【 全民造星III／黃金時段收視創開台紀錄 】 _ 《全民造星III》真係好多人睇，只要看看facebook、Instagram以及網上討論區就會知道，更重要，是有無綫「加持」，臨急臨忙變陣，安排原定2021年才播放的劇集《香港愛情故事》提前於周一至周五晚上10點半播出（昨晚，即22／12剛好播完大結局），又突然間籌辦《衝上雲霄大選》，於本周六（26／12）晚上舉行，播放時間由晚上8點半至晚上11點，完全跟《全民造星III總決賽》重疊，當然TVB為顧顏面，不會承認此舉是正面對撼，因為堂堂將軍澳大台，是不可以，亦不可能認低威。 _ 好了，一定有人問：「喂，你講《造星III》有好多人睇，咁即係收視幾多呢？冇就唔好吹咁大啦唔該！」喇，其實眾所周知，ViuTV從來都不會向外公布收視，很多時我都只能夠向消息人士打聽，比如今年年初播出、由黃秋生與張錦祥主持的飲食節目《究竟食咗乜》，在嚴峻疫情下，周一至周五晚11點播出，曾經錄得最高收視3.5點（第9集），成為全台收視冠軍，之後播出的《美女郊遊遊》，亦獲得相若成績，足以證明，晚上10點半至11點半時段，是99台的收視保證時段。 _ 不過江湖傳聞指，有ViuTV中人對於本人公開收視大感不滿，其中一個關鍵，在於他們覺得收視點數「唔靚仔」，不應公開。（其實我從來無法求證，只能講是傳聞，好奇廣告客戶是否收到這些資訊呢？）查實當翡翠台黃金時段收視亦不過20多點，作為一個只開了4年多的電視台，收視去到有多高才叫「不肉酸」、「好靚仔」？參考台灣，收視率0.1，只有21,700人收看，所以「破1」大概就有20萬人收看，2020年神劇《想見你》在中視播出時，大結局平均收視有2.35，已經是非常好的成績了，難道又要收收埋埋唔公開？身處網絡世代，作為新台，可以採用為自己打氣的方式宣傳，每升0.1，都要為自己打氣，輸人不輸陣，聲勢這回事嘛，很多時真的是「叫」返嚟，而且要慢慢累積，希望ViuTV的管理層明白。 _ 兜了一個大圈，到底《造星III》的收視怎樣？據了解，曾經錄得的收視紀錄有5點，但不知道這個數字是代表平均收視還是最高收視，但已肯定是ViuTV開台以來、不計算2018年直播世界盃時（決賽夜26.6點）的新紀錄了。（2016年開台，5月3日的收視冠軍為《跟住矛盾去旅行》，平均3.3點，最高曾去到4點，《瑪嘉烈與大衛》和《夜行書生》分別排第二、三，收2.7和2.6點，黃金時間平均2.1點。）而去年12月《全民造星II總決賽》的直播收視為3.6點，難怪無綫要急急變陣。ViuTV公關回覆說：「我們從來不會對外公布收視！」就此，我專誠打電話問問花姐。「我唔知道收視幾多，我淨係睇VOD，即係睇我哋個App，我哋（節目）係第幾位，我只可以睇到咁樣，如果去到5點收視，其實算唔錯喇，喺我哋個台嚟講，我唔知真定假，都係你同我講。」 _ 數字是冷的，但《造星III》帶來溫暖就肯定是真，花姐承認好開心，「因為我都聽好多朋友講話，真係好耐未試過坐定定喺度睇電視，要趕番屋企睇，呢樣嘢我係好開心，因為我記得之前同你做訪問都講過，我最初（製作《造星》）自己係好希望大家有番睇電視嘅習慣，因為幾廿年前，我同屋企人一齊食飯睇電視，係一件好Warm嘅事，亦都可以聯繫到家人嘅感情，但可能因為時代進步，已經冇咗呢樣嘢，而家大家會約埋成班人一齊坐埋睇電視，好似令到呢個世界融洽咗，（相比收視）我反而係咁樣開心啲，我相信ViuTV會繼續努力，我同好多監製，大家都會一齊去諗啲新嘅節目，希望有多啲新嘅刺激畀到觀眾。」 _ （23122020） _ #游大東 #游大東影視筆記 #全民造星 #全民造星III #ViuTV #花姐 #香港愛情故事 #衝上雲霄大選 #TVB #yautaitung #23122020 #黃秋生 #美女郊遊遊 @ilovemyoq @viutv @stupidmusichk @todui9atvshow @hkgirltalkdrama @smartposthk @tse_kk @bartpau @samm0123 @vincitang @cloudchow

