【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18261-Q18280）

Q18261：

龔成你好。一年前有朋友介紹我follow你，我follow左但一直冇太認真留意。

直到暑假時，我屋企人俾公司裁員，突然之間有種背負住屋企人既責任，我都覺得係時候要增值下自己財富。所以我決定再返去你個page睇下，現在已經開始睇你既書。

今年21歲，仲係讀緊書嘅大學生，很少投資知識和經驗。現時剛剛開始做10個月實習，一個月人工應該有$10000左右。

同屋企人商議好俾$2500家用，我紀錄過每月支出都係維持大約1000元，預計每月可儲到$6500左右。

我原本打算月供$4000買股票，但實習完左之後嘅一年我唔會有收入，因為我要讀埋最後一年大學先畢業。手頭上現金有大約5萬左右，所以中間果一年我未必可能有足夠資金投入股票。

我想問三個問題：

1） 我知道愈早投資愈好，請問我應唔應該下年邊返part time邊返學，還是問家人借住少少加自己錢月供，定係唔好投資繼續儲多d資本將來先再月供？

2） 如果開始月供，應該用邊間銀行或證券行開戶最好？我個人可以比較進取和承受少少既風險，除左盈富之外，仲可以加咩股做組合？如何分佈？

3） 我會開始睇關於投資既書，除左你d書同埋富爸爸窮爸爸之外，有咩書適合我呢種新手睇？

龔成老師︰

1） 你可以做一些PARTTIME去維持一定收入，就算唔能夠跟今年月供金額一樣，也盡力去接近，咁樣會較理想。借貸投資始終有風險，同時只適合高階投資者，加上要在明顯平的市況才會動用。

2） 你可以睇翻佢地收費，基本上用銀行或證券行都無問題。

以你年紀計，"平穏增長股" + "潛力股"都適合。

平穏增長股，如盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）
潛力股︰比亞迪（1211），中生（1177）或福壽園（1448）。

由於你現時無乜選股經驗，你可以先用盈富基金（2800）作為你投資目標，佢係包括50間質素不錯上市公司股票的組合，有助你平衡組合中的風險。每月可先月供$3000在盈富基金，餘下的資金就先儲起。

現時大市只是合理區較底位置，你現有5萬資金可以先投入一半，分2注，去入盈富。餘下一半和每月儲到的錢就等大市出現一定程度的下跌，才掃貨。

其間要努力增加投資知識，在看書、新聞、報目關課程。到你有一定能力和經驗，就開始買其他我建議的股票。

3） 以下是我認為適合初學者睇的書：

《我十一歲，就很有錢》
《經濟蕭條中，七年賺$1500萬》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

------------------------------------------------

Q18262：

你好，想請教一下您

本人今年27歲，月入28k，下年應該可以有55萬左右既首期，亦應該會準備生育。

有睇過您出的《5年買樓4部曲》，你認為250尺既細物業係值得投資，咁170至200尺既物業你有咩睇法，因為我而家不斷出去睇樓

滿意又合乎首期既物業多係半新樓，而太子XX（380萬179尺，銀行估價為360）及大埔XX（350萬192尺，銀行估價為354萬）都係其中之一，請問你覺得值得投資嗎？

真是麻煩你了，謝謝你
若購買單位後，打算出租之用

龔成老師：

250呎是最少的投資，如果少過250呎，就開始勉強，物業的價值唔算高。

半新樓都可留意下，新樓就唔建議。你最重要是計下租金回報率及呎價，比較下同區同類的單位，比較下你想買入的單位，是否有吸引力。

由於少過250呎，因此，要「吸引」，即是比其他物業價錢較好先考慮，否則唔投資。

這些少過250呎的物業，過往一年回落左唔少，價錢上有機會找到較合理的，但你都要明白，佢在質素上始終會較一般。

------------------------------------------------

Q18263：

龔sir, 碧柱園服務同雅生活已經有明顯既盈利預測，所以股價一直高企，看似回落機會不大

發展急速，現價碧桂園服務可以買進嗎？你會用邊類估值方法來幫物管股估值？

龔成老師︰

碧桂園服務（6098）有質素，這企業的生意不錯，本身有規模，盈利正不斷增加，加上高股本回報率，而且行業處增長狀態，而佢的規模及品牌，相信能助佢持續取得生意。

但有兩個問題，第一是佢上市年期不算久，這刻根本未見到企業的真實情況，因此仍要觀察。第二是估值，現時市盈率去到近80倍，少少貴的水平。

而雅生活服務（3319）無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。

這企業的發展快速，可說是有危有機，雖然可帶動業務快速增長，同時會令企業造成風險，你要明白這點。

質素及增長力來計，碧桂園服務（6098）較高，但太貴，此刻唔會考慮。

從整體質素與投資值博率去考慮，雅生活服務（3319）會較好。現價在合理區上部，可以投資，但只能小注，並要分注慢慢入。

------------------------------------------------

Q18264：

請教一下隻新創建，佢剛賣左巴士業務，看來清除左瘀血，但又好似想收購不良資產業務，呢隻值得長線投資嗎？雖然息率吸引

龔成老師︰

新創建集團（0659）於8 月21 日宣布，以32億出售旗下新巴及城巴業務，買家為 Templewater Bravo Holdings Limited、漢思能源及 Ascendal Group Limited 合組的財團。

由於巴士並非其核心業務，佔盈利比重唔算高，對集團長線影響唔會太大。

整體而言，集團質素算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，你宜集中在股息多於股價回報。

------------------------------------------------

Q18265：

龔sir你好！ 有選股的問題想請教。24歲，收入15k。

現時持有港鐵225股，
越秀房地產569股，
長江基建234股，
中生製藥336股，

比亞迪82股，
中國平安53股，
盈富基金325股，
香港電訊86股。

每月供港鐵$1000
長江基建$1000
中國平安$500
盈富基金$1500.

現時每月手上有鬆動的$3000，想問我應該選擇哪一股？還是在原本的組合內加碼？謝謝

龔成老師：

你持有的，基本上都是有質素的股票，但以一隻24歲的人來說，增長力不算強，你可以減翻D收息類股或增長力不算強的股，如長建（1038）、香港電訊（6823）、越秀（0405）。（你不用全部減，可以慢慢調整或減部分）。

