螞蟻招股平常心當抽獎

　　仲有一個星期就到美國總統大選，兩候選人四出拉票，與此同時美國肺炎確診個案創單日新高，而新一輪刺激經濟方案毫無進展，美股隔晚腳軟，道指創兩個月以嚟最大單日跌幅。道指盤中一度跌近千點，收市跌幅略為收窄，但亦要跌650點；標指跟納指分別跌64點及189點。雖然美股咁樣衰，但港股隔晚ADR又唔算好大鑊，都係跌百幾點去到24700水平，今日港股應該唔會跌到足美股。

　　其實美股調整又如何，相對其他股市，美股係全球最牛市場，一日半日調整唔使大驚小怪。雖然總統大選逼近，令美股投資者變得審慎，但估計當總統大選結果塵埃落定，美股又可以重拾上升動力，古天后對美股後市仍睇好。

　　全球矚目的重磅新股螞蟻集團「A+H」上市計劃終於開始招股，H股由今日起至周五以全電子招股形式進行招股，每股招股價80港元，一手50股H股，每手入場費4040.31元，預期11月5日「A+H」同日首掛。近日大量資金湧入香港，當然與螞蟻招股有關，按招股書資料，螞蟻完成「A+H」上市後，超額配股權未行使、發行在外的約303.76億股股份，按每股H股80元計，集團股份市值達2.43萬億元。

　　螞蟻入場費都算親民，缸邊友肯定積極參與，講真對於螞蟻招股古天后都係平常心，唔會建議沽出手上新經濟股套現嚟抽螞蟻，始終重量級嘅新股首日掛牌表現唔會太強勁，即使未有抽中新股，上市後先入場唔會買貴好多。睇番阿里巴巴(09988) 股價及相關新聞 首日掛牌收報187.6元，較招股價176元僅溫和上升。至3月大市因肺炎疫情大幅調整，阿里股價更跌至招股價附近，最低見過167.6元，仲平過招股價十蚊咁滯。

　　想抽螞蟻集團都係量力以為，無必要沽出長線投資嘅ATMX嚟套現抽IPO，亦唔多建議借盡孖展嚟抽，皆因表現超班嘅新股，借盡孖展亦唔見得會抽得多，表現唔好嘅新股，借得多中得多兼中伏，所以一向古天后認為抽新股都係當參加抽獎，志在參與，平常心面對啦。

　　除咗螞蟻招股，今日市場另一焦點為大笨象(00005) 股價及相關新聞 派成績表，受累全球經濟低迷及地緣局勢不明朗，綜合券商預測，第三季預期信貸損失(ECL)達20.18億美元(約157億港元)，按年急飆1.28倍，按季大減近五成；至於上季列帳基準稅前利潤預測20.68億美元(約161.3億港元)，按年倒退57%，而按季則飆89%。分析認為，ECL或為第三季業績報告投資者要關注的地方。

　　雖然大笨象盈利可能有改善，但銀行息差持續受壓，預期截至9月底止的淨利息收益率，較6月底時縮窄0.2個百分點，拖累第三季淨利息收入按年下跌15.75%至63.76億美元。雖然管理層已表明會加速轉型計劃，但重組進度可能要到明年初公布全年業績時先有更多披露。呢排大笨象股價似翻生，但古天后都唔會推介，反而手上持股嘅長期股東，睇埋今日份業績，股價唔肯繼續彈嘅話，真係要好好考慮狠心分手。

　　古天后

#300likes30shares #古天后 #古天后日誌 #頭條財經網

利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。

依家我嘅聊天室已經停止免費試用, 直接課金入來聊天室啦：https://bit.ly/2BmeAhZ
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。