【《魂遊記》的四個密碼 】 _ 傳統就係老套？ _ 始於清末，源自廣東省珠三角的傳統說唱音樂「南音」，跟香港獨有、70年代中後期逐漸興盛的「粵語流行曲」，是屬於兩個不同年代的流行文化產物，風格南轅北轍，無論歌詞內容和聽眾年齡層都相差萬丈遠，但綽號「萬能泰斗」的粵劇名伶阮兆輝深信並非如此，決定擔當跨代橋樑，以「賽馬會藝壇新世力」的名義，發起名為「南音‧承傳」的計劃，與「E世代全才唱作人」張敬軒合作演唱《魂遊記》一曲，嘗試探索兩者拼湊交匯會帶出怎樣的火花。 _ 《魂遊記》由伍卓賢作曲、編曲及監製，惟不僅音樂部份，亦包含影像故事，長達約九分鐘的短片，由曾獲金像獎最佳美術指導提名的張蚊與廣告界資深導演陳品聯手掌鏡，劇本邀得劇場界「鬼才編劇」、曾獲「香港舞台劇獎」最佳劇本（《香港式離婚》）的本地著名劇作家黃詠詩負責，以自身經歷編寫歌詞，以及創作一個橫跨20年的故事 ── 講述2010年，蔡思韵飾演的「中女」午夜夢迴，見到1990年的自己，又名「少女」 ── 見鬼嗎？「係靈魂相認！」導演之一的張蚊說。 _ 劇情與「雙聲」互相穿插，配合紫紅色調的大坑虎豹別墅與半山羅便臣道住宅實景畫面，影像交疊，迷幻而古雅，聽見「韶光倏忽恨難留」這句，倍覺唏噓淒涼，有歷練的人看在眼裏自有共鳴，忍不住反覆重播，細味當中隱藏的密碼，就由輝哥獻唱的六句南音說起。 _ 夕陽西下水東流， 物換星移幾度秋， 形貌何處魂自返， 韶光倏忽恨難留， 奉請魂兒登練度， 乘空攝景上瀛州。 _ 都說《魂遊記》是黃詠詩基於自身經歷而創作的故事，她生於大家族，爺爺篤信三清，乃聞名港澳的黃道長，在打齋業界赫赫有名，所以影像開首，阮兆輝於一眾茶客面前的獻唱的六句南音，實情是喃嘸佬經常在靈堂上大派用場的歌詞，「頭六句係我家族堅係用嚟招魂唱嘅，其餘嗰啲（部份）我老作！」 _ 阿詩笑言，當初之所以有這六句出現，全因腦海中的微弱記憶。「我係聽過我十叔唱過，（創作劇本）之前我問番佢，佢喺電話唱畀我聽，我就抄低。其實我（最初）都唔知叫咩名，只知道係屋企（使用的）招魂曲。」言下之意，這六句是名不經傳的文本？「佢話冇名，話喺《青玄煉度科儀》差不多結尾（出現）。」 _ 依照上述字眼，在Google世界裏查找一番，最終在「香港中文大學道教文化研究中心」的網站發現相符內容，原來這六句確實出自一本名為《青玄集要煉度施食科儀（下）》的科儀文獻，科儀是道教術語，有道教道場法事的意思，「科」即動作。本書共有兩卷，於清朝光緒十一年，亦即1885年問世，距今136年，當中有部份字眼跟今天的版本不同，譬如「乘空攝景上瀛州」，在文獻中是寫「乘空躡景上瀛州」（瀛州是中國神話三大神山之一，意指天國），原版另有兩句「青山綠水連天遠，野草閒花滿地愁」，在《魂遊記》中則沒有出現。至於六句南音的意思，用最簡單方法解釋：事物消逝乃自然定律，不要留戀人間。 _ 另一個或會引起觀眾思考的，是阮兆輝與張敬軒之間的關係，因為兩代的蔡思韵於同一個空間裏相遇，是否代言阮與張的「共存」，也是基於同一種設定？黃詠詩坦言這樣是有點想太多了，「好得意，冇專登諗住咁樣做，但出咗嚟又似，成件事好自然發生。」那麼為何又會見到黃詠詩本尊亮相幕前，她坦言本身只是打算做「戥腳」充撐場面，後來才知道自己入鏡，所以要感謝兩位導演的用心，「導演好好嘅，佢哋好鍾意個故仔，想我呢位真正嘅主人翁都出一出鏡，當係Signature咁，其實係In-Joke嚟嘅，成個Team都合作得好開心，全部人都好錫大家。」 _ 最後一點要留意的，是輝哥在短片裏拿着的兩塊板，中間有紅線牽引，稱為「响板」、「響板」，或者單純稱為「板」，是一種敲擊樂器，借板與板之間撞擊產生聲響，帶出節奏，歷史久遠，最早可以追溯至唐代，使用的木材亦甚有要求，輝哥說：「以前係用檀香木造嘅話就叫『檀板』，但呢啲都係俗稱，唔係學名。」 _ 生於廣州的張敬軒，一直對南音十分鍾愛，並希望能夠滲雜於流行曲之中，去年舉行《張敬軒 × 香港中樂團盛樂演唱會》，其中一節演出，便將地水南音的一代宗師杜煥的《憶往》跟舊作《披星戴月》糅合其中。相隔半年後，這次創作《魂遊記》的過程中能再度加入南音元素，張敬軒感到非常興奮，亦明白這是自己的責任所在：「可以同輝哥阮兆輝先生合作，機會相當難得，所以好開心，作為流行音樂歌手自己都應該成為一個橋樑，令年輕朋友認識傳統藝術，可能00後都少聽我哋呢代啲歌，利用自己仲喺呢個行業希望做多啲嘢。」 _ 原文刊於《香港01》 —— 標題：「魂遊記︱張敬軒阮兆輝攜手傳承南音 導演安排編劇黃詠詩客串有因」 _ （24042021） _ #游大東 #游大東影視筆記 #魂遊記 #張敬軒 #阮兆輝 #黃詠詩 #蔡思韵 #張蚊 #陳品 @fitto_records #虎豹別墅 #yautaitung #24042021 @eeg_music @wah_wah_lee @williamontheway @hcfc_official @hinscheung_officialfanclub #南音 #廣東歌 @9588hk @cantopop_fans

一連四日。徐小鳳的二三事 #02 努力不懈的小鳳姐 黎到第二日！今日同大家分享一直努力打拼嘅小鳳姐❤️喺呢度預告，聽日即將同大家掀開大家對波點裙嘅種種疑問！✨ ————————— 1.小鳳姐早期喺邊度獻唱? 答:正如之前講過，小鳳姐父母一直好擔心當時嘅娛樂埸所品流複雜，所以小鳳姐早期主要喺各大中式夜 總會或大酒樓獻唱。與此同時，小鳳姐好早已經開始「走埠」(受聘到外地演唱)，第一次係去吉隆坡， 甚至喺1973年受邀請去到倫敦演出。 2. 當年跑埸唱歌係咪好唔簡單? 答:係呀！小鳳姐初出道時雖然人稱「小白光」，但只係可以響當時表演轉場時唱一兩隻歌或者加入臨時加入組織嘅歌舞團巡迴演出。而且小鳳姐自己要一手包辦造型、合同、行程嘅所有嘢，日日不停來回港九兩邊，演唱時候仲要執生應酬台下聽眾同埋接受點唱，轉數慢啲都唔得！ 3. 聽聞當時小鳳姐走場嘅成績非常犀利? 答:小鳳姐走場最高峰嘅時候每日由下午4點唱到凌晨4點，報道紀錄佢一日走咗最少6個場地，好有毅力! 4. 之後小鳳姐好似開始錄唱片?喺邊間公司? 答:其實「香港之鶯」比賽冠軍原本嘅獎品係有一紙唱片合約嘅，但當時簽入小鳳姐嘅EMI公司(由70年嘅1隻 EP收錄咗小鳳姐嘅一隻single推斷)冇幫佢出唱片，直至1969年，小鳳姐喺吉隆坡登台時候先俾名指揮家 文就波先生發掘，喺南國唱片廠用咗2日錄咗12隻歌，分做3隻EP推出，但冇簽長約。70年代，新開業嘅文志唱片公司簽入小鳳姐，小鳳姐先正式成為專業歌手。 5. 小鳳姐嘅第一張唱片係咩? 答:按推出時間應該係南國唱片嘅《牆》，《嘆十聲》同埋《戀之火》，三隻一齊推出架，用左兩日時間就錄曬。 ［1］ 6. 