如果你之後有資金增加，可月供增長力高少少的股，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18266：

hello hello.岩岩做左幾年野，最近先開始玩股票，想請教下你。

想問下月供同自己買碎股最大既分別係咩？如果我每個月將自己草到既錢自己去買碎股，唔係flexible d咩？又或者草幾個月一手一手咁買入，係咪都可以？

暫時打算買入盈富，香港電訊，港燈。呢個組合會唔會太保守？thanks

龔成老師：

月供同入碎股類似的，但月供就是「固定金額」。

而比起一手手入，月供會較有平均價格的效果。

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

至於你的組合，的確較保守，不太適合年輕人。

------------------------------------------------

Q18267：

老師今年年中先認識你，睇左你幾本書，股票勝經，致富藍圖同50潛力股係入面挑選左823呢隻股 好好彩贏左6千

但我知呢啲係新手弊病！所以我將果小小錢再加啲錢黎報讀你既股票基礎班，希望增值下自己

另外較早前買入1810十手購入價係15.10 升到而加20 真係好興奮

因為有之前既經驗今次點都唔放！希望體驗到陪升既感覺

由乜都唔識跟人買數字股輸左幾萬之後，到而加識小小又贏到啲個感覺真係好開心，已報你班，期待跟你學多啲知識！

龔成老師：

相信你已基本明白投資原理，投資並不是坊間的炒炒賣賣，而是持有優質股，長線。同時建立一個組合。

領展（0823）、小米（1810）都有長線持有的價值，你可以長線，唔好比中短期股價影響。同時，可以加入其他股票，建立一個更平衡的組合。

具體建議你上完堂，先慢慢配置自己的組合。股票班見！

------------------------------------------------

Q18268：

老師你好，想請問有咩長線潛力股可以推介，例如比亞迪同美團，本人唔介意承受風險，

同時想請問老師，領展股價可否從上90高位

謝謝老師。身體健康

龔成老師：

可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性高，同時風險大左，你要自己平衡。

同時不少都唔平，你要控親注碼。

領展（0823）慢慢會向上，$90有機的。

------------------------------------------------

Q18269：

龔老師，本人32歲，已婚有兩個小朋友，收入唔多，扣除生活成本，每個月只有$1000多可存。

想問零存整付 和 月供股票 哪一個較適合我存錢/投資/抗通脹？ （或者其他）謝謝

龔成老師：

以你的年齡，月供股票較好，但你要先留一定的備用現金，之後先進行月供。

盈富（2800）$1000較適合你。

但你要留意手續費，如果手續費太高，就唔值得做。

------------------------------------------------

Q18270：

你好龔老師，本人今年30歲，剛新婚，正職月入25000。
無做投資，依家有20萬左右saving。欲2年內育1子，長遠希望可達至財務自由。

1. 打算與家人購入土瓜灣近地鐵站40年左右2房單位（430萬，會做高成數按揭）
a) 請問現時是買樓時機嗎？

2. 請問如果新手投資，該如何步處？ （每月可儲10000左右）

3. 若現時做線上小生意，是好時機嗎？
多謝龔老師細閱。

龔成老師：

1）地點不差。但要留意樓齡的維修相關問題。

香港樓中短期有可能波動，但長遠仍是向上，就算跌期跌都唔會多，如果你睇中，都可考慮，最重要是「供得起」。

2）你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

3）是時機。其實這些生意，愈早開始愈好，太多人得個「想」字，先行者能賺最多錢的。

------------------------------------------------

Q18271：

龔老師: 跪求指點迷津！
本人33歲月入3萬公務員，

同父母同住，每月一萬家用、一萬投資 ($9000月供股票) 、一萬其他消費(交通、飲食、娛樂等，通常每月用5千左右，其他儲起)

手上現有現金約80萬
股票共約22萬:

月供組合: 煤氣$1500、比亞迪$1500、港鐵$3000、盈富$3000

尚有小量建設銀行、阿里巴巴、小米、中生製藥、金沙

目標:
財務自由！財務自由！財務自由！
移居泰國，努力尋找副業發展中！

投資組合上，請問有沒有可加速的方案達到目標？
亦有機會準備同男朋友同居，消費上又一筆…. 唉

龔成老師：

你上述月供的，都是有質素的股票，你可以進行長期月供，至於持股，無問題，同樣是有質素的，長期持有就得。

如果你要加速，有兩個方向，第一，加大投資潛力股比例，當然，要求你的投資實力都會多左，你唔單止要月供，同時要自行選股，把握買入時機，創造較高的回報。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。最好當然等回落先考慮。

你現時有$80萬，可以想想怎樣平衡風險與回報。

但要留意，現時大市未平，要一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

第二，如果你打算移居泰國，又想發展副業，最好是發展一些與香港及泰國有關的業務，你要把握一些你的優勢，你要尋找這個市場。

你的消費將會進一步增加，因此要尋找更高的收入。

------------------------------------------------

Q18272：

你好，呢排睇過2007碧桂園同883中國海洋石油，呢兩隻股票現價算唔算合理價？

同埋有冇發展潛力？

龔成老師：

碧桂園（2007）的質素都不差，但碧桂園服務（6098）更好。2007拆出6098後，質素略略減。

2007要不斷發展物業去賣，這樣才不斷有生意，但6098的模式就不用，物業管理是持續性的，擁有一個項目後，就會有持續的現金流，加上2007負債較多，所以從質素上，6098更好。

但要留意6098現價略貴，投資要控制注碼。

至於中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

------------------------------------------------

Q18273：

hello sir 想請教以下問題：
本人28歲月入$18000，明白收入偏低而且支出不少，希望能盡力每月賺取固定的額外收入，現擁有現金4萬及以下股票：

1. 0788 - 8000股
2. 1928 - 800股
3. 3347 - 200股
4. 9988 - 100股
5. 9999- 100股

問題一：　因為現金不多又希望作備用現金，請問是否建議沽出上述股票？

問題二：　接觸股票不久，明白買得太散，但因為要等出糧先有錢買，但見到覺得潛力股就想買，請問是否建議沾出上述某幾隻股票？

再將資金購入2013/799/3033 其中一隻？請問sir 推薦邊隻？

問題三：是否建議沽出9999或9988及3347，走一轉再主力購入9988?

謝謝老師解答！

龔成老師：

1）現時你的$4萬，可以作為備用現金，不要動用。而現時你的持有，基本上都是有質素的，你可以長線持有，唔好心急賣出。

2）其實，你最重要是建立一個長期的組合，唔好轉來轉去，你可以想清楚，自己的投資策略如何，那些股票值得你長線。

南方恒生科技（3033）可長線的。

3）唔好做「走一轉」的投資，無意義的。

------------------------------------------------

Q18274：

龔sir，你好
最近開始想學習股票投資
係Facebook youtube 都留意左好幾個吾同既老師

佢地好多都係做短期炒買
例如day trade ,swing trade
我想請教下佢地做這類既買賣係咪主要用統計過往股市走勢？

或者估股民心理？
*我個人都係比較覺得龔sir既理論適合自己

另外想問一下，龔sir既書籍有冇教企業估值？有的話是那一本？

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地用少少腦去想，都會明短短炒根本賺唔到錢。長線先至係王道。

坦白講，要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，要考慮企業的生意、盈利、現金流等財務數據，同時要比較行業，考慮這企業的經營情況，之後的環境又會如何。這都是計算的基礎。

