【龔成問答信箱】（Q21761-Q21780）

Q21761：

老師你好，我上堂見你有教Benjamin 選股方法，其中一個係計流動資產淨值的3分2

以港鐵#66為例

流動資產=43,495 M
流動負債=41,651 M
流動資產淨值 = 43,495 M - 41,651 M = 1,844 M
流動資產淨值x2/3 = 1,844 M * 2/3 = 1,229 M

25/6/2021 的總市值 = 2,649.53 B
已發行股本(股) = 6,183,275,373
25/6/2021 的收市價 = $42.85

1,229M 除以 6,183,275,373 = $0.19
根據Benjamin 選股方法, 港鐵股價要跌到$0.19 先算便宜

想請問以上計法正確嗎?

龔成老師︰

對，你的計算是正確，但要留意，這只是一個「以資產角度計，貪平的方法」，即是說，我地估值有好多方法，而這個方法，就是假設「就算企業業務再差都好，流動負債點都值錢的」，以爛船都有三斤釘的角度出發。

佢這個方法，只係其中一個估值方法。佢以流動資產淨值，去計算一個有安全邊際的估值。

但由於佢這個方法，只係著重於資產價值上，而港鐵(0066)係一間有潛力企業，未必能有效反映實際情況。

所以，我課堂經常會講，我地最好用多個不同估值方法，去得出一個較立體的估值結果，這個答案，才會較有參考價值。

------------------------------------------------

Q21762：

因為我和家人都有貨(完美健康1830)，但其實不多，大約1-2手，我和家人都不太認識「買賣單位降」和改名會有什麼影響，但我們擔心不知會否影響現時我們持有貨的價錢，

例如現在1手是8蚊，即32000元，但之後改名改股變成8蚊1000股的話，是不是即變成我們持有1手貨由32000變成8000蚊？那麼我們要不要在調整之前賣出，然後降股後買回？

我家人有點擔心

龔成老師︰

其實無分別，只是方便買賣，不用擔心。

我地是否投資一隻股票，重點係佢企業本身架質素。佢改名，其實唔重要，只要佢本身業務和質素係無變，咁就無問題。

完美健康(1830)於7月15日會進行拆細，每一手由以往4000股1手，轉變為1000股1手。從而，令每手買入成本少左。

但作為現有投資者，你係唔會有影響。

以你現時持有一手為例，你有4000股(即1手)，現價假設係$10，你持貨總值就係$10 X 4000股 = $40000

拆細後，你依然都係會持有個4000股，但就會變成4手(因為現時係1000股1手)。我假設現價不變，都係$10。

拆細後持貨總值︰$10 X 4000股 = $40000。

你會見到，其實拆細這個動作，對你手上的持貨價值，係全無影響。因此你唔需要因為拆細，而賣出持貨。

但留意，此股現價略貴。現貨可持有，就暫時不宜再加注。

------------------------------------------------

Q21763：

老師您好！我係您既學生，而家睇緊您本千萬富翁(一路睇放唔低)。

我想創業自己做生意，但一向呢方面既知識唔多，雖然之前返果份工都係做sales...

但覺得自己相比起其他人business sense方面唔太好..想請問有無咩方法改善？老師有無睇過啲好既書本可以推介？

另外，我都明白要認識多啲人加強人際網絡，但係我個人有啲內向型，一諗起呢啲就聯想到要去一啲function自我介紹咁識人，想問下有無咩方法會自然啲？謝謝！

龔成老師：

坦白講，創業最好的學習，就是去創業，你得到的將會比你睇書多好多。

我建議你試下一些低成本的小生意先，例如網上創業等，這是一個很好的進步機會。

你最重要是不斷試不斷試，想，是無用的，試，才可有得著。你可以寫低所有你認為有商機的生意，然後睇下那些較小本，而你又做到，就可以開始。好多時有無市場有無發展，並不是想出來，而是試出來的。

另外，有D生意要真你有較強人際網絡，但有D生意則無要求，所以唔好比這些因素限死左自己。你可以參加一些商會活動，或早餐會之類活動，去結多D人。

至於自然唔自然，其實好主觀的，你去得多就得，所有野都是熟能生巧，做，是最重要的，唔好得得想字。

------------------------------------------------

Q21764：

老師好，有5百萬cash (前幾年買賣樓賺+儲蓄）, 應該買股票好定買樓好？

背景：3字頭，同屋企人住，而家住嘅地方有d遠

人工扣除家用開支，應該儲到1萬左右，有基本嘅醫療、危疾、年金

另外有30幾萬股票：
0002 - 2500股 $73.1
1928 - 2000股 $28.43
9988 - 200股 $225
2018 - 1000股 $41.6
1038 - 500股 $47.3

如果今次再買樓，應該唔會咁輕易賣出，除非好動蕩，最多係用黎自住（近返市區方便d返工同出街）或收租。因為有自住嘅可能，都會揀d高質素少少嘅樓買，咁就會用哂d cash

樓價高，如果只係用黎收租，其實回報唔多，計埋供樓利息可以話冇，不過可以博樓市會升，而家唔買之後可能更貴。但長遠8-10年後，

我唔係太睇好香港前景，覺得會俾大灣區/其他內地城市慢慢取代，所以都驚長遠會跌20-30%

但係另一方面，我又唔敢用幾百萬黎買股票...我就係普通人心態，擁有又驚失去...咁就更加唔上唔落

如果真係唔買樓，而買股票/基金，請問有咩建議？

超長遠目標：返part time、建立1至2個可以一直玩到老嘅興趣，可能要用時間、金錢黎鑽研、再老d或者會移民

唔好意思，寫得好長

仲有一個問題，就係可謂小注？唔同資金下，小注嘅定義會唔會唔同？謝謝

龔成老師︰

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我地再睇翻眼前而一刻，由於你自住唔算有大問題，那這筆資金，我地應較集中從投資角度，去做考慮。

現時租金回報率唔算好高，投資在優質股，值博率相對較高。

你3X歲，建議你用「平穏增長股」 + 「潛力股」的組合。現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只是合理區，你現有500萬資金可以先投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

但你要注意一點，我地財富組合除左要有增長力和質素外，平衡性都好重要。你長線都要找機會加入物業類，以免成個組合過於偏重股票類。

因此，若你在此期間，發現一些租金回報率唔錯，又有質素的樓盤，你都可以出手。

至於我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

------------------------------------------------

Q21765：

你好，我想問如果我要將啲股票分類

公用: 3， 270
地產/房託: 12，66，823，778
賭業: 27，1928
銀行: 1398，2388，3988
平衡: 2800
新經濟: 388， 788，1177，1211，1810，9988

請問新經濟嗰部分可以點分，每個分類應佔組合幾多。
謝謝

龔成老師︰

我建議你可以簡單，從「行業」和「風險度」去進行分類。

「行業」你可以主要分成公用(0003,0270)、地產相關(0012, 0066算半隻, 0823, 0778)、博彩股(0027, 1928)、銀行股(1398, 2388, 3988)、科技股(0788, 1810, 9988)、新能車(1211)、醫藥股(1177)

至於港交所(0388)業務性質特別，你可以分開。

我地投資優質股時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

就「風險度」，我地可以分成「潛力股」、「平穩增值股」和「收息股」。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

「潛力股」- 0388, 0788, 1177, 1211, 1810, 9988
「平穩增值股」- 0003, 0270, 0012, 0066, 0823, 0027, 1928, 2388, 2800
「收息股」 - 0778, 1398, 3988

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

這個部份，基本上係因應你人生階段、投資經驗和風險承受力，去作出配置。

例如你係年青人，你就可以「潛力股」、「平穩增值股」各佔50%。若你尚有5-8年就退休，就應「平穩增值股」、「收息股」各50%。到退休，就100%「收息股」。

------------------------------------------------

Q21766：

龔生你好，本人想問你一些意見。我五年前因先生生意問題賣左層樓，已租樓五年，現在想買返樓，請問是否好時機？

我有現金大約三百萬，月入41000，先生沒有穩定收入，兩個仔女一至兩年後大學畢業，本人五十歲。現在租金18500。

我只擔心退休後無屋住，而且已50歲，所以想上返車, thx

龔成老師︰

現時香港樓市，算係合理區頂部，從投資角度，未算好吸引。

但由於你目標係自住，我地考慮重點，唔係現時樓市水平，而係物業符唔符合你需要，講緊係未來10年、20年，係唔係都適合你。

如果係合適，你就堅守住"供得起"這個大原則，就算現時置業都係可以的。

但最好，你可以係置業之餘，留有一定現金，去用優質股進行增值，咁就更理想。

------------------------------------------------

Q21767：

龔老師，您好，我朋友公紹而認識您，我朋友話你分析及推介的股票很準，我初看到閣下的Facebook, 建議買2800，如果大市跌是否會跟住跌，為何會推介2800,因為我股票不太認識。

我有持
1313,9.9元買15000股
914, 45.7買，1000股
1810, 25.15買5000股

最想請教老師我上年$2.9買3988,坐足一年，重貨，跌到約$2.3，利息都補唔番差價，下星期除淨，除淨前會升些嗎？

我想除淨前賺差價，不要息可以嗎？謝謝老師

龔成老師︰

你對派息運作，似乎有點誤解。

在「除淨日」前一天，依然持有股票，就會收到股息。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在除淨前沽出，而出現任何著數。

