公主求愛記（上） . 作為一個公主，我一直喺城堡等待愛情。 . 而今日，我終於等到啦！ . 一個英俊瀟灑、威武不凡嘅勇士，身披金甲聖衣、腳踏七色彩雲，高舉寶劍，向住凶猛嘅黑龍衝過去！ . 黑龍向佢噴出一口火焰，佢靈巧咁避過...... 咦，佢避唔過，火焰燒爛咗佢條底褲，空氣中瀰漫住BBQ嘅味道。 . 「好痛啊！我唔玩啦！」佢慘叫一聲，連滾帶爬咁逃離咗城堡。 . ， 我即刻衝出去，扭住黑龍隻耳仔：「小黑你做乜噴火啊？係咪覺得自己好有型啊？」 . 見到佢我就嬲，唉，小黑係母后臨死前留畀我嘅， . 母后話，男人都有狩獵心態，辛苦得番嚟嘅女人先會珍惜，所以就畀條黑龍我。 . 勇士打敗黑龍，救出美麗嘅公主，從此幸福快樂咁生活落去......劇情應該係咁。 . 但係小黑太唔爭氣，我忍唔住鬧佢：「你自己講，第幾個勇士俾你嚇走？」 . 「你話要考驗佢地，我點知佢地咁細膽啫。」 小黑扁晒嘴：「我係一條黑龍，黑龍就實會噴火......」 . 仲駁嘴，真係愚子不可教也。 . ， 不過我諗咗好耐，時代唔同咗，對於依加啲男人嚟講，黑龍呢種超自然生物，真係幾恐怖。 . 要搵到一個打敗黑龍嘅男人，哪怕黑龍放水，都相當唔容易。 . 我可以等，但我嘅青春唔可以等。 . 我尋晚發咗個惡夢，夢見我嘅勇士終於出現，佢勇敢咁打敗黑龍，衝入城堡。 . 我地四目交投，然後佢問：「老巫婆，你將公主收埋咗喺邊？」 . 我當堂嚇醒咗，嚇到膠原蛋白都流失埋。 . ， 咁樣等落去，我嘅惡夢可能會成真。 . 好彩，小黑係一隻識變形術嘅黑龍，我就叫佢變身，變成一啲無咁恐怖嘅動物。 . 小黑嘅變形術，要閉關念咒施法一日一夜，先可以變身。 . 我等咗一日一夜，等到一隻......吊睛白額虎！ . 小黑沾沾自喜：「依加我又唔識飛，又唔會噴火，隨便嚟個武松咁嘅勇士，就可以赤手空拳打低我啦。」 . ， 我繼續喺城堡等，等啊等啊等，我嘅武松都無出現，可能老虎都係一種太恐怖嘅動物。 . 於是小黑又變身，由老虎變成豹，無幾耐，再由豹變成狗。 . 我望住眼前嘅黑狗，唔好話勇士，我凶狠少少，拎把掃帚都可以打飛佢，我估今次，我嘅勇士會嚟「拯救」我啦掛？ . ， 小黑守喺城堡門口，幾日後，有個男人經過：「聽聞城堡有一位好靚嘅公主，只要打低黑龍，就可以娶到公主。咦，黑龍呢？」 . 呢個時候，小黑就衝出嚟，好凶狠咁向個男人吠叫。 . 我個心跳得好快，勇士嚟啦，只要打低小黑，我就屬於你㗎啦！ . 點知個男人望吓小黑，嘆一口氣：「唉，得隻流浪狗，個城堡點會有好嘢。睇嚟我行錯路，公主唔喺呢個城堡。」 然後佢轉身就走咗。 . ， 果一晚，我又扭住小黑隻耳仔，檢討今日嘅失敗：「你係咪唔夠凶狠啊？都表現唔到你係守護城堡嘅惡犬。」 . 小黑好委屈咁講：「公主，我依加嘅身型，同呢座城堡真係唔多夾。」 咁又係，如果我由城堡最高點望落去，直情見唔到小黑。 . 寶物嘅珍貴程度，同Boss嘅實力，應該係成正比。 . 既然我將黑龍換成黑狗，我就唔應該再做城堡中嘅公主。 . ， 於是，我化妝成村姑（其實只係落妝），搬咗去一個小村落。 . 每日，我就帶住小黑喺森林流浪，平時係放狗， . 但一聽到有人行近，我就會大叫：「衰狗，唔好咬我啊！救命啊！」小黑就追住我跑。 . 等咗一個月，路過嘅人，包括咗用拐杖嘅阿伯、其他村姑，同冷血嘅男人，居然無人把握英雄救美嘅機會。 . 待續... . #短故 #短篇 #小說 #陳美濤 #廣東話 #粵語 #tomatochan #公主求愛記