【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13101-Q13120）

Q13101：

呀Sir想問下你點樣面對失敗。

因為最近我5月考CFA，辭左份工用左兩個月左右去考，之後想搵返工，遇到個市差，社會運動同年尾等因素，點樣搵工都搵唔到。

一方面覺得自己太衝動，因為同期既同事都升晒職，但另一方面覺得與其係到怨，或者依個係一個機會比我學野，我係依段時間學到好多野，知道身邊邊啲人係最重要，屋企人點樣支持我，搵工有咩技巧，人脈既重要性，機會係比有準備既人。

我都好積極繼續搵工，我相信吸引力法則，越無回覆就越寄CV，亦都係到諗成功人士會點做，成功唔係比有能力既人，而係比唔放棄既人！

我今年24歲，有啲人可能到30歲甚至成家立室先遇到，興幸係我仲未有任何家庭負擔，只不過我怕我再求職時，會有一段長既空白期，加上CFA對我搵工暫時都未有需要，所以成日都好灰。

有諗過去個旅行散下心，因為畢業到做野都未去過旅行，唔知你點睇失敗呢？

龔成老師：

我從來唔同「失敗」這個字眼去形容自己，我會同「經歷」。

無人知你另一條路會點，如果你的心態是永遠留在原公司，可以你10年後，都只是職位一般，但你現時肯出去試，就算你這刻不成功，下次都會成功，10年後，你一定會比原公司更強！

所有野都是一個學習，好多人選擇逃避，認為「不犯錯」就是最好，但這些人同樣會「失去進步、突破的機會」。

你24歲，係一個好年輕的時期，係事業增長的黃金期，你肯試是十分好的，只要你保持正向心態就得。

你可以去旅行休息下，我會建議你保持做運動、睇書，令個人積極，只要你保持正面，不放棄，一定會找到更好的工。

我想翻我過往，人生都有低谷的時期，但現在回想翻，每一次人生低谷，都令我最大的突破。例如打工的不如意，令我更決定辭職！例如過往同拍檔夾唔到，最後我決定自己搞，最後做得更好！比以前做很更大！

當時每次都是唔開心的，但就係最大的突破時期，所以，你這刻正處於好大的突破狀態，加油！

------------------------------------------------

Q13102：

成哥你好，我想問聯塑合理價是多少？因為行業市盈率波幅太大，我怕自己計錯

加上累積升幅也不少，但我又覺得升得多不代表貴

龔成老師：

中國聯塑（2128）業務有質素，這股在《50值博倍升股》初推介到現時，已升了一倍有多，現時已過了平宜區，不過仍未算貴，有長線投資價值，但投資值值博率比過往少左。

由於佢負債增加左，我地在估值時都要保守翻少少，你預現價在合理區中上部，未貴，小注投資可以。

------------------------------------------------

Q13103：

龔成老師，我已每月月供盈富基金約Hk$1000。。。
另手上全是大藍籌股。。中電,媒氣,港交所,電能,恒生。。

你對外幤看法如何?。。近來香港局勢。。本人對本地金融體法。。港元前景十分擔心。。

本人主力買瑞朗,日元,美金。。
和少量加紙。。。老師有什麼評語和建議。。

龔成老師︰

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

我相信，中短期會有資金方面的影響，但具體有幾大獲，就要睇外國真正的走資金情況，因為真實情況要到時先知，會唔會出現骨牌效應，都有好多變數。

不過我相信，長遠資金唔會大走，始終香港都是有優勢，有錢賺的地方就有資金來。因此，我相信中短期有影響，但又唔需要過份地擔心。

我們應該還原基本步，明白"買股票，是買企業"，只要企業長線核心因素不變，我地就可以保持持有這支企業。反而動盪時期，有機會令優質股跌至平宜價位，為我們創造出長線投資機會。

另外，你現時月供$1000盈富（2800），選股上無問題。但金額太少，變相你月供手續費比重會較高（理想手續費約1%），會侵蝕你長遠回報，建議你加大金額會較好。

------------------------------------------------

Q13104：

龔成兄，黎緊巴巴11月上市，大家都好期待，希望如果有時間能邭好似上次太興上市前提供啲精彩分析。期待中.....