盈富（2800）佢係一隻追蹤恆生指數的ETF，所以恆指下跌，佢都會同一比例地下跌。

佢並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。所以，我經常都會推介佢比讀者，特別係經驗較淺的一群。

你上述4隻股票，都係有質素，若你係年青至中年人士，都適合。

但華潤水泥控股（1313）業務較波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。但就要留意股價上落會較大，自己要注碼上控制，唔好佔你組合太高比重。

至於中行(3988)佢有質素，算係收息股類，增長力唔高，主要係收下息。若你較年青，就不要持有太多。

而且，我地投資會講求成個組合的平衡性，唔應該太集中單一企業或行業，佔比要維持分別15%和30%以下，才算穏當。

因此，你現時重貨的話，建議你沽出部份，去平衡風險，咁會較好。

------------------------------------------------

Q21768：

龔成老師，您好，我係一位32歲的全職媽媽，留意您的文章有一段時間，但3月才正式入市

270 2000股$24.1
1810 800股 $24.5
1177 2000股 $8
1448 2000股 $7.8

3067 200股$19
2388 1000股$28.5
3800 5000股$2.74
1972 600股$24.3

以上是我手頭上的股票，大部分算高位入市！特別270係咁跌！

1/我們抽中了白居二，可能會在一年內盡量買來一家四口自住，未知是否需要用到此十零萬資金，所以請問我是否需要放曬所有股票？定keep一兩只？目前配置合適嗎？

2/目前住荃灣，應該買唔起附近，以您專業的眼光，如果買樓，邊一區會是個潛力股？因為我今次未必可以買到三房，想以後仔女大左可以換大間！

期待您的解答，感謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時股票，大部份都係有質素和適合你。而且除了粵海(0270)，其他都唔算好高位入，大致係合理區頂至略貴，你可以守。

雖然粵海(0270)帳面值虧損較大，但佢係有質素，你照長線持有，主要用來收息，再加上少少平穏增長。

但現回到你買入價，相信會要較長時間。

另外，保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

1) 我地成個財富組合，除左講質素外，平衡性都好重要。因此，我建議人在置業同時，必需留有一定優質股，作增值之用。

這樣才會避免到，所有資金完全側重晒係單一資產(物業)類別。

但若你生活上係有置業的迫切性，你盡用這些股票去買樓，都係可以。但緊記，你最低限度，要堅守"供得起"這個大原則，就可以入市。

之後，你再有新資金，才再慢慢累積優質股。

若你打算1年後置業，由於時間唔長。如果你確定係要動用股票部份去業，你現時就要開始，慢慢分批沽出持貨。唔好等到動用資金個一刻，才一次過去沽，以減低價格波動，對你回報造成之影響。

2) 較高升值潛力地區，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

雖然你長線有細屋換大屋打算，故新購物業(細屋)有升值潛力，對將來換大屋較有利。

但同時間，佢都係你自住樓，你都要從生活角度去考慮。2者要取得一個平衡，才算理想。

------------------------------------------------

Q21769：

龔成老師你好，我和太太均31歲，各月入$5萬，資產如下：

- 物業1，2017年買，自住，月供$15k，26年按揭
- 物業2，2020年買，收租，月供$13k，收租$11k，30年按揭
- 股票$150k，005 和 2628
- 現金$1M

每月扣除開支，儲$30k-35k，想50歲有$50k被動收入，資產應如何配置？感激！

龔成老師︰

若你想做到50歲後每月有5萬蚊現金流，以股息率6%計，你需要本金1000萬。

你現時財富組合，物業和股票都有，係理想。但比例上，明顯偏重左係物業類。因此，我地新資金應優先投放股票類，去令組合更平衡。

現時你持有股票，匯控(0005)主要收息，無乜增長力，唔適合持有太多。而中國人壽(2628)雖係增長股，但近年賺錢能力，明顯係弱左﹐不宜持有太多。

這2隻股票，建議你沽出部份，慢慢換至增長股，長線對你會較有利。

你31歲，應利用「平穏增長股」 + 「潛力股」這類增長股，去創建一個增長組合。現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

大市現處於合理水平，那100萬資金，你可以再用多30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

假設投資回報有10%（連股息再投資），你每月投資$30000 + 現有資產(15萬股票和100萬現金)，20年後大約會增值至2800萬，相信用以上計劃，很大機會達至你的財務目標。

------------------------------------------------

Q21770：

老師，我現年我33歲，兩公婆每月加埋收入得25000，有一物業供緊剩低50萬左右，但供樓及小朋友同家庭基本開支30000，户口現金剩30萬左右，

我想問下老師意見我仲適唔適合投資股票？

龔成老師︰

以你情況，由於每月係入不敷支，因此重點應先放在這財政問題上，要令你變回收支平衡之餘，也可以有一定資金作投資。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工(如SALES，一些多勞多得的工作)、找PARTTIME、網上生意等。

目標係令你可以應付生活開支同時，每月有資金空出，作投資之用。

當你可以做到這點，你就可以開始月供股票計劃，去為自己增值。

你33歲，可用「平穏增長股」 + 「潛力股」的組合。你每月可用5成儲蓄作月供，其餘先儲起，等大跌市時去掃貨。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於現有30萬資金，我建議先扣起半年生活支出，作應急之用。餘下部份，你可以先用一半，分注買入上述股票。

如果你唔係好認識這些股票，可以集中買盈富(2800)。餘下部份，都係同樣等大跌市機會出現，才出手入貨。

------------------------------------------------

Q21771：

老師，你可否給我一點建議？
我的情況：

現時37歲
每月收入：$20萬
每月開支：$17萬
現有3層樓，都要供，2層出租，一層自住
股票：$25萬（有2388、2800、3067、9888、6618、1208、941）
現金：$30萬

如果我想50歲財務自由，每月有$50000去用，我應該點做？

龔成老師︰

以你的情況，其實不難的，首先，你現時有兩層樓收租，當你50歲的時候，理論上已還了一定的借貸，加上租金在長遠會偏向上，因此，該物業能為你提供一定的正現金流。

若然到日後供款完成後，現金流將會更加明顯。

如果假設你50歲時，物業未供完，我再假設未有正現金流，你就可配合以下方向去參考。

50歲想每月有5萬蚊現金流去支援生活。我地以股息率6%去計，你就需要本金1000萬。

由於你現時已有不少物業，未來新資金應集中翻係股票類，以免財富組合過於偏重單一資產。

以你37歲，應以增值為主，可以選擇一些「平穩增值股」+「潛力股」作投資目標。

你現時持有股票，都係有質素和適合你。但百度(9888)、京東健康（6618）不確定較高，不宜持有太多。

五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際，這股不建議持有，你可以每有反彈，就慢慢沽出。

中國移動(0941)有質素，但只係收息股，增長力麻麻，同樣不要持有太多。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里巴巴（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，餘下30萬和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 30現金 + 25萬持股，50歲時大約會增值至逾1000萬。

再加上你現有物業的租金收入，相信以上增值計劃，很大機會可以助你達成退休目標。

------------------------------------------------

Q21772：

龔sir 你好 ，我本人26歲。以前買過港股，有買過小米$15.x左右，賺左小小16.x就賣左。現在持貨：

-中國鐵塔$1.5
-3兩黃金平均$18600/兩
-小量美股

近年睇多左你既Page，都覺得價值投資既重要。同埋要建立一個投資組合非常重要。

未來計劃主要想投資美股：

長線投資：
-蘋果
-BRK 伯克希爾 B
-Tesla
-微軟
-台積電

中期：
-美航
-Pala Tech

短期：
-富途
-蔚來、bilbil

我想30歲前儲到100萬，我會儲月入大約55%既人工，目前月入24K，資產大約15萬。

希望老師俾小弟建議。

另外非常感謝你回覆網友問題，post其他網友既case，俾我地見到好多層面既人既經驗，非常值得借監，你既回覆亦值得學習。多謝你！加油

龔成老師︰

美股都有質素，你用來作增值組合，都係可以。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔好再用短炒這個策略，而係用長線角度，去選擇股票。

你上述股票，都係有質素。只要你係長線投資，再用平均價格或月供去儲貨，咁就無問題。

但留意，Palantir Technologies Inc (PLTR)和Bilibili Inc (BILI)都有投資價值，不過由於佢地至今都未有盈利，不確定性較高，不宜太大注。

另外，雖然疫情開始穏定，但始終存在不少變數。加上航空業賺錢能力，已經係弱左，American Airlines Group (AAL)這類企業，唔係太建議你投資。

