，長遠發展潛力較高，但風險都會大少少。而新地，則預佢係較平穏發展。

中銀香港(2388)和平保(2318)，2隻都係有質素，前者係銀行業，後者係主力做保險。中銀行性質上，會令佢風險高少少。但整體而言，2隻都有質素，你可以睇翻自己較睇好邊個行業。

中生(1177)和GX中國電車（2845），前者係醫藥股，長線人口老性，加上人均收入上升，都對緊藥需求有增無減。

而2845這基金的，目標是追蹤Solactive中國電動車指數NTR「相關指數」表現緊密相關的投資回報。

如果你睇好電動車發展，可以月供2845。而且佢係一籃子的企業，相比1177，更有分散風險能力。

以上選項，如果你都係唔知點分好，最簡單就係將預算拆一半，2隻都供晒就可以。

最後提提你，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21875：

龔成老師你好，我25歲, 剛工作2-3年，上年開始買d股票，現有組合如下：

(股票) 名稱 股 平均買入股價
0011 恒生 400 126
0005 匯豐 1200 34.8
1810 小米 1000 27.5
9618 京東 100 286.6
9988 阿里 300 255
6600 賽生藥業 500 18.8
0823 領展 (每月買$4,000, 由上年$65開始買起)

平時亦有短炒 3690, 1024 等科技股 和 0883 中海油

(1) 以上股票是優質股嘛? 請問 9988 , 6600 (我係抽新股抽中的) 有無長楂必要?

(2) 我覺得我組合較多銀行股同新興科技股，但對其他行業認識不足，請問如果想長期穩健股的話，有甚麼選擇?

(3) 如果想60歲退休時左右每個月有$30,000-40,000收息, 到時股票投資額應有多少? 現有組合/只買股票可以嘛?

謝謝

龔成老師︰

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

1) 只要係有質素，而又適合你年紀的股票，我地都會長線持有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你還很年青，才25歲，應先做好財富累積部份，故投資時應集中係有增長力的優質股身上。

阿里巴巴(9988)和賽生藥業（6600）都有質素和增長潛力，故你長線持有就可以。

但賽生藥業(6600)業務始終波動，不宜持有太多。

2) 恆生(0011)和匯控(0005)雖然都有質素，但只係收息股類，增長力不高。以你年紀，不宜持有太多，建議你將部份換至其他增長股，會較好。

而中海油(0883)只係商品類股票，對產品定價能力較弱，質素只係中等，不宜持有太多。其餘股票，都係適合你長線持有。

未來時間，你可以集中係「平穏增長股」 + 「潛力股」。

但由於潛力股會較波動，若你想投資長期穩健的股票，可以較集中係「平穏增長股」類。若你對以上股票或行業不太認識，你集中係盈富(2800)就可以。

同時間，我建議你用月供模式，去儲貨。因為初學者對企業估值，點去定平貴，未必會太了解。你先利用月供模式，去做增值，可以減低買貴貨風險，對你而言會較理想。

你每月先用5成儲蓄做月供。其餘先儲起，用一邊月供一邊儲蓄的策略。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

3) 如果你希望退休後每月有4萬蚊現金流，以股息率6%計，你需要本金800萬。

所以，你現時要努力累積這筆資金，為退休做準備。但我地投資時，唔會只集中係優質股，我地要講求成個財富組合平衡性，當中要包括不同資產類，好似股票、物業、車位等等。

但由於股票投資金額係較少，所以你初期可先用這個途徑開始。到有一定資金，才加入物業類，咁就可以。

我假設投資回報有10%（連股息再投資），你每月投資$5000，到退休時已可以增值至800萬以上，達至你的退休目標。

但你還很年青，我建議你盡量每月用一半人工，去做投資增值。好好把握年青優勢，令複息回報效果發揮到最大。

------------------------------------------------

Q21876：

龔sir:本人月收入九萬，妻子無收入，家庭支出六萬,可儲約三萬，現金120萬

物業
一居屋自住（未補地價）值七百萬 （已供完）
一外國物業值一百八十萬（未完成按偈一百三十萬）待出租

港股股票 約33萬

881 中升控股 881 一手共三萬
700 騰訊 一手共六萬
1801 信達生物共五萬
066 MTR 共四萬
1883 中信國際電訊共四萬
3067 科指ETF共三萬
3187三星房託共三萬