龔成老師：

其實，阿里巴巴過往曾經在港上市，之後退市（當然，業務規模與現時想上市的阿里巴巴有所不同），但這股，並不是一間「與民同樂」的公司。

因為佢過往的做法，見到佢有最佳的時機，做對「公司」最有利的事業，但對「小東股」卻一般，就過往佢以一個好平的價，收翻小股東的股並退市，將公司私有化，小股車持有5年一起空，你就明白佢對小股東點。

------------------------------------------------

Q13105：

龔成你好，本人有意買入1830 必瘦站，翻查數據，發現佢由2017 年起連續3年的ROE 皆上升，但過去3年一直大約於0.4-2.6 呢啲價位。

想問現價可買？

龔成老師︰

必瘦站（1830）有質素的，財務數據正面，生意盈利都保持增長，股本回報率相當高（不過派息比率都高，在股票班有講這類情況）。整體仍是有質素的。

佢在大陸都有市場，生意增長明顯，而盈利亦保持向上，不過中間就有少少波動。相信長遠仍有增長力，但仍又唔算好積極咁去擴展，因為佢每年的派息比率都好高，反映佢將盈得的資金，都用作派息，沒有不斷投資資金去發展。

我相信這是不錯的收息股，以現時有10%-12%的股息，算很吸引。但市場是公平的，佢股價不太高，先會有12%的股息，而市場點解比佢的股價唔會太高？

這是由於佢的業務，點都會有不確定性，就算過往派息不錯，也未知之後的業務、盈利、派息，你要明白這點。你可以現價投資，但在注碼上，不要太過訓身。

------------------------------------------------

Q13106：

Hi 可唔可以講下儲蓄成份既保險同月供股票 邊樣好d?

龔成老師︰

在整個累積財富的過程中，我地要多持有「資產」，即是長期會不斷升值的項目，儲蓄成份既保險只是「產品」，不屬於其中。在理財分配上，你可以小量持有，不宜持有太多。

香港最典型的資產，就是物業、車位、優質股。長你應該將資金投資優質穩健的股票，長期持有，企業價值的成長，長期會帶動股價的成長，財富自然得以累積。

而月供股票，則可以助你減低買入股票時，價格過高的風險。方法是你每月將現金，買入某一隻或多隻股票，慢慢咁樣儲貨。

月供股票每月投入的金額相同。當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

如果你不認識股票和投資知識不多的話，可從盈富基金（2800）著手，此股已包含50集恆指成份股，這些都有質素的股票。你只要月供，並長期持有即可。

------------------------------------------------

Q13107：

你好龔成老師，我今年26歲，剛剛開始一邊月供一邊儲現金，同時睇緊投資理財書增加知識，遲啲仲諗住上你嘅投資倍升股課程

請問
1. 如果我每個月月供$10,000，供30年，假設回報率12%，到時預期結餘大概$35,000,000。到時候再將依3千5百萬轉投資收息股，又假設利息回報率6%，每個月平均收息收入 $175,000，我咁樣計法請問正確嗎? （目前月供緊0012, 0066, 2800）

2.請問月供同一手手買，邊一種方法可以更快增值財富同有更高回報？如果每月有$15000投資，應該如何分配? $10000月供, 月儲$5000 （以作儲備現金同日後投資用） 這樣可以嗎?

3.另外請問除左睇書同上你嘅堂，仲有乜野其他方法去增加知識? 謝謝!

龔成老師︰

1） 你計法無錯，這樣運作就可以在30年後創造出每月17.5萬現金流。

而你月供的選擇都有質素，但你年紀尚輕，建議你加入一隻潛力股如比亞迪（1211），中生（1177）或福壽園（1448）。金額分配︰盈富$4000、其餘恆基、港鐵和潛力股各佔$2000。

2） 其實月供和一手手買都可以做到平均價格效果，只要你保持平均地慢慢投入股市（如保持住每月定額買一手）就可以。

2個方法無話邊個可以做到明顯高回報，一手手優點是節省了銀行月供收費，但缺點是你必需要確保自已有自律性地進行。

至於你$15000，$10000月供, 月儲$5000這策略適合。現時大市在合理區，所以我地應該邊月供，邊儲現金。你儲下來的現金，可以等大市出現一定程度的下跌，在平宜價加大力度掃貨。然後長線投資。

3） 除左睇書和上堂外，你可以睇D財經新聞，自己慢慢睇年報，咁樣去累積知識，都會對你成長有幫助。

------------------------------------------------

Q13108：

你好龔成老師, 本人35歲, 和太太和小朋友（3歲）一齊住, 有一層居屋（剛供完）, 因家庭需要, 每月只可以儲$5000

流動現金$10萬，股票因聽朋友講抄細價和窩輪, 這幾年全部都輸了，所以真是想你比一些投資意見我，我可以
怎樣投資, 不想再行錯路, 謝謝!!

