好多謝大家尋晚抽時間陪我鳩噏，見到你哋咁踴躍留言係精神嘅。但係有啲留言去得太快我睇唔切，所以抽啲出嚟喺度回應吓：

CatherineCatCat：Celebrity Edge 下年年尾先行，未咁快plan喎哈哈。不過我九成九會上呢架船，過多排等我知道啲時間再話你知啦 （或者你留言提提我）。放心，如果同船嘅話我實請你哋飲返幾杯。
Siu Chung Fai 香港都有Nandos sauce，但係佢唔喺醃sauce嚟，極其量都喺用嚟做basting；啲雞要事前醃定brine定，焗到差唔多熟之後先擺上個grill度再baste，所以喺屋企整嘅話係有啲麻煩。
Lee Agnes：有三隻新船 （盛世公主號，挪威喜悅號，雲頂夢號，遲啲仲有隻World Dream世界夢號）都會用中文溝通。船上面會有多啲華人員工，水牌餐牌都會有中文，老人家應該會覺得舒服啲。當然啦，麗星都可以，但係搭船緊係搭啲新啲正啲嘅好。
Kin Leung：撩鼻屎係人生一大樂事，我揸車嘅時候成日都撩鼻屎跟住彈過去馮小姐度。隻眼開隻眼閉啦。
Lau Ling Hin：佢尋晚四點先返屋企，無得同佢玩switch。做廣告就係咁㗎喇，啲客放工前先話要改嘢，改完又要等佢覆，一味等等等。不過佢依家情況都好咗㗎喇
Jonathan Chow：希臘我好過幾次，有去雅典同啲島仔。其實玩島仔嘅話搭郵輪係一個好好嘅選擇。幾個島行勻晒Mykonos，Santorini, Rhodes... 好多郵輪公司都會有Greek Isles同埋東地中海嘅航線，你可以參考吓皇家公主號（Royal Princess），佢仲會去埋黑山科托爾，嗰度又係靚度抽筋。

仲有其他留言我遲啲開片答。尋晚嗰live又破咗紀錄，所以要再一次多謝大家支持，陪我一齊癲。下次馮小姐要OT我再同大家玩live。Cheers guys