669 創科共三萬（月供三千）
2800盈富共一萬 (月供一千）
1299友邦共一萬(月供一千）
9988阿里爸爸共一萬（月供三千）

美股股票 +基金 （約十四萬）

TSM台積電 一萬
AAPL蘋果 兩萬
COIN Coinbase 一萬
貴金屬ETF 三萬
白銀ETF 三萬
基金四萬

澳洲基金（十二萬）

Bitcoin 兩萬

請問

1.你認為我持有的投資/股票組合需要改善嗎，例如友邦，創科好似已經pe 好高/好貴，另外每隻股票的質素也希望老師給點意見

2.需要再加多潛力股/平穩增長股嗎？

3.如希望每月有五萬現金流收入讓自己財務自由，應該作出怎樣調整/部署？

唔記得咗講我今年35歲，希望50歲前完成目標

龔成老師︰

1) 你現時持有股票，都係有質素。創科(0669)係貴，而友邦(1299)算係合理區中上部。

現價雖然唔平，但未到好貴。故現貨可持有，你照維持月供都無問題。

2) 你現時股票，都係有增長力。但不論月供，還是現有持貨，都係比較偏重左係潛力股(0881, 0700, 1801, 3067, 0669, 9988, TSM, AAPL, COIN)。

佢地雖然有增長潛力，同時風險都較高，不宜持有過多。

以你35歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，貴金屬、白銀這類資產，唔會創造現金流，唔建議持有太多。我地一般只會持有黃金或者白銀，去對沖一些突發性金融事件，大約佔組合3%左右，其實已經可以，最好以實貨持有。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

而虛擬貨幣，我不是這方面的專家，所以我無太多意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

如果你分析到佢長遠的交易大，大家都持續關注，就有價值，就值得你投資。但畢竟佢波動性都好大，就算投資，也不宜佔組合太多。

3) 如果你希望15年後每月有5萬蚊現金流，以股息率6%計，你需要本金1000萬。

現時大市在合理區，你建議你每月用儲蓄一半，即$15000做月供。其餘先儲起，用一邊月供一邊儲蓄的策略。

而現有120萬資金可以再投入多30-50萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產180萬(所有股票、貴金屬、白銀、基金和比特幣)，15年後大約會增值至1800萬，故這樣安排相信很大機會達至你的財務目標。

------------------------------------------------

Q21877：

龔老師您好，麻煩你給我意見，現有股票組合都是高價買入，請問那些應該繼續守 那些應該止蝕離場還是溝貨？什麼價位放或溝貨？

00700@$660
01024@$357.3
[email protected]
03690@$433.8
09618@$395.23

現金流有7萬

萬分感激

龔成老師︰

首先，你唔好將個重點，放錯係買入價個度。我地持有一隻股票與否，關鍵位是企業質素、前景，不要被買入價影響。

買入價只是一個心理因素，如果企業核心因素未被影響，我地係唔需要理會。現時你持有股票，都係有質素，有長線投資價值。

至於溝貨，我就唔建議，因為這幾隻股票，現價都只算係合理區頂。而且當中藥明生物(2269)、美團(3690)本身不確定性都較高，只宜小注。

另外，你現時持股全部都係潛力股，佢地雖然有增長潛力，同時風險都較高，不宜持有過多。

就算你年青，潛力股可最多只宜佔組合約5成，餘下應用平穏增長股作組合。若你投資經驗較淺，潛力股比重，要再調至3成以下。到你學到一定投資知識，才慢慢調高。

如果你係近退休之齡，你些潛力股，是不適合你的。

未來時間，你就要加大翻平穏增長股部份，令組合更平衡。

現時大市只在合理區，現有7萬你可以先儲起，等大跌市才出手。

------------------------------------------------

Q21878：

收到 我有買阿sir啲書嚟睇啊
股票班要等我儲到錢先

啊Sir 睇唔睇好京東健康

龔成老師︰

好，在上股票班前，都要努力學習。

你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂掌握，會有幫助。

京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

------------------------------------------------

Q21879：

潛力股都係可以持期持有？定係升到某個價位要放？我只有一手小米。

因為我岩岩先睇完大富翁，準備購入你其他書本

龔成老師︰

你現時手上只有小米(1810)，而且只有1手，你照長線持有就可以。

至於沽貨，我不會有明確的目標價。

我賣出基於下列幾個原因：由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。

此外，股價要是嚴重高估，例如市況狂熱，又或自身的原因令股價爆升，都有可能沽出。

若然你無法掌握到我上述所講的，可簡單用「升一倍、放一半」的原則，沽出後等同收回成本，餘下的貨就不用再理會，長期或永遠持有，因為這部分已經是淨賺。

當然，你小米(1810)只有1手，就用不上「升一倍、放一半」這個策略，所以你長線持有就可以。

如果你本身對投資認識不多，你可以先睇我寫架"80後百萬富翁"、"財務自由行"和"股票勝經"，會較為適合初學者。

------------------------------------------------

Q21880：

老師，我在考慮一個問題 就係假設我用300萬買左個車位放租，月租3000蚊 。一年3萬6。回報得1.2%，另外要租83年先回本。這樣的投資還算可行嗎

龔成老師︰

過往年代，車位一般都去到6%-8%的租金回報，但近年市場資金不斷追資產，連車位都不平。

近年「車位」價格近年雖然已回落不少，但整體上，只係合理區頂部。

若以你例子計，只有1.2%租金回報率，其實係不太理想。不單升值空間細，就連基本租金回報都不合格，唔係一個理想的投資目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。