#教主生日快樂 來一個和教主顏色配對的雪條💎 粉色配粉藍 是絕配？ 其實我覺得藍色配黃色 先至夠夏天 ☀️ 加上最近真係入咗好多芒果🥭 用嚟整芒果smoothie 真係好好味 再加埋藍色脆皮朱古力真係透心涼 今次裝飾用咗朱古力畫白雲☁️ 夏天感覺出晒嚟呀！ 為b 真係可以唔食飯齋食雪條😅 #鮮芒果菠蘿雪芭脆皮雪條 #大叔彩蛋真心暈浪 #導演真係要加人工 #viutv #教主 #ansonlo #好耐冇追電視 #每晚坐定定收睇 #mango #pineapple #smoothie #popsicle #chocolate #skyblue #cloudy #summer

我在大台短暫的日子 八，離開大台前和後 （終） 過去多次提及過，我在大台工作的日子非常短暫，試用期也沒過我就決定離開了。那時候除了有點對不起介紹我入去的朋友之外，我基本上沒有後悔（不過，那是我唯一一次祼辭經驗，現在回想還是覺得頗大膽）。萌生離開的念頭在工作了兩個多月的一個晚上，那晚拍了一場大陣仗的槍戰場（早前提過很難忘的一晚），很累，跟子誠談起自己對大台工作的盼望與落差。我算是踩入了一直想踏足的行業，有份製作電視片集，辛苦過後有收穫（起碼作品很大機會面世，而且（當時）會有一定數量的觀眾觀看），本應是每位做創作的人嚮往的事。但原來前題是你也要喜歡你的作品。儘管大台那時還是有不少認真工作、態度專業的台前幕後，而且面對王維基香港電視的挑戰，那時的確感受到內部有種要爭氣的心態，但種種原因下，大台劇的水平依然每況愈下。辛苦完成拍攝工作，連自己都不感興趣觀看，那如何在拍攝時獲得滿足感，如何有動力繼續工作？ 除了滿足感的問題，另一樣做了PA才發現的是，原來自已較喜歡有時間規律的工種。我不介意OT，但我卻不太接受到每日上下班時間不一的生活。特別是我因為喜歡電影才想嘗試走入影視工業，但這份工的不穩工作時間令我難以安排私人時間入戲院看電影（有時有時間但卻太累），這有點本末倒置。 那夜拍攝之後，我放肆地曠了一日工（後果是被導演罵得狗血淋頭XD），想清楚後就趁試用期結束前辭工了。有趣的是，珍姐得悉有個做了一陣子就走佬的新人，竟召我入房了解一下。那天是我的Last Day，我才第一次跟自己大老細對話。我找了一個辭工的理由，她還語重心長地鼓勵我，說歡迎我在任何時候回來。這可算是我十年工作生涯中最怪異的一刻。導演也對我的離開感到意外，上一週他才review 我的工作表現，認為我整體工作頗好，想不到我突然就要走了。不過，我想我應該不是第一個未過試用期就「頂唔順」的PA吧。 我離開後，還接觸過大台/舊同事數次。一次是劇集剎科宴，他們請我出席；另一次是我在入職時登記了索取綜藝節目門票，在我離職後他們才抽中我，我回去看了草蜢主持節目，也算是浪費了一晚，哈哈。之後我就再沒有見過他們，除了兩次在街上相遇，一次在2014年的旺角，另一次在2019年的中環，兩次的活動性質一樣。 間中也會有朋友問我意見，應否入行做(大台)PA。我通常都是反問他，本身有沒有追香港劇集? 若果有的話(而且是喜歡的)，那麼入行還好，你會較容易保持熱誠，而這是做影視創作必需要有的；若果本身你已經少看大台劇，不齒其製作水平，那就別浪費時間入行了(更別幻想自己能改變裏頭甚麼)。