龔成老師︰

短炒不是正確的投資方法，而衍生工具更加是非常難玩，這都是經驗之談，你要改變你整個投資模式。

其實投資股票就是買企業，有如你買入一盤生意，我地要找一些有質素和前景的優質股去投資。之後，我地長線持有，去讓優質企業慢慢為你財富增值。

你每月儲到的$5,000可做月供一些平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、港交所（388）、長建（1038）。如果你不太了解這些股票，全數月供盈富都可以。

同時間建議你多看相關書本、新聞或課程。本人不定時有開【投資倍升股課程】，你可以留意我FB。這課程適合初學者的，到你讀完整個課程後，你已能自己選股、投資、評估平貴，在投資上已掌握了一定的知識。到時候，你才動用你現存的10萬蚊資金會較好。

------------------------------------------------

Q13109：

龔成老師，你好，本人32歲，月入28k，另一半38歲，月入20k，育有一名剛滿月的孩子，有一層供緊的自住樓，月供9k。

由於我倆以往都係月光族，無甚儲蓄，所以只有現金100k，睇過你著作後，深受啟發，自知起步遲，加上有了下一代，好想於理財方面急起直追，為孩子教育、我倆日後生活做好準備，最理由希望最終達至財務自由。

由於孩子剛出生，花費不少，現每月可儲10-14k，想問問如何為財富增值較全面？如想開始月供股票，組合有何推介？

龔成老師︰

你能夠為下一代著想，從月光族脫變成每月能儲10-14K，你已經行出很重要的第一步。其實你年紀尚算年青，有足夠時間去做財富增值，以達至財務自由。

我地會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

現在你每月儲到的錢，可以6成去做月供，其餘先儲起，用一邊月供一邊儲蓄的策略。

月供方面，你可以投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、港交所（388）、煤氣（0003）或潛力股︰比亞迪（1211），中生（1177）或福壽園（1448）等。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q13110：

美市快衝破歷史高位, 跟環球經濟走相反方向, 大師如何投資美股

龔成老師︰

你所講的美市破頂、美股跑嬴其他市場都唔係投資股票應考慮的主要因素，我地要睇的是企業本身質素和前景。

由於近年美股的升幅不錯，因此多左人投資美股，多左人認為美股較好，但我地唔好因為這些中短期的表現，就認為美股較好。

其實投資股票就等同投資一間企業，關鍵位應該是企業長線質素和前景。

美股我無特別深入研究，但當中有不少企業有投資價值，關鍵位就是你認識的程度，如果你對相關股有認識，可以投資。

但以長遠計，中國及美國經濟發展都會不錯，而中國的增長力仍會好少少。如果你真係想投資美市，又無特別那一隻股認識，可以投資相關基金或可以考慮領航標普五百（3140）。

------------------------------------------------

Q13111：

老師你好，1383太陽城集團值得持有？還是係時候放 1.67 average price 買入6手

龔成老師︰

太陽城集團（1383）這股我有保留。

佢最大的問題在新核數報告，佢近年的財務數據，核數師報告都出現「修定」報告，即是核數師對一些賬目有疑問，最後與這公司算是處理並無事。

但這已反映當中有一些「古怪」的地方，在我地投資者角度，已經要小心。

同時，這企業的盈利十分波動，有時會出現大額的虧損，都是令人擔心的地方。

可能佢業務是有潛力的，但我會偏向保守，故不建議佔你組成太大比重。如果此股只佔你組成比例很低，你可以持有，但會比較建議你沽出剖份換至其他優質股。

------------------------------------------------

Q13112：

龔成老師你好，本人係你嘅支持者，讀過幾本你嘅書，如80後富翁系列和50潛力股等等，今次係發一次想請問一下。

有消息指阿里爸爸最快今個月尾喺香港上市，想問下你點睇，會唔會買入？另外，你會點睇佢嘅投資價值、長遠發展？

個人覺得內地市場接近飽和、馬雲被迫退休等等係令人憂慮。但另一方面，東南西市場其實仲有唔少發展空間，加上阿里同騰訊都係內地兩大科技巨頭，今次喺香港上市，好令人期待，呢啲都係令人想入埸啲利好因素。好期待你嘅回覆，幫幫小fans指點迷津。

