【喺Economist嘅香港辦公室打GVG】 話請《經濟學人》嘅姊妹刊物《1843》，早前聯絡我話想做訪問；而個訪問特別之處，就在於要同受訪者做一件佢平時中意做嘅嘢。世界各地嘅社會人士，就係跑步食煙購物睇展覽館咁樣。 本來做外媒訪問，我當然提議嘅就係「行山」，透過行山去講下山頂嘅風景，又講吓自己有幾鍾意香港呢個地方之類果類大路嘢啦。點知因為武漢肺炎，話喺戶外太危險，呢個建議唔得。 結果，記者睇完《Unfree Speech》同埋《Joshua Teenager vs Superpower》，就反建議問可唔可以打機。我當時都嚇左一跳，話自己打開GVG，但都有啲懷疑，呢樣野會唔會上到呢種國際媒體。 而且都有問佢哋，就算肯都好，又到底點樣搵個地方可以打機呢，去我屋企又真係唔係咁方便⋯結果佢哋真係搵左兩部PS4返嚟，仲要買埋《Gundam Versus》，自己係屋企練左幾鋪。 然後幾日前，我就真係上咗位於太古港島東商業區嘅 《經濟學人》office，同兩位記者打咗大半個鐘GVG，成件事真係覺得好超現實，得意得嚟亦都幾有違和感。 打機當然緊要，但同時我都講咗對於未來政局研判，包括如果立會個半，北京會唔會搞臨立會2.0，一口氣DQ成70個議員，到時又點破局，透過要挾取消獨立關稅區，即「國際攬炒」反制中共。 當然為咗豐富訪問嘅內容，而純粹講述遊戲亦都冇乜特別，所以當然佢哋都要從點解我鍾意睇高達呢個角度入手，咁記者就問咗我好多關於高達嘅劇情，我都提到自己好鍾意睇《鐵血的孤兒》。 結果，兩位記者今晚就話我知，佢哋啱啱留意到，原來Netflix有Iron Blooded Orphans睇，之後為左寫呢篇訪問，兩個經濟學人記者真係睇緊呢套動畫，仲問我鍾意邊個角色咁樣。 可能有好多人覺得睇高達或者追動畫，係細路仔先會做嘅嘢？但其實好多動畫都有好深嘅寓意，反映社會實況，充滿政治含意，尤其是係高達所承載着嘅反戰思想，以及對於政體權力鬥爭嘅描寫，都係相當仔細。 點都好啦，都辛苦晒兩位記者無啦啦因為呢個訪問，竟然要去追《鐵血的孤兒》嘅動畫，唔知呢篇訪問見街之後會寫成點，但都真係希望呢套最呼應到香港實況嘅高達動畫，能夠讓到國際社會可以從一個更特別嘅角度，了解香港少年投入抗爭以致戰爭，種種掙扎同埋心路歷程。