【何麒的生活隨筆】
何麒：淺談EDC (二) 口袋裡的光輝—電筒

上次講到外國嘅EDC，其實你去啲興趣嘅論壇例如CandlePower Forum，或者係Fountain Pen Network 都會見到人講EDC，Reddit 有r/EDC呢個subreddit 專係講呢個習慣，甚至你可能去啲軍品或者行山牌子嘅官網都會有EDC呢條產品線，其中都會有唔同嘅產品推出黎。咁佢地啲外國人平時返工或者返學又會拎啲咩呢？其中一樣最常見就係電筒。

講真嘅，有啲人做野要落地牢或者電線槽呢入啲無乜光嘅地方做野，有枝電筒或者頭燈係身一定會方便啲。同埋有時遇上家居緊急狀況例如屋企停電都可以拎出黎用啦。

如果你上Youtube 睇人哋啲收藏可能會見到電筒都有好多款，咁到底唔同款嘅電筒有啲咩分別呢？主要就係三樣：燈嘅類型、入咩野電池同埋枝筒嘅大細形狀。

首先，電筒嘅燈膽係有分黃膽（即係鎢絲燈膽）同LED。黃膽個色溫係暖啲黃啲，但黃膽其實係好哂電，同埋你用大電壓少少嘅電就會燒，所以而家啲人通常都係買LED燈膽。

然後就到電池，電池係一枝電筒嘅電力來源，揀電筒嗰時都要留意下係用咩電池。而家LED技術成熟，其實用AA/ AAA電芯嘅筒都夠用，而且容易買到，唔使一定買用工業用鋰電嘅筒。不過揀電芯就盡量唔好用鹼性電芯，一黎好容易漏汁整壞你件電器，二黎好易走電影響效能。買充電電池其實都唔係好貴，仲可能充返電繼續用又環保啲添。

接住落嚟就係電筒嘅大細同形狀。要咩大細取決於用咩電芯同埋要入幾多粒電。細筒細枝嘅可以放落褲袋，大枝嘅可能要放入背囊啦或者電筒套，講到尾其實都係睇你個人口味嘅。有啲款就係個筒身有個夾可以夾落腰帶或者褲袋口，呢樣嘢就有好有唔好嘅，因為有時夾到落腰帶係方便啲，但反手渣電筒可能會哽手。

最後就講下我有咩牌子推薦啦。Surefire 同Streamlight 比較出名，佢地都係出產戰術電筒為主嘅。Surefire 好多款式都係用啱啱講嗰啲麻煩鋰電，而Streamlight 比較多元化，有出產消防用嘅照明用品同一啲日同嘅款式。另外重有Nitecore，佢啲款式幾概念性幾科幻。除左佢哋之外，重有一個叫Maglite嘅大家都可以留意下。就咁講個名大家可能唔知咩黎，但早二三十年LED電筒未興起嗰時，有好多人會買大大碌Maglite電筒用黎照明＋當棍咁用。而嚟王依家鋰電同LED燈膽咁普及嘅時代，其實呢個牌子都出左啲新款。另外就重有Fenix，老老豆豆呢個係大陸牌子嚟，不過喺外國都幾賣得，望下就算啦。住喺外國嘅巴打我會推介你留意下Foursevens，佢以前係美國一個賣電筒嘅網站，最後就比人收購左，佢特別在於啲筒好多都係細細枝設計好細枝但做到幾高輸出，同埋佢有啲款係搵原條嘅銅，用車床車個筒身出黎，有啲款重有幫你拋埋光添，造工都可以話係唔錯。

啊，喺最後提多句啊，雖然警棍都算係EDC，但無特權嘅市民帶喺身係犯法㗎！記得千祈唔好帶喎，千祈唔好啊～

今次淺談EDC就講住咁多先，覺得有用嘅記得Share俾朋友睇啊。

（本欄逢周三更新。敬希讀者垂注）