#gfmurmur9064 我係中六學生，係雙性戀，鍾意咗個女仔朋友(下稱A)1年幾。 我同A初識係喺中三。嗰時開學我同A一齊坐，覺得佢普普通通，雖然一齊坐但唔多嘢講，客客氣氣咁，並且基於性格上嘅唔同(A外向我內向)，我諗住唔會同A做到朋友嘅，然後坐咗1個月就調位，我同A就冇再有咩交集。 升上中四，我同A又一齊坐。呢次因為上年識咗嘅關係，我哋比起上年都多咗嘢講，亦都因為咁，我慢慢了解到A為人，發現佢幾幽默，又好直率，想笑就笑，唔會遮遮埋埋驚俾同學話。我都對A漸漸有啲好感，但呢啲只係屬於朋友上嘅好感。後嚟，1個月之後我哋又再調位，再次冇咩交集。 到到上年即係中五，我又再同A坐埋一齊。今次基於某啲原因，班主任話就直接坐呢個位到中六。因為咁，我心諗點都要同A熟啲，費事成年冇嘢講就好尷。好在前2年都有坐過一齊，算係frd frd哋，我哋都好自然咁傾到偈。 隨住我同A一齊坐得越耐，慢慢咁我認識佢越多。例如上面講話A好幽默，喺呢次我仲發現A好鍾意講爛gag，成日令到我笑唔停口；A都成日r我吹水，佢一r我講嘢，我就冇心機聽書，淨係想聽佢講嘢。以及嘅係，我唔知點解見到A笑，每次都有種心動、覺得佢笑嘅樣好charm嘅感覺，我甚至專登網上查啲笑話同爛gag，就係想返學同A講，引佢笑。 喺呢啲事情下，我漸漸覺得自己好唔尋常。點解平時笑點高嘅我，一聽到A嘅爛gag，我會笑唔停口？點解平時認真上堂嘅我，會寧願聽A講嘢都唔聽書？點解見到A嘅笑，我會有種好心動嘅感覺？ 我越嚟越覺唔對路，亦都衍生出一個答案: 我鍾意咗A。 初頭我上網做啲性向測驗，個結果都只係話呢個係啱啱識新朋友嘅感覺，過一排就唔會咁㗎喇。但係情況啱啱相反:我對A心動嘅感覺越嚟越強烈。 例如有次參加咗個活動，A做組長，組入面有2個男仔因為私怨而有拗叫，甚至諗住打起上嚟。原本我只係食下花生，唔想理佢哋，但係A就好大聲喝佢哋:「唔好再吵，有咩返去吵！你哋唔識尊重嘅話，返去早唞唔送！」嗰2個男仔即刻收咗聲，都冇再諗住打架。喺嗰刻，我覺得A真係好charm，覺得佢好尊重唔同嘅活動，亦喺必要嘅時候係會好認真，而唔會仲喺度扮幽默；同時我亦都好羞恥，自己仲掛住食花生，就下定決心改變自己，以令到A唔好覺得我做事唔認真。 仲有有次我有幸同A出街，嗰時佢緊係唔係校服look而係行街look。當我見到A平時返學冇特意搽嘅嘴唇，喺呢次有搽紅，我直情差啲面紅晒，同有想咀佢嘅衝動，更加唔洗講見到A嘅衫褲係覺得幾咁性感。我仲記得嗰時搭地鐵，A喺度碌IG，我就一直𥄫佢個波(當然A冇發現，掛住睇手機)。 喺呢啲事情中，我都幾肯定自己唔係純粹對A朋友上嘅好感，而係有鍾意佢嘅好感。 確定咗我嘅性向同對A嘅鍾意之後，我就更珍惜中五嗰年嘅時光，多啲同佢傾偈、同佢講笑話同爛gag，希望佢心裏面都當我係朋友。本身我都諗住只係咁，因為A有條仔，中二已經喺埋一齊，我都唔想拆散佢哋，只係諗住做A嘅朋友。 但係，意料之外，A嗰年後期竟然同條仔散咗。我瞬間好開心，諗住自己都有機，但係同時又諗，唔知A係咪雙性戀:如果A唔係，咁我表白都冇用。其實A有講過一啲嘢令我覺得佢都可能會有啲雙性戀，但我又唔敢博。 猶豫咗好耐嘅呢段期間，我都好留意A身邊嘅同姓同異性。有時見到A嘅其他朋友，見到佢哋一齊傾得好開心，我又驚A鍾意佢個朋友；之前A又試過同一個男仔行得好埋(我諗住係自己諗太多，但其他同學都係咁認為)，我又驚佢哋會一齊。好彩最尾唔係呢回事，我都鬆咗口氣，但係成日咁疑神疑鬼，我真係好辛苦... 到咗今年中六，我終於唔係同A一齊坐，而係坐佢嘅右後後面。因為咁，我又會成日𥄫住A，見到佢同佢隔離個女仔傾得好開心嘅時候，我又會好唔gur，驚佢唔記得我。 喺我遲遲未同A表白嘅情況下，近排我發現咗——A好似同咗隔離班一個男仔一齊！！我個心瞬間真係穿咗個窿咁，真係好down… 其實如果A冇同之前條仔散咗，我諗我唔會咁傷心，只係會希望同到佢做朋友就夠。但係我又唔應該怪A俾咗個希望我，佢邊知道佢會同之前條仔散？而且我都冇可能要佢為咗我，而永遠唔再搵另一半，更何況佢都唔知我對佢嘅心意...我呢一切都知道，但係我真係覺得好難受，好想同A講我對佢嘅感覺，即使佢又再有多條仔都好... 有冇人可以俾俾意見我應該點做... ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig