［匯豐強勢，小小啟示］2021有息派，咪好咯。根本最初就無辜之極，畀英國政府夾硬屈。但，之後又點？

1. 前作（睇最好，唔睇都不影響本文）領展70蚊，小小啟示　（https://fbook.cc/3JCl）。同系列仲有「中概股冇事，小小啟示．迪士尼歷史新高，小小啟示．銀行年尾減按揭息，小小啟示．」， Patreon已寫（https://bityl.co/4Y0h），請訂。或者睇完呢個Post覺得精彩再訂都得。

2. 久休復出，呢篇有啲火。寫文有火係好重要的，冇火嘅應該收檔，唔好呃飯食—雖然我冇收你地錢。咁唔收錢都咁有火，Patreon就仲有火！月頭支持下出火啦（https://bityl.co/4Y0h）

TLDR：2022年5厘息，很好。但2023年呢？會唔會都係買4厘息嘅領展好啲？當然啦，都係睇價。唔買股票嘅人其中一個最大嘅盲點。故事好多人識講，但再好嘅公司都有個價，再垃圾嘅公司都有個假。呢下先最難判斷嘛。你知人地未來十年搵幾多錢，都未必判斷到個股價之後會點的。

3. 匯控近嚟走勢唔錯，上到3個月新高，44蚊了。短答案，當然都係唔應該買。但仲想探討幾樣嘢。首先留意，近期係強，但年頭都仲60蚊，都仲係跌咗三份一。

4. 至於低位？穿過30蚊添，咁有咩人低位撈？多數都唔係你。低位買嗰個叫做平保。服未？3億買落去。錢多咪自然心安，幾時都係財不入急門，你拎啲救命錢去賭，必然輸死。

5. 另外，的確嗰時係全城皆死心，一沉百踩（其實4月已踩咗好多腳）。咁亦都真係有人話，喂，嗰時已經極悲觀啦。事實見到果然如此。都係老教訓，別人恐懼時我貪婪。不過，亦係成日重覆嗰句，當局者迷啦。你而家睇返當然容易，但當時好難去睇到幾時先係「最恐懼」。你代入下，你係個有1000萬身家買晒匯控收息退休嘅老嘢，4月息都唔派，股價仲係咁插 — 而你仲有500萬，你真係仲會買落去？

6. 講返近期，咁呢排升乜？正如寫領展時都討論過，講舊年嗰啲咩9厘息，算吧啦，意義近乎零。講咗N咁多次，「股票係炒將來」，你舊年派幾多厘息，關我乜事？又唔係我有份。好少少嘅你至少應該睇Bloomberg之類嘅2020派息，但更正路應該睇2021 2022，因為，老細，而家都2020年12月啦。投資者會睇幾遠，呢啲真係冇得量化，但very rough rule of thumb，大半年至一兩年都還好。

7. 咁但，當然，係有傳英國（同歐洲）會容許返銀行派息，咁當然會幫到公司，但，傳都傳咗好耐，乜都反映晒。話說回頭，由頭到尾我都覺得係一場鬧劇。你有啲英國銀行，金融海嘯幾乎沒頂，要政府打救。咁拎得政府錢當然有代價，你成為半間國企，總不能亂咁派息益啲Fat Cat．問題係，大佬，匯控08年根本冇問政府拎錢！供股嘛。但今次危機政府一樣管你，「喂我唔使要你啲錢，上次都冇拎到」「到時你就會話要架啦」。

8. （最新你見到超市Sainsbury 回返水畀政府，就係唔想阻撚住派息派花紅。當然香港就有大快活拎咗補就業照派息，又冇話唔得，補就業畀你出糧嘛，咁有出糧咪得）

9. 而另一方面，官嘅嘢，梗係最緊要唔好爆鑊。唔派息，你啲股東咪嘈咯，嘈嘈嘈嘈飽佢，吹得我脹？而我冇見嗰班鬧匯控嘅人去英倫銀行度嘈。事實而家見到，監管當局係過慮，銀行嘅情況遠比佢地想像中好—但，再講一次，官嘅嘢，話知你啦。畀你派息又唔係佢有份，但出咗事佢要孭鑊嘛

10. 但講返股價，都係唔好有乜期望。係呀，會派返息，但派幾多先得？寫文時唔在公司，但睇返大行高盛報告（大約都有個譜）（https://bityl.co/4hwI）—2020年就雞碎咁多啦。但2021就 3毫美金，2022就 4毫美金。即係2021就5厘息，2022就7厘息左右，還好啦

