［今日寫呢啲］週末專題，奈雪的茶。1689個訂閱了，不如月底前做到1700啦，順手賀我生日。反正而家入嗰啲下個月我會退錢。

TLDR：奈雪的茶，市值同隻維他奶差唔多咋！你估係咪真係好好賺？咁當然，你可以覺得隻嘢超抵嘅。大股東賺夠想益你平賣畀你呀可？

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

好啦，隻嘢都抽完，而家先講？係，因為忙。但反正關係不大，你齋係抽隻新股呢，根本唔使咩分析，反正只係玩一日兩日，睇乜都多餘。咪講「供求」，但甚至唔好以為超額幾百倍實升，嗰啲「需求」假嘅，啲友孖展之嘛，佢唔會上市追的。

咁但如果你想知應唔應該第一日沽，可唔可以長期持有，之後追唔追，或者純係想認識多啲間公司，睇下應該點睇招股書，咪睇篇文咯。100蚊都唔使，買幾杯奈雪咋！仲送晒以前嘅幾百篇文（差不多一年！）

首先要講，街外人睇，真係另一回事。唔好用你閣下嘅品味，去判斷啲嘢受唔受歡迎，更加唔好用受唔受歡迎去判斷隻嘢得唔得。首先有啲公司生意好唔好好易睇到（港交所！），但有啲唔係，例如賭廳，賭最大嘅係超級貴賓，你去研究多唔多人，嘥氣。正如ASML SPGI 之類生意好唔好，你街上邊睇得到？

仲有，受歡迎呢啲嘢，好易造出嚟，使錢咪得。受歡迎又未必真係多人幫襯，多人幫襯又未必高收入，高收入又未必高利潤，高利潤又唔等於個估值抵，根本係N咁多樣唔同嘅事

更重要嘅係，好多分析最後都係結果論。做好產品自然會有生意。咁即係冇講過。咩叫好產品？眾所周知，最大市值嘅餐廳，全部都係賣垃圾。麥當勞海底撈大家樂好食咩？即使你講星巴克，在咖啡撚心中，都係垃圾（我就唔識分）。但大公司一定係玩品質控制，行銷，控制成本。同你「煮好啲嘢」完全係兩回事。你要追夢嘅咪小野二郎咁，原宿開間Sushi Bar（＊），一晚做十幾個客算數。但你要上市一定係 味將軍 美心 LVMH。

所以，你有冇飲過奈雪，根本無關重要。你覺得好垃圾，who cares？我都唔明超級英雄片有乜好睇，但就係有好多人睇。唔好將自己放到咁大，反正香港得一間分店（日本都有一間！反擊日本成功！）。甚至大陸佬覺得奈雪好唔好，都係who cares．麥當勞大家樂好好食咩？「大家樂請分析員食飯都唔係在大家樂啦唏」

吾友高天佑話齋，呢隻係奶茶第一股。但，唔係奇在賣奶茶可以上市，中國十幾萬萬同胞，一人買一個胸圍都不得了（畢菲特都係咁上下講法）。唔好話賣奶蓋，大把古怪行業都上到市。所以奇怪根本係，做乜咁耐先有第一間奶茶股？真係好好賺？你話呢？

咁有啲人總係覺得好好賺唔使上市，all due respect，有乜公司真係好好賺唔上市？華懋霍英東定Subway Mars？你覺得佢地上市大得過而家啲龍頭？

咁睇數啦，奈雪上限都不過係拎340億市值。好多咩？一間維他奶咁嘅估值咋！（定你覺得好抵？）。係咪即時覺得奇怪？奈雪雖然唔係龍頭，但都二哥啦（大哥你估下係邊間？），先340億市值。你老味海底撈打邊爐賣到2000億市值（仲要高位跌咗一半！高峰時4300億！）。安踏賣鞋賣到5000億市值。覺唔覺得件事有啲問題（咁當然，安踏好似有海外嘅，雖然有人話冇鬼佬買）。

奈雪上限都不過係拎300億市值。Something is wrong la

BTW，話埋你知，奈雪全部店都直營，我都幾意外。因為傳銷同Franchise 係上世紀最仆街但亦最偉大嘅兩種發明，加盟店嘅嘢，利用啲友追夢做老細嘅心態，封晒蝕本門。但奈雪就係冇做。點解？會考Commerce 或而家咩　企會財教嘅基本嘢啦，加盟店咪難控制品質，啲友側邊租多個舖賣煎釀三寶。

仲有，奈雪全部舖都係租嘅。咁又睇你點演繹，香港嘅咪話賺埋都係益地產商，但大陸情況又唔同啦，地產商個巴京拎包華冇咁大。人工成本先最貴，而你奈雪我估總不能叫件大媽去做品員啩（冇飲過，唔好問我）。仲有，冇舖又可以扮asset light model啫

