[為紀念今日打十號風球，我決定出個post]
[大家留哂係屋企被逼睇我廢話...wahahaWaHaHaWAHAHA...]

有日，一個睇落都相當肥胖嘅中年男士，訓住係床比救護員推入黎急症室。男士睇落都仲相當清醒。

醫生：「做咩事架？」
男士：「好肚痛呀！」
醫生：「痛左幾耐呀？點樣痛法呀？」
男士：「幾日啦，壓住壓住咁痛呀。本來唸住過兩日無事，今日太痛落街睇醫生，點知一落街就真係頂唔順要叫白車！」

醫生聽完，就叫姑娘幫手量血壓、做心電圖之類，開始唸下肚痛點解會搞到咁。點知，姑娘就突然之間拎住心電圖衝過黎比醫生睇。

醫生一睇完，「oh sh**」一句就衝左出去，臨走掉低左一句「你自己睇」。

我一攞起張心電圖，我都心唸一句「oh sh**，STEMI（心肌梗塞是也）」。

大家一見到，全部都即刻忙亂起黎。抽血嘅抽血，打豆嘅打豆；係五分鐘裏面，心臟科醫生都已經出現埋會診，幫病人做心臟超聲波。

心臟科醫生一睇完，「oh sh**」；將超聲波轉比我同醫生睇，我地再加多兩句「oh sh**」。從心臟超聲波可見，大塊心臟肌肉都已經唔識郁，明顯到我小小醫學生都一望就見到。

心臟科醫生：「我地而家要即刻幫你通波仔，如果唔係你生命真係會有危險。」

男士嚇到哦左一聲，簽完紙就比人推左上去通波仔。

人的心臟主要有三大條冠狀血管提供血液，大家估下佢塞左幾多？

===我是分隔線＝＝＝

心臟病同電視節目一樣，都有好多種，正確名稱為「冠狀動脈疾病（Coronary Artery Disease）」，簡稱「冠心病」，可以引發嘅徵狀，醫學界通稱「Acute Coronary Syndrome（急性冠狀動脈綜合症）」，簡稱「ACS」。

若果我地望住個心臟，如果冠狀動脈塞左：
(1) 唔劇烈運動就無事，我地稱之為「穩定性心絞痛（Stable Angina）」
(2) 坐定定都會無啦啦心絞動，是為「非穩定性（Unstable Angina）」
(3) 坐定定都痛，塞到心肌開始壞死，是為「心肌梗塞（Myocardial Infarction，簡稱 MI）」
而只有 (2) 同埋 (3) 會被歸類為 ACS。
[MI其實仲會分為 ST-Elevation MI (STEMI) 同埋 Non-ST-Elevation MI (NSTEMI)，但分別對普羅大眾黎講太難啦，只需要知道STEMI比較嚴重，（亦即係故事發生個款）就足夠。]

心絞痛或心肌梗塞所引致嘅痛原來相當獨特，醫學界一般會咁樣形容：
Compressing chest pain at left lower chest, with radiation to the neck, jaw, and left arm, often accompanied by palpitations, shortness of breath, and sweating.（左面心口拿住痛，會好似成噸重嘢壓實，抽到上頸同埋左手手臂都會痛，痛起上黎標哂冷汗，心口之前都試噗噗咁狂跳。）

可惜，呢種最典型嘅痛法，其實唔會次次都發生，亦唔一定會一有就符合以上講嘅所有野，有時可以只有其中幾樣亦得，有時更加可以痛都唔痛，所以一切都並唔係咩金科玉律。非典型嘅痛，醫書就會話係女士同埋有糖尿病嘅病人中比較常見。

無論如何，當大家一運動起上黎就會心口痛（無熱身拉親當然唔計）、或者坐定定都會痛到標哂冷汗，咁就要盡快睇醫生啦！

P.S. 附圖就係一張顯示住STEMI嘅心電圖，ST Elevations即係箭咀指住嘅地方。

===我是分隔線＝＝＝

開估時間。

頭先中年男士有嘅三條冠狀動脈，係塞足三條，通波仔亦係通足三條。一路做嘅時候，旁邊嘅人都不斷話：「佢撐到黎急症室真係一個奇蹟...」。