《開戶三寶》

未入行之前，同大部份人想法一樣，以為兩手揈揈走入銀行，就可以開個戶口。現在知道，這樣想實在是Too Simple, Too Naive!

不是我誇張，而是要成功開個戶口，配合天時地利人和，絕對不容易！但問題出現在哪裡？為了所有同事着想，同時不讓大家白跑一趟，小妹在此強烈建議大家以後開戶口前，帶齊以下「開戶三寶」！

(1) 身份証
(2) 住址證明
(3) 錢

大家估下一般問題出現在哪一項？無錯，就是住址證明！

示範一：出現率89%

「哎呀， 我唔記得帶住址證明，可唔可以開住先？」
「唔好意思，唔可以。」
「幫幫手啦，我第二日再交返比你！」
《警訊》呼籲不要輕信來歷不明的陌生人。其實大家都是第一次見面，萬一我幫你開完之後，你不再補交文件，消失於人間，我去邊「嘔」份證明出來？小妹雖然不聰明，但也不要欺負我老實呀！

示範二：出現率55%

「咦？小姐，呢張好似唔係三個月內發出嘅住址證明喎！」我指着張皺皺的「梅菜」。
「唔係呀， 12月1日呀嘛！」
「係就係12月1日，不過係2015年喎！」
大霧並不是這樣博的。

示範三：出現率30%

「請問有冇帶住址證明？」
「有啊，我帶咗月結單。」Good，抵讚！
「呃⋯⋯小姐，點解呢張無印個地址？」
「吓？要有地址嗰頁㗎咩？」
「⋯⋯」
好吧，其實你已經盡了力，我不怪你。可能是住址證明這個term比較難理解，又或者是銀行寫得不夠清晰⋯⋯

示範四：出現率19%

「呃⋯⋯小姐，點解張住址證明唔係你個名？」
「噢！佢打錯我個名！⋯⋯不過差唔多啫，冇所謂啦，你照開啦。」
呃⋯⋯咁如果有個名同你差不多的人取走你戶口所有錢，請問仲有無所謂？

至於客人非常抗拒開戶時入錢，又是另一項迷思。不要問我點解要入錢落戶口，戶口是用來存錢的，如果你不入錢，請問你開戶口做什麼？大部份戶口有規定要求每月維持最低某個金額，我們苦口婆心提醒， 都是希望你們避免扣錢，that's it！我真的不懂，為何每次提醒戶口要入錢，大家都耍手擰頭，好像怕戶口會吃了你的錢呢？不過，開戶時入錢不是一個must，每間銀行的要求也不盡相同。我一般不會強迫客人入錢，所以，也請不要問我借錢「墊住先」入戶口了！

「你借俾我入住先啦！」
「吓？」
「我第二日咪還比你囉！你日日喺度返工，唔驚搵你唔到喎！」

天啊！現在問題是怕找不到我嗎？又是我的問題嗎？而且港媽從小教導，做女仔，除了不要貼仔，更不要貼錢返工！

好了，例子就先說這麼多，我想帶出的是，其實我們不是存心耍你，不幫你開戶口，而是你的文件不符合規定，就不能開，無情講。但願以後大家會帶齊「開戶三寶」，你合作時，我都做得更爽手！不過，如果你是希望藉著多跑兩趟來見我一面又另作別論。

圖片來源：Getty Images

【全民退保掃盲貼】

1. 政府話唔肯搞全民退保，諸多藉口。坊間又有各種質疑聲音，又話慷他人之慨。到底全民退保係咪咁洪水猛獸呢？不如一齊搞清楚少少概念先，不要人云亦云。

2. 好多人問，全民退保只會益咗「新香港人」？先莫論「新香港人」對香港的整體經濟影響到底如何，這條問題人人答案唔同。就算我們只睇支出的一面：沒有全民退保，政府一樣要俾綜援生果金，「新香港人」一樣有得攞，而財政來源則來自庫房。如果入境政策不改，人口持續老化，結果就是加稅，最後大家都要俾。所以，如果以為不搞全民退保就不用處理「新香港人」的養老問題，sorry，這樣實在是 too simple sometimes naive 了。問「俾唔俾」根本是問錯問題，只要冇入境審批權，就 one way or another 都係要俾。全民退保就是要找一個打工仔唔洗俾的方法來俾，先幫大家止蝕。至於入境審批權，當然要繼續 fight 啦！

3. 打工仔點樣可以唔洗俾？我們可以參考一下學者方案。他們提議向每年盈利過千萬的大企業增加 1.9% 利得稅。誠哥，係時候回饋社會了。另外，他們提議把一半的強積金供款改用作全民退保。與其被銀行同基金佬食，不如一個戶口統籌，起碼慳返行政費先。再加上政府的種子基金，三管齊下，打工仔就不用再在現有的供款之外再「科水」，也不用開新稅，政府話開新稅係靠嚇。得說明，這兒的確是有財產轉移的成分：從富豪的口袋重新分配到老人家的手中。在貧富差距超大的今天，這絕對不為過。

4. 或者你會擔心，今日就話有全民退保，萬一到我年老的時候個全民退保戶口冇晒錢，到時我冇得攞咪好唔抵？不用怕。學者方案成條數計晒出來，去到 2064 年都仲有盈餘。相反，如果繼續用現有政策來應付養老開支，庫房面對的壓力更大，隨時更易爆煲。

