《數碼暴龍與我》（長文慎入） 幼稚園嘅時候，我已經被數碼世界選中。唔知道為咗啲咩嘢原因，我呀媽決定買一隻當時好多人玩嘅他媽哥池俾我。但去到寶琳慧安園某玩具鋪嘅時候，店員向我呀媽推介一款設計俾男仔玩嘅寵物機—元祖數碼暴龍機。從此，我就愛上咗數碼暴龍。但講真啊，得嗰幾歲人仔，中文都唔識得幾隻，更何況要睇日文？其實我都係亂咁玩亂咁chok唔知玩緊乜。而家諗返，可能當時我鍾意嘅、開心嘅，係呀媽送禮物俾我嘅呢一刻，所以我到今時今日都仲好記得。 升咗上小學之後，我對數碼暴龍嘅喜愛有增無減。尤其係喺生活壓力非常大嘅情況下，數碼暴龍成為咗我嘅精神之柱。當時我呀媽係一個好典型嘅怪獸家長，將我嘅時間表排到抖啖氣嘅時間都冇。放學一係就去拉琴，一係就去操水，甚至乎係Why not both。完晒仲要衝返屋企做功課，就連星期六日都要去操水。所以其實我係好少睇數碼暴龍動畫，因為根本冇時間睇。唯一嘅娛樂時間就係每個禮拜日嘅朝頭早，可以去屋企附近嘅吉之島玩具部同一班互不相識，但同樣喺「被選中嘅細路」一齊對戰、換卡。最有印象都係有次我真心好唔想去操水，我襯呀媽入咗女廁，我就匿埋喺吉之島玩具部，一匿，就匿咗三四個鐘。我呀媽唔見咗我嚇到報警，最後仲要坐警車返屋企。 被選中嘅細路當中都有好多仆街仔。每次同人交換卡簿睇，睇完總會冇咗幾張金字或者閃卡。曾經有個細路甚至呃咗我部機。話說有啲數碼暴龍機係可以改機，令進化嘅時間縮短極多。當時有個同我差唔多年紀嘅小朋友話可以幫我改機，咁我好天真咁交托咗部機俾佢啦，不過之後就冇再見到佢啦。希望你哋今時今日唔好再做壞事啦。 對於數碼暴龍嘅回憶又點止咁少呀。小學某年，呀媽送咗部SwanCrystal（Bandai出嘅遊戲機）同Digimon Battle Spirit 2俾我。買機嘅時候我簡直覺得自己係全世界最幸福嘅細路。可惜過咗冇耐，我媽話我沉迷打機，一手將部機狠狠扔落地下，遊戲機即場報銷。我由一個幸福嘅小孩，變成一個只懂憎恨同發洩嘅人。從嗰一日起，我就經常發脾氣打爛嘢，更加發從心底裡討厭自己呀媽。大個咗一直都好想真誠咁原諒佢，可惜每次諗起，我都會好傷心。因為佢扔爛部機嘅嗰一刻，經已劃咗一刀喺我嘅內心深處。 升咗上中學之後，總會有人笑數碼暴龍低B、小學雞。係，我認我垃圾。為咗融入新嘅圈子、為咗唔被同學恥笑，我冇袒誠實地接受自己鍾意數碼暴龍呢個事實，仲好白痴咁同自己講：「大個咗就唔應該睇埋啲小學雞卡通片啦」唔睇都算，我竟然連啲數碼暴龍機都揼埋。而且一停，就停咗足足六七年。直到讀大學，價值觀開始有啲唔同，明白做人忠於自己先會活得舒服。剛好同期嘅Bandai喪推數碼暴龍廿週年活動，所以開始會儲返啲數碼暴龍機。喺心靈上，算係想向數碼暴龍呢個老友補償返失去咗嘅幾年。 雖然同數碼暴龍呢個朋友和好咗，但始終唔敢同佢太親近。因為深知道，有啲嘢，總會有終結嘅一日。感覺就好似喺2011年，當你知道數碼暴龍主題曲《Butter-fly》歌手和田光司先生鼻咽癌再次復發，你係唔會想聽到佢現場唱歌。因為每聽一次，佢就離你越遠。最終，喺2016年4月3日，和田先生不敵病魔，佢嘅聲音只能成為回憶。所以當我知道呢套《Last Evolution》係「真·最終章」嘅時候，我係冇諗過睇，因為我根本未READY。但有一日，有電影發行公司邀請我去Screening，我覺得一切都係命運，係數碼暴龍呢一個老友有啲嘢想同我講，所以我決定要去面對佢。 電影嘅內容我就唔多講啦，費事俾人話我劇透。只可以話俾大家聽，回憶總是美好，但一切光景已成過去，過分沉溺只會令人停滯不前。能夠帶着回憶面對將來，人，才能夠成長。不過我都明白，說話容易，實踐很難。數碼暴龍曾經係我生命嘅一部分，但如今我，經已失去呢一部分。 而且我深知道，喺呢個世界上，絕對冇一樣嘢可以填補呢一部分。 能令男子漢流淚嘅，係時間。 係呢，聽日做咩好啊？