【 ViuTV直播世界盃決賽收視出爐 】 四年一度 #世界盃 落幕，周日（15/7）晚上ViuTV直播格仔餅（克羅地亞）大戰西多士（法國）決賽戰，事前外界因爲無綫輕敵，只以古天樂「迎戰」，早已預期99台收視定必創新高，結果如何？ 根據ViuTV公布的官方收視數字，決賽夜平均收視高達24.4點，最高收視更有26.6點，再創開台新高，直播接觸人數多達205.2萬，網絡平台的串流收看人數亦有41.2萬，總結所有免費播放賽事，撇除網絡收看人數，累積觀眾人數高達408萬，超過62%的香港電視觀眾曾在家中轉台收看數碼99台直播世界盃。 無綫又如何？之前小弟經已講明，大台今次明顯輕敵，結果翡翠台收視節節敗退。周日決賽夜，無綫挑選《使徒行者》電影版對戰《Good Night Show全民睇波派對》，仍然有15點收視，算係執番身彩，之後《晚間新聞》和兩小時重播《刑事偵緝檔案IV》，分別只得4點和2點收視，是「合理地難睇」，始終是世界盃，放在奇妙77台直播，也可能會令無綫收視插水，如今仍然有4點、2點，而不是零收視，無綫高層應該還神，至少他們還未重蹈亞視覆轍，至於ViuTV經過此役大勝更不應驕傲，而是想好整體節目方向，強化入屋觀感，讓更多觀眾明白有得揀，今夜三個全新節目——《Good Night Show全民造星》、《入住請敲門2》以及劇集《Plan B》頗有睇頭，冀望能挾世界盃餘威，收視不會立即打回原形。 （16072018） 圖片來源：FIFA WORLD CUP Facebook專頁 #yautaitung #游大東影視筆記 #游大東 #ViuTV #rating #收視 #TVB #古天樂 #planb #全民造星 #入住請敲門2 #入住請敲門 #港劇 #電視 #worldcuprussia2018 #worldcup #france

【 電視節目預告／22:30《返歸啦俄仔》首播 】 【 除非now e又打柴？！ 】 今晚開始， ViuTV 不再免費直播世界盃賽事，直至7月3日。 學《家有喜事》裏面的李香琴話齋：「冇電視睇點算呀！哎喲世界末日喇！慘無人道呀！你殘忍呀！你黑心呀！」 黑心的話，很多人情願「now e」又死機。 不過，冇波睇，唔等於冇節目。 「編輯A」龔昨藍告之，話自己試睇ViuTV播韓劇《醫療船》，睇到半路，已經頂唔順，要轉台睇《天命》，「張國強啲戲真係好勁，原來佢都60歲！」，結果轉個頭又發現和珅與乾隆數錢好騎呢，「煲劇女王」黃潔慧立即搭嗲：「史高治叔叔！」咦咦咦，咪即係《唐老鴨俱樂部》（Duck Tales）？我的童年回憶呀，一九八七年在翡翠台首播，細細個真的在睇，仲要識得唱英文版主題曲。 Anyway，病到呆吓呆吓，語無倫次。 重點係想講，今晚22:30，ViuTV會首播《返歸啦俄仔》，由真．俄仔 Ansheles 帶大家返去他的家鄉，即係一落機已經零下10度嗰種家鄉，唔使睇，聽見都打個冷震。 今次節目中，Ansheles會帶大家遊歷莫斯科、索契（Sochi）和喀山（Kazan），返母校、見前度女友、見阿媽（親生阿媽，Hi Auntie！！），總之飲飲食食之外亦會去玩去癲，癲到畏高但又會跳Bungee Jump，仲有打大赤肋浸溫泉和嘗試Russian Sauna，俄仔告之，他去Sauna期間，明明有條毛巾遮住，點知最後懵吓懵吓底褲都除埋，「但我動作實在太大喇，搞到要打格仔！」 嘩嘩嘩，唔通係童軍跳彈床？ （25062018） #yautaitung #游大東 #游大東影視筆記 #ansheles #返歸啦俄仔 #TV #RUSSIA #VIUTV #HKIG #HONGKONG