【辱華？】聲優茅野愛衣參拜靖國神社 遭中國網民炮轟 日本知名聲優茅野愛衣，日本國內外都有唔少粉絲，曾聲演多部知名動畫，例如《罪惡王冠》、《我們仍未知道那天所看見的花名。》、《冰菓》及《刀劍神域》等。但因為今個月11號（農曆年三十）參拜靖國神社，引起一眾中國網民炮轟，怒指佢「辱華」。更有網民異想天開將最近日本地震同佢參拜靖國神社混為一談，話茅野愛衣去完神社祈福就帶嚟7.3級地震。面對中國網民口誅筆伐，茅野愛衣最終選擇道歉，但中國網民好似唔收貨喎，相信佢往後作品都好難引入中國市場。 事源喺2月11號，即係農曆年三十，茅野愛衣喺廣播節目《工作之餘祈願》大爆當日去咗參拜靖國神社。茅野愛衣表示，由於工作地點就喺靖國神社附近，見有時間就去咗參拜，更話靖國神社係一個令人心情好嘅地方，令大家可以好好鞠躬行禮。消息一出，各大中國平台包括bilibili、微博、豆瓣等網民即刻鬧爆佢，揚言要抵制有佢聲演嘅作品，更求下架所有動畫。 茅野愛衣尋日就喺Twiiter表示，已經將相關廣播節目下架，對於自己「認知不足」而為各為粉絲帶嚟不便深感抱歉。但各位中國網友好似唔多收貨，更留言指「參拜靖國神社行為嚴重觸犯我國底線，傷害人民感情，也沾污了二次元這方淨土。支持我國對你完全封殺，將所有參與配音作品下架。」喺微博亦有唔少人認為佢道歉欠缺誠意，更諷刺佢根本覺得參拜靖國神社無錯，錯就錯在被大家發現。 #茅野愛衣