當然，現在有了其他選擇，例如是Viutv和一些外判製作公司，似乎也是不錯的選擇。但可悲的是，不論是哪家公司，PA的工資都是相若，是一個「收銀阿姐」都比你高人工的行業。決定前一定要想清楚，以免行冤枉路。 最後，感謝有些讀者每篇也有追看，本頁亦因此多了近500新followers。對其他大page/黃Page來說可能是少數目，但對一個寫電影評論和資訊分享為主的專頁，500絕對是一個大數。這次讓我回憶起不少在大台工作有趣的事（啊，還有一件小事：那時大台不停地吸納前亞視藝員，當時盛傳萬綺雯將會過檔，而我某個晚上，經過隔離廠竟然看到她（應該是拍老表），她點頭對我微笑，那一刻我覺得整個場景都錯配了，很奇幻），也反思了當時自己做得不夠好的地方（有時還是太依賴我的senior PA了，做事不夠主動）。如果時光倒流，我想我會多留一至兩個月，等整套劇拍完，嘗試一下做後期才離開，那整個經驗或許會更為完整。 我今後應該不會再寫大台了，一來根本不會看它的東西，沒法評；二來要分享的都分享了。我還是感恩認識到入面工作，專業的台前幕後同事們，跟他們學習了很多。我這個沒有讀過任何電影課程，亦沒有任何拍片經驗的人，在電視台工作所學懂的點點拍攝知識，有助我對電影的理解，對日後寫影評亦有幫助。下半年，我會寫多些電影文，繼續向大家分享我的電影品味和看法。謝謝。 完! 利申：以上都是個人、片面、短暫，而且歷史久遠的經歷，並不代表所有PA的立場。 (圖片攝於n年前，我在公司貼的海報)

我在大台短暫的日子 六，PA難忘事 近排大熱肯定係ViuTV嘅Error自肥企画，呢個熱潮唔只捧紅咗193、Dee哥、保錡同肥仔，就連幕後如Mike導、編劇暉、Agent L（本身係導演）成個無制限ot編集団都紅埋。見到大家終於關注到電視台幕後工作人員，尤其係製作組嘅創意同辛勞，係幾滾動。 入正題，上幾篇文講咗PA嘅職責，今回分享幾件PA難忘事。因為我經歷短，可能一啲其他同行感到習以為常嘅事，我反而會有幾深嘅印象。 第一個我諗起嘅係拍攝時某一場戲。嗰場戲係一段老人家嘅Flashback，畫面呈現佢以前後生時坐咗多年監，一直坐到老年。呢場戲係廠拍，我地搭咗個囚室景，兩位女演員分別係羅蘭姐同埋姚子羚，我地製作組要諗嘅係：究竟點拍先至可以最直接而有趣味咁交代到子羚一坐就坐到老，變成說故事嘅羅蘭姐呢？我地組嘅導演無諗住求其兩個鏡頭dissolve交代就算。佢一開始就做咗個判斷，決定用一鏡直落拍攝呢個角色嘅老去，亦即係要一個鏡頭出現兩位演員飾演同一角色。決定之後，導演就花時間，花心思諗點樣喺無budget下，利用鏡頭，加埋角色借位、道具幫手等等拍到一個一鏡換人嘅畫面。無記錯嘅話，最後係子羚喺囚室望住窗外，鏡頭跟子羚視綫移動，然後趁畫面見唔到時演員迅速走位，換入羅蘭姐。因為呢個角色臉上有條大疤痕，鏡頭返黎時影住羅蘭姐臉上嘅化妝疤痕，向觀眾明確提示兩位演員為同一角色。雖然呢場戲係設計並非真係好複雜好特別，不過我一向都覺得拍戲唔係要炫技，而係點善用鏡頭有效地說故事。我覺得導演呢個設計係提升咗成場戲，雖然只係短短十秒嘅過場，但係佢有諗法，無交行貨，我欣賞。 同樣，有啲演員都好畀心機。羅蘭姐演技好大家都知，但有幸喺現場睇過佢拍戲，會更加感受到佢有幾厲害。佢拍戲好快就醞釀到情緒，拍攝時嘅能量收放自如。大台電視劇嘅劇本水平一向都水水地，但佢即使喺呢種水平嘅劇本都可以交出上佳演出。仲記得有場羅蘭姐嘅喊戲，我地全廠人（工作人員加埋都有十幾人）都睇到入晒戲靜晒，Cut咗之後停咗幾秒先有人開聲，大家都讚不絕口。 第二件我好難忘嘅事係關於一件道具炮仗。場戲係講幾十年前，有個少年得罪壞人，結果佢喺間大屋前畀人綁住成抽炮仗恐嚇佢。我地事前就落咗單畀道具組，要求整道具炮仗。可能係因為我地寫單時又無好認真諗過炮仗應該係點嘅樣，道具組製作中途我地有睇過一次都唔覺有咩問題。直到拍攝日我地收埋貨，跟車去到外景現場，導演一睇見件道具，我地先見到出事。導演嗰刻係我見過佢最爆嘅一次，佢嘅怒火係大到震撼到我以為大埔外景場地有火山爆發。原來導演本來諗住當個壞人綁住個少年時，會塞其中一枝落佢個口到嚇佢，所以想要嘅係大大碌嘅炮仗，廁紙筒尺寸。但係，道具組係用咗新年掛喺揮春隔離嘅炮仗裝飾黎加工。而家抽野全部都係蠟筆Size，小朋友玩泥沙咁。導演嬲到反問我地要點L樣拍，然後返咗上車話收工唔拍。結果擾攘咗一陣，大家工作人員先夾手夾腳氹返導演，用嗰抽野拍完場戲。 最後，數到難忘事，不得不提全個拍攝最辛苦嘅一場戲，亦都係較大陣仗嘅一場。嗰場戲背景係四五十年代一個深夜嘅夜總會門口，壞人爽完出黎時同警察發生一場槍戰, 呢個單元嘅男女主角，仲有好多配角等都喺現場。嗰場我地喺場地拍（即係大台入面嘅外景），拍咗一個通宵。場戲係幾十年前，準備上已經要花多好多時間，包括要搵老爺車，道具又要嗰個年代嘅道具；而且因為係槍戰，有角色中槍，所以動作導演、爆破組嘅同事都在場。我地好似係22:00定23:00先開始拍，首先要拍晒啲非動作場口先。因為天氣炎熱同埋有幾陣驟雨，進度一直都落後咗。然後到最大陣仗嗰場槍戰，我地大約係25:00先準備同現場再排que位，車喺咩位、角色喺咩位、邊個開槍先，邊度中彈等等十九幾萬樣野, 到27:00先開機拍，但我地又要趕喺天光之前搞掂晒，而且無論係車定人，都唔可以NG，因為車會中彈爆玻璃（我地用啲糖漿之類嘅物體做效果會）、人中彈衫會染紅等。喺咁大壓力下，大家都史無前例咁緊張。每一秒嘅時間過得好似好快咁，但同時間每一秒嘅辛勞又令我覺得度日如年。有野做嗰時反而還好，充實啲；最辛苦係有時候可能其他工作人員要時間準備，我地只可以喺旁邊等。天氣又熱大家又攰，偏偏就乜都做唔到，睇住時間過，嗰種焦慮同疲乏係好蝦人。結果，我地竟然成功趕係天光前完成拍攝，成場戲都無乜出錯。我對成套劇嘅拍攝都無乜滿足感，唯獨呢場戲有，因為真係見到全組人好用心咁完成一件事，雖然可到黎大家可能都仲係覺得好水皮，但係，喺好多環境因素局限下，嗰場戲我認為已經好成功。 以上都係一啲我而家仲記得當時感受同情緒嘅時刻。除此之外，話晒入大台先有機會見到好多演員，都有好多難忘嘅印象可以同大家分享。下回就講我遇過同合作過嘅演員。 利申：以上都係好個人、好片面、好短暫，而且歷史久遠嘅經歷，並不代表所有PA嘅立場。 （圖片為n年前同影后嘅合照，配上而家好流行嘅打格仔。）