【龔成問答信箱】（Q22001-Q22020）

Q22001：

龔sir你好，有啲問題想問你，我依加28歲，曾經讀大學嗰陣時完全唔識投資但又亂咁嚟，當時買咗幾隻股票，如果而家放出去都蝕好多錢，

唔知要唔要繼續放喺度等奇蹟好，定係呢啲股票都係冇得救不如放出去？然後將啲錢用黎投資盈富基金？因為我係初學者 都吾敢投資其他股票住

以下係當初大學戈陣買嘅股票：

33安山金控購入價10.975 現價1.46
2389北京健康購入價0.8250 現價0.1110
8193亞太金融投資購入價0.9371 現價0.056
8269富譽控股 購入價3.6998 現價0.16
08310大豐港購入價1.21 現價0.2030

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你重點要放係佢地質素上，唔好諗有奇蹟，令佢地無端端去翻買入價，比你清貨。

如果佢係劣質股，出現而個機會率係極細，更常見係越跌越深，迫住你放。

你買的股票，我睇唔到有明顯投資價值，甚至有部份，有機會係財技股。我建議你沽出這些股票，換至其他優質股，咁會較好。

以你28歲，可以選擇一些「平穩增值股」+「潛力股」作投資目標。

你現時無太多投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

而你沽出的股票，我建議先用來集中投資盈富(2800)，會對你較有利。

------------------------------------------------

Q22002：

1.呀sir我想問進階班第二課慨網站巿盈率通道合理區範圍參考價值高唔高？

2.有代表性每股盈利的平均數為5年慨平均數，想問如果我用3、4年去作平均數會否失去代表性？

3.雅生活（3319）過往巿盈率13.31～25.92。行業巿盈率平均17.72～34.91。我應該自行調整過往巿盈率高低，還是採用行業巿盈率先比較合理，因為物管股大部分都是近幾年才上巿。感謝老師指點

龔成老師：

1）有參考價值，有D大行報告都會有這通道，原理有少少似我地課堂教的10年市盈率中間4年合理區

當然，最後都要自己做一些調整，因為只是程式化，網站是比一個參考方向你，你要自行調整及配合實際情況。

2）利用5年平均數，只是其中一個找「有代表」盈利的方法，絕對不是唯一方法。

最重要是「代表性」，因此，幾多年，並不是核心，如果該數據的經營環境同現時完全不同，就一年都不會用。

3）兩個數我地都會同，對於這股，用佢自己的較好，同時，我地估值時會較保守。你可以好佢自己過往數據作基礎，然後再作調整。

------------------------------------------------

Q22003：

老師，另外想代朋友問問，如果佢有200萬現金，應該點投資喺股票度？

背景：39歲，已有多項物業，有固定收入

龔成老師︰

我地財富組合除左要有增長力和質素外，平衡性都好重要。你朋友現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你朋友這筆資金，最好優先投入股市，去令成個組合更平衡。

以你朋友39歲，可以選擇一些「平穩增值股」+「潛力股」作投資目標。

若你朋友無太多投資經驗，潛力股這類風險較高的股票，就不要持有過多，最多維持2-3成好了，甚至先集中係平穏增長股類。

若有一定投資經驗﹐潛力股比重可以相應調高，佔組合約3-5成，視乎佢投資經驗多寡和了解這些股票程度而定。

現時大市只是合理區，你朋友的200萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

------------------------------------------------

Q22004：

成哥，我見市場預測黎緊通脹會來臨。 請問應該如何處理？會對市場有點樣既間接/直接影響呢？想請教下

龔成老師︰

其實一個正常經濟環境，係應該存在若干通脹，才算健康。但當通脹過高，就會影響日常生活，以至企業營運成本，繼而影響企業盈利能力。

如果政府以加息去對抗通賬，利息就會上升，一般會對股市、樓市都有影響，但我地要考慮當中的因果，如果背後是因為經濟利好而加息，就有可能對企業反而是利好的。

至於我地投資時，你就要考慮，通脹對企業盈利，造成什麼樣的影響。

若政府透過加息手段，去調控通脹問題，企業融資會有什麼事情發生。

當然，我地投資時，唔好估個走勢。無人知係唔係好快會有高通脹，都唔會有人知，政府會唔會出手干預。

因此，我地投資時，主要都係要根據現行估值，再用平貴，去制定買賣策略，咁會較好。

------------------------------------------------

Q22005：

成老師，我今年52，成老師我希望可以在55後半退休，轉做半職工作！

我遇到麻煩.... 不過先先多謝您，參考咗您建議同喺您嘅專業吸收，透過月供，我股票喺大巿升升跌跌都維持17至20％回報....

拉上補下，計埋現金終於第一個百萬。

未來會將大部分錢借比細佬比首期，佢兩年後會還返比我。未來，我只會留返20萬股票左右，10萬現金...

我手上有︰
車：比亞迪1211，175
賭：銀娛0027，金沙
內銀：建行
地產：恒基0012
公用：煤氣，港鐵，長建
指數：盈富
零售：1212利福

1。請問我留返邊啲好呢？

2。如我喺呢兩年間重可以每月儲1萬，我想供5千股票，定喺等到股價理想再入巿呢？

多謝，您一路以來悉心解答，助我哋理財... 因為您，我先可以借錢比細佬比首期，我哋都好多謝您

龔成老師︰

不用客氣，能幫到你就好了。

1) 你持有的股票，全部都係有質素。但你現時52歲，並打算3年後半退休。

因此，我會建議優先將一些波動性較高的股票沽出，咁會較好。

比亞迪(1211)和吉利(0175)會係較波性較高，可以優先沽少少。其次會係持股較多的恆基(0012)。

餘下的股票，你按比例沽出就可以。但留意，這些股票有投資價值。如果只係得1手，我就建議一直持有，唔好沽出。

2) 現時大市在合理區，你可以用一半資金月供，其餘一半才留起，等大跌市機會。

月供目標，會係盈富(2800)和一些收息股。用$2000至$3000月供盈富，餘下供2,3隻收息股。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22006：

老師，我想問一個問題，我想聽聽你意見。

關於購買今期居屋，我想問應該買鑽石山，樓價高，交通方便，每月供款有一點壓力，但日後轉讓比較好

還是買粉嶺，樓價低，上班距離遠，花時間，但供樓沒有壓力，還可以有餘錢作儲蓄或投資？

請問在累積財富方面如何考慮？

龔成老師︰

從投資角度，如果粉嶺居屋整體條件，唔係好差。你係應該選擇佢，因為長線才可以有更多資金，進行財富增值。

但從自住用家角度，選擇邊間，較難有一個明確答案。因為自住樓，除左考慮投資層面問題，也要考慮佢是否適合未來5-10年(甚至更長)的生活所需。

而且，你而一刻供款較吃力，但未來收入有可能改變，令供款變輕鬆。(當然，如果你係無信心，長線供得起，咁鑽石山就可以直接不考慮)

同埋你所講，如果你將來會換樓，物業的地區優勢，都係你要考慮的地方。

因此，你要係這些因素中，找個平衡點，去作出決定。

------------------------------------------------

Q22007：

龔成老師你好！我是一位單親媽媽，今年38歲有一位12歲女兒，每個月收入2萬蚊，每月可儲蓄1萬手上現金有二十五萬，手上股票如下：

1183：8OOO/5.3
3O67 :3000/17.012
939 :5000/6.2
1177:15000/8.14
1357:4000/2

請問龔成老師以上股票質素如何是否可以長線?

龔成老師︰

你持有的股票，質素上算可以。

但以你年紀，應先集中係增長上面。建行(0939)係收息股，增長唔高，現貨可持有，但唔好再加注。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，你小注持有可以，唔建議太大注。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時好集中係中生(1177)，雖然佢高質素，但持有過多，始終都會拉高左你組合風險。你中生(1177)現貨可保留，但新資金就唔好再放落中生住，等佢比重平衡翻先再考慮。

以你38歲，可以選擇一些「平穩增值股」+「潛力股」作投資目標。但開始投資前，我建議你先儲起半年開支，以備不時之需。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有資金(扣除半年開支後)，可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22008：

