【足球】香港16歲女將陳頌文加盟曼城 去英國踢波可以話係所有足球員嘅夢想，而唔少香港人亦曾經或正在為呢個夢想而努力，早年有陳肇麒去熱刺試腳，近有戴偉浚曾加盟狼隊U23，而最新就有年僅16歲嘅女將陳頌文 (Karri) 加盟曼城U19。 據報，香港土生土長嘅Karri自四歲就開始踢波，曾於香港阿仙奴足球學校受訓，後來加入公民女子足球隊，曾經於同一年贏得U18聯賽冠軍、自己成為神射手兼MVP；同年協助中學校隊拎埋學界冠軍，自己同樣係神射手兼MVP，實力完全超班。而喺上年更升上甲組成為正選，協助球隊奪冠。 另外Karri亦曾入選香港女足成年代表隊，去年於女子土耳其杯正選上陣。 據知Karri於今年7月隨家人移居英國，之後就去咗曼城試腳成功兼正式加盟其U19女子足球隊。希望佢能夠有好成績啦！ 圖片：網上圖片 #足球 #陳頌文 #香港 #運動員 #公民 #曼城

作為一個由連尼加+加斯居尼年代開始做英L嘅人嚟講，實在有太多嘢想寫，但係由於好眼瞓，再加上聽朝仲想睇NBA，而家就簡單講幾句先啦。 美斯，球會級錦標同個人榮譽幾乎乜都贏過晒，偏偏國家隊嘅冠軍就由出道開始等到尋日；阿根廷，先終於唔駛再做亞軍廷。 唔計奧運，阿根廷等一個大賽冠軍，等咗28年。 阿根廷嘅守門員馬天尼斯，喺阿仙奴坐到籮柚都變形之後轉投維拉，終於證明到身價；到幫埋阿根廷捧盃，佢係足足用咗十年時間。要用十年，先證明到畀所有人知自己唔係某啲球迷口中嘅廢龍、佢係一個有級數嘅龍門。 尼日利亞國家籃球隊，2012倫敦奧運輸73-156畀美國 — — 足足輸83分；2016年再碰頭，都輸44分。 尋日，佢哋喺熱身賽，贏美國90-87。 CP3，打咗16年NBA，轉到嚟太陽，今年先第一次打入總決賽。 太陽本身等入總決賽，都等咗28年，而佢哋場數領先緊2-0。 修夫基，1996年歐洲國家盃射失12碼，英格蘭四強出局；到以領隊身份帶領代表隊，結局相同。期間相隔咗四分一個世紀，足足25年。 英格蘭，對上一個大賽冠軍，係1966年贏世界盃，到而家55年。 地球上面幾十億人，總有人贏在起跑線，總有人一出世就係人生勝利組，不過，唔多。感激呢個世界上仲有體育；體育一早話畀我哋知，勝利同成功，往往係屬於一直堅持、一直冇放棄嘅人。 唔好誤會，冇人保證堅持一定會成功，呢個世界冇嘢保證成功；惟一可以肯定嘅，係每遇上挫折就放棄嘅話，一定會失敗。 堅持呢樣嘢，一啲都唔好玩，仲可能好辛苦，更加可能會失敗多好多好多次。 每當覺得堅持辛苦嗰陣，諗下輸，輸，仲慘過堅持；只要堅持，就永遠都仲有機會。 呢啲，就係體育同運動教識我嘅事。 作為球迷，真係好希望、好希望英格蘭下次可以行埋最後嗰一小段路。

【運動】15支球會另組「歐超聯」 歐足協揚言封殺 12支歐洲頂級球會於今日發出聯合公告，指會自組「歐洲超級聯賽 (European Super League)」，由該12支「創始球會」共同管理，成為新嘅「週中賽事」。而目前主辦週中賽事——即係歐聯同歐霸——嘅歐洲足協就揚言會全方位封殺「歐超聯」球隊。 「歐超聯」嘅12支創始球會有來自英超嘅曼城、曼聯、利物浦、車路士、熱刺及阿仙奴；來自西甲嘅皇家馬德里、巴塞羅那及馬體會；以及意甲嘅國際米蘭、AC米蘭同祖雲達斯，全部都係當地最受歡迎、最頂級嘅球隊。據公告指，眾多球隊過去數年都曾與歐洲足協就「提升比賽質素」及「增加財政收入」兩方面進行商討，但就未能達成共識，於是12支球隊就決定另組歐超聯。 歐超聯預計8月開賽前會有多三支球隊加入成為「創始球會」，另外又會有5隊以資格賽形式參加，總共20支球隊參賽，8月開始兩組雙循環主客賽事，之後會有淘汰賽，單場決賽就喺五月舉行。據報歐超聯估值達46億歐元，平均分每隊都拎到兩億幾，而去年歐聯冠軍 (連同晉身各級淘汰賽) 嘅獎金最多都只係一億歐元多啲啲。 好明顯，呢12支球隊就係因為同歐洲足協分贓不勻而決定另外爐灶，而失去呢12支球會，歐聯、歐霸嘅叫座力及吸金力亦會大減，所以歐洲足協事後就發表強硬聲明，話歐超聯係「少數球會基於自身利益而成立」，話其他協會成員會一齊反對，仲會用一切方法封殺參加歐超聯嘅球會，而參賽球員亦可能會被禁參加任何國內、歐洲或國際性比賽，甚至被剝奪國家隊資格。 一邊係求 (更多) 財嘅大球會、一邊係建制中嘅既得利益者，兩邊爭鬥嘅結果相信會從此改變歐洲足球比賽格局。