11. 之但係又，以上，係高盛估計啫。而高盛係比較進取嘅（唔進取點justify 51蚊目標價？）（＊）。2021 2022 佢估 3毫同4毫美金派息，街（大圍嘅consensus）就估2毫半同3毫咋（如圖）。如果用大圍（沙田嘅未知）嘅數，就即係2021 就4.5厘，2022先5厘—又唔係好吸引咋

12. 因為仲有一樣嘢，樓上講嗰啲派息—派到先係。銀行始終唔同領展咁，2022咩世界，邊個知？就算2022年得，2023呢？唔係玩嘢，而係真係得罪講句，「好撚多人呢，唔識就咪撚講啦」。唔係咩好火箭科學，你考CFA Level 1都要學，大學讀Finance 101 都一定學，discounted cashflow．你老味你收息收一年架？收兩年？收三年？你計條式係將未來咁多年嘅嘢discount 返晒嘛，直到無限—因為企業可以永生，永生過羅永生（又，唔係有人以為加到無限結果都係無限架可？邊個教你數學？我啲學生一定唔會咁。香港地STEM嘅嘢）。

13. 你要嘅，今年派10厘息都得架，咪預支蜜月畀你（＊＊），之後冇得派咁解之嘛。成個諗法都唔make sense：你買落間公司，梗係覺得啲錢在佢度好過在你自己度啦。否則點解你唔自己炒股票？聽講呢排個個都一個星期執幾成喎。

14. 而N咁多人，都係唔知公司係可以忽然唔派息嘅。4月咪領教過咯，宣佈咗都可以收返，除埋息亦唔會加返畀你（＊＊＊）。由始到撚都合法，亦一路公司做，只係之前啲公司冇咁大冇咁多人受害。嗰班話去法庭投訴去證監告嘅，你見有冇have a case？當然而家股價彈返上嚟咪唔嘈。升上返200蚊錫晒你添。

15. 然後你睇下，領展連今年咁嘅情況都唔使減租 仲似乎唔使減派息，應該真係要核戰或者外星人侵略地球領展先要減租減派息。

16. 事實係，領展上市咁耐（當然都唔係好耐，未夠20年），從來冇減過派息。未必去得到美股講Dividend Aristocrat 嗰種水平（有啲要睇廿年甚至廿五年），但，呢15年間，匯控已經兩次reset派息啦（如圖），仲要供股添。

17. 而舊文都寫過（https://fbook.cc/3JCl），領展呢種穩定性，十分值錢。牙醫同你自己炒股嘅分別，牙醫今日搵80萬，你炒股搵100萬—但佢都係有錢過你（除非你係1億本搵100萬嗰種）。背後嘅alternative path唔同，佢再衰都有幾皮嘢個月，你炒股嘅，倒輸都仲得。

18. 反轉頭講，你見咁多人「靠匯控收息退休」，咪知道呢種「穩定提供派息」嘅嘢係好有市場—只係你嘅期望錯咗啫。呢個年代，冇得穩穩陣陣8厘息架小朋友，怪邊個？美國聯儲局啦，歐州央行啦，英倫銀行啦，日本央行啦，人民銀行啦。其實人類好似幾百年歷史都係玩印銀紙，你有冇見有得收返？你有邊樣嘢會平過五十年前？有嘅，去日本咯，同埋電視機之類（＊＊＊＊）。只係近十幾年更加肆供忌憚咁解。Another Story．

19. 仲有最後一樣，近期銀行股強勢（國際同香港，中資另一回事），亦都同美國長債債息反彈不少有關。銀行就係借短錢放長錢嘅一個遊戲，長債債息升，對銀行息差係好事。

20. 咁做乜長債債息彈？又有人話係因為通脹預期，如是我聞。「不過債息高唔係應該不利股市？」「earnings yield gap嘛」。係就係，但又係嗰句，真實世界唔係科學實驗咁，唔係債息忽然抽上嚟，股市即插—正如之前都唔係債息一跌股價就升。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
（＊）大行報告往往要寫sort of「how we different from consensus」嘅東西，因為要同客交代，「做乜要睇你」。但實情多數係浪費時間，self defeating，好似匯控呢啲，閒閒地五六十個分析員寫，點樣人人都唔同？人人都contrarian，咪人人都唔係contrarian 咯。最後根本大家個consensus都係稻草人。你又話街度個個睇淡我地睇好，佢又話出面間間睇淡我地睇好，事實係人人都睇好。哲學呀。