龔成老師︰

阿里巴巴（NYSE:BABA）作為內地其中一間科技巨頭，無論質素、技術、市佔、品牌等優勢。"淘寶"在內地電商和"支付寶"的領導地位，更無容置疑。雖然馬雲退休，但阿里已是成熟企業，相信影響唔大。

阿里巴巴主攻電商，除了內地業務，配合國家“一带一路”發展方向。外國生產商，也希望借助阿里平台進入內地大市場，所以發展空間還是有的。收費平台阿里巴巴的支付寶，在國際上支付經驗和技術，都有一定優勢。

但有一個因素要留意，企業集資一定希望越多越好，所以很多時都在股市較熱時出手，希望有較高定價。特別是阿里這類有咁高品牌和市場認知度的企業，定價估計唔會平。所以，到時要睇翻佢定價高低。如果過高，就算阿里質素再高，我地都不宜此刻太大注。

------------------------------------------------

Q13113：

Hello 龔Sir,您好!上次幸好經您指点後，改動了MPF組合。現在就算普遍下跌也不太差。

現在想請問您對388港交所的意見。之前180元買入幾手。分別在240，280放了。現在又想買回。前景怎樣？它又要收靠倫交，您怎看。如果可以跌到200元，你認為如何？

現在聽您講，有月供股票，供香港中銀和2800，都幾好。好多謝！

龔成老師︰

我唔建議你用"低買高賣"這種估走勢的策略，其實投資股票其實就是投資企業。假設你買入一隻優質股，佢由$7升到$70，但你$8賣出，咁就放棄了巨大的賺錢機會。

我過往就是見證大客股票客，在$1X買入港交所（0388），$20全部賣出，有99%的散戶都賣出左，就是佢地覺得港交所會落翻$1X。

你睇翻轉頭，總覺得好易，但當時就好難。所以，你要留意番買入優質股，長線持有是最好的。。

至於港交所（0388）是壟斷企業是典型的優質股，業務穩健，而且香港證券業發展前景良好，與中國證券業的聯繫亦愈來愈緊密，所以值得長線持有。

之前港交所提出收購倫交所，希望在歐洲市場加入一個新的業務平台，提升港交所業務能力和協同效應。雖然倫交所董事會已達成一致決定，拒絕此併購提議，但港交所依然希望努力遊說其股東們同意收購。倫交所作為英國重大金融基建，加上收購者為背靠中國香港交易所，無論在經濟和政治層面去考量，這交易要成事都都有一定難度。

雖然成事機會不高，但長遠無改集團優勢。這股價格有週期的特性，因為港交所收入主要來自成交及上市費，所以一定會受到市況影響，令股價會出現較大的波動。因此，只要你不在股市大熱時，例如2015年大時代，這類全民皆股的年代買入，其實都有投資價值，並可長線持有。

此股於在$240水平以上就開始貴，如果你無貨，現價可以小注買入長線持有。

------------------------------------------------

Q13114：

老師，經過考慮，我已經開立了月供股票戶口，下個月開始每月供$3000 盈富、$1500 煤氣、$1000 港交所。

第一次買股票真的有種戰戰兢兢的感覺，希望自己在做一個正確的決定，可以為自己的未來達至財務自由。

未來，會將港交所提升至$1500。另外，我看過老師的書，你亦提及reits 是優質股，我放進月供可以嗎？
衷心感謝

龔成老師：

每個人總有第一次，你平常心就得，特別是近期股市較波動，你就更加要平常心面對，唔好太著重買入價，因為長期來說，你的買入價會平均，只要你買入的是有質素的股票就得。

你上述都是有質素的股票，你長期月供就得，如果你有較多資金，可以加大港交所（0388）金額。房託都是不錯的股票，你可以加。

但要留意，唔好用盡每月的資金去做月供股票，你要同時留有一定的現金，等你有資金等機會，在平宜價時較大手投資。

------------------------------------------------

Q13115：

老師，我佢莎莎之前已經係臺灣全線倒閉，退出臺灣市場，如果持續下去，擔心香港會唔會成為下一個目標？

另外吉利我10.74入，現價13蚊，我應該先止賺，回落再入？

龔成老師：

莎莎（0178）台灣業務虧損，已是多年來的事，所以佢最後決定全部結束。其實，佢在東南亞不同的地區，都有分店，每個地區都有當中的獨特性，所以有賺有蝕正常，而台灣業務一向都不賺錢的。

但香港業務一向都是賺錢的，只是近期中短期問題，所以，如果一年內能解決問題，影響仍是有限的。

而我地買企業，要以長線的角度為分析點。

正於吉利（0175），會建議你長線，這股品牌及質素不差，除非你買入了很多，就現價賣少少。

------------------------------------------------

Q13116：

老師，近期睇你寫ge書同facebook專業，令我對投資多左一定ge認識,好欣賞你呢種自己做到而且仲想幫其他人實現理想ge心態,希望你可以更上一層樓!