而黃金是貴金屬，有「終極貨幣」之稱，主要作用是對沖黑天鵝事件。

不過，黃金沒有現金流，持有無法創造出經濟價值，持有過多，反而會拖慢成個組合的增值效果，我建議佔財富比例太多，大約3%以內好了。

至於投資部份，你每月可先用5成儲蓄去做月供，其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

除了可考慮月供上述美股外，我建議你加入Vanguard標普500指數ETF〈VOO〉，是追蹤標普500指數的ETF。佢係一籃子的優質美股，有助提升你組合平衡性。

我假設投資回報有10%（連股息再投資），你每月投資$12000 + 15萬資產，30歲時大約會增值至90萬。

所以，你想提高成事機會，最好再調高少少個月供金額，會較理想。

------------------------------------------------

Q21773：

Hi，有事想請教我收到另一間公司offer

其實我好迷惘 有2個offer 一間全球top 5 會計師樓 一間係中型既list co

Top 5 個間係高壓文化 must ot 會好辛苦 但學既野會多 有朋友話不少人捱五到一個月就走 for junior 位 捱到既senior 就做得耐

另一間中型既list co manager super nice 我覺得 但學既野五太多 佢話五洗ot 兩間既人工offer 一樣

我考慮既點 係要challenge 自己入去個間高壓文化做下 捱到 就會係有料既人。定舒舒服服入去中型list co 做 利申26 years old

講多少少 我自己係能力是ok 我最大問題是情緒問題 一五開心 一驚 表現先大打折扣 有自信信心 表現超好 所以五太岩高壓既環境

但屋企人勸我入個間高壓文化捱下 捱到你咪情高提高

龔成老師：

其實你個考慮點，應該都係放係長線因素，你要知道邊度架經驗、資歷、知識、甚至做事方法，會對你投入這個行業，以至長線發展，會係最有利。

你可以問下一些行內朋友，或者同學意見。再加上你以往在中型/中小型會計師樓經驗，去綜合一個結果比自己。

高壓文化、OT，這些唔係唔可以考慮。但這些相對你成個職業生涯，只係一些中短期因素，我唔建議你睇得太重。

------------------------------------------------

Q21774：

老師, 今次真的可以實名的叫龔老師, 因為我已經報讀老師的課堂.

對上一次請教您, 已是一年多前, 很多手上的爛股都去掉, 現時入的,都是看老師您回覆, 再加上自己預估的, 買了一些股, 老師可否幫忙, 看一看有冇入錯, 謝謝您.

我現年43, 月入50000, 積蓄有80萬, 想再入啲優質股, 保留30萬在手, 所以計劃想投資50萬左右,

現時手持,
1810 x 2000股
788 x 40000股
992 x 2000股,
1478 x 2000股,
2800 x 2000股

本人計劃想買700, 2269 or 1772, 2128, 1347，想請問老師有咩高見? 謝謝您.

另外, 我老豆有些股已經跌左25%, 想請教下, 可唔可以再守? 2188 同860.

感激老師.

龔成老師︰

你現時持有股票，都係有質素，照長線持有就可以，但中國鐵塔（0788）增長力減弱左，你不要加注。

至於你計劃買入的5隻股票，都係有質素，但有幾點要留意。

中國聯塑(2128)現價偏貴，最好等有明顯回調，才入貨。

贛鋒鋰業（1772）、藥明生物（2269）不確定性較高，不宜太大注。

你以上所講的股票，除了盈富(2800)、聯想（0992）算係平穏增長股外，其餘都係潛力股，佢地雖然有增長潛力，同時風險都較高。

以你年紀，不宜持有太多，大約佔3-5成(視乎你投資經驗和風險承受能力而定)，餘下應集中以下平穏增長股，否則會令你組合風險過高。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市只在合理區，你可再投資在30-50萬，餘下資金就等大跌市機會。

當然，你可以不用急，唔洗即刻走去再投資。你可以等上完堂，對整個投資概念有較完整理解，才出手都可以。

至於你父親的持股，力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。

泰坦能源技術(2188)規模好細，而且近幾年都係出現虧損，投資價值不高，建議沽出。股票班見!

------------------------------------------------

Q21775：

成老師，想你提供一些理財意見，現有狀況如下：
年齡： 43
職業： 企業銀行

1）現有資產共HK$16.94 Million

- 現金 ： HK$1.1 Million （remarks: 2%p.a. deposit rate for staff with deposit balance within HK$1 Million）
- Asian Currency Bond Fund : HK$0.1 Million
- 自住物業： HK$13.5 Million
- MPF : HK$1.4 Million

- Equities : HK$0.61 Million
>5 HSBC @ 3156 shares
>3988 @1,000
>1398 @1,000
>3968@650
>16@500
>700@200

>1@50012@1,000
>27@1,000
>9988@100
>1448@7,000
>3067@1,000

- 合資格年金累算權益：HK$0.105 Million （已繳兩年）
- 保單累算權益： HK$0.125 Million

2） 每月收支

- 每月收入: HK$90,000
- 每月合共開支：HK$70,000
（父母家用: HK$15,000）
（供樓：HK$39,000）
（日常開支：HK$14,500）
（MPF 供款: HK$1,500）
->每月平均盈餘 : HK$20,000

請問在50歲時能否做到每月有HK$30,000 被動現金流? 另外，如何能達成？謝謝！

另外，想補充一下, 本人現樓按結欠HK$6.9 Million, 尚餘16年期

龔成老師︰

你現時43歲，財富仍有一定增長能力，可以利用這7年時間，將財富增傳值，到了近50歲，就可轉翻一些現金流類別的資產。

如果你希望7年後每月有3萬蚊現金流，以股息率5%計，你需要本金720萬。

現時大市在合理區，現金和股票最好各佔一半，你現時持有現金水平係偏高。雖然你現金有2%員工利率收取，但這程度的增長力，唔算理想。

建議你用這筆現金和每月儲蓄，去增持一些有增長力股票，去累積這筆財富。

現時持股，大致上可以。但匯控（0005）、中行（3988）、工行（1398）都是收息股，增長力唔高，唔好持有太多。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。但佢地波動性和風險會較高，你要自己平衡。

你現有110萬資金，可以再投入多20-30萬，用"分注"形式，慢慢買貨。餘下資金和每月儲蓄，就等大市出現一定程度的下跌，才大力度掃貨，然後長線投資。

以大市過去年平均回報10%計（連股息再投資），你每月投資$20000再加上你現有資金和持股（約170萬），7年後大約會增值至560萬。如果要達至你的財務目標，月供金額必需增大至$35000。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成目標。

------------------------------------------------

Q21776：

因為本人媽媽不擅於投資，我剛開始接觸股票，幫佢review股票組合發現大部分都係蝕錢，我應該幫佢止蝕定由得佢等落去呢？

0042 平均價2.14
1398 平均價5.72
0998 平均價5.68
1288 平均價3.94

3988 平均價3.5
1680 平均價2.98
2628 平均價26.22
2009 平均價3.86

2866 平均價 4.35
1766 平均價11.67
0390 平均價 8.52
0005 平均價78.69

有一部分已蝕一半已上、帳面合共虧損30萬左右，我可以點幫佢調整呢？因為佢年紀都十分大，亦唔適合過高風險投資。唔該曬龔sir。

龔成老師︰

我地先要睇翻隻股票有無質素，如果佢帳面虧損，但係有質素，我地都可以守住先。若無質素，就算帳面無蝕，我地都要考慮減持，甚至全部沽出。

東北電氣(0042)、澳門勵駿(1680)投資價值不高，建議有反彈，就慢慢沽出。

中國人壽(2628)、金隅集團（2009）、中遠海發（2866）、中國中車（1766）、中國中鐵(0390)有投資價值和增長力，但增長力唔會好強，質素算係中等。

若佢唔係佔組合太多，持有係可以。若較多，可以慢慢換碼至優質的收息股。

匯控(0005)、工行(1398)、中信銀行（0998）、農行(1288)、工行(3988)、有質素的收息股，主要提供現金流的股票，適合你媽媽。

由於你目標係收息，帳面賺蝕反而唔重要，除非佢本質出現問題，否則你長線持有收息，就可以了。

但你要留意，現時你媽媽組合中，有不少銀行股。個別行業，不要佔組合30%以上，否則會有過度集中性風險。

而且，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。所以，你都要幫她調整一下個比重。

以下是一些有質素的收息股，給你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21777：

咁佢哋都有能力成為10倍股？但似乎來講指數好難升到10倍股⋯⋯水桶一指最大潛力，有冇機會係10倍嘅選股？

阿sir，唔知道你有冇留意啲細價股，汛和（1595）會比京基借殼上市，咁1595值唔值得投資？將來等收成？

另外，我想問第一視頻（82）值唔值得長線投資？因為佢改名做瘋狂體育，未來幾年係體育年份，佢係唔係一隻潛力股？謝謝阿Sir


龔成老師︰

水桶1，係指增長潛力較高股票，通常都是處於行業快速增長階段初至中期，故相對其他股票，有較大增長潛力。

但要指數ETF(如3194、3067、3032、3033)增長10倍，係會較難。

由於佢唔係單一企業，要做到10倍增長，即係要絕大部ETF中股票，出現大幅爆升，因此要ETF成為10倍股，機會較微。除非你投資一個長時間，都有可能。

京基欲借殼汛和（1591）上市，暫時未落實，無人知發展成點。若言成事，我地才可以從新業務，可判斷此股有無投資價值，現時所有都係得個估字。

以現時集團質素計，投資價值不高，唔建議持有。

第一視頻（0082）從事互聯網業務，包括在中國經營體育彩票新零售業務、網絡視聽新媒體、其他互聯網相關的投資，以及阿聯酋杜拜的衛星電視台業務。

業務持續虧損，質素一般。除非你好確認佢之後的發展正面，就可小注博下。

記住，我地投資股票，就係投資緊一間企業，要分析係長線的企業投資價值。佢用乜野名，係唔會對佢業務有影響。

另外，唔係好估走勢或者估消息。我地要用實質理據，去做投資決定。

而且，就算再優質股票，都要時間去成長。唔好用賭博心態，諗住博某股票業務突然改變，從而令其股價爆升。

這個做法，只是投機，並不是投資。

------------------------------------------------

Q21778：

老師，原來我有好朋友關注你，同埋有一個上過你堂，佢依家做到財務自由，佢隻1211原來佢40元樓下買左萬幾股，依家都冇走貨，我問佢幾時走，佢話當你見到成街都係電動車就可能會走！