其他嘅，留返文入面講（4000字呀！）。但再講少少。首先你可以估下，奈雪一間舖一日幾多生意？不妨估下。我估冇你想像中咁多，而亦唔關城市事，唔同級別城市都差不多。但500間舖（話開到千幾間！），斬埋就好係嘢。

之但係，總有盡頭嘛。廿幾蚊杯，其實好係嘢！你不如諗下大陸幾錢人工？仲要二線城市喎。「不如真係反攻日本啦，而家得大阪一間」「星巴克都反攻意大利法國啦」「COCO老番屋都開到印度啦」

仲有講埋最後一個迷思，「呢啲咁嘅化學嘢好好賺」「啲茶使幾錢成本？」。Yes and no，當然你可以質疑佢造假數買貴貨（點解咁做？因為十派牙都係自己咯），但既然呢隻放上市，應該當住呢隻真。

事實呢種「呢啲咁嘅化學嘢好好賺」「啲茶使幾錢成本？」我聽咗冇四十年都三十幾年！真的！細個食早餐對面阿叔都係咁講。問題係：咁好賺你唔去開？真喎。以前就話資訊唔流通，而家我知道暴利嘅，點會冇人抄冇人搶？所以呢啲「好好賺」係迷思，你冇其他嘢嘅，兩下就抄到你收皮啦。亦所以點解啲公司要搞咁多行銷，因為貨物易抄，但品味氛圍價值冇咁易抄。
詳情就文入面講，但你不妨估下，到底佢賣一杯奶茶，入面有幾多係材料成本？（唔計員工舖租其他嘢，只講材料）。我估，一定比你想像中高好多！

你以為食水好深？我覺得唔係。拿，星巴克就真係杯嘢入面大約10%係材料錢—唔係你以為係乜？sorry破壞你童年。其實你杯咖啡，絶大多數去晒：人工—我總不能整件大媽同你Hello Ivan，租，稅，仲有賺你嗰份。「最仆街係個杯呀餐巾呀分分鐘貴過啲咖啡豆，下次記住拎多幾張返公司炆屎」

講遠咗，星巴克入面，10%係材料錢？咁奈雪呢？梗係唔止。但你可以估下幾多。

咁即係買唔買得過？咁就睇文咯。但你睇估值大約知。我當星巴克，1330億市值（美金啦），265億生意，36億純利。或者想睇大陸嘅，海底撈，2000億市值（港紙），290億收入，23億利潤（人仔）。

咁奈雪呢？咪話上限340億市值。你仲要預佢升喎！計下數咯。一年幾錢生意？文入面話你知（其實招股書都有），或者用心算。500間舖。然後頭先咪叫你估下每間每日做幾多生意咯。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

（＊）OK，估都估到佢間嘢唔係在原宿，原宿只有龍蝦包同學生妹。呢句去原宿開間sushi bar係歌詞，小野二郎梗係開銀座，去銀座你就知自己窮。真係的，我在大阪福岡甚至京都食米芝蓮兩星都仲覺得唔貴 — 去銀座就知自己窮，都係去返嘉湖銀座算。

［麥麗素！送禮好！禮到心又到！］（＊）麥當勞自己出McPlant，冇講乜水背後代工，但Beyond Meat就大插。

TLDR：朋友話，林嘉欣點算（＊＊）？答曰：錢已收啦。去對面再代言都仲得

原文：McDonald’s to test McPlant, which includes a meat-free burger, next year; Beyond Meat shares fall（https://bityl.co/4Nb1）

1. 拿，呢排好多時都搞Patreon（當然係科水讀者永遠優先），但都唔好話唔理普通免費讀者，一樣有文畀你。當然你支持更好（https://bityl.co/4Nb6）

2. 是咁的，Beyond Meat股價逆市重挫（而家跌8%）。點解？因為麥當勞自己出素肉漢堡。McPlant，麥攀。你咪去鬧大公司走去抄人咯。吹咩？有冇專利丫，有你咪去告。冇嘅，你咪鬧咯，但幾多公司都係抄嚟抄去？蘋果出完iPhone全部都抄佢個設計添，so？你有冇兩萬億市值？

3. 幾時做生意嘅問題，都係會畀人抄。任你慢慢拗，但咁多年都係咁。一係你嘅技術門檻高到不能，一係你有好強勁嘅品牌（但牌子唔係品牌，有啲友心甘情願畀人笑都做傻仔嘅先係品牌，例如蘋果），一係以本商人，一係network effect，一係政府容許壟斷，一係專利。護城河不離呢幾味。全部都冇嘅，都未必唔得，有啲都係事後先知，你見幾大派圍攻Netflix都未打得低佢啦。但條路就難好多（亦因為咁Netflix先升到你唔信，因為好多人都覺得會唔掂）

4. 咁我唔係專家啦，但Beyond Meat呢類有幾高嘅技術門檻？唔知了，到McPlant出嚟你咪知。但麥當勞畢竟行銷之王，強勁品牌（對，Junk Food都可以品牌，因為唔健康你都成日食），整得好食過你，應該唔難？又或者，Beyond Meat有幾多係真技術，幾多係Marketing？

5. 但又留意下，其實麥當勞都冇講，到底邊個係supplier，只係強調唔係自己整—咁即係仲簡單，技術門檻都唔使。「OEM」咁，我理得你背後係 Beyond Meat 太極魚　定達明一派雞，總之嚟到呢度大家都係McPlant。「即係嘉頓麵包」（＊＊＊）

6. 咁點解Beyond Meat跌？因為加拿大嘅測試版就係佢地整。斷估如果滿意嘅，就會高調宣佈由佢地做啦。而家麥當勞咁講，好似暗示咗飛起Beyond Meat咁。

7. 而對家Burger King，亦都有咁嘅嘢，但就係由Impossible Foods 整。

8. 同場加映，仲有啲好笑嘅係，麥當勞今日開市前出業績，順手爆埋呢單嘢。 Beyond Meat呢？收市出業績。應該唔會收市話你知「其實係我！」咁詼諧掛？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。一個月一舊水唔使，三個月已近700人訂！仲有免費試睇：https://bit.ly/31QmYj7

instagram @ivanliresearch．七成金融（短打）兩成嘢食一成其他嘢。

【李聲揚課程】題目:「美國大選全攻略」 影片/課程編號：CC011 費用: $400

由基本嘢講起，邊個會贏，民調準唔準，幾時有結果，冇乜時間嘅睇邊幾個洲。仲有邊個黨對股市好，侵侵連任股市又點，拜登上台又點。咩時間買。同埋最重要，買乜股。

出售平台(有埋影片簡介)：https://bityl.co/4FHC
付款及收看步驟：
1/點擊報名收看 [影片/課程編號：CC011
2/利用信用卡網上付款
3/及後有登入資料可以立即收看
查詢：whatsapp 63832145

（＊）居然唔少人話我知從冇聽過咩係麥麗素，一度令我懷疑自己係咪曼德拉效應。幸好呢個世界上有youtube（https://ytube.io/3BC2）．又話說拜仁慕尼黑有位法國中場叫杜利素，呢期好多機會出場，我每次聽到佢個名都諗起首歌。又，麥麗素真係唔好食，細個嘅我blind taste都分得到。但 What if人地做得有你咁好，甚至好過你，或者係有你七成但價錢係你三成呢？法律我唔知，但類似嘅嘢任何行業都出現。麥當勞都賣炸雞啦。你見韓仔啲零食咪又係抄日本包裝（其實唔止零食，差不多所有嘢都係），但玩玩下勁過你添。

（＊＊）林嘉欣真係正到一個點。港女話港男只愛瘦，根本係偽命題。而林嘉欣亦係我身邊好多女仔朋友咬牙切齒相當憎嘅女仔。覺得佢姣精，小三格。「拿男人咪鍾意呢啲」。喂，埃汾由《男人四十》（c. 2001）佢扮學生妹開始（我入戲院睇咗兩次），睇到而家我都男人四十（唔止添），佢每一套戲我都入場睇！天將雄師　我都入場睇！心理罪之城市之光　我都入場睇！詭絲　我都入場睇！鐵粉！

（＊＊＊）其實我細個最初知時有啲震憾，我細個以為全世界都係用同一款包，或者同一檔公司供應，或者自己整。咁即係呢，理論上，你去第度食個漢堡包，同香港嘅包，會唔同味？又好似係。我以為係真係統一的

1972 年創立摩斯食品，已故創業者櫻田慧是日本漢堡界具代表性的革新者。他塑造出以絞肉、洋蔥跟淋上大量番茄醬汁的 #摩斯漢堡。1973 年領先麥當勞，推出使用照燒醬的照燒牛肉漢堡。接著在 1987 年孕育出捨棄漢堡麵包、改用米做的摩斯米漢堡。創業以來一直遵行製作者為中心的生產導向，為此首次將開發模式，轉換為重視顧客需求的 #行銷 導向。

詳細全文：
https://bit.ly/3iCF1j3

延伸專題：
【肉食大國捨棄香腸轉向素食？】
https://bit.ly/3nsc654
【麥當勞「染綠」，素食漢堡銷量急升？】
https://goo.gl/b3j7bf
【Google 也想要：種出來的「漢堡扒」】
https://goo.gl/E7oxSU

==========================
在 www.cup.com.hk 留下你的電郵地址，即可免費訂閱星期一至五 CUP 媒體 的日誌。

🎦 YouTube 👉 https://goo.gl/4ZetJ5
🎙️ CUPodcast 👉 https://bit.ly/35HZaBp
📸 Instagram 👉 www.instagram.com/cupmedia/
💬 Telegram 👉 https://t.me/cupmedia
📣 WhatsApp 👉https://bit.ly/2W1kPye