#在日落前交換日記
星期一至五 5-6 叱咤903
阿檸 - 毒檸王國
【努力地即刻駁嘴！！！！】

邏輯系學生 檸

早排喺網絡討論區有句說話又紅透一時，就係「唔講咁多，即刻駁嘴」。事源係咁嘅，有位網友開咗個post，話自己由細到大成日搏咀，唔駁就身痕，所以想發表一啲講完出嚟會激死屋企人的說話。佢製作咗幾張類似網上語錄，則係博人噤個share制嘅長輩圖，上面寫著佢自己嘅搏咀金句，而喺呢個post嘅最尾，佢就好瀟灑咁留下咗一句「唔講咁多，即刻駁嘴」。

點解會紅透一時呢？當然係因為佢搏咀嘅內容。舉個金句例子，例如：
「人哋話，條條大路通羅馬，我就話，條條大路通陰間。」
係咪唔知佢講乜呢？冇錯，就係呢一種一啲都唔好笑，又唔知佢究竟做緊乜嘅金句，令佢紅極一時，尷尬程度直逼阿輝，家姐，faction TV呀等等，大家都替佢尷尬，甚至有人講出一句，「我哋都係喺討論區睇下你個post啫，諗起你啲屋企人都覺得慘。」

嗱，就唔好誤會，講起呢件事，並唔係侮辱你，而係呢，我覺得你嘅思考同呢位網友都有類似嘅元素，不過你技勝一籌，至少合邏輯呀下，令到我可以喺人哋神聖嘅婚禮上燃燒少少腦細胞，令我諗下呢啲所謂諺語，都真係有令人即刻駁嘴嘅空間。

細細個嘅時候，屋企人成日唔比我哋駁咀，但係其實駁咀係一種批判思維嘅訓練。就算係駁咀駁到條條大路通陰間嘅尷尬地步，都唔可以放棄，要keep住思考，keep住尋找其他人講嘅說話入面嘅罅隙，喺反駁同建立之間，就會搵到自己嘅價值！每個人都要渡過尷尷尬尬，「唔講咁多，即刻駁嘴」嘅學習階段，先至可以駁咀駁到好似你咁爐火純青，令人喺婚禮入面陷入沉思嘅，各位小朋友都要努力呀～

語言系學生 Oscar

圖片來源：
LIHKG討論區
會員：Saul_Niguez
主題：[搏咀]咩叫"條條大路通羅馬"?