我在大台短暫的日子 一， 入行經過 好多年前我喺大台做過助理編導，亦即係PA。雖然日子非常之短（只係跟咗半套劇），好多嘢都冇親身經歷過（例如一啲特定類型嘅拍攝、海外拍攝、後期製作等），但仍然有唔少嘢可以同大家分享一下，唔知大家有冇興趣？我可能先寫一兩篇，睇下反應。如果大家都想知（而我又唔懶嘅），黎緊呢兩個月有時間，我就寫多幾篇關於我喺TVB工作嘅日子嘅帖文，等大家可以（好片面咁）了解一下喺香港電視台做PA究竟係咩一回事。 第一篇，講吓入行經過。 唔知有冇讀者有興趣去大台（又或者其他電視台/媒體）做PA，又或者大家第一個諗到嘅問題就係，究竟係點樣入行？使唔使讀啲咩專門學科？定係等電視台出招聘廣告呢？個答案係，其實我都唔知！我好好彩，係有人介紹入去，所以正式PA招聘渠道我係無經歷過嘅。而且，當年我嗰個時代背景有啲特別，我一陣再講，我係完全唔知道而家大台請PA 有冇咩requirment、需求大唔大等等。 我嘅入行經過要由演藝學院嘅一個外展課程講起。當時我開始鍾意睇電影，但又唔肯定自己係咪同時鍾意做創作。我見APA 有搞一啲外展Course，有兩個同電影有關，一個係陳慧教嘅「愛情電影」；另一個係龍文康教嘅「電影編劇基礎班」。都係名字上嘅分別啦，前者好似唔太似我想讀嘅野，後者好似比較直接啲同創作有關，所以我就報咗後者。 係嗰班入面有各式各樣嘅學生，包括有啲想教自己學生寫作嘅中學老師、有啲有志投身電視電影嘅年輕人（有一位真係做咗網絡作家＋電影導演，佢套戲好似已經拍完，排緊期上映，）、亦有啲真係純粹黎當讀吓興趣班嘅朋友。而其中一位學生係TVB嘅前PA，大家熟落咗之後，佢問我地有冇人有興趣入去大台做PA，咁難得有個咁容易入行嘅機會，梗係做啦。我（仲有一兩個同學）即刻畀資料佢，佢幫我地聯絡TVB嘅HR，好快我就收到電話約面試。 與此同時，上文話我嗰個時代背景有啲特別，特別在於HKTV正正就係嗰年成立。王維基嗰陣喺八大院校招FG，雖然我畢咗業返緊工，亦唔係八大出黎，但見機會難逢，都射咗波潛入港大個招聘會度扮HKU學生。招聘會當日，王維基講完啲開場白（即係佢嘅抱負云云），做咗個Q&A，然後就開始畀我地Group interview。我都唔記得面試內容，但我記得一組8-10 個人，質素好參差。反正應該都係因為自己對電影嘅認識稍稍比在場嘅其他同學仔為高，所以完咗之後，自己都幾肯定會收到follow up call。結果，好快佢地就打黎叫我去第二輪面試。 究竟TVB面試同HKTV面試有咩分別呢？分別真係好大。TVB面試流程係： 入到去填form，之後去見七樓（Drama製作部）HR。印象中佢係無考核過我（唔知係因為本身佢地請PA無乜要求，還是因為我係有人介紹嘅關係），只係問咗我想做戲劇定綜藝，同埋同我講啲「做PA 係好辛苦㗎，不過又唔係好似出面講到咁嘅，仲會學到好多野添」之類嘅說話。我只需要保持有禮貌嘅微笑，加上少少誠懇地點點頭，就搞掂咗個面試，成個過程我估大約10分鐘。 至於HKTV第二論面試，我記得先係有一個筆試，四五條題目畀半個鐘你答，有一條係問「如果去到荒島拍攝先發覺帶漏野，你會選擇點做」之類嘅處境題。筆試之後就係個人面試，面前係三四個監製。首先都係介紹下自己（老媽子教落，呢part 係唯一一part 你可以暢所欲言，大騷 quali嘅環節，如果講得又詳盡又好，一來可以畀到一個好好嘅first impression 對方，二來可以用盡interview 時間，減少打後對方問你啲鬼咁艱難問題嘅機會，所以呢，識得介紹自己真係好重要），然後佢就問吓你點解想做PA，知唔知PA職責，然後就深入啲問吓你有冇咩片種你唔想拍等等（我答咗古裝同Sit-com，因為前者製作水平越來越求其（嗰幾年係特別多穿崩野發生）；後者則千篇一律（我由細到大都好憎睇Sit-com，係直到後來開始睇外國sit-com，先知原來sit-com 可以咁好睇））。面試超過30分鐘，監製話覺得我好好傾，未試過同人in咁耐。佢覺得好係一個好好嘅candidate (well, of coz LOL；其實更大可能係因為一啲真係讀電影嘅畢業生，又點會去in HKTV/ TVB 吖...), 但同時Over-qualified, 驚我留得唔耐（嗯，結果都係吖），所以要考慮吓。 最後，兩間都有請我，但我揀咗大台。首先係因為，HKTV畀offer 我畀得遲，我已經喺大台返咗成個禮拜，所以就無謂又轉。二黎，嗰時HKTV係超級新，新到連廠房都無。而大台有齊晒配套，亦有系統。如果新人學野，好似都係大台好啲，所以我就決定拒絕咗充滿朝氣嘅HKTV，而選擇入TVB。當然，幾個月後嘅我就會知，原來點揀都好，我都係做唔長。哈哈。 入行經過大概係咁。下一篇應該無咁長，可能會講吓返工第一日嘅事。 利申：以上都係好個人、好片面、好短暫，而且歷史久遠嘅經歷，並不代表所有PA嘅立場同經歷。 （圖片攝於n年前TVB見工日）

【 遭無綫解僱前員工連登發功：秋後算帳陸續有嚟！】 _ 因為「反修例運動」而衍生出來白色恐怖持續發生，繼國泰和機管局炒人之後，作為全香港最大的商營電視台 ── 電視廣播有限公司亦同樣出手，於上周五（23／8）突然解僱20人，涉及多個部門，包括配音組、字幕組、工程部、劇集組導演、助理編導等，當中《愛．回家之開心速遞》兩名編導和一名節目統籌，亦包括早前曾發起譴責無綫新聞部「失實報道」，並發表「袁志偉下台」言論的活動召集人。無綫電視行政總裁李寶安，當日回覆傳媒查詢時，只是說裁員是業務調整，是商業決定，跟其個人言論無關。「公司收入受本港市場不穩和政治動亂拖累，故需重整公司業務和精簡人手。」 _ 不過故事未完。一群懷疑是日前遭解僱的前無綫員工，為數不知多少，剛剛於「連登討論區」發表一篇文章，標題名為：「我們是一群被辭職的TVB員工，今次好想同大家講，公司一直都存在着白色恐怖，希望各位留意及小心」，文章有兩大重點：（1）呼籲現職無綫的同事要加倍小心，切勿將個人政見在公司展現出來，包括「反修例」文宣，因為保安員見到之後隨時會篤灰，再直接通知人事部向相關敢言員工開刀；（2）白色恐怖一直存在，於將軍澳電視廣播城內天眼處處，嚴密監控員工一舉一動，「因為CCTVB好多CCTV！」此外他們又製作一張文宣，直接諷刺李寶安：「你保安嚟咋，當自己真係保安局呀？」又指ViuTV對待支持「反修例運動」的員工跟無綫有天淵之別：「一樣有連儂牆，一樣有影職員證，一樣冇錢賺，又唔見人哋炒人？」 _ 【 ⚠️⚠️26/8 01:18更新 】但有無綫員工報料，指出今次炒人事件未必100%跟「反修例運動」有關，對方說，肯定有一位遭解僱的人是藍絲，但那人沒有影職員証。另外製作部經內部向4位職員派信，「唔係人事部跳過直接炒！」對方又說，製作部PA明明長期缺人，而且一直有招聘，「所以炒呢個人如果話係裁員就唔太合理，所以我個人都唔排除係白色恐怖！」 _ 【 原文如下 】 ／／我們是一群被辭職的TVB員工，今次好想同大家講，公司一直都存在着白色恐怖，希望各位留意及小心： _ TVB已經進入白色恐怖，23/8星期五被辭職既20位員工已fc係曾經都涉及，影職員證表示支持反送中，曾在新聞部貼連儂牆，大樓外牆掛黑白旗和曾經帶有關遊行宣傳單張及Banner回公司，或收藏有關頭盔及疑似攻擊物的拍攝道具。20人都由保安部通知人事部，由人事部直接通知被辭職員工，以經濟收入不佳為由，跳過所有部門主管直播辭掉有關職工。 各TVB同事，小心自己在網絡嘅言論，小心自己帶返公司既文宣物品，你不理政治，政治也會來找你，呢個只係一個開始，之後秋後算帳陸續有嚟，大家要照顧好自己，不要輕易將自己的政見在公司表達出來！因為CCTVB好多CCTV!／／ _ （25082019） #游大東 #游大東影視筆記 #無綫電視 #TVB #李寶安 #白色恐怖 #逃犯條例 #反送中 #連登 #hkig #hk #tvb #hongkonger #香港人加油 #25082019 #viutv

微辣團隊尋求更多熱血人才加入!! 學歷：不是重點 經驗：有就最好，冇都唔怕 上班時間：彈性（會突然上班，絕不會突然下班） 薪金：面議（由專業核數師以抽獎方式決定） 假期：跟樣貌成正比 要求： 不甘平凡 追求進步 擁有夢想 份人唔怕悶 想將興趣變成事業 福利： 不用打卡 不用出糧（可自行選擇） 可選擇工作崗位 可吃東西又不用減肥（要懂得分享） 招聘崗位： 幕前 編劇 編導 剪接 編輯 製片助理 藝人助理 平面設計師 廣告銷售員 平台營運專員 實習生 外賣專員 爛gag專員 寵物小精靈訓練員 辦公室要保持安靜你唔保持安靜就玩員 請將 -詳細個人簡歷 -個人經驗及作品集（如有） -近半年半身照 -應征崗位 -要求薪金 發送到[email protected]