.阿公話，有時喺街遇到靈體，如果佢衣著同現代人一樣，唔望真啲根本分唔清佢係靈體定係人。但靈體係存在於另一個空間維度嘅能量，所以點解成日話見到鬼係半透明，因為佢只係一股能量，而唔係實體。 . .正如大家用肉眼所望到嘅嘢，其實唔係眼睛接受到影像，而係由眼睛接收到光線，傳到大腦，大腦再轉化成影像。 . .有一個簡單實驗可以證實到，首先，你預先叫朋友20~30分鐘後幫你進行呢個實驗，而你喺半個鐘，必須處於半熟睡狀態，之後，請朋友喺你耳邊輕輕啪手指，或者敲響啲鐵或玻璃，如果你未入睡，除咗響聲，仲會見到眼角傳出聲響嘅方向有閃光。 . .呢個係腦神經受到刺激嘅正常反應，亦證明係個腦話你知有光或影像，而唔係你眼球見到。 . .而靈體能夠影響到我哋嘅腦電波，令你見到或感受到佢嘅存在。亦解釋到點解每個國家出現嘅靈體都唔一樣，中式會著唐裝、紅衫、長髮…西式大多係一團唔同顏色嘅煙。 . .「但唔係人人都有陰陽眼嘛，諗起喺條街到行行吓，穿過隻鬼個身都夠恐怖啦！」 .「而家周街都係wifi、電波、訊號…你每行一步都穿過佢哋。其實道理一樣，所以唔使咁驚，鬼唔會無緣無故害人，佢害人又無著數，人先會為自己利益害人。」阿公飲一啖茶，蹺起二郎腿，又繼續講。 . .「仲有啊，其實陰陽眼只係代表『感知』能力特別強，唔係咩超能力。每個人都有不同程度嘅『感知』力，舉個例，當你訓緊覺，若果有人企喺床邊望住你。你會覺得周身唔舒服，然後扎醒。去提款機撳錢，後面有人排隊，你都會感覺到佢嘅存在。」 . .「咁如果我無陰陽眼，點知道一間屋有冇靈體？」 .「有幾種方法即使唔請師傅，又唔識任何宗教，都可以簡單測試嘅。」 . .「如果你覺得每次去廁所，或行到屋企某個角落會覺得周身唔舒服，可以試吓將啲白米、或者石灰粉平均錦喺地面，記得閂晒所有門窗。如果有靈體存在，石灰粉同白米會有好似波浪咁一波一波泛起。」 . .「若果你唔單止想知有冇，仲想見吓個靈體，你可以試吓半夜４點，臨天光時用手機開閃光燈影吓間屋，就有可能影到唔同顏色嘅影。你都可以用手機對住個指南針錄影，然後如常去訓覺，第朝睇吓個指南針有冇郁到，就知有冇靈體經過。」 . .「如果你真係唔怕死，想訓練自己『感知』能力，又對宗教抗拒唔想學法，冥想都係一個辦法。正如當一個人訓緊覺時感知力會增強。就算見唔到靈體，都可以感應到佢哋存在。」 . .「但係…如果好似阿公你咁，遇到村屋入面個男人靈體，佢唔知自己死咗，不停同你講嘢，又或者個人畀鬼上身，咁點先知對方係咪鬼？」 . .「你可以畀張符佢睇，問佢睇唔睇得明。如果對方畀鬼上身，或者佢係靈體，佢會睇得明啲符咒。」 . .就好似，當時屋入面個男人咁… .我決定令個男人靈體安心去投胎。 . .道士有一個大忌，面對呢種唔知自己死咗嘅靈體，唔可以直接同佢講「你已經死咗啦，去投胎啦！」 . .就等同一個精神科醫生要專重病人，唔能夠同個病人講佢係痴線，而係畀耐性去幫佢解決問題。呢種叫職業道德。 . .我同女街坊講，佢會引起靈體不安，所以叮囑佢暫時唔好入屋。雖然女街坊好不滿，我點解要咁為個靈體著想，但最後都聽話，喺外面等我消息。 . .我入返屋，見到個男人將櫃入面嘅嘢倒晒出嚟，又將衫褲丟晒落地，好似好慌張咁周圍搵嘢… . .難怪女街坊同我講，話佢半夜訓覺衣櫃啲衫會自動飛晒出衣櫃，廚房啲櫃又會自動打開，仲跌爛過唔少碗碟。 （下圖續）