龔Sir你好，想問我媽媽所持的股票策略，她持有941中國移動 成本$55，5,000股

這股票一直跌到$47，本身的目的都係想收息長楂，其實佢嘅趨勢係咪一路都會跌？如果係不如放咗佢？

謝謝你

有幸有睇你寫的書，千萬富翁嗰本。雖然只係睇咗頭一個兩個chapter都得著啟發

我現在正在睇得你在書中推介的《秘密》，講關於吸引力法則。所以我都學用有錢人的方式/態度投資

龔成老師︰

若你媽媽目標係為左收息，你係唔洗理個股價升跌，照長線持有去收息，咁就可以。因為我股價波動，係唔會影響到你收息部份。

除非，企業長線質素明顯轉差，又或者派息政策有變。或者，此股你媽媽長線持有就可以了。

至於佢會唔會一直跌，中短期我估唔到。因為會受很多因素影響，有些因素其至跟企業本質無關。

但長線計，中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

佢增長力不算強，但作為一隻收息股，佢有合格，這股有長線投資價值。

係投資增值上，知識和正確思維，都係同樣重要。《秘密》這本書，很值得睇，你可以慢慢研究。

------------------------------------------------

Q22009：

龔成老師您好，我係澳門的讀者。因為疫情關係我還沒有機會上老師的堂，但我已在WhatsApp報名，現待港澳通關後報讀老師的課。

但現在有2隻股票想找老師先行指點一下，雖然我已閱讀了老師的書本，但仍味掌握估值方法，所以只從外部分析，但不知道他們現在價位是否合理。

1. 第一隻股票是巴郡（BRK.B），他所投資的公司都是老師在書中所說的好公司。它應是屬於水桶二的股票嗎？還有他現價是否合理？

2. 另外第二隻股票是台積電（TSM）。我看好晶片業的未來發展，因需要晶片的行業實在太多了，它既是龍頭，也有不斷進行研發體積更少的晶片。

它應是屬於水桶一的股票嗎？還有他現價是否合理？

3. 我有興趣進行這2隻股票的月供，所以想老師幫忙評估一下合理價範圍。問題有點多。勞煩老師。感謝

龔成老師︰

估值方法，書中略有介紹。但因為實際操作，係比較複雜，你到時在課堂上，我會用幾小時再具體解釋，相信你會較易掌握要點。

1) 巴郡（BRK.B）係一間成熟大型綜合企業，增長力係有，但唔會係最強的類型。

這類大綜合企業，估值係較難。因為佢包含了不同行業的公司在內。投資這類企業，你可以用分注模式，慢慢儲貨，會較適合。

2) 台積電係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

由於佢已有一定規模，所以算係水桶1至2之間。初步睇佢現價算係合理區頂，你可以考慮慢慢分注，或用月供儲貨，並長線持有。

3) 這2隻現價計，做月供係無問題。但緊記月供係長線計劃，最少做3年，並持有5年，才會有較理想效果。

希望疫情盡快過去，到時澳門見！

------------------------------------------------

Q22010：

龔sir, 我有個好消息講您知。自從聽您講及上咗堂重新部署自己投資，加入潛力股，近幾個月由賺五位數變賺六位數，有很大進步，真的多謝您。

我更買了您本80後千萬富翁，我都要進入瘋狂狀態，而且要做多些有意義的事。

而且，還債後仲有五位數字淨

龔sir, 本來我好驚 轉換環境，但受你影響。我勇敢行出第一步，不斷寄自薦信務求搵份高人工的工作。希望成功。為了成功，我越黎越厚面皮及積極

謝謝賜教

龔成老師︰

恭喜你，記住優質股要長線持有，才會有最佳增值效果。餘下持股，唔好見升唔少，就忍唔住去沽貨。

記住，除非真係去到好貴、大市好狂熱、或者企業質素變差，我地才會考慮沽出。

你開始願意去突破，跳出自己舒適圈，已經係向前行左一大步。相信成功，只係時間問題，努力。

------------------------------------------------

Q22011：

你好啊 大師傅，上年睇完你本80後既書後開始調整左投資心態 由短視轉成長遠目光 睇既係公司發展同將來及價值，感激。

本人30歲，之前儲落一筆錢，宜家人工19000，手上有︰

500股(75.3) 中電(2)，
70000股(11.24) 煤氣(3)，
2000股(43.35) 電能實業(6)
21000股(26.1) 中銀香港(2388),
10000股(12.26) 深圳國際(152),
3230股(43 匯豐(5)

然後都跟左你d意見月供左2800, 823, 66 各3,000，共9,000，現金大約20萬，有時騰訊600蚊會入 升少少就會賣左去賺千零蚊。

每年36000買宏利壽險計劃供15年 (已供5年)，另有基金每月派3000蚊息， 家用同日常開支約9,000,月供股9,000，餘下1,000，想35歲前被動收入20,000 有冇可能性?

對股票無咩技術 都係每日睇你d post 同書籍擴闊視野, 個倉有冇需要執一執?

感激不盡 希望有運你抽中指點一下

龔成老師︰

首先，你唔好再用短炒模式，去做投資策略。你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

如果你希望5年後每月有2萬蚊現金流，以股息率6%計，你需要本金400萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現有持股，質素上係無問題。但選股和配置比重上，都有問題。

首先，中電(0002)、電能(0006)、深圳國際（0152）、匯控(0005)只是收息股，增長力好一般。以你年紀，持有太多，會拖慢財富增長進度。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

而盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時持股中，公用股、銀行股、煤氣(0003)、中銀香港(2388)都明顯超標，你要慢慢調整翻個比重。

而月供方面，你都太過偏重物業類。領展(0823)當然是物業類，從港鐵(0066)業務性質而言，佢都算係半隻物業相關股票。

建議你減少這2隻股票月供金額，而抽出來的月供資金和每月餘下$1000，你可以先儲起，等大跌市才動用。

以下是一些適合你年紀的股票，由於你投資知識不高，可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

我假設投資回報有10%（連股息再投資），你每月投資$10000 + 現有持股(約170萬)，5年後大約會增值至340萬。

若你相達至400萬目標，你要加大每月投資至$18000。或將累積年期，加長至8-9年，才可以做到。

------------------------------------------------

Q22012：

龔Sir，你好，我有置業嘅問題想你指教。

小弟今年25歲， 即將結婚。我入息平均$20000，未婚妻入息$14000，銀行現金約有190萬多

我同未婚妻都想生小朋友，我應該去買樓/ 生小朋友，未婚妻辭職，收埋d錢租樓排公屋好呢？

我嘅擔心地方係買嘅樓必定舊樓，而2人學歷能力難以係工作上有大發展，怕背負債項多年到老，而居屋又好困難抽。

但排公屋，要生左小朋友先一家三口排得，擔心地方係等上樓起碼8年時間，未來要排幾耐都係未知之數，可能更多。

請龔老師比意見指教下我

龔成老師︰

首先，係給你理財建議前，我希望你先改變一下人生"消極"的想法。

你現在25歲，事業和人生才剛起步，不要這麼快就斷定自己，只能當個"普通的窮人"。

想當年我跟你相若年紀，人工不到你一半，憑自己努力，可以儲到100萬，現在更增值至1000萬以上。我學歷都不高，公屋出世。

相比之下，你現時客觀優勢，比我還明顯。我建議你唔好咁快只想公屋，要努力學好投資，去為自已財富增值，其實要自己買入一個自住物業，不是想像中咁難。

而且，物業如果有質素，其實係一個資產(而唔係負債)。因為你好似每個月都比錢落去，但其實你有部份資金，係買緊物業。

當物業升值，你就會從中獲益。

現時要成功輪侯到公屋，都起碼等5-6年。若你善用這時間，去投資優質股，為財富增值，很大機會已累積出一筆置業資金。

故建議你唔好只係一心諗住公屋，應該努力增值，去為自己將來增加更多可能性。

你25歲，可以用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有190萬資金可以先投入40-60萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

假設投資回報有10%（連股息再投資），你每月投資$10000 + 本金190萬，5年後大約會增值至370萬，相信對你置業和日後累積更多財富，都起到一定作用。

至於居屋，你可以照去抽。雖然投資價值不及私樓，但自住係可以。

另外，若你計劃短期內生小朋友，記得投資前先扣起相關開支。最好多留起半年開支作應急用，才開始這個投資計劃，成件事就會相對穏當。

------------------------------------------------

Q22013：

你好，龔老師！請問美股輝瑞同蘋果可作長楂和現在再買入？

龔成老師︰

Apple（AAPL）有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。

近年大部分時間在合理區中上部至略貴的水平，如投資要分注，長線持有。

輝瑞公司 (PFE)是一家全球研究型生物製藥公司。集團主要從事醫療產品的發現、開發及生產業務，其全球產品組合包括藥品和疫苗。

此股有一定投資價值，但礙於業務性質關係，盈利方面會較為波動。現價算合理水平，可分注或月供儲貨，並長線持有。

但由於業務上都有一定不確定性，令投資風險增加，故不宜太大注。

------------------------------------------------

Q22014：

你好龔成先生，本人今年34歲，月入3萬6千，太太任職護士，月入5萬，有一名2歲女兒，將會生多一個小朋友。

現在有一間居屋已補地價，太太名，市價600萬，還有300萬按未供。兩年後將會有宿舍，現時有現金130萬。

想請問好唔好買多間樓收租或佢其他投資？如果買樓，可以買邊類型物業比較好？唔該曬，希望收到你回覆

還有扣除供樓，養車，俾家用，請工人，家庭開支，每月可儲2萬

龔成老師︰

我地財富組合除左要有增長力和質素外，平衡性都好重要。

由於你已經有一間物業，現時資產組合，算係較偏重於物業類。因此，新資金我建議先用優質股增值，以免過於集中個別資產類別，而產生風險。

到你用優質股累積到一定金額，才再考慮第二個物業，這樣會較為穏當。

投資優質股方面，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時34歲去計，應先做好財富增值部份。策略上，你可以投資「平穏增長股」和「潛力股」。

你每月5成儲蓄，即是用$10000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那130萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22015：

成哥, 想請教一下, 港鐵(66)一直聽你說是優質股, 但點解佢股價總是浮游在$44左右, 無明顯既大增長?

明白佢有業務既獨特性同埋長遠都仲有發展空間, 但價位就反映唔到..? 還是當年社會運動令佢既負面形象大受影響? 呢隻股票之後會唔會升返高D?

利息方面, 是否應該選擇以股代息呢? 謝謝你呀~

龔成老師：

港鐵（0066）有質素，可長線。

佢無大升的原因，第一，佢過往一直都唔平，部分升值已透支了增長力。第二，近年對佢有不少事件都影響了中短期盈利，例如社會運動、疫情等，第三，佢發展最快的情況過去左，之後雖然仍有增長力，但不是高增長類。

長遠而言，佢始終有質素，佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的。這股可長線投資。現價大約在合理區中上部。如果要以股代息，可以選股。

------------------------------------------------

Q22016：

前陣子感覺到迷惘，感到投資好難，但其實好似你所講建立左個組合再慢慢擴大，等時間讓企業增長就可以了。希望自己可以做得到

老師你點睇加息？好多人話加息股價會跌，我都想這是入貨時機，但現在的貨要怎樣部署呢？定係都係長遠持有就冇問題？

龔成老師：

其實最重要是投資優質股，然後建立一個平衡的組合，長線持有。你要學識「唔好理短期股價」。

加息，一般會對股市、樓市都有影響，但我地要考慮當中的因果，如果背後是因為經濟利好而加息，就有可能對企業反而是利好的。

因此，我地分析時，最重要睇「企業基本面」，以及長遠因素。

你可以尋找一些質素較好，企業有獨特性，長遠有發展的企業，同時該企業風險度適合你的。

------------------------------------------------

Q22017：

龔sir ，想問下房託怎去分辨成長性？

為什麼領展可以有錢不斷去買物業，但其他房託如置富，陽光只能靠本身物業租金提升，但很少去買物業？

想問下順豐房託能否歸類為領展那一類有成長性的房託？

龔成老師：

每間房託的營運政策都唔同，領展（0823）較進取，想自己有較大的增長，因此會不斷去投資物業，但這動作都有風險的，業務不確定性會比其他房託為高。

而一般的房託，大多數只以翻身物業去提高價值，相對會穩健少少。

投資者可以按自己的投資目標，以及風險承受能力，去決定投資那些房託。

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的，但又不算好強的增長及賺錢能力。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

