【立即檢查】#U型渠 內貯水阻疾病傳播！放梘水check渠道有無漏氣⁣ 青衣 #長康邨 #康美樓 一夜間變成疫廈，由於高層有住客確診患 #武漢肺炎，病毒可能經廁所渠管進入低層單位，令同座另一位住客同染病。事件引起全城關注，一方面擔心03年沙士「#淘大事件」再發生；另一方面大家都擔心自己屋企個馬桶有機會播毒。疫情當前，大家做好家居環境衞生，可預防疾病傳播。如果唔確定家中老舊渠管有無漏氣，其實有簡易方法自行檢查！⁣ ⁣ -------------------------------⁣ Follow @likemagazinehk | 每日送上優質生活Tips⁣ -------------------------------⁣ ⁣ 定期向排水口注水⁣ 經過專家嘅檢測，相信今年康美樓有人連環「中招」，不涉及U型渠去水位問題，而係有人自行改裝廁所糞渠，而且沒有完好封住排氣管，當樓上有人發病，樓下單位廁所開抽氣扇，就將糞渠內帶有病毒空氣抽進室內。不過，今次事件再次喚起大眾關注廁所管道設計和保養嘅關注。⁣ ⁣ 有臭味快搵人檢查⁣ 在香港，無論係私人樓宇、公共屋邨或商業大廈，只要有廁所或任何污水排放系統，大部分都會裝有U型渠。U型渠嘅作用係阻隔污水管嘅臭味及污穢物包括細菌病毒等由污水渠管進入室內。03年沙士後，政府發表調查報告，指出淘大花園爆發沙士，因大部分連接地台排水口嘅U型聚水器很可能因乾涸而未能發揮隔氣作用。因此，每星期將半公升水倒入排水口，確保去水渠內有足夠嘅水，係預防疾病傳播嘅重要一步。此外，要定期檢查洗手盆、浴缸、座廁和地台排水口，如有滲漏、淤塞，或者排水口有臭味，應馬上安排合資格技工檢查和維修。⁣ ⁣ 查渠道漏氣用梘水⁣ 廁所渠管驟眼睇正正常常，好似無穿無爛，點先知道有無漏氣？香港大學醫學院微生物學系講座教授袁國勇教可以喺喉管接駁位附近放番梘水，然後開抽氣扇，如果有氣泡冒出，代表渠管可能未密封，要盡快搵專業人士檢查跟進。⁣

蘋果報導：「青衣長康邨康美樓的廁所是U型渠設計，專家不排除因此散播病毒。」 . . 相信大家都好緊張，雖然你識我係作者，但其實我都係一個地盤佬。等我分享一下關於清潔U型渠同Check有無塞渠嘅簡單方法── . . 首先，唔係因為有U型渠所以有病毒，而係因為U型渠乾涸，或無隔氣彎管，去水位直接連接大渠而提高傳播風險。 注意：疫情嚴重，每個星期一定要喺U型渠倒水，冇乜水流過嘅去水位就要倒兩杯。一杯水嘅份量，唔一定要用1:99嘅漂白水加強消毒效果，清水都得，但千期唔好倒熱水（霧化就會變打邊爐傳染事件），多啲打開門窗，保持通風系統暢通無阻，減少病毒入屋。 如果你會開暖氣，或者室內氣溫好高而乾燥，咁你就要再勤力啲倒水落去。 之後我手把手教你Check 以下嘅嘢： 1️⃣沖涼洗面嗰時聞吓啲水有冇臭味，仲有馬桶附近嘅去水位有冇異味，有嘅話就要勤力啲倒水 2️⃣拎個電筒照下個去水位，倒水落去，睇吓佢係咪即刻好快咁流走晒？廁所同廚房都要睇，如果佢係慢慢流，唔係即刻完全流走，咁即係有隔氣彎管，有儲水能力，咁病毒就會少啲 3️⃣如果你屋企平日好多昆蟲同曱甴，可能係本身無隔氣彎管或太乾，所以昆蟲先可以喺度匿埋，都係多啲倒水 4️⃣地台去水位，發現塞咗可以用通渠泵或者通渠劑，好多地方都有得買，總之keep住有一杯水係入面，唔好比佢乾，亦都可以減少昆蟲出現 5️⃣望吓洗手盆或鋅盤底係咪樽型嘅隔氣彎管？其實大多數都係。最驚入邊有垃圾塞住，可以扭開個杯位清理，一拎出嚟好多污水架，所以小心啲處理，洗完裝返落去就得㗎啦 6️⃣抽氣扇嘅負氣壓係會抽走U型渠嘅水份，所以如果你成日開抽氣扇嘅話，盡量開住窗或門，當然最好唔好長開抽氣扇 7️⃣如果你屋企係黑廁，一旦有社區爆發就會好大鑊，你可以用啲方法黐實個去水位，例如搵牛皮膠紙封住佢，然後多啲蓋住個馬桶，就算冇人嘅時候都蓋住佢。如果你發現有以上嘅問題就盡快搵師傅嚟睇，否則你可以諗暫搬出去住 半夜爬起身寫都係希望幫到大家，保持個人同家居衛生，好好照顧自己啊！ P.S. 好多人聽到係淘大2.0要成幢大廈疏散已經好驚，一聽到U型渠就慌，亦有傳係講排氣管接駁問題，所以康美樓唔一定係歷史重演，保持謹慎，但唔好過份恐慌 P.P.S. 盡力照顧自己同身邊嘅人，提高意識，做到嘅盡做，幫到盡幫，太chur太緊張都無用