（＊＊）預支蜜月呢個term幾耐冇聽人講過？證明而家婚前性行為係default，甚至拖前性行為都係default。世界係進步嘅（＊＊＊＊＊）

（＊＊＊）而我到而家都唔明點解有人覺得除咗淨要畀返佢。全世界都唔會咁做。而講嘅十個有十個都唔知咩係除淨。

（＊＊＊＊）呢個亦係量度通脹嘅一大問題，係呀，而家啲電視機平過當年，even in nominal terms．正如你而家啲電話咁撚勁，都係賣幾千蚊，config勁過晒幾十年前嘅　電腦　電話　相機加埋喎，仲要平一大截。不過人類係進步嘛，而家仲叫你睇大牛龜電視用大哥大咩。所以官方「通脹」啲嘢唔好太過走火入魔。

（＊＊＊＊＊）問題永遠係，後生仔就有時間有體力但冇錢溝唔到女，出嚟做嘢就有體力有錢冇時間溝唔到女，到老嘢就有時間有錢但冇體力溝到女都冇用。解決方法？偉哥。所以點解輝瑞股價升極都有（＊＊＊＊＊＊），「你估真係靠疫苗」。或者，做富二代。亦證明偉哥幾咁偉大—佢幫你補返做唔到富二代嘅不幸。

（＊＊＊＊＊＊）任何人同我講　有志者鄧竟成　或者　when there is a will there is a way嘅，我都係傳返輝瑞嘅股價圖畀佢—如果你講嘅嘢成立，人地應該執咗笠。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）

【龔成問答信箱】（Q13261-Q13280）

Q13261：

成哥你教得好好，我明白好多之前唔明的野，我而家想請教下：

1. 你中提到如果幾年來毛利率下降，只有兩個原因，其中原因是減價促銷，可否用以下數學公式的分子和分母增減去解釋毛利率為何下降？

毛利率＝(收入—直接成本)÷收入

2. 這直接成本是否只包括已賣出貨品的成本？

3. 你怎樣分辨毛利率下降是因減價促銷或貨品成本上升所致？

龔成老師：

1）你這條公式，正正是毛利率的公式，當直接成本增加時，毛利率就會下跌。又或當直接成本增加時，而銷售價格無法作出相應的增加，都會令到毛利率下跌，反映企業的賺錢能力正在減少。

2）每個行業的直接成本，定義都有所不同，但都是指最直接的成本部分。最簡單的理解就是零售業，貨物的來貨成本就是直接成本。

3）要分析當時的大環境，有無加價的情況，當時經營環境如何，對手是否處於減價的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13262：

老師，我在10年前買了XX的月供基金，每月供2千，之前因agent建議，轉過兩三次投資組合，所以10年後，無升到。

依家仲蝕緊幾千蚊，依家最新的投資組合是7成供中國基金，3成系Healthcare基金。

由於供左10年，就算surrender都唔洗罰錢，戶口現時有197K左右。想請問我是否應該繼續供落去。我其實還有一份儲蓄保險，每月供$2000, 但要到56歳先可以攞番D錢。

我會參考老師的的建議，下個月開始月供股票，打算$3000 (2800) 及 $2000 (1211)。其實已經41歲，應唔應該供1211定系選港鐵或其他股呢？
謝謝老師﹗

龔成老師︰

保險公司的基金，有好有壞，我好難評論，但當中的潛在費用，往往不少，反而簡單的投資在指數基金，例如盈富基金(2800)，長期回報往往更多，而且管理費好少(0.1%左右)。

你再了解下，你所投資的基金，當中的投資策略，以及投資在甚麼類別的項目中，分析是否有長線投資價值，然後才決定是否停供。

至於儲蓄保險不要動了，每人都有基本保障需要，只要唔係過多就無問題。

以你年紀，尚有增長力，所以你月供安排無問題。但如果你將來想加大供款，建議集中番係平穏增長股，如盈富（2800）、金沙（1928）、港鐵（0066）、中銀（2388）、恆基（0012）會較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13263：

百威亞大應該增有 我現時有60手 27.7 買
還是走？

這股是否優質？及有前景？
因我看他是啤酒界的一哥

龔成老師︰

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。

簡單來說，這股質素是有的，但估值方面較難，股價因此會波動，因此佔比方面要注意。

所以，此刻只建議持有小注，同時你要明白當中的風險。如果60手佔你總資金比例不輕，你最好賣出部份。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13264：

你好龔成老師，我有廿十萬股票分別是
1398，5000股，買入價6.64
0005，400股，買入價68
0388，200股，買入價296
0788，8000股，買入價2.14
0700，100股，買入價460
0966，1000股，買入價21.1
1368，5000股，買入價4.69

現多突然多了一筆資金大約三十萬，以及有大約三十五両實體黃金在保險箱，我應該怎樣去增加自己既財富？請指教
謝謝

龔成老師︰

你現時持有股票都有質素，但問題是各類別的股票都有。平穏增值股︰388、700、788、966、1368 / 收息類︰5、1398。

我地投資增值係會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你新增的30萬可以因應你現時年紀，投資以下股票，同時對你現有組合作出調整︰