------------------------------------------------

Q22018：

龔sir你好！由上年股市開始升，就令我越買越多股，我想知我既投資組合入面有咩要賣出，麻煩你啦！

0001
2319
0175
1810

2689
0363
9988
1170

0883
1873
0831

龔成老師︰

從質素上，你持有股票，唔見有明顯問題。是一個潛力股和平穏增長股，有增長力，適合年青至中年人士。

但部份股票，質素上較弱。若你持貨係比較多，你可以考慮沽出部份，換至其他更優質的股票，咁會較理想。

玖龍紙業（2689）、信星鞋業(1170)、上海實業控股（0363）質素算一般﹐增長力唔會太高，不宜大注。

利亞零售（0831）出售香港「ＯＫ便利店」業務，預期未來發展只會一般，同樣不宜持有太多。

維亞生物（1873）雖然業務有發展，但有風險。

佢主要就臨床前藥物開發提供基於結構的藥物發現服務，例如基因到蛋白質（Ｇ２Ｐ）及基因到結構（Ｇ２Ｓ）。

睇翻佢主要客戶，主要包括位於美國、中國、歐洲等地的製藥及生物科技公司。

生意都有不差的增長，但毛利變化大，企業賺錢能力仍有不確定性，以估值計，現價唔算平。

業務是有發展的，但仍有好多不確定性，故暫時不宜佔組合比重太高。

另外，我想提多你一點。投資股票，唔好受大市氣氛影響，見個市係咁升，你就不停去入更多貨。

我地投資一隻股票，除左係要有質素外，定價都好重要。當市場氣氛較為高漲時，好多股票個價都會比人炒高。

若你這時候入貨，就好大機會會買貴左，影響長線回報。我唔係話大市較熱時，就不要買股票。但必需小心謹慎地做好估值，確保價格合理，才好出手。

------------------------------------------------

Q22019：

龔sir 你好，你點睇
香港寫字樓未來走勢
謝謝

龔成老師：

寫字樓同經濟有較大相關性，中短期會有少少上落（但不會大跌），長遠會平穩向上。

首先要睇經濟基本面，如果經濟持續地差，失業率上升，寫字樓向下，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

但我會認為經濟不會太差，因此，有可能向上。

在長遠計，香港始終土地有限，對寫字樓一定有需求，因此偏向上。雖然在家工作因素，會對需求有影響，但不是核心性，可能會影響了增長力，但需求仍在，因此長遠會平穩增長。

------------------------------------------------

Q22020：

龔成老師你好，剛剛經朋友介紹而去看老師的‘80後千萬富翁’，未看完，但已獲益不少。思想成有錢人已準備好...多謝老師！

亦想直此請教老師，我在$820買入了9626,現仲跌緊，要可繼續持有？

另外一883, 是否值得現在入市？
麻煩老師指點

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

嗶哩嗶哩（9626）有質素，有長線投資價值。

佢可以話係一個綜合性的視頻社區，在當中，用戶同埋內容創作者能夠有好多元的內容，並進行互動，內容包含生活、遊戲、娛樂、動漫、科技和知識等眾多領域。

另外，佢亦能夠支持廣泛的視頻內容消費場景，以專業 用戶生成視頻（PUGV）為中心，輔以直播、專業機構生成視頻（OGV）等。

根據報告，35歲及以下的用戶佔佢的月活用戶比例超過86%，月活用戶達到2.02億人，每年增長5成以上。業務正高增長。

佢收入主要來自移動遊戲、增值服務、廣告、電商及其他；收入成本包括收入分成成本、內容成本、服務器及帶寬服務成本以及電商及其他成本。

過往的生意高增長，這刻雖然未有盈利，但前景正面，這股有潛力，有長線投資價值，不過估值就較難，股價變化大，市場對這股的股值較分歧。

此股係有投資價值，若你只係投資小注，長線持有就可以，但要預股價上落較大。若佔組合較重比例，建議你最好沽少少，去平衡風險。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

現價合理，可以分注入貨。這類商品企業，都可投資，但就要明白不是最高質的企業，故不建議持有太多。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21921-21940）

Q21921：

老師，上完最後一堂，多謝你既分享同教導。

我follow左你個page好耐，但都係今年先開始認真學投資理財，以前以為只要儲錢叻就ok.

自問儲錢唔算差(當然無老師勁), 以前一個月揾一萬左右都儲到7至8000左右，因為細個開始就想收租退休

(大學個時我靠幫人補習都儲到10萬畢業)不過總係儲唔到大錢，次次一儲到一筆仔，就會係無厘頭既情況就會用左

直至認真睇投資書，認真睇致富心理先發現原來我方法算ok, 但心態唔好

老師，尋晚你話俾個終極目標自己，我好認同。收租退休都仲係我終極目標，但係依家學識要set short term goals

話說我買左樓，唔係最理想既，但都係我心水地方之一。新界藍籌屋苑，希望會係我第一間有既樓，之後會再換大啲/買多層收租，希望一步一步向目標前進。

多謝你過去8堂授課。雖然我未明得晒，不過都照報左進階班！希望可以學多啲野！

暫時我都只係做緊月供，見次次你講親既優質股都偏貴。同埋啱啱買完樓要少少時間回氣，差不多差左袋。

不過我會留意多啲股票市場，等自己既投資唔好集中晒係層樓度，雖然依家有mortgage link account, 但我諗揀啱股票既回報會更高，更快可以幫我買第二層樓然後開始收租。

Sor for 太長氣

龔成老師︰

其實你未掌握晒，係正常。但只要你努力溫書，再去實踐。好多你唔明的知識，就會慢慢變得明白。

因課堂教你們的，只是一些知識、技巧和經驗分享。你必需要去實踐，去累積經驗，我教的知識才會有用。

你現時投資想法，大致都正確。由於你財富組合，偏重係物業類。現時你應用新資金，先集中投資優質股。而你未對平貴太有把握前，可維持月供模式去做。

而第二個物業，你唔洗太急，最好隔長少少時間，先再考慮，以減低週期性價格風險。

至於進階班，其實你掌握到初班的7成知識，你就應該應付到。如果你覺得自己未到7成，你就在此期間，比心機溫，為進階班好好準備。

進階班見!

------------------------------------------------

Q21922：

你好啊，想請教下因為計劃緊買樓。

1. 你覺得應該放哂全部股票去比多啲首期好，定係留返部分股票唔放之後比少啲首期較好？

2. 另外，如果諗住可能半年-2年內買樓，係咪唔應該再做月供？

因為我同男朋友現時月供我：$5000 / 男朋友：$8000

龔成老師︰

1) 現時按息不高，我建議你借多D，空出來資金，用來投資增值，效益會較高。

而且，我地投資都會講求一個組合平衡性。如果你買樓，而要盡固股票，令成個財富組合，完全偏晒去一邊，其實係唔理想。

2) 要視乎你月供資金，係唔係需要用來置業。如果不用，你維持月供係無問題。

若要動用，你就要睇有多久，才會動用。若只有半年至1年，最好就不要月供，直接現金持有。

如果長少少，可以去到2年，你都可以維持月供。但選股上，就唔可以太進取，盈富(2800)係可以。

但比亞迪(1211)和小米(1810)這類潛力股，波動性太大，我唔建議。

另外，你可以考慮收息股，佢地增長力不高，但勝在股價波動較細，又有一定股息，都值得你考慮。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21923：

老師，我係你股票班學生，上年上你堂，真係獲益良多，感謝你一直既分享，同發放正能量，令我覺得自己都有機會做到。

但可惜我剛上完堂，婚姻出現問題，呢半年我經歷情緒問題，好想自己慢慢放下件事，好想向前行

想為自己打算，要靠自己係香港置業，決定自己生活，但睇過好多小單位，一個人供真係好吃力，供得樓黎，又無多餘錢投資，令我覺得無希望一樣。

睇住自己之前建立既股票組合，阿里同中煙都跌好多，而令到心情更差，好似已經努力存資金，但覺得唔會達到財務目標一樣，好灰心。

想多謝你的正能量分享，有時令我覺得仲有希望。另一方面我對唔住你，發生件事後，我無好好溫習，可能課程內容已經俾反晒老師你了。

但我呢排情緒好轉，我亦打算抽時間溫習，希望會pick up 反。感謝

龔成老師︰

每個人一生中，難免都會經歷一些人生起跌。在不順境時，會覺得做什麼事都很困難，有一種無形的無力感。

但你要明白，這個世界，唔會永遠只係給你不如意的事。就好似大雨過後，你是總會看得到晴朗的藍天一樣。

你可以給自己一個時間，去慢慢調整自己心情。有需要時，你可以尋找專業人士意見(如社工、醫生)。之後，你再調整投資和置業計劃都未遲。

中煙國際香港(6055)和阿里巴巴(9988)都有質素，中短期波動總會有，但佢地質素無明顯變差，你照長持有就可以。

月供方面，如果你係用我之前建議，你就照進行，就可以。

記住，你要先照顧好自已，才進一步去計劃其他的事。只要我地要按部就班，一步步去處理眼前問題，總會找到方向。

------------------------------------------------

Q21924：

龔成老師，我最近買了一些股票，比亞迪1211，恆大汽車708，中國平安2318，信義光能968，中芯國際981，工商1398，粵海270，這些股可以長期持有嗎？需要set止蝕嗎？

另想問問中國有贊8083有潛力嗎？想買黎長線投資，值博率高嗎？

另完美醫療最近兩日回了不少，現價8蚊左右可買入嗎？還是等待合理價4～6蚊再買？

VESYNC 2148我12蚊買，依家跌到10蚊想問需要止蝕嗎？佢係小家電龍頭，但由於之前有部份股權有禁售期，黎緊18號解禁，我怕會再大跌，請問需要止蝕嗎？但看佢基本面是強的，唔該哂。

補充一下買價︰

比亞迪1211：$171｛佔比10%｝
恆大汽車708：$36・35｛佔比10%}
中國平安2318 ：$83 ｛佔比20%}
信義光能968 ：$13・93｛佔比10%｝
中芯國際981：$24・75，｛佔比10%｝
工商1398：$5・02｛佔比20%｝
粵海270：$11・5 ｛佔比10%｝
阿里巴巴9988：$217・8 ｛佔比10%｝