你提及的月供盈富方面,有無話供到幾時可以停,定係一直持續累積下去,當一個儲蓄計畫咁樣?

龔成老師：

由於現金不斷貶值，優質股不斷升值，因此，我地無必要賣出優質股，變回貶值的現金。

所以在理論上，月供盈富（2800）可不斷進行，愈長愈好。當然，你認為貨已夠，例如10年後，轉其他股都得。

又或你已經年齡大，想轉為收息股，這時都是轉的時候。

我地整個財富計劃，是「配置」，不是「買賣賺差價」。

------------------------------------------------

Q13117：

點睇星星地產？

龔成老師：

星星地產（1560）主要在香港從事物業發展及物業投資、提供物業管理服務及提供融資。

佢近年項目有天際中心、星星中心及虹方；以及五項在建項目，即柴灣角項目、元朗地盤項目、觀塘地盤項目Ｔａｃｋ　Ｌｅｅ項目及Ｓｅｏｎｇｓｕ項目（位於韓國首爾）。

這企業規模細，盈利不穩，負債高，投資價值不高。不過，現時估值低，是吸引力之一，這股我未深入研究，如果你睇好，小注投資都可以，但就要明白當中的風險。

------------------------------------------------

Q13118：

龔成你好，我今年29歲， 月入二萬八千蚊，可以每個月儲一萬蚊左右，近排看你的facebook和書籍。

因為本身自己沒有儲蓄嘅計劃，所以想用月供股票為自己資產增值，現在希望每個月用七千蚊港幣購入月供股票，但有問題希望龔成先生您解答。

1)月供股票分布
• $3000 盈富基金(2800)
• $2000 港鐵公司(66)
• ？？？？？

但另一隻未有心水，有冇建議？另外以上月供股票分佈做唔做到增值嘅效果？

其實我係想搵增長股，多過收息股，因想現金增值，選擇三隻股票太少定需要四隻風險較少？？謝謝

2) 另外睇書月供股票應該供款至少三年，持有至少五年，當中派出嘅利息應如何處理，另外應如何估計當買入嘅股票到你賺幾多個百分比先應該要沽出呢？

3) 月供股票還有沒有應該注意的重點
謝謝

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你選較有增長力的股票，比較好。

你選4隻股票，會比較平穩，你可以月供盈富（2800）$3000。恆基（0012）、銀娛（0027）、港鐵（0066）各$1500，即是合共$7500，餘下則儲現金。

2）你收息後，要進行「再投資」的動作，由於初期收息不多，所以可以先儲現金，到有一定的數量後，就會再投資在股票，例如買盈富。

至於幾時賣出，我地並不是睇多少百份比，如果企業一直有質素，可一直持有，若股價升得過多，到時「股價遠超企業價值」的水平，都可以考慮賣出部分或全部。

3）一定要選優質股，因為原理是長期儲貨，如果投資了質素有問題的股票，就會好不利。另外，月供最重要是長期進行，唔好理中短期的股價。

------------------------------------------------

Q13119：

你好 成哥，想問問太古地產現價合理嗎？

龔成老師：

太古地產（1972）有質素，現價處合理區較上部，你分注投資可以。

佢係香港及中國的綜合地產發展商、業主及營運商。簡單來說分做三個部分：物業投資、物業買賣、酒店投資。

由於太古地產有發展大到型綜合項目的技術與經驗，因此這是其中的獨有優勢，這無論是發展中國的項目，又或是外國的項目，都能為太古地產帶來理想的回報，這亦會往後的總租金收入不斷向上。所以我地在估值時，會比高少少佢。