但如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18275：

老師，想問月供盈富 好唔好？

現在應唔應該入里亞巴巴呀？

龔成老師：

月供盈富（2800），可以進行，盈富現價合理。

至於阿里（9988）這股有質素，有增長力，不過現價唔算平，所以你如果入，只能小小注，或等回落先，又或以月供模式進行。

------------------------------------------------

Q18276：

龔成老師，你好！自從follow 你嘅page 同埋睇左你D書之後，都已經慢慢開始投資股票。非常感激！

目前擁有嘅股票如下：0066 - 1500股，0823 - 100 股，2800 - 2408股。一直都係月供盈富。其他嘅都係趁3月份嘅時候，一手手買嘅。

之前龔老師都有講過，澳門銀行月供嘅手續費相對比較貴，所以我都諗住係每個月繼續供5000蚊，不過係輪住月供，一個月供2800，一個月供0066，一個月供823咁。

等如果有好時機，再一手手買。請問咁嘅安排好嗎？

月入都只係大概15000蚊，我一個月用5000蚊月供，跟住另外5000蚊儲嚟供馬來西亞嘅債券同埋基金(需要供5年)

現金儲蓄大概有20萬。我想再加一個潛力股，比較有興趣嘅係小米1810。請問龔老師，我咁樣配置嘅話都恰當嗎？
或者我應該點樣做會比較好？

非常感謝龔老師嘅時間，會耐心等候回覆！

同龔老師再補充返小小資料先，我係喺澳門返工嘅馬來西亞人，所以想係澳門嘅呢幾年儘量儲多D錢。謝謝龔老師。

龔成老師：

你上述所月供的，都是有質素的，你可以長線持有及月供。

你可以每月供$5000，轉住供上述的3股，這3股都值得長線，由於盈富（2800）是組合，比起單一股票有較大的風險平衡作用，因此，盈富的比例可多少少，你可以盈富供2個月，然後另外2股各供1個月。

至於基合與債券，最重要是選一些有質素，風險唔高的，債券要有「A」評級的。

至於小米（1810），長遠有發展力，現價在合理區中上部，你可以投資。

你唔好用盡現金，慢慢運用$20萬資金，任何時候都盡量留有一定的現金。

------------------------------------------------

Q18277：

龔sir你好！我有個疑惑，我有時抵受唔到其他好股票升嘅好消息誘惑，都想分杯羹，再加上可以分散風險，所以就買左20隻，每隻小注，當然我明咁樣管理起身會麻煩

通常話持倉股票隻數唔好咁多，10隻左右，哩兩種諗法點平衡？我宜家又需唔需要，點管理減少持股數量呢？多謝指教！

龔成老師：

根據一些學術的研究，如果你持股的數日超過15隻，的確能減少集中風險，能將非系統性的風險減少，不過，由於太多股票管理困難，所以我會建議在當中加入ETF，例如盈富（2800），已經能有效減少風險。

另一方面，持有太多股你管理會好難，因為當你買入股票後，你應該要持續檢討，久不久要睇佢地的業務情況，業績、財務數據。

所以，我會建議你在買入前，要自己寫一份報告，對企業有一定的了解，同時有充份的理由，才買入，這就安全更多。我自己都是這樣。

------------------------------------------------

Q18278：

龔成老師你好，本人最近開始同兩個朋友一齊開舖搞生意，真正落手落腳做先發現原來大家好多意見分歧，而有一個朋友更加係成日唔覆機，唔做野

但臨落決定先諸多意見同阻撓，覺得好氣餒，想你俾少少意見。其實做生意係咪最好唔同人合資？

龔成老師：

同別人合作做生意，經常都有不同的煩野，我自己都試過，我試過有其中一盤生意，我付出多佢付出少，大家分成一樣，所以最後決定拆伙。

後來又試過有另一盤生意，佢出左一D古惑野，大家最後無左信任，所以最後決定拆伙。

合作做生意真的好煩，你要睇下點樣處理，你想一些長遠的方法，如果認為無得搞，就拆伙。

我自己而家D生意，都是自己搞的，我現時會用「請人」「外判工作」的方法，總之，我是老版，我比錢去買別人的時間同服務，我要有控制權。

------------------------------------------------

Q18279：

老師你好 我近2-3個月先開始意識到投資為未來的重要性。所以而家好心急 想請教你方法

我已婚 36歲 沒有小朋友
一直都沒有儲蓄習慣
現時每月收入17000

$2000供保險
每月儲3000去做月供股票
盈富$1500
比亞迪$1500
兩手恒生入手價$139

有30萬現金，但想用黎投資餐飲業，（搵左成年都未搵到入市時機） 所以一直唔敢用呢舊現金去股票市場做投資

另有20萬人民幣係屋企人比我的本意用黎開額外需要的後備資金（未有用處）

財務自由好似離我好遠 ，我想未來可以去泰國移民

我想問

1）我恒生唔望到近年儲會升上去 好唔好做止蝕 ，用呢舊錢去買其他增長速度快啲既股票？

2）如果真係買，建唔建議去買美股Tesla ? （長揸）

3) 老師對農夫山泉未來發展睇法如何呢 （長揸）

4）之前睇過你寫既經歷 月入$8000但儲蓄$10000到底可以點做到 ？

5）因為心急， 但又細膽，我拎左$20000去試玩股票牛熊 ， 每次都係入4-5千 ，有$500-1000收益，明白唔係長遠方法，但唔個仲有咩方式可以

老師會否對我情況有任何意見？可以令我快啲上返軌道
謝謝老師

龔成老師：

1）恆生（0011）你預佢主力收息，股價增長力不強，不過要上翻你的買入價，都有機會，以你的年齡，轉其他轉適合，只是你想現價轉還是等佢上翻去先轉。

2）Tesla是潛力股，可投資，現要留意股價會較波動，自己要控制注碼。

3）業務有質素，但唔平，因此小注好了。

4）你可以睇《80後2百萬富翁》，我是利用狂做兼職去增加收入，去完成目標的。

5）唔好再玩牛熊證，長遠計你一定輸的。

你現時保持月供，方向已正確，同時睇下生意方面如何。備用現金唔好急用。可以在這段時，多留意生意的資訊，以及不同類別，小本的生意。

同時，多學習投資知識，對你長遠有好大作用。

------------------------------------------------

Q18280：

龔sir你好 我2014年做過債務舒緩計劃每月還$9615.97足足還左70期 今年6月已經清還晒

2018年喺恒生做咗個儲蓄三年計劃每月儲5000元
另在2019喺AIA又係做咗個儲蓄三年計劃每月儲3000元

我係做旅遊業 因工作量不大如前 但自己又想置業
呢刻如果問銀行借十萬元出嚟

分60期還 用嚟一次過投資股票 會唔會太冒險 咁應該投資哪類型好
謝謝老師回覆

龔成老師：

理財不能太進取，要平衡風險去爭取合理回報。

你現時的儲蓄計劃可以進行，不過當中的回報可能較低，你應該同時投資其他有增長力的項目，建立「財富組合」。

至於借$10萬買股票，是高風險，無人知最後能否賺錢，當你以為自己一定賺時，就是最危險的時候！

建議你想方法增加收入，加大儲蓄。同時投資穩健類別的股票，去累積財富。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14841-Q14860）