龔成老師︰

這些股票都有質素，係一個偏向進取的組合。若你係年青至中年人士，這個組合係可以。

但比亞迪(1211)現價係貴，現貨可持有，但加注最少等到$135以下，才好考慮。

另外，恆大汽車(0708)雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

完美醫療(1830)現價依然唔平，你最好等佢有明顯回調，才慢慢小注儲貨。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

業務不算差，發展有潛力，但企業規模始終較細，業務未穩定，整體都有風險。若你只係小注，持有無問題，但就要明白當中的風險。

至於解禁，解禁唔代表股東一定沽貨。而且與企業質素無關，你係唔應該考慮。

------------------------------------------------

Q21925：

龔sir, 最近我睇完你一篇關於現金貶值的文章，這樣

你讚不讚成加按物業去做投資，例如股票、基金或年金？

龔成老師︰

現金長線都只會係貶值，我地今天借錢，明天雖然要回歸還同等金額的現金，但當中價值，其實已經係貶值了。

在現時低息環境，加按物業去投資，係可以考慮。

但大前題係你有無個明確的投資目標，可以確保你有效運用這筆資金，去增值自己的財富。優質股、基金或年金都可以考慮。前2者，你可以比較翻個回報，邊個較理想。

而年金，由於本身回報唔算十分高，若按息增加，有機會令你賺取的息差收窄，甚至消失，你要明白這個風險。

之後，我地就要因應你年紀，去睇翻自己現時負債水平，係唔係適合再加重負債。

若你係30歲，總負債相對總資產去到90%，都可以。但若年紀較大，到50歲時，就最多只可以50%。

------------------------------------------------

Q21926：

龔sir. 我現有的股票組合ok嗎？

恒生 16.97%
中國銀行 4.08%
領展 26.87%
中國人壽 11.28%
港鐵公司 15.38%
阿里巴巴 14.93%
小米 10.49%

月供組合ok? 已供1年

盈富基金 53.14% ($4000)
恆地地產 21.99% ($1000)想停供，供左1年都未供到一手...
小米 21.99% ($1500)
香港電訊 2.88%(供左1個月停供左，因為你說要先增值才再現金流)

想放左恆基轉投2800，想利用沽左既錢每月加大供2800月供金額到5000元，龔sir，請問你的睇法，謝謝

龔成老師︰

先講現有持股，質素上係可以。以你41歲年紀計，都適合你。

中國人壽(2628)質素只算中等，不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時恆生(0011)、港鐵(0066)和領展(0823)係超標，但由於佢地都質素，因此你不用沽出，只要利用新資金，去慢慢拉翻平衡，咁就可以。

月供方面，無問題。如果你想集中供盈富(2800)係可以，但唔建議沽恆基(0012)現貨，因為此股係有質素，碎股唔應該係你持有一隻股票與否的考量。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21927：

龔老師想請教一下，早前以26蚊入左2手 0241 阿里健康，今日跌到18蚊，請問如呢幾日以18蚊入番1至2手，呢隻股下半年，有無上升既潛力？

^_^感激不盡！

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

我唔知道佢下半年會升定跌，但以長線潛力計，這股有投資價值。但由於不確定性較高，這類股只建議小注持有，但你預佢股價上落大。

若你資金非常充裕，就算再加1,2手，都只係佔你組合比重好少，否則不建議加注。

------------------------------------------------

Q21928：

龔sir, 你好！ 有問題想請教你意見，本人43歲，而家住緊一層已供完既未補地價居屋，先生剛剛又買了一層新樓大約明年底可收樓，之後打算住新屋。問題是我層居屋可以點處理好呢？

我唔會補地價放租，亦唔想冒險放租。咁樣應唔應該賣左層樓佢呢？

層樓大約可放到450萬左右，加上我有130萬現金，可否用500萬買一啲收息股來用作生活費。理想係有每月2萬5，我今年開始冇做野，家中無小朋友，先生亦都唔想我再工作。

新樓方面先生可以自己供無問題及支付到大家既生活費。先生亦提出話如果賣左層樓之後10年股票收入會唔會追唔到通脹？

如果真係賣樓轉買股票請問邊啲會合適？（是否銀行股和公用股好）麻煩龔sir比啲意見我呀。唔該晒你。

龔成老師︰

你個情況，比較複雜。我一般會建議，最好將空置物業放租，避免浪費了收取現金流機會。

但你不考慮去補地價放租，我建議可以的話，你們先住居屋。新樓則放租出去，用以租養樓的策略。變相，你先生每月都可以空出一些資金，去用作生活開支。

如果你地都係希望賣樓，去買收息股，都可以。只要你選擇的股票係有質素，長線必然係跑嬴通漲。

但由於收息股作用，主要係提供穏定現金流，去支援你生活開支。因此，你唔好預佢有明顯增長力，只會係收下股息而已。

若你希望每月有2.5萬蚊現金流，以股息率6%計，你需要本金500萬，故你賣樓後，資金係足夠的。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

現時大市只在合理區，你可以先用一半資金，慢慢咁分注入市。餘下就等大跌市，才出手入平貨。

但你要緊記，唔好太集中係個別企業或行業，成個組合要平衡。相同行業不可佔組合多於30%，而單一企業不要高過15%，否則會有過度集中性風險。

------------------------------------------------

Q21929：

龔成老師，你好。手上有幾隻股我列為灰色股，已持有好幾年，已經跌到一個點，現在想重組下，我應該放哂佢，還是那些可以繼續持有，搏翻身？希望你可以給我意見，萬分感謝

1）1165,順風潔能，均價1.3,持有30000股
2）1848,中國飛機，均價9， 持2000股
3）6136康達環保，均價1.75,持23000股
4）1668華南城，均價1.65,持14000股
5）1800 中交建，均價7持6000股
6）1186中鐵建，均價7.6,持3500股
7）665海通，均價3.7,持30000股

希望你能抽空看一下

龔成老師︰

順風清潔能源(1165)睇唔到有明顯投資價值，你最好係沽出。

康達環保（6136）質素好一般，長線建議你換至其他優質股，會對你較有利。

華南城（1668）、中交建(1800)、中鐵建(1186)、海通國際（0665）質素只算不過不失，這些股唔建議持有太多。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。

最大的風險來自佢高負債，佢業務原理是借錢，買飛機，再租出給飛機公司。

航空業不確定性較大，對佢有影響，加上佢利用槓杆，風險點都會有。不過，這只是中短期情況，長遠仍是不差的。

現貨可持有，但總投資注碼不能多。

我相信你投資，存在不少核心性問題，例如選股、定價、理財概念等等。

見你持有股票，不單係質素較弱，而且好多時都係買貴貨。你要明白，買股票就同買企業，你必需要了解企業架優勢，點賺錢、行情有無發展，財務狀況等。

唔好聽消息，或者只係知個號碼，就去投資。另外，你要學識點樣去做估值，點去定平貴。

唔好受大市氣氛，影響你判斷。大市好狂熱，人人買股票，你就要小心。因為個價好易被炒高晒，影響你長線回報。

在你再投資前，我建議你先睇我寫架《80後百萬富翁》、《財務自由行》和《股票勝經》，相信可以幫助到你，去認識正確的理財概念。

之後你再重新計劃，你往後投資之路。

------------------------------------------------

Q21930：

早晨龔成老師 我想問一問關於6666恆大物業 自從我係16.4入左4手之後就一直跌到依家 跌左差唔多一半

我買之前都有做功課見佢持現金比例都好高 賺錢能力又唔錯 見佢管理物業嘅面積都增加緊 但預計嚟到佢9.8配股 佢母公司3333恆大又出債務等壞消息

想請問老師對6666前景睇法點 現價算唔算平 同埋如果母公司出事對佢有幾大影響 唔該晒老師

龔成老師︰

恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

至於配售，暫時只係預測，而且2.7億佔已發行股數，係一個好少的比例，影響不大。我地投資與否，應集中翻係企業質素本身。

恆大(3333)和恒大物業（6666）是2間獨立公司，就算恆大(3333)出事，財務上都唔會直接影響到恒大物業（6666）。

但恒大物業（6666）不少收入，是來自母公司提供之物業。若母公司恆大(3333)出現債務問題，影響其物業發展速度，將有機會出現負面影響。

你買入價略貴，近期股價回調不少，但都只算係合理區頂部。若你持貨不多，可以守。但持貨較多，最好沽出部份，去平衡風險。

------------------------------------------------

Q21931：

老師，好鍾意你本新書，教左我一樣好重要的事，失敗係必然，有機會去錯係好事。。。。但我都想問一樣你無咁專的事，就係我到30歲先知自己過度活躍症加d亞斯保加。。。

越來越覺得自己好難打工，因為唔鍾意跟大隊，唔明老闆的暗示，無法一心二用，易得眾人，短期記憶差。。。。。。

但我睇野好通透，危急時好應變到，長期記憶好好，觀察力好強，數理好好，英文好＜＜＜其實都比較係這兩個病常見的特質

你所講那5條路，邊條你覺得我行好？

謝謝阿sir

龔成老師︰

首先，多謝你支持我的新書。

你的健康問題，可以先請教醫生意見。以我理解，係可以透過藥物和一些訓練去治療的。

至於5條路點選擇，其實好睇你個人意向、興趣和專長。你現時健康上的問題，我相信唔會明顯影響到你行任何一條路。

「經紀團隊」、「專家」你可試下。其實「生意」都可以，但你可以試左「經紀團隊」、「專家」先，在這兩個類別，有好多你這些無法明老板想甚麼的人，反而更成功。

其實，行這些路重點唔係你當下能力。而係你是否願意投放時間，將自己磨鍊成一位專家。

當中會經歷無數次失敗，你覺得自己有否能力堅持下去，才是成功與否的重點。

------------------------------------------------

Q21932：

龔sir，有財務上嘅嘢想你幫手分析

本人30歲，已婚，暫時未有子女，但將會計劃生小朋友，與太太收入共50k左右嘅穩定收入。

資產：

1）約100萬現金
2）60萬基金保險儲蓄
3）一隻價值約30萬手錶（非必要不會變賣）
4）一層300呎一房單位，價值500萬左右，位於新界元朗區，於2018年做9成按揭上會，月供15000左右

