［巴塞帝國興亡史］5000幾字，不過應唔算難明。又，原文仲長，唔關我事。循例利申：唔捧巴塞，但亦唔憎巴塞。畢竟我在魯營入場睇美斯。

TLDR： 西瓜共蟹，唔識莫買。呢篇真係極長。但你要搵人鬧嘅，好簡單，Bartomeu就係屌靶。條友完全唔識足球，亦唔識足球嘅生意。自己唔識都算，又唔知人善任。全歐洲都知佢係水魚，玩到佢謝。尼馬嗰2.2億歐羅，最後去咗邊？另外，買親人都畀貴價，簽親都水貨，人工又畀得高，唔死就奇。但話說回頭，邊個選佢上去架呢？聽講巴塞唔係老細足球油王波喎，咩人選佢上去？最後，美斯份糧亦有一定嘅角色，當然佢係落場征戰嗰個，貪錢嗰個好似係佢老豆，冇乜人會怪佢。同場加映 多蒙特同彭美拉斯點樣玩到Bartomeu謝，笑死無命賠。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 真係英雄所見樂瞳，我諗到呢個題，然後原文Simon Kuper最後亦都係用羅馬帝國比喻巴塞。記住，你覺得篇文垃圾覺得我唔識波嘅，請你去鬧Simon Kuper，「不過鬧之前睇下人地咩料子先」。內容主要都係取材自篇文，當然有啲我個人想法，我盡量分開。一係你睇原文咯，唔使錢的（https://bit.ly/3fI5AVE），但你又唔想英文或唔鍾意睇字嘅，咁咪只能聽我講，你自己選擇的。

2. 篇文其實嚟自Simon Kuper本新書，幾日後出（https://bit.ly/3iwl9kN）。唔記得佢係咪特別捧巴塞，但之前見佢都寫唔少巴塞或美斯文，訪問好多人，絶對有資格講。佢本書原本係寫巴塞成功史，點知寫寫下已經見到巴塞盛極轉衰，佢篇文寫嗰時都未知美斯走，但已經預言好大機會。

3. 上篇文比較technical（https://bit.ly/37Hxr3T），而且只係講一單球員交換，講巴塞大鑊到要搞埋啲咁嘅怪雞嘢，但冇解到巴塞點搞到咁，不過個故事太過過癮。今篇我保證，易明好多。真係你打football manger都知係乜事

4. 好似講歷史咁，遠因，近因，導火線。巴塞搞到咁大鑊，導火線當然係疫情，同埋西甲嘅salary cap，巴塞要瘦身。但差不多間間球會都受影響，點解唯獨佢地咁大鑊？

5. 巴塞財政問題，你可以睇Twitter @Swissramble，7月尾已經講巴塞好大鑊，唔係事後孔明．但講真佢啲嘢真係純金融，唔易入口。所以你可以睇我呢篇文講。

6. 近因係巴塞財政狀況近幾年都差，年年都只係勉強頂住，但一個疫情打落嚟咪出事。有幾差？普通人都睇得明：巴塞係全世界收入最高嘅足球會，疫情前唯一一間一年收入過10億美金嘅球會（不過，都係少過一間維他奶！）。但欠落嘅債，去到14億美金。冇錯，長命債可以慢慢還，但大鑊在啲債好多都係短債，好快要找數。咁明晒啦？

7. 你想賣人？嘿，成班老嘢，邊有人買？況且，人人知你莫財，點會唔壓你價？就算其他人真係咁好心，亦都有心無力，其他球會都係十分水緊。好可能De Jong，Ansu Fati或Pedri之類都只能平賣。冇錢就係咁架啦（題外話：所以叫你唔好借錢買股票）

8. 之但係，呢啲都係近因。巴塞點解搞到負債咁多？同埋點解年年蝕錢（收入高都可以蝕錢）？就係遠因。

9. 巴塞嘅收入，疫情前一路係全球頭兩三位。固然疫情下打擊大，仲有啲贊助商又縮數，但照計唔應該咁快出事。咁收入冇問題，就梗係開支出事啦。於是你普通人都估到，球會可以有乜開支？咪就係買人出事，同埋人工出事。
=========================================================
10. 香港文化興搵禍首，我都明。咁今次畀定個屌靶你，肯定係前任會長Bartomeu，佢就係亡國之君。去到現任Laporta時肯定返魂乏術了。今年3月先接手，可以做乜？