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、長建（1038）、粵海（0270）
潛力股︰比亞迪（1211）、中生（1177）或福壽園（1448）
收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

至於黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，因此，黃金不會成為我地財富組合中，佔比太多的部分（約3%）。所以，你可以將部份黃金變現，再去投資股票，長遠效果會更好。

由於現時大市只在合理區，你資金可以先投入一半。餘下一半待大市出現一定程度的下跌，才大力度掃貨，然後長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13265：

成哥你好！我2017年尾開始投資股票，由於冇系統性學習過股票知識，亦冇睇過任何股票書，而且當時股巿又處於熱炒時期，我自己抱住人買我唔買會虧嘅心態去踏入股巿。

經過呢兩年嘅學習，尤其買咗你大部分嘅作品後，令我覺得投資嘅收成要用時間、耐心去見證。

我有個問題，當時我用均價23蚊買咗6800股美高梅，以現價嚟講我已經輸咗一半有多，如果當初買美高梅之前睇咗你嘅作品，起碼我選擇咗金沙、銀河，就算跌咗都冇現在咁慌張，因為仲有息收、重要嘅係企業仲有成長。

我現在想將6800股以現價來計嘅美高梅轉成另一隻股，最想轉嘅係《50隻優質潛力股》介紹嘅 楓葉教育 或者 轉成 特步國際 ，你認為合適嗎？

另外，我仲持有 正榮地產，均價5.7買嘅，呢隻可守等佢升定換馬好呢？

感謝你！

龔成老師︰

美高梅中國（2282）有質素的，只不過你在2017年大升市時買入，個價比較貴。但唔洗太擔心，我地唔應該因為股價下跌而止蝕，只會因為企業優質度改變而止蝕。賭業中短期不利，但長期仍處於賺錢的狀態，因此唔需要擔心，有得守的。

只是你買入價貴左，可能要長少少時間。相信行業中短期會弱，股價會較為不利，但不要理會，長遠會慢慢好轉的。

正榮地產（6158）主要在中國從事房地產開發、物業租賃及物業管理業務。此股質素算中等，經營現金流長期負數，加上負債比較嚴重。如果佔組合唔多可以持有，但長遠轉至優質股較好。

楓葉教育（1317）本質不錯的，長遠仍是正面的。這股有長線投資的價值，但由於股價較為波動，最好分注投資。

因為佢過往增長快，但在政策風險下，最影響的不是現時的業績，而是之後的發展，令增長力減慢。但如果以一間平穩增長的企業來計，現價已是合理價，因此現時可以理解為合理區中下部。

特步國際（1368）主要從事鞋履、服裝及配飾等體育用品的設計、開發、製造、銷售、市場推廣及品牌管理。

集團獨家總代理商經營的全國超過6,200家零售店組成的龐大分銷網絡，其覆蓋全國31個省份、自治區及直轄市，集團在海外亦設有一些銷售點。

此股有質素，作為內地知名體育品牌，無論在品牌和規模都有一定優勢。但由於環球政局不穏、內地經濟放緩等負面因素，預期零售相關行業收入會進一步轉差，特步也不會例外。此股有長遠投資價值，只要佔組合比重不太高就無問題。

如果你覺得美高梅佔比太重，想轉到其他類別股份，楓葉教育或特步國際都是可行的選擇。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13266：

老師，請問醫藥股值得月供嗎？如果中生和石藥邊隻長線較好？

龔成老師：

唔少優質的醫藥股，都值得月供，長期不斷儲貨的。

人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多多。

例如中生製藥（1177），長遠仍有一定的發展，佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

佢商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

雖然現價就有少少貴，月供是很好的投資方法。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13267：

老師你好，想問1211，在38元有貨，可以中線持有嗎？

龔成老師︰

我地持有一隻股票與否，關鍵位是企業質素、前景，不要被買入價影響，買入價只是一個心理因素。

比亞迪（1211）因為早期出左業績，雖然有增長，但較近期的數據及預期業務較弱，相信中短期仍會弱。

要留意，我地分析時，唔需要太著重中短期的數據。佢出來的數據的確有點失望，但中國車市都預左有影響。

中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

股價由高位回落不少，現在回落至合理水平，同時反映市場預期中國車市的不利情況。相信這股中短期股價仍會不利，但長遠前景仍在的，有貨可守。但要留意，這股有風險，因此不能太大注。

車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期2、3年後先有真正的爆發情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13268：