現時與太太居住於家人嘅住所，每個月會俾番$5000家人作租用

有2個問題：

1）我應該作出投資嗎？因為驚拎錢出嚟投資，將會有小朋友需要用錢時，擔心未能即時調動

2）我應唔應該賣咗現時擁有嘅物業，因為我想買番近少少自己現時住嘅地方，當初置業係一時衝動，現時想平手賣出現時物業，並以9成按揭買另一較大嘅物業。

龔sir，我應唔應該賣出現時嘅物業再買入另一較大，樓齡較舊嘅物業？求解答，好困擾

龔成老師︰

1) 現金長線只會一直貶值，不作投資，變相你的實際財富，其實一直在減少。當然，我地都要因應實際情況，去預留一些現金，作日常交易和應急之用。

所以，你要睇翻你自己人生規劃，去調整投資大計。若你短期內，例如1-2年就打算生小朋友，時間較短，故這部份資金，最好以現金儲起備用。

但餘下的資金，我建議你進行投資增值，咁會較好。

你現時財富組合，已經有物業類。將來投資，我會較建議用優質股進行增值，這樣財富組合平衡會較好。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那100萬資金(要先扣除，有需要預留的資金)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

2) 至於換樓，你要先想清楚。因為香港買賣樓宇成本，其實唔細，一買一賣你當中會無左唔少錢。

作為自住樓，除非佢好唔適合你"長線"生活所需。或者投資價值好弱，否則我唔建議作出變動。

若你真係有實際需要，要轉換自住物業。你可以有2個方法，一個當然是沽出現貨，再換另一間。

另一個就係將而有物業放租，自己另租自住物業。這樣做，就可以保留你這個物業資產，同時也可以滿足你生活需要。

但大前題，係你這個物業要有投資價值，最少有能力跟大市同步，否則就無投資意義。

------------------------------------------------

Q21933：

你好，我買了2618（京東物流），現在我心態放寬，等盈富再跌，再入

京東9618 我也賺了少少時放了，把錢集中在剩下中

都是因為龔sir 建議，已留名你澳門班

龔成老師︰

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資，小注投資係無問題。

至於沽出京東(9618)，若你係因為風險承受能力，而作出的調整，係可以。

但從財富增值角度，緊記優質股係一定要長線持有，才會有理想效果，唔好升少少就沽，目標要放遠少少。

希望疫情盡快受控，可以早點，可以回澳門跟大家見面，澳門班見!

------------------------------------------------

Q21934：

老師，買了你的書看，學到不少價值投資法。本身持有自住物業，打算月供股票計劃約行2年左右，我都比較保守，想上落較少+慢慢增長，以下組合可行嗎？

進行了約半年：

1）AIA $3000/月
2）HKEX $3000/月
3）建行 $3000/月

打算加：

4）新鴻基 或 領展 $3000/月

供完余下每月約$10000 cash flow作buffer，有其他投資推介嗎？

龔成老師︰

你現時打算月供的股票，都係有質素。當中港交所(0388)盈利較受大市波動影響，會係較高風險的一隻。但只要你長線持有，以上5隻都係無問題。

這個組合算係平穏增長型，若你係年青至中年人士，這個組合都係可以。

新地(0016)和領展(0823)都有質素，但增長潛力，領展會高少少。至於餘下$10000，我建議你先儲起，等大跌市機會，才出手掃平貨。

緊記月供係一個長線計劃，月供最少維持3年，並持有這些股票5年以上，才會有較理想效果。

你月供2年勉強都可以，但再優質的企業，都要時間去增長，所以你必需要用長線持有模式，去處理這些月供得來的股票，才會有好回報。

------------------------------------------------

Q21935：

龔sir你好，今次係第二次聯絡你，過去半年期間，我買晒你所有著作睇晒(除左買樓4部曲果本)，亦閱讀左好多巴菲特同凱恩斯講價值投資既書，叫做開始慢慢理解股票係乜野一回事

我背景今年34歲，月入只有約18k，加埋太太都係只有約30k，上年買左層6m新樓，月供約15k，今年年尾亦會多個新生命，本黎以為一世人就要供樓供到60歲退休，

但自從睇左龔sir既經歷同著作，我深深相信只要有無窮既意志力同不斷增加知識，一樣可以改變人生，就係呢團火令我將所有非必要既支出cut晒，

放工/放假亦搵多份part time增加收入去投資(雖然真係好攰)，所以我先多謝龔sir令我改變左人生態度!而我亦係呢幾個月開始建倉，詳情如下:

66@500 $45.75
175@1000 $24.75
270@2000 $13.16
1099@400 $17.7
1177@1000 $7.74

1928@400 $38.4
1972@200 $23.75
3067@200 $18.96
9988@100 $217.6

暫時仲有約$250k(全副身家)係morgate link

有幾個問題想請教龔sir:

1)你對我所持股票組合有無乜建議?如果我目標係以增長為主，有無邊隻應增持/減少?或加入邊隻股票?

2)現有組合算平衡嗎?

3)我理解龔sir所講，優質股如果股價下跌，反而有加注既機會，但有樣野唔明就係如果我買入一隻股後，股票從未跌穿買入價，咁應該如何去𧗾量加注與否呢?

因為對於資金唔多既小股民，如果只持有一兩手，財富增值一定有限，但如果高於買入價加注咪會拉低左回報囉?

4)我打算短期內最多只會動用多50k投入股票市場，因為要再增加收入/同儲蓄後先會再拎出黎投資，餘下200k就留低以備不時之需，

但現在是否未到時候?係咪應該留起呢50k，等大市有明顯回調先動用?

5)1810&1448我自己好想入，如果無貨幾錢入第一注好?還是起碼等到合理價先入貨?論增長力是否1810會比1448高?

再次多謝龔sir你改變左我人生觀!由於我現時做零售業，夾唔到時間上你堂，但我已決定過埋今年就轉工，希望到時可以夾到時間見到龔sir你真人

Thank you sir!

龔成老師︰

1) 你持有的股票都係有質素和增長力，是適合你的，你照持有就以。

2) 大致上都平衡，但留意一點，以你年紀，潛力股大約佔5成就好了。若你投資經驗較少，要再下調多1,2成。盡可能控制在這個範圍，以免組合中風險過高。

而且，你要隨著年紀增加，要慢慢將潛力股比重下調。去到50歲時，大約只宜佔2成。

3) 你要用買入價，作為入市標準。我地去制定入市策略時，應用企業平身估值平值，去做決定。只要在合理區，我地就可以有計畫地，慢慢分注入貨。但升越合理區，開始貴的時候，我地就要等時機。

若你可用注數不多，第一手是在合理區頂，我地另一注，最好等有較明顯回調，才出手。

若你注數較多，第一手是在合理區中間買入。但由於手上持貨不多，就算回升至合理區中上，你都可以再入小注，再增加持貨。

當然實際操作，我們除了可用注數外，都要考慮埋大市情況，此股質素和潛力等，去得出個最終方向。

你可以參考我<<股票勝經>> P.316-317 中的"金字塔式買入法"。我們分配資金模式，大致上就會用這個方法。

4) 這50K，我建議你儲起，因為現時大市只在合理區，不宜將全部可用資金入市。要留有部份，用來等大跌市機會。

5) 小米（1810）和福壽園（1448）都有好有質素的潛力股，增長潛力上，我會比小米高少少分數。

現價計，小米（1810）略貴，要回多1,2成才算合理。而福壽園（1448）算合理區頂至略貴，無貨先入一注都可以。

我的書本，只是給你一些投資知識、技巧和經驗。真正令你改變人生觀的，其實是你自己。

我有時都開星期六班，你可以留意。雖然你暫時夾唔到時間上堂，但唔好因為咁，就停左學習。要多睇財經新聞、年報、相關書籍，去提升自己技巧，長線投資才做得好，加油!

------------------------------------------------

Q21936：

龔成老師,你好: 上年才認識你, 開始爬文.

本人己是中年,現在份工已做了13年(有中年危機), 但一點都唔開心, 只是求生活, 月入3萬, 物業Mortage尚有300萬, 只有40-50萬現金,上年開始供股$4000 AIA & $4000 銀娛.

想請教:

1) 現在開始步會否太遲?

2) 如果想用儲蓄錢(40-50萬) 加碼在每月供股部份, 應該怎每月供幾多, 買邊隻比較安全?

3) 需要點做才有被動收入3萬達到財務自由?

每月可以儲多$2000現金

龔成老師︰

1) 現時起步雖然唔算係早，但只要你用正確方法和心態去投資增值，都可以做到一定效果出來。

2) 以中年人士而言，都有增值需要，但策略上要保守少少。你可以選擇一些「平穩增值股」，作為投資目標。

以現時大市合理區狀況，你手上50萬，我唔建議盡用。你大約可以20-25萬，分開3年，每個月加大$5500-7000去做月供。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

你可以從中選擇多2隻，更好方法，就是全數加入盈富(2800)，佢係包括55間質素不錯上市公司股票的組合，有助你平衡組合中的風險。到你有一定能力，才買其他我建議的股票。

餘下現金和每月多儲的$2000，就是等大跌市時才出手。如果你能在這段時間學好選股等技巧，到大跌市時就能把握機會，財富增值會更明顯。

3) 如果你希望每月有3萬蚊現金流，以股息率6%計，你需要本金600萬。

你要透過以上方法，去累積這筆資金。到有足夠數量時，就將佢換成收息資產，去創造現金流，支付你退休生活的開支。

我假設投資回報有10%（連股息再投資），你每月投資$10000 + 50萬本金，15年後大約會增值至590萬，故這樣安排相信很大機會達至你的財務自由目標。

------------------------------------------------

Q21937：

龔sir, 現為大學year3, 預計畢業後有20-25萬資產。暫為14萬資產，5萬由屋企人保管投資，2.5萬貴金屬， 4.7萬股票，其餘為現金。

今年內預計會再有5萬現金收入作為增長，暫時收入以補習教學為主，7-8、12為收入高峰。現為21歲，如果想5年內有100萬資產，應如何部署增加收入？

小妹在投資市場上曾入手港股1.06 元入手432及美股以64usd 入手Nio，而432已離開，仍手持nio, 但虧損波幅較大。

我可以承受中等風險的投資，但仍未搵到合適自己的投資組合

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時大學year3，相信是十分年青的年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主。

