輕輕評論一下 （以下全屬個人意見）

我不清楚土耳其的醫療系統是怎樣運作
但我難以想像淋巴癌在西方醫學下會被誤診。

首先要確診淋巴癌，病人通常會出現淋巴腫脹、發燒、夜汗、體重下降等徵狀。

醫生會替病人進行抽活組織檢驗(biopsy)再由病理科醫生在顯微鏡下作病理學診斷，去確定是那一種類的淋巴癌(Hodgkin or non Hodgkin lymphoma)。

之後病人會再做正電子電腦掃描(PET-CT scan)去作staging 以決定治療方案。而影像掃描亦由放射科醫生去做。

我難以想像血科醫生、病理科醫生和放射科醫生一齊犯錯誤診淋巴癌。

再者我亦想不透到底個second opinion醫生怎樣去確診病人患的是傷風而不是淋巴癌。傷風在病理科來說是很難確診的一個感染啊。

*另，一般來就化療引起的脫髮隨著療程的完結會長回來

**並不是每種化療藥也會導致脫髮

***如對癌症的診斷有懷疑，請在治療前找second opinion （但記住要盡快，別令病情惡化）

是咁的。
新聞報道話土耳其有一個男人只是患上傷風, 卻被醫院診斷為淋巴癌 (lymphoma), 病人三年來接受四個化療療程, 最後發現誤診, 話要告醫院云云。

我上 Google 翻查病人姓名 Yilmaz Kiziloglu, 英文新聞網站報道唔多, 只係認得 MSN news, 其內容都係冇乜 details.

作為醫生, 我有少少回應:

拿, 首先, 發燒/體弱/淋巴腫起真係可以係淋巴癌症狀。當然, 其他病 (例如病毒感染) 都可以有咁嘅徵狀, 這些症狀不是淋巴癌特有 (non-specific symptoms)。

第二, 香港報道話病人兄弟對報告有懷疑, 去另一間醫院複查結果, 結果「證實」病人只是患上傷風??

疑點一: 去複查結果, presumably 係三年後嘅事 (病人做咗三年化療)。 嗰個係咩報告結果? 當年如果係做淋巴活組織切片化驗 - 難道醫院會keep住組織樣本三年?? 如果你話個顯微鏡 slide 有影相, 有 photographic record? 病毒咁細, 要用電子顯微鏡先見到嫁喎...

疑點二: 就算醫院真係keep住組織樣本三年, 個傷風病毒真係仲 intact and detectable? 一般病毒要靠感染細胞來「生存」, 咁個樣本要點樣保存才可以在三年後 test positive for common cold virus, 我真係唔知...

結論:
我唔係話間土耳其醫院冇診斷錯淋巴癌, 更加唔係話醫院唔會出錯。We are humans, we all make mistakes. Even planes crash once in a while and kill hundreds. It doesn't stop us flying everywhere.

不過我估另一間醫院複查結果, 可能只係基於症狀的臨床診斷, 才認為當年係傷風病毒感染 - 好難想像有咩 test 可以驗返三年前病毒感染。

其實篇報導帶出嘅問題係, 傳媒好鍾意以訛傳訛地報導醫療新聞, 個個翻譯下又可以出街。 明眼人一睇就會覺得相當有嫌疑, 一般人睇完就會對西醫存疑, 甚至覺得西醫醫生冇料到, 唔可信, 「傷風都可以當 cancer」。

至於一些別有用心的人, 當然就最鐘意尼 d 新聞。After all, 如果你個賣點係自然療法, 精油等等, 而收入係網上賣書, 講衰你嘅「競爭對手」 can only be good for your business, right?

究竟 screenshot 中寫嘅「激素」 係咩, 我也放棄揣測了。

#利申我冇野賣
#聽就聽唔聽就罷
#係咪突破了盲腸
#咁咪會導致peritonitis

公院嘅病人成日覺得好無助，好似無人理，想搵醫生就永遠搵唔到。究竟醫生唔見左個陣發生左咩事？

通常巡房前，一組醫生（一個高級醫生帶住主診嘅小醫生，再加上若干個啦啦隊 [又稱醫學生] ）都會係護士站先傾哂所有佢地負責嘅病人最新發展，包括對上一次到而家有無其他唔舒服、會診、檢查之類。某日朝早，我地就係堆哂係護士站做緊呢一樣野。

初級醫生：「二十號床阿 xxx ，我地之前就係懷疑佢有 A 病，而家血壓正常，無發燒無屙嘔，睇野都清楚返。」

高級醫生：「咁佢隻藥開始食緊未？」

初級醫生：「我地仲等緊 consult 齊哂先，報告應該係哂到。」

微生物科報告，有。腦內科報告，有。眼科報告 ……

高級醫生：「Due to the abnormal involvement of the retina and macula, which is atypical of disease A, please rule out the followings: (1) leukaemia/lymphoma infiltration, (2) rare infections (e.g. cat scratch disease, Toxoplasmosis…下？！攞電話黎！」

（翻譯通：「病人眼底嘅不尋常發現與 A 病不太相符，請先撇除以下疾病的可能性：（1）淋巴癌及白血病、（2）罕見傳染病，如貓抓病、弓蟲病…」。由於 A 病嘅藥係唔可以係有癌症或者傳染病嘅情況下使用，簡單黎講就係「瀨野」。）

接落黎，我地一眾醫學生只有繼續打氣，但係醫生們就好似歡樂滿窿華咁樣不斷打電話：

1. 搵眼科講返究竟咩事
2. 搵腦內科講返最新情況同埋如何推遲佢嘅治療
3. 搵血液科研究血癌嘅可能性
4. 搵微生物科問返檢測個堆罕見病嘅方法
5. 搵實習醫生排好哂抽血同檢查

因為一份報告，各部門高級醫生係十五分鐘內聚師於護士站會診，換黎主診醫生係五分鐘後巡房同病人講嘅一句：「尋晚眼科黎左，剛剛到問咗專家意見，陣間幫你抽多幾枝血，確定埋唔係其他奇怪嘢就開始幫你落藥。」

我唔係話醫生永遠唔見人係正常，亦唔係話醫生永遠是對的；但我都希望下次當大家開始問候醫護人員屋企時，記得呢故事，知道醫生唔肯立馬衝過黎睇你，其實都可能係一件好事。