我依家30歲開始學投資，算吾算遲，其實我五年前已經開始接觸股票，一直都係輸，有時可能贏小小就用晒，到最後本金都輸埋！又重新來過

我開始明白你經常講嘅一句，買股等於企業，企業慢慢去發展，企業既成長，等於我儲蓄！

我而家買入嘅股票我都唔會再輕易去走貨，因為佢係錢搵錢

我放假要再去買你一本書，你經常提我知識好重要，係邊本書係簡單容易明白

我第一本書就係睇你介紹嘅50隻優質股同埋10隻潛力股！

我想學知識，邊一本我比較容易明白
等待謝謝你的回覆

龔成老師︰

你可以睇我寫架"80後百萬富翁"、"財務自由行"和"股票勝經"，較適合初學者。

其實30歲，依然係一個財富增值的黃金時期，只要你認真學好正確的投資方法，一樣可以做到不錯的回報。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，建議你用「平穏增長股」 + 「潛力股」的組合。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄估月供，其餘先儲起，用一邊月供一邊儲蓄的策略。

而你朋友買的比亞迪(1211)，係好優質的潛力股，現時未算行業爆發時間，長線持有，待佢慢慢發展上去，回報會更理想。

但由於現價已經偏貴，要月供最好等佢回到$150才開始，會較穏當。

------------------------------------------------

Q21779：

老師，我應唔應該買樓？出面話公務員會減薪, 咁你覺得樓市之後係咪應該會下跌?

咁我係唔係應該要等多一陣先買?

龔成老師︰

若公務員會落實減薪，某程度上，都會影響到私人市場的薪酬變動。

但樓市之後會唔會下跌，係要好多因素，唔係單單睇薪酬變動咁簡單。而且，我地投資唔好太著眼1,2年架事，要諗長線少少。

香港樓長線都係供不應求，因此樓價長線都係睇升。

始終市場需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

但中短期係有機會出現波動，造就入市時機。但你唔好預佢大跌，若係自住樓，只要係合你需要，而且長線"供得起"，你就已經可以出手了。

至於你之前講的房屋政策，只係好初步，無人知會唔會成事。就算成事，又要等到幾時先可以立法執行。

因此，你在做決定時，要在現實情況和這些存在不確定的未來政策中，自己取個平衡。

------------------------------------------------

Q21780：

龔Sir，你好。想請教一下，手上有匯豐控股（00005），平均買入價$57.8；電能實業（00006），平均買入價$66.7。

早幾年買，錯過左高位賣出時機，而家帳面蝕錢，不過睇返多年收過股息算打平。而家係咪應該賣出，定等機會股價升返？（好似好難）

龔成老師：

首先，要睇翻你的年齡與投資目標，你上述持有的，並不是無質素的股票，這些都是收息股，不過，增長力就不強。

如果真的賣出，可以等過1、2年，經濟好轉，等佢地股價上翻D先賣。

如果你年輕，其實未必太適合持有，應該在適當的位置，轉其他。

如果你年長，又或風險承受能力較低，又或投資目標著重現金流，其實就可以持有的，因為這兩股都是不差的收息股，只是你買入價少少高，但如果以長期收息的角度來說，其實無問題的。

另外要留意，你不能持有同一隻股票太多，你應該建立一個組合，同一隻股票去到15%好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19341-Q19360）

Q19341：

老師，我見0006電能嘅流動資產減少約2成，反而流動負債增加左9成，流動資產淨值呈現負數，往年均為正數，呢個係唔係一個嘅危險訊號呢？

另外，係報讀老師你嘅倍升股進階課程之前，有咩書可以睇去作準備？我已經上左基礎班。

龔成老師：

風險度略略有增加，但又不用太過擔心。

睇翻佢最新的中期業績，如果你睇佢資產負債表同埋附註15，就會見到具體情況。

佢流動資產淨值呈現負數，如要是流動負債增加左，睇翻原因，是一筆$33億的負債，由之前的長期負債變成了流動負債，即是差不多開始到期。

但以佢本身的資產與現金流情況，以一間業務很穩定的企業來說，要延長或再進行借貸，無問題的，始終整體的負債水平不高，因此問題不大。

你上進階班前，可以睇《選股勝經》《年報勝經》。

------------------------------------------------

Q19342：

你好啊 成哥，好耐冇問你問題 最近諗緊兩條問題 想請教下你

1. 作為一個投資新手 因為手上冇乜股票 係咪應該喺合理區中部或者合理區下部就應該入手 而唔係一直等到佢到便宜區？

因為冇人可以預測未來 都冇人知道心水股票是否會喺股災來臨時跌到便宜區

2. 當有股災既時候購入既策略應該係點？係咪都係應該分注入？

因為當跌到便宜區就大手買入 如果再跌到更加多手上資金可能就唔夠 但如果唔大手買又驚錯失良機

龔成老師：

1）其實最重要是平衡，如果你本身完全無貨，在配置中已變成了「不平衡」（集中在現金），因此，都要適當地買入優質股，只要合理價就可以。

當然，不會用盡你的現金，只會部分入貨，餘下現金會等平先買入。

2）要睇股災的情況。

在正常的市況（合理區），會一邊買入，一邊留現金，而所留的現金，就是等大跌市（便宜區），即股災時買入。

但動動用的程度是一次過買入，還是分注入，要睇情況，但都是動用儲備。

------------------------------------------------

Q19343：

老師你好呀 想問問港元債券 港股 美股 歐洲股 日本股 嘅發展分析為何？

龔成老師：

我地進行理財，可以建立一個平衡的組合，因此，只要有質素，都可以考慮。

港元債券是防守性產品，若你好低風險，好想收息，就可考慮，但以增長角度，未必適合。

至於歐洲股、日本股，本身經濟不太好，加上疫情，回勇時間要更耐，所以長遠的發展只是一般。

至於港股與美股，長遠的發展理想，中國與美國在長遠，將會是全球兩個最大的經濟體，因此相關企業往往有一定的投資價值，同時投資這兩個市場可以的。

------------------------------------------------

Q19344：

你好老師
想問！一隻股票目標價係點定斷？

龔成老師：

所謂的目標價，通常是一些大行分析，計算出這股的企業價值，然後認為這股現時股價與這價值有距離，之後就會去翻目標價。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q19345：

老師你好，想問下如果每月扣除供樓開支後的餘錢，應該用作股票投資還是盡快還清貸款？謝謝

龔成老師：

現時處於低息環境，還錢並不一定有著數，其實最重要是計算「按揭利息」及「回報」之間的差別。

例如你有$100萬，如果投資收息股能取得6%股息，你就得到$60000一年，如果你想這$100萬作還錢，就可以慳利息，如果按揭利息3%，你就慳到$30000。

比較之下，你唔還錢，將錢作投資，得到$60000去支付$30000按息，會更著數。

當然，投資收息股有價格上的波動，而減少負債能令你減少風險，因此，各種選擇相會有利弊，但你先要明白，並不一定「盡快還錢」就是最好。

在低息環境，你拖長還錢反而有利，而高息環境，就應該盡快還錢。

如果你有基本投資知識，就應該將資金投資。但如果無信心，就還錢。

------------------------------------------------

Q19346：

你好，1088相比起1310同2638係唔係風險大啲？

龔成老師：

雖然3隻都是收息類股，但中國神華（1088）的風險度，的確會比另外兩隻較大。

最主要是業務因素，一間企業要有穩定業務，先可以有穩定的盈利，先有條件去進行持續派息。中國神華（1088）質素中等，過往較有質素，近年有減弱情況。

佢始終有一定規模，但政策不是好支持行業，的確會對佢有影響，但已經在股價反映左。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，如果商品價格大升，佢會好賺，但如果大跌，佢就可能會蝕錢，而這方面好難控制的。

所以整體來講，這股不算差，但又不算非常好，唔好對股價有太大的期望。如果是收息的，都可以，但就唔建議太大注。

------------------------------------------------

Q19347：

想指敎一下，現在入車位投資值得嗎？ (平過市價一成) 本身有一層自住加一層收租, 有股票基金債券佔一半！ 謝謝

龔成老師：

現時的車位租金回報率唔高，以投資的價值計，其實唔算吸引。但如果你找到平過市價一成的，就可考慮。

可以視車位為你的財富配置一部分。

------------------------------------------------

Q19348：

龔Sir，我follow了你的fb 專頁已有一段時間，亦是你書籍的讀者，從你的文字可感受到你對教授投資知識嘅熱誠同價值觀，使我獲益良多。

我想報讀老師的課程，但礙於居住地點及作為兩個年幼子女的父親，還是希望放工後盡量將寶貴的時間留給他們。請問老師有否考慮製作網上課程呢？

即使以相同課程費用，我也願意報讀。因現時科技發達，我相信成年學生即使在網上平台與老師溝通互動，也可做到課堂實體上課效果。還望老師日後可作考慮。

龔成老師：

明白，我遲d，會開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q19349：

成兄 想請教一下網上醫療 阿里健康財報 半年約純利4億，但現時市值3000億以上，係咪已經被高估，還是一個新領域嘅開始，將來會有爆發式增長？

龔成老師：

當我地進行估值時，佢上年度的盈利只是其中一個推算點，特點是潛力股時，所考慮的因素會著重「將來」。由於市場預期佢每年盈利會高速增長，因此市場比佢好高估值。佢有潛力，但現價略貴。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。

------------------------------------------------

Q19350：

龔老師你好!
想問1177及1071！

龔成老師︰

在未來人口老化、政府對行業資源的投入、人民生活和收入質素提升等因素下，都令人們對醫療需求增加。

中生製藥（1177）本身己有一套完善的營運系統，集團己擁有多個賺錢的藥品類別。在高毛利支持下，可以不斷將錢再投資在新藥裡。這種經營模式下，相信長線發展可維持正面。

現價算係回到合理區中上部，可以開始分注投資。

華電國際電力股份（1071）主要從事發電及供熱業務。

本身賺錢能力唔算話太高，盈利過去幾年都幾波動，而且負債唔輕。

整體質素，只屬一般。

------------------------------------------------

Q19351：

你好 我留意左你個page好耐 獲益良多 知你好忙 我長話短說

我媽媽已經67，有10萬元想買股票。我miss左個銀髮ibond, 請問除了盈富外仲有咩可買呢？謝謝你

龔成老師︰

以你媽媽年紀，投資上應該以保守項目和現金流為主。

佢可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

上述股票都在合理區，你可以先用5萬分注入貨。餘下一半，就等大跌市出現，才進行入市。

------------------------------------------------

Q19352：

成哥,你好!本人近兩個月已讀了你6本著作,獲益良多,正安排時間打算參加你的課堂。

最近讀了你的書才開始檢視自己和家人的財政狀況,發現頗為混亂,整個人都處於迷惘中,還望成哥指點迷津:

1. 本人14年前在澳門和家人以$170萬合資購買了一個複式唐樓單位,

每層實用面積約900呎,共1800呎,一直放租,已供滿,現時租金$12000。由於樓齡已超過30年

唐樓升值能力有限,打算以約$600萬之價出售,雖呎價平但因LUMP SUM太大故一直無人問津,

請問我們應減價出售還是應該繼續放租呢?

2. 現和家人同住屯門居屋,3年半前老公單名以$417萬買入屯市實呎317兩房單位放租,

尚欠300萬,租金回報約4厘,由於樓齡也超過30年,且面積太小,請問應否放售後再換大一點及樓齡細一點的單位嗎?

3. 我暫時無業,老公月入約$55000,中年無子女,有約港幣$130萬在高息戶口,

人民幣$150萬,分批放入定期,年利率約2厘左右,因人民幣定存利率愈來愈低,最近人民幣也升值不少,
所以打算分段兌回港幣,請問這做法是否正確?所持現金,我應再投資樓市還是買股票收息好呢?

4. 以前太無知,人雲亦雲買股票,所以股本已損失約30%,現在價值約$28萬,實是慘痛教訓!以下為本人持倉:

股票 股數 買入價
0778置富 8000 8.812
0823領展 500 67.85
0005匯豐控股 800 38.7
0939建行 6000 8.46
3988中國銀行25000 3.014
3311中國建築 6000 12.52
3337安東油田 10000 3.95
8198樂透互娛 2000 12.8

由於一直用澳門銀行戶口買股票,費用貴,且現在已常居香港,是否應沽出手上股票,轉在香港劵商繼續投資?
另外,3337及8198已損失近9成,應該沽出還是繼續放著算了?

5. 閱讀你的書籍後,深知資產的重要,近期已在香港開了劵商的投資戶口,

希望能幫老公建立較優質的投資組合,由於我投資知識仍有限,故只是從盈富開始,打算大約1個月入1-2手,
若PE較低時會多入1手,現在已儲了4手,請問這做法是否可行?另外,我也可始留意置富、領展、金沙、港燈等收息股,

但仍未能掌握買入價位,因之前的慘痛經驗,現在投資都比較保守,但若以我現時情況,盈富+收息股這個組合又是否恰當呢?

知道問題太多,但還望成哥賜教!

龔成老師︰

1） 你現時租金算唔錯。但由於樓齡開始大，如果佢無特別大升值潛力，你可以慢慢找機會放，但唔需要急。

至於要否減價，你可以參考同區類似單位，看會否定價過高。

2） 如果有實際生活需要（如居住面積不足），換屋都可以。只要整體負債唔會因此變得過高，同埋堅守"供得起"原則就可以。

若無迫切性，可以先用優質股一邊增值，一邊等換樓機會都可以。

3） 除非你有明確需要，否則轉回港幣去做投資較好，不論高息戶口、定期也好，這些產品都不是理想的財富增值功具。

由於你手上已有2間物業，再投資物業會太集中（當然你成功沽出唐樓，則另作論。），所以你而家應該去投資股票，令成個財富組合更平衡。

4） 你要時持股，大部份都有質素。但過份集中在銀行股，佢佔你組合近一半。個別行業唔好高於組合30%，否則會有過度集中風險。

樂透互娛（8198）和安東油田（3337）質素好一般，建議沽出。

由於優質股係長線持有為主，唔會經常做交易，所以你放在澳門銀行先都可以。

5） 你現時儲盈富（2800）架方法係可以，但由於你無乜投資經驗，"其他股票"若都想自行定平貴去入市，會有點危險。

建議你用月供，或者"定時定額"咁去直接入貨。例如每個月1號，不論當時股價多少，都入1手。咁樣就可以平衡倒價格波動架風險。

但這個動作和月供，都必需長期進行，最少供3年和持有5年，才會有理想效果。

組合上，你可以用盈富（2800）主導，再配以一些"平穏增長股"和"收息股"。如果你較近退休之年，"收息股"比重上可以多一點。以下都是合適股票，給你參觀。

平穩增值股︰盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

------------------------------------------------

Q19353：

龔先生你好請教一下：

1） 何為細價股和大價股？ 用股價區分對嗎？ 如港燈（02638）, 股價7.71和陽光房產（0435）
都屬細價股嗎？ 細價和大價股有什麼優點和缺點呢？

2）本人是新手, 層低風險一族, 以上提到的兩樣股票以下股價值得入手嗎？ 息率應有5%對嗎？

港燈02638： 7.71
陽光房產0435： 3.81
謝謝！
補充, 我不是月供股票, 是每手買入

龔成老師︰

1） 細價股無一個明確定義，一般都係講一些股價或市值好低的股票。

細價股也有好壞之分，如果該公司的業務本質穩定，市值不算太細，而且穩健發展業務，這類股票就仍有投資價值。但如果市值低於10億元，生意既不穩健，賺錢能力又弱，過往更從沒派息，股價波動大。

不但是市場上的炒賣股，連帶公司內部也加入炒賣，所以這類股絕對不宜沾手。

你明白投資股票，我地係睇企業本質，去評定佢有否價值。所以，大定細價股，其實唔算主要考慮因素。

2） 港燈（2638）和陽光房地產（0435）都係有質素架收息股，這2隻坊間都唔會視為細價股。

佢地都有投資價值，前者等佢息率到5%才分注入市，咁會較理想。

而陽光房地產已在合理區，可以開始分注入市。

------------------------------------------------

Q19354：

你好丫sir，我有關於債券嘅問題想問你。

雖然你本書話買咗最好係持有至到期日，不過我有另一種方法唔知可唔可行。

股票我會一手一手買，如果冇比較平嘅股票我就會儲現金，但不過覺得現金儲得太多，但係又未有股票合適買

所以想買債券令啲錢唔好就咁放喺度毫無增長，然後如果中途站嘅話就會攞出嚟，冇賺嘅話就直到到期日，
咁樣可唔可行？

龔成老師︰

你做法雖然可以令資金保持一定增值，但長遠計有機會得不償失。

我地假設中途出現買平貨機會，而債券又跌低過你買入價。若你因為怕債券蝕價而唔放，咁就會失去儲平貨時機。相反，若你選擇照放債券去入平貨，債券會出現虧損。

由於長線計，優質股的增長力，一定優於債券這類投資產品，所以2個情況都會令你長線回報被拉低。當然你會話，咁債券升就雙嬴。無錯，但我地唔會去咁估，投資要用一個理性和平衡架策略。

我建議你用現金去等機會，雖然中間會有段時間係白白放左係度，但用長線財富增值效果計算，都會對你較有利。

------------------------------------------------

Q19355：

老師你好， 我想請教聽聞一間企業分拆子公司上市會令母公司股價上升的，但我買了京東集團（9618）後，分拆了京東健康出來上市後，京東集團沒有因此有令其股價上升

反而下跌，這令我費解想不明白，請老師有空回答吧，謝謝。

龔成老師︰

這個唔係一定，其實我地投資，著眼點應該放係企業本身架質素和長線行業發展上。這些跟企業質素無關的事情，我地唔應該考慮。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。