貴金屬(如金銀、黃金)，主要係用來對沖突發性事件。佢本身唔會創造現金流，不宜持有太多。佔組合3%左右，其實就足夠，最好以實貨持有。

蔚來（nio）有質素的。佢係中國高端電動汽車市場運營，生產電動汽車，同時間佢發展緊自動駕駛，以及人工智慧等下一代技術的創新項目。

例如型號EP9、ES8、ES6、EC6，通過佢自己的銷售網路銷售汽車。長遠發展正面，前景就無問題，現貨可持有。

但你預佢之後的股價上落仍大，投資一定不能太大注。可長線的，注意風險。

盈大地產(0432)過去多年都出現虧損，加上負債不輕，睇唔倒佢有投資價值，不要再投資。

由於你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了。你相再保守點，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有25萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$8000 + 25萬本金，5年後大約會增值至100萬。你可以就著這個預算，去計劃你的理財方案。

當然，這個金額只係一個參考。你還很年青，負擔相對較少，應該盡力儲蓄去做增值，儲蓄比例最少要達至收入一半，才算理想。

------------------------------------------------

Q21938：

龔成老師你好，我今年32歲，月入$45,000，每月可儲$20,000至$30,000。

1. 目前持有股票：盈富基金2800 5000股@24.5、希慎興業0014 500股@29.5、粵海投資0270 2000股@12.08，以上是希望可以長揸收息。

2. 另外還持有：偉易達303 1300股@89.30、易大宗1733 12000股@0.78、中國銀行3988 20000股@3.29、碧桂園2007 10000股@14.57、明源雲909 1000股@60，

雖然部份都有息收，但股價一直上不回家鄉價，要不要考慮止蝕。

3. 現有$300,000現金，考慮再買入以下股票：金沙中國有限公司1928，國藥控股1099，阿里巴巴9988，銀河娛樂0027，京東集團9618，中國平安2318，

請問以上推介那一隻呢？建議買入價是多少？

麻煩晒

龔成老師︰

1) 你個財富增值概念，唔係太正確。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應先做好增值部份，而唔係去諗點收息。你現時持有股票，其實都有一定增長力，係平穏增長股類，都適合你，你長線持有就可以。

2) 你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你上述持股有質素，但偉易達(0303)、中國銀行(3988)只係收息股，增長力好一般。碧桂園(2007)負債水平好高，風險唔細。

而明源雲(0909)不確定性較高，這4隻股票，你都不宜持有太多。

至於易大宗（1733），此股投資價值不高。最大的問題，就是核數師意見，過往多年都出現「保留意見」，反映核數師認為佢盤數「有古怪」，有些問題，這類股，沽出較好。

3) 這6隻股票，都係有質素的增長股，都適合你。阿里巴巴(9988)和京東集團(9618)偏向潛力股類型，風險會較高﹐故要控制注碼。

現時這些股票，都在合理區，現價可以入1注。但由於未算平，故資金不要盡用，最好多等每回調10-15%，才再考慮加注。

------------------------------------------------

Q21939：

成哥你好，想問下你隻1024快手，我330入，依家大概回到去204，見佢業績都麻麻，請問可唔可以長線持有，定升返d轉其他。

另外本身個組合想入返d實業類，蒙牛乳業同農夫山泉，想問下咩價位入比較合理。

謝謝你抽空幫忙。

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，你現貨可持有，但你預佢短期股仍會十分波動。

蒙牛乳業（2319）有質素。

佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。

無論品牌、銷售網絡、發展，都不差，長遠正面。這股有長線投資價值，不過現價就唔算平，回翻10%先慢慢分注入，會較好。

農夫山泉（9633）有質素的。由於有一定的品牌價值，因此企業質素與發展正面，財務數據不差，生意與盈利都有理想增長。

不過上市不久，股價較波動，同時上市前數據可能執靚過，因此要注意風險度。現價合理區頂至略貴。

若想入貨，現價小注投資好了，這股適合長線的。

------------------------------------------------

Q21940：

您好龔成, 訂閱您Fb已多年, 以下有一問, 十分煩惱,未知閣下能否抽空賜教：

情況：媽有一個自住三房私人舊樓單位，樓齡32年, 估計如賣出約560萬。 因該樓舊需要夾錢換𨋢, 大約每戶比20萬, 暫時不知何時要付。

她已60+歲退休弄孫， 她除家用外無收入。我們３個子女現為搬出，但家姐租樓多年，有意和姊夫跟一細女回去同住，他們儲蓄20萬左右未夠錢買樓。

她有幾個選擇， 哪個是最好的財務安排?

１. 賣出，媽出首期比家姐買較新的樓， 家姐供樓 ，然後：

１Ａ： 4人（媽，姊，姊夫, 一細女即孫 ）同住, 可能繼續住元朗/轉去東涌/青衣。媽每月比少少租家姐當幫手供。或

１Ｂ： 自己另外買細單位自住，其餘投資／買股票做每月收入 （唧種可推薦給她這些退休人士而是比較高收入，低風險?）

3. 繼續自住, 家姐搬回, 每月給媽家用

或有其他選擇, 但現時未想到。

十分感謝！

龔成老師︰

其實係財務層面，這3個選項都係可以。反而我覺得，選擇邊個方法的重點，應該是你媽媽自己的想法。

因為香港一買一賣的成本較高，因此，未有明確目標前，（3）是較好。

當然，另外兩個方案其實都可考慮，最重要是你地成家人的意願，因為現時影響多人。進行（1）的方案時，要大家傾好各自的權益，清清楚楚是最重要，大家要「先小人，後君子」。

如果你媽媽，係想和你姐一家同住。若現有自住樓係配合到佢地長線生活所需，咁就可以。

除非有好大生活上問題，否則不建議換樓，因為香港買賣樓宇成本唔細，一來一回，會唔見好多錢。

若你媽媽不想同住，佢可以沽出現時物業，換一間較細自住屋。再將餘下資金，投資一些收息股，去為自己創造現金流，支援自己退休生活上的開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只係合理水平，資金不宜盡用，你可以先將部份，以分注形式買入上述股票。餘下資金，就等大跌市出現，才加大力度掃貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18321-Q18340）

Q18321：

老師可唔可以比啲鼓勵支持我 我衰貪心 學人走去買左啲老千股。

辛辛苦苦草落既錢冇左一大半 真係崩左 我宜家讀緊書 下年23歲先開始做地盤學徒計劃得15000一個月 第二年先有20000 之後就有大工牌

想下年開始試吓進行下學你5年草100萬 有冇啲咩建議可以分享下比我 我宜家真係好迷惘唔知點算

宜家剩低果啲錢都冇乜心機打理 又唔知點開始買返其他貨

龔成老師：

我1999年開始投資股票，2000年，投資電盈（0008）輸左8成身家，到2001年，因為炒輸，911事件，令我輸身家，到2003年，學人炒孖展，又輸左好多錢。

我之後，用心學投資，只學「真正賺錢的投資方法」，即是巴菲特的方法，每次買股票之前，要自己用大量時間去研究股票。

平均每星期用6小時睇一間企業的基本面，一年睇52隻，但我一年只買1、2買股票，我要自己睇得好準，好有信心先出手，點解我咁小心？

因為我過往輸得多！

自從我十幾年前輸左上述幾次後，我之後，投資絕大部分都贏錢，仲要好多都贏幾倍。

你23歲，好年輕，如果你可以好好學習，記住今次輸錢的經歷，保證你之後賺得更多！

------------------------------------------------

Q18322：

龔Sir你好，我又有事想請教了。
現在已每月用$10000月供股票，分別：

*2800盈富 $4000
*66 地鐵 $2000
*03 煤氣 $2000
*1211 比亞迪 $2000

除1211外，其他都是於恆指32000時供款的，所以全部暫時虧蝕。

我見煤氣近年股價不繼下跌且減少減息及紅股，故想將月供煤氣的資金改為供哪隻較好？

有以下心水：
1177 中生製，788 中鐵塔，6049 保利物業。
或其他更具增長力的？

謝謝。
*原想供1448，但多間銀行都無此選擇。

龔成老師：

煤氣（0003）增長力的確比過往略減，但不是無質素，如果你想組合有較高增長，可以將煤氣轉其他，而另外幾隻就唔好轉。

如轉，你可以考慮中生製藥（1177）或中國鐵塔（0788），如果你能承受風險及想較高增長，就中生製藥。

另外要留意翻，現時大市只處合理區，要一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18323：

請問老師，你常說一邊買股一邊留有現金待大跌市時就買優質股。

我現時買左100萬股票，現金仲有200幾萬，如果冇特別用途，衣家要入幾多？定係等大跌市先入？又點樣先定義為大跌市？

龔成老師：

以現時的大市平貴情況，你持有3-5成現金就適合，因此，你持有現金是較多的。

如果出現下跌15%以上，就開始是大跌市，到時現金的比較會進一步減少，買較多股票。

你可以將其中$50萬資金，分6-12個月，慢慢買入一些優質股，長線投資。

------------------------------------------------

Q18324：

買左你d書啦！老師

如果我現在有大約現金100萬左右，幾時係好時機可以買樓？同埋要注意咩？

而我屬於首次置業！另外我d股票有好幾隻都屬於未到買入價，包括#3，11，2388，1177，我應該點做好？係咪繼續keep住收息？謝謝您！

龔成老師：

多謝支持！要睇晒同「用」。

如果你想置業，要睇翻你的實質需要情況，你可以按《5年買樓4部曲》所教的方法，決定現時先買入細價樓，還是一次過儲多D資金，一次過買心頭好物業。

如果想買細價樓，最好是買完後，你有一定的資金剩，唔好完全無錢，有$100萬-$150萬已可以開始準備。

香港樓長遠仍向上的，不過中短期可能會調整（不會跌太多），你可以留意下。

至於你持有的股票，都是有質素的，但其中3隻增長力不強，你要睇翻自己的投資目標。要以「長遠的財富增長，風險與目標，配置」等，是否適合你，而不是單單考慮你的買入價。

------------------------------------------------

Q18325：

老師，我一路都有追睇你嘅Facebook教授，學到好多嘢，亦幫自己儲到啲錢，前一陣子經濟未明所以呢賣走左大部份嘅股票

今年35歲，收入每年大約40萬，佣金制度,每個月收入並不穩定，所以買樓的話需要比20%首期，或者用朋友公司做九成

現在以很平的租金租住朋友的單位，所以沒有迫切的住屋需要

面對而家的樓市有未知嘅恐懼，感覺有少少迷惘，正在考慮是否應該上車抑或將一筆錢另作投資

手頭上資產大約有1,000,000
當中有800,000為現金的200,000為股票及基金投資

另外還有800,000是父母交予管理，當中有400,000已做了一個高息定期， 其他的都是現金和一些股票

錢話多唔多而家都唔知點樣部署
所以想徵求下你意見

雖然自己未買得成樓但係依然都想為自己退休籌備下
所以想每個月供S&P ETF或者美國房地產ETF

龔成老師：

以你的年齡，投資方面可以做得更好，你大部分是現金，以及家人管理的定期，這都是太保守。你持有「有增長力資產」的比例較少。

從方向來說，你可以增加股票的比例，或會買樓。

如果你長遠都有買樓的需要，其實可以1、2年內，留意香港樓。香港樓由於供應不足，長遠仍會向上，而中短期會因經濟風險，而有可能下跌，不過，並不是大跌，你可以考慮把握這個機會。