Q14841：

Hihi 老師，上個月無意係Facebook 見到你嘅viedo ， 加上依家home office ，日日睇你出post, 唔多唔少學咗少少 簡直覺得點解唔早d識你！

由於以前好鐘意買嘢，唔識儲錢，又唔識買股票，現在現金只有約20萬

1）之前月供長和一年，但一路跌，係咪應該將d錢轉加供月供嘅盈富？另外亦啱啱開始月供緊388 同 003

2）收息平穩股有咩拒介？

3） $35.5 入咗維他奶，可以再入？有潛力嗎？

4） 我想3年內增至60萬，要月供幾多？同點安排先可以實現？現有一手維他奶，一手恆基，一手領展

5） 你d書邊到會齊d？想買你本優質股同倍升股、幾間都冇

Many thanks

龔成老師：

1）你將財富只集中供一隻，這會帶來集中風險的問題。長和（0001）本身無問題，這股不差，但增長力不強，不過，你集中供一隻就有風險。

因此，你應該加入盈富（2800），盈富就是50隻股，有分散風險的作用，盈富最好佔你財富比例最多。港交所（0388）、煤氣（0003）可以保持月供。

2）金沙（1928）、港鐵（0066）、置富（0778）都可考慮。

3）維他奶（0345）有潛力的，但你買入價較貴，就算現價都唔平。唔好心急加注，暫時持有先無問題。

4）你每月要儲到$10000，可以月供，以及部分資金等投資，這樣就有機會滾存到$60萬以上。投資目標是平穩增長股，上述所講，以及你所選的類別都可以。

5）誠品有較多。

書本在三聯、商務、大眾、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（初版）

------------------------------------------------

Q14842：

龔成老師你好, 有留意開你的PO, 見到你不時提到金沙和銀娛是不錯的股, 我由於在澳生活, 也有留意賭業狀況, 據聞未來亞洲各地都有意成立新賭場, 如日本和馬來西亞, 請問這會對這兩隻股會有影響嗎?

另外, 現時多隻股的價位都偏高, 請問是否不要在這個時候入市?因現在入怕會被中美協議有一定影響.

另外, 本人大約30歲, 除去供樓和家用, 每月有1萬左右流動資金, 有意供盈富, 華虹, 中鐵塔（因看好未來5G）, 請問對以上選擇有意見嗎?

分配上, 是否盈富佔的比重較多比較好?

龔成老師︰

未來亞洲各地若成立新賭場,對澳門博彩業難免會造成負面影響。但影響有多大，要到時才知道。

但澳門博彩業始終有佢優勢，除了營運經驗豐富、賭場有規模外，而且業務背向祖國。預期中國未來一段時間，都會係經濟增長最快經濟體。

人均收入增加、言語和地理位置上便利、再加上中國本身是一個較熱衷博彩的民族，都利好澳門賭業長遠發展。現在2股都在合理區頂部，要買最好用月供。

華虹半導體（1347），佢而家係部分範疇擁有技術，但並不是整個產業鏈中最重要的技術部分，所以不能定為很高質素的企業。不過，中國政府一定會加強開發半導體技術，所以，有潛在的增長力。

而中國鐵塔（0788）其實有質素的，只是近期有少少炒概念，所以唔能夠太進取。這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

這2隻月供是可以，但由於風險不少，如果$10000為月供總額的話，2者總金額不宜高於$3000。餘下$7000就放在平穏增長股中，如果你不懂選股，直接放入盈富（2800）就可以。

------------------------------------------------

Q14843：

老師你好，我今年28歲，月入$34000，存款大約有$250000，由去年11月開始月供匯豐$5000，現時想月供盈富基金$3000。我想問我這樣的投資組合在5年後可獲利幾多？

另外，阿里巴巴有冇機會落到去$210？現價買入又可唔可以？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。匯豐（0005）增長潛力以今非昔比，現在只算是收息股，增長力欠奉，唔係咁適合你。

你可以將原先月供匯豐的$5000分為2份，一份月供一隻平穏增長股，另一份供一隻潛力股。

以下都是優質股，你可以選擇︰
平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）
潛力股︰比亞迪（1211），中生（1177）或福壽園（1448）

以恆指過去年平均回報10%計（連股息再投資），你每月投資$8000，5年後大約會增值至58萬。

另外，你有一個投資概念錯左，就係用左"估走勢"去部署投資計劃。無人會知大市之後的升跌，無人知阿里巴巴會唔會回翻$210，佢可以一直衝上更高價都可以，無人會知。

所以，我地唔會「估個市的走勢」，只會利用平貴去分析，入市策略。阿里爸爸（9988）有質素、有發展，但現價少少貴，因此，你小注入，可以。可長線投資。

------------------------------------------------

Q14844：

龔成老師，你好，我是澳門的朋友，28歲，現金約60000,有一物業（欠款200萬），每月供款約9000

現月供股票10000,
2800：5000 ,
939：3000
66：2000

另每月儲蓄現金幾2-3000。
請問月供股票所選股票和金額分配是否合理，
現時階段有甚麼可以再加強？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你月供組合中的建行（939）是收息類股票，增長力欠奉，所以唔適合你。

你可以考慮轉為潛力股︰比亞迪（1211），中生（1177）或福壽園（1448），因為你現時月供中盈富（2800）和港鐵（0066）都是平穏增長型，加入一隻潛力股，有助提升你組合成長力。

至於金額分配方面，維持現狀就可以了。（即盈富$5000 + 港鐵$2000 + 一隻潛力股$3000）

至於每月額外儲到3000蚊和現金6萬蚊就等機會，當大市出現一定程度的下跌，就可以動用現金去投資，在平宜價加大力度掃入優質又有增長力的股票，然後長線投資。

------------------------------------------------

Q14845：

你好龔成老師，我仔細看過你回覆的其他讀者問題。想請教一下你所指的估值是便宜，合理區間或貴的標準是如何計算。

例如你說1177中生製藥在10元以下屬便宜;1448福壽園PE低於20屬便宜。這個標準是怎樣介定?謝謝。

龔成老師︰

如何為一個企業估值，在課堂上也要用上好幾個小時去解釋，唔係三言兩語可以講得清楚。簡單而言，我地會用基本分析的，所分析的，是企業的基本面，分析企業質素，行業前景等。

如果你想詳細了解點樣去估算，你可以參加我的【投資倍升股課程】。這課程適合初學者的，因為整個課程的設計都是針對初中階投資者的，課堂頭3堂都是初階的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

另外，提翻你中生（1177）低於$10只是回到合理區，而唔係平宜區。如果你無貨，在$10以下可以入注，或你用月供形式去收集此股都可以。

------------------------------------------------

Q14846：

龔Sir你好，最近有睇你經濟一周既專欄同Youtube既Channel
有少少投資問題想請教下

小弟29歲，有兩年投資股票經驗，由於都係斷斷續續短炒多，5~10%就會放，亦因為短炒都唔會大注
令到財富唔能夠有效增值，決定痛定思痛長揸股票投資

不計現有股票，現時可用投資資金35萬，每月可儲$15000~20000

龔Sir提到需要有平穩增值股同潛力股, 以下是小弟現在的配置, 希望提供多少意見，謝謝

平穩增值股: 現有1手中電, 未來打算在低位分注吸納2800
潛力股:現有一手3383雅居樂及剛開始$9000月供雅居樂
睇好內房股，年報表示雅居樂業務範圍廣，旗下雅生活盈利表現不俗，環保服務將來有分拆願景
是否可帶動母公司盈利?