1. 如果想將一部分資金長線投放美股市場，應該買s&p500 定係數隻大型龍頭科技or零售的成長股較好。因為覺得s&p500 過度分散。

2. 可唔可以排序下2020，2313，669既優質度同潛力。

3. 呢3隻既未來十年前景如何。

4. 669同業多唔多競爭者，市場接唔接近飽和。

5. 2313作為代工廠護城河如何，盈利壓力同波動性有威脅嗎，代工廠係咪應該估值比低d。

6. 三隻都值得買？ 謝謝你🙏

龔成老師︰

1） 選擇數隻大型龍頭科技or零售的成長股都可以，但重點是這些係優質企業就可以。記住，我地投資其中一項好重要的，就是投資自己熟識的企業，若果對中港企業較為認識，就應較多在這裡選取適當的股票。

唔好因為近年美股的升幅不錯，多左人投資美股，就認為美股較好。

2 & 3）

創科（0669）主要從事製造與經銷電器及電子產品，有一定的優質度、有增長力，但又未到潛力股，只能視為平穩增長類，因為佢最高速發展的時期相信已過，現時已有相當的規模，相信往後只能平穩增長。

安踏體育（2020）製造及買賣安踏品牌體育用品，以及分銷國際品牌產品。集團全球化的戰略，令佢本身的生意及規模發展都不錯。

不斷增加資金去拓展業務，這必然有危有機，這點會令佢短期的派息能力較差，但如果你目標是長線就無問題。佢其中一個優點，就是在增長的同時，負債並無特別增長，這令企業的風險不算高。

申洲國際（2313）本質不錯的，近年的生意與盈利都有不錯的增長，加上佢股本回報率（ROE）處於高水平，反映佢雖然做代工方式為客戶製造針織品，但由於利用全縱向模式營運，令佢都有一定的優勢，有一定的賺錢能力。

三者都各有優勢，優質度相若，但以潛力計，則安踏和申洲會較高。

4） 雖然有競爭對手，但集團領先電池工具技術、改良市場原有工具技巧和成本跟生產效率控制得宜等因素，都令佢保持優勢。你留意番佢毛利率和純利率一直保持平穏上升。

5） 申洲國際（2313）以代工模式經營，主要客人如NIKE、ADDIDAS等都是大型品牌，理論上會降低了集團議價能力。但你睇番佢毛利率和純利率一直保持平穏上升，可見佢其盈利能力未受代工形式所影響。

6） 3隻都是優質股，可以長線持有，但現價偏貴，最多只可做月供或分注形式去小注買入。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13269：

本人27，月入21000，投資知識仲在學習中，今年1月先開始緊月供股票（月供$5.5k左右），而10月開始打算調整月供既金額

1211 $1500 （現有250股）
2800 $5000（現有845股）
0066 $2500（現有258股）

想問下以上金額分配合理嗎？

另會每月儲起$4k,現時大約有$80k, 存款，都明自己遲左好多起步，都希望35歲時可儲到150萬（年期都想愈早愈好），如果想達成目標，應點再安排？

另外呢幾個月都有不同既社會活動進行中，睇到的股價下跌緊，但我都明白買股票係買緊個間公司而唔應該只著重於股價，但點都會有的擔心

多謝你咁忙都用心解答問題，辛苦老師啦！

龔成老師︰

有心唔怕遲，現在起步也不算太慢。由27去到35歲尚有8年時間，以恆指年回報10%（連股息再投資）約有10%，以你月儲$13000計（月供9K+儲蓄4K），大約可以增值至178萬，當然要睇番到時情況，相信你達標機會很大。

你月供組合無問題，可以跟你安排。至於每月儲到的$4000，現時大市大致在合理區，你可以等大市出現一定程度的下跌，就投資在平穏增長股。

例如：盈富（2800）、金沙（1928）、恆基（0012）、中銀（2388）、港鐵（0066）、粵海（0270）、領展（823）或潛力股︰比亞迪（1211），中生（1177）或福壽園（1448）等，這樣會增長得較好。

近數月，香港社會出現不少不穏定因素，都令很多股票股價下跌。

但我地一定要了解股價下跌的原因，基本上，現時社會狀況造成股價中短期向下係好正常。只要了解翻當中的事情，無影響到企業核心就唔需要擔心太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13270：

龔成老師，想請教下你關於資產轉資嘅疑問。手頭上有幾百萬資產，正打算轉換貨幣做美金，但又唔肯定呢個做法是否明智之舉？ 換成美金 還是 開一個外國戶口 轉資 比較好？