如果唔打算置業，月供S&P ETF或者美國房地產ETF，都是可以的。要好好運用你手上的現金。

------------------------------------------------

Q18326：

老師我今年25歲了，同女朋友一齊儲錢，每個月，月入加埋大約有3萬6蚊，每個月大約儲到1萬2蚊

渣住
11800股16.5，3200股20.2小米
一手hsbc 47.5
一手吉利氣車16.7

現金大約仲有十五萬，我應該如何把握機會財富增值呢
3隻股都應該keep住持有嗎？

小米應該止賺嗎還是先賣出一半

龔成老師：

小米（1810）、吉利（0175）都是有質素的股票，你可以長線，但你唔好只集中在2、3隻股，要建立一個平衡的組合，因此，你之後唔好再加原本持有的股，應該加其他。

小米建議大部分持有，如果真的想賣，賣4分1至3分1好了。

至於匯豐（0005），以你的年齡來說，未必最適合你的。

匯控賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。同時不能持有太多。

至於現金，你可以動用$5萬，投資有質素的股，餘下$10萬就唔好動用。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18327：

你好，自上次提問後開始了第一次的投資，入了一手2800和更改了mpf 的組合。謝謝你的意見！

現時仍有約5萬可用作投資。我發現有兩隻股票的買入時機可能較理想，想請教老師你意見。

1. 1928金沙中國－ 現時的時盈率大概在17倍左右，現在是否一個時機入貨，以我現時的資金，最多可入3手，我應如何分配？

2. 0823 領展－ 現時的息率大概是4.48, 我都有與趣入手，想請教如何分配。

3. 像領展等房地產信託是否不用看市盈率，我在hkex看到領展的市盈率是負數，其實是甚麼意思？

4. 我的部署是2800+ 兩隻優質股（多數是1928同823）再加隻潛力股（但現時比亞迪和小米等都算貴）。

我預算大概的比例是
2800 30%
1928 30%
823 30%
潛力股 10%

再次感謝你在書中和回答Facebook提問的分享，現在跟朋友同事傾投資，發覺大家的取態很不同，有人覺得投資是困難和需要所謂很敏銳和捉準時機

有的會相對focus 短期獲利（其實感覺真的唔錯，有多幾千蚊錢用吓又或幫補吓屋企），但看完你的書更加強我的長線投資和持有優質股的方向。Many thanks!

龔成老師︰

緊記投資一定係要長線，以往我見短炒架人，都係大多輸錢收場。

1） 金沙（1928）現時在合理區，你可以分注入貨。

2） 領展（0823）是優質股，有一定規模，坐擁不少優質商場，而餘下仍有一些有條件提升的商場，故仍有一些潛力。

此股最少要求要有4%以上息率，才有投資價值，股息率達5%會更理想。

你可以現價入金沙和領展各一手，到有較大回調少再入餘下一手。

3） 由於房托收入中，會有一個物業重估的項目。佢唔係真正現金收入，只係一些會計數字，而這個數字會令到實際收入出現誤差，故這類股票之市盈率會相對無咁準確。

負市盈率，代表此股出現虧損。但出現在領展的虧損，並非真正虧損。只是物業重估數字影響，令到佢會計上看來，有虧損情況。排除這個物業重估數字，佢盈利是正數的。

4） 由於你年輕，我建議你加大潛力股佔架比例。但好多潛力股現價都偏貴，入貨時要做好估值，或用月供都可以。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

------------------------------------------------

Q18328：

請問老師信義光能（968）進行配股，股價一度下跌，可以襯這機會吸納嗎？另外想問，一般配股是否都會出現股價下跌

我在哪裡可以看到這次配股的原因？
想查看一下是否作營運資金

龔成老師︰

由於配股時會發行新股，故股價會按比例下調。

信義光能（0968）宣布通過配股集資26億元，用作擴張太陽能玻璃產能的資本開支。

環保能源會係大勢所趨，未來光伏行業，在中國以至全球發展都係正面。

此股係有質素的，雖然股價較為波動，但多年來都保持向上，2018年的生意就出現了下跌，但近年慢慢回復增長力。

佢回落主要係早前價值過高，股價只是回落翻較正常水平。現時價格依然係有點貴，如果你無貨，可以考慮回多1、2成先開始買。同時要分注慢慢入。

有關今次配售資料和公告，可以係港交所網頁找到（附相關連結）。

https://www1.hkexnews.hk/listedco/listconews/sehk/2020/0903/2020090300006_c.pdf

------------------------------------------------

Q18329：

龔成老師，你好！我今年23歲，任職公務員，月入15000，現有32萬 現金，目標5年內儲到150萬。

請問資金上可如何分配及投資？

另外，打算開始每月2000 買股票，該選哪一隻股票？
謝謝

龔成老師：

如果要5年累積到$150萬，你要加強儲蓄，以及投資方面要進取少少，先做到。

第一，每月要逼自己儲$8000-$10000，你可以想方法增加收入及控制支出，第二，要利用投資去進行增值。

你可以要集中投資潛力股，但這就會較高風險，同時要求你有較高的投資實力。

現金$32萬，你可以將一半投資股票，餘下一半就等機會。慢慢分注入，唔好急。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18330：

龔sir你好，留意左你既facebook同youtube，發現投資理財既重要性，近期先開始學，想3年後有一百萬可能嗎？

現時29歲，有10萬現金，15萬保險基金（而家退保就會得話6成），4.8萬儲蓄保險，另外用左18/9萬買左以下股票：

345一手@26.85
1038兩手@40.45
3兩手@10.89
1299一手@70.6
4一手@15.02
823兩手@60.2
405兩手@3.6
1810一手@23
1972一手@20.95

1.以上組合會否太散？

2. 現時大概可以月儲12-14k, 想開始月供股票，以下組合可以嗎？

2800@3k
[email protected]
[email protected]
[email protected]

其餘儲現金，想再分注買入823/4。
謝謝！

龔成老師：

3年後預期有$80萬-$100萬，能否累積到$100萬，都要睇市況，以及你的投資能力。

1）唔算散，當中都是有素的股票，可長線持有，不過，以29歲來說，增長力就不算強，你可以加入多少少較有增長力的股票。

2）可以進行月供，當中3隻都是較有增長力的股，可以月供，長線投資。

要好好利用餘下現金，投資領展（0823）及其他股，但唔好太心急，要耐心等機會。

------------------------------------------------

Q18331：

龔sir 你好

我想問我持有0762中國聯通,平均價$5, 30000 股。 ？長遠睇好中國聯通嗎， 定係而家有得就好快啲走咗佢？

龔成老師：

中國聯通（0762）本質不差的，但賺錢能力比過往有減弱情況，增長力都是，佢是平穩增長類別。

如果你想財富組合有較高增長力，這股未必最適合，如果你想組合穩定，這股都可以作為其中一員。

------------------------------------------------

Q18332：

老師，我有一個小孩，家庭總收入十萬/月，有一單位收租（租金剛等如按揭）

我和先生從不投資，現在想兩年後移民。請問如何投資較理想？謝謝

龔成老師：

如果打算兩年後移民，你投資就不能太過進取，應該儲現金，作備用，等安定好，先慢慢真正投資增值。

這刻，會考慮現金行先，餘下的都可以投資，可以考慮一些環球股票基金，美股基金都可。如VOO、QQQ，你有美股戶口都可投資。

------------------------------------------------

Q18333：

龔sir, 你好
我今年29歲
月入28.5k

之前跟個同事上外匯自動交易班
學費同埋落場交易都唔見咗成廿萬

之後買咗部智能售賣機又唔見咗6萬
但完全回唔到本，盈利都淨係拎黎俾哂部機既管理費

因為租緊屋住 大概每個月只儲到10000~13000
而家手頭上有58萬cash

1000股0008
500股0006
500股1038
1000股6823

請問點先可以盡快達到財務自由?
P.S. 本身無咩接觸股票，都係睇你個page先了解多少少

龔成老師：

我過往做迦外匯孖展經紀，好明白投資外匯根本好難賺錢，所以我地同事無人會自己玩。

另外，我建議你多睇書，打好基礎，你要起樓，就要打地基，這點好重要。

你現時持有，不是無質素，但有兩點注意，第一，集中在「李氏」的股票。第二，你年輕，唔應該集中在這些收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時手上現金，只動用$20萬好了，慢慢分注入。餘下資金等你有更多投資知識先動用。

你可以考慮盈富、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18334：

你好，我想問問題，我已經31歲，投資左：

135 價位6.55一手
6969價位36.04一手
9988價位247.4二手
00005 價位62.72二手

依家應該可以點部署？

龔成老師：

昆侖能源（0135）匯豐（0005）只是收息股，其實不適合你投資，因為增長力不強。而你年齡應該要增長較多的。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價升了不少，現價唔算平，如投資真的小注好了，而這股有長線投資價值的。

至於阿里（9988）都有長線持有價值。

------------------------------------------------

Q18335：

呀Sir，請問點解近期中國鐵塔股票下跌？是否熱潮過後既調整？

我見佢2019年d ratio (ROE,Profit Margin, etc)都改善左好多，PE好高，現價是否適合買入？

龔成老師：

中國鐵塔（0788）有質素的，部分財務數據有改善，佢本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

但股本回報率不高，是這股較弱的地方。

因此，這企業本身並不是好賺錢的能力，企業再投資的回報率一般，這點市場明白，而市場會期望行業的增長帶動這企業。不過，在中期業續見到生意的增長只有5%，這是一個較低的水平。

這令到市場對這股的期望減少。現價處合理水平，不過增長力暫時睇只是中等。

------------------------------------------------

Q18336：

阿sir 我做緊功課時候發現，你話第二步係5年數據，係咪核數師 (無保留意見)為其中一個基本準則？ 我check 過9988, 883, 27, 6862, 2313,175的2020數據都係”不適用”, 原因係乜野呢？

係咪有咩特別原因都會令一啲有質素股票的核數師意見為不適用呢？

龔成老師：

兩個原因，第一，如果是中期業績，就是「不適用」。

第二，2020年頭，出現了疫情，影響了核數的工作，所以佢地不少過程都延期或受影響，令你見到「不適用」。你不用擔心，這不代表企業有問題。

「不適用」不代表企業有問題，不用擔心。

------------------------------------------------

Q18337：

我係你學生，我用你教的選股法，簡了799, IGG 做分析，有以下問題想請教阿sir.