請問這樣的方式會有需要改善的空間嗎?
另外，2388在經歷社會運動後是否值得方段吸納?
謝謝

龔成老師︰

你要緊記短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。中電（0002）增長力欠奉，唔係咁適合你。現貨可持有，但唔好加注了。

盈富基金（2800）現時在合理區，如果你無貨，其實已經可以入第一注。

雅居樂集團（3383）是內房股，有規模及品牌，質素是有的，但同時存有風險，中國樓市近年持續向上，佢的盈利自然向好，但如果樓市逆轉，就會對佢地造成打擊。

佢的負債唔少，以及近年股價已上升好多，這刻的值博率變得較少。當負債高時，盈利就會「放大」一樣，因為當中企業用了財務槓杆，好景時好好賺，逆轉時股價大跌。

這股不是不可投資，但就要控制注碼，同時明白風險較高。如果你用來月供，我唔係咁建議。

你如果想做月供，你可以參考以下股票，都優質和適合你年紀。以你月供$20000計，你可以選擇4至5隻。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）

至於中銀香港（2388）是中國銀行（3988）子公司，業務主要在香港，亦有東南亞地區，由於有獨特地位，同時賺錢能力不錯。

其實我地投資主要考慮長線企業質素，社會運動是中短期因素，可以唔洗太理會。此股現價合理，已有長線投資價值。但股價就略有波動，因此適合分注投資，長線持有。

------------------------------------------------

Q14847：

龔成老師你好，本人是你的長期讀者，你的理財理念很能啟發我個人對人生的規劃。

本人33歲，屬專業人士，工作穩定，月入約50K，十年內月入將增薪至70K，而這十年也正正是我重要的十年，因為本人即將成婚，也將於年內置業自住（約700萬樓），故有一定經濟需要，因此良好的規劃便顯得更重要。

本人現有120萬現金，過去數年有供儲蓄保險兩份，兩年後將供完，合共約有本金48萬 ，滾存。本人今年才開始買入股票，持有2800@27，1手；11@157，2手，不多，並打算在跌市時再買入數隻心儀股票。

今年打算開始月供股票，但仍未有砌好組合。

先說本人目標，本人打算十年後總資產有500萬，希望手持第二個物業收租，隨著年紀增長，長遠希望把資產放入收息股，60歲前可以有穩健的股息，同時有穩定的租金收入。

如果要達至這個計劃，龔成老師有些甚麼建議給我呢？謝謝老師。

龔成老師︰

由於你即將成婚和計劃年內置業自住，有十分明確目的，故手持120萬建議維持用現金形式持有。

如果你希望十年後總資產有500萬，包括增加第二個物業作長遠收租之用，我建議你現階段先用月供形式，去建立一個財富增值平台。

現在你將每月可動用投資資金，6成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金和2年後保險取回的48萬就等機會，當大市出現一定程度的下跌，就可以動用現金去投資，在平宜價加大力度掃貨。

以恆指過去年平均回報10%計（連股息再投資），假設你現每月投入$20000資金 + 2年後投入那保險的48萬資金，10年後大約會增值至470萬。

雖然未到500萬，但由於那470萬未計算你未來人工增長，相信10年後達至總資產500萬，並安排買入第二個物業不是沒可能。

長遠你可以繼續用這個模式為自己增值，詳細可以參考我"財務自由行"一書。

------------------------------------------------

Q14848：

你好
請問新石文化（1740）怎樣？

龔成老師︰

新石文化（1740）主要在中國從事電視劇投資、製作、發行及許可業務。客戶包括電視台（包括其營運實體）、從事電視劇發行業務的公司、電視劇執行製作人及版權擁有人。

其電視劇會在一些較知名電視台播放，如中央電視台、天津廣播電視台、山東廣播電視台及安徽廣播電視台以及愛奇藝、騰訊視頻、風行網及PP視頻等網上視頻平台。

業務上，的確有吸引力的，不過，我一向都新股半新股都無興趣，因為真實面要慢慢先見到，故估值困難，只建議小注，同時你要明白當中的風險。

------------------------------------------------

Q14849：

Hi 老師你好 我今年27歲 平時 有玩牛熊 只輸過兩 兩次都係衰貪心

不過 我見你有講月供股 但我唔係好明 點樣月供股又 做發係點？

我見盈富基金 都成萬幾蚊一手 又點樣話每月供幾千咁嘅 麻煩你

龔成老師︰

短炒不是正確的投資方法，而衍生工具亦好難玩，這都是經驗之談。現在你是以「預期市況」模式去投資，希望你要改變這個想法。

我在18歲開始買股票，頭幾年同你一樣玩衍生工具，估個市會升就call，估佢跌就put，但幾年來，輸多贏少。後來我發現，有錢人唔會咁樣投資的，於是我無再咁樣玩。

其實真正有效財富增值，應該係投資在優質股，並長線持有，讓其自然增長。

簡單來說，"月供股票"就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上，當然越長期就越理想。

------------------------------------------------

Q14850：

老師，請問金價你有見解嗎？ 這兩星期都維持高位

同埋想請教你如果以盈富基金的增長能力，以月供3千，供30年會有接近1000萬嗎？

龔成老師︰

首先黃金我唔會特別研究所佢價位，因為黃金是貴金屬，是「終極貨幣」，也是人類自古以來的貨幣。現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，因此，黃金不會成為我地財富組合中，佔比太多的部分（1%至3%）。你可以投資黃金，現時黃金處於合理水平。

如果你想長期財富增值，則應該做月供股票，長遠效果會更好。以恆指過去年平均回報10%計（連股息再投資），你每月投資$3000，30年後大約會增值至590萬。如果要1000萬，就要將月供加大至逾$5000。

------------------------------------------------

Q14851：

老師 請問你平時講要儲够貨 點為之儲够貨呢？例如我要買恒基 要儲够幾多先吾洗再入市？

如果我要買盈富基金 港鐵 恆基 銀娛 呢四樣里面要儲够幾多為之够貨呢？有冇標準？萬分感謝

龔成老師︰

最基本方法，我地會以你預定投資資金是否用盡，來決定是否儲了足夠貨。

假設你有100萬，我可以考慮投資在6至8隻優質股上。以8隻計，每隻平均投資金額應為12.5萬。當你該隻優資股己完全投入了這12.5萬，就代表現階段儲夠貨了。

其實分怖多少無一個特定準則，大前題係要唔好太多股票，分得太散（越多就越難每隻了解清楚）。也唔可以太集中，因為任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