------------------------------------------------

Q13120：

龔sir 我係其中一個剛剛完全你課程的學生。謝謝你的教導 你的課程設計深淺度適中 恰到好處 十分受用！

你在最後環節分享夢想的重要性，和你書中及fb 都不時提及，對我有很大的激勵！

謝謝你的inspiration! 祝願大家在不久的將來都能達成夢想！Thank you

龔成老師：

課程可以幫到你，實在太好，但這不是一個結束，你要溫書，要多睇年報，用「企業評估表」。你仍要不斷進步，你的財富，與你的知識，成正比！

你都要為自己的夢想努力，記住，中間一定會有困難，但最重要是相信自己，永不放棄，加油！

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

房託基金（REITs）向來是很多 Smart Investor 的「財息兼收」之選，以追求穩定回報和現金流。其實房託基金如何因時制宜實施管理方針？派息能力的支持面與貨幣價值有何關係？《#致富解碼》今集獨家邀請到旋風式來港的 #越秀房託 #林德良 主席，以國際大型投資基金級高層次戰略角度，分析房託基金的未來走勢。

【第13集主題：#房託基金REITs】
主持：天窗文化集團 CEO #李偉榮、資深 iBanker #蕭少滔
業界嘉賓： 林德良（越秀房託管理人董事會主席、執行董事及行政總裁）

➤ 【投資Hotspot】與你捕捉環球及香港市場投資先機
影片中的主持人名牌有誤，正確位置應是：
（左）資深 iBanker 蕭少滔
（右）天窗文化集團 CEO 李偉榮
00:00 本週財資市場重點
00:38 市場好消息
00:55 市場壞消息
03:29 追求穩定回報、現金流的Smart Investor的選擇

➤ 【致富解碼】 邀請業界人才暢談財經金融，深入淺出與你配置Smart Money
06:37 本集主題：房託基金REITs
06:47 嘉賓介紹
07:30 越秀房託最初上市物業集中在廣州，目前已擴展至上海、杭州和武漢。現時業務方針和定位如何？
09:31 受到疫情影響，許多房地產表現變差，但越秀仍可維持6厘派息。越秀現時營運情況例如出租率、租金水平有何變化？
14:11 商場租金收入受疫情影響，現時國內消費力是否逐漸復甦？
17:39 2021年「報復式消費」會否刺激經濟大增長？
19:18 最近人民幣偏強，對越秀的派息能力是否有好的支持面？
21:22 正在觀望甚麼目標？
22:38 越秀會否考慮收購數據中心、物流配送中心？
23:50 「在家工作」顛覆寫字樓工作生態，出現「去中心化」現象，甲級寫字樓需求會否受影響？
25:28 大灣區有何增長投資策略？
28:48 對中國宏觀經濟有何看法？
31:20 香港企業或個人如何在大灣區發揮？
34:00 國際投資者近來的反應如何？

➤ 【iBanker見聞錄】資深 iBanker 蕭少滔（Alex）暢談投行二三事。
35:40 本集主題：IPO的風險評估
36:24 IPO有甚麼甩碌（失誤）事件？
41:28 創業板和主板上市有甚麼分別？
43:13 美國和香港的監管制度有何異同？

? 鎖定睿富財經頻道，《致富解碼》新集數逢星期六 9a.m. 上線！

======================================================

書籍推介 ➤ 全球有租收 ── 善用REITs靈活投資優質物業（蕭少滔 ）
➤深入淺出解構房託及房託ETF的基本概念及運作、各地房託的規管及風險，讓你了解香港、新加坡、澳洲、日本、英國及美國房託市場優劣之處，再按需要分散投資。
　　
實體書 | 會員享9折 | 全球運送 https://bit.ly/2YsPo2B
Google Play 電子書 | 試閱 https://bit.ly/2Sy3c8l

======================================================

【更多推薦影片】
➤ 價值投資如何達成財務自由？ | 嘉賓：簡志健（紅猴）、洪龍荃 https://youtu.be/-KM-G9IdblE
➤ 住宅樓走勢、樓市剛性需求 | 嘉賓： 汪敦敬 https://youtu.be/CjEX7pbLW94
➤ 共享工作空間疫情新商機 | 嘉賓：許飈 https://youtu.be/0o8ianCbLkI

======================================================

【追蹤 WealtHub睿富，即可獲得最新財經金融資訊】
Facebook: https://www.facebook.com/wealthub.hk
Instagram: https://www.instagram.com/wealthub18/
YouTube: https://www.youtube.com/channel/UCZ7O...
Website: http://www.wealthub.hk/

投資涉及風險。本節目純為嘉賓個人意見分享，不構成任何投資招攬或建議。本節目對閣下因援引有關資料所引致的任何損失或損害概不負責。

#Wealthub #iBanker見聞錄 #睿富財經頻道 #iBanker #投資銀行 #投行