1. 利息覆蓋率的數據可以在哪裡找到呢？ 我睇左好多次財務報表都找不到單純利息的字眼，而該股的利息盈利率為395.089, 是否可用這數字呢？

2. 股票上大行預計PE值，是否越低越好呢？ 因為代表預計盈利上升。

而該股現時PE 9倍，預期PE 12倍，是否預計下年度業績收入會減少呢？

3. 於二零一九年四月十日，本公司的全資附屬公司天盟香港控股有限公司，訂立協議收購位於意大利佛羅倫薩的歷史性綜合設施－Palazzo Magnani Feroni

以及該物業的管理公司－Cedro S.r.l（「管理公司」）之100%已發行股本，收購總價2,013萬歐元，可予以調整（「收購」）。本集團擬將該物業重新發展為手機遊戲藝術人才培訓基地及歐洲分支機構。

一個遊戲商以近2億港元收購建築物以作培訓及分支基地，是常見的做法嗎？

既不是投資項目，一來不會因為該資產有收益，而這筆開支卻算入投資活動的業務合併開支，明明收購一棟物業以作經營之用，何解不是經營活動的開支呢？

4.該公司董事會共持有8成以上股權，其中三名大股東分別持有23～30% 股份，算是過度集中嗎，會容易出現自己人古惑嗎？

5. 阿sir你對呢隻股票有咩睇法？

我見佢現金流係好充足，ROE亦有反映再投資回報，不過呢間企業好有良心，用左30pages 講佢點樣對員工好，對社會做公益咁

當然我內心好欣賞佢，好希望成為佢員工之一，佢又會用股份獎賞員工，又捐150萬口罩保護衣俾國家，佢份年報一個圖都無

又無好好解釋在不同國家收入，而佢又講到自己好全球化，有成7.2億用户。但主席報告上講的都沒什麼吸引重點，你覺得點呢？

龔成老師：

1）你在一般的財經網站，都能找到，例如我教你的網，你輸入IGG（0799），去「公司資料」，「財務比率」，在尾二的欄位見到「利息盈利率」。你見到佢395倍是正確的，只要大過5倍就合格。

2）預計市盈率理論愈低愈好。如果現時PE 9倍，預期PE 12倍，預計下年度業績盈利會減少。

3）間中都會有，不過我未細仔研究，如果對企業財務數據影響大，就要關注。

當中有好多複雜野的，我地好難表面解讀。

4）少少集中，但由於這股的市值不是好細間，因此問題相對不大，但都要關注。

5）IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

主席報告不夠具體，這是扣少少分的，因為我地投資者想了解多D，而佢表述不足，但我地最重要，仍是睇業務。

整體上，這股不是無質素，但由於有風險，因此唔建議大注。

------------------------------------------------

Q18338：

老師，想請教一下，近期股市波幅都大，下列為本人持有比較多的股票，因為經常見到你對某些股票評價剛好是我持有的，買入價好像都是高位

所以想請教一下，是否繼續持有還是先走去投資其他比較值得的股票。

金沙中國1928 / 12000 / 32
長和1 / 5000 / 58
領展823 / 2000 / 69
中銀香港2388 / 10000 / 24.5
中生制藥1177 / 50000 / 9.3
舜宇光學2382 / 5000 / 126

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買價價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

上述持有的，都是有質素的股雲你持有是無問題的，但部分的增長力不強，例如長和（0001），要睇翻你的投資目標，是想收息還是增長。而金沙（1928）、中銀（2388）則是平穩增長類。你建立平衡的組合就得。

------------------------------------------------

Q18339：

成哥，感恩三年前看到你的Facebook，令我由過去月尾存摺不會過千，到現在花了兩年半時間透過投資及儲蓄達到最少有三十五萬。是你的書及股票班令我明白儲蓄、投資、目標的重要。謝謝你

最近哥哥和我轉按了物業，還了之前貸款後各分到85萬現金，以前月供6000，現在月供7500。其中三十萬我會用在我的夢想-開蛋糕店上，作為營運資金。餘下60萬現金想全部用作投資，短期內都不會使用。

本來想投資386,但正如你所說這個年紀還是投資增長股比收息股好。如果60萬分注投資到3883可以嗎，我看過它的基本財務數據都幾好

龔成老師：

太好了！每次見到有這樣實質的改變，我都會覺得我所做的事有意義！

如果你做生意，建議你多留現金。暫時只建議你投$30萬，餘下資金，你當等投資機會，或作生意的備用資金，會更好。

你唔好只集中1、2隻股，而是要建立一個組合。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，你可以將這股加入組合，但不是組合的核心。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18340：

我見有人話1177係老千股，係咪？

龔成老師：

好奇一問，是一些網友講還是某些「專家」講？當中的理據是甚麼？

因為中生製（1177）每年的經營活動現金流量，去到$50億，這類股好難是老千股。佢近期股價的確略貴，但業務本質不是老千成份，股價會波動，但長遠有投資價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

(右下角開啟自動產生字幕)三個免費挽回教學影片立即參考：https://bit.ly/3BMBqcY

冷凍是其中一個最常見的挽回方式，分手後之所以需要冷凍是為了降低對方的反感，讓對方在這段感情中有喘息的空間，日後才得以順利恢復聯絡，

到底該如何判斷自己是否需要冷凍？一旦面臨被前任封鎖的情況，亦或者對方不願跟你有任何互動的時候，那就必須果斷冷凍！

因此今天我將會分享如何使用冷凍法，讓前任重新對你產生興趣，不僅跑來主動來跟你恢復聯絡，還會越來越想靠近你，最後成功復合的超殺假想敵挽回法！

如果你不確定自己該不該冷凍，想要快速挽回前任的話，那我強烈建議你完整看完這支影片，你將會收穫良多！

以下是問題簡述：

因為愛情觀不同導致分手，她封鎖了我的FB及IG，

表示先退回朋友關係，我們現在每兩天傳一次簡訊，

但都是偏冷淡的回覆，請問我現在應該用冷凍法？

還是朋友挽回法？我該如何自我提升與改變？

如果你的感情也有類似像上面敘述的挽回問題，強烈建議你把這支影片完整看完。

今天的分享有幫助到你，請在以下留言讓我知道，也請多多分享！

《愛情時光機》三個免費挽回教學影片立即參考：https://bit.ly/3BMBqcY

#戀愛診療室 #愛情時光機 #失戀 #挽回 #復合 #冷淡 #冷凍 #改變 #假想敵

＃飛宇 ＃feiyu #feiyuG6 #GoPro三軸

入手近二個月很不錯的GoPro穩定軸
但收音問題還是要克服
最好能外接麥克風或是純錄影
收音分開處理

有興趣可來粉絲團問 FB https://www.facebook.com/mycart/

＝＝＝＝
特色：
整機防潑水設計。(防水等級：IP67)
以藍牙與手機連結，以WIFI與相機連結。
新增OLED顯示屏。
一鍵改變相機拍攝模式，多種拍攝模式無縫切換。
5000mah超大容量電池，給穩定器提供充足電力。
自動旋轉模式任意指定轉動路徑，完美匹配延時攝影和自動拍攝。
多種工作模式可選，適合大部分拍攝場景。


訂閱：https://goo.gl/hBkJLR

elos電動化後教學及小技巧 http://pse.ee/5QN3G
我的每天VLOG https://goo.gl/dm1T4n
留言回覆整理 https://goo.gl/hNKq2H
電動滑板影片 https://goo.gl/wPA3vi

elos改電動：https://goo.gl/wDa9GM

i3+小改款代購： https://goo.gl/mtqi3L

二手清光光蝦皮 https://shopee.tw/shop/5540977/
我的商店街：http://www.pcstore.com.tw/eoutlet/

＝＝＝＝＝＝＝
｜電動滑板｜elos改板後注意事項
https://www.youtube.com/watch?v=jEIFb9SvXho&t=1s

｜elos電動滑板｜遙控器配對
https://www.youtube.com/watch?v=ugWU_26YuEw

｜elos改裝注意事項｜elos登機如何拆電池？
https://www.youtube.com/watch?v=R2m2Fw9BiCk

i3+ i4D 遙控器配對
https://youtu.be/5qmpCJapzqE?t=17m40s

新款三速省電遙控器
https://www.youtube.com/watch?v=nZ_cb3RJXxk&t=183s

[新手必看] 電動滑板好玩！但有些事你要知道！！(選購使用心得)
https://youtu.be/A6YcsF_YRl8

電動滑板 Q&A 13個常見問題(e-skateboard FAQ)
https://youtu.be/8Xvy4Kry-lc

＝＝＝＝＝＝＝

我的攝影器材以簡單方便為主
Sony A7iii 16-35mm
Canon EOS M6 11-22mm
Canon G7X MKII
Gopro Hero6 Black
螢石E ZVIZ S5
Gopro Hero5 session
Garmin Virb XE
iPhone X
SENA 10C

外接麥克風：
RODE VideoMicro
森聲3D全景聲錄音耳機
Aputure D1

剪輯軟體 ： FCPX

想看更多有的沒的請訂閱
或來粉絲團走走

FB https://www.facebook.com/mycart/
Blog https://johnnypa.blog/

訊息與我聯絡 http://m.me/mycart

音樂來源：
https://soundcloud.com/stream
https://player.epidemicsound.com/

協助加上字幕
http://www.youtube.com/timedtext_cs_panel?tab=2&c=UCOnx3Q0ssEIdFG7_ckJRMQg