【電影腕錶】歷代007戴咩錶？戴勞因為作者鍾意 Rolex時代 喺史上第一部《007》電影《鐵金剛勇破神秘島》中，Sean Conney就曾經戴住 Rolex Submariner Ref.6538出場，但原因就唔係Rolex贊助電影，而係為咗忠於原著。事關《007》原著小說作者Ian Fleming本身就係一個Rolex迷，經常戴住隻Rolex Explorer Ref.1016，於是佢寫書就安排James Bond都戴Rolex。電影中Sean Connery都戴Rolex就變得非常合情合理。該腕錶隨後接連出現於《間諜網》及《金手指》中。 特別值得一提嘅係，據報當年Sean Connery拍攝時戴嗰隻Rolex Submariner Ref.6538唔係道具、亦唔係Rolex提供，而係同樣身為Rolex粉絲嘅Sean Connery本人收藏。另有一說係劇組問電影製片人Albert R. Broccoli借嘅。 喺Sean Connery主演5部《007》電影後，系列迎來首次換角，搵黎澳洲素人George Lazenby出演。George Lazenby於僅有嘅一部作品中就戴過三隻Rolex，包括一隻Ref.5513、一隻Ref. 6358，以及一隻經過特別改造，加上紅色秒針嘅Ref. 6238。 電子錶時代 George Lazenby接棒失敗後，美高梅先搵Sean Connery返黎拍《鐵金剛勇破鑽石黨》救亡，然後再由Roger Moore接任James Bond出演《黑魔黨》。電影亦開始為James Bond嘅腕錶加入各種神奇功能，例如《黑魔黨》中嘅Rolex Submariner Ref. 5513就被設定為內置能夠改變子彈軌跡嘅強力磁石，個錶圈仲可以變做小型圓鋸。 另外隨住電子錶興起，Roger Moore於電影開場時亦戴咗隻Hamilton Watch出嘅Pulsar LED電子錶。接下來兩部電影就進入電子錶風行嘅時期，雖然電影中James Bond間中都有戴機械腕錶，但啲高科技功能就由Seiko出嘅電子錶包辦。1977年 《鐵金剛勇破海底城》中，Roger Moore就戴住隻可以接受MI6電報，再即場打印出黎嘅Seiko 0674 LC；而喺1979年嘅《鐵金剛勇破太空城》中，隻Seiko Memory Bank Calenda就被設定為一個小型計時炸彈。 TAG HEUER驚鴻一瞥、Rolex短暫回歸 整個Roger Moore年代，James Bond都係戴Seiko腕錶為主。直到1987年《鐵金剛大戰特務飛龍》中，James Bond改由Timothy Dalton飾演，腕錶亦由Seiko轉成TAG Heuer嘅Professional Night-Dive Reference 980.031——但只喺電影中出現10秒，亦係TAG Heuer腕錶唯一一次出現於《007》電影之中。Timothy Dalton第二部、亦係其最後一部《007》電影，《鐵金剛勇戰殺人狂魔電影》就回歸Rolex懷抱，戴上一隻Rolex Submariner Ref. 16610。 《新鐵金剛》Omega皇朝 Pierce Brosnan接任之後，Omega就成為《007》電影嘅官方合作伙伴，標誌進入「Omega時代」至今。Pierce Brosnan於《金眼睛》戴上Omega Seamaster Professional 300M Ref. 2541.80，電影中經由Q改造，擁有鐳射切割功能，並可用作遙距引爆器使用。隨後整個Pierce Brosnan時期，James Bond都係戴住Omega Seamaster Professional 300M Ref. 2531.80上陣。 Daniel Craig自2006年《新鐵金剛智破皇家賭場》開始接任James Bond，同樣繼續戴Omega，不過比起Pierce Brosnan時代就多啲變化，例如《皇家賭場》中戴上Seamaster Professional 300M Ref. 2220.80.00及Planet Ocean 600M Ref. 2900.50.91、《量子殺機》中戴上Seamaster Planet Ocean 600M Ref. 2201.50.00、《天凶城》Seamaster Planet Ocean 600M Ref. 232.30.42.21.01.001、到鬼影帝國就戴Seamaster 300 Ref. 233.32.31.41.21.01.001等。 《No Time To Die》 而黎緊嘅《No Time To Die》中，Daniel Craig當然會繼續戴Omega，據知會係Seamaster Diver 300M 007 Edition Ref. 210.90.42.20.01.001。另外Lashana Lynch所飾演的新特工Nomi亦會佩戴一隻38mm黑色錶盤、NATO錶帶的海馬Aqua Terra腕錶、由Naomie Harris所飾演的Moneypenny則會佩戴一隻27.4mm配備草綠色錶帶的De Ville Prestige腕錶。 資料及圖片來源：Watchfinder、網絡圖片