11. 陣間會慢慢鬧Bartomeu，但此人根本完全外行，唔識足球，亦都唔識足球嘅生意，絶對係一條水魚，畀人玩到佢謝。自己唔識都算，但佢又唔知人善任。

12. 但，巴塞唔係老細足球嘛，唔係油王大陸錢，喂，會員制架喎。咁所以，第二屌咪屌啲球迷咯。唔係你同我（除非你係有份投票嘅），我地呢啲電視機球迷反而最聖潔。喂，Bartomeu係你班友選上台架嘛，咁唔係啲選民負責返？原本佢只係過渡角色，但2015年（記住呢個日子）6月巴塞在柏林對祖雲達斯，10年內第5次拎歐聯後，佢就大票數再當選。呢次亦係巴塞暫時最後一次拎歐聯。

13. 當然仲有，美斯。或者應該話美斯份糧，可能係美斯老豆。美斯有幾好波已經唔使討論，佢在賽場上絶對冇欠巴塞半分。巴塞近年戰績可能未如球迷預期，但絶對唔係巴塞財困嘅原因，畢竟巴塞唔係搞到冇歐聯踢嗰種情況。不過，美斯份糧，同埋佢對球會轉會嘅參與，似乎亦同巴塞財困有一定關係。

14. 關於美斯，我仲想講多兩句。Simon Kuper寫過好多美斯嘅文，場上固然唔使討論，足球場外美斯並唔係一個特別鍾意權力嘅人，特別麻煩嘅人，甚至唔係一個特別貪錢嘅人（佢老豆就可能係）。美斯要嘅嘢好簡單：佢要勝利，佢要一隊戰無不勝嘅夢幻隊，就係咁簡單。「其他嘢你地幫我搞掂佢」。球員冇理由要理埋球會財政嘅嘢，關我春事。但美斯份糧，弔詭地就搞到巴塞搵唔到美斯想要嘅球員。況且球員亦都知道美斯呼風喚雨，權力好大，佢撐你，高層唔敢唔加人工。邉個高層夠膽同美斯作對？美斯唔係一個權力慾好大嘅人，但佢知自己有影響力（以上都係作者啲文講，你可以去質疑）

15. 我目測香港巴塞球迷遠多過皇馬。但唔好忘記，在美斯嚟之前，巴塞戰績並唔係一間咁「神」嘅球會。固然巴塞more than a club，你亦可以話係中央馬德里打壓，由佛朗哥之類講起。但客觀事實係巴塞在美斯之前，只係拎過一次歐聯冠軍（當然05-06嗰次都唔多關佢事），美斯同拉馬西亞嘅黃金一代，就改變咗巴塞。但，之後呢？

16. 既然巴塞場上表現唔係導致財困嘅原因，咁所以亦唔使鬧朗奴高文之類，歷任主帥都唔關事。球場上嘅得失冇搞到巴塞陷入困境，至於咩轉會簽人，唔係主師話到事嘅。頂多係體育總監，但實際上係Bartomeu，或者其他高層，或者美斯。朗奴高文之類，會務上冇乜say
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
17. 頭先講過，巴塞2015年拎歐聯後，Bartomeu就大熱再當選。所以就由2015年講起。

18. 正如頭先提到，2015年，巴塞如日中天，10年拎咗5次歐聯。多得拉馬西亞黃金一代，當時巴塞財政情況極好，冇人會相信巴塞有一日會冇錢，當時巴塞要乜人有乜人。但就係呢度開始出事。

19. 巴塞嘅轉會，向來都亂嚟。董事局好多人都有唔同意見，至於教波嗰個往往係唔會知嘅。唔好忘記，仲有體育總監要講嘢，仲有……美斯。

20. 但，始終罪魁都係Bartomeu。好簡單，因為呢條友係真係唔識的！但你地選佢上台嘛。原本佢嘅體育總監係蘇比沙列特（Zubizarreta），巴塞名宿，幫佢簽咗尼馬同蘇亞雷斯，聞風喪膽嘅MSN組合。但2015年Bartomeu就炒咗蘇比沙列特，6年換咗5個體育總監。自己唔識唔緊要，但你搵件識嘅好冇？

21. 事後睇，2017年，就係巴塞惡夢嘅開始，但當時你都唔會估到。發生咩事？尼馬走咗。呢個未必係巴塞或者Bartomeu任何人嘅問題。況且PSG畀咗破紀錄嘅2.2億歐羅轉會費嘛。當時點睇都係PSG先係水魚，對不？巴塞拎住2.2億歐，可以買好多人

22. 但，就係Bartomeu將呢舊錢亂咁用。有好多好好笑嘅故事，但，總之好快，全歐洲就知呢條友好多錢洗，又要好快咁用咗佢，亦知道呢條友乜都唔識。真係千載難逢嘅一條水魚，唔昆你對唔住自己球迷。