另外，不知道老師有無留意近年新加坡嘅經濟發展潛力？轉資開戶的話，坡紙 同 美金 邊款較好？

我二十七歲 有一份穩定全職 最近見好多富商都逐漸有轉資風向 令我有呢方面嘅考慮 但有好多疑問出現 希望老師可以提點一下 想了解下老師的意見，謝謝

龔成老師：

如果你現時持有的是港幣，是否轉做美元，其實無所謂，因為有聯匯，你唔需要擔心港幣會出事，所以，除非你想投資一些美元類的資產，否則，唔需要刻意轉做美元。

至於坡紙同美金，最重要的，是「不要單單持有貨幣」，如果你持有的目的是單純外幣，意義不算大。因為「紙幣」只是「政府借據」，你單持有是無意義的，只會貶值，你一定要投資「外國資產」，先有作用。

因此，如果唔睇好香港經濟，應選定長遠睇好的地區，投資該地的資產，到時先轉相應的貨幣。

不過，我相信香港只是中短期問題，我仍對香港長遠發展有信心的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13271：

老師，見大快活跌左唔少
現價可否買入？
謝謝

龔成老師︰

大快活（0052）是有質素的，我都很喜歡這股。比起其他一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定和經濟不景氣影響，股價出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價合理，有長線投資價值，但中短期依然會波動，最好分注入市。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13272：

成哥，有人將2800 同安頓A50 比較，你點睇？

如長線持有，月供股票
2800, 南方a50, 安碩a50 邊樣較好，有咩分別

龔成老師︰

盈富（2800）是追蹤在香港交易所上市50間優質上市公司的股票組合

南方A50（2822）和安碩A50（2823）追蹤在深交所和上交所上市的50隻最大市值A股，由於2隻股票追蹤目標一樣，表現雖然都會有分別，但唔會太大。

盈富（2800）所屬香港市場比較成熟，價格波動無咁大。而大陸股比較波動，但長遠增長力會較強。雖然中國比過往年代增長較慢，不過長遠仍是不差的經濟體。

如果你想要較平穏增長，可選盈富。假若你想以有較大增長，以潛力為先可以南方A50（2822）和安碩A50（2823）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13273：

龔成老師你好，有問題想請教一下。本人看完你的著作，現在買了一手滙豐及一手恒生，因希望收息，見到中銀香港又不錯，想買一手，這組合可以嗎？

但你說過銀行股佔的比例不可超過30%，該買什麼代替中銀香港好呢？請賜教，謝謝

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

其實你可以用番「先增值，後現金流」作方法去審視番你的組合，初期應投資較多增值類資產，較後期則應投資較多保守類項目。

所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你可以因應番你架年齡，去審視番你現有組合是否適合 ，同時可以在當中找中銀香港的替代股。

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、恆生（0011-增長力稍遜於中銀香港）、長建（1038）、粵海（0270）

潛力股︰比亞迪（1211）、中生（1177）或福壽園（1448）

收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13274：

成哥，想問下同仁堂國藥3614同 1666科技，而家兩隻邊隻值得買D？同埋我成日搞唔清香港同仁堂D鋪係屬於 1666定 3613？

龔成老師︰

同仁堂科技（1666）主要從事醫藥技術開發、技術諮詢、技術服務；製造、銷售中成藥、生物制劑。

同仁堂國藥（3613）則是同仁堂（1666）旗下企業，主要集中在生產、零售及批發中藥產品和保健品；並提供中醫診療。

故你所講的同仁堂香港店，其實都屬於這2間企業，只不過同仁堂國藥（3613）係直接管理。

由於同仁堂集團收入主要來自銷售中藥產品，故同仁堂國藥（3613）較有增長力。但要留意，這類股的行業變化較大，同時研發上，無可避免有風險。雖然同仁堂算是藥業保健股中，較穩健的一隻，但都無可避免受行業不確定性影響，因此，只要投資不太大注。

整體而言，2隻股票都有投資價值。現時同仁堂科技（1666）估值合理，而同仁堂國藥（3613）有點貴，如果買都要分注進行。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13275：

龔成老師，本人買了你的投資教學書籍, 獲益良多，在此感謝!