一個組合，大約6-8隻會較為穏當。

以你上述4隻股票為例，我會港鐵（0066）、恆基（0012）、銀娛（0027）各佔20%資金，而盈富（2800）因為比較特別，佢是一個包括50間質素不錯上市公司股票的組合（而不是單一的企業），有效平衡風險，所以可以佔高一點至40%。

------------------------------------------------

Q14852：

成哥你好
小弟今年32,澳門人
一家六口,呢五六年收入都吾穩定,可以話無正當職業,平時靠短炒同收息勉強維持,

每月支出大概兩萬,
要供大陸一個單位,每月5000左右
手頭現金20萬,持有股票:中海81 6蚊6萬股,

2333 10蚊6萬股,都渣左好多年,呢兩隻准備長線,希望有5倍回報,

246一萬股,准備除牌,
1211,1000股A股55蚊買,准備70放,

想問下長線如何,因為本人都幾睇好,只系買入價吾靚
仲有我想知如果我資產到一百萬,投資物業或股票呢,那一樣快到1000萬

因為我十年前如果買樓,吾買股票,几十萬既樓而家賣600萬,所以有一份執著要系股市拿返
求指教

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。我地投資股票就如投資企業﹐應該長線持有讓其慢慢自動為我們財富增值，這樣才會達至最佳財富增值效果。

比亞迪（1211）是一隻有潛力的優質股，我建議你長線持有，而唔好用短炒差價模式去操作。

大陸樓，你可以計下當中的租金回報，以及升值潛力是否理想，如果只屬一般，那就不如賣出，轉投其他更高增長力的項目。

中國海外宏洋（0081）主要於中國從事物業投資及發展業務，過往幾年都有增長，算有質素。但較大問題是其負債不輕，經濟環境好，收入理想時當然無問題。但經濟環境變差，資金鏈出現問題時，企業就會好危險。

加上此股過去數年股價都十分波動，你投資時要明白這些風險。

長城汽車（2333）都正面的，中國汽車市場龐大，加上仍有增長力，這公司都有品牌，所以長線發展不會太差。但你要留意翻未來車市焦點會落在新能源汽車，比亞迪（1211）這類新能車龍頭，前景相信比長城為佳。。

至於瑞金礦業（0246），這企業連年虧損，再加上核數師多年來都"不表示意見"，代表盤數有古怪，此類股票應盡快沽出。

因為我地進行財富的配置，組合中最好包含有物業、股票等，建立一個平衡的組合。所以就算未來"物業"或"股票"增長力較優勝，你也不應過於偏重單一邊，以免造成過於集中風險。

你現在有2件事必需要做︰

1） 就是找到一個穏定收入來源，才可以展開你的財富增值計劃。

2） 中國海外宏洋（0081）和長城汽車（2333）雖然質素唔係差，但你組合中絕大部份都放在此2隻企業，有過份集中風險。建議你將最少一半轉至其他優質股，這樣會較穏當。

以下股票都是優質，適合你年紀投資︰
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）

------------------------------------------------

Q14853：

你好龔生
我今天28歲 澳門人

月入40000
2014年買樓 325萬，現在樓宇已經47年
己出租8000元

月價18000，差14年供滿
已月供4000元，2800盈富三年平均價25.8

想賣樓轉其他投資，，或增加資產
今年28year
現在存款20萬

龔成老師︰

雖然你現時的物業未能為你創造正現金流（每月還款 > 租金收入），但賣出將自己處於"沽空"樓市的狀度也不理想。

因為我地進行財富的配置，組合中最好包含有物業、股票等，建立一個平衡的組合。另外，由於賣出物業後，無人知能否買得翻，加上買賣物業的洗費相當高，因此，暫時都唔建議賣出物業。

反而你可以動用現有資金，加大在股票方面投資。以你年紀，應以增長力為重點。

如果你可以的話，盡量加大每月可投資在股票金額。當中6成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。

至於儲下的現金和20萬就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資，相信這樣安排會適合你。

------------------------------------------------

Q14854：

龔成老師你好:
我想問吓

3140 領航標普500，
2822 南方A50 ，
3019 XTR 環球，
2840 SPDR金ETF。

這幾隻ETF 適合作長線投資嗎 ?
你對呢幾隻ETF股票有什麼評價？

龔成老師︰

領航標普五百（3140）是追蹤標普500指數之表現，如果你睇好長遠美股發展，可投資。

南方A50（2822） ，投資目標為提供緊貼富時中國A50指數。這股可投資，但你要明白畢竟中國是較新興市場，這股相對香港的恆指會較波動。

Xtrackers MSCI 環球掉期 UCITS ETF〈3019.HK〉目標是提供在扣除費用及支出之前緊貼"MSCI環球總回報淨值指數"的表現的投資回報。

而"MSCI環球總回報淨值指數"是公眾持股量調整市值加權指數，所反映的是全球已發展市場大型及中型資本公司上市股本證券的表現，此股也可以投資。

SPDR黃金ETF（2840），為交易所買賣基金，投資目標為反映ＬＢＭＡ黃金價格。但這個黃金ETF，我就不太建議投資。

我投資貴金屬的目的，主要是對沖巨大不利事件的風險，例如超級天災、第3次世界大戰等，這些機會發生的機率極少，因此只要投資少少貴金屬已足夠。

由於我地投資黃金是基於上述因素，因此我不買金ETF，而會投資實貨。

------------------------------------------------

Q14855：

龔成兄，昂納科技877什麼價便宜價？現價便宜，合理，貴？你對昂納有什麼睇法？想買入，thx.

龔成老師︰

昂納科技集團（0877）主要從事設計、製造及銷售用於電訊及數據通訊系統的光網絡產品，以及用於智能製造市場的機器視覺系統及傳感器。

本質其實不差的，但股價太過大上大落，要注意這方面的風險。之前試過處好貴水平，近期股價回落，這刻處合理水平。

企業有發展潛力的，有長線投資價值，但你要預佢股價波動，小注投資無問題。

------------------------------------------------

Q14856：

龔sir,剛上完股票班 但對roe 有一些疑問，
假設公司負債比率超100%
股東權益= 資產-負債
就會出現負數
ROE 亦會變負

但這負數意是並不代表公司蝕錢 （因盈利是正） ，那roe 的數值有甚麼意思？

龔成老師︰

在會計層面︰總資產 - 總負債 = 股東權益（或稱淨資產）

留意，「負債比率」只是一個總稱，「總負債÷股東權益」，以及「總負債÷總資產」，都是負債比率，上堂有講過，總負債÷股東權益不希望超過100%。

不過，如果當（即總負債/總資產）超過100%時，代表集團總負債已超過本身總資產值，即出現"資不抵債"的情況，簡單點講，就是公司要"破產"了。

而出現過種情況，多數企業本身已出現大幅虧損所致，所以基本上唔會出現你所講的情況。

------------------------------------------------

Q14857：

你好龔成老師, 本人27歲, 無物業, 月入大約23000, 扣除必須使用後, 每個月剩大約12000（家中兩老都係自己負責番, 所以用得較多）,

1. 剛剛開始想月供股票, 其實依家供2800, 0027 同埋0823 係咪最好的選擇?? 每個都供$1000, 我諗住長供, 直到儲到好多為止, 唔知咁做算唔算岩唔岩呢?