過往的財務數據，收入每年都是20%左右增長，2019年收入為5700億人民幣，已經有實質的盈利，用佢2019年盈利為120億作初步推算，現價唔平。

從質素上，這股不差的，但估值上就不算平。如果佢佔你組合唔多，現貨長線持有就可以。

如果市場認為佢分柝出來後，反而無左一些優質資產，就會令股價跌。但如果認為佢得到資金後有更好的發展，就會升。

------------------------------------------------

Q19356：

今年32歲。穩定月入六萬

我由今年2,3月開始積極入貨（可惜初初未認識龔sir, 有少少亂買）。

現有既貨：

762 , $4.76 ~ 22000 股
9988, $263.8~ 300股
005 , $43.15 ~ 1200股
1177, $7.4 ~ 7000股
285, $22.72~ 1000股
1810, $22.5 ~ 600股
788 , $1.32 ~ 26000股
1833, $100.5 ~ 200股
1038, $37.5 ~ 500股
2382, $ 152.1~ 39股

有10 萬現金。打算如果762, 1177, 788 同1833 再keep 住跌的話，會用埋黎加注。

當日心諗恆指昇我都會跟住有相應既回報。但到左今時今日，帳面仲係蝕（未計939, 我真係蝕住走左蝕$8000）。

其實有d 心灰，想聽下龔sir 意見

龔成老師︰

恆指升，唔代表所有股票都會一齊升。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增長為主。匯控（0005）只是收息股，增長力唔高，唔適合你。

組合中，除了中國聯通（0762）和長建（1038）係較平穏外，其他都波動性較高的潛力股。佢地雖然有質素，但波動性略高，不宜持有過高比重。

未來時間，你應該加大"平穏增長股"的比重，咁你個組合先會較平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

另外，平安好醫生（1833）有質素，但業務不確定性較高，暫時唔建議心急加注。

雖然現時帳面係虧損，但只要調整翻好個組合，長線相信都會有理想回報。

------------------------------------------------

Q19357：

龔sir, 你好，最近終於跟先生買了第一層物業，看了樓都差不多成年，見疫情下樓價依然看似穩定而本身租樓有需求便入市。

可惜未能如你教導般找到低市價一成的荀盤，只是低2-3%便入了...現在向銀行申請按揭中，想請教：

方案1：申請85%按揭，剩餘約30萬元資金作股市投資，如盈富、領展等（不擅投資，求建議），
希望2年後轉按時回報能高於按揭息率

方案2：申請80%按揭，裝修後剩餘無幾，每月供樓後有1-2萬收入餘額作儲蓄，再作股市投資

龔sir未知哪個方案較好呢？謝謝!

龔成老師︰

現時按揭息率依然係有個較低水平，我建議你用方案1，盡量留多一點資金在手。

現時大市只是合理區，30萬資金可以先投入一半，用"分注"形式，慢慢買入以下平穏增長股。餘下一半就等大跌市出現，才大力掃貨。

用盈富（2800）計，長線都會有8-10%回報（連股息再投資），足以跑嬴按息。但留意2年而個時間唔長，回報會相對波動。但只要你係長線持有，咁就無問題。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

不過，你唔好太心急入市買股，等完成整個按揭過程先，因為你要買過6成要買按保，不確定性較高，所以要預留多d資金。等完成過程先。

------------------------------------------------

Q19358：

龔老師，去年看了你多本書後，叫細佬入1211比阿迪同阿里巴巴，佢存款不多但也賺了十萬蚊。

我代他感激你！你的分析及眼光均非常精準。

佢四十歲人才開始發奮工作，在順豐速運工作，現終於積存了十八萬，謝謝你。

另我逼佢每月5000蚊月供煤氣、盈富儲錢，請問現有資金有什麽其他選擇？我只叫他抽了一手萬國數據。另外你最近出了的新書是什麼名稱？感謝!!

龔成老師：

能夠幫倒你細佬就好了，除了月供外，佢可以先動用9萬去"分注"買入以下平穏增長股。餘下9萬，就等大跌市才出手，入平貨。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

盈富（2800）可以長期月供，煤氣（0003）都可供，但金額應較盈富少。

萬國數據（9698）主要通過可變利益實體在中國內地及香港從事運營數據中心，以提供託管服務、管理、諮詢等服務。

初步睇佢都有投資價值，但係此股則上市，可參考數據唔多。而且集團過往一直在燒銀紙狀態，未有盈利。而是市值郤去到過千億，當中主要都係"估"佢將來發展。

當將來發展不似預期，就會出現較大回調，你要明這個風險。此股可持有，只是不宜太大注。

我最近的新書《5年買樓4部曲》。

------------------------------------------------

Q19359：

成哥
想問有無聽過銀行同保險公司合作

借一球 去買一隻有保值回報的基金
借一球 息H+0.8%+0.25%

大概1.2-1.5%
但基金保證回報 3.2%
所以offset利息後

有19尼回報
有風險嗎？

本要出10萬（90萬借銀行）
total 100萬買基金

龔成老師：

兩個風險，第一，H如果上升，你的資金成本會增加，令你回報減少，甚至出現虧損。

第二，該基金的回報是否保證，你一定要問得好清楚，基本背後有那些風險。又或如果你中途賣出有那些問題。

------------------------------------------------

Q19360：

龔sir,有事請教，之前投左1M係股市，現在眼見樓市下調，本來打算樓換樓,但彈藥未夠，想轉投買細價樓收租，計過如果買3、4百萬的樓加其他雜費，用首置約花80萬左右，計過收租回報約3%.

正在考慮到底keep住留優質股或買樓？

矛盾因素：老公現供樓貸款2百萬，我倆收入穩定，兩人月入五萬多，月供萬七，買左樓儲錢能力或現金流大減

未來一年會生小朋友，支出大增，但疫情過後樓價又升怕更難買到樓.我應該點揀？點部署長期計劃？

我最近對澳門樓市吾太樂觀，樓價升幅太大，有泡沫的危機感，普遍澳門人兩萬元的收支，唐樓約3M起、十幾年樓5百幾約5、6M，8百呎以上8M以上，而租金6千至萬鬆

用嚟投資回報率吾高，賣樓扣除成本價格上升有1M先叫有賺，新樓推出好快有出租盤，投資客多，現時買入估計要捱一年，疫情過後外僱回流，租客先會多，我要去博嗎？謝謝

龔成老師：

我相信澳門樓，有自住的價值，始終澳門都是一個地少人多的地方。但以現時的回報水平，以投資的角度，只是一般。

如果你資金不是好多，就唔好心急買樓，反正你現時都有物業自住，買樓有一個好重要的原則，就是「供得起」。

比起樓價升跌，你是否供得起會更重要。如果計過數，支出太大，就等多幾年先。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19081-Q19100）

Q19081：

阿sir你好，知道你貴人事忙，但都好想講個好消息你知，我人生第一次股票賺了6位數！雖然只係賬面數，但第一次見到真係好興奮。

我係上年開始投資股票，今年三月大跌市時把握得唔太好，錯失了好多機會，事後明白到投資知識真係好重要。

之後就開始不停睇書，除左阿sir嘅書，我都睇左好多關於投資理財、致富思維嘅書，真係獲益良多，我好認同阿sir成日講知識同財富係成正比的。而家上緊阿sir股票班，相信上完一定可以再提升投資實力。

一年前的我諗都無諗過可以投資股票賺到10萬，而家我好相信自己可以達成財務自由嘅目標，我定了短期目標35歲前有100萬股票資產（今年31），長遠目標45歲可以財務自由提早退休，我相信自己可以做到，到時再講好消息你知。

差啲唔記得講，我好慶幸一開始係學阿sir的投資方法去買股票，如果我係學坊間短炒賺差價，相信唔好話賺錢，輸少已經當贏了

龔成老師：

太好了！

我地運用的是「價值投資法」，這方法已經證實賺錢，巴菲特，以及好多基金經理，都是用這方法，所以，我地行的方向最正確。

知識同財富成正比，這是必然的，你要加油！保持進步。我相信你一定可以完成目標的！

------------------------------------------------

Q19082：

龔先生，你好，我現年31歲，最近開始回港工作，現在月入$24700，比家用5000，自動轉帳比媽咪，諗住幫佢買股票增值，自己可儲$10000，未知如何分配。

有500股9988，平均價$265買入。係滙豐。

澳紙36000剛係滙豐買左JP global fund. 每股10.06AUD，滙豐收左大概1.6%service charge. 年回率3.3%.
自己而家大概有€5000可用，冇打算轉港紙，因為我其實等virus完左，我會返。港紙有大概$15000。

希望你可以比少少意見。謝謝你!

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這年齡，可以投資平穩增長型，如盈富（2800）、美股就VOO，以及小部分潛力股，如阿里（9988）。長遠應該這樣做配置。

至於基金方面，你要睇翻佢有無質素，同時是否合符上述的配置方向。

------------------------------------------------

Q19083：

呀sir, update下你先, 最後我大約$2.4x買左注1830, 估唔到未等佢跌多10-15%已經升番上來, 都係諗住長線投資架啦.