23. 當其時嘅巴塞，在轉會市場上呼風喚雨，仲要有錢在手，冇乜球員或經理人會say no，未必單單都成，但所有人都會同你傾。2017年尼馬走後，巴塞原本有機會平價買到麥巴比同夏蘭特，但Bartomeu唔要。不過我覺得呢啲不能怪佢，總有走漏眼，況且其他人都有異議，唔係話個個都話要簽但Bartomeu一票阻止。

24. 咁買唔到最好嘅，冇咁好都OK啦，畢竟2.2億歐真係好多錢（雖然PSG都係分期）。問題係，巴塞結果去買嘅，係多蒙特嘅丹比利Ousmane Dembélé。應該冇乜人反對係水貨啦？仲要係用咗1.5億歐羅。

25. 而成件事係好Q好笑的，好似拍賣會咁，明明另一高層同Bartomeu之前一早講明，我地底線只會畀8000萬歐買丹比利。入蒙地卡羅酒店房（同多蒙特傾）前仲夾好，多過呢個價我地就拍枱起身走。結果入到去，多蒙特嘅德國佬，就話冇時間傾，趕住坐飛機，唔會同你講價，1.5億，要就要唔要就拉倒。但結果？Bartomeu都係話好！咁佢係大佬嘛，另外件高層當然冇聲出。因為Bartomeu要同球迷交代，況且佢根本唔識。事後佢仲話丹比利好波過尼馬。

26. 然後大家都知，之後巴塞亦都用咗1.6歐去買古天奴，利物浦合埋眼都識笑，居然有啲咁嘅水魚。錦上添花當然係後來借埋古天奴畀拜仁，然後拜仁歐聯大炒巴塞古天奴仲要梅開二度。我懷疑路明尼加漢尼斯一定有Whatsapp利物浦啲高層齊齊恥笑Bartomeu。至此，尼馬嘅錢已經嘔突，而丹比利同古天奴，在巴塞嘅表現，大家有目共睹。

======================================================

27. 當然，某程度上巴塞係慣咗做水魚的。背後未必係佢地特別笨（Bartomeu就應該係），亦因為佢地嘅文化係「我要嘅嘢就要得到」，反正選會長個個都係拍心水「我要簽邊個邊個」，有問題留畀下手，球迷係唔會理咩財政狀況，話知你下季畀個警務署長我做，今季我就要捧盃。你搵件「理性撚」去選，同人講「我為巴塞長遠著想，我唔會簽人，因為我地再咁搞呢，5年後會爆煲，大家要接受我地未來幾年都唔會有盃捧」，我保撚證你唔使選。球迷就係咁，呢啲就係「民粹」。

28. 又例如，de Jong應該唔算水貨，但巴塞畀7500萬歐。個問題唔係你同我覺得值唔值，最好笑係阿積士都覺得唔值，原本係出面開價3000-4000萬，但有人畀錢要志在必得獨家買斷，唔通唔要咩。

29. 巴塞嘅文化，痴心情長劍，非君不娶。我唔會要一個「de Jong咁類型但平一半」，我就要de Jong本人，幾多錢都要。聽落好型，但你咁拎去做生意，就死得。對家一定當你水魚咁劏。公平地講，似乎呢個唔係Bartomeu年代獨有嘅事。

=======================================================
30. 至於美斯嗰部份，都講過下，佢份人工實在極高。當然我無意批評美斯，波一定係好到不得了，無可取代（否則巴塞就塞走佢啦），咁你可以話「全世界最好波嘅球員要加人工有乜問題？」（同意），況且，亦有話係佢老豆嘅主意，佢自己只係專心踢波，呢啲真相冇乜人會知。但反正文入面都引述巴塞高層講，美斯都唔係一個問題，最大問題係佢加，其他人又會要加，而大家都知美斯出名鍾意幫朋友，Other people’s money，有錢齊齊搵。

31. 當然美斯對外一直都聲稱自己只係專心踢波，但文中又引述巴塞高層講，美斯都成日背後發功。邊個先真，我都唔知。但話說2019年，尼馬同美斯講話想離開PSG，美斯應該係有大力要求巴塞去買。但巴塞真係冇錢，而且覺得唔值（即係，冇錢），PSG開價2億歐喎。結果真係不停做大龍鳳，扮到好似想買，其實只係安撫美斯，「我地盡晒力啦」。但似乎美斯冇咁好呃。最後大家都知，巴塞買咗基沙文，又係1.2億歐，美斯似乎唔多高興。當然美斯係專業嘅，冇因為咁就hea踢，但文入面話佢完全不能原諒Bartomeu。美斯並唔係一個特別鍾意權力嘅人，佢鍾意人地幫佢搞掂晒，「但我話想要邊個嚟你就幫我搞掂佢」，而由始到終佢都係想要尼馬（所以，我估佢真係一定去PSG）。至於基沙文，嚟到巴塞當然亦係唔係嗰回事，更重要係。呢1.2億歐，仲要壯大埋馬體會，反咬返巴塞。「益利物浦多蒙特都算啦，唔好益自己西甲對手嘛」

