自閉兒父母的挑戰：二人三足難同步 文：阿星媽 ◤ 「#唔該你咪再扮晒自己係悲劇主角啦！」 那個晩上，我跟丈夫說起女兒的評估結果，然後他就激動地向我連珠爆發，一時說我怪獸，一時說對我極度失望。坦白講，他說的一字一句，在我聽來都真係難聽過粗口。 「我經歷緊嘅嘢你明咩？」我哭著反問他。哭，是因為委屈，也是因為我已無法再抑制，我的情緒急需一個出口。 ▌#我向左走他向右走 一開始，我們夫妻倆在穎穎的情況上並未有太大分歧，甚至可以說是同聲同氣。我們覺得穎穎是獨生女又沒有上過N班，社交和語言能力上有點遲緩也很正常，心裡總是抱持一個想法：進步，只是時間的問題。 但大概是作為母親的直覺，加上每天接送女兒上學，我開始注意到穎穎跟其他同齡孩子的分別，最終我決定聽從班主任的建議安排評估。自那天起，我跟丈夫在女兒的事情上亦開始朝著不同的方向走。 有時跟朋友談起，他們總是說：「畀啲時間啦，男人係咁，好多時接受唔到嘅都係爸爸。」我心想也是的，雖然丈夫堅持阿囡無問題，但至少沒有阻止我帶她去做訓練。 #不能說的三個字 「自閉症」這三個字，在我們家是個taboo，並非我不敢說，而是我清楚知道另一半對這個名稱有多反感。對他來說，這是一個強加於女兒身上的負面標籖。他強調穎穎開朗活潑，又怎會有問題？有問題的是學校、社會，還有那些動不動就帶小孩去做評估的大人。 如果說積極面對是對女兒愛的表現，那麼像我丈夫般逃避現實也不見得沒有愛。相反，我知道他是因為太愛女兒，不忍她受傷害，所以選擇用另一種方式去保護她。 #我是孤軍作戰的媽媽 記得有次駐校社工向我交代女兒的情況，言談間問起我的近況。我卻不知怎的突然情緒爆發。 「有時我真係覺得條路好似得我一個人行……」 自女兒確診這一年多，我常有這種無力感。由最初猶豫是否該去做評估，到下定決心，卻被丈夫質疑。我反問自己所做的真是為女兒好嗎？我是否非要證明女兒有嘢先安落？但我看過很多自閉症網頁，發現跟穎穎的行為的確頗為相似。究竟係定唔係？懷疑、忐忑、自責……反反覆覆，心情就是複雜。 另一半的取態固然為我增添壓力，在女兒的事情上，我總是有口難言。其實我從不介意別人知道，但丈夫並不然，因此我甚少跟人提及，他的家人更是毫不知情。多少次，有人問起為什麼穎穎總是唔望人，說話又講來講去都係嗰啲，我聽在耳裡感覺難受，好想為女兒辯護，但考慮到丈夫的反應和感受，又把說話吞回去。 #吞回去的話變成淚水 這種壓抑的情緒時而來襲，試過不止一次竟無故流淚。哭什麼呢？我從未因為有個自閉症女兒而自憐呀。 現在回想大概是這段日子，我習慣把女兒的事都一個人扛。做評估帶訓練聽講座，還要面對孩子的日常情緒，表面看似如常，壓力卻早已爆煲。但我要的絕非偉大母親這個光環，我只是做了父母該做的事，我想要的是另一半跟我一起分擔，在困難時可以依靠取暖，但現實中卻因彼此想法不同，總讓我有孤軍作戰之感。 「要記住最重要唔係個評估結果同點解阿囡會有，而係我哋應該點去幫佢。」多得社工姑娘提醒，我總算可以走下去，慢慢的，期望丈夫有天會跟上來。 #他要的只是時間 事實上，這個男人也不是原地踏步的。我告訴他女兒手眼不協調，他就跟她練習拋波拍波，相比以往開口埋口就話治療師教的東西刁轉，小朋友唔識好正常，我看到他的進步。 最近，他問我關於評估是怎樣的，說是替朋友問的。我心想這代表他私下有跟別人提過，我沒有追問，但感覺又是踏前了一步。 我也嘗試在不施壓的情況下滲啲滲啲，讓丈夫對自閉症有多點了解。好像前陣子醫院為我安排了網上講座，正在廚房準備午飯的我便故意調大聲量，好讓他一邊WFH一邊不自覺跟我一起收聽。我又把一本關於自閉孩子與爸爸的書刻意放在當眼處，期待丈夫有天會主動拿起。 眼前呢條路唔易行，但我有信心會等到他歸位，一齊行落去。 ◢ ＝＝＝＝＝ 作者：阿星媽，非一般星媽。女兒五歲時確診為自閉症，自此帶著孩子展開一連串訓練。由對自閉症一支半解到慢慢認識，發現星兒們都藏著可愛而率真的靈魂。 ＝＝＝＝＝ #自閉症譜系障礙 #自閉兒阿星媽手記

