【究竟係咩色？】任天堂Switch Lite新顏色引熱議 最近任天堂推出Switch Lite新機身顏色「藍色」，不過唔少網友就覺得呢隻色應該叫「紫色」，更拎返任天堂喺2001年推出嘅GameCube遊戲機對比，表示當年官方都稱呢隻顏色叫「紫色」，大家又覺得係「藍色」定係「紫色」呢？ 任天堂喺4月13日公布Switch Lite「藍色」新機後，外國網友James Bartholomeou就馬上質疑「呢隻色係藍色咩？」，並拎出任天堂廿年前推出嘅GameCube遊戲機作參考，表示當年官方都叫做「紫色」。 有位充滿科學精神嘅網友就直接搵色碼出嚟對比，指出GameCube同新Switch Lite其實唔係同一隻色，反而更似「紫色」GBA。不過另一個問題嚟啦，究竟點樣定義「藍色」定係「紫色」呢？經過美國雜誌《nintendo life》編輯Kate Gray一輪研究，佢認為Switch Lite新色係介於藍色同藍紫色之間嘅「靛藍色（Indigo）」，不過大部份人都覺得「靛藍色」就叫做「紫色」。 《nintendo life》就舉行咗個投票，現時有42%人認為係「藍色」，8%認為「紫色」，33%認為「靛藍色」。唔知大家覺得呢應該係咩色呢？ #任天堂 #SwitchLite