===================================================================
32. 事情發展到呢度，巴塞已經好似畀白蟻蛀咁，越嚟越吃力。2014-2019年使咗10億歐羅買人（未計賣尼馬嘅收益嘅），多過任何一間球會，但成績明顯唔成正比。

33. 去到2020年頭，蘇亞雷斯受傷，巴塞要搵人，只能夠搵啲平嘢。結果當時體育總監艾比度Abidal搵著北京國安嘅剛果/法國球員Cédric Bakambu。呢單又係一單鬧劇，剛果人收到電話，十分歡喜，卒之唔使在北京睇電視機，就坐飛機去香港，轉機去巴塞。點知嚟到香港開返電話，Abidal先同佢講：唔好意思我地改變主意，你在香港玩得開心啲。我肯定剛果人屌咗佢老母N次。最後剛果人返返北京繼續睇電視機，而家仲在國安（彩蛋：FC過，其實北京有機直航去巴塞，咁點解會去香港？可能剛果人想嚟香港去重慶大廈食咖喱，可能剛果人唔想坐國航，又或者嗰日咁啱冇機。如果係直航件事仲好笑，剛果人去到西班牙人地先同佢講唔好意思）

34. 剛果人鬧劇之後，應該好多人都知巴塞最後簽咗乜水。丹麥人Martin Braithwaite。此人應該都算係水貨啦？呢條友米杜士堡都未踢得掂，居然去咗踢巴塞，好似話在個介紹新球員環節，條友的波晒球技都出晒醜，波都控唔到。「可能太緊張」。文入面都有講，當年連尼加同曉士（Mark Hughes）去巴塞，話有個介紹會，曉士有啲緊張，連尼加同佢，驚春咩，最多咪一百十人嚟！ —點知去到魯營有6萬人睇佢！連尼加幫曉士開脫，話巴塞嘅壓力，唔係人人受得住。

35. 當然，Bartomeu年代嘅轉會，沒有最好笑，只有更好笑。另外有個叫Matheus Fernandes（我聽都冇聽過）嘅球員，亦係同時簽落。係由巴西彭美斯拉買嘅，仲要只係預備組，我以為係隱世球王拿度尼添。固然只係1000萬歐，散紙，但完全唔知係乜事！呢條友甚至冇一個正式介紹會。最後借咗去華拉度列，出咗幾場，返返巴塞出咗十幾分鐘，就踢咗佢返巴西。

36. 當然只係好少錢，但畀你見到巴塞啲轉會係如何亂嚟。連彭美拉斯個體育總監都覺得神奇，「啲人話我發神經呀，叫艾比度嚟買個踢彭美拉斯預備組都冇乜點有得上場嘅小朋友，點知真係有人買喎」。果然水魚唔怕多。大家可以諗下，美斯見到Braithwaite同Fernandes，有乜感想（彩蛋：Fernandes著咗件19號波衫，因為Covid—19，冇人肯著，成件事真係19得很）

37. 然後，就發生咗上篇文講，同祖雲達斯交換球員嘅事件。美路去祖雲達斯，巴塞簽比真歷。巴塞當時已經好唔掂，但急需要一筆「盈利」。上篇文都冇講，因為再搞唔掂，就要Bartomeu自己上身，咁佢當然諗呢啲方法。但啲蘇洲屎就留下之後嘅人解決了。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
38. 已經打咗5000字，都只係講咗巴塞轉會如何操作。買貴人嘅後果好嚴重，你賣固然蝕錢，但你唔賣一樣每年同你「折舊」，例如比真歷之類，當然cash唔使點比（同祖雲達斯offset咗嘛），但profit -wise每年都仲要拖低條數。

39. 寫得太長，但以上都只係講轉會。唔好忘記，巴塞除咗轉會出手豪，人工亦出得高，美斯份糧亦係一個問題。本來就收入多開支多冇問題，但以wage as a percentage of income，巴塞都係離晒罩嘅（comment會貼圖）