669都向上咁升, 冇增持冇賣出

最估唔到當然係1211, 以幾倍咁升, 暫時賺左一筆唔錯既數, 但到而家都同呀sir你一樣冇賣過, 多謝呀sir!
上左呀sir堂已經2年, 一直奉行價值投資, 好彩既係算比較快已經見到d效果, 真係要多謝你！

另外加上呢幾年儲錢, 算比我當初預算快左, Thanks呀sir!

龔成老師：

必瘦站（1830）比亞迪（1211）都可長線的。要耐心持有。

中短期股價股價永遠無得估，所以投資最好用「策略」，買入後就長線。

------------------------------------------------

Q19084：

hello 老師 你好
8月尾第一次 同你溝通 流動資金得個41k

2個月後回顧 反覆睇左你2本書 股票勝經 同 財務自由行 都好大動力令我自己省啲使 cash flow 已經double up左 80k 唔算多 但起碼意識到個種多啲錢旁身個種喜悅同安全感

**到呢一刻 我都係未開始月供或入市 因為 我有一個疑問：-

你成日都話要買入企業價值 分析企業資料數據

如果早20-30年 香港都係一個英國base嘅結構 有好多可靠嘅法律規範 （啲人會蠱惑但多丁點道德）係ensure資料/數字嘅準確性比大家去分析

如：依家科技股醫藥股 都好chinese base （利申：我對9988一路都有興趣）如果啲數據一路都係造出黎 造到好似好美好 看似無違規 咁咪一路用錯嘅data去分析

如果一個唔覺意 龍門任牙爺擺 一句話你違規 咁咪不升反跌 甚至乜都無？

期待你一針見血嘅見解

龔成老師：

你所講的，是政治與監管的風險，在我地投資上，由古至今，都存在的。

當我地投資時，都考慮到會有這風險。我些風險，我地好難量化長遠對企業有幾大影響，唔知會唔會發生，但我地明白佢地有這個風險。

所以在考慮企業的質素與估值上，有時會因這個風險而打折。

同時，可以建立一個平衡的組合，同一股票唔好多過15%，同一價業唔好多過30%，就能減少集中風險。

------------------------------------------------

Q19085：

龔成老師，我继續有睇你的fb. 明白長線投資企業的概念。但我手上的 mtr, 領展, 857 都是低於我的買入價, 只是優慮它們是否有回升的日子？

另外，請問 883 可作短線定長線投資？
感谢

龔成老師：

上述都是有質素的股票，港鐵（0066）、領展（0823）完全不用擔心，長線持有就得。如果可以的話，你可以加入盈富（2800），組合會更加平衡。

中石油（0857）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

至於中海油（0883）情況與中石油類似。另外，唔建議短炒。

------------------------------------------------

Q19086：

見到有其他網友講「一日一龔成，貧窮遠離我。」足見粉絲對老師的欣賞，亦是我心底認同。

我之所以叫客戶要留一部分金錢學習投資是因為過往自己的理財方向不太好，所以真心希望大家能夠計劃好理財。尤其是這次疫情令一些職業陷入困境，更加速我要提醒身邊人要好好學習理財，為未來自己打算。

自小父母教我量入為出，努力儲錢，我只是採用「加」的模式。

雖然過去有投資股票，結果好似贏粒糖輸間廠的。加上過往聽從保險朋友買保險基金投資，但最終回報並不理想，甚至連保本都無，有些忍痛取回。

現在最大問題是手上還有一大堆97年蟹貨，有些股票更合到連手續費都付不起，可以説是「雞肋」。

明白老師説若不是優質就要放棄，寧願集中回資金轉投優質股，還有機會賺回所失去的本金（希望）。

我好想斬當年的貨，已不存希望。

我希望自己能鼓起勇氣問老師那些股票走勢：去定留，因自己目前尚欠分析能力。

龔成老師：

保持進步啦！我18歲都是由零開始，不斷學習有錢人知識，現時只是運用他們的方法。

在分析一隻股票去與留時，最重要是「企業質素」，不是買入價與賺蝕，要集中分析企業的業務質素、前景。

------------------------------------------------

Q19087：

老師，都想問一個問題，你說要睇組合%多少
一般建議每隻股票不應多於15%

但我唔明的是你計算時以當時市價，為什麼不是我的買入成本價？

因為以我現時情況，1211的表現一定會over這個百分比。

請賜教，謝謝。

龔成老師：

其實最準的計算，是長期的股價平均。

例如持有某股10年，我地唔會用10年前的價，而是用近一年的平均價。

你首先要明白，我地點解會「同一股票唔好佔組合比例多過15%」？

目的是避免過度集中，唔想太多財富集中在同一類別的資產，令我地面對風險，而這個風險，我地會考慮「最新的財富情況」，對你這刻有多大影響。

而你的想法，只停留「買入價」，你與一般散戶一樣，集中用「買入價」「賺蝕」去分析股票與評估風險，但因入價只是一價過去式。

------------------------------------------------

Q19088：

你好，請問平均月入$30000，老婆做小生意，月入不穩定，可能幾千蚊一個月，現住父母供完果層樓，想搬出黎住，手揸$1M，應該買幾錢範圍既樓？

龔成老師：

由於收入有少少不穩，加上唔算好高，因此唔建議太進取。

$400萬-$450萬的物業較適合，你可以做8成按，假設按揭金額$350萬，30年，2%，月供大約$13000，你要計算下自己的負擔能力。

------------------------------------------------

Q19089：

老師，點睇bitcoin呢隻股

龔成老師：

這類虛疑貨幣，我不太認識，所以沒有投資，亦無法比太多意見。因為我只會投資自己熟識的項目。

這些虛疑貨幣並沒有「實質價值」，但就有「交易價值」，當市場上接受的人愈多，佢的價值愈高，但如果無人接受，佢就會一文不值。

另外，當中亦存在著一定的投機價值，這部分愈多，價格就會愈波動，這就要更小心，因為當投機價值變成主導，這部分的價值變化可以十分大，可以在一夜消失。

簡單來說，由於比特幣無實質價值，長遠的價格，就會趨向佢的「交易價值」，你要分析，長遠係咪好多人用。

------------------------------------------------

Q19090：

老師而家都係長線投資?
通常咩時候先會放?

感覺一隻股票就算升左100%,但一直放在到而唔賣，一日唔放一日冇資金到返手，就算隻股升左感覺都唔實在

龔成老師：

如果企業質素改變，或者好貴，就有機會放，但如果可以的話，盡量都唔賣。

港交所（0388）上市價$4，如果你升到一倍，去到$8，用你上述的方法，就算佢升到$400，你都賺唔到。

我過往做銀行、證券行，見到98%客戶，與你有同一樣的想法，睇翻佢地戶口賺蝕數，永遠賺唔到大錢！我唔希望你同普通散戶一樣。

------------------------------------------------

Q19091：

龔sir你好，我係星期六班同學

打算加入水桶1既美股做平衡。
因未熟識選股，我打算加入兩隻ETF QQQ及ARKK.
其中想問龔sir關於ARKK意見。

ARKK係主動型創新科技股既ETF，2014年上市。
ETF包含雲端, 網購,生物科技,自動駕駛,等
其中Tesla佔11%及Square佔6.4%

我對ARKK分析
好處
1.創新科技股潛力高
2.上市至今每年回報率~30%
3.ETF股份約有35-50隻，分散風險
4.流通量足夠

壞處
1.管理費0.75%, 比QQQ及VOO高得多
2.創新科技股處歷史高位，風險大
3.部份股未有盈利支持
4.將來每年回報率比較QQQ及VOO更為波動

ARKK投資策略如下：
現價約USD$95
每月分注各買約HKD$2000
若到USD$70以下
則加大月供數至HKD$2500
USD$45以下
大手買入

QQQ都以類似策略

現在修訂既投資計劃
水桶1 55%
1810,9988,1177,QQQ,ARKK
水桶2 40%
788,3319,823,1928,月供2800
水桶3 5%
941,688 (兩隻待好d價位賣，想做到水桶1,2 64比例)

感謝龔sir寶貴時間回答。

呀sir上堂可以飲暖水或熱少少既水
相信可以減輕喉嚨不適。

龔成老師：

其實方向正確，我覺得這個配置做得不差。同埋上述的分析都正確。

科技ETF的確唔平，現時全球都有這情況，所以用分注買入，長期月供的策略，是較好的做法。但要留意，你都要留下一定的現金，如果股市出現一定的回落，就可以用現金把握到機會。

水桶1、2、3在選股及比例上，都無問題，這是大方向，你照計劃進行就得。

係，要多飲暖水。

------------------------------------------------

Q19092：

龔老師，你好。有以下問題想請教。

這是本人profile
年齡：35 (單身)
職業：公型機構長工
月薪：72000

每月開支：約43500(包括17500 供樓、3000 水電煤管理費差餉、15000家用及8000個人零用)

每月儲蓄：約28500 (當中包括預留每年交稅70000及扣稅年金60000，即每年儲蓄約$21萬)

資產：自住物業，2017年760萬購入，現市值約900萬, 2019年做了轉按，剩餘按揭480萬，年期29年

現金：17萬港元 (當中包括現值約2萬港元的澳元)

股票：約12萬港元[包括 1手領展(0823)(2019年中約$89買入)、2手恆生(0011)(2020年4月$139買入)、1手騰訊(2020年9月$543買入)及3手基石藥業(2616)(2020年11月10.8買入)]

基金：與北美和亞太股票及債券有關的每月派息基金，22萬港元(過去平均年增長約10-20%，約一年前以本金19萬買入)，平均約6厘息，每月收息約$1100

債券：4手iBond

目標：打算3年後和父母(已退休沒有收入)共同支付首期買大約400萬物業(例如新樓開放式單位或屯門/元朗二線區域舊樓)收租

因第二層樓需要支付6成首期加上律師費和雙倍印花稅(因本人和父母各已有物業)和雜費等，預算要270萬，父母可夾120萬，假設本人收入和每月儲蓄不變，屆時本人現金增至約80萬

但仍欠70萬，屆時估計月薪約75000。但如果樓價仍然上升，可能需要更大預算。

查詢：

1) 請問有甚麼方法/工具可達到這個儲蓄目標?