本人40歲單身, 剛剛5月買了一層560萬300呎40年樓齡的單橦樓係天后區自住. 因為社會不懚時勢所以樓價已下跌。不過如老師所說, 如果自住又供得起就不用太擔心. 我想用餘下的錢作以下部署作60歲退休（1300萬）, 想
老師結予一些見議:

1.投資成份保險月供$3000, 已滾存50萬 - 不變

2. 公司ORSO 月供11000, 已滾存50萬 - 不變

3. 存款 10萬 - 計劃買入盈富，恆地, 港鐵

4. 每月收入扣除開支剩1萬, 計劃每季買入以上股票 （因為工作關係所以不能月供）

龔成老師︰

你想法正確，由於你物業是自住性質，故樓價波動唔需要理，最重要係供得起。

當我地進行人生財富累積，會運用「先增值，後現金流」作方法，年青時應投資較多增值類資產，以增值為先，而較年長時則應投資較多保守類項目。

以你年紀，尚有增值能力。所以你選擇的平穏增值股：盈富（2800）、恆基（0012）、港鐵（0066）都是可以的。建議你比重放較多在盈富，可以令你組合更平衡。

而你用每季固定金額代替月供股票，這個策略都可以做到平均格價效果，所以無問題。但你每季只會儲到3萬元，不足以3隻股票各買1手，所以你可以全數買晒盈富（2800）就可以了。

現在離你60歲尚有20年，以恆指年平均回報10%計，季供$30000到時大約會有680萬，以完成你目標一半以上。

只要你ORSO和投資保險回報唔係太差，相信到時你60歲累積到的總資產和你目標唔會差太遠。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13276：

龔成老師你好，小弟今年27歲，月入7萬5左右。現在手持大約120萬現金，有份十年儲蓄（每年供1萬美元，已供兩年），扣除保險及各項開支，每個月儲到6萬~6萬5。

中短期目標想買樓自住，長期就當然係財富增值。老師，想問你點睇而家個樓市？我而家係咪應該做住財富增值（例如月供股票），再睇睇個樓市變化再決定，抑還是繼續儲多d彈藥（現金），作好短期內上車既準備？ 謝謝！

龔成老師︰

相信中短期有可能出現調整，但當中仍有未知數，而我一向不太預期中短期的，不過，我好有可能在一年內增持香港物業。至於長期，因為需求大，供應仍然不足。因此長遠仍會向上的。

香港樓現價略貴，投資價值的確較少，但自住價值仍在。現時香港樓市比合理價，貴左少少，唔算太多。如果你短期內有迫切需要買入一間屋自住，你要留意番供款，只要得起樓價變動唔需要太理會。

否則，現時以回報計股市會較吸引，對你財富增值較有效。現時大市在合理區，你可以將每月一半儲蓄（作月供）和一半現有資金（要分注入市），投資平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）。和小注潛力股︰比亞迪（1211），中生（1177）或福壽園（1448）。

餘下的資金，等大市大跌再入市，會對你財富增值效果提升。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13277：

龔成老師:想問現在香港甘乱,經濟ㄧ定會很差 ,手上的股票由盈轉虧,港鐵是否还可以長期持有?

1177現在還有盈利,是不是先賣出先?要不要止蝕?還是跌低買入?謝

龔成老師︰

首先，你要明白投資股票，就等同投資企業，我地要考慮的是企業質素和前景。基本上，就算是優質股，股價中短期上落好正常。但如果上落太大，就要了解翻當中的事情，有無一些影響企業核心的因素。

我相信香港現時的社會狀況，中短期會對股市方面會有負面影響，但受影響程度，就要睇外國真正的走資金情況，當中還有都好多變數。

不過我相信，長遠資金唔會大走，始終香港都是有優勢，有錢賺的地方就有資金來。因此，我相信中短期有影響，但又唔需要過份地擔心。

港鐵（0066）中短期的確不利，但長遠而言，香港的長遠發展必然是向著新市鎮，鐵路系統必不可少，將來社會對鐵路這個大型運輸系統的依賴必愈來愈多。

加上政府亦表示這會是發展的重點，故無論是鐵路以及相關的物業，都會保持增長，長遠計必然向好，持有無問題。

中生（1177）因中央出左d藥品降價的政策，「以藥品規格採購試點進行，據透露本次帶量採購的具體操作方法，是按藥品通用名進行遴選，企業必須要保證有足夠的生產能力，價低者得」。所以，預左對行業有影響。

不過，中生製這類咁大的企業，財力較強，就算市場出現中短期的亂局，只會淘汰左一d無質素無實力的企業，長遠對佢影響有限。但賺錢能力減少，企業無可避免去扣少少分，但依然有質素，可持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13278：

呀sir，宜家個個都覺得零售業受最大影響
同埋佢地股價都跌左唔小，咁係咪適合掃貨？

利福/莎莎/周大福/六福呢d股係咪要把握機會掃多d

龔成老師

你的方向正確。

我地投資，永遠是睇企業的長期業務面，中短期的事情與股價波動，不用理會。

上述的股票，長遠仍是有質素的，但中短期一定會弱，而我地投資者正是把握「中短期不利事情令股價受壓，從但長期因素無變」的機會入市。

不過，現在的股價仍未算好平，同時股價會波動，因此，未到訓身的時候，但已是合理區中下部，可以分注投資長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13279：