40. 固然Bartomeu任內，都簽咗Pedri返嚟，好好嘅收購，不過真係十件水貨先扑中一件掂嘅。你話拉馬西亞完全斷層，亦唔係，Ansu Fati亦都擔到大旗。但，真係遠水不能夠近火，都講過巴塞嘅問題唔係場上，係財政。你Ansu Fati踢得再好又點？巴塞似乎只能係賣走呢啲好球員，而疫情下，對家都冇乜錢，況且人人知你莫財，當然再壓你價。

41. 爆煲？就唔似會嘅，但，照計賣走啲主力不能避免，點都要幾年調整下。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

#點解我永遠tag唔到余家強

兩年前，余家強寫梁芷珊。

蘋果日報，蘋人誌，出版在A叠，
洋洋3000字。

事件會過時、情懷會改變，
今日的我即使洨打倒昨日的我，
我也踏上了向前的軌跡。
遠去的一切只會更加遙遠。

人物專訪， 3000字，你有沒有心機看完？
但反正而寫家強就很有心機寫，
把那2019年4月屬於我的情感，
深刻而有力地記錄下來。

我不知道自己有多難寫。
我也曾經連續兩年撰寫Cosmopolitan
封面人物訪問，每月交稿4000字，
我覺得每一位被訪者都很難寫 -
佢好多嘢講難寫，佢無嘢講更加難寫。

我的人訪水平遠不及余兄，
我只知道，做好每一件事，
持續交出高水平，
除了是天份，更重要在堅持。

衷心仰慕每一位在堅持的人。

2019年4月9日
6種身份 2種男人 - 梁芷珊

撰文：余家強
攝影：羅錦波

▶️▶️ https://hk.appledaily.com/local/20190409/RD4FW37EAIKWLYABMJZWU57MY4/

梁芷珊人生上落之大，估佢唔到。

1989年《他來自江湖》初登螢幕，劇中周星馳對她驚為天人，觀眾也驚為天人，卻零演技，於是套用她說法「好快收皮」，我們定義此為花瓶。

但轉眼見梁芷珊識填詞，出道作鄭秀文《不來的季節》，還寫得一手好文章，四百首歌四十本書，我們定義此為才女，雖然才女不應該是花瓶。

但轉眼見梁芷珊下嫁羅傑承，羅傑承啊，一臉不解溫柔商場狠角色，橫看豎看非文青，有理由相信她愛慕虛榮，我們定義此為闊太，雖然闊太不應該是才女不應該是花瓶。

十多年過去，再大的風浪再大的官司熬過了，女兒學業有成了，但轉眼見梁芷珊離婚，套用她說法「朋友都話要離唔係依家離啦」，愛慕虛榮不會捨得銅鑼灣搬黃竹坑，於是我們定義此為棄婦，雖然棄婦不應該是闊太不應該是才女不應該是花瓶。

但轉眼見梁芷珊與法籍廚神Olivier Elzer拍拖，還五十歲重新創業，於是，只得定義她為傳奇，唯有傳奇可以兼容咁多身份。

──自覺上落太大嗎？

梁芷珊說：「我的人生只有上，因為勝在起點低。」起點之低，要由醜小鴨開始。一二三四五六不多不少，這是六種身份的女人和關於她兩種男人的故事。


醜小鴨變花瓶

醜小鴨，梁芷珊並非隨口謙虛，而是經常提起，這天甚至說：「我問羅生（羅傑承）點解追我，他笑道：『因為想搵人夾band。』他見過我小時候學生相，瘦瘦黑黑戴副眼鏡厚疊疊，雙目無神，成個陳友咁。」抬埋前夫作證，拿她沒法。

天生左撇子，學寫字反轉晒。「當年沒『學習障礙』觀念，阿媽逼我右手用筷子，小學老師以為我懶我蠢。一個唔靚唔叻唔勤力的女仔有什麼希望？爸爸是公務員，但只分配到華富邨公屋，有一個名額送子女去英國讀書。我偷聽父母傾偈：『阿女讀書咁差，不如留番機會俾個仔啦。』即係我弟弟。我知道無份，於是拼命考入庇理羅士，得十六個位我都敢報。

「我靠作文拉高分，貪作文唔使背書，投稿《讀者文摘》仲有錢收。中學老師見我手長腳長，用我做班長，依然叫唔出我個名。於是行搞笑路線，二次創作歌詞，笑吓老師自嘲吓，上晝推出，下晝已經全校識唱，我不會隱名，因為我希望人家記得我。

「我想挪走厚眼鏡，所以我任職補習，反正沒皇仁仔來等我放學。第一份收拿去配con。」

之後女大十八變，OL般考入Poly商科，又偷聽父母傾偈：「阿女自己搞得掂，都係送阿仔去英國啦。」已經不重要，梁芷珊陪朋友報名港姐……再一次，並非隨口說說，那朋友有名有姓，就是當選亞軍的朱潔儀（庇理羅士同學），而梁芷珊兼職模特兒拍了該屆宣傳片。「因為我唔夠薑。」