小鳳姐一開始好似唔係唱廣東歌? 答:小鳳姐一開始都係唱國語時代曲嘅，第一次喺唱片演繹廣東歌係1972年嘅《徐小鳳之歌第七集-唉! 往事何苦提》，翻唱咗62年商台廣播戲插曲《勁草嬌花》。 7. 小鳳姐有咩出名嘅歌? 答:小鳳姐因為聲線獨特，一出道就受到好多人欣賞，唱左好多家傳戶曉嘅金曲。而家最出名嘅就梗係《喜氣洋洋》(1979)、《叉燒飽》(1973)同《風的季節》(1981)，其中《風的季節》（1981）更加係梅艷芳參加新秀歌唱大賽嘅時候選唱嘅歌。除此之外，《婚紗背後》(1986)、《每一步》(1986)、《城市足印》(1986)、《誰又欠了誰》(1986)、《重逢是個夢》(1987)、《流下眼淚前》(1987)⋯⋯ 8. 咁佢係幾時開第一場演唱會？ 答:小鳳姐係入行14年先開第一次演唱會，83年1月尾喺伊利莎白體育館開咗一共4場《康藝之星徐小鳳演唱會》。 9. 小鳳姐「演唱會女皇」呢個稱號係點嚟？ 答:小鳳姐自從83年開咗第一次個唱之後就一直到世界各地開演唱會，淨係香港唔計補場已經開咗194埸， 85、87、89、92年嘅演唱會都打破紅館場次紀錄，92年嘅43場仲要只係用咗一個月左右，到而家都仲係本地最多埸次嘅女歌手，所以先會俾人尊稱做「演唱會女皇」。 10. 小鳳姐而家仲有冇唱歌？ 答:小鳳姐06年之後相隔8年先響14年再喺香港開個唱，對上一次個唱係18年，呢次演唱會仲要係無dancers，全靠小鳳姐一個人唱足全場！小鳳姐亦都有喺18年嘅歡樂滿東華同上年嘅公益金入面演岀，仍然寶刀未老。下次小鳳姐出場大家一定要入場支持呀! ［1］：http://www.paulatsui.com/profile/index.htm #徐小鳳

在音樂串流平台大行其道的年代，於大氣電波裡穿梭歌曲，偶爾遇上未知的驚喜，始終是個無可替代的經歴。每晚9時正，聽到《音樂情人》熟悉的開場白，便覺心神如繫上安全帶，準備投入那一小時的聲音旅程。 小時候只知道鄭子誠是個壞人，長大才發現這樣一個奸人堅有著會融化耳朵、磁性得彷彿在收音機上聽會浪費掉的動人聲線。在香港電台第二台播放的《音樂情人》，閒日每晚9時準時放送，而上一個更是由鄭子誠太太主持其中一日的《恬淡情懷》，播的卻是西文懷舊金曲，同樣悅耳。已是第三代音樂情人的鄭先生，節目都會播放他的精選舊歌，以70至90年代廣東歌為主，至於逢星期五晚就重溫當年今日的中文歌曲龍虎榜，或是適逢歌手生日，都會做個回顧，不過我最喜歡的是節目尾聲的點唱部份，讓不少人憑歌寄意，既有父母點唱給新生兒女，也有老夫婦的情深告白，而張學友那句「便愛你多些 再多些 至滿瀉」久不久便會定時出現，點唱者濃濃的情意，彷彿透過空氣意外散落到我們這班聽眾。 這些懷舊金曲誤打誤撞成為了童年的一部分，不得不歸功那個被母親拔走電源的電視，讓那些晚上在似懂非懂的電台節目裡渡過，也因而學會從歌中懷那個不屬於自己時代的舊，長大後念念不忘，才讓那些旋律有了名字和故事；當中又夾雜著紅唇王子因說錯話而星途盡失，某位名伶正值芳華卻選擇下嫁他人等來自父母嘴邊的逸事，那個斑斕的年代，讓有些人成為了傳奇，也讓有些人永遠地與傳奇失之交臂。而沿著鄭先生的導航，往往遇上連接過去的意外驚喜。 * 部分圖片來自鄭先生的《音樂情人》專頁 #香港電台第二台 #音樂情人 #鄭子誠 #廣東歌 #就係香港 #編輯團隊日常 #90後路過媽劇停