龔成你好! 我想請教現市的投資方向，我和先生每月9萬收入，有一BB &工人，之前3月在自住樓套了200萬出來。

現自住樓每月供款增加$6,000（負現金流$6,000）

在4月（高位，約100萬首期，8成按）買了一細價單位收租，每供$15,000，收租$12,000（負現金流$3,000，未計$800管理費）

現持股票$40萬（港鐡、煤氣、金沙、比亞廸，知識有限，只懂呢幾隻）
現金$120萬HKD

現香港情況差，又撤資又乜乜
1) 我是否需要轉持美金？
是否要開海外戶口？（保住自己既錢）

2) 我如何運用現款投資？
(例如：買REIT收息幫補負現金流，會否賺息蝕價？High yield bond fund收息如下圖有無得諗？環球吹淡風，風險高嗎？)

謝謝你的時間！

龔成老師：

1）不用轉。

香港只是面對中短期問題，長遠仍是有前景的，同時，港幣有聯匯，不用擔心。

當然，你可以在長遠建立一個環球的組合，這是任何時候都可以的。

2）你這刻物業的比例較多，宜增持翻股票的比例，以你的情況，我相信平穩增值股如盈富（2800），以及收息股都是你的選擇。

收息股不要再投資太多地產類的股票，可以考慮翻港燈（2638）、香港電訊（6823）、深高速（0548）等這類股會更加好。

至於債券基金，則有好多的，這一定要仔細睇先得，有d則有潛在的風險，絕對不是保本的產品。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。你要睇下該基金的策略，是否高風險。

第三，不少銀行都會提供借貸，以槓杆去放大回報，以平息借貸去賺取息差。這一定會提高了風險。

我不是說債券基金有問題，只是說明當中的風險，最重要的，這不是保本產品。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13280：

想問下金界合理價位係幾多？
現價應唔應該入？

龔成老師：

金界控股（3918）有質素的。現價合理中上部。

佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。

賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。

但要留意，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白，亦因為這原因，若投資此股，在注碼上不能去得太盡。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【摸魚手札】買年金者是豬（渾水）

友欄徐家健教授以諧趣方式調侃年金，類比倫敦金。題目有趣，我可以補多幾筆。先把結論講出來：買年金是傻豬豬，買政府的年金無咁傻豬，但本質上都係豬。先講一個故仔：

退休人士大明有一筆退休金，然後參加了年金計劃，定期派錢。剛好兒子小明要結婚，可惜無錢買樓比首期，退休金又用來去買年金，大明只好抵押自己居住的唯一單位套現，每月還款。好景不常，剛好遇上加息周期，還款壓力增加，年金派息追不上生活成本，加上小明又要供樓，大明只好出山做野。退休人士久未復出，重新工作固然辛苦，慘在積勞成疾，比預期壽命更早死，然後年金計劃正式玩完。

如果你係專業投資者，你會條件反射把年金當成投資品去睇，然後計回報率睇yield，然後去對比收息股，睇銀行定期派息，開始計一些百分比的死人數學，然後......你就開始中計了。收息股、銀行定期、債券等投資品和年金不同，是一開始你付出的本金，未必到最後好像股票、定期、債券用最後拿得翻，有相近流動性。因為年金的設計本質係對賭你條命有幾長，所以男士和女士的回報各不同，因為預期壽命在模型的變數計算也不同。除左長命，也要祈求上天你無病無痛，子女要生性，否則你一時間要調動大筆資金就GG了。

一般人分析年金係簡單地計比回報率的percentage，然後估自己有幾長命，而忘記人地背後係有一隊專業精算師運算同你對賭開盤。所以，你要問的問顥係：你有無方法在這班精算精英前鑽空子，計贏佢地？

年金的推銷比其他產品更難，那是因為參加計劃的人要先付出。行為經濟學有一個概念叫loss aversion，先付出的痛，大於收定息的良好感覺。同樣的問題，也發生在逆按揭上，所以這些幻想以投資產品包裝成退休產品的計劃比較難推銷，就係咁解。

當你面對一些看似極度複雜的情境或投資產品，有時不必想太多，我會建議回歸街頭智慧，用最簡單的檢視方法，就係睇推銷的人身體是否誠實。推銷大灣區的權貴，根本就不會把資產、業務重心轉去大灣區。口裡說愛國的人個個都有外國護照，做好隨時著草的準備。大家不妨睇下設計、推銷年金計劃的人會否身體力行，自己落場，叫埋子女親朋一起去玩。咁你咪知年金有無料到囉。

https://hk.finance.appledaily.com/…/artic…/20180728/58497704