無論如何，成名了，《他來自江湖》，「監製叫我負責飾演靚女。」故事至此本應圓滿落幕，但靚女零演技；零演技靚女本應也無問題，按梁芷珊說法，她自己收自己皮。

「頻頻NG，秋生和星仔待我很好，助導過來幫我整咪時低聲說：『醒目當幫忙，收工嘞。』係喎，阻住地球轉，自己都會行慢咗。唔阻住，也是一種推進，反正我對咁多事情好奇，無理由擺心力在欠缺相對優勢的地方，我須要進步。」


才女變闊太

華麗轉身，很快被發現寫作優勢。「人家說我際遇好，其實什麼人就會遇到什麼人，我鍾意文字，自然總遇到個鍾意文字的男友（指廣告才子練海棠）。那夜他車我返家，說明天要推辭填不來了，我自告奮勇給我一晚時間試試，於是有了梁漢文的《想着你等着你》。我中學玩填詞為了人記得我，結果第一首作品還是落了練海棠名字。」

之後著作等身，故事至此又可圓滿落幕，但梁芷珊再一次令人估佢唔到。

嫁羅傑承，做馬主搞足球隊，與才女相距太遠，她說：「話我愛慕虛榮，表面證供成立。」愛慕的是另一種虛榮。

「我喜歡比我強的男人，愈成功的男人愈堅強，因為一定克服過許多挫折才成功。羅生大情大性，會發洩出來，轉頭又梳理得好好，對運動員對球隊很照顧，攬晒上身。這樣的男人好吸引，適當時間遇上適當的人，怎不嫁？

「另一種是文藝型，交得出作品是用理性管理感性，專注的人永遠英俊。」

後者她自己做了，不算，欲知梁芷珊喜歡的第二種男人，請讀下去。

──停了創作不可惜嗎？

「我的愛情小說涉及上流社會，同羅生一齊，他不想我寫，費事以為我影射他的朋友。

「我把寫作放在業務上，為南華攞到Giorgio Armani贊助，七頁proposal不能長，幾考文字功夫。我安慰自己，若非親自執筆，未必成功呢。

「足球界怕申請怕寫文章，就由我用女性角度去幫去籌劃吧。」

從無諗過嫁咗唔使做，梁芷珊的確不只闊太，她落手落腳，甚至現時離了婚，辭去了飛馬足主和足總董事之位，她新開的Maxi House繼續做足球marketing。

「我離開boardroom，與足總仍是朋友，只不過覺得架車行得慢，我落車推會快啲啫。我天生無體育細胞，完全不懂踢波，現在更加無話專撐哪一隊，我撐的是運動員精神，想個行業有生機，survive下去。」


不是棄婦

羅傑承也撐足球。唔夾嗎？

「不是不夾，係夾完啫。」

這句有良心。最怕聽見多年夫妻一朝歸咎於性格不合，完全推翻以往，怎可能？梁芷珊卻冷靜分析。

「朋友都話：『五十歲，分咩開吖，霸住個位嘛。』我話，霸嚟做乜呢？我有自己的事想做。

「羅生最大難關（澳門官司），我身體力行幫過了。女兒，一口氣把她教養，送到英國讀書（還成為GCSE狀元）。每十年當廿年用，我身心透支、身心俱疲。羅生打不死，他要做太多，到頭來，花多一小時對着我都是負擔。我們各自不用照顧情緒，每晚要對期表。終於我說：『不如試吓明天一覺醒來，對方不在旁邊，問吓自己有無一絲唔開心、唔自在。如果無，咁分開啦。』

「羅生在一篇訪問說得對：『大家都攰嘞。』真的，大家見到大家都攰。若要拿走什麼來減壓，不如拿走對方啦。我和他綑綁式，包晒感情、生活、工作、未來，但分開可以好和平好完美示範，因為我不考慮身外物。」

與前夫再見亦是朋友，也並非隨口說說，今年賀歲盃便齊齊搞。「作為拍檔，他一流……」

梁芷珊曾經離奇暴瘦，惹惡疾疑雲，她說：「不單瘦，臉色差，人似墮入網中，想做不敢做，不想做的又行錯。」其時正值婚姻抉擇。「離婚第一件事就買重住院保障，沒了後顧之憂，這樣只要搵到基本使費，可以行自己的路。五十歲仲買到全保，朋友讚我身體好。」