5. 至於 2064 年之後？到時人類移民火星啦，點答你呀。如果我真係計條 2064 年之後的數俾你，都只會變數字遊戲啦。現實一點，你不如反轉來問，如果不搞全民退保，只係用現行稅收來養老，去唔去到 2064 年先？

6. 最後最後，回到根本：今時今日在香港要養老，現行政策係唔 work ，一定要變。攞綜援，要先同仔女分家產，結果搞到家變。強積金，先唔講基金佬，家庭主婦又冇份，唔通家庭主婦就唔會老咩？全民退保，在我眼中不止是一個世代問題，更加是階級問題。係架，係要向大企業加稅先搞得成架。我唔覺得有問題喎。你覺咩？

學者方案詳見：http://www.hkscholarspension.com/…/12/全民養老金66學者方案1107記者會聲明.…

－－－－

更新：

7. 又有人問「喂，強積金自己供自己，你要我攞一半出來夾全民退保，我點知自己攞唔攞得返？」傻豬豬來的，強積金要 65 歲先有，全民退保一實行，你啊爸啊媽已經立即每個月每人攞 $3500，即係全民退保幫你俾家用呀，你話邊個抵？計埋條數你睇：強積金每個月 $1500 ，僱主僱員加埋等於 $3000 ，攞一半支持全民退保，即係 $1500 。你父母兩人，每人可以從全民退保攞 $3500 ，合共 $7000 。假設你一家有父母子女四人，父母退休而子女都返緊工，即實施全民退保之後，你呢個家庭的 net gain 是 ($3500 x 2) - ($1500 x 2) = $4000。無錯，一實行全民退保，唔洗等到 65 歲，家庭計是每個月淨收入 $4000 。而且你父母越長命，就收得越多；你不幸失業，佢地一樣會繼續有得攞。呢個方案，點都好過你自己俾家用你父母，另加你自己供自己果份強積金啦，係咪？

8. 想再說說學者方案中的強積金轉移是不是「累退稅」。我不喜歡太虛無的定義之爭，我比較重實際。對於低下階層來說，學者方案在現實中不會增加他們的開支，卻會增加他們的得益。這是一個改善，我就會支持。當然，你可以說整個設計仍然是不理想，不公義的。那我會很歡迎你提出一個更理想，更公義的方案出來，我會全力支持。但我也要指出，如果你真的是要和我爭拗這點的話，我們的分別就不再是全民退保該不該做，而是該如何做；也就是我們其實是站在同一陣線的，我高興都來不及。話時話，工黨年年都會提開徵大額股息稅，那些覺得學者方案過於「累退」的朋友到時記得要支找啊！

#廣告觀點：海闊天空、超級續航

到今時今日、呢個時勢仲問「愛兄弟？還是愛黃金？」，真係too simple、too naive。

我唔係要為蝗家強辯護，但係道德高地邊個唔識佔領？

四十幾歲人未試過出賣手足？我唔排除你係義氣仔女，但有冇可能係你賣咗而唔自覺？

四十幾歲人未試過俾手足出賣？一係你好彩有班真心兄弟，一係你身上冇乜嘢價值去畀人賣。

有說「政治是眾人之事」，又曰「你不愛政治，但政治會找上你」，生活裡的人際關係，也是「政治」，又有云「政治一日都嫌長」，人為了利益，這一刻稱兄道弟，下一秒賣友求榮，也是屢見不鮮。

人賣兄弟，不外乎出賣兄弟之尊嚴和信念旗幟，「你嘅信念海闊天空」正正是賣旗幟，而且不獨是家駒的旗幟、更是不少香港人嘅旗幟（編按：據知《海闊天空》是Beyond作品，而黃貫中及葉世榮尚未離世，生勾勾的兩個人忽然在廣告片的舞台上「被消失」，變成黃氏兄弟私有化作品，蝗家強連Paul及世榮都賣埋）。

但以前香港寬頻廣告都用《海闊天空》Endorse啦，又唔見你哋鬧王維基「消費」黃家駒？不同者在於出賣手法，假如蝗家強早前冇嗰張「喜歡你」世紀合照、就唔會有嗰句「Beyond係一個令我又愛又恨的名字」、就更加不會有今天這種民間迴響。

當日猶大賣耶穌，為兩袋金幣，今日蝗家強賣兄，好難猜測佢所得多少。但賣友求榮不單單為金錢財富，為溝女有之，為自己上位添人氣有之，為贏得社交人緣也有之，無形的利益，都是利益，兄弟是一顆踏腳石，踏腳石是為了踩一把的，踩得用力一點，自己的身價就抬高一點，人際關係又好一點，「人生超級續航」就不是夢想。

願那些「超級續航」的人「海闊天空」，直登家強的彼岸。

作者：LJ

短片來源：大陸手機廣告、香港寬頻廣告及梁振英FB

本版接受投稿，歡迎將文章及配圖inbox給我們，謝謝。
不想錯過廣告狂人文章，可Click我們這個專頁的like掣，再點選「接收通知／Get Notifications」。
follow 廣告狂人instagram:
http://instagram.com/madmanmonogram