對於NIP嘅新隊員 Draken 嘅讀音，我早幾日前都係相當困惑，於是由文字角度出發，發現Dragon於瑞典文字之中，寫作 Drake，由此推斷Draken 本人想食「dragon」呢個字而起名 (個人推測，因搵唔到有訪問提及)。再者，我參考國外賽評嘅讀音，對方以英式口音讀出與Dragon極為相似但又有啲唔似嘅音，繼而我嘗試發類似Dragon 而保留 'K'音節嘅讀音，希望以最接近嘅音節表達。

對於讀音上，我認為討論嘅空間好大。我正職做電台，有人問我：點解時間嘅「間」你唔讀做時「姦」？點解機構嘅「構」你唔讀做機「究」？我笑而不語。

讀中學嘅時候，教授何文匯指出當今嘅廣東話讀法出現問題，中學生應該參考佢嘅著作，改變一啲約定俗成嘅音，例如朝早嘅「朝」，應該讀作「潮」，愉快嘅「愉」應該讀做「如」。我全不認同，結果去到公開試，照住自己認同嘅讀法，一樣拎A。

早於2014年，我主持足球節目，與聽眾討論過前皇家馬德里嘅門將卡斯拿斯 (Casillas) 嘅讀音。於西班牙語發音中，Casillas裡面嘅「la」嘅「l」，應該係唔發音，所以，有人話正確廣東話發音應該係「卡斯亞斯」，整個發音為 [kaˈsiʎas ]。如果要考究前曼聯中場球員朴智星嘅名字，大家應該改口讀做「票」智星，因為「朴」字於韓國並不讀「樸」。我對此相當困擾，但我卻上左寶貴一課，證明有人著重當地發音，有人著重本地譯法。

以巴西選手 FNX 為例，有主播會讀 F-N-X 三個音節，亦有人會選擇讀Phoenix。但無資料及訪問內容顯示FNX本人起名時，以Phoenix角度出發。而顯然讀F-N-X依然為多數，讀Phoenix嘅人為少數，並不存在錯誤之說。

今次「Draken」事件，我希望以三個角度作參考，包括選手本身國藉的言語、國外賽評，以及係名字當中的意見。我個人決定，以英文(包括英式或美式讀法) 讀Dragon、以瑞典語讀Dragon，還是以瑞典語讀Drake，都係可以接受。對於有評論指，國外主播會發J音，讀法類似「J勤」之說，我認為對方可能參考左英文字Drake的讀音 (dr'ek / dreɪk)，再推論Draken嘅讀法，我認為咁樣係無抵觸，只係用英文去硬拼Draken，但忽略左選手本身名字嘅理解。

如果係咁，各花入各眼，同英文差唔差，無關係。

歡迎指教，謝謝。

延伸閱讀：https://www.reddit.com/…/…/5b9j76/draken_doesnt_fuck_around/