毋寧說那是情傷，走得出便無恙。


不是傳奇

但一年間與名廚Olivier Elzer打得火熱，未免來得太快，而且同樣有商業合作，就不怕重蹈逼得太緊的覆轍嗎？

梁芷珊笑道：「新感情不攰的。這是文化差異，外國人眼中，對伴侶welcome to join，不come with履行責任，不用對期表。

「我做推廣，他做廚師，也是『咁啱』，marketing welcome to join。例如今天知道曼聯和拜仁踢紀念賽，我即刻問畢特訂飛，未問他去不去睇，他join，就買多張機票而已。」

廚師正是她喜歡的第二種男人。

「照顧溫飽呀！中國男人有風度而唔浪漫，羅生乜都攬晒上身。外國男人浪漫而無風度，他呀，買餸、下廚成套畫面好正，但我開電力車，他開電單車，從不會替我charge電。」

給她嚐遍了，其實梁芷珊應該復出寫愛情小說，可惜目前只計劃寫管理學。

二十年前，梁芷珊有本書叫《我的六個身分》，自道身兼model、OL、藝人等等，比起今天本篇說她的六種身份，小巫見大巫。人生真正經歷過，驀然回首，反而沒啥大不了。

「不覺得上落大，起點低，拉勻總是向上。我不相信贏在起跑線，養過馬就知（她的「軍事出擊」是馬王），哪場冠軍會由頭帶到尾？要識得分段發力嘛。

「我本身的障礙是，有一天學校美勞課彫薯仔印章，反轉再反轉，忽然頓悟，啊原來要令人家睇得明。我過往的思路像一盒未砌的puzzle，每一part都齊，但沒整理，想通這點，成績便好起來。教育女兒也一樣，開竅靠她自己。今次做專訪預咗被問心得，亦預咗咁講會乞人憎，但我還是講，因為想幫大家壯膽──不必怕放手，我女兒就係無補習無學琴的例子。為人父母什麼資源都肯俾，偏偏沒俾最重要資源給子女，時間。有時間才有自由有休息。」

狀元母親肺腑之言，信者得救。

「所以我給女兒起名樂桐，讓她有個快樂童年。」


後記

「要我不工作不可能。」是梁芷珊口頭禪。新office落腳黃竹坑工廠大廈。

「無人想承認由銅鑼灣搬黃竹坑。以前在皇室堡，連貨倉都維港景維園景。重新創業，先衡量租金支出，工作需要呼吸空間，倒不如偏遠些闊落些。有諗過在大坑home office，但家居還家居，我屋企甚至沒電腦，在家只看書。」

她的新公司Maxi House（萬事屋）人手精簡，像她教女般崇尚主動發揮。三大業務：簽球員做經理人、搞體育推廣，那是由前夫而來的專業；整體裝修得像個大廚房，做烹飪示範和飲食marketing，又與現任男友相關；還有圖書出版社，則屬伊人自家首本戲。

半生經歷，一時登覽。

──考慮再婚嗎？

「不會了。同羅生因為有小朋友，有小朋友一定結婚。我的小說很少開心結局，我不相信天長地久。

「潮流興問愛抑或責任，責任並非愛，只不過孭到尾。」

［ESL vs ESG］　讓你知道天地不容～～一刻不放鬆～～來讓你再去贈我　～～～這可怕的陣痛（＊）

經濟原文：【歐洲超級聯賽】歐超聯融資行摩根大通被降ESG評級　因做法不符合股東利益（https://bityl.co/6Usq）

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

TLDR：JP Morgan因為出資支持歐超聯，由ESG合規變成不合規。咁都得？！

1. 今個星期花生極多，有幾十單都未得閒寫。但呢單亦真係挑戰我三觀，完全係奇聞。比起歐超聯出世然後兩日夭折更神奇。

2. ESG investing，雖然近年先多人講，但同好多而家巧立名目嘅嘢一樣，古已有之啦。即係點？即係冇良心嘅企業，咪唔好投資落去

3. 之但係，法律就還法律，斷估唔合法嘅冇得上市啩？（＊＊）。但良心，喂，一人一義十人十義喎。好多網友覺得華爾街嗰啲全部仆街冚家鏟，成個股市都係昆人嘅，係咪全部Black List 晒？

4. 咁當然你自己可以唔買啦，但，基金又如何？亦有基金在方針講明，例如我唔買黃賭毒股票（黃業其實好難上市，毒嘅，大麻股咯。但賭股好多）。唔買煙酒亦得。亦都有啲唔買軍工股。