#gfmurmur9280 我係一名有depression嘅f.6女仔。係呢兩年因為學業同家庭問題而令我自己患上呢個病同性格都變左好多。係f.6上學期我鼓起勇氣同學校老師傾心事，但我並無同佢透露過多自己私事同自己有depression呢件事（即將自己唔開心嘅事講得無咁嚴重）。 我識左佢3年，由中四開始教我。f.4一開始因為佢邀請我參加比賽，但我唔守時而豎立一個壞印象比佢，而我地除左上堂之外，都唔會交流。到中五，我為左打破呢個印象，而開始溫多啲書，考好佢嗰科，有唔識嘅問題就會問佢。係個時開始，我唔知點解，我會咁在意佢對我嘅睇法。當我好大壓力就黎喊嘅時候，我睇翻佢教我而寫低嘅筆跡就會對唔開心嘅事有所釋懷。我自己係某個差唔多經營唔到嘅學會嘅Chairlady，有一次當我比負責老師鬧我嘅時候，我翻到課室忍不住喊左出黎。我友人帶我去見我嘅科任老師希望我可以同佢傾計，但當我同佢見面嘅時候，我手足無措，而佢亦都見到我忍住淚水嘅表情。嗰時係我第一次搵佢傾計。 到f.6，因為要處理嘅事越黎越多，而我一向無排解壓力嘅習慣，所以太多野積累落黎令我有想離開世界嘅念頭。我猶豫左好耐，決定搵老師輔導下我，我同佢開始每星期都傾計。 慢慢地，我開始變到好依賴佢，我情緒都因為佢而好左好多（起碼喊少左，唔會失眠）。唔知點解，我開始無時無刻都好掛住佢，見到佢同其他學生一齊我會有啲唔舒服。為左同佢單獨相處嘅時間耐啲，我特意做多左功課，落堂將我唔識嘅問題問佢。而慢慢地，佢開始由冷淡變得熱情，由冷酷變到同我講野時會笑（我甚少見到佢同其他學生或同事傾計會笑）。有次當我情緒唔穩定時而想去搵佢，但撞正佢要開會，我好內疚，但佢為左我而唔去開會陪我同我傾計。我開始敢於分享自己內心嘅傷痕，而佢亦分享佢童年嘅陰影。 直到因疫情而停課，中六last day無左。對我黎其實係可有可無。但佢係嗰日打電話同我慶祝呢日，亦關心我嘅備試進度。係嗰日起，我地開始變得疏遠。 我每日都同佢分享我嘅溫書進度同近況，但因為見唔到面，加上家庭問題，令我情緒再度唔穩定，我再次喊多左，亦開始用利器傷害自己黎抒發感情（只有自己知道）。我唔再同佢傾計。 隔左幾個禮拜我未係低潮期回復過黎，我再打比佢，但佢反而話翻我唔成熟，令我再度崩潰。 我帶著崩潰嘅情緒考試。試後，我反省我做錯嘅地方同佢道歉，亦表達我因佢而唔開心嘅事；而佢亦都向我坦白佢之前因家事（恕我無法透露）而影響佢情緒。呢次係我地第一次講自己對對方嘅感受，同自己刻下嘅情緒講出黎。 相處左咁耐，經歷過好多事，我其實好迷惘，我唔知我自己對佢嘅睇法係點。或者我係第一次感受到咩係溫暖，或者我未試過體驗比人關心我嘅感覺，或者我所見到嘅世界太細，未識分辨種種感情，又或者，我係佢身上見到我嘅影子，有相似嘅經歷，相同嘅性格，所以我先咁依賴佢。有時我會諗，送卡感謝佢嘅教導，唱歌比佢聽去開解同樣處於困境嘅佢，因為有同學同佢係鄰居而妒忌，因盡力過比佢讚而開心......究竟係出於咩感情？幫我同學會負責老師辯解，同我講內心深處嘅傷痕，為我而缺席會議，拒絕其他同學嘅電話但主動打比我關心我......點解偶爾會做出超越師生嘅舉動？我好驚我鐘意左佢，我好清楚知道師生關係唔長久。我亦好害怕受傷害，亦擔心自己自作多情。 好多謝大家願意花時間睇到呢度。我好清楚大家或許對我會有好多不滿，我係呢度講嘅言論全是我嘅愚見同感受，必然係錯同負面嘅，如果令你地感到唔舒服，請自行離開。謝謝！ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig

第一次撞鬼（下） . 「搵法師嚟對付我啊？」阿秀冷笑。 . 阿秀伸個頭埋嚟，我清晰見到佢面上嘅血跡，嚇到成個人都震晒：「唔好......唔好殺我。」 . 「我唔會殺你，我會晚晚陪你玩。」阿秀喺我耳邊講。 . 轉眼間，成地都係血，血愈嚟愈多，水位一齊上升，幾乎要淹沒我， . 但下一刻水位又低咗少少，等我鬆一口氣，水位又再升番。 . 來來回回咗幾次，我覺得生不如死。 . ， 第二朝，我有氣無力咁同法師講呢件事。 . 法師沉吟咗一陣：「或者，阿秀唔係真正出現，而係製造幻覺畀你。你嘅尖叫同掙扎，都只存在於你嘅幻覺中。」 . 我追問：「所以呢？」 . 「佢唔係一隻普通嘅鬼，佢係一隻唔普通嘅鬼。」法師咁樣答。 . ， 我難以置信：「你係法師，你都無辦法？」 . 「就好似醫生咁，盡咗力，都唔一定醫得好，總有啲疑難雜症搞唔掂。」 法師嘆氣：「最多我今次唔收你錢啦。」 . 「咁我點算？我死梗啦？」我一臉迷茫。 . 「照你咁講，阿秀應該無打算殺你，唉......祝你平安啦。」法師講完就走咗。 . ， 望住法師嘅背影，我幾乎精神崩潰。 . 阿秀無打算殺我，我就應該感恩戴德？ . 問題係，我根本唔識阿秀，我無對唔住任何人，點解我要俾厲鬼纏身？ . 諗到呢度，我忽然意識到問題嘅關鍵：點解阿秀要纏住我？ . ， 假設我死咗，變咗鬼，就算我無得搵仇人報仇，我都會想去搵朋友親人。 . 就算無親無故，我最多去搵靚仔明星，或者我有好奇嘅公眾人物，點都唔會纏住一個無咩特別嘅陌生OL。 . 唯一嘅解釋係，阿秀無得揀，出於一啲佢都解決唔到嘅問題，佢只可以同我溝通。 . 或者，佢想得到我嘅注意，所以先嚇我？ . ， 我決定，換一個方法。 . 夜晚，阿秀出現，喺佢開口之前，我突然講：「喂，不如我哋做個朋友。」 . 「朋友？」阿秀呆一呆，即刻變番扭曲嘅神情：「我係一隻厲鬼！」 . 我嘆氣：「你會一世纏住我丫嘛，我知啊，但晚晚都重覆，大家都悶，同一套鬼片係咁睇都唔會驚啦。」 . 「你想我點？」阿秀把聲有啲猶豫。 . ， 「我無想你點，只係我哋既然一世分唔開，不如了解吓對方。」 我加多句：「你晚晚唔畀我瞓，我唔捱得幾耐，死之前都畀我認識吓你掛。」 . 「我無想你死。」阿秀支支吾吾：「不過我......我係鬼......」 . 「鬼咪鬼囉，從此你就係我嘅鬼朋友！」我努力扮到好豪氣。 . ， 喺我嘅引導下，阿秀慢慢講出佢嘅諗法。 . 原來，舊年阿秀俾車撞死後，靈魂就一直困喺條街度，佢走唔到，亦無人見到佢。 . 佢睇住所有人來來往往，喧囂之中，佢成為一隻寂寞嘅女鬼。 . 直到佢遇到我，唔知點解佢可以跟我走，仲可以製造幻覺畀我，佢一直跟住我。 . ， 我忍唔住問：「點解你要嚇我？」 . 「我又唔識你，我以前睇鬼片，鬼同人嘅交往就係咁......」阿秀有啲尷尬。 . 我固然無辜，但企喺佢嘅角度，如果全世界得一個人見到我，我都想獲得對方嘅注意。 . 我儘量用商量嘅口吻：「以後，我哋夜晚就傾吓計，之後畀我瞓一陣，好唔好？」 . ， 從此，我多咗一個鬼朋友。 . 天一黑，當我獨處嗰陣，阿秀就會現身，我會分享我今日遇到咩事。 . 有時放假，我都會去阿秀屋企附近，畀阿秀睇吓家人嘅近況。 . 禮尚往來，阿秀唔再阻住我瞓覺，我嘅作息時間漸漸變番正常。 . 有時，佢會用製造幻覺嘅能力，整啲好正嘅幻覺，畀我享受吓，葡萄美酒夜光杯，財寶美男一大堆...... . ， 每個人都遇過壞人，但無咩人覺得自己係壞人。 . 因為每人都有自己嘅邏輯，都覺得自己做嘅事係合理。 . 有時候，企喺對方嘅立場諗一諗，理解佢嘅邏輯，或者更有機會化解矛盾。 . －完－ . #短故 #短篇 #小說 #陳美濤 #廣東話 #粵語 #tomatochan #第一次撞鬼