2. 我聽人講0066都幾好, 然後有人叫我買太古o個d 的股（1927, 太古a 同b） , 我見佢前排好似都跌唔少, 咁依家入手又係咪一個唔錯的選擇呢?? 謝謝解答

龔成老師︰

1） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你所選的盈富（2800）、銀娛（0027）和領展（0823）都是平穏增長股，都適合你。由於你每月閒置資金有$12000，我建議你可以增大每隻月供供款至$2000。

而餘下的$6000，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2） 港鐵（0066）此股的獨特性好強，本身已經壟斷了全港的鐵路，同時政府表明香港之後的發展，只會更依重鐵路，因此往後佢只會更強。

現時佢股價處於合理區頂部，由於佢優質所以長期處於不平宜的位置，你可以考慮用月供去投資港鐵。（即組合變成月供$8000和月儲$4000）

而太古地產（1972）都有質素，香港最近的社會運動對佢的香港商場會有影響，但這只是中短期，長遠來說，佢仍是有當中的價值。

而佢的優點，就是發展大型複合項目的能力，同時更在中國多個城市複製這模式。簡單來說，這股現時處於合理區中下部，有投資價值，但相信中短期會弱，你預要長線先有收成。

------------------------------------------------

Q14858：

老師你好， 我今年28歲，打算每月用10000供煤氣，港鐵，銀娛同中生製藥。這個組合會太risky嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。煤氣（0003）、港鐵（0066）、銀娛（0027）是平穏增長股，而中生製藥（1177）是潛力股，都是有增長力的股票類型，所以都適合你。

而金額分配分面，你可以每隻股票$2500，這樣安排對你年紀而言，是會比較合適。

------------------------------------------------

Q14859：

我想問下，股票既回報長遠黎講系米好過放係定期 或 mortgage linked 户口，我吾系好識計條數

龔成老師︰

恆指過去年平均回報有10%（連股息再投資），如果你長線持有有增長力的優質股，回報相信會跑嬴定期或mortgage linked户口。

當然後2者風險程度計，定期或mortgage linked户口一定會比投資股票為低。但作為理性投資者，我地唔係要找最低風險的項目去投資。而係在合理風險情況下，將回報最大化。

所以你在進行資金配置時，要睇翻自已年紀和情況，去選取合適的投資工具。

------------------------------------------------

Q14860：

您好 龔先生
現在是買入股票時機？因為示威活動少了

如 2800 66
比定期存款好？

龔成老師︰

其實我地資時候會著眼係長線因素（如企業質素和行業前景），中短期因素（如香港社會近期出現動盪）反而唔係咁重要。

現時大市市盈率不足12倍，以過往恆指波幅在8-22倍計，現時係合理區，所以如果你無貨，現在可以入首注。

而港鐵（0066）現時已在合理區頂部，你利用月供方法去投資會較好。盈富（2800）當然是投資之選。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

香港樓市癲價不勝寒，回報偏低？放眼全球，還有眾多更具投資價值的置業之選！

天窗會、睿富請來4位 #專業領域 的投資專家，教你從環球樓市、外匯、按揭、實戰四大關鍵，多方位解構及部署「磚買世界樓」的致勝策略。每堂特設30分鐘互動問答，助你逐步踏上海外置業致富之路！

收費：天窗會會員$1,880 l 非會員 $2,180
網上售票：https://goo.gl/zdywrK

單元一【環球樓市解構X管理外匯風險】
日期：8月30日7:30-10:00PM

導師：盧楚仁（艾德證券期貨首席投資策略師，經濟通〈外匯達仁〉主筆）

內容重點：
‧從環球經濟、貨幣及息口走勢拆解海外樓市走勢
‧運用外匯讓物業投資賺取最大回報
‧管理外匯風險「防守術」

導師：林浩文（萊坊高級董事及估價及諮詢部主管，海外樓市專家）

內容重點：
‧海外樓「101」：環球樓市概況
‧成熟國家的置業「穩賺」策略（如英國、澳洲、日本等）
‧發掘新興國家具「爆發力」物業的策略（如馬來西亞、泰國等）

單元二【海外樓按揭X 實戰致富秘技】
日期：8月31日7:30-10:00PM

導師：王家安 Dennis（物業投資者，睿富WealtHub「環遊投資」作者）
黎家良Desmond（銀行按揭專家，暢銷財經書《有升有息》作者）

第一節重點：
‧香港vs海外：買樓流程大不同
‧海外置業「重中之重」：銀行按揭選擇及秘技
‧不同國家的稅務、中介、雜費評比
‧挑選中介及發展商秘技

第二節重點：
‧選擇收租盤還是轉手盤？
‧海外樓「遙控」管理方法（租務、保養、善後）
‧實戰經驗：馬來西亞、越南、英國穩賺物業

上課地點：觀塘鴻圖道78號17樓A室

收費：天窗會會員$1,880 l 非會員 $2,180

網上售票：https://goo.gl/zdywrK

*立即到 https://goo.gl/v9pN4f 免費成為天窗會會員，以優惠價參加活動！

今日來到裂口理論的第三課！如果之前未曾看過我們裂口概念的回回溯測試的觀眾記得重溫一次！今日為大家柝解兩大問題：裂口是否一定要補？如果補了的話我們應該作甚麼部署呢？今日我們為大用上18年數據作回溯測試，並嘗試在美國標普500，納斯達克指數，香港恆生指數，上證指數和馬來西亞指數作出統計！

首先讓我們來回顧一下在過往18年之中，各市場出現裂口的數量為多少。根據彭博Backtesting功能，香港恆生指數出現334次上升裂口，310次下跌裂口。我們用上第一集提及的優化沽出策略：在裂口出現後第二天買入或賣出，把握走勢轉向時平倉。結果如下：

上升裂口

香港恆生指數
交易次數
334
勝出次數
151
失敗次數
183
賺蝕
66.88

美國納斯達克指數
交易次數
263
勝出次數
111
失敗次數
152
賺蝕
-0.93

標普500指數
交易次數
90
勝出次數
36
失敗次數
54
賺蝕
8.75

馬來西亞指數
交易次數
185
勝出次數
94
失敗次數
91
賺蝕
110.92

上證指數
交易次數
133
勝出次數
57
失敗次數
76
賺蝕
59.62

而如果出現補裂口的情況，我們就會在第二個交易日的開市時進行買沽空，直至收市價升穿早一天的高位才平倉。這樣就可以測試到補裂口後是否會出現一個大轉勢，因為每個裂口代表市場的心態發生突變，而補了裂口的話就代表市場開始轉向。到低市場是否真的開開轉向呢？我們來看一看數據：