2) 請問有沒有風險較低方法每月賺取更多被動收入?

3) 我現在的現金、股票和基金分佈健康嗎?

4) 本人從來未有投資美股，請問有甚麼美股值得買入呢?

5) 外幣投資方面有沒有甚麼建議?

對不起問題比較多，非常感激!

龔成老師：

1）有3年時間，要利用投資去進行增值，不過，由於3年時間不算長，因此唔能夠太過進取，只能以「平穩增長」作為核心。

2）你現時的方向，應該是「增值」，而不是「被動收入。

其實當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

3）你可以賣出政府債券，同時現金已足夠，之後應該加強股票方面的比例，只要股票有質素，唔好太高風險，已經可以考慮。

當然，到你近買樓的一年，現金比例就要增加翻。

4）你可以考慮VOO，追蹤標普500指數，這是最適合你的，但唔建議一次過入，要分注，慢慢收貨。

5）外幣長期只會貶值，唔太值得投資。

你在之後的財富配置，可以集中增加股票，如果不懂選股，就投資盈富（2800），分注去入，希望財富提升，盡量接近你的目標。

不過，如果要提高完成目標的可能，要加大儲蓄，同時現金部分，要把握跌市機會投資，效果會更好。

------------------------------------------------

Q19093：

Sir hello
我買左659 新創建 6.08入 你覺得佢同太古地產對比邊隻更值得長線持有？我又使唔使轉過去太古地產？

龔成老師：

兩隻都不差的，都有長線投資價值，不過從質素上，太古地產（1972）的優勢，以及發展上，會較好。

你轉部分過去都得。

------------------------------------------------

Q19094：

請問成哥對2606 有咩睇法

3319 佢跌多幾多比較便？

永星，新城悅，碧桂園，雅生活，奧元健康，2606，呢6隻內房股論值值博率同優質程度，你會怎麼排

龔成老師：

藍光嘉寶服務（2606）不差的，佢係中國西南地區及四川省的物業管理服務供應商。

生意與盈利都有一定的增長，財務數據不差，現金流理想，不過規模就不是好大，這點會略有風險，同時持續性發展未必及一些較大型子有背景支持的同業。

整體都有投資價值，現價合理，只要不太大注，這股都可投資，長線持有。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

當然，行業有時會有較大的炒作，股價上落大，要注意風險，而整體是有長線投資價值的。現價合理區中上部。

碧桂園服務（6098）、雅生活服務（3319）較有投資價值。餘下的中等。

------------------------------------------------

Q19095：

請問以我現時資金怎樣達成財務自由？ 因為我就快到40，我又未結婚，又無物業收租，真係好擔心。

因為呢個年紀萬一公司重組，無左份工，就好難再搵。麻煩老師指點

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這刻應該集中「增值」，因為你年齡仍不算大，要好好握握時機。

你如擔心無左份工，就要儲多少少現金，多現金備用就會較安心。

同時，多增值自己，你公司的情況，無得控制，但你就可以提高自己的價值，無論是留在公司，以及出去發展，你自身價先最重要。

------------------------------------------------

Q19096：

你好龔sir,想問你對技術分析有何看法，因為知道龔sir的投資理念是"投資企業"，但無可否認，有的人以技術分析來獲得財富。

我是一個應屆畢業生，現在只有7萬左右的積蓄，就算用複利息的方式很難可以將它滾大

現在這個時代，我在懷疑『找世間沒被人發掘的企業』這個方式還可行嗎？

龔成老師：

我20年前，是技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

至於你所講「現在這個時代，好難找世間沒被人發掘的企業」，你可以睇睇，每一年都有唔少股票，是升1倍、升10倍，點解？就是一年前市場未發現這股。所以，這方法是永恆不變的。

------------------------------------------------

Q19097：

龔sir, 最近一直向身邊親友推薦你的投資理念，其中一位親戚因錯信經紀，虧損嚴重，1200萬的資本已跌了4成，現希望重新出發，便託我向你請教。

圖中是我替他整理後的組合現況，是否大部分股票都應斬倉止蝕?

持有1、5、6、76、82、293、390、632、788、941、1019、1038、1359、1800、2828、2888、3328、3800、6886。

另外他現時55歲，但仍希望資本增長，投資部分新經濟股，如700, 1211等，請問可以嗎? 實在感激不盡

龔成老師：

首先要明白，我地繼續持有一隻股票與否，與買入價無關，因為這只是一個心理因素，最重要是企業的質素、前景。

誼礫控股（0076）、第一視頻（0082）、國泰（0293）、中國信達（1359）、保利協鑫能源（3800）、中港石油（0632），長遠要賣出，要在有反彈時賣。

至於銀行股比例太多，長遠要調整翻。其他算是可以守，但組合增長力不強。

如果佢想有增長力，建議慢慢重組組合，平穩增長股可以佔7成，潛力股可以佔3成。

騰訊（0700）、阿里（9988）、比亞迪（1211）都是方向，但要注意現現唔平，部分要等回先入。另外，可以考慮安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19098：

本人年齡46, 夫婦月入140K, 兩女分為 14 和10歲……自住物業市值8.5M, 尚餘6年$700,000 按揭，每月還$10,000，一澳洲Apartment full pay 年尾收樓作出租用途，3年後可能大女出國讀書住

一香港小單位出租，市值4.7M, 供$13,000 15 yrs 2.25%, 收租$12,000, 另股票市值4M

香港出租單位尚有1.8Mloan amt, 將過罰息期，想轉Hibor plan , rebate 0.8%

想问我轉按借2M, 應該借盡30 years 嗎？
我本人可能明年8月轉做家庭主婦，家庭会少40K per month 收入

現今是否選擇hibor plan 較著數？

另想问老師的課程有否獨立一兩堂可以上？
因太忙難抽時間

龔成老師：

你可以轉按，30年，現時低息，只要適當運用資金，對你有利的。不過要留意，這始終會增加了你的風險，你自己要承量翻，同時，會增加左每月要還款的金額。

你現時的財富組合，較偏重於物業，這會出現集中風險的問題，最好在之後的配置，加強翻物業以外的資產類別，例如股票類。

另外要留意，加按得來的資金，始終原理是借貸，因此不能太進取，投資收息股，增加現金流，是方向。你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

至於課程，由於整個課程都有關連，獨立上的效果會大打折扣，因此，無提供分開上。

------------------------------------------------

Q19099：

我本身是神職人員，由細到大，教會都教導我們不要太看重錢，甚至略為妖魔化了投資，如果在教會講投資，會被人覺得好世俗、拜金、不倚靠神…

到我長大後，自己才開始懂分投資和投機的分別。覺得健康的投資是適切的，特別在香港。你有一句話令我很深刻的，就是「金錢是資本家勞役人民的工具，因此需要擁有優質資產」，就是這句不能認同更多的說話，令我對投資積極起來。

直到最近，香港各方面的環境都急促變化，更令我想快些財務自由，為的不是唔洗做，反而是因為我太熱愛我這份傳道工作，更令我想快d成為自由傳道

即是不受薪地傳揚愛和公義的普世價值。始終受薪的限制太大，也要兼顧平衡各階層的利益。

謝謝你耐心聽我的分享=)

龔成老師：

我相信金錢與宗教不是對立的。

相反，如果有運用金錢的能力，就可以幫到更多人。

因此，我們絕對不要拜金，而是要明白金錢的運作，有智慧地得到金錢，而不會為金錢出賣自己。

加油！

------------------------------------------------

Q19100：

龔sir你好，打擾了，又要向你求教了。
最近有朋友sell 儲蓄保險，聲稱有6%利息，但是要月供1500，供5年。

你覺得我應該做這個決定嗎？

利申：抽到4手ibond, 30000左右股票，20000元左右現金，需要自己給學費（yr1)

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你這刻應該著重「增值」。

當然，在我地理財中，攻守兼備是重要的，所以上述的儲蓄保險，有防守的作用，但要留意，防守部分，足夠就得，不要多。

至於ibond，賣出轉股票更好。

其實，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。