5. 同樣地，近年咩石油公司嗰啲，都係眾矢之的，基金又唔買，銀行都唔借錢畀佢地，因為借咗就自己都同謀，有份搞到冚球鏟，自己啲股票都畀人黑名單。或者咩緬甸軍頭呀，非洲血鑽呀，呢排啲生薑棉花呀咁。

6. 之但係，客固然唔會自己逐隻睇，基金都未必會，就當然要有啲第三方機構去評。咁就又係嗰句，十人十義了。你覺得飲酒天地不容，我覺得飲百事先落地獄喎，just saying

7. 但，今次呢個，真係going too far．首先我係反對歐超聯的，原因講過，你可以唔同意，但重點不在此。

8. 當然我唔會誓死悍衞歐超聯支持者嘅自由（CLS，好多條命？）。而JP Morgan 即使唔係推手，都肯定擔當咗好重要嘅角色，洋基鄉里圍威喂嘛（順帶一提，我見好多球迷講球會話一入呢個歐超聯就分幾錢幾錢，好過歐洲足協好多。呀老細，係人地JP Morgan借畀你的，要還的，仲要同你計息，可見球迷真係幾咁易昆）

9. 但，而家話成立歐超聯，背棄歐盟 OCED 同聯合國道德標準？搞乜？首先我唔知幾時呢堆變咗道德組織，但即係，我借錢畀人搞波出糧裝修球場咋喎，唔係借公畀人買軍火種族滅絶下話？

10. 你可以話滑坡謬誤，但此例一開，真係萬能Key 任你玩。Let’s say下次有間銀行借錢畀歐洲足協，係咪即時又變non-compliant？雖然我反對歐超聯，但足協腐敗人人皆知。

11. 講到尾，金錢利益一回事，大球會貪得無厭要鬧又另一回事，球迷唔高興又另一回事，但你借錢畀佢又係再另一回事下話？

12. 固然你睇官方講法，話「不符合股東利益」，但得罪講句，你呢啲ESG機構邊位？CFA都未必有個。你畀JP Morgan老細更知咩係「符合股東利益」？股東出咗聲啦咩？況且，借幾十個億出去咋喎，佔本loan book有冇一千份一？

13. 呢啲咁嘅嘢，ESG都要理嘅，就真係有排唔得閒。第時借錢畀拜仁嘅銀行又話打壓小球會唔道德。借錢畀地產商又搞到香港人住納米樓不道德。

14. 所以ESG呢啲咁嘅嘢，講梗係個個贊成好聽，去到實行你見真係相當荒唐。當然啦，呢間Standard Ethics唔知有幾有影響力，其實你可以當佢發神經的。

（＊）呢排幾好唱口，仲揀埋啲幾廿年前我考會考時聽嘅歌。可能又畀啲小朋友批評話廢老脫節聽埋啲咁舊嘅歌（實情我貼啲再舊嘅都仲得）。不過，扯，你見鬼媒啲newsletter，John Authers 嗰啲，啲文貼法蘭仙納杜拉添呀，仆街，成百年前呀，清朝人嚟的（其實爭幾年），果然香港人寧舍巴撚閉。

（＊＊）都唔好咁老定，合唔合法呢啲，睇jurisdiction啫，大麻已經係好好例子。又或者你諗下日本啲彈珠機公司，在香港上市，「做乜唔在日本上？」「貪你香港有common law？」。我記得管理層好技巧地講，佢地啲生意，not illegal—呢啲就日本語言藝術啦。事實熟悉日本文化嘅（我唔係講我）都知，日本就係好多呢啲咁嘅掩耳盜鈴嘅混吉嘢，彈珠機中獎當然不能換返錢，唔畀賭錢嘛，但可以換獎品，然後又咁啱隔離會有啲人幫你收獎品換做錢。咁啱啫，同公司無關，如是我聞。仲有，你睇愛情動作片嗰啲泡泡浴，日本禁止賣淫嘛，但現實上全部可以「本番」（你懂的）。點解？日本法律冇禁止男女一齊沖涼喎，又冇禁止你畀錢人幫你沖涼，然後你地情到濃時唔小心跣咗啲嘢入去，就唔係店方控制到啦，。呢啲就係關東嘅玩法。關西又另一種玩法，友台 新田飛地 話你知，料理組合，你食食下和菓子變咗食草苺牛奶，呢啲自由戀愛嘅嘢，開明嘅日本國政府係唔禁止的。不過唔知啲和菓子做乜咁貴，應該好好味。（又，日本嘅嘢，真係乜都要分關東風關西風，不過聽聞呢個唔關關東關西事，只係大阪係咁奇怪，同啲黑官商勢力有啲關係喎，如是我聞）

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