第二日補

香港恆生指數
交易次數
123
勝出次數
49
失敗次數
74
賺蝕
-15.56%

美國納斯達克指數
交易次數
75
勝出次數
21
失敗次數
54
賺蝕
-15.15%

標普500指數
交易次數
21
勝出次數
5
失敗次數
16
賺蝕
-7.32


標普500指數
交易次數
21
勝出次數
5
失敗次數
16
賺蝕
-7.32

馬來西亞指數
交易次數
57
勝出次數
23
失敗次數
34
賺蝕
13.1


上證指數
交易次數
38
勝出次數
10
失敗次數
28
賺蝕
-34.69


第三日補

香港恆生指數
交易次數
72.0
勝出次數
24.0
勝率
33.3
賺蝕
7.2

美國納斯達克指數
交易次數
48.0
勝出次數
19.0
勝率
39.6
賺蝕
5.9

標普500指數
交易次數
16.0
勝出次數
5.0
勝率
31.3
賺蝕
-4.3

馬來西亞指數
交易次數
26.0
勝出次數
12.0
勝率
46.2
賺蝕
3.9

上證指數
交易次數
21.0
勝出次數
8.0
勝率
38.1
賺蝕
-3.4

以上統計結果顯示，當中有三分二的上升裂口會在兩日內補。但補裂口並不代表大轉勢。我們可以見到大部份市場補裂口的趨勢策略既勝率都比較低。上證最低只有23%勝率。同時，回報也不樂觀。幾乎全部也跑輸指數。

下跌裂口方面，各市場出現裂口的數量如下：

下跌裂口

香港恆生指數
交易次數
310
勝出次數
112
失敗次數
198
賺蝕
-43.39

美國納斯達克指數
交易次數
186
勝出次數
61
失敗次數
125
賺蝕
-21.78

標普500指數
交易次數
38
勝出次數
6
失敗次數
32
賺蝕
-13.5

馬來西亞指數
交易次數
142
勝出次數
55
失敗次數
87
賺蝕
58.29

上證指數
交易次數
131
勝出次數
51
失敗次數
80
賺蝕
-2.29


而在一至兩日內補裂口的情況如下： 是次我們就會在補裂口的第二個交易日的開市時進行買買入，直至收市價跌穿早一天的低位才平倉。這樣我們能否找到一個入市機會呢？




第二日補

香港恆生指數
交易次數
115.0
勝出次數
53.0
勝率
46.1
賺蝕
77.5

美國納斯達克指數
交易次數
62.0
勝出次數
24.0
勝率
38.7
賺蝕
-0.1

標普500指數
交易次數
7.0
勝出次數
4.0
勝率
57.1
賺蝕
5.2

馬來西亞指數
交易次數
50.0
勝出次數
21.0
勝率
42.0
賺蝕
13.7



上證指數
交易次數
23.0
勝出次數
10.0
勝率
43.5
賺蝕
-0.1

有趣的事情出現了。我們可以見到恆生指數如果在第二天補了早一天的下跌裂口的話，在補裂口的第二個交易日開市時進行買入，結果有77%回報。雖然勝算仍然跌於50%。但這不失為一個買入機會。


第三日補

香港恆生指數
交易次數
61.0
勝出次數
26.0
勝率
42.6
賺蝕
-2.0

美國納斯達克指數
交易次數
42.0
勝出次數
21.0
勝率
50.0
賺蝕
10.8

標普500指數
交易次數
10.0
勝出次數
5.0
勝率
50.0
賺蝕
-1.8

馬來西亞指數
交易次數
29.0
勝出次數
15.0
勝率
51.7
賺蝕
16.7

上證指數
交易次數
24.0
勝出次數
7.0
勝率
29.2
賺蝕
-14.3

但是如果在第二天補，再進行買入的話，回報就會大大減少。恆指更會出現負回報的情況。這個分別可以這樣理解。如果一出現下跌裂口市場馬上補回的話，支持力度比較用兩天時間去補更為大。所以出現轉勢的情況也較多。

======================
1) 本月活動，現正接受報名:
新我要做富翁 試堂分享會 (香港站)▶ https://money-tab.info/mts-trial?yt=1
贏在美股試堂分享會(Online)▶ https://money-tab.info/ussjac?yt=1
Jasper 期滙商品分享講座+試堂▶ https://money-tab.info/comjasp?yt=1
Eric Sir期指策略分享講座+試堂▶ https://money-tab.info/futeric?yt=1
King Sir 樓市講座▶ https://money-tab.info/proking?yt=1
齒輪理論 入門班/初班▶ https://edu.money-tab.com/m0m1-reg-c?m0m1=yt
其他活動▶ https://money-tab.info/activity?yt=1

2) 我要做股神APP下載：
iOS▶ https://bit.ly/moneytabapp_i
Android▶ https://bit.ly/moneytabapp_a
升級版▶ https://money-tab.com/membership

3) 緊貼我們社交平台，不錯過任何免費分析/教學：
訂閱YouTube頻道： https://youtube.com/c/我要做富翁?sub_confirmation=1
讚好Facebook專頁：https://facebook.com/203349819681082

本年，環球股市走趨強勢，相信大部分戰友都有所斬獲。不過有時候，在上日走勢不錯的背景下，開市時明明已經是裂口高開，氣勢看似不錯，但其後市況未有繼續向上，收市價更是跟上日的收市價接近。有些持貨的朋友就有點怕了，更短線離場。其實以陰陽燭來說，這個形態可被歸類為淡友反攻！未知大家是否認識這形態，今集街頭智慧就為帶來好/淡友反攻的測試。

本集內容﹕甚麼是好/淡友反攻？ / 好友反攻測試 / 淡友反攻測試

======================
1) 本月活動，現正接受報名:
新我要做富翁 試堂分享會 (香港站)▶ https://money-tab.info/mts-trial?yt=1
贏在美股試堂分享會(Online)▶ https://money-tab.info/ussjac?yt=1
Jasper 期滙商品分享講座+試堂▶ https://money-tab.info/comjasp?yt=1
Eric Sir期指策略分享講座+試堂▶ https://money-tab.info/futeric?yt=1
King Sir 樓市講座▶ https://money-tab.info/proking?yt=1
齒輪理論 入門班/初班▶ https://edu.money-tab.com/m0m1-reg-c?m0m1=yt
其他活動▶ https://money-tab.info/activity?yt=1

2) 我要做股神APP下載：
iOS▶ https://bit.ly/moneytabapp_i
Android▶ https://bit.ly/moneytabapp_a
升級版▶ https://money-tab.com/membership

3) 緊貼我們社交平台，不錯過任何免費分析/教學：
訂閱YouTube頻道： https://youtube.com/c/我要做富翁?sub_confirmation=1
讚好Facebook